TRINITY HI BABYLON SAKHUA AṬANGA LO CHHUAK A NI LO

THUHMA :

He thu ka rawn tarlan hi Kristian zirtirna, Trinity- leh Oneness- inkar a in hnialna tam tak hring chhuak tu pakhat a ni a, in hnialna tâwp thei lo an tih zîng ami a ni.

Ka thuziah lai pakhat, Ancient Civilisation- chungchang a Sumerian leh Akkadian ho te khawsak dan, an pathian biak chanchin bâk ah Mythology leh History te, Bible nen a an in relate- na hrâng hrang ka buatsaih lai mêk hian tun a thupui bîk hian ka rilru a luah hneh êm ém mai a, tichuan a bul theih tâwp aṭanga  chhuiin he Kristian zirtirna huang a a rawn luh dan te, thudik nge ni a thu vuvûk mai tih te ka'n dapkhawm a, a kimchang tâwk lo viau nâ in ka hun neih dân in a daih ngang bawk si lo, tichuan he thu hi chhui chiang ve a, thil nihna dik tak lo haichhuah belh zêl tûrin chhiartu zâwng zawng te ka sâwm tak meuh meuh che u a ni.

Babylon Trinity chungchang hi Kristian hmasa lam a kohhran Roman  khân lachhawngin, Catholic- kohhran i'n a tun a Nu thianghlim Mary- leh a fapa Isua nen, Pa pathian- te ho an biakna hi a ni e an ti ṭhîn a, chu chu tun a Trinitarian kohhran ho zirtirna hi a ni e tiin Oneness lamin an bei a, he theory hi a lâr in mizo ṭawng a ziak tam tak chhiar tûr a awm a, chumi ina a ken tel, Christmas te, Christmas Tree leh Mistletoe bakah Easter day, Easter rabbit, Easter Egg.....etc  te pawh he Theory vâng hian a lo pian phah bawk a, chung ho te pawh chu a bulṭhûm aṭangin la buatsaih leh kan tum dawn nia.

BABYLON TRINITY THEORY :

He Theory- lâr tak mai hi mizo ṭawng a chhiar tur tam tak a awm awm kan tih tawh kha, mahsela tu ziak nge ka hre mai bîk lawk lo a, he mizo ṭawng a ziak ho thu lâkna a ni em chu ka hre lo a, Rev. Edir Macedo- Universal Church of the Kingdom of God- hotu pa hian a website ah a ziak nual mai a, chu bâkah Association for Biblical Research- website ah te he mizo ṭawng  a lehlin nen a in ang chiah hi ka hmu bawk a, ka lehkhabu kawl lai engemaw zât ah tawite te a tarlanna a awm nen, chung ho chu ka document hmuh te chu an ni mai, mizo ṭawng a ziah ah chuan Lka Chawngthu leh Larrick Ralte- ziak hi an kimchang ber niin alang a, chuvangin a kutziak aṭangin tam tak chu ka lakhawm in thulakna pawimawh ber zing ah ka hmang bawk a ni.

Tunlai ah chuan Internet lam aṭangin  thil tam tak a hmuh zung zung theih tawh a, mahsela he Theory hi chu Ancient religion ah ni lovin, mimal leh pawl website, blog...etc ah te hmuh tûr tam tak a awm nual bawk.

Aw le,  Babylon Trinity- Nimrod, Semirami, Tamuz te chu i han belchiang ang hmiang.

(GEN.10)

Tuilet hnuah chuan Nova fapa Hama, chumi fapa Kusa chuan Pathian dodaltu tur mi chak tak a rawn hring ta a, a hming chu Nimroda a ni. Bible pawhin ‘mighty Hunter’ ti hialin a sawi a ni. Jewish tradition-ah chuan Nimroda chu ‘thuneihna hmang dik lo, Pathian laka hel’ nia sawi a ni a; Book of Enoch (Enoka lehkhabu) chuan Pathian laka a helna chhan hi “an thlahtute tuilet hmanga hremtu Pathian laka phuba lak tum” niin a tar lang a. Mika 5:16 ah pawh Pathianin Nimroda ram chu a tihchhiat tur thu a sawi a ni. Nimroda hi lal a ni satliah mai lova, Puithiam leh pathiana inchhalin, occultic worship zawng zawng tobul a ni a, tuilet hnua Pathian dotu hmasa ber a ni.

Nimroda chuan khaw ropui tak tak Babel (Babylon) te, Assuria te, Ninevi leh Kalah te a din a, a pa thih hnuin a pa nupui, amah hringtu ni bawk Semiramisi nen an innei leh a,a chakna hmangin lal-ah a insiam ta a ni. A dam lai chuan pathian-ah a inchhal a, a nupui Semiramisi pawh chu ancient Babylon lal nu hmingthang tak a lo ni ta bawk a ni.

Semirami- chanchin hi thuchiang tak a awm lo êm êm mai a,  Bible lah chu a ngawi tlat thung a, a hming lanna awmchhun a ngaih chu shinar hi a ni mai. Shinar hi Hebrew thumal a Shammur an sawina a ni a, chu chu Sumer/Sumeria Lalram rawn inṭanna chu a ni ta a ni, scholars te chhuina ah chuan he hming Shinar/Shummer/Sumer/Sumeria hi Sammur-Ammat-i hming daih lohna atan a phuah ah an ngai a ni. He Sumerian hmeichhe hming hi hun lo kal zel ah an hellenised(greek) ta a, Semiramis ti in a lo lar chho ta zawk a ni.

Chhuina a tam em em mai a, chhuitu thenkhat chuan he nu hi Neo-Babylon 820 BCE vel a Assurian Lalna ah an chhui tawp a, mahse a hnuhma han en hian hei mai hi chu a ni teuh lo. Tin, Hming inang hi an tam êm êm bawk a, ancestor worshipping inṭanchhohna bul a ni bawk a, an inngaisang tawn liam liam nge, an hming hi I,II,III.. zâwng hian an kal nasa ve êm êm bawk. Euphrates luikam a hmakhawsang thawnthu zawng zawng ah hian he nu hming in a inphiarbelhbawm chuat vek mai zawk a ni tih hi scholars tam ber pawmdan chu a ni.

 

Tah hian sawi dan chi hnih a lo awm leh ta a, chu chu Semiramis hi Cush-a nupui ang a sawina leh a fapa Nimroda nupui ang a sawina tih hi. Mahse a dik zâwk emaw a awm thei chuang lo.

Tin, Sawi dan pakhat ah chuan Tui pathiannu leh mihring inkar a lo piang ang a sawi a ni a, tuilet tirtu Pathian do em em mai a ni, hetah hian chhui zui tur erawh a vang ngang mai. Engpawh ni se, Erech, khua a nawhchizuar ang a sawi a ni a, chutah chuan Cush-a nge Nimrod-a nen hian an intawng ta ang a sawi a ni. He erech khua hi Ham a nupui, Kaina line(serpent seed?) in an thlahtu khua lo din tawh tu Enoka (gen 4:17)hming chawi a a phuah a ngaih a ni a, chu chu a lo kal zel a Erech, chu chu Uruk tobul a ngaih a ni bawk.

 

Engpawh ni se, Ham-a fapa, Cush-a line hi sakhaw diklo ching chhuaktu, Pathian lak a helna tantu chu an nita hrim hrim mai a ni. Book of Enoch ah chuan Nimroda chu Pathian lak a a helna chhan chu "kan thlahtute lak a phuba ka lakna" a ti ta ngat mai a ni. Nimrod-a hming awmzia hi hebrew thumal marad atanga lokal“rebel/rebellion” tihna a ni tiin Rabbinical thenkhatte chuan an la ti zui bawk. A hming tak ni lovin, a helna avanga a title a nih hmel zawk mah bawk. Mak ve tak chu, chronology chhut chuan Nova line ziding Bible a hming lang chinte hi, Tui a let khan natural death in an thi vek hman tlat zu nia, Tuilet kha an thlatute te zing a damrei ber, methusaela thih kum chiah a ni tlat, Pathian in a nghak a nih hmel em em a ni.Chutichuan an thlatute phuba a lak dawn chuan Nova line lo lam anih a ngai ta tlat a nih chu.Chu chu a dang a awm theilo, a nu lam atanga Kaina line kan puh ta lo theilo a ni, chu chu Serpent Seed, Isua do tu tur leh khawvel tawp a Israel hnam do rawn tu tur an la survive theihdan awmchhun chu a ni ta chiah bawk a ni.

 

Semiramis-i lo chhuahna hi kan hre chiang ngamlo a, Erech khua a nawhchizuar thin tih hi kan hre ta lek mai a nih chu,(sawidan dang ah chuan Nimrod-a sipaite zing a mi nupui, sam buang thang mai  a ni a, chu chu Nimrod-a hian a chhuhsak an ti bawk). Engpawh ni se, a sualna hi a langsar ta em em mai a ni. Nimroda hi Lalpa hma*(against) a sapel chak a ni a, khua a din a, chutah chuan mite a mankhawm a, babel insang chu an sa ta a ni. he babel insang hi Bible ah chuan tuilet lak a an himna atana sak leh an hming tih than nan tih ziak a ni a, brick hmang a sak, bitumen a char leh tlat, water proof a ni an ti bawk. Hei hi Babel tih a Bible a kan hmuh kha a nih hmel a, Sumerian ho te khân he tiang Bebel( Ziggurat) hi tam tak an sa a ni tih Sumerian civilisation lam en chuan kan hmu thei ang.)

 Nimroda chu Pathian Marduka a inti a, Semiramisi chuan Astarte a inti thung. Anmahni pathian a pawm lo tute chu sapel angin Nimroda chuan a pel mai ṭhîn a ni.

 

Semiramisi hming dang, Bible-a lang, hnam hrang hrangin alem an siam a, chibai an buk ṭhin te chu-

Aseri/ Asera (1 Lal.15:13, 16:33, 18:19..

Asterothi (1Sam.7:3,4) leh

Diana (Tirh. 19:24,27,28,34,35) te a ni.

Nimroda chu a hmelmaten an tihlum a, a taksa chan darh vekin a ram chhungah an thawn darh a. Semiramisi chuan Nimroda taksa bung hrangte chu a la khawm leh vek a, a ‘serh’ erawh chu  a bo niin a sawi thung a ni. (Hei hi Hindu hovin Lord Shiva serh ‘shivalinga’ an biakna nen hian lo ngaihtuah zawm u la).

 

 

Chu a serh chu a bo tak tlat avang chuan Nimroda (pathian) chu khawvelah a lo let duh tawh lo niin Semiramisi chuan a sawi a, mipuite hnenah chuan Ni (sun) ah a kal chho ta niin a hrilh bawk a, he ta tang chiah hian Ni pathian biakna (sun worshipping) chu a lo intan ta bawk a ni. Hnam hrang hrangin hming hrang hrang an vuahte zingah heng - Baal te, Baalim te, Bel te, Molech tihte hi a ni (Bible keu thin chuan kan hre nual tawh awm e). A hnu zela he pathian an biaknaah hian bati/ khawnvar an hman phawt chuan Nimroda thlarau chu an zingah a lo tel ve zel thin niin Semiramisi chuan a sawi bawk a ni.

 

Semiramisi chuan thla (moon) chu pathinnu a ni tiin a khua leh tuite chu a zirtir leh ta a, ni 28 cycle chhunga thla bial zan (full moon) chu thla pathiannu chi thlah theih hun, a chi a lo puitlin hun niin a zirtir a. Amah ngei pawh chu thla pathiannu fanu, a hnen atanga lo chhuak niin a insawi bawk a. Thla pathiannu chuan tui (egg) lian pui mai Euphrates luiah a ti tla a, chu thla tui (egg) atanga lo piang chhuak ta chu niin a inchhal ta bawk a ni. Hetia artui atanga lo piang nia a inchhal avang hian artui chu nun thar leh chi thatna entirnan leh an pathiannu semiramisi symbol atan an hmang chho ta zel a, Babulon atanga darh ta Rom hote, Druid hote, Nothern Europe, China leh Japan ramahte an uar chho viau bawk. Setana’n a tanpui nasa viau a nih a rinawm, a zirtirna awihawm lo tak takte hi a khua leh tuite chuan an awih em em bakah, he hmun atang lo darh ta hnam hrang hrangte chuan an mahni version-in he zirtirna hi an inhlan chhawng ta zel a ni.

 

 

Hemi hnu hian Semiramisi chu hming thar invuahin, pathiannu ISHTAR (Easter tia lam tur) tia koh a lo ni ta a. Heta tang chiah hian spring equinox a lo thlen a, thla bial hnu chawlhni hmasa ber chu Euphrates lui atanga Ishtari lo pian chhuah hun nia ngai a Easter Sunday an lo celebrate tan takna chu; thla atanga artui lian pui (Moon’s egg) pawh chu ‘Ishtar’s egg’ tia hriat lar a lo ni ta bawk. Hei hi vawiin ni a ‘Easter egg’ lo pian chhuahna bul chu a ni.

 

 

Tichuan, hnam hrang hrangin pathiannu Ishtar chu anmahni tawnga la chhawng zelin Eostre, Astarte, Ostera, Eastre etc.ti te-in an lo sawi chhawng thin a. Baala kawppui/ nupui Ashtaroth tihte Ashtoreth tihte, Diana tihte, Egypt pathiannu Isis tih te, Rom hovin Venus antihte leh Bible ngei pawhin a huat em em ‘Van lal nu’ (queen of heaven) tihte hi he nu Semiramisi sawina vek hi a ni. Hnam hrang hrangten chi thatna pathiannu (fertility goddess) anga an hriat thin avang hian an sakhaw thil serh leh sang reng rengah hian a huhova sex hman nate, temple-a nawhchizuar khawite hi hmuh tur a awm deuh zel a ni.

 

 

A pasal Nimroda thih hnu chuan Semiramisi chu a rai ta a, ‘Ni pathianin min rai tir’ ti a sawiin, chu a fa pai lai chu a pasal Baal/ Nimroda lo piang nawn tur niin a sawi ta a. A fapa chu a lo pian chuan Tammuz tiin a hming an vuah a. Mak ve tak chu, Semiramisi hian he a fapa hi Genesis 3:15 a Pathian lo sawi lawk, hmeichhe thlah, rul lu la tithitlingtu tur kha niin a sawi a nih chu. Heta tang hian Ni pathian Baal te, Thla pathian Ishtar (semiramis) te leh pathian fapa Tammuz biaknate chu a lo intan chho leh ta a ni. Hnam hrang hrangte sakhua hi kan chik chuan, goddess leh a fapa lem hi hmuh tur a awm deuh zel bawk e.

Tin, Nimrod-a nunrawng lutuk hian pawi a khawih in hmelma pawh a insiam ve ta chiah reng a, sawi dan pahnih a awm ta a, pakhat chu a uncle, Shem-a (Mekisedeka kha amah hi a ni a ngaih a ni bawk), Nova fapa khan a that an ti a, a taksa hi a chandar vek a, khaw hrang hrang ah an thawn darh an ti. Pakhat leh ah chuan Esaua khan an ramvahna a a that e tiin Jewish Tradition chuan an sawi, an damrei a, kum 500 chuang an la dam hawlh hawlh hlawm tih hi kan chhinchhiah bawk dawn nia. source dang leh chuan Nimrod-a hming pu hi pahnih an awm a ni e an ti bawk. Engpawh chu ni se la, Nimroda chu a thi ta ta, Semiramis chuan thuneihna a la duh bawk si a, a fapa Tammuz chu pasal ah a nei leh ta a ni, an sawi dan chuan Semiramis hian lalthuthleng indawt panga ah ro a rel e an ti bawk.

Semiramis chuan a pasal thih hnu chuan lalna chu a pum hmawm ta a, hetah hian a sipai te chu a duh duh a lamtang a siam nan a mutpui ta vak vak mai thin tiin an sawi leh bawk. Uruk khaw lal Gilgamesh pawh mutpui a alamtang a siam a tum a, mahse Gilgamesh hian a thah ve mai a hlauh avangin a hnial niin an sawi bawk.

Tammuza rawn sei lian chho chuan sazupui a ngaina hle a, chutia an pathianin a ngainat tak em avang chuan hmansang sakhua-ah chuan sazupui chu ‘sacred animal’ ah an hmang chho ta zel bawk a, a hnu zelah phei chuan mother goddess chhinchhiahna (symbol) atan an hmang zui ta nghe nghe a, hei hi Easter Bunny lo pian chhuahna bul chu a ni.

 

 

Tammuz chu a tlangval laiin ramsa kawlh (wild pig) in a tihlum ta hlauh mai a, a nu leh a khua leh tuite chuan an sun nasa em em mai a. Semiramisi chuan a pa Baala hnenah a kal ta niin a sawi leh ta a, amaherawh chu, sakhaw serh leh sang an hman laia khawnvar emaw, bati emaw a chhit phawt chuan Pathian Baal leh a fapa Tammuz te chu thlarauvin an zingah an lo tel ve zel niin a zirtir a, hei hi trinity ziarang lo lan tanna chu a ni.

 

 

Semiramisi chuan zirtirna thar a phuahchawp leh ta a. Ramsa kawlh-in Tammuza a tihhlum lai khan, a thisen thenkhat chu Evergreen tree thing kih tawhna hnu bul lam tawite la dingah chuan a far a, chumi zan chuan chu thing bul chu lo thang lianin a lo puitling leh ta nghal niin a sawi a, heta tang hian evergreen tree chu Tammuza thisena tih thianghlim tawhah ngaiin ‘sacred tree’ angah an ngai leh ta bawk a ni.

 

Kum tinin Tammuza thih hriatrengna chu an hmang thin a, a spring equinox thla bial zawh sunday hmasa ber lo thlen hma ni 40 chhung chu ‘intih lungngaihna ni’ atan an hmang thin a, hemi hun chhung hian tumahin sa an ei thiang lo bawk. Chu hunah chuan Baal leh Tammuz betute chuan an lung (heart) zawnah ‘T’ chhinchhiahna an siamin Baal leh Tammuz chu chibai an buk thin a, hei hi a hnuah ‘Tau cross’ emaw, ‘Tammuz’s cross’ emaw tiin an sawi thin a ni. Chhang thianghlim (sacred cake) an tih mai, a chunga Tau cross chhinchhiahna awm an siam a, an ei bawk thin a ni. Hei hi “Lent” leh ‘Hot cross bun’ lo chhuahna bul chu a ni.

 

 

Tichuan, Tammuz hriatrengna hun an hman zawh chuan Spring equinox a lo thleng a, thla bial zawh chawlhni hmasa berah chuan Ishtari pian cham chu hlim takin an lawm ta thin a. Rawng chi hrang hrangin artui an chei a, Sazupui a tel ngei ngei bawk a. Tammuz kha wild pig in a tihhlum a vang khan he hunah hian vawksa ei ngei ngei tur a ni bawk a, hei hi ‘Easter ham’ lo chhuahna bul chu a ni.. Hei ngei hi Ishtar’s (Easter) Sunday chu a ni e.

A chunga kan sawi ho te hi Babylon Trinity ti a an sawi thawnthu chu a ni a.

Bible chhûng a an ṭanchhan te tarlang in han sawi zau leh deuh ila.

Jeremia 7:18   Naupangte'n thing an fawm a, an pate'n mei an chhêm a, hmeichhiate'n van lalnu hnêna hlan tûr chhâng an hmet a, pathian dangte tan in tûr thilhlan an hung chhuak a, mi tihthinrimna mai tûrin.

Jeremia 44:17 Keini leh min thlahtute, kan lalte leh kan hotuten Juda khawpuiahte leh Jerusalem kawtthlêrahte an lo tih tawh thin ang khan van lalnu hnêna rimtui halte leh a hnêna in tûr thilhlan bun chhuah te, kan tawngka chhuak apiang ang zel khan kan ti ngei ngei ang; chutih lai chuan ka hmuingil a, ei leh bar tûr a tam a, chhiatna reng kan hmu hlei nem.

Jeremia 44:18-19   Van lalnu hnêna thil hal leh a hnêna in tûr thilhlan bun chhuahte kan ban chinah hian engkim kan tlachham ta zawk a, khandaih leh tam tea tihboralin kan awm ta a ni.

Tin, hmeichhiate chuan, "Van lalnu hnêna rimtui kan hal lai leh a hnênea in tûr thilhlan kan bun chhuah laite khan kan pasalte remtih lohvin êm ni a biak nân chhâng kan siam a, a hnênah in tûr thilhlante kan bun chhuah kha?" an ti a.

Jeremia 44:25 nangni leh in nupuite chuan, 'Van lalnu hnênah rimtui hal leh in tûr thil hlan bun chhuahte chu ka lo tiam tawh ang zelin ka ti ngei ang,' tiin in kain in sawi tawh a, in kutin in puitlkin tawh bawk a. (In thutiamte chu tinghet ula, in thu tumte chu hlen law law rawh u.

Jeremia bu a kan hmuh ang hian, Semirami chu Van Lalnu- tiin an bia.

Ezekiela 8:14   Tichuan LALPA in hmâr lampang luhna kawngkhârah mi hruai a; tin, ngai teh, tah chuan hmeichhiate Tamuz ngâi a ṭapin an ṭhu a. 

Ezekiela 8:16  Tin, LALPA in hung chhûngnung zâwkah chuan mi hruai lût a, ngai teh, LALPA in thianghlim kawng kharah chuan hulhliap leh maichâm inkârah hian mi sawmhnih leh panga LALPA in thianghlim lam hnuchhawna, an hmaite khawchhak lam hawiin an lo awm a, khawchhak lama nî chu zuk lo bia a. 

Ezekiela bu a kan hmuh ang hian Ni Pathian (Nimrod) leh Tamuz- an bia.

Khing ho khi Babylon Trinity Theory chu a ni.

BABYLON THEORY DIK LOHNA :

Nova- kha c.2950 BCE vel ah a piang a, hei pawh hi Theory tam tak a awm. Hemi bîk hi Adama siam anih kum c.4006 BCE- Theory aṭanga chhût a ni aw.

Nova chuan kum 500- mi anih in  fapa pathum a nei a, Genesis bung 11: 10- chho a kan hmuh angin, tuilet hnu kum hnih ah kum 102- mi anih in Sema- chuan fapa Arpaksada a nei a, chu chu c.2450/2452 BCE vel tihna anih chu.

(Creation Theory 6000, 4004, 4000 BCE..etc pawh thai luh tel in Babylon trinity theory hi Sumerian mythology nen a in rem thei chuang lo a, a awm ang ber chu tun a ka rawn ziah lan khi a ni, in rem thei tur ang ber a ka chhût a ni e.)

Genesis bung 6: 18-  a kan hmuh angin Nova fa te khan tuilet hma in fa an la nei lo vek a ni.

Tichuan, Sema bâkah, Japhetha leh Hama- te khân tuilet hnu ah khân fâ an nei vek tihna a ni a, an nei kum a in an loh pawh in kum hnih khat bâk in a in rual lo lo vêl ang.

Engpawh nisela, Sema khân fa hming koh(?) Arpaksada-  a neih khân Hama pawhin Kusa- a nei ve nghal mai ang a, cousin an ni a, an inkawm tâwk vêl tûrah ngai ila.

Tichuan Kusa chuan Semirami lakah Nimrod- kha a nei leh tihna a ni dawn a, khilai a Babylon Trinity Theory mil tûr khi chuan. Helai ah hian  thil dang han zep lawk ila.

Babylon lam theory ah pawh khian Semirami chi leh kuang hi ṭanchhan a awm bîk lo a, Unau te, chhungkhat te an innei tih chu tupawhin kan hre vek ang a.

Chuti anih chuan Japhetha fanu emaw, Sema fanu emaw Kusa- hian a nei dawn tihna a ni a.

Chuti anih chuan Serpent Seed Theory lam chu rintlak loh ah chhuah a ni dawn tihna a ni.

A chhan chu Semirami hi Watcher/ Kaina thlah angah a chung a theory khian a sawi si a, mahse khi theory khian Japhetha emaw Sema chi ah thai luh an rem ti lo in an hnawl fithla ṭhak duh ang.

Chuti anih avâng chuan Hama khân Milian thlah kal zel nupui ah a nei tihna a ni a.

Chu chu Babylon theory pawhin ṭanhmun ah a hmang thei ang, a chhan chu sawi dan pakhat ah Semirami kha a chi leh kuangte tui let a thih tir tu Pathian lakah a lungawi lo a, phuba lâk a tum a ni thei.

Mahsela, han ngaihtuah chiang leh deuh ila, Pathian in Milian leh an thlah te thah chimih nan tui a lêt tîr na na na, han tihhlum kim loh leh si kha a va han nawi thlâk dawn êm.

Pathian engkim tithei chuan thah chimih duh siin, pakhat a zuah leh si dawn em ni.

Mythology lam aṭang pawhin kan la sawi tûrah ngai ila, Tamuz hrim hrim erawh hi chu Pagan God a ni a, Nimrod pawh hi Bible a hming lang meuh anih avângin hmanlai Lal pakhat ah a ngaih theih mai.

Semirami pawh hi Bible lam hian hming hmerh in a thailang lo a, Babylon theory lam ringtu te hian Lalnu pakhat ah pawm tlang ve mai sela chuan a dik na lai a awm ve thei tlat a,mahsela Nimrod leh Tamuz nen an sawi kawp bâkah Pathiannu angin an sawi bawk si a, Nimrod lah Sumerian Era- hun ami a ni bawk si, Sumerian ho Pathiannu ah Semirami hming a tel ve lo a, Bible a 'Van Lalnu' tih lah pathiannu dang daih a ni bawk si, chutiangin Thla(moon) pathiannu anga an sawi leh a lo ni chuang si lo.

Bible aṭanga kan en chuan Nimrod hi Genesis bung 10, chho ah kan hmu a, chuvangin a awm tak tak a ni, a awm lo kan ti miah lo aw.

Genesis bung 10 - chho ah an in thlah chhawn dan kan hmu a, châng 30- ah chung inthlah te chu a hnam ang zêl in an kal darh tih kan hmu.

Bung 11- ah Sinar/Sumer- phaizawl kan hmu leh a, chutah chuan Nimrod kha Lal a lo ni tawh a, Ziggurat Babel) kha ama thupek a sak niawm tak a ni, mahsela Pathian in a chhunzawm tir lo a, a ti darh ta a.

(Genesis 10:10-12) Tin, a lal ṭanna chu Sinar rama Babel khua te, Erek khua te, Akkad khua te, Kalne khua te a ni a.

Chu mi ram aṭang chuan a chhuak a, Assuri ramah a lût a, Ninevi khua te, Rehoboth-Ir khua te, Kalah khua te,

Ninevi leh Kalah inkârah Resen khua te a siam a (chu mi Resen khua chu khaw ropui tak a ni).

Tichuan Pathian tih darhna avângin Babel chhuahsan khaw dang a siam leh tihna a ni.

Mika 5:6  Asuria ram chu khandaihin an tichhia ang a, Nimrod-a ram chu a luhnaah chuan an tichhe bawk ang: tin, ani chuan, kan rama Asuria mi a lo kal a, kan ram chin a rawn rah hunah, ama lakah chuan min chhan chhuak ang.

Zawlnei Mika- bu a kan hmuh ang hian Nimrod-a Lalna ram chu tihchhiat a ni dawn a, Nimrod-a hi awm lo sela chuan Bible hian a sawilang hauh lo ang.

Tin, Book Of Jubilee ah chuan Sema fapa Assur- kha Nimrod anga sawi a ni ve bawk a,  Flavius Josephus- pawh khân Assur- hi  Assyrians thlahtu ah a sawi ve bawk a ni.

ANCIENT CIVILISATION :

Sumerian ho hi Mesopotamia- ramah chuan  Lal nei a ram rorelna nei hmasa deuh ber an ni a, c.5500/ 4500 BCE chho vel khân an lo awm tawh a, anni hi Mesopotamia chhim lam ah an awm a, Hmar lamah Akkadian ho an awm thung. Hemi hun hi Middle Bronze Age lai vel a ni.

Anni hma hian Ubaid Period  an ti a,  c.6500 BCE vel khan an lo awm tawh a, Early Pottery- aṭang tawh a awm niin an lang, anni ho hi Sumerian ho tho an ni e an ti bawk.

Sumerian ho lalram hun tâwp lam Early Dynastic 2- Period lai, 2800 - 2600 BCE vel khân Gilgamesh- chu a rawn Lal a, a ni hunlai hian Tuilet a awm a ni,Nova tuilet ang kha, chu chu Epic Of Gilgamesh tih ah a awm a ni.

Chumi hnu  c.2334 BCE khân Sumerian ho chu Akkadian Lal Sargon- in a rawn hneh leh a, Akkadian Empire 2334 – 2154 BC (180 years) - chu a lo ding leh ta a ni.

Akkadians Empire chu Gutian- hovin rawn hneh lehin anni hian c. 2141 BC–c. 2050 BC chhûng ro an rél leh a.

Chumi hnu ah Sumerian ho lo lian leh in Gutian ho an rawn hneh leh a, chu chu Neo-Sumerian Empire an ti a, c. 2112 BC – c. 2004 BC ro an rêl leh a ni.

Mahsela Isin-Larsa period- hun rei lo te a rawn ni leh a, chumi hnu ah Amor- ho rawn lian in Old Babylon Empire a rawn ding chang leh ta a, c. 1894 BC – 1595 BC chhûng vel do nei rengin an ding a, hetih lai hian Assyrian Empire chu a rawn lian ṭan tawh hle a.

Kassites Empire chuan rawn hnehin, anni hian c. 1595BC — c. 1475 BC chhúng ro an rel hnu in, Babylon lalram chu tualchhung buaina leh ram te reuh te te dona hnuaia awm in   c.1155 BC vel khan Kassite  Dynasty chu a tlu chhe leh a.

Tichuan Assyrian Lal Tukulti-Ninurta I- chuan rawn hneh in Babylon chu a thuhnuaiah a dah ta a ni.

Assyrian Empire chu  911 BC–609 BC chhung an Lal leh a,  Neo-Babylonian Empire- in rawn hneh leh in 626 BC–539 BC chhûng ro an rel leh a.

Anni hi Israel fa te Sal a hruaitu te kha an ni a, An hma a Lal ram Assyrian ho pawh khân sal ah an lo hruai ṭhen tawh kha.

Tichuan Achaemenid Empire- chuan Babylon chu an rawn hneh leh a, anni hian Medo- nen an rawn do rawn a, mahsela an hneh hnu in Medo- Lal hi hneh leh in Persian, Achaemenid Empire- chu a lo ding chang ta zâwk a.

Anni hi Greek Lal Alexander the Great an rawn hneh in khawvel pum mai chu Greek thuhnuaiah a awm a, Roman ho lo lian in Greek ho chu an hneh ve leh ta a.

Roman hnu ah hian Mongols ho te, Sultan Turkey Lal te bâk ah Vikings ho te an rawn lian a, chumi hnu fe ah Kumpinu a rawn lian leh a ta a ni, a bâk ho chu Tunlai khawvel mai a ni ta.

A chung a ka tarlan ho te khi in hrethiam chiah lo mai thei a, kan thupui nen a va inhlat inti a ni maithei, mahsela heng ho Civilisation aṭang hian Babylon Trinity hi kan chhui dawn a ni.

Nimrod- hi Sinar/Sumer- khaw din tu, Sumerian mi a ni an ti a, chu chu Sumerian Civilisation- lam kan thlîr chuan Alulim hi Eridu- Lal a lo ni tawh a, kum 28800 chhûng ro a rel an ti a, hei chu Mythical King ang deuh a ni a, Enmebaragesi- hi Kish Dynasty a Historical King chu a ni a, 2900-2700 BC- khan Sumer ah Lal a ni.

Nimrod tih hming hi Sumerian Lal leh Uruk khaw Lal ah hmuh tur a awm lo hrim hrim.

Tin, Amor mi Hammurabi,  Old Babylon Empire- c. 1792 – c. 1750 BC  chhûng Lal kha Nimrod a ni e an ti bawk a.

Mahse History lam kan en chuan a nih theih dan a awm lo a ni.

A Lal kum thu hla ah chuan Nimrod ni mai awm in alang a,  mahsela Hammurabi- hi Amor mi a ni a, chu chu Hama fapa Kanan-a, chumi fapa Amor-a thlah zel a ni a, Nimrod erawh Hama thlah ni mahsela, Kusa- fapa tiin Bible in min hrilh a.

Tin, Hammurabi- hi Old Babylon Empire- chhung ami a ni a, chu chu Sumerian Lalram tlukchhiat hnu kum sanghnih deuhthaw liam hnu a rawn ding chhuak chauh a ni bawk.

Genesis 14:1   Tin, Sinar khaw lal Amraphela te, Ellasar khaw lal Arioka te, Elam khaw lal Kedorlaomera te, Goiim khaw lal Tidala te dam lai chuan heti hi a ni a, 

A chunga kan hmuh ang hian  Amraphela- hi Sinar khaw Lal ti a Bible in a sawi hmasak ber a ni a, Chuvangin Nimrod-a a ni e tiin theory ngaihnawm tak pawh a awm.

Mahsela Nimrod a ni thei lo hrim hrim, Amraphela- hi Abrahama hun laia Sinar khaw lal a ni a,Nimrod erawh Hama tupa daih a ni si.

Tichuan Ancient Civilisation ah chuan Nimrod hi awm thei lo tawp tihna a ni.

Semirami- chungchang han tarlang leh ila, ani hi sawi dan pakhat ah chuan Nimrod- a sipai te zîng a pakhat nupui a ni a, chu chu Nimrod hian chhuhsak in nupui ah a nei an ti a.

Shammuramat/ Semirami chu Assyrian Lal Shamshi-Adad V- nupui a ni a, 

A pasal hi Neo-Assyrian Empire - lai a Lal niin - 824 BC–811 BC chhûng ro a rel a , an fapa chu Adad-nirari III a ni.

Semirami- hi a lo awm tak tak a ni maithei a, mahsela History aṭanga kan hmuh dan chuan Assyrian Lalnu Semirami hi Babylon Trinity Theory pawmtu te'n ṭanhmun ah hmangin, an Theory ah an zep tel ve mai mai niin alang. Hming in ang an nih vâng pawh a ni maithei.

Nimrod-a nupui a ni thei lo hrim hrim tih chu an kum ah pawh hian alang chiang em em a,  Neo Assyrian Empire chu, Old Assyrian Empire (1880 BC) tluk chhiat tawh hnu, Kassite Dynasty hnu lam 911-609 BC inkar a rawn dingchang leh kha an ni a, Semirami pasal pawh 

824–811 BC inkar a lal anih kha.

Hemi hunlai hian Israel Lal chu Jehoshaphat-a fapa Jehu-a a ni a, Jehu-a hi Zawlnei Elisa- in Israel Lal atân hriak a thih anih kha.

Chuvangin Semirami hi Nimrod-a nupui a ni thei lo hrim hrim.

Tamuz- pawh hi Semirami fapa emaw, Sumerian Lal  fapa emaw, mihring anih na emaw,  amah vâng a Easter Rabbit, Hot cross bun, a pian cham December ni 25....etc Babylon Trinity Theory a an telh zawng zawng hi a awm lo vek a ni.

Chumi awmzia chu, Babylon Trinity Theory, Ancient Civilisation- a a awm an tih hi pakhat mah a awm lo tih hi a ni.

ANCIENT MYTHOLOGY :

Historical base lam kan hrût zo a, tunah Mythology lam aṭangin i'n hrût leh ang aw.

A hmasa ber ah Nimrod- chungchang hi han tarlang ila.

Babylon Trinity Theory- ah Nimrod- hi Ni pathian (Sun God) a sawi a ni a, tin, a nupui Semirami- khân a khaw mipui te hnenah Nimrod chu Ni ah a chan thu a sawi ti a tarlan a ni.

Nimrod- chu pathian Marduk - ah a in chhâl a, Marduk tiin an be chhunzawm tiin tarlan a ni bawk.

Chuan, Ni pathian biakna Nimrod aṭang hian a inṭan tiin sawi a ni bawk a, chuvangin heng ho hi Mythology lam aṭangin kan chhui chiang ang.

Mesopotamia- ramah hian Civilisation hrang hrang a lo tawh a, a hnam fing ang zâwng chuan Sumerian Civilisation hi a hmasa ber ang a chhût theih a ni, anni hma hian, Emiran, Aterian, Mousterian Culture ( Middle Paleolithic/Midd Stone Age) c.160000 - 20000 cal BP- te an lo awm tawh a, anni hma fe hian Upper Paleolithic...etc..ah an lo awm tawh a ni.

Chung ho hnu ah Sumerian Civilisation a rawn lian a, Akkadian, Assyrian, Babylon, Medo-Persia, Persia, Greek, Roman...etc angin a rawn kal chho ta a ni.

Tichuan Sumerian pathian pakhat chu Marduk- a ni a, hei Babylon hovin hming ngaiin an be chhâwng veleh a, Akkadian chuan Adad- tiin an vuah a, mahse Marduk- ti pawhin an sawi tho.

 Assyrian chuan Bel-/Hadad tiin hming an vuah thung a, Kaanan- ho vin a Ba'al- an tih kha a ni.

Marduk- Siamtu pathian a ni a, agriculture, tui, rorel tu, tidamtu leh dawi lam pathian a ni.( Sumerian ah chuan, Secondhary Gods- an tih ang kha ania, First Goddess Tiamat nen a an inbeihna pawh ngaihnawm tak a ni a, remchang ah kan la tarlang dawn nia.)

Tichuan anihna ngai leh hming ngaiin Sumerian Marduk- chu Babylon hovin an be veleh a, Sumerian ho hian Marduk hi Asarluhhi- tiin hming dang an vuah tel tho bawk.

Babylon Trinity theory ah Nimrod- hi Ni pathian(Sun God) tiin an sawi a Babylon hovin, chu chu Marduk tiin an sawi bawk a, Mahsela a dik lo ve ve, an theory hi a inhnial sa hrim hrim a ni.

A dik tak ah chuan Babylon Ni pathian chu Shamesh- a ni a, chu chu Akkadian- ho hming an ṭâwm a ni a, Sumerian ho chuan Utu- an ti thung.

Marduk hi Sumerian, Akkadian,Assyrian, Old Babylon leh Neo- Babylon- ah Ni pathian (sun god) an ni lo vek a ni.

Marduk leh Ni pathian Utu/Shamesh te hi an pu te Cousin an ni thung.

Nimrod- hi Ni pathian nisela chuan Marduk- ni lovin, Shamesh tiin a hming a inchhâl zâwk ang.

Chuvangin a engti zâwng pawhin Nimrod hi Ni pathian a ni thei lo anih chu.

Semirami- hi Babylon Trinity Theory ṭanchhan tute chuan thla pathiannu(Moon Goddess) - ah a in chhâl an ti a.

Hei chu eng ang pawhin a dik thei lo hrim hrim a ni.

Sumerian leh Akkadian- ho pathian Babylon hian an ṭâwm kan tih tawh kha.

Mahsela Sumerian, Akkadian, Babylon- te hian Thla pathiannu (Moon Goddess)- an nei lo hrim hrim a ni.

Sumerian ho thla pathian chu Nanna-a ni a, chu chu Assyrian leh Akkadian- hovin  Sin- an ti a, Babylon - ho pawhin Sin- tiin an be ve a ni.

Nanna/Sin- hi Thla pathian a ni a, a nupui chu, Sumerian hovin Ningal an ti a, Akkadian hovin Nikkal- an ti thung.

An fa te chu Sumerian ho chuan, ni pathian Utu, Indona leh hmangaihna pathiannu Inanna, Ningublaga, Nuska- an ti a.

Akkadian/Babylon - hovin, Ishtar, Numushda- an ti thung.

Babylon Trinity Theory- pawmtu te'n Semirami chu Ishtar leh Aseri- hming a in vuah a, chu chu hun lo kal zel a, Semirami chu Ishtar leh Aseri- tiin kan lo sawi ta zel an ti a.

Mahse hei hi chu a ni thei lo hrim hrim tih a chung a kan tarlan aṭang pawh khian a hriat vek tawh a ni.

Semirami chu Ishtar- lo invuah nisela chuan, Amah leh a nu kha anih kawp angai a ni.

Thla pathian kha Semirami a ni thei ta lo a, a nupui pawh lo ni ta sela, an fanu Ishtar- kha Semirami anih leh tho angai bawk si.

Tin, Sumerian hovin a Inanna- an tih chu Akkadian hovin Ishtar- an ti a, Kanan hovin Astarte - an ti a, Old Assyrian Empire chhûng ah Asheri- an ti a, Neo- Assyrian ah Ishtar- tiin an vuah leh.

Chuvangin Babylon Trinity- pawmtu te'n Ishtar leh Aseri- hming a in vuah kawp an tih chu thil ni thei a ni lo a ni.

Semirami kha Sumerian din tu Nimrod- nupui leh a nu ni kawp a ni an ti a, chumi anih phei chuan Sumerian Civilisation- ah Ishtar- hming anla sawi lo, Sumerian ṭawng pawh a ni lo a, Akkadian- daih anih avângin.

Chuti pawh lo ni sela, Asheri- tih phei chu Old Babylon Dynasty din hma daih Old Assyrian Empire- lai a an phuah ania.

Asheri- pasal chu Ashur- daih a ni lehnghal bawk nen,  Ishtar- tih phei chu Neo- Assyrian ah a rawn lâr chauh bawk si.

Tamuz- hi Nimrod leh Semirami te fapa ang a sawi, Nimrod a boral hnu a Semirami pai leh a ni a, a pa ah Nimrod-a thlarau, Ni zung aṭanga a pai niin an sawi Babylon Trinity pawmtu te'n.

Mythology ah chuan, Tammuz - Sumerian hovin an sawi a, Akkadian hovin Dumuzid- an ti a, Babylon hovin Tamuz- an ti.

Sumerian Mythology lam a alan dan chuan Tamuz- hi Tui pathian Enki leh Duttur- te fapa tiin an sawi a.

Akkadian ho chuan Ea- leh Zertur - te fapa an ti ve thung a.

Babylon hovin Enki leh Turtur- te fapa tiin an sawi thung.

Tamuz- nupui chu Queen of heaven Inanna- a ni a, Inanna- hi Ishtar, Astarte, Asherah, Asheroth- tiin an sawi a.

Hetah chiah pawh hian Babylon Trinity Theory vawrh lâr tu te chu an Theory ah an in hnial nghal a ni.

A chhan chu, Tamuz-a nu Semirami an ti a, mahse Mythology lamah chuan Semirami tia an sawi ho khi Tamuz-a nupui a ni thung si. Tamuz- leh Inanna- te hian fanu Nanaya- anla nei bawk lehnghal.

Tamuz-a pa Nimrod- ti tu te hian Nimrod- chu Ni Pathian an ti a, mahse Mahsela Mythology ah chuan Tamuz- a pa chu Tui pathian Enki/Ea- daih a ni si.

Tamuz- hi a naupan laiin Sanghal in a tihlum te an ti a, khawi aṭanga an hriat nge ni ang aw te ka ti ṭhîn.

Naupan lai a thi nisela chuan nupui fanau a nei dawn lo tihna a ni si a, mahse a nei hman si.

A thih dan leh Underworld- a a kal tâk na chhan te chu ngaihnawm tak mai a ni a, Epic Of Gilgamesh Tablet VI- ah a in i ziak vek a, Gilgamesh Epic- hi Semirami- fapa chu Tamuz- a ni titu te ṭanchhan bu pakhat anih avângin anni pawhin thudik zâwk chu an hre ngei tûr ah ngai ila.

BIBLE AṬANGIN :

A tâwp khâr nan Bible- a Semirami- te chhungkaw chungchang lang an tih, Babylon Trinity Theory pawmtu te'n a an ṭanchhan hi i'n târlang leh thuak thuak teh ang.

Kan hriat reng aṭan a ka duh chu, Nimrod, Semirami, Tamuz- te hi an awm ngei a, an awm lo tiin ka'n sawi lo tih hi.

(Genesis 10:8-9)

Tin, Kusa chuan fapa Nimroda chu a nei a: ani chu leia mi chak tak a lo ni tan ta a.

LALPA hmaah chuan sa pêl mi chak tak a ni a: chuvângin a ni, "Lalpa hmaa sa pêl chak tak Nimroda ang a ni," an tih thin ni.

(Mika 5:6)  Asuria ram chu khandaihin an tichhia ang a, Nimroda ram chu a luhnaah chuan an tichhe bawk ang: tin, ani chuan, kan rama Asuria mi a lo kal a, kan ram chin a rawn rah hunah, ama lakah chuan min chhan chhuak ang.

Khimi Bible thu ah khian Nimrod- chu alang ngei a, Lal pawh a lo ni ve ngei ang, a lal hun chhúng tarlanna rintlak a awm lo a, a chhungkua sawilanna Ancient Civilisation ah a awm lo hrim hrim.

Chuvang erawh chuan a tak ah a awm lo tihna a ni lo a, Nimrod- tih hmingpu chu Lal chu a lo awm ve tawh ngei a ni, chu chu angaihnawm ang tûrin a thawnthu an phuah belh tihna a nih chu. (Rumliana chanchin an sawi zawng zawng hi a tak vek a ni lo, an phuah belh a awm nual.)

(Ezekiela 8:16)

Tin, LALPA in hung chhûngnung zâwkah chuan mi hruai lût a, ngai teh, LALPA in thianghlim kawng kharah chuan hulhliap leh maichâm inkârah hian mi sawmhnih leh panga LALPA in thianghlim lam hnuchhawna, an hmaite khawchhak lam hawiin an lo awm a, khawchhak lama nî chu zuk lo bia a.

Ezekiela bu ah hian Babylon a Israel fa te sal a an tân hun lai vel kha tarlan an ni a, Israel fa te sal a man tu te hi Neo-Babylon Empire-( 626 BC–539 BC)- kha an ni a, Nebuchadnezzar II- in Sal ah a man hlawm anih kha. Neo-Babylon Empire- hi Persian, Achaemenid Empire- in an rawn hneh ve leh a ni. Achaemenid Empire- hi Daniela hun lai a mi te kha an ni a, Lalnu Esther-i pasal Ahasuer(Xerxes) te ho kha.

Neo- Babylon Empire lai hian ramchhûng ah Akkadian leh Aramaic- ṭawng hman a ni a, chuvangin Sumerian ho Ni pathian Utu pawh, Akkadian- ho in a an ṭâwmpui angin Shamesh- tiin an be ve a ni.

Tichuan Ezekiela bu a Khawchhak lam a Ni chhuak an bia tih khi Nimrod- ni lovin, Ni pathian Shamesh  - zâwk tihna anih chu.

(Jeremia 7:18)  Naupangten thing an fawm a, an paten mei an chhem a, hmeichhiaten van lalnu hnêna hlan tûr chhâng an hmet a, pathian dangte tan in tûr thilhlan an hung chhuak a, mi tihthinrimna mai tûrin.

(Jeremia 44:17-19) Keini leh min thlahtute, kan lalte leh kan hotuten Juda khawpuiahte leh Jerusalem kawtthlêrahte an lo tih tawh thin ang khan van lalnu hnêna rimtui halte leh a hnêna in tûr thilhlan bun chhuah te, kan tawngka chhuak apiang ang zel khan kan ti ngei ngei ang; chutih lai chuan ka hmuingil a, ei leh bar tûr a tam a, chhiatna reng kan hmu hlei nem.

Van lalnu hnêna thil hal leh a hnêna in tûr thilhlan bun chhuahte kan ban chinah hian engkim kan tlachham ta zawk a, khandaih leh tam tea tihboralin kan awm ta a ni.

Tin, hmeichhiate chuan, "Van lalnu hnêna rimtui kan hal lai leh a hnênea in tûr thilhlan kan bun chhuah laite khan kan pasalte remtih lohvin êm ni a biak nân chhâng kan siam a, a hnênah in tûr thilhlante kan bun chhuah kha?" an ti a.

Jeremia bu 'Van Lalnu'- tih hi Semirami- sawina a ni e an ti a.

Kum tinin Tammuza thih hriatrengna chu an hmang thin a, a spring equinox thla bial zawh sunday hmasa ber lo thlen hma ni 40 chhung chu ‘intih lungngaihna ni’ atan an hmang thin a, hemi hun chhung hian tumahin sa an ei thiang lo bawk. Chu hunah chuan Baal leh Tammuz betute chuan an lung (heart) zawnah ‘T’ chhinchhiahna an siamin Baal leh Tammuz chu chibai an buk thin a, hei hi a hnuah ‘Tau cross’ emaw, ‘Tammuz’s cross’ emaw tiin an sawi thin a ni. Chhang thianghlim (sacred cake) an tih mai, a chunga Tau cross chhinchhiahna awm an siam a, an ei bawk thin a ni. Hei hi “Lent” leh ‘Hot cross bun’ lo chhuahna bul chu a ni.

Tiin a chung a tarlan ang khian an sawi ṭhîn a.

Mahsela Tamuz leh Nimrod- te biak nân Chhang( ash Bread) hi an siam ngai lo.

Bible a kan hmuh angin 'Van Lalnu tân chhang an ur'- tih kan hmu a, Babylon mi te hian Sumerian hovin a Inanna- an tih chu Akkadian hovin a Ishtar- ti a an sawi ang in an be chhawng a, chuvangin Ishtar- tân chhang an ur ṭhîn.

Chhang ur hi Banylon tihchhuah ni lovin, Sumerian ho tihchhuah a ni a, an pathiannu Inanna- an biakna chikhat, hmeichhia chauh ina an biak dan a ni.

Chuvangin Babylon theory pawmtu te hian an thu inkalh hi an chhût chiang lo a, an theory leh Bible- a in kalh tlat a, anmahni an in hnial reng si.

(Ezekiela 8:14)  Tichuan LALPA in hmâr lampang luhna kawngkhârah mi hruai a; tin, ngai teh, tah chuan hmeichhiate Tamuz- ngai a ṭapin an ṭhu a. 

Bible- a kan hmuh ang hian Babylon mi te hian Tamuz- hi an bia a, mihringte  hma a ngaih vâng /Underworld Demons- vânga a thihna kha sunna angin an nei ṭhîn a ni.

Hei he 'Sunna'- hi Georgian Calendar ah chuan April thla tîr a ni.

Chu chu Babylon Trinity Theory pawmtu te hian an hre sual a, Georian Calendar a February    thla ah an ngai a, tin, February thlen hma ni sawmli (40) - na aṭangin an ti bawk a.

Mahse an hre sual a ni, February thla bial zan hmasa ber ah Tamuz leh Ishtar (Dumuzid leh Inanna) - te innneihna ni an tia, an lâwm ṭhîn zâwk a ni.

A Calender aṭang hian tlem han belh leh lawk ila.

Tamuz- a thihna avânga an lungngaihna thla chu, Sumerian, Akkadian, Babylon - te ho thla chhiar ah chuan, thla lî na, Araḫ Dumuzu- an ti a, Chu chu Georgian  Calendar chuan July thla a ni.

July thla, ni hnihna chu Tamuz- a thih ni ah ngaiin a sûnna an nei ṭhîn a. Chumi thla ni khatna aṭanga chhiar a, a ni kua na(9), sawmparukna(16) na leh sawmpasarihna(17)- na ah te meichher kengin kawngzawh runpui an nei bawk ṭhîn.

Chumi thla tawp ni thum chu Tamuz-a thlân a a awm entirna a ni bawk.

Tin, Ishtar nen a an inneih ni Araḫ Addaru- thla ni khatna ah lawm a ni ṭhîn a. Chu chu Georgian Calendar chuan February thla a ni thung. February ni khatna emaw ni 14-(valentines day) emaw hi a ni mai thei. Tamuz- nupui ishtar/Inanna- hi sex & love- pathiannu a ni ve tlat mai a.

Khi ta a chunga kan tarlan tak ang khân, Tammuz- thihcham lawmna leh sunna, te kha Babylon trinity Theory ah chuan thla bial zawh sunday hmasa ber an ti kher a, a ni miah lo tih chu kan sawi mek hi. Tin, Sunday- serh sawisel tum rân a Theory siam an ni bawk a, mahse an chhût sual hret a ni.

Tin, Sunday serh chungchang an sawi leh dan pakhat chu:

Tichuan, Tammuz hriatrengna hun an hman zawh chuan Spring equinox a lo thleng a, thla bial zawh chawlhni hmasa berah chuan Ishtari pian cham chu hlim takin an lawm ta thin a. Rawng chi hrang hrangin artui an chei a, Sazupui a tel ngei ngei bawk a. Tammuz kha wild pig in a tihhlum a vang khan he hunah hian vawksa ei ngei ngei tur a ni bawk a, hei hi ‘Easter ham’ lo chhuahna bul chu a ni.. Hei ngei hi Ishtar’s (Easter) Sunday chu a ni e.

An ti a, mahse hei pawh hi an hre sual leh det a ni.

Sumerian hovin Inanna- piancham an lawm ngai lo a, a pianni sawi lanna an Myth ah a awm lo.

Tin, Akkadian, Assyrian leh Babylon hovin Ishtar- piancham an lawm ngai lo, an Myth ah Ishtar pianni sawi lanna a awm lo.

An pianni sawi lanna website...etc te ho hian an Source chu an Mythology- hi a ni zêl tûr a ni a, mahse   a awm miau loh avângin an phuah belh tihna mai a ni.

Sumerian/Babylon- Calendar ah chuan thla ruk na, Araḫ Ulūlu - hi Inanna/Ishtar- chawimawina/hriatrengna thla a ni a, chu chu Georgian Calendar chuan, August thla a ni.

Mahse hei hi a pian thla a ni lo maithei a, An thla chhiar dan leh an hman dan ngaihtuah chuan Inanna/Ishtar- thih thla ni zâwk âwm a ni, a chhan chu Tamuz thihni pawh in sunna an nei tlat a.

Inanna/Ishtar- kha a unaunu, Underworld pathiannu Ereshkigal-i'n a that anih kha.

Mythology lam aṭanga hriat theih awmchhun chu,  Inanna/Ishtar- hi  c.3400 BC ah piangin c.2200 BC- ah a thi tiin.

Calendar lam hi tlem kan tarlang  zuai  tak tak ang e, kan topic ni lo mahsela.

Georgian Calendar ah December ni 25- hi Tamuz- a pianni a ni tiin Christian Pathian Isua- piancham lawmna chu sawisel ṭhin a ni a, Banylon Trinity Theory vâng hian, a awlsam dan ber in anih theih loh dan han tarlang ila.

Roman hovin 783 BCE- vel aṭang khan Lunar( thla calendar) Romulus Calendar chu an hmang a, hetah hian kum khat ah  thla 10 a awm a, Ni 304- a awm.

Chumi hnu ah Roman Republic, 504/c.450 BC- aṭangin an hmang zawm leh a, hei pawh hi Lunar Calendar tho a ni, Kum khat ah Thla 12- neiin an siam thung a, ni 355- a awm thung.

Chumi chu The Julian calendar- tiin, Julius Caesar - khân 45 BCE ah siam in an hmang leh ta a, hei hi Solar calendar- a ni thung.

Caesar- hian  Alexandrian Astronomer, Sosigenes- chu khawvel in ni a hel kual dan aṭangin a siam tir a,  Kum khat ah ni, 365, darkar 5, minute 48 leh seconds 45  (365.242189 days)- a awm a, chu chu thla 12- ah a sem leh a ni.

Leap year kum in February ah ni 24- a awm thung.

Julian Calendar- hi a dik tawk lo an tih avângin Pope Gregory XIII- chuan a thlâkna tûr siam in Julian calendar chu a siam ṭha a, chu chu tuna khawvel pum ina kan hman Georgian Calendar- hi a ni.

Kum 1582- ah siam in hman ṭan a ni.

Tichuan Julian calendar aiin ni 13- in a hma ta a, December ni 25- chu Julian calendar aṭanga teh chuan January ni 7- vel a ni ta daih a.

Roman Calender hmasa ber Romulus  Calendar- aṭanga Georgian calendar convert phei chuan December thla reng reng alang lo.

December ni 25- hi Isua pianni ti a hman sawisel tu te hian, ni 25-chu Roman ho ni pathian piancham an ti a, a chângin an pathian Saturn- chawimawina ni an ti bawk a.

Hemi thu ah pawh hian an theory hi a inhnial sa hrim hrim a ni.

A chhan chu Roman pathian Sol invictus- leh Saturn te hi thuhmun emaw an tih vâng a ni. Chu pawh nisela ala in rem thei chuang lo.

Roman ni pathian Sol invictus- hi Julian Calendar ah December ni 25- ah apiang a, chu chu an lawm ṭhîn a.

Mahse Julian Calendar a December ni 25- chu Georgian Calendar ah chuan January ni 7- a ni thung.

Tin, Roman- ho pathian Saturn- hi Ni pathian ni lovin, Agrigulture lam pathian a ni a, chuvangin buhseng zawh  ah amah chawimawina Saturnalia- festival an lâwm ṭhîn a.

A hman hun hi ram hrang hrang ah a danglam ve zel a, India ah chuan September thla vel ah a ni a, mahsela Roman ho buhseng zawh festival lawmna hun chu Georgian Calendar chuan December ni 17- a ni thung.

Hei lo pawh hi Theory pakhat a la awm a, Roman ho Pathian Mithras- chungchang ah pawh, Hei chu Hindu ho pathian Mithra- nen a in relate ve tlat a, mahsela December ni 25- Theory ah chuan Pagan Festival ho hi Georgian Calendar ni 25- celebrate- theihna a awm lo a ni.

Remchang ah December ni 25- thu hi la sawi zau tum ila, a detail deuh in, Christmas tree, easter bunny, Hot Cross bun, Chaldai Cross, Easter Sunday....etc ho te hi.

A tawp khâr nan tak tak.

Semirami kha a mihring chuan a awm tak tak kan tih tawh kha.

Neo-Assyrian Empire lai a, Assyrian Lal Shamshi-Adad V- nupui kha Semirami ania, an fapa chu Adad-nirari III- a ni.

Hemi ah hian Semirami hi c. 850 BC- a piang tiin a inziak a,  c. 798 BC - ah a thi a ni.

Semirami pasal Assyrian Lal hi, Israel Lal Jorama leh Juda Lal Ahazia- hun laia Assyrian Lal kha a ni a.

An fapa, Adad-nirari III- hi Israel Lal Jehu- hunlai ami kha a ni.

Tichuan Semirami tupa, Adad-nirari III- fapa Tiglath-Pileser III- phei chu Bible ah a lang ve hial a ni.

(II Lalte 16:7) Tichuan Ahazan Assuria lal Tigalath-pilesera hnênah, "I chiahlawh leh i fapa ka ni alawm: mi bei tûra lo thawk Suria lal kut ata leh Israel lal kut ata hi mi han chanchhuak te khai," tiin mi a tir a.

Tin, Semirami- fapa pawh hian lâr na a nei chu chu Boundary Stone, Saba'a Stele- kha a ni. Syria ram a Sinjar Mountains- chhim lam ah kum 1905- khân hmuh chhuah leh a ni.

Hemi ka rawn sawina chu Semirami, Assyrian Lalnu chu a tak ah a awm ngei tih tarlan ka tum vâng a ni a, Mahse heta Semirami hi chu c.850 BC- chho ami kha ania, Babylon Trinity Theory ami chu a ni thei chuang lo, Nimrod- kha Sumerian din tu an ti a, chuti anih chuan Sumerian hunlai a Semirami hi awm tur a ni.

Mahse, Sumerian hun tawp hnu ah Akkadian, chumi hnu ah Old- Assyrian, chumi hnu ah Old- Babylon, chumi hnu Neo- Assyrian Empire- hunlai ami a ni chauh si.

Chuvangin Kan tarlan tâk ang khian Christianity a Trinity- zirtirna hi a dik emaw dik lo emaw kan sawi lo.

Mahse Babylon Trinity sakhua lachhâwng a ni lo tih tarlan na zâwk a ni e.