THE CASE BOOK OF CHESTER BURNLEY | The Comfort Inn Mystery (Notebook - 4)

​THE CASEBOOK OF CHESTER BURNLEY : The Comfort Inn Mystery (Notebook - 4)

- Chester Ralte Sr

Taksa sawizawi tùm êm êm vâng pawh ni chuang lo, zîng lam harh hma lutuk leh mutthilh theih tawh loh avânga ka tei chhuak chu a lo tih chi phian mai, motor vei vak tlêm lai a boruak thianghlim tak ka'n hîp chu dam sawng sawng hian ka in hre hial mai. Naupan deuh lai ata tawh mi tawmim leh harhvâng lo chi, kawtthler a ṭhiante football  khel lai pawh a sir aṭanga lo en ve mai chi leh min sawm chuan tih beidawn aia tel ve leh mai ṭhîn kha ka nia, rawlthar chhoh vel lai pawhin infiamna ai chuan mahni pindan a lehkhabu chhiar ka duh zâwk fo ṭhîn.

Chumi avâng erawh chuan ka chut chuang hauh lo ania, infiamna lam a ka han tel ve pawh hian  thei pawl chu ka ni ve mai zêl a, ka tui lohna a ni hran lo a, mahni a awm nuam ka tih vâng zâwk a ni ta ve ang.

Zing thawhhma hrim hrim hi ka tui lohna lam a niin ka hria, ka han inchhui lêt chiam pawh hian hma tak a thawh a, insawizawi aiin, tlai tak a zawi sa a thawh hi ka ngah zâwk tlat a ni. Mahsela a hun a lo thlen chuan ka ṭhianpa ang deuh hian ka in siam rem leh mai thei zêl a, Siamtu malsawmna pawh a ni ang e.

Watford kawtthler ka fan chiam hnu chuan  kan pindan luahlai lam pan in muangchangin ka kal bek bek a, kan Apartment kiang ka thlen phei leh chuan ka ṭhianpa inlêng ni ngei tûr a ni; patling kum sawmnga(50) bâwr vêl tûr, incheina pawh changkang tehchiam lo, kawr dung sei lum chi ha hlûn mai hi kan pindan panna kailawn ah chuan a rawn chhuk thla bauh bauh a, kan in pelh lai chuan a hmel chu rilru buai leh ṭap mai tûr niawm tak hian ka han hmu tlat mai pek a.  Kan in pelh lai chuan a lukhum phawkin zing lam chibai min han bûk zauh a, keipawh chuan ka lo chhâng lêt ve na in ṭawngkam erawh chuan kan in be lo.

A la hmâ angreng viau nâ in inchhung ka han luh chuan ka ṭhianpa chu chhuah mai inpeih hian a lo in fam leh ap tawh mai a.

Hna a neih loh chuan ka ṭhianpa hi a mu rei thei viau mai a, hna a neih erawh chuan ka zan mut hma te hian zing a lo tho leh hman ṭhîn a, a châng chuan zankhua in ṭhutkhawmna pindan a ṭhutthleng dûp tâwi chi ah chuan a ṭhu tlaivar ṭhak a, chuvang erawh chuan mutchhuak leh chauh a nei awm pawhin alang leh chuang si lo.

Chutia inchhung ka han luh rual chuan ka ṭhianpa chuan, "Caldwell, tukin zîng chu min thawhkhalh ve mial a, Coffee pawh ka lum so tawh kha." a lo ti sup a.

Kei lah chuan," Zinglam ah mu thei hek lo i, inleng i va nei hmâ ve." ti chungin  coffee lum thar thar chu ka in thlit a, ṭhutkhawmna pindan lamah chuan ka phei zui ve leh a.

A sîr a ṭhuthmun ka rem lai chuan ani chuan," Thil anihna lang chiang êm êm, mahse chhuichhuah loh a zu zi ral mai thei lam a ni." a ti zâwi leh sap a.

"A eng lam chu ni maw," ka lo tih chuan, amah bawk chuan, " i hre lutuk, thla hmasa, hmasa leh a thil thleng kha maw le, London hotel pakhat a hmeichhe ruang an chhar chungchang kha." a tih tâk ah chuan ka vâr uar uar a.

"Nula khawngaih thlak tak kha maw, a hmel lah kha a ṭha nasa mai si a, a uiawm ka lo ti rilru khawp asin....Kan thu dang alai chuan tukin a i inleng kha, kha nu chi leh kuang lam a ni ang chu maw?." ka'n ti deuh hluai a.

Ani chuan, " A pa anih kha, min hmu tûrin Wareham- aṭangin a rawn kal vang vang a ni âwm a, Rêl chuan man lah a to nasa mai si a, a haw leh lam ah pawh a chuang ngei dâwn si a." a ti  vawng vawng a.

" Rel chuan man maw, Bus- pawh a awm alawm," ka ti liam puat a.

Amah bawk chuan rang zet hian, " An chhungkaw khawsak ngaihtuah chuan a to êm êm ringawt mai a ni, a hmanhmawh êm avângin a kal lam leh haw lam kha Rel- ah a chuang ngei ang.

Chuti zât sum sêng chuan kei mi rawn hmu a ni a, beiseina chhe tê ala neih ve ṭâwk ṭâwk vâng a ni. Ka theihtâwp chhuah sak hi ka ba tlat." tiin a tho hluai a, a ṭhutna hnung lam a tukverh kiangah chuan kawtthlêr lam hawiin a ding ta reng a.

" Thla thum lai aliam tawh chu a ni mai a, kan sawrkar uisathiam ho lah chuan beng an la sik mai mai reng chu ania,  kum pawh vei sela eng an ang chuang hlei lo'ng e, an chêt dan hi van ek khum tum ang vel a ni,  chuvang tak chuan kan nula-i  pa beidawng khân min rawn hmu chu ania." thinrim hmel tak hian a ti thâwp leh sat a.

Kei chuan, " Chanchinbu leh Social Media lam a an rawn tarlan dân tam tak aṭang pawh hian ngaihdan felfai tak a siam theih reng a ni lawm ni, chutia han chhui vak a ngaihna tûr pawh awm in ka hre lo, kan Scotland Yard- te hian kan nula ṭhianpa, a zin vah pui pa kha hmangaihna tel lovin  han tuai deuh hlek sela engkim a fel mai dâwn a ni lawmni?" ka lo ti thuai a.

Ka ṭhianpa chuan, "Anni chuan an thei maw le, indâwp dân pawh a zir a zir chhuak inti ngat kha an ni hlawm a, mahsela an zirna ah mi neinung leh challang te dâwp dân tûr an zir tel lo pawh a ni ta ve ang." a tiin rilru hah hmel deuh hian a rûm zui hak a.

Bangbo zet a,"Engtia zir tel lo maw?" ka han  tih chuan.

Ani chuan, " Kan nula khawngaihthlak te kha chhungkaw neinung an ni hran lo a, a ṭhianpa leh a zin vah pui pa te erawh kha chu duh apiang lei mai thei chhungkua aṭanga rawn chawrchhuak a ni a, chuvangin kan sawrkar uisathiam te hian an dâwp ve ngam hleinem,  thudik aiin sum hi mihring te hian hman nuam kan ti miau mai si a." a ti leh hluai a.

"Ka hrethiam e, a enga pawh chu nisela, thil thlen dan tûr chu i ri ruang chhin tawh rêng rêng em? Chanchinbu leh TV- lam a an sawi dân aṭang hian." ka ti leh a.

Ani chuan, " A tîr khân ka lo ngaihsak vak lo a, mahsela tun hnu a ka han chhuikîr hian tualthattu chu hre tawh ah ka in ngai a, amah man theihna leh mawhpuh theihna tûr erawh evidence- engmah ka la hre thei lo thung. Mahse ka la hre mawlh ang." a ti leh a.

Ka hma zâwn Dawhkan a chanchinbu lo awm darh nuai chu ka'n ban a, " Hei chu i inleng pâ rawn ken kha a ni maw, an chuar in an hlui tawh êm mai." ka ti a.

Ani chu muangchangin a lo inher a, a ṭhutna ngai ah chuan a rawn ṭhu leh a, chutia ṭhut pah chuan,"  London Tribune, ruang chhar tuk, tuk leh tlai lam a chhuak anih kha, han chhiar nawn leh teh." tiin ani chu ṭhutthleng nghenchhan nghêngin a maimitchhing diar diar a.

" COMFORT INN, HYDE PARK- AH NULA RUANG CHHAR A NI:

Nimin April ni 4, 2012- tlai lam dâr thum vêl khân, Comfort Inn, Hyde Park- ah hmeichhe ruang chhar a ni a,   a ruang hi Scotland Yard- hmunpui lamah Post Mortem tûr a lâk a ni. He hmeichhia hi hemi khualbuk a thleng, Amy Foster, Wareham, Dorset County bial a chêng ni a hriat a ni."

"A va han tâwi lulai êm(!)" ka'n ti zui chiam a.

" A ruang ka hmu lo a, a thlenna khualbuk lah ka la tlawh miah lo bawk a." la maimitchhing chung chuan a rawn ti nuah nuah a.

Kei chuan Chanchinbu thleh pah hian," Tukin ah a pa kâ ngei aṭangin thu thar leh a kim lo lai i hriat belh ngei ka beisei." nghahhlelh hmel fahran hian ka lo ti a, ani chu a rawn meng a.

"Caldwell, ka sawi tawh ang khân sawrkar uisathiam te'n a an chhui chian duh loh avânga a lungawi loh thu bâk ah a ruang chungchang thu tlem te bâk lo chu ka lo hriat tawh vek an ni." a ti a.

Kei chuan," Ruang chu?." ka lo ti hluai a.

"A pa khân a hmai vel chu a dum hle a ti a, chu chu a ni mai." a ti a.

Chutah a kawr ipte a Cigar- a ah lai chu phawrh in a ṭan tê tê a, "Kei ai chuan he thil hi a  thlen tirh ata i bengkhawn viau in ka hria a, thil thlen dân awm ang tûr pawh i ngaihdan hriat a chakawm kher mai." a ti zui a.

Kei chuan chanchinbu chu dawnkan a theh pheiin ṭhuthmun ka'n rem ṭha leh té té a, inti puithu deuh tak hian,

" Thil thlen dan ri ruang niawm ka zeldin leh ka ngaihdan hi a dang vak chuang lo, Tunlai khawvel ah chuan Social Media- a chak tawh a, mi hian thil kan chîk tawhin thil thlen dan kan sawi nasa a, ka hmuh ve phâk chin pawh hi ka ngaihdan ang tho an ni, tam tak chu.

Mahsela felfai deuh in ka'n sawi hrim hrim ange, Kha nula boral ta Amy Foster- kha, a ngaihzawng,  kum riat lai a lo zui tawh Theodore Zachary White- nen California, US - lam chhuak Company pakhat, London a rawn in chhawp thar E.O (Essential Oil), a interview nei tûr a Wareham aṭanga London- a rawn kal an ni a.

He khualbuk ah hian room khat ah thleng dûn lovin room indawt chiah ah an thleng dûn a, chu chu April ni 3, 2012- kha a ni.

Chumi zan chuan Miss Amy chu a bo tiin a ṭhianpa hian a sawi kha a ni a, chu pawh i hriat hnu vek an ni ang chu." ka'n ti a.

Ani chuan," Chuan...." tiin a mit a rawn meng zuau a, Kei chuan sawi chhunzawm lehin,

"Khami zân khân nula kha, an thlenna khualbuk kiang lawk a dawr tê ah a kal niawmin sawi a ni a, chu chu Khualbuk a  CCTV  leh a thil leina dawr neitu te kâ aṭanga hriat theih a ni. Tichuan a  mamawh a dapkhawm zawh a, an thlenna lam a a kîr leh chu khualbuk Lift ah a chuang a." ka tih lai chuan ka ṭhianpa chuan,

"A dik, an thlenna room kha building chhâwng lî na ah daih a ni a, kailawn ah chuan a chho lo tawp ang." a lo ti leh a.

Kei chuan," Helai ah tak hian ania kha thil kha a thlen tâk ni. Lo ngaithla chiang la aw helai tak hi, A ṭhianpa khâ nula pindan lam ah len luh a tum a, mahse a lo awm loh avângin a call a, ani chuan dawr ah a kal thu a lo hrilh ngei ang.

Hetih lai,  phone aṭanga an inbiak lai hian an in hau tawh pawh a ni thei a, chuvangin a ṭhianpa Theodore Zachary White- hi Amy Foster- hmuh tumin inhnuai lamah thinrim tak chungin a chhuk a.

Amy- nen chuan Ground floor ah intâwk in, an in hnial deuh a, an pindan awmna floor pan tûrin Lift ah an chuang chho dun zui leh bawk a, mahsela a hriat loh a dawr a a lo kal daih avânga an in hauhna chu Lift chhûngah pawh chuan an chhunzawm ta zêl a, Lift an chhuahsan hnu, a kiang a anla awmlai chuan kut hial an in thlâk ta a, chutah chuan kan nula Amy- chu vanduai thlâk takin a ṭhianpa T.Zachary- nen a an in chai buaina lamah Bathlâr aṭang chuan a tla ta a ni.

Chanchin kan hriat dân in Lift- awmna hi an pindan awmna kiang lawk a ni a, an thlenna pindan Corridor ah tho a awm a, chumi Lift ep ah chuan Bathlar sei vak lo a awm a, chu bathlar chu Khualbuk hnung kawmchar lam ami a ni a, Khualbuk hnunglam hi Lungrem chhah leh nalh tak feet ruk a sâng a hung a ni." ka han ti a.

Ka ṭhianpa chuan," Bathlar aṭanga tla nisela a tlâkna zâwn ah a ruang chu a awm dâwn lawmni? mahsela  ruang kha bathlar hnuai zâwn inchhûng lam ah hmuh a ni leh daih si a?" a rawn ti leh khauh a.

Kei chuan rang zet in, " Khatia bathlar aṭanga a han tla kha a chatthla nghal chiah lovang a, a zuk tlâkna lai kha khualbuk chhâwng hnuai ber kawmchar lam, Garage- atan a an hman ah a ni a, ṭanpui tu tûr an awm dah law maw tiin a theih ang angin a vâk sawn pawh a ni ve thei tlat." ka ti leh a.

" Thil ni ve thei tho chu a ni, mahsela CCTV aṭanga a lan dân in, khami zân khân khualbuk kawmchar hnuai lam, khami Garage hungtu lungrem ah khân hmeichhe pakhat, hmanhmawh tak a a lâwn chhuak lai alang an ti a ni lawm ni.?" Ka ṭhianpa chuan a ti leh a.

Kei chuan," Inzawmna an nei dâwn emaw ni chu?" tiin ka lo chhâng leh diam a.

"  Inzawmna a nei thei a, a nei lo thei bawk. Khami zân a khualbuk a thil thleng zawng zawng khân he tawhsual nen hian inzawmna an nei vek kher lo ang. Chu chu thil chiang sa a ni a, mahse kha hmeichhia kha a tel ve anih zawngin zawn hmuh ngei chi chu a ni ang." a ti leh a.

" Zawn hmuh ngaihna a awm ngut ange maw?" ka tih chuan, ani chuan, " Kan tum dawn lawm, anih loh pawhin he thil hi a nihna dik tak ka hailang ngei ang, i ngaihdan kha a dikna chen pawh a awm a, lo dik pawh nisela Evidence- ber a awm loh chuan kan tân chuan rinhlelh man ngawt a theih si loh." tiin min chhâng a.

" Kei chuan, " Kan sawrkar uisathiam te chuan i lo inrawlh ve chuan an ngaithiam hauh lo ang le, buaina kan ti punlun zâwk ang mai ang tih pawh ka hlau hlel lo ve." ka ti a.

Ani chuan," Chu chu hriat sa a ni alawm, mahsela kan nula chhungte hian an fanu vanduaina tawh dân thudik hi hre ngei sela ka duh a, an tân ka thawk ang, " tiin min chhâng a.

Chutah, " Kan tem vir ta sa sa bawk a, tukṭhuan ei hma in London- lam kan pan mai dawn em ni? Tun aṭanga  darkar chanve ah Rel a chhuak dawn ania." a ti zui leh zat a.

Ka ṭhianpa sawi ang tak chuan, chumi hun aṭanga darkar chanve ah chuan Watford Junction kan thleng phei dêr a, Chuta ṭang chuan Rel- in Shepherds Bush-  thleng hahdam takin kan tlân a, Shepherds Bush- ah chuan kan chuanna Rel- kan thlâk hnu in Lancaster Gate Station- rei lo te ah kan thleng  leh thuai a, chumi hnuin  ke in kan kal leh ta a, Ka ṭhianpa duhdan in, Bayswater Road, kawng zau leh mihring veivak tlemna lamah kal leh ta zêl a, chutiang a minute sawm vel lai inbe mang lova kan kal hnu chuan, kawng dinglam pangah a lo peng a, l Queensborough Terrace- panna a lo ni a, chutah chuan kal in,  Queensborough Terrace- ah kan lut leh a, chumi hnu chuan vei lam a in pathumna, building var nalh tak mai, Khualbuk changkang tak Comfort Inn- chu kan thleng ta, Kan kal kual in kawng a thui angreng viau a, a hahthlak angreng viau mai.

Chu kan hma lawk a chhiatna rapthlak leh thinrim thlak tak mai thlenna Khualbuk, Comfort Inn- chu chiang lehzualin a awm dan ka'n tarlang leh lawk ang nge.

Khualbuk hma lam chuan kawtzâwl a nei châu angreng hle mai a, a  a dithlifarfêm- zâwl deuh thaw in in hmalam zawng chu thîr pal feet li vel a sângin a in hung a, a inchhûng luhna hrim hrim chu kawngkharpui pathum awmin, chûng kawngkhar te inkâr chu tukverh tê pahnih ṭheuh in a daidang leh vek a, ka ṭhianpa sawi ang khân ground floor chhiar tel loh in, chu in chu chhâwng lî ngei a lo ni bawk.

Chûng chhâwng te chuan hmalam ah tukverh pakua ṭheuh, nalh tak a in rem ṭhat an nei vek a. Luhchhuah nan a an hman ber niawm tak, kawngkharpui dinglam sîr ber lam chu muangchangin kan pan dûn a.

Kawngka luh hma, a dithlifarfêm hmalam ah chuan Comfort Inn- tih hi lianpuiin a lo intâr a, chumi intârna aṭanga kawngkapui inkar, hulhhliap chu feet sawm vel zet a sei leh feet nga vel a zau a ni.

Kawngkhar chhung dinglam ah chuan khualchhawn nula hmui vâm hiam mai pakhat hi uniform felfai zet ha hian a lo ṭhû a, a hma a dawhkan ah chuan thluak khawlnei a lo inchhawp a, a ṭhutna hnung chung sâng bangkil ah chuan CCTV a lo awm bawk a.

A dawhkan hmalam ah chuan nalh fê mai hian COMFORT INN- tih hi a in chhu kalh mai bawk a.

Ka ṭhianpa chu khualchhawn nu lamah chuan pheiin zawite hian a va be sû sû a, a card pawh a hmuh zauh lai ka hmu.

Chutah chu nula chuan ring vak lo hian," Theih e, chhawng li na room no 400 leh 401-ah a ni a, mahsela room chhung erawh luh kan remti rih lo ang tih ka hlau khawp mai." nelawm tak a nui seih chung hian a ti a.

Ka ṭhianpa in'a " a pawi lo e, tichuan kawmchar lam garage pawh hi..." a tih lai in nula chuan, " Garage hi hemi building dinglam ah sawn a gate chu a awm a, hemi chhûng lam aṭang pawh hian kal theih chu a ni a," tiin a lo sawi a.

A ṭhutna chhak lam a corridor lam chu kâwk in," Khimi tâwp ah khian basement luhthlâkna chu a awm bawk.." a ti zui zat a.

Ka ṭhianpa chuan, "A lawmawm e, ka ṭhian Dr.Caldwell- nen hian a hmunhma han thlir thuak kan duh a, i lo remti hlauh chu a kan lawm kher mai." tiin a kut chuan min han hui a.

"Lo kal rawh le," a tih chuan kei pawh chuan i he lovin  ka zui ta nghal a.

Khualchhawn nu ṭhutna piah deuh a ṭhutkhawmna niawm tak ah chuan mî, tlem azâwng an lo ṭhu khawm laih laih a.

Keini chuan Corridor lam chu pan in Inkhaichhohna lo awm hmasa ber ah chuan kan chuang chho a.

Lift- aṭanga kan chhuah chuan a hma a ka sawi tâk  ang khân a ep ah chiah chuan bathlar chu a lo awm chiah a. Lift ep ah chiah chuan.

Bathlar dinglam leh veilam ah chuan Corridor- awm phei  ve ve in chu Lift dinglam room pathumna leh pali na chu room number 400 leh 401- na chu a ni.

Bathlar lamah chuan kan phei dûn a, he bathlar hi a thui hran lo a, feet ruk vel emaw a sei a ni ang, a bâk a dinglam chu darthlalang bang vek a ni thung a.

Hemi kawmchar lam in awmdan hi han sawi lang leh lawk ila, 'L' - shape kan tih ang deuh hian a awm a,  bathlar dinglam chu darthlalang bang in a awm phei tluan kan tih tawh kha. A veilam erawh chu 'L' - shape inṭanna lai tak a ni thung a.

A hnuailam chu a sâng angreng hle mai a, in hmalam a chhâwng li chu a hnunglam ah chuan basement zawng zawng nen chhâwng ruk lai a lo ni a.

A hnuai zâwn tualzawl chu a zau vak lo nâ in motor pathum chu a lo ding mêk a.

Chu tualzawl zauh lam chu kan awmna bathlar lam aṭang chuan, a fencing thleng chuan feet 40 vel a ni ang a, mahsela 'L' shape ang a ni kan tih tawh kha, bathlar veilam chiah ah chuan room a awm leh a, 'L' angin tual zawl lam ah chuan a a tawlh chho dû a.

Fencing pawnlam chiah a building lian tak tak ding te tan pawh chuan kan awmna lai chu  an kawmchar lam an ni ve tho a ni.

 

Ka ṭhianpa chuan uluk takin bathlar hnuailam chu rei tak chhûng a melh ngar ngar a, ka sawi tawh ang khan, bathlar hnuai, Building kawmchar lam tualzawl leh garage te chu a zau zawng leh awmdan te, chetsualna thlen lai te nen lam chuan a ngaihtuah chhuak vek ni hian alang.

Chumi hnu ah chuan ngaihtuah mûk hmel deuh hian a rawn hawi chhuak a,  a chal ti chuar nûng nûng chung hian a vei leh ta thauh thauh a, kan ep a Lift leh Corridor te chu uluk fahran mai hian a thlêk leh a, 

"Inhnuai lamah kan zu chhuk ve thung dawn em ni ang." a han ti a, kei chuan ka zui ve nghal zat a, Lift a chhuk lovin kailawn rahka tam zet mai ah chuan muangchang hian kan chhuk thla dûn bauh bauh a.

"Hriat belh i nei thei em?" ti a ka'n zawh chuan, " Ka ngaihdan awmsa ka nemnghet a ni mai e." ti chauh in min chhâng a.

Kei chuan, " Chu, bathlar aṭanga tla thla anih chu i ring lo tihna a ni maw?" ka ti leh a. Ani chuan, "En teh Caldwell, A ṭhianpa in a namthla emaw, a tihhlum anih i  rinna ah hian i rin sual ka ring hauh lo. He tualthihna chungchang ah hian a ṭhianpa hi mawhphur tu chu a ni ngei a, mahsela thudik chu a in puan phawt loh chuan a zuzi ngei dawn ka tih tawh kha, kan sawrkar uisathiam te hian an in puantir awm tawp si lo a, chu chu a buaithlakna lai a ni." a ti ta a.

A hma a khualchhawn awmna ah khan chhuak thla leh in kha nu ina  min kawhhmuh angin Inchhung lam aṭang chuan inhnuai lam chu kan chhuak tlang lehnghal a.

Basement ah chuan mi tumah hmuh tûr an lo awm lo. "Helai hmun hi ruang an hmuhna chu a ni." tiin a bulah chuan ka'n ṭhu tung a.

Burnley- erawh chu ka thusawi  hria awm pawhin alang lo, a hma lawk a kan awmna bathlar lam chu ka hau hian thlîr daih thung.

Chu ruang awmna chu bathlar nen chuan a in zâwn lo kher mai, inchhung lam, chu in ban lian tak phên deuh ah hian a lo ni a, ka ṭhianpa sawi ang tak khân.

"Ruang kha a tuk tlailam ah chauh an hmu iti ti raw"? ka lam hawi chung chuan a rawn ti a.

Kei chuan thawh kân pah hian," Ni e, chu chu Scotland Yard- lam thuchhuah dan a ni." ka lo ti a.

"An hmu hma ngawt mai, khami lai khan mikhual thleng an tam lem lo a ni ngei ang." Burnley chuan a ti leh a.

"Kei chuan, An hmu har ngawt zâwk ka lo tia, mahsela kan uisathiam rual te thulakna kha kan nula  ṭhianpa T.Zachary- a ni miau a." ka lo ti a.

Burnley chuan,"A eng ah chuan maw". a rawn ti deuh hû a, Kei chuan hawikual pahin, " Khami zân khan zînglam dar hnih vel ah kan nula Amy- phone aṭangin a ṭhianpa hian Amy- chhungte a call a, a pindan a Amy- awm loh thu leh mipa nen khualbuk an chhuahsan thu a sawi a, tin CCTV aṭanga an hmuh hmeichhia kawrdum ha fencing a a lawn liam kha Zachary- khãn Amy anih thu te pawh a sawi tlat alawm." ka ti a.

Ani chuan chek tlak tlak pah hian," Chuvang chuan Amy- chu pawnlam a bo angin report a ni tihna a ni a, a pa pawh khan a sawi alawm, chu nu tlanchhuak lai video pawh min rawn thawn a ti bawk a," a ti leh a.

Chutah fencing lam pan chuan a kal nghal a, phun nuah nuah pah hian a kâwk kual a, kei pawh chuan ka zui ve thuai a. Fencing hi Khualbuk basement zawn, kawmchar lam tualzawl a ni. 

Fencing vei lam zâwk chu pan in, " Helai hi a ni ngei ang, ani chiah mai, saw mi fencing, khualbuk ep ami saw chu lawn theihna a ni lo, chubâkah inchunglam aṭang khian alang chiang a, ding lam pawh hi a ni thei lo, a sâng lutuk." a ti mawlh mawlh a.

" A dik chiah mai, Caldwell, hemi lai ah ngei hian a lawn liam a ni, a chhan chu bawlhhlawh paihkhawmna zêm ah hian lawnkai a awlsam em alawm," tih pah in chulai fencing hrûl a bawlhhlawh phur Truck ina an hnuh mai theih, truck body ang deuh thîr bawlhhlawh bâwm lian tak ah chuan a zuang lawn a.

''Enteh Caldwell, Fencing pawn lam hi chu a sâng vak lo a, chubakah helai a in ding ho kawmchar lam hi a ni phei vek tawh a, street light a awm loh avângin khualbuk leh a bulhnai vel in ho aṭanga êng lo chhuak ring mai a êng a ni a, thil sual tih nan a êng nuam tawk chiah a ni lehnghal." a ti deuh duah a.

Kei chuan chu bawlhhlawh bâwm pui kiang a alluminium- bawlhhlawm bâwm chhin nei tlu deuh nuai chu kâwk in," Heng ho hi a rahchhan an ni ngei ang," ka lo ti ve bawk a.

Rawn zuan thlâk auh pah hian, " Eng emaw hlauh nei anih loh pawhin a hmanhmawh viau a ni ang, ni lo sela chuan Gate lam aṭangin a chhuak ngei ang." a ti leh a.

Kei chuan," Gate ah tlan chhuak dawn sela chuan khualbuk kawtchhuah lama a chhuah a ngaih bâkah bîk bo na a vâng dawn a," ka lo ti a.

Ani chuan, "Ni chiah mai, a hmel emaw amah hrim hrim pawh kha tuma hmuh a duh lo tihna a ni mai, anih loh pawhin khualbuk garage gate thleng tûr chuan feet sawm riat emaw lai a tlân a ngai dawn a, fencing erawh sawlai ruang awmna aṭanga feet sawmhnih vel chauh a ni a, a lawn liam hman chuan bîk bo na a tam zâwk tlat a ni." tiin min chhâng a.

Chutah, "Engpawh nisela helai hmun hi chhuahsan phawt teh ang, kan theih ang ang chu kan ti tawhin ka hria." tiin inchhung lam panna kailawn lam chu a pan ding nghal a, kei pawh chuan ka zui ve leh ta nghal a.

Inchhung Corridor kan kal lai chuan, " Khualchhawn nu saw eng emaw han zawh thlithlai leh ka duh deuh a, a bâk chu kan tlangval-a hmuh a ni mai." ka lam a a lu rawn thle in, ka bengbul deuh ah hian ring lo deuh hian a rawn  phun sû sû a.

Chu khualchhawn nula chhe hran lo tak kiangah chuan kan ding dûn a. Burnley chuan, " Ka lo tibuai leh lawk mai che, tunlai chho hian mikhual in nei tam hran lo a ni maw," a ti a.

Nula chuan aw zangkhai tak hian, " Kumin chu zin vâk an tlem riau mai, accident kan tawh hnu aṭang phei kha chuan." a ti a.

Burnley bawk chuan, " Kha accident thlen zân kha i duty lai a ni em aw." a ti leh a.

Nula chuan," Aw ni e," a ti liam puat a.

"Khualbuk kawmchar fencing a lawn liam hmeichhia, kawrdum ha kha in mikhual a ni em le aw, ila hre mai thei em.? Burnley chuan a ti thâwp sat a.

"Ni lo." tih chauh in nula chuan a chhâng a, a hma a computer chu a khawih ta daih a.

"Anih chuan engtik lai a rawn lût nge tih ala hriat theih em?" a ti a, a hnung a CCTV lam chu hawiin," hemi kawngkhar aṭanga rawn lût anih chuan Camera- hian a lo record ngei dawn a ni lawmni?" a ti zui leh zat a.

Nula chuan nin hmel deuh hian," Ka pu, kan hriat ang ang chu Scotland Yard- hnenah kan sawi tawh asin, tunge maw inih le." a ti ta mai a, a Computer khawih lai chu dah in a kuangkuah thak a.

"Private Detective ka ni e," tiin a kawr ipte aṭang chuan a Card- phawrh in nula chu a pe a, nula pawh chuan a lo la ve mai bawk a.

" Thil thleng dik tak min hrilh la ka duh a ni, Scotland Yard- hnena i hrilh ni lo kha." Burnley chuan a ti ram ta hmak mai a.

Nula chuan a chhâng lawk lo, ka ṭhianpa Card chu kengin a hmet khâwr neuh neuh a, zawi te hian a thaw ri leh hak ṭhîn tih keipawh chuan ka hmu thiam nghal mai.

" Thudik tak hriat kan duh a ni, chu pawh tawhsual tâwk nula kha zan ah rei vak lo kawngkam dâwr ah a kal tih kan hria a, chu nu chu engtik hun a chhuak nge ni a, engtik hun a lo kîr leh nge anih tih leh, fencing a lawn liam hmeichhia kha engtik hun a rawn kal nge anih kan hre duh a ni.

Fencing aṭanga rawn lâwn lut nisela CCTV- aṭangin a hriat theih vek dâwn a, chuvangin kawngkapui aṭang ngei hian a rawn lût a ni." a ti leh a.

Nula chuan ka ṭhianpa lam pawh en chuang lo hian, " Kan mikhual nula kha zanriah eikham hnu, dar sawm rîk dawn thuak ah a chhuak a, darkar chanve vel hnu ah a rawn kîr leh, ka hre sual anih pawhin a sual tam lovang" a ti chuai raih a.

Burnley chuan rang zet hian, "Anih chuan nula lawn liam ve thung kha," a lo ti leh a.

"Mikhual nu lo kir leh hma lawk in," a tih leh lai chuan, " Mipa kalpui a nei em, rawn luhpui emaw hemi inchhung aṭang hian." tiin a lo pawtchat a.

"Nei lo." tiin nula chuan a  chhâng tawi tak a.

"Amah in a rawn lût tawp tihna emni," ti a a zawh leh chuan,

" Ka hriat ang ang che chu ka chhâng tawh che," a ti ram leh ta hmak mai a.

Thudang zawh leh a tum lai chuan mikhual rawn thleng thar tûr hi an rawn ri lût nak nak hlawm a.

Kal rih mai tûr a ka ṭhianpa kheuh ka tum lai tak chuan chu khualchhawn nula hma a dawhkan chu Burnley chuan bawh in ring lo tê hian, " Anni ai chuan sum ka pe tam thei zâwk daih che asin, thudik min hrilh dawn phawt chuan," a ti sap a. Chutah rang zet in a rawn ding mar a," Caldwell, i kal tawh ang hmiang." a ti ta a.

Ka ṭhianpa thusawi a hriat veleh chuan nula chu a phu deuh dâwrh in ka hria, a mitmeng chu zâmna in a khat chiang a ni.

Mahsela a vanneih asiam in a chetbuai hma in mikhual tûr te'n an rawn chîm hman niin ka hria.

Khualbuk aṭanga kan chhuah hnu chuan kawngpui dungah chuan muangchangin kan kal dun a. " Tihian Watford lamah kan kîr leh phawt dawn nge Wareham- lamah kan tlang mai dawn." ka tih lai chuan kawng kam a chanchinbu an lo zawrh chu lek kâng vat in a bih ngur ngur a.

Chutah hlim hmel deuh hian, "Caldwell, Kan haw angai lo a, kan zin pawh angai dawn lo a ang riau," tiin chanchinbu chu min han pe a.

Chutah chuan, " April ni 4, 2012- a Comfort Inn, Hyde Park- a tualthihna thleng chungchang a thu kal zêl ah accident tâwk Miss Amy Foster- thianpa leh a zin pui T.Zachary- chu Scotland Yard te'n thu zawh fiah tûrin ni 20, June 2012-  khân la in, vawiin ni 25, June 2012- hian  Court ah thawn niin Bail- a chhuah a ni."

Tih thu hi a lo chuang a, ka chhiar lai chuan Burnley chuan, "Zanin tlai lam chhuak anih kha," a rawn ti a.

"Wareham lamah a haw nghal ang em?" ti a ka zawh chuan, "Ray Turner- kan zâwt dawn nia, ani hi Scotland Yard- ah chuan a hawi harh leh vengva pawl a ni a," tih leh a cellphone phawrh chu a rual nghal a.

Phone a mi bia ah chuan be tawi pawl tak a ni ngei ang, a sawi duh leh a hriat duh zawng a zâwt a, lawmthu pawh sawi ta chuang lo chuan a phone chu off in a ak zui lehnghal daih a. Hetiang hi kan in hriat tirh aṭang khan a ching a ni tih ka hre tawh a, mi ho ve tak tak leh mi pawimawh tak tak, pawimawh ah pawh Ram khat hruaitu te meuh pawh tun a Ray Turner- a biak ang tho hian a be ṭhin a, a mawi lo ve tiin thu thluaithlum dan te leh thil dang dang pawh ka hrilh tam ta.

Mahsela anih erawh chuan a dik alawm, tih bakin min chhang ngai lo a, "Mihring vek kan ni a, vaivut aṭanga siam te thlah vek kan nih avangin kan in ang vek, Pathian pakhat thisen a tlan ngai vek kan ni, mihringte hi kan pawimawh dan a in ang lo vek a, tupawh hian pawimawhna lai kan nei vek alawm," a ti mai ṭhîn a, keipawh hian dik tak chuan a thusawi hi ṭha ka tiin dik ka ti ve tho a, mahsela a sawitu pa hriatah erawh chuan a thusawi ka pawm thu erawh ka hrilh buang bâr duh bîk lo.

"A va han tihzia tak êm, Kan mi duh chu Park Grand Long,  Hyde Park Hotel ah a thleng anih chu, Turner-a sawi dan chuan bail in chhuah mahsela naktuk, tûk leh emaw thleng London a la châm rih tûr in an ti a ni âwm e." a ti leh a.

Chutah ka chanchinbu kenlai chu a rawn ban thuak a, man a pe dawn emaw tih laiin a chanchinbu bawk chu a thlep leh sawk sawk a, a zuartu a pe lêt leh ringawt a, A zuartu lah chuan ṭha tê hian a lo la ve leh mai bawk a. 

Taxi veivak chu lo phar in Park Grand Long Hotel lam pan chuan kan chhuak zui leh ta nghal a.

A hlat lem loh avângin minute sâwm vel ah chuan Hotel- chu kan va thleng phei a, 

Hotel receptionist hnenah chuan ka ṭhianpa chuan kan mi hmuh duh leh a chhan te sawiin a Detective Card- chu a'n lek lang a.

Receptionist tlangval chuan an mikhual thleng te chhinchhiahna chu a hma dawhkan chung a computer ah chuan hmanhmawh takin a'n en thuai thuai a,

" Third floor room number 311- anih hi, Theodore Zachary White, Wareham." a tih chuan lawmthu te Burnley chuan a'n hrilh zui ve luam a. Chutah kan piah lawk a Lift - ah chuan hmanhmawh deuh in kan lut zui ta nghal a.

Chhawng thumna kan thlen chuan Corridor sei tak chu zawhin mikhual pindan kawngkhar pawnlam a room number in târ chu kan thlêk phei diat diat a, pindan parukna kawngkhar ah chuan 311- tih rangkachak rawng a ziak hi a lo intâr a, Chester Burnley- chuan a'n kik karh karh a, vawi li, vawi nga vel a kik hnu chuan a rawn in hawng a. A in hawng tih lêm ah, kawngkhar chu chain- tereuhte hian pindan chhung lam bangah hian a in thlunzawm a, kuttum zen luh theihna tâwk vel hian a in hawng thei a, pindan luahtu chu, chumi kawngka tlemte inhawngah chuan rawn awm langin engnge  kan duh tih min rawn zâwt a.

Burnley- chuan rang zet hian a kawrlum hmalam ipte aṭangin a Card- a phawrh thuai a, chu pa chu a pe ta a.

"Theodore Zachary White- i nih ngei kan beisei, i ṭhiannu chungchangah khan thu han zawh lawk che a rem em.?"aw nem angreng deuh hian a han ti a.

Chu pa chuan Card chu uluk deuh a a bih vung vung hnu chuan a rawn pe leh a, kan pahnih a min melh tawn zauh zauh pah hian, " Chhuah zalen ka ni tawh a, thil pawimawh chu Scotland Yard- hnenah lo va zâwt mai ta che u." tih leh kawngkhar nem khâr a rual ta mai a.

Ka ṭhianpa erawh ala beidawng lo nasa mai, kawngkhar chu a'n kik leh karh karh a, chutah a rawn ri rawk a, a hma ang bawk chuan tlemte rawn hawng lehin a a rawn dâk leh a, lungawi loh hmel zet hian.

"Ka sawi tawh kha, in duh chuan Scotland Yard- Office ah va kal mai rawh u, sawi tûr ka nei tawh lo." a rawn ti leh a, ṭawng pawh kan ṭawng ve hma chuan kawngkhar chu a khâr ri leh bur a.

Chutah ka ṭhianpa chuan a note-bu tereuh te ah lai leh a pen- chu phawrh in kawngkhar rinchhan chuan engemaw ni hi note bu- ah chuan a han ziak sawk sawk a, a ziah zawh chuan chumi a ziahna page- chu pawtthla in a note bu leh pen- chu a ak ṭha leh daih a.

Chu lehkha them chu hûm in kawngkhar bawk chu a chûm leh dawt dawt a.

"Kan lût tûr hi a ni ringawt." a ti sap a.

Chutah kawngkhar chu a hma ami ang bawk chuan a rawn inhawng leh a, thinrim tak mai hian chu pa chuan, " kal bo rawh u, anih loh chuan Police ka call dawn." a rawn ti vîn ta ṭhak mai a, kawngkhar pawh a khâr ri leh ṭhuai a, a khâr leh rual chiah chuan ka ṭhianpa chuan a thil ziahna lehkha them chu kawngkhar chhunglam ah rang zet hian a theh lût zauh tih pawh ka hmu.

"Kan kal mai dawn em ni"? ka han ti a, Burnley- erawh chuan, " a rawn hawng leh dâwn alawm, rei a ni lo ang, kan lût ngei ang tih ka tiam a che." a ti tlat thung a, tichuan kawngkhar pawnlam ah chuan ngawi rengin kan ding dûn ta reng a.

Rei vak lo ah hian ka ṭhianpa sawi ang tak tak chuan kawngkhar chhunglam chu a ri rawk rawk a, hawn pangngaiin a rawn inhawng ruai ruai a, pindan luahtu pa chu kawngka bul ah chuan lungawi hmel vak loh hian a lo ding rûn a.

Chu veleh ka ṭhianpa chu pindan chhungah chuan a lût vat a, keipawh chuan ka zui ve nghal thuai a, chutia kan luh veleh chuan kawngkhar chu ngawi rengin a khar ri leh bur a.

"He lamah hian," tiin min rawn kal pel a, pindan a ṭhutkhawmna, sofa- inhung lamah chuan a phei tlang a.

Chu pindan chu a lian lem lo nâ in a fel thlap mai a, pindan pawh pahnih chauh a awm, ṭhutkhawmna pindan leh mutna pindan.

A ṭhutna hmâ ah chuan Chester Burnley- nen ṭhuthmun kan rem ve a.

"Min rawn chhui zêl tihna a ni maw?" a ti thâwp sat a.

Ka ṭhianpa chuan, "Comfort Inn- aṭangin kan rawn phei chiah a ni, an khualchhawn nula pawh kan rawn kâwm bawk." tiin a lo chhâng lêt a. Mit khap lêk lo hian ka ṭhianpa chuan pindan luahtupa chu a melh kar reng tih ka hmu.

Chu pa chuan a kut pahnih in a hmai chu a'n tuai phurh a, " Ka hriat ang ang chu Scotland Yard- hnenah ka puang tawh asin," a ti leh a.

Burnley chuan, " I hrilh bâk zawng kha min hrilh theih chuan a lawmawm viau ang, ka ṭhianpa Dr.Caldwell- nen hian," a lo ti leh a, chu pa mit ah chuan a en leh kal mai a, chu pa erawh chu a zâm tih a kut tih phût kual vel dan aṭang chuan alang chiang ngang mai.

"Ka sawi tawh kha." a tih lai chuan, " Nichin a mi te pawh kha maw," ka ṭhianpa chuan a lo ti vat a.

Eng emaw sawi tum hian a ka a âng zuau nâ in engmah a sawi leh ta lo, a chal velah chuan a thlan a rawn bawl deuh ṭuk ṭuk a.

Chutah ka ṭhianpa chuan, "Theodore Zachary White, ka han sawi sak mai dawn che em ni?

April ni 3, 2012- khân Comfort Inn, ah Amy Foster nen in thleng dûn a, inthlenna room pawh a indawt chiah a ni,  chumi zan chuan zanriah eikham ah Miss.Foster- pindan ah i lêng a, i haw hnu in zan vak hmeichhia, nawmsip bawlpui tûr chu i ko a, tichuan inhnuai lam a receptionist kiangah i lo nghak a, chu receptionist hmeichhia chu a ka hup nan sum tam tham tak i pe bawk.

I pindan luah hawh a in chhoh leh hma in vanduaithlak takin i ṭhiannu Miss Forster- kha khualbuk pawnlam aṭangin a rawn lût thut mai a, chuvangin hmanhmawh takin Lift- tlan pêl in basement lamah in chhuak dun ta a.

Him tawh a in inngaih laiin i ṭhiannu Miss Forster- chuan basement a in khawsa dunlai chu a rawn phâwk ta che u a, i hmeichhe tawmpui chu hmanhmawh tak a tlanchhia in fencing ah a lawn liam a, nang erawh chu i ṭhiannu nen in hau vin kut hial in in thlâk a.

Chutah chuan i rêk hlum a, building ban kil, garage sîr ah i hnutchhiah ta a ni.

Chumi hnu chuan a phone leh a pindan chabi laksak in i ṭhiannu chhungte chu i call a, Amy- chuan mipa dang ûm san ang te in i hrilh a.

Inchung lam a i chhoh hnu in  CCTV- a in chetla lai record anih i rin avângin CCTV- chu  receptionist nula hnenah khan en i dîl a, mahsela i hlauh angin i chet dan tenawm tak chu a lang lo hlauh a, mahsela i hmeichhe tawmpui tlanchhe lai erawh alang thung a, chutah chuan i rilru tenawm zia a rawn lang chhuak ta a.

Video chu copy i dil a, chumai pawh ni lovin tuma hnen a sawichhuak lo túr a tiin sum i pe bawk a.

Tichuan Miss.Foster- chhungte hnenah chuan an fanu chu tlanbo anga lantir in chu video i copy pawh chu i thawn ta a.

I pindan a i chhoh leh hnu in a phone i kawl daih chu rinhlelh i hlauh avângin a room lamah i tlan phei leh vat a, a phone chu va dah sawk sawkin i tlanchhuak leh a, room chabi pawh i paihbo nghal bawk.

Tichuan Miss.Foster- chhungte hnenah pawh a room a i luh theih loh leh chabi i neih loh thu i sawi a, a hnu ah a phone pattern i hriat loh thu pawh i sawi leh bawk." a ti ta mai a.

Ka ṭhianpa thusawi chu T.Zachary- chauh ni lo, kei ngei pawh chuan mak ka tiin kan meng phar dûn nasa hle mai a. Kan pathum zîngah chuan kei hian a mak ka ti ber hial awm e.

Misual tukkhum pawng a- phei chuan ka ṭhianpa chu dawithiam melh hian a melh niin ka hria. A chângin a beng a hup a, a chângin a hmai a hup bawk a.

Chutah a lu kun rûn chung hian, " Min enthla a ni maw."?  a rawn ti thâm ta ṭuak a.

Chester Burnley- chuan, "I ka aṭang ngei hian chu i thiltih tenawm tak chu ngaihthlak ka duh a ni, thup pawh tum sa teh mah la i thup hlen thei dawn chuang lo." a ti ram leh ta hmak mai a.

A sawi rual chuan a kekawr ipte aṭangin recorder- tereuhte hi ka ṭhianpa chuan a rawn phawrh a, kan hma a dawhkan ah chuan a dah ta a.

Chutah buai deuh nuai hian chu pa chuan a thiltih dan tenawm tak chu a sawi ta a, mahsela ka ṭhianpa sawi nen chuan danglamna pawh a awm hran viau lo mai, a sawitu an dang tih mai loh chu.

A sawi tûr ang ang a sawi zawh hnu chuan a ṭhu kun tlawk tlawk a, patling pumpa chu a ṭap ta zawih zawih mai a, Ka ṭhianpa chuab chutiang misual, an sualna hmuh chhuah tâk thut avânga inti lungchhe kual leh mahni sual zia hmu chhuak deuh thut ang chi chu engah teh vak angai hran lo kher mai, faifuk hlarh hlarh chungin a kawrlum ipte aṭang chuan cigar a phawrh a, muangchang a ṭan kaiin dawhkan a a recorder dah chu bsn in a ak ṭha sawk sawk a, kan thil  duhber kan hmuh tawh avângin chutia a thiltih sual avâng a lungchhe vankai a a awm lai chu kan chhuahsan ta daih a.

Pindan kan chhuahsan dawn lai chuan kawngka chhûng lam chhuat kil sîr a lehkha them inthlep lo tla ka hmuh chuan kal pahin ka chhar zauh a, chu chu a hma lawk a Chester Burnley-a note bu aṭanga pawh thlak tâk kha a ni tih ka hria.

Chu lehkha them chuar tak chu pawt parh in ka'n en a, ka ṭhianpa ziah ngei mai, "IN REH HLUMNA" tih hi a lo in ziak kalh a. Ka chhiar zawh chuan ka kawr hma ipte ah ka hnawh lût daih a.

Chumi tlai chuan Paddington aṭangin Rel chak chiin Watford- lamah kan haw leh ta a, Watford kan thlen a, kan pindan luah hawh a coffee kan indun leh lai chuan Chester Burnley chuan a cellphone chu lek chhuak in a recorder nen chuan a thlunzawm a.

"Engtin nge i tih dawn tak, kan sawrkar mi rawih te hnenah i thlen dawn em?" ti a ka zawh chuan,

"Thlen  mai mai lo ang, hmaihma ngei a a inpuang an hmuh loh chuan he thil hlu tak hi an thilhlui dahkhawmna hmun chang mai mai tûr a ni dawn asin." a ti mai a.

Chutah, "Kan nula chhungte min ngenna angin an hnenah ka thawn ang a, an niin an duh angin ti rawh se." a ti leh a.

Kei chuan," A ni tho mai." tiin ka lo chhang a.

Ani chuan, " Khatiang misual kha chu hremhmun pawh thleng sela, hremhmun a a tlâk hma in ramhuai hovin an vaw hmasa phawt ta ve ang. Setana fachuam dik tak a nih kha." a ti nuah nuah a.

Kei chuan, "Khatia thil thlen dan dik tak mai i sawi ta mai kha mak ka ti tâwp thei lo, a ruangam din thei mah ila, kei chuan hmaih ka neih mai bâkah ka chhui dawn thiam lo leh pek a nih chiah kha." ka ti a.

Burnley chuan, " Ka hriat ang zât leh ka tawn ang zât tawng ve tawh ni la chuan kei aiin i chhui thiam zâwk maithei asin." a ti mai a.

" Hmeichhia tlanbo kha ania, kha kha engtin nge.?" tiin ka han zâwt a, ani chuan, " A tir aṭanga ka rin dân sa a ni a, chuvang a receptionist pawh zâwt kha ka nia, mahsela kha nu khân a sawi ṭhat duh loh êm avâng khân ka lo rin lâwk ang ngeiin sum a tham anih ka ring a, ka ring dik ta chiah bawk anih kha." a ti a.

"A tir ata thuchhuah hrang hrang ka hmuh aṭang khân the thil thlen dan tûr hi chu ka riruang tawh a, mahsela ka buaina ber zâwk chu kha misual kha engtin nge ka in puan tîr ang tih zâwk kha a ni.

 In ngaizawng an ni a, Khualbuk a thleng dun ta na na na chu zanlam ah an in lenpawh ngei dawn tih chu a chiang sa ah ka ngai a,  mahsela hmeichhia kha a hria te'n a an sawi dan hmangin, hmeichhe fel pangngai tak angin an chhuah zel mai a, chuvangin chhungte awm loh lai pawhin a chêt khawloh duh ka ring lo a ni, chu ka rinna chu pindan hrang a an thleng khân a rawn ti fiah ah ka ngai mai.

Tin, mipa zâwk hi mahni a awm peih lo kan nih ṭhin avângin nula pindan a leng lût zâwk anih ka ring bawk a.

A chhuahsan hnu lawk a a ngaihzawng- kha mu nghal mai tûr a a rin avângin  call girl- pawh ko anih ka ring a.  A chhan chu khaw tê zâwk Wareham- ang a tlem a lo neinung ve deuh leh hawipir thei chuan khawpui a chuan chhuah meuh chuan  an nungchang a lo danglam tlangpui ṭhîn tlat a ni.

Tichuan chumi zan a tawmpui tûr a biak lai vel chuan a ngaihzawng kha zanlam a ei tûr nepnawi leiin a lo chhuak ve hman chiah a, tichuan call girl rawn thlen hnu lawk ah, a room a an chhoh leh hma siin, a ngaihzawng dawr kal rawn kir leh nen chuan an in hmu hman ta thuak anih ber chu.

Bathlar aṭang a a tlâk ka rin lohna chhan chu, a tlâkna hmun kha kawmchar lam anih avângin chhawng ruk lai a ni a, thi sa emaw, nikhaw hre lo sa a tla anih loh chuan a âu dawn ngei ngei a, mahse tumah in thâwm an hriat thu engmah sawi a awm bawk si lo. Khami zan khan kha khualbuk ah khan mikhual thleng an tam lo in, zan rei lam tawh a ni bawo si tiin ngaihdan lo siam pawh ni ila, kha khualbuk bathlar ep a building te kha luahlai vek an nih avangin hmeichhe au ri chu an lo hre ngei ang, kawmchar lam a ni a, mutna pindan lam chhawn vek an ni tlat.

 Chu lo ah, a pa ina ka hnena a ruang chungchang a sawi khân, a hmai kha a dum thual thu a sawi a, hmeichhe vun ngo tak ni si, khatia a ruang hmai dum tlatna chhan ni thei chu reh hlum anih chauhvin a ni. A thlalak, a damlai ami pawh social media ah tam tak i hmu ve ngei tawh ang a, hmeichhe vun ngo leh hmelṭha tak a ni tih i hria ang chu.

Caldwell, heti zawng hian i hrethiam maithei, tui tla rêng rêng chu an chuap ah tui a tling ṭhîn a, a chhan chu an boruak hîp tûr ai kha tui an hîp luh tam vâng a ni.

Boruak kan hip luh hian kan chuap ah a thleng zêl anih kha maw.

Tichuan tui tla hlum an tih, an tlâk hma a thi sa emaw te chuap ah chuan tui a awm ve lo thung a ni.

Chu ka rinna chu bathlar hnuai zawn a a ruang a awm loh thu ka hriat khân a nemnghet ta chiah rêng a ni, chuvangin Khualbuk pawh ka lo suangtuah dan ang deuh diak diak in ka hmuh phah bawk.

Tin, Miss.Foster-  phone leh a room chabi chungchang velah kha chuan hei hi ka rindan sa a ni bawk a.

Khatia a tihhlum khan an inhauhna avângin a thinrim ala reh lo a, a tihhlum avângin a rilru ala chiai ve bawk a, in ngaihtuah chiang mang lovin a ngaihzawng chhungte kha a phone a, chuvangin mipa dang nen a tlanbo ang te in a sawi anih kha, misual leh rilru chhe bawrlawk lutuk bakah ngaihzawng kawp chingte hi chu an thik thu a chhiat mai bak ah an rilru ang leh an khawsak dan anga awm ve tûrin an kawppui te hi an ring tlangpui ṭhîn tlat a ni.

Mahsela inchunga a chhoh hnu khan a rilru pawh a lo fîm ve ta deuh a, fin kher rek chhuahin a hma lawk in, a ngaihzawng kha tlanbo anga a sawi avângin, a room ah chuan a va lut a, Miss.Foster- phone chu a va dah a, pawnlam ah pindan chu kalh in a chabi pawh a paihbo ta a, chutah chuan a hmeichhe chhungte'n a an zawh leh pawhin a tum rûk dan tak a lo chhângin, a tlanbo a, a phone pawh a room chhungah a awm a, a room chabi pawh a spare a awm loh avangin a luh theih loh a lo ti ta chiah rêng anih kha.

Mahsela, a tihhlum tirh a Miss.Foster- phone ngei aṭanga a lo biak tawh avângin amah leh amah a in sawi âwk ta tho tho a ni." a ti ta a.

Kei chuan ngaihnawm ti tak in ka lo ngaithla veng veng a, chutia a sawi zawh chuan, " Thudik kan hailan tawh ber a hnu, Scotland Yard- lam a evidence- pêk chu ka la duh tho tho mai, a chiang tâwk bawk êm asin." ka ti leh a.

Burnley - erawh chuan a lu a thing nar nar a, " Caldwell, i hrethiam lo a ni, tun ṭum a thil thleng kan buaipui hma lawk a Case- mak tak kan buaipui, i thu ziah chhawn leh a Notebook engzahna ber nge i tih tâk, ' A Game Of Shadow'- ti a i vuah tak chungchang te kha, kha thil thleng rapthlak leh tenawm, London a Protestant Pastor pakhat, a taksa hmun li vel lai a chemte a vihna awm chung a sawrkar uisathiam ah pawh NCA(National Crime Agency)- meuh te pawh an chhui tîr a mahni intihlum ang a an chhuah tâkna kha, Sawrkar lai Party leh MAFIA- pawl te inrawlh ang hial a an chhuah tâk chiamna zo zai te pawh kha i ngaihtuah lêt ngai lo em ni.

Kha thil thleng kha, a ti tu ber chu an inchhûng a chêng, hriatchhuah an hlauh avânga an awmpui nu tleirawl Thailand- lam mi- pawh London aṭanga hmun hla tak a an tirhbo chungchang te kha, an in chhûng a cheng hmeichhe pahnih remruatna a thleng anih thu te pawh kan chhui chhuak a, mahsela sawrkar uisathiam rual te chuan eng hu ah mah min ngaih sak duh lo anih kha. 

Ti khan mahni intihlum ang a chhuahin thu pawh a zuzi ta mai mai a, tun a kan thil tawn hi han ngaihtuah la,  khatiang kha a thleng nawn leh lo ang tih pawh sawi theih a ni si lo." a ti ta duah a.

Kei chuan, " A thu hrim ah nang leh Sherlock Holmes- te chauh hi he khawvel ram zau ah hian Private Detective- rau rau ah pawh in thil chhui dan leh tih dan kalhmang, ṭawngkam thleng a in ang inni in ka hria, amah hi i ngaisang ve hrim hrim nge, i thil chhui dan te hi?" ti a ka zawh chuan ani chuan,

" Ngaisang teh reng mai, chumi avâng ngawr ngawr a la chhawng ka ni lo a, Sherlock Holmes thil chhui dan hi a mawl in hriatthiam a awlsam a, naupang aṭanga pitar leh putar bâkah mimawl ber aṭanga zir sâng ber thleng pawhin an hrethiam êm êm vek a, chuvangin ka hnathawh dan i ziahchhawn leh ṭhin avâng hian thil thleng tam tak kan chhui chhuahte hi khawchhak lam aṭanga ruahthimpui rawn sûr mai tûr a ring tu hnam mawl tak tak te hian an lo hriatthiam ve ka duh vâng a ni bawk." a ti ta a.

Kei chuan, " Hrethiam mawlh teh se, tichuan thudik hi thlahtu bul te chhui a, buaipui reng reng hnam mawl tak te hian a hnam pum in hrechhuak sela, sawrkar leh a uisathiam rual te pawhin in enlêt nân hmang hrâm rawh se." tiin ka lo tuihnih ve leh a.