FROM AUSCHWITZ | Rachel & Walter Müller

Thla tam tak hmuhsit leh hnuaichhiah na an tawn hnu chuan zankhat chu Gestapo- paruk hi thâwm na tak nen Weizman- inah chuan an lut a, thlabar tak a lo en tu chhungkaw zîng a an pa ber Moshe Weizman- chu an hotu ber chuan a ho te hnenah chuan man tûrin thu a pe nghal a.

Chu Juda pa chuan ṭan a lo la ngam reng reng lo, dim lo tak in a nupui fanau te'n a ṭap chung a an kuah lai chu phih tho lawp in, an hnungkhirh sawk sawk a, pawnlam ah an hnûk chhuak ta hawn hawn a.

German Police- hovin a chhungkaw pa ber an man aṭanga ni hnih na ,zan tir lamah  Juda ho chenna lai bialah chuan Sipai Truck- an rawn inzui duah duah a,  silai kap ri leh na tuar thawm te an ri zawih zawih a, Ruth Weizman-chuan  a fa te  pahnih chu kuahin sofa ah chuan thlabar tak hian an ṭhu ṭhap a.

An chenna kiang a Juda ho an nghaisa anih an ring thiam mai.

Rei lo te an an kawngkhar chu pawnlam aṭangin an rawn chhuih hawng bur a, Gestapo sual hmel tak tak silai keng pali hi an rawn lut zui nghal a.

"Min rawn zui rawh u, tunah," tiin pakhat chuan nufa thlabar tak te hnenah chuan a ti vîn tuar a.

Chêt pawh an che ṭha ngam lo, chung police ho chu hlau takin an en ṭhap a, chutih laiin, pakhat chuan, " In thawmhnaw inla telkhawm lo em ni, tunah in chhuak dawn la khawm nghal vek rawh u, hmanhmawhin." a tih leh tâkah chuan ṭap zawih zawih chungin an thawmhnaw leh an tlereuh thil hlu deuh te chu an zin ip leh thingrem ah te chuan chuan an khung sawk sawk a, Weizman fanu tleirawl Rachel- chuan pian hlai takah a thawmhnaw leh lehkhabu te fûnkhawmin a bâwk a, nau puak dan ang deuhin a hnung ah dahin a hmalamah a suih bâwk leh a.

An in lakkhawm zawh chuan Gestapo- ho chuan pawnlamah an khalh chhuak ta thuai a.

An in kiang a Juda ho pawh an thawmhnaw nen kawtthlerah chuan an lo awm nual hlawm a, chhungkaw pa ber leh chhungkua a kumtling tawh mipa chu a hma lawk a an lo hruaibo tawh avangin nunau ho an ni deuh ber tawh mai.

Sipai Truck- ah chuan ṭawt takin an hnawh lut  zung zung a, pitar leh putar, kum upa lam deuh te erawh chu motor kiangah an din tlar tîr a, Police ho chuan an kaphlum ta vek hlawm a, an vaiin chulaia an kahhlum zât chu mi sawmhnih lai an ni.

Truck-a an khung zawh chuan chulai hmun chu an tlan chhuahsan thuai a, an kahhlum tâk te ruang chu engtinnge a awm tih tuman an hre zui tawh lo.

Darkar hnih vel an tlan hnu chuan Rel chawlhhmun lian vak lo hi an thleng a, Truck- a ṭang a an han chhuk chuan Juda mi za chuang fe hi chulai hmunah chuan Barbed ware- hung chhungah, kawtthler ah an lo khungkhawm tih Rachel- chuan a hmu a, hmun tinah German- sipai silai keng an lo awm bawk a.

Chung Juda dahkhawmna ah chuan thleng thar ho pawh chu an thawmhnaw nen an dah lut ve nghal bawk a.

Zankhua in chulai chuan an awmtir a, a tuk varṭian a ran phurhna Rel sei tak a lo thlen chuan Juda ho hmun thum a ṭhen a hmun hnih lai chu an êk beng leh nghek a. 

Juda mi an man khawm an dah lailawkna Lodz Ghetto- lam panin an chhuahpui leh ta a. Hetih lai hi kum 1942-kum tir lam a ni.