PASALṬHA CHHUANSANGA | Indona Leh Hmangaihna (Bung Ruk Na) ZAN VAK

Ngaw chhûng an luh leh lai chuan khua a thim ṭan tawh a.

An vai chuan chak takin an tlân ṭheuh a, inhloh leh an hlauh avângin inhlat lo tak in an tlân hlawm a.

An tlân thui tial tial a, ngaw chhûng a thli thaw vûk vûk te pawh chu a nasa tawh lovin nui ri thangkhawk hluah hluah te pawh chu an zâwi ve tial tial a.

Boruak a lo dang a, thâwm hriat tûr pawh a awm tawh lo ta maw tih chuan an chau lutuk chu an châwl ta hlawm a, khua pawh a thim chiang tawhin Zan lam roreltu Thla pui pawh a lo chhuak ṭan ve mêk a, ngaw hnuai ah chuan chiang lo ruai hian Thla zung a rawn lût ruái a.

An vai chuan an hah hlawm in thâwk pawh an thaw ṭha hleithei lo, a ṭhen in kut in lei an beng a, an rûm hlat hlat a, Sangpuia leh Kapa chu leiah chau tak in an mu zangthal  huang a, an silai erawh an hûm reng thung.

Rei vak lo hnuah Hrima- chuan, " Kan tlansan thei ta a ni ang chu maw," a rawn ti a. Kapa- chuan che sawn chuang lo hian," Buh ṭîn engzah hmun tak tlan ang i maw? min rawn umzui ka ring tawh lo." a rawn ti veleh a.

Thla pawh chu a rawn chhuak sâng telh telh a, an awmna lai ngaw chhûng pawh a pik vak tawh loh avângin a rawn chhun êng angreng tawh khawp mai.

An han hahdam deuh a, an tlansan tâk ngaw chhûng zâwk lam chu an thlîr leh zauh zauh ṭhîn a, an tlân thui viau nâ in an ngaih erawh ala ngam tak tak chiah lo niin alang.

 Chhuana, Sangpuia leh Denga- te chuan an iptepui leh chem bâkah an silai hlo, fungi ah lai bâk lo chu engmah an la hman lo hlawm a, Hrima leh Kapa te khán silai leh fungi ṭhenkhat an rawn khâwm hlauh zâwk a, chuti ni lo sela chuan chemtum chauh hûm chung a chulai ngaw chhûng a an vahvel a ngai ngei dawn si a, chutiang chu a chakawm lo kher ang chú.

An tlân chau thawkhat bawk a, chulai hmun aṭanga chhuah leh chu an hmanhmawh tawh lo hlawm khawp mai, an châwl rei telh telh a, ramvachal ṭheuh an ni bawk a, an ngaih pawh angam ve telh telh a.

Kapa leh Chhuansanga chuan thing ro fawm in meipui an chhep alh hluah a, an silai hlo te pawh an thun hlawm bawk a.

Rei pawh a ni lo, an meipui chheh kiangah chuan an muhil zui ta bawrh bawrh a.

Lêng hnawtchhuak âr a khuan hun âwm vêlah chuan Hrima- mu tui lai chu a harh hlawl mai a, a'n hawi kual a, an meipui pawh a la thi lo nâ in a rêm lam a lo ni tawh a. Mahsela Thla ala tlâk loh avângin an awmna chu ala rawn chhun êng deuh ruài a.

A ṭhiante chu an la mu tui hlawm khawp mai, an chau bawk a ni ang, vaihmite leh thosi an tam teh rêng nên Denga- phei chu a hnâr thlurh thlurh mai lehnghal a.

Mei a tuah ṭhat a, a chhawm lai mêk chuan an awmna chhak lam aṭang chuan eng thâwm emaw ni hi a rawn ri a. Ngaihthlak chian tum a a beng a'n dawh rual chuan chumi thâwm rawn chhuahna lam aṭang chuan Chinghnia hi a rawn û ruah ruah a, vawikhat chauh a û a, a reh leh daih a.

An awmna aṭanga a hnaih hranpa loh avângin engah a ngâi lêm lo, nasa deuh in an meipui chheh chu a ti alh hluah a, a silai hûm rân chung chuan mutthilh leh mai a tum a.

Mahsela muhil hman lo, a chhîng deuh duâr duâr hman chauh a, thâwm dangin a rawn ṭhâwng leh ta.

A hmun ngai bawk aṭang chuan Chinghnia chu a rawn û leh ruah ruah a, tunah chuan vawikhat mai a ni ta lo, a vawihnih û leh rual chuan Chinghne dangte pawhin an lo chhâwn ve ta tluar tluar a, an riahna chhak leh thlang lam aṭang te, hla deuh leh an kiang hnai lawk lawk aṭang te chuan an rawn û ta tluar tluar hlawm mai.

Chu veleh rang tak a in perh tho vat in a ṭhiante chu a kai harh thuai a, thil awmzia a'n sawi nâ in, a sawi aia chiangin a rawn lang chhuak zui nghal a.

An riahna aṭanga hlam sawmthum vêl a hnim te chu an ri sun sun a, a khât tâwk in Chinghne û thâwm hriat tûr a awm reng a, an meipui ên phâk loh deuh a nih avângin anmahni erawh chu an hmuh mai theih loh, an thâwm erawh chu mikhap kâr an a nasa telh telh thung a, anmahni leh anmahni insual leh in ngur thâwm te pawh chu a rawn hnai telh tel mai.

Sangpuia leh Hrima- chuan an thingṭang fawm khâwm leh hnahthel ro te chu ṭhâm khâwm in an meipui chheh ah chuan an vawm lût zêl a, Denga, Chhuansanga leh Kapa- te pawh chuan an chem phawrh in an awmna lai chu an lo sâm fai ve sawk sawk bawk a.

Rei lo tê a'n mei êng ina a ên phâk lohna hnim pik kâr aṭang chuan Chinghne lian zet mai hi muangchangin a rawn chhuak a, Chhuansanga te lam hawi chuan a dîng reng a.

Chu zân thim ah chuan a ruangam chu a lang lian kher mai, Thla êng ina ngaw chhûng a chhun ên deuh riai avângin chiang lo ruaiin alang a, a khât tâwk in a ngur leh chhur chhur ṭhîn a.

Sangpuia te ho chuan kah mai theih tûrin an silai an lek far a, 

" Muangchangin i tawlh sawn mai ang u hmiang, an rawn tam tak tak hmâ in," tiin Kapa-a chu a phun sur sur a, Sangpuia chuan," Ni lo ve, mei êngah lo chuan kan che thei lo ang," tiin a lo chhâng lêt a.

Rilru siam fel a har an tih hmel hlawm khawp mai, Denga pawh chuan, " Engzah nge an nih kan hre si lo a, silai ngawt chuan kan kâp sêng lo ang tih a hlauhawm hle mai." a rawn ti ve leh a.

Chutih lai chuan an awmna chhak lam hnim te chu an ri leh sun dun a, rang zet hian hnim kâr aṭangin Chinghne sâwm rual vêl zet tûr hi an rawn tlân chhuak a, mahsela mei êng chinah erawh an rawn kal mai ngam bîk loh avângin an rawn hnaih tak tak rih chuang lo. Mahsela mihring an hmuh rual chuan an ha hriam tak mai chu ti langin an ngur chhur chhur a, a khât tâwk in an û leh ruah ruah ṭhîn a.

"Kap ila, an tlanchhe mai lo maw, tichuan keini pawh kan in saseng thuai thei zâwk ang." Kapa- bawk chuan a rawn ti leh a.

Chhuansanga- chuan," Ni e, heti rêng rêng chuan an in punkhawm chhûng kan nghâk thei hial ang, tunah pawh sawm rual deuh thaw an nih hmel tawh ania, heti chauh pawh hi an tawh khirh viau ang." tiin a lo tuihnih ve bawk a.

"Anih chuan mahni zâwn ami ṭheuh hi hlah tum lo ila, thal thlah rual lovin a in dawt deuhin thlah ila, silai hlo pawh kan thun leh hman zêl mai awm mange ka ti."  Denga chuan a lo ti a.

"Anih chuan nangin han thlah hmasa ber la, a dawt ah kei," tiin a hma zâwn a Chinghnia chu Kapa chuan silai chuan a tin zui nghal a.

Thla êng ruai hnuai ah chuan Chinghne rilṭam hmel tak tak te chu an vai thuak thuak reng a.

Chutihlai chuan silai a puak ri dawt a, Chinghne pakhat chu a hrâm zuai a, a bawk zui nghal rawp a.

Silai rîk veleh chinghne ṭhenkhat chu an tlânchhe nghal a, mahsela an tlân vek lo.

Mitkhap kâr an silai dang a rawn ri zui ve lehnghal a, Chinghne pakhat a thal leh ta.

Mahsela zan thim hnuaiah chuan rin aiin an lo che thei phian mai a, chuti mai chuan a dam lai chu pâwngpaw kah fuh vek theih an ni bîk lo,  Sangpuia phei chuan vawihnih a kâp a, a ṭhelh ve ve lehnghal a.

 Pathum an kap hlum hman chauh ang tih chuan Chinghne ṭhenkhat chuan an rawn bei let ve ta thut mai a, pakhat chuan Denga- a rawn zuan a, a silai hlo thun hman tâwh hek lo vi.

A rawn zuan ran êm avângin a iptepui a a chem pawh a phawrh hman lo a, a silai kâwm in a lo hlap pial deuh hman chauh a ni, mahsela a rawn beih leh hma in  Sangpuia'n a lo kâp hlum hman hlauh a.

Chinghne pahnih hian Hrima- chu an lo beih rawn ve mêk bawk a, pakhat in a bânrék lehlam ah a hap a, pakhat in a châwn ah a lo seh bawk a, a silai hlo a thun  hman tawh bîk loh avângin a silai chu a paih a, na ti a ṭê tuar tuar chungin a iptepui a a chem chu harsa ti tak a phawrh in a bân a seh tu chu  a'n vai a, na tuar chung a vai chu a lo na bîk vak si lo, chu chinghnia chu a hliam nual hnu ah a a lû ah a sât fuh hlauh a, chu pawh vawihnih thum a sah hnu ah a thi chauh  a.

A tâl vêlna ah a châwn a seh tu khân a thlah hlauh mai a, ṭê ruai ruai chungin a chem chu a vai kual a, mahsela a hliam nasat êm avângin a ding reng thei bîk lo, muangchangin a ṭhingṭhi ruai ruai a, chu veleh a sehtu ngai bawk chuan rang zet hian a rawn zuan leh a.

Mahsela Chhuansanga chuan an thingtuah bân puam tiat lai tûr, la ling vût mai hian a zuang lai tak chu meiling darh chuai khawp hian a lo hlap thûm dawp a, chu pawh chu che leh tûr chuang awm lovin a a zal ve leh ta dêr a.

Chumi chhûng chuan Sangpuia leh Denga- pawh an lo buai hle mai a, an pahnih chuan ṭan lo la dûn in Denga- chuan chem nen Sangpuia silai hlo thun lai chu a lo vêng a, Sangpuia chuan hmanhmawh tak a silai hlo thun in a lo kâp tlu nual tawh a, an lo hnaih deuh chuan Deng chuan dimna tel map lo hian a lo changel sah leh thâwr mai zêl a, a upa ber niin a huaisen bawk a, pali lai chu a sîr lawk ah chuan thisen nen an let reng tawh a, sah hliam pawh a nei nual tawh bawk.

An meipui chheh pawh chu an inbeihna a an pal darh nasat êm avângin a thi lo chauh tawh a, thla êng ai chuan a la êng deuh chê chê chauh tih theih a ni.

Hrima- pawh bawihsawm lovin a thing tum ken lai nen chuan Chinghne pathum ina an lo bâwr Kapa- lamah chuan Chhuansanga- chu a tlân leh thuai a, Kapa chu leiah a tlu hi a lo ni a, Chinghne koham tak tak te chuan an lo ching let nasa mai, anmahni leh anmahni te chu an lo in ngur chhur chhur a.

A theihpatawp a a thing ken lai chu vaiin Chinghne pakhat chu a hlap lêng lawp a, pakhat ina lo zuan a tum chiah chu a chhîp thlâk zui leh ta ngheng mai a, pakhat erawh chu thim tham ah hnim kâr ah a tlanchhe ta daih a.

Sangpuia leh Denga- te beitu pawh pahnih chauh an ni ta, mahsela anni pawh chu an tâwi an tâwi a, thinrim tak a ngur chhur chhur chungin hreh hmel deuh hian hnim pik kâr ah an bibo zui ve leh ta a.

Lei châr a tlu reng Kapa- chu thim tham ah chuan  Chhuansanga chuan kovin a'n sâwi nawk nawk a, mahsela chhan tlâk a lo ni tawh lo, Chinghne sehna avângin a nghawng chu a lo bung lo chauh hi a lo ni a, thisen in a bual nuau a, a pum pawh an lo seh kak duai a, a kawchhung erawh an lo phawrh nasa hman lo, a taksa dang pawh a him lo nasa kher mai.

Chhuansanga chuan rilru na tak chungin a dâr ah vuan in a sâwi a, a hming in a ko vak vak a, chutihlai chuan Sangpuia chu Chhuansanga kiangah rawn kal in a bul ah a rawn ṭhû a, zâwi sap hian,

" Kan ṭhian a chu chhan tlâk a ni tawh lo ve, engpawh nisela, tunah chuan kan kalsan mai rih angai a ni." a rawn ti a.

Hrima pawh a in hliam nasa deuh a ni, Denga chuan ṭhutchilh in a lo bawihsâwm a, a iptepui chu zai chhia in Hrima bân rêk leh chawn hliam te chu a lo tuam sak mawlh mawlh a.

Rei pawh a ni lo, Denga'n- a Hrima hliam a tuam zo hman âwrh tih chuan an awmna aṭanga hnai té, hlam sawmhnih pawh tling ṭha ṭhum lo, an awmna chhak lawk aṭang chuan Chinghnia bawk chu a rawn û leh ta rawng rawng mai a, tunah chuan pakhat chauh an ni ta lo, a rual in an û chuah chuah mai a, reilo tê a'n an thâwm chu a nasa sâwt viau mai a, anmahni leh anmahni insual thâwm te pawh a hnaiin an hnim tâwn rîk ri aṭang te chuan a hma aiin an tam zâwk tih pawh hai theih a ni lo.

An meipui chheh pawh a darh nuai a, Ngaw chhûng a thla êng rawn lût riaí chauh chu an êng neih chhun a ni tawh a.

"Kan in sa seng thuai angai a ni, heti ngawt chuan kan chelh zo lo tawp ang." an bul vêl melh kual chung hian Sangpuia hian a ti a.

Denga pawh chuan, " Ni e, a siruk lâ in an rawn thawk dâwn anih ngei chu," a lo ti zâwi ve sup a.

Sangpuia chu a tho hlawt a, Chhuansanga- dâr a bêng zauh in, "Anih chuan kan hmanhmawh angai ania, Chhuansang, Hrim-a, hi kaihkuah ila, kan kalpui thei mai ang." tiin Hrim-a te lamah chuan a phei nghal a.

Chhuansanga pawh chuan thawh pahin a silai a chhar a, an kiangah chuan a phei ve ta thuai a.

Hmanhmawh tak a an silai hlo an thun mawlh mawlh lai chuan chau âw tak hian Hrima chuan, " Ka silai hlo pawh kha aw," a rawn ti a, Denga- chuan rang tak a thun sak in a silai chu a ah tîr a, Sangpuia leh Chhuansanga- te chuan Hrima chu an kuai ding a, an pahnih chuan an kaihkuah a, an kut lehlam in an Silai an hûm ve ve a.

Denga- chuan inring tak a silai lek chungin hnung a dâwl a, tichuan an theih ang tâwk a chakin chu ngaw hnuaiah chuan an kal leh ta a.

Tuibur hmuam dâ vel an kal hnu chuan umzui tu an nei ta tlat mai. An hnunglam a Chinghne û ri ruah ruah te chu an reh hleithei lo a, an û ri mai ni lo, an hnim tâwn ri te pawh chu a rawn hnai ta deuh deuh mai.

Chuvangin anni ho pawh chu  an hmanhmawh sauh sauh a, chu ngaw pui an pelh na tûr pawh a hla tawh lo a, thingkung ding te pawh an tlêm tawhin hnim pawh a pik ta lutuk lo a, kal pawh an chak phah ve ta deuh.

Lei pawh a lo ro vin a lung ṭhîl tial tial a, lei hrûl a ṭiau chhûm zîng chiai te pawh chu an lo pan ve ta deuh deuh a, in pal thlûk na khawp vêl a lian lung an awm phauh phauh a, hnim pawh an tlêm in khûp thleng vêl a sâng an ni tlângpui.

Silai a ri dawt a, chinghne pakhat chu a let hlawm tawp a. Chu chu an sîr lam aṭanga rawn ûm tu pakhat a ni, A rawn zuan kân lai takin Denga chuan a kâp hi a lo nia.

Tlan pahin a'n han hawi kual a, an hnunglam aṭang chauh lo pawhin an rawn ûm tih an hre ve chiah a ni.

Tlan pah in Denga chuan a silai hlo a thun leh sawk sawk a, a thun zo hman ṭâwk tih ah an sîr lam aṭang bawkin Chinghne pakhat hian a rawn zuan leh a, ani chuan a lo kap leh zawt a, mahsela a hliam chauh a ni, a ke hma veilam ah a kap fuh a, a na ti chu a râk chiam a, engtin nge a awm zui tih erawh a thlêk hman lo, mahsela a rawn ûm zui tawh lo tih a hria.

Silai hlo a thun hman tawh lo, thinrim tak a hrâm chungin pakhat dang a rawn lang leh nghal a, chu erawh a  silai chuan a lo vei let tawp a.

Chinghne rual chu an hnung lawkah chuan an rawn ri rum rum a, a kaihkuah ber Hrima chuan, " Ṭhiante u, ka ti khawmuang mai mai che u, kan piah deuh ah sâwn min nghat ula, ka lo ti khawtlai ange, " a ti a.

Sangpuia chuan, " Ni lo ve thih leh ruam khat ah, dam leh tlâng khat ah kan ti ang chu." tiin hnunglam a'n hawi a.

Chinghne rual khat hian Denga- chu an lo hnaih tawh hle tih a hmuh chuan, Chhuansanga chu a hrilh vat a, hmanhmawh pheleng a tlân an ni bawk a, an inkar pawh a lo in hlat hman viau mai.

A rem deuh laiah Hrima- chu an nghat a, an pahnih chuan Denga lamah chuan an tlân kîr thuai a.

An silai an kâp a, an theih ang a rangin a hlo an han thun leh thuai a. Denga chuan vawikhat a silai hlo a thun leh hman, chu chuan chinghne pakhat chu a kâp tlu leh a, a dang thun hman anih tawh loh avângin a silai chu a paih a, a chem lek chhuakin a hnunglam a rawn ûm tu chinghne rual lamah chuan a tlân lêt leh ta mai a.

Chu thil an hmuh chuan Sangpuia te ṭhian dun chu an ṭê tuar a, Denga- chu au a. Mahsela ani erawh hawi pawh a rawn hawi kîr lo.

An sîr lam ve ve aṭanga rawn ûm tu te pawh chuan in hrosa a ngur chhur chhur chungin an ṭhian dun chuan an rawn veh ṭan ta.

A khât tâwkin an silai chu an hmet puak zauh zauh a, an tum erawh an hlah lo dûn kher mai, mahsela chutiang chinghne rual bei tûr chuan a hlo sawh chawp zêl ngai chu a beitham lua a ni.

Denga- tlan kir leh chu Chinghne rual nen mit khap kâr an an in pawmchilh a, a chem chu vai thlâwn vek lo mahsela an tam hneh êm avângin dinchhuah leh ngaihna a awm ta bîk lo. "Tlân rawh u" ti a a û ri rawih rawih chu chinghne hrâm in an chilh bo zo ta. Mahsela chu chuan chinghne ho chu a ti khawtlai a, Deng-a taksa khawngaihthlak tak chu an in chuh a, a bân puam chin, a kut bung chu chinghne pahnih hian an in chuh a, hnim pik kâr lamah an tlanbo pui ta daih a.

A taksa ṭhenkhat dang erawh anla in chuh luih luih a. An vai erawh chuan an ni lo, a tam zâwk chuan in hrosa chhur chhur chung hian Sangpuia te pahnih lam an pan a.

Mitkhap kâr a'n an rawn pun belh zêl a, Hrima- silai pawh a khât tâwkin rî ta khauh khauh mai, an ṭhianpa Denga- chhan tlâk a ni tawh lo tih an hria a, mahsela tlân leh thei an ni tawh bîk lo.

Chinghne rual chuan an rawn tam hneh leh tawh viau mai a, an kah thlûk leh zauh ṭhin avâng leh silai rî avâng chauh in an rawn bawh ngam lo niin an hria a. Chuvang chuan pakhat in silai hlo a thun chhûngin pakhat in a lo kap zel a, chumi pah chuan an ṭhian Hrima- lam an pan hret hret zêl a.

Hrima- chuan a silai chu harsa ti tak chungin a lo lek a, a sîr lawk a rawn veh tu chinghne hnai zual deuh apiang chu a lo kâp ve zel hi a lo ni a, a ṭhiante pahnih ina a kiang an lo thlen chuan an pathum a silai hlo pawh chuan a daih tawh kher âwm lo ve.

"Kan thei ang anga kan in saseng pah angai."  tiin Sangpuia chuan Hrima- chu hmanhmawh angreng tak hian a kuah ding a, Hrima duh lo chung paw bahlât in a tlân pui ta. Chhuansanga- pawh an hnungah silai hmet puak chung zêl in a rawn tlân ve a.

Mahsela thui pawh an tlân hman lo, Sangpuia leh Hrima chu an ṭé ṭhawt a, khâm sâng tak maiah hian an tlân liam ta vawn vawn mai a. Chhuansanga pawh chu a tla ve teuh kher mai.

Chu ngaw zau tak, an tlanna lam chu a lo tâwp thut chu niin, a tâwp ah khâm sâng êm êm mai hi a lo bir thla vut mai a, a sângin a hnuailam chu a thim kûk mai a, thla pawh a liam ṭan avângin a thim tawh angreng khawp mai.

Chhuansanga chu a thaw ri hrâwk a, a ṭhian te han auh hman pawh a ni lo, chinghne rual khat hian an rawn nangching ve leh nghal si a.

A ipte pui a a chem pawh a phawrh hman tawh lo, a silai chu a han vai nghal thuak thuak a, chinghne koham tak tak sawm rual zet hian an vir tuau tuau a.

A hmalam ah chinghne rual in an ngur chhur chhur a, a hnunglam lah khâm sâng tak a awm bawk si. Chuvang chuan thih dawn rau rau chuan a tam thei ang ber ka thihchilh ang ti niawm takin a silai vai a an kian deuh lai chuan a chem a phawrh vat a, a silai chu chinghne ho lamah a vawrh phei a, chumi kâr, mitkhap kâr chhûng lek, a silai theh phei avânga an darh hak lai tak chuan ṭanhmun a siam rem thuai a.

Pali vel hian an rawn pan leh a, a ke ah seh tum in alamah an rawn dawk leh zawk zawk ṭhîn a. An chêt ran hlawm êm avâng leh an in hrosa thâwm te avâng chuan ngaihtuahna fîm pawh a nei thei bîk meuh lo.

Chinghnia lah chu an rawn tam belh tulh tulh mai a, chhaih chauh phawt tum niawm takin a chângin an veh thauh thauh ringawt a, a chângin bawhchilh tum niawm tak hian an rawn bâwr leh tuau tuau bawk si.

Chutiang vel a rei vak lo an in chhaih hnu chuan rang zet hian pakhat hi a rawn dawk zawk a, Chhuansanga- chem humna lam bân bul ah tak mai hian a rawn hap thut a.

Chuveleh a ngal leh châwn ah te chuan an rawn bâwr huk a, an hap ta bawrh bawrh mai a. 

An rawn che rang teh thut êm a, ngaihtuahna fîm neih hman pawh a ni lo, Chhuansanga chu a tlu ta a, mahsela lei châr ah erawh a ni lo.

Chu khâm mawng thim khup maiah chuan chinghne rual nen chuan an tla thla ta vawn vawn mai a.

*********************************************************************************************************

Tui a luak chhuak puat a, khuh bawrh bawrh chung a a han men chuan a ṭhianpa Sangpuia hian a lo ṭhutchilh reng hi a lo ni a.

Chau zet a ṭhu chhuak in a han hawi vêl a, Ni awm dân aṭang chuan chawfâk hun âwm vêl a ni.

Sangpuia chu a thaw hak a, " Ka beidawng hman ṭêp asin."  a ti a. Chhuansanga chuan,"  Khawnge kan awm, engtin nge...engtin nge ni ta, khawnge Hrima..." a ti buai nuai a.

" Tui hian a lên thla zêl anih loh pawhin a hnâr lamah khân a awm a ni ang," Sangpuia chuan a han ti a, chutah lui hnâr lam chu hawiin, " Khi lamah khi chuan a awm ka ring lo." a ti thâwp leh sat a.

An awmna ṭiau pho thlang deuh, tui chîm chin ah hian Chinghne pakhat ruang hi a let ngât a.  An awmna aṭanga lui hnar lam chu a hmuh thui theih loh kher mai, a chhan chu an awmna lui ral lehlam chu bang ang deuh hian lui hnar lamah a ding chho ur mai a, a hnâr lam thui vak lo ah hian a kâwi daih bawk si a.

Lui mawng lam erawh chu chil chhak phâk aia thui vêl hret ah hian lengkir a sang angreng tak a awm thung a, a thlang lamah chuan lengkir chhawr dawh sâng lo tê tê in a in chhawr dawh thla duât thung a.

An awmna ṭiaupho chu a thui vak lo, hlam sâwm velah     awih pangper sang vak lo hi a bawk zun mai a, chu chu lui mawng lam thlengin di hmun vek a ni thung, a hnâr lam erawh chu thui vak lo ah thing a ding ṭhut a, lung khawk rawk bang a awm leh a.

" Ti rawh, khimi di hmun lam khi i pan teh ang, lui hnâr lam khi kha ngaw anchhe dawng lam kha anih chuan kan pan lam tûr pawh a ni ngei ang." tiin Sangpuia chu a tho chhuak a, awih pang lam chu a thlir dauh dauh a.

Chhuansanga pawh khuh bawrh bawrh chung hian a tho a, " Kan thil tawn te kha han dam chhuah san theih anih pawh ka ring lo hial asin." tiin Di hmun lam pan chuan a kal nghal a, Sangpuia chuan ani chu zuiin, " Khuanu in kan tan a a ruat a ni lo tihna a ni ngei ang, anih loh chuan kan vanneih vâng liau liau vâng a ni ang."  tiin a rawn tuihnih ve leh a.

Chu di hmun awih tlân deuh ah chuan harsa ti vak lovin an lâwn chho a, hriamhrei engmah an ken tawh loh avâng chuan an lâwn sâwt viau mai.

"Kan khua a hlat vak ka ring tawh lo nâ in helai hmun a zan hun han hman leh ringawt chu a phûr awm tehchiam si lo a, khawthim hma ngei in helai hmun hi chhuahsan ila ka duh a ni." Sangpuia- chuan a ti a. Chhuansanga chuan, " Ni chiah mai, Chul emaw khawi khaw lo emaw tal chu kan hmuh thuai i beisei teh ang." a lo ti ve a.

Chutia ti ti chung zêl chuan di hmun chu an lâwn a, rei vak lo ah an lâwn chhuak a, a mual lehlam erawh a lo awih vak tawh lo, mahsela mual thui angreng tak, di hmun tho hi an hmalam ah chuan a lo awm leh a, chumi chu ngaw chhah lo zau fahran mai ah hian a in khawh lût leh a.

Chung hmun te chu chawhnu her zawng an zawh a, a ram hmelhmang pawh an hriat hnu a lo ang ta deuh deuh a, chu chuan an thla pawh a ti muangin an rilru pawh a ti harh a, an kal sâwt phah viau mai.

Khaw thim rualin an khaw lo an thleng a, an chauh tawh êm avângin thlam pakhat ah hian an lût râwih a, meitalh lo awm te chuan mei chhêm in thlam chhung a maipawl leh mai sakhal lo awm te chu an ei ta hawn hawn a.

An eitûr hmuh ang ang hmang te a an inhnawhpuar zawh chuan khua an han chuan a, mahsela a lo reh diak mai, chu an awmna lo ri te ho thlam ah pawh chuan êng a awm hlek lo mai anih chu.

Mahsela chungte chuan an rilru a luah hman tak tak lo.

An puan hmuh ang ang chuan an hliam te an tuam a, tap bulah chuan tui deuhin an muhil ta bawrh bawrh a.

A tuk ah chuan ni chhuah rualin an khaw lam pan in an chhuak a, mahsela kawng lak a feh tûr tumah an tawh loh avâng chuan mak an ti angreng hle mai.

Khaw dai hnai mai an thlen chuan boruak a meikhu chho   nguah nguah an han hmu a, ngaihṭha lo tak chungin an tlân thuai thuai a, khua an han thlen chuan an rin ang chiah a lo thleng anih chu.

In ding lai rêng a lo awm tawh lo a, an khaw kawtchhuah ah te chuan mitthi ruang an lo let pheng phung mai a, mihring dam hmel rêng hmuh tûr an awm lo.

Sangpuia te in chu a kâng ral deuh thaw a, an in kiang lawk a Chhuansanga te in pawh  a him bîk chuang lo, a lo tlu sawp nuai a, an tuium leh inchhung bungrua te chu a vêlah an lo darh nuai a.

An pahnih chuan rang takin tual a mi ruang ho lamah chuan an tlan thuai a, la dam an awm leh awm loh an   han en a, mitthi te taksa ah chuan silai a kahna emaw, fei a chhun na leh chem a sahna hnu hma rêng hmuh tûr a awm loh avâng chuan mak an ti dûn kher mai.

A tam zâwk chu an pangti a kim lo hlawm a, an kawchhungte a chhuak nasa hlawm hle a, Tin, an hmai leh taksa dang a kut tin  hriam tak a hamna hnu hma a tam êm avâng chuan engvang a thi nge an nih a, an chung ah engnge thleng tih chu han rin mai tûr an hrethiam lo dûn kher mai.

Lungchhe tak a tual lai a Sangpuia pa, Lal upa min- ruang, hmai hêk huam an ṭhutchilh reng lai chuan hmeichhe na tuar rûm ri hi an piah lawk a in kâng bâng aṭang chuan a rawn ri a.

Chu veleh thâwm lo chhuahna lam ah chuan rang takin an tlan phei vat a.