WAR OF THE TITANS | From Epic Greek Mythology

Greek ho te pathian Olympian leh milian Titans- indona hi Titanomachy tih a ni bawk a, an indona chungchang chauh ni lovin, an indo chhan leh a hnu a thil thleng, a thawnthu ti ngaihnawm tu leh ti famkim tu ṭhenkhat han tarlang bawk ila.

Lei pathiannu Gaia- leh Van pathian Uranus- te hian Titans- te hmâ hian fa râpthlâk tak tak paruk, Milian Mit pakhat nei pathum Cyclops – an tih, Arges, Brontes leh Steropes- te leh Lu sawmnga leh bân zâ țheuh nei milian pathum Hecatoncheires- an nei a, Greek țawnga, ἑκατόν (hekaton, “hundred”) ,χείρ (cheir, “hand”), Hundred hand, unau Briareus / Aegaeon, Cottus leh Gyges te chu. 

Mahse Uranus chuan chûng an fâ milian leh maksak tak te a hmuh chuan a lungawi thei lo a, ” Heng ramsa râpthlâk te hi ka pawm thei lo, pathian kan ni a, pathiante chu țha famkim kan ni, chuvangin hêng thilsiam râpthlâk tak te hi Vânram ah an awm ve thei lovang, kan paihchhuak tûr a ni.” tiin an lo puitlin tak tak hmâ chuan lei piahlam khawvel hremhmun hrehawm Tartarus- ah an vâi hian a paihlût ta vek a.

Chumi hnu chuan Lei Pathiannu Gaea- leh Uranus te chuan fa dang sâwmleh pahnih, milian an nei leh a, chûngte chu ‘Milian Sâwmpahnih (Twelve Titans)’ – an tih, Crius, Cronus, Coeus, Hyperion, Iaetus, Mnemosyne, Phoebe, Rhea, Tethys, Theia, Themis leh Oceanus te an ni.

Fa duhawm leh lian tak tak an neih leh hnu pawh chuan pathian te nû, Gaea- chu a pasal Uranus- ina an fa hma sa te lak a nunrâwnna a chhuah avang khân ala lungawi thei chuang lo a, a thiltih avâng khân kum za fê a ral hnu pawhin a thinur a reh thei tlat lo.

 A pasal ina Ni êng hmu tawh ngai lo tûr a Tartarus-a a paih luh a fâ te chu lâk kîr leh a a pasal laka phuba lâk theihna hun tûr remchâng a melh char char reng a.

Tichuan a hnu a an fa Titans- unau te chu kum tam tak chhûng a rûkin an rilru leh an mizia te a zir chiang a.

A pasal Uranus- bei leh do ngam tûr chuan Titan- unau te chu an chak tâwk lovin, an rilru a dawih a, chuvang chuan a mangang kher mai.

Mahsela hun a lo kal zêl a, Titan unaute an lo puitlin chuan an zînga a tê ber Hun Pathian Cronus- chu a pa ang bawk a nunrâwng leh huaisen a lo ni chho va, a unau te aiin fin pawh a fing bîk tih Ghea- chuan a lo hre ta a, An nu ina thil engkim a hrilh hnu pawhin an unau zînga a pa Uranus- hmachhawn tûra a nu Gaea-i thlâwp ngam awmchhun a ni ta a ni.

Tichuan le, Ghea- chuan rem ruat in a pasal hun hman dan hrang hrang te chu Cronus- hnenah chuan zir chiang tûrin a hrilh a.

 Cronus- hian a pa Uranus ina Tartarus-a a unau paruk thithei lo te a tân tîr thute erawh a hre ve lo, a pa aiawh a Pathian te Lal leh Pathian chungnung ber nih theihna kawng țha ber ni a a hriat avângin a nu Ghea- chu a thurualpui ve tawp a ni a, a nu Ghea erawh chuan tum dang daih a lo nei reng si a.

Hun tam a pa beih dan tûr a lo zir chian tawh avângin a tâwp a tâwp ah chuan hun ṭha a hmu ta nge nge.

Ruahman dan angin thil a kal ta, zankhat chu Ghea- chuan a pasal chu uain a pe chiam a, Uranus a rûi chu Oceanus- tuipui kam ah amahin tui takin a muhil ta a.

Chutia a mutthilh hnu chuan  Ghea chuan a fapa Cronus chu rang tak a ko vin favah hriam tak mai a lo pe a,

tichuan Cronus chuan thâwm dîm takin a pa mutui lai chu a va pan phei țhêm țhêm a, a favah hriam tak chuan a pa serh chu a hleh sak ta hlawk mai a. A serh hleh thlâk chu tuipuiah chuan a paih a, a pa serh ațang chuan Tisa châkna, Mawina leh Hmangaihna Pathiannu hmelțha tak mai Aphrodite-i a lo piang a, A pa thisen ațang chuan Milian(Giant) leh Ash Tree Nymph/ Erinyes te an lo piang ve leh a. A pa hnenah chuan a thuneihna a tâwp tâk thu leh amah chu Lei leh Vâna thuneihna changtu anih tawh thu hrilh in a pa chu a man ta a.

Tichuan Hun Pathian Titan Cronus- chu Pathiante zawng zawng zîng a Lal ber a lo ni a, an unau ‘Titans’ chuan lei leh vanah ro an rêl ta a, he an rorel hun chhûng hi ‘Golden Age’- an ti. 

A pa serh ațanga lo piang Aphrodite-i hi a hnu ah Zeus-a fapa Indona Pathian Ares-a nen inneiin fapa Eros- an nei a, (Eros hi Roman ho chuan Cupid an ti a, Valentine Day vela lâr deuh, naute thla nei, hmangaihna thal keng țhin lem hi ani.. CR) Eros- hi Spartan Lal Menelaus-a nupui Helen-ina Trojan Lal fapa Paris-a a hmangaih theih nan a Hmangaihna thal a kâp tu kha a ni.

Uranus-a thisen ațanga lo piang Ash Tree Nymph, Lasi pathum Erinyes an tih, Alecto, Megaera leh Tisiphone-i te hi a hnu fê a Crete thliarkar a Zeus-a enkawltu te kha an ni bawk a, Chuan Uranus-a thisen ațanga lo piang ve tho Milian(Giant) an awm bawk a.

Khawvêl a Titans- ho ina ro an rêl chhûng hi khawvel ropui lai ber tiin an sawi țhîn a, Titans- unau te chuan fel takin rorelna an in sem a. An unau zîng a naupang ber Cronus- a chu a hotu ber a ni a, Hun Pathian a ni bawk, a unaunu Rhea nupui ah a nei a. Rhea chu thianghlimna Pathiannu a ni a, Hmeichhia zawng zawngte enkawltu a ni bawk.

Oceanus-a chu Khawvel tui zawng zawng chunga thuneitu a ni a, a unau Lui Pathiannu Tethys-i nupuiah neiin Tui lasi leh lui pathian te thlahtu an ni. Hyperion-a chu êng Pathian a ni a, nupuiah a unaunu Theia-i, lei chung boruak zawng zawng enkawltu chu neiin Ni Pathian Helios-a te, Thla Pathiannu Selene-i te, Vârțian Pathiannu Eos-i te hi an fa te an ni. Coeus-a chu Thiamna, mihring themthiamna zawng zawng pe tu a ni a, a unaunu Finna Pathiannu Phoebe-chu nupuiah neiin fanu pahnih Leto-i leh Asteria-i te an nei a, kum tam liam hnu in Leto-i hi Zeus-a nen inneiin thal kah leh rimawi Pathian Apollo leh ramsa enkawltu Pathiannu Artemis-i annei anih kha. Mnemosyne-i chu hriatrengna, finna Pathiannu a ni a.

Tin, Themis-i chu hrilhlawktu Pathiannu a ni bawk, Zawlnei hrang hrang leh Delphi- zawlnei te hnena hrilhlawkna petu a ni.

Crius-a chu vân chung arsi zawng zawng enkawltu ani a, Aries arsi bâwr khâwm hi a chhinchhiahna a ni. Iapetus-a chu mihring hun kal leh thinlung enkawl tu a ni a, a unaupa Oceanus-a fanu Asia chu nupuiah neiin milian ropui tak phîr unau Prometheus leh Epimetheus- te chu an fa te a ni.

Tin, Chiron-a a awm bawk a, Titan Cronus-a leh Lasi Philyra-i te fâ a ni. Chiron-a hi Centaur hmasa ber a ni a, A kâwng a chin hnuailam sakawr, a chunglam mihring a ni. Kum tam tak liam hnu in a fanu pakhat Endeis-i chu Zeus-a fapa Aeacus-a nen inneiin fapa pahnih Telemona leh Peleus-a an nei a, Telemona- hian fapa Ajax-a, Troy kulh beihna a tel kha anei a, Tin, Peleus-a hian fapa Achilles ropuia anei bawk anih kha.

Chiron-a hi chatuan mî, thi thei lo a ni a, Greek ram Pasalțha tam tak chu hriamhrei hman dan a zirtir a, Achilles-a pawh a têt tê ațanga hriamhrei hman dan zirtir tu a ni a, Tin Greek Pasalțha ropui leh lâr tak tak Asclepius-a te, Ajax-a te, mihring alu bawng rapthlak tak that tu Theseus-a te, Argonauts rammutna a an hotu Jason-a te, Zeus-a fapa Medusa thattu mihuaisen Perseus-a leh Phoenix-a te hi a zirtir chhuah te an ni.

Titans unau te'n Lalna an chan hnu chuan an nu, lei pathiannu Gae- chu Cronus-a chenna ah kalin a thiltih a lawmpui thu asawi a, Tin, a fa dang, a pasal Uranus-in Tartarus-a a tântîr thu pawh sawi a, chung a fâ te chu Cronus hnenah chuan Tartarus-aṭanga la chhuak tûrin a hrilh bawk a.

Cronus-a chu fing tak mai anih avângin a nu rilru leh thil tum dik tak chu rei lo te ah a hrethiam ta vek mai a, Titans unau te hma a an nu fa hmasa, Hecatoncheires- leh Cyclops- te chhanchhuah nan chauh an nu chuan hman a lo tum tih a hre ta a. Anni unau aiin a fa hmasa te a hmangaih zâwk avâng chuan nasa takin Ghea-nen chuan an in hau a.

A pa a beih dâwn lai khân a nu hian a thiltum rûk leh a unau dangte hi a hrilh duh loh vâng a ni, tin Cronus leh Titans te hian unau dang an nei tih pawh an lo hre lo hrim hrim a.

Cronus- thinrim chuan a nu fa hmasa te chu Tartarus aṭang chuan a chhuah tîr duh bîk ta hauh lo mai, chhuah a hnêk in a pa Uranus-ang chiah in, chûng a a nu fa hmasa te chu ramsa kawlh mai an nih thu leh Tartarus- chu an awmna hmun tûr dik tak zâwk anih thu a nu hnenah chuan sawi ta piap piap mai a.

Chu a thusawi a vâng chuan a nu Gaea- chu a thinur kher mai, a in her vut a, chhuah tum a a in her lai chuan Cronus chu anchhia lawh in a chungah chuan hilhlâwkna thu a puang ta a, chu chu, ‘Titan Cronus hian fâ a neih hun ah a pa a tih ang bawk hian a fâ te'n a Lalna anla rawn chhuhsak dawn a ni’ tih thu chu.' chumi a sawi zawh chuan Titans unau te awmna chu a chhuahsan ta a.

TITANOMACHY | WAR OF THE TITANS :

Titan Cronus-a chuan a nupui, a farnu ni bawk Rhea-i chu a hmangaih hle nâ in Tartarus-a a unaute la kîr leh tûr a a nu Gaea- ngenna a hnial avânga a nu thinur in a pa ang khân a lalțhutthleng chu a fapate zînga pakhatin a chhuhsak dawn ti a anchhia a lawh kha hre rengin an fa piang hmasa ber Hades-a chu a piantirh in a dawlh ta daih a, a hnu a lo piang an fa dang Demeter, Hera, Poseidon leh Hestia te pawh chu a dawlh leh ta vek a, an fâ apiang a dawlh zel avâng chuan a nupui Rhea-i chu a lungchhia in a thinur hle a, tichuan a nu Gaea-i hnenah kal in tih dan tur a va zâwt ta ngawt a. 

Gaea-i chuan tun a Rhea-ina a pâi mek naute hian Cronus- chu ala hneh dawn thu a lo hrilh a.

Tichuan Rhea- i chu raipuar ṭeuh chungin a pasal nen a an chenna aṭanga chhuakin  Crete thliarkar a Mount Dicte tlâng a pûk ah a kal a, fa chu a hring ta a, a hming ah Zeus- sâ in, Lasî, Ash Tree Nympy, Erinyes an tih bawk, Alecto, Megaera leh Tisiphone-i te chuan an lo enkawl sak a,  kêl hnute in an châwm a, a naupan zual chhûng chu Zeus-a chuan Crete thliarkar ah chuan a nun a hmang chho ta a.

Rhea-i chuan a nû thurâwn chu zâwmin Cronus-a hnen a a kîr leh chuan an fa sên thawmhnaw chuan lungtum a fûn a, naute ang takin a siam a, Cronus-a hnen a hlan pahin a tâna a hrinsak fapa a nih thu a hrilh a.

 Cronus- chuan eng khaw sawi set set lovin chu lungtum chu lâ in a dawlh ta pawp a, bumin a awm tih réng a hre lo. Cronus- chuan a fapate zînga pakhat chu a dawlh lovin Crete- thliarkara lasî ten an enkawl  tih a hre hauh lo, hre ngat sela chuan a thinrim viau ngei ang.

A lo tlangval hnu in Zeus-a chu a nu Rhea-i chuan Pathiante chênna ah ala kîr leh a, a pa Cronus-a no hlântu ah a awm ta a.

 Chutianga hun engemaw chen an awm hnu chuan Rhea-i leh Zeus-a chuan a pa bum dân tur an rêl a, Titanness Metis-i( damdawi leh ngaihtuahna siamtu Pathiannu) Rhea-i unaunu chuan damdawi siamin Cronus-a wine in tûr ah chuan a telh a, chu wine chu Zeus-a chuan a pa chu pe in Cronus-an a in zawh chuan a pum a na ta vak a, a luak ta nghek nghek a, a hmasa ber ah lungtum a dawlh kha luakchhuakin, a hnu ah a fâte ho, a dawlh te zawng zawng kha puitling vekin a luakchhuak leh ta vek a.

Titan Cronus- hi milian a ni kan tih tawh kha, a fâ a dawlh te pawh hi Pathian vek annih avângin an pa pum chhûngah a nung chungin an awm vek a ni. Cronus-a dam lo let reng hnenah chuan Rhea-i chuan an nu Ghea-i hrilhhlawkna kha sawichhuakin,  Zeus-a chu a fapa anih thu leh a fa te chuan a pa Uranus-a angin an paihthlâk dawn thu Cronus-a chu a hrilh a, chu thu a hriat chuan Cronus pawh a thinrim kher mai.

A dam ṭhat veleh a unau Titans te chu ko khawmin  chûng a fâ pathian naupangtê tê te chu nuaibo tum in Indo hmachhawn tûr a inring tûrin a hrilh hlawm a. Mahsela, a unaupa fate Prometheus leh Epimetheus bâkah a unaupa Oceanus-a te chu an telve duh lo a.

 Pathian naupangtê tê unau te chuan milian(titan) ho chu hneh rual niin an hre lo a, heng milian te hi a mal tê tê pawh a hneh rual loh leh thiltithei tak tak te an ni si a.

 Mangang takin an pi Lei Pathiannu Gaea-i hnenah Zeus-a te unau chu an kal ta ngawt a.

An pi chuan anni unau chu chu thurâwn lo pe in Tartarus- a awm mêk, an pu Uranus-an a tân tîr Hecatoncheires- leh Cyclops-  unau te chhuah tûrin leh an țanpuina dîl tûrin a lo ti a.

 Tichuan Zeus-a te unau chu lei hnuai khawvel mitthi khua Tartarus ah chuan an kal leh ta vang vang a, Tartarus- tanin a hrehawm tak a lo awm Milian mit pakhat nei Cyclops unau bakah Kut zâ leh lu sawmnga nei Hectoncheites unau te chu an chhuah zalên ta a. 

Chutia kum za tam hrehawm tak a an tânna hmun aṭanga pathian naupang tê tê te'n a an chhanchhuah avâng chuan anni chu an lâwm hle a, Zeus-a te unau thil tum an hriat hnu phei chuan an ṭanpui ta a.

 Cyclops- unau te chuan Zeus-a chu țêk leh khawpuirî (lightning & thunder) chung a thuneihna an pe a, Hades- a pawh intih bo theihna lukhum (invisible Helmet) pe in Poseidon pawh Tiang thiltithei ( Trident) an pe bawk a.

Chûng a pa unau te chuan thiltihtheihna nasa tak an pêk bâkah indona ah chuan  Zeus-a te chu țanpui an tiam bawk a.

Zeus-a te unau thiltih dan a lo hriat chuan Titan Cronus- chu a thinrim kher mai, indo tûrin a unau te nen Mount Othrys ah țanhmun an siam a, milian zawng zawng ko khawm in Titans zîng a a alian ber mai Atlas-a chu hruaitu ah a awm a.

 Zeus-a te unau pawh chuan Mount Olympus-ah țanhmun siam ve in Olympus an inti a, tichuan Pathian te indona rapthlak tak Titanomachy chu an țan ta a.

Remruatna fel tak nen Olympus te chuan beiin Titans ho lambun tûr a an dah Hundred handed Hecatoncheires- unau te chuan lungpui lian tak tak an chawi fur mai a, anmahni pawh hi milian tho annih avângin an lung chawi te chu tlâng lian pui pui an pawt thlawn hlawk hlawk hi a ni mai a.

Titan Atlas- leh a pawl milian mawl leh chak tak tak te chuan Mount Olympus chu an rawn pan hum hum a, Olympus- unau te chuan kawng lak ah lo chhaih buaiin a hun tak ah Zeus-a te unau chu an hnungtawlh a, Titans- ho te chu Hecatoncheires- ho te lambunna huangah chuan thlêm lûtin Hecatoncheires- te chuan Titans- ho chu lungpui za tam takin an lo vawm rawn ruih ruih a, Titans ho te chu tlângin a chim hnan emaw tiin an tlân chhe darh chum chum a, tichuan Olympians- te chuan chutia an chiai thlabar lai chu ûmzui vatin, ṭanhmun an siam rem hma in nasa takin an in bei thut a, an indo thâwm avang chuan tlângte chu an khûr hlawk hlawk a, khawvel hi tuilian leh țek in a khat a ni ber mai.

Olympian unau chu naupang hle mahsela remruatna fel tak nen a che chhuak zél an nih avâng leh Hecatoncheires leh Cyclops- te'n a an puih bawk avâng chuan Titans- ho, thiltithei zâwk te chuan an hneh hleithei lo.

A tâwp ah Cronus-a beidawng thinrim chuan a unau sakawlh râpthlak Typhoon chu a ko chhuak ta a. 

Khawvela tlang sâng ber ber te ai pawhin a lian a, van a arsi te tawng thei hial khawp a lian a ni a. A kawng a chin huai lam chu rul niin a invial ruih mai a. A ban tam tak Octopus bân ang mai te chuan chhim leh hmar a tuam khup mai a. Tin, chûng a bân aṭangte chuan sakawlh rapthlak tak tak an rawn piang chhuak ṭuam ṭuam reng bawk a. Typhoon- chuan lung lianpui pui leh meialh in Olympus tlâng chu a dêng chawrh chawrh reng a, a bân tam tak chuan Olympus- chu a zial bawk a.

Olympian te pawh chuan an hlau vin an khûr hlawk hlawk hial a ni. Amah chauh ni lo, a bân aṭanga sakawlh rapthlak tak tak sâng tam tak lo piang te chuan Olympus tlâng chu an lâwn ruih ruih reng a, chung ho ringawt pawh chu kum tam tak chhûng an bei rêng bawk a.

Mahsela a tâwp ah chuan an beidawng a, an theih ang ang a tlanchhia in Olympus tlâng ropui tak chu an chhuahsan ta hial a.

Mahsela chuti ringawt chuan Titans te hma ah an tlâwm dâwn si a, chuvangin Zeus-chu a inti paukhauh a, a chakna leh huaisenna zawng zawng sâwmkhawm in chu sakawlh chu a in kulhna Oceanus tuipui chungah kal chilh in Zeus-a chuan ṭêk leh meialh hmangin Typhoon- chu a dêng ta hum hum a, Zeus-a thiltihtheihna ṭêk nasa tak mai ina a den nasat lutuk avângin Casion tlang, Syria ram lamah Typhoon- chu tlanchhia in chu tlang lian tak phenah chuan a tawm ta daih a.

Zeus-a chuan a na tuar lai chu zuk nangchingin an insual ta hrep mai a, tharum ah chuan Typhoon- chu hneh rual a nih loh avâng leh a len êm avângin Zeus-a chu a bet zâwk ah a ṭang ta char char mai. A tawp ah phei chuan Typhoon- chuan Zeus-a hnungzang ruh chu a bân sei tak chuan a hlap tliah sak ta nge nge a, che thei lo a let reng Zeus-a taksa chu a chan darh a, Dragon Delphyne hnenah a pe ta daih mai a.

Chutia a Zeus-a a hneh tâk a vâng chuan nasa tak in a hrâm ruah ruah a, chu a aw ri thangkhawk chuan lei a nghawr a, khawvel ah chuan lirnghing leh tuilian nasa tak a awm zui nghal a.

Chumi hnu chuan Typhoon leh Cronus- te chu inhmu in, hmalak zêl dân tûr an rêl a, Zeus-a ber a awm tawh loh chuan Olympian unau te chuan an beih ngam an ring tawh lo a, Mahsela Cornus chuan Olympian unau te chu inremna neih pui rêng a tum lo, an vaiin Tartarus-a paihthlâk vek a tum tlat a.

Zeus-a chanchin an lo hriat chuan a unau te chu hmanhmawh takin an tlanchhiatna hmun aṭang chuan hmanhmawh takin Olympus tlâng lamah an kîr thuai hlawm a, an rilru a hnual hauh lo mai, an unaupa phuba chu lâk ngei tumin an rilru a huaisen sauh a, ro an rêl zui ta thuai a.

An zîngah chuan Zeus-a fapa, pathiante tirhkoh Hermes-a pawh a tel ve a, a ni chuan pheikhawk thlawk thei a nei a, tin, a pa ang bawk a fing tak mai a ni a, chu chu remchangah la in, ani chu a rûkin Dragon Delphyne- awmna ah chuan a thlâwk thla ta vang vang a, a pa taksa darh nuai chu harsa takin a ru chhuak leh ta a.

Amah bâkah Olympian unau te chuan an thiltihtheihna hmangin Zeus-a taksa peng te chu vuah khawm lehin an ti dam leh ta a. 

Tichuan an unau chuan Typhoon leh an pa Cronus- bei tûr chuan an chhuak leh ta a, Zeus-a chuan a hma ang bawkin ṭêk chuan Typhoon- chu a deng leh chuai chuai a, a unau dang te leh Typhoon- bân aṭanga sakawlh lo piang te chu nasa takin an lo in bei ve bawk a, Typhoon- chuan lungpui lian tak mai chawiin Zeus- chu a lo vawm a, ani chuan boruak sang takah chu lung chu ṭêk a in a lo dêng keh darh chuaih mai a. Chu lungpui keh them pawh chu tlang tiat tiat a lian a la ni tho mai, a them pakhat pawh chu a len êm avângin Typhoon- chu a delh ta a.

Typhoon- hliam tuar lai chu Zeus-a chuan nangchingin Etna tlang bulah ṭêkin nasa tak maiin a dêng a,Typhoon- thinrim leh na tuar chu rapthlak takin a ri hum hum a, tlangkang leh mei sa tak tak tlang chip atang chuan a phuhchhuak hum hum a, Mahsela Etna tlang hnuai aṭanga inhai chhuak leh tûrin chakna a nei tawh bik si lo.

Tichuan Zeus- chuan

 kâwlphê leh țêk hmangin a that a, Sicily a Mount Etna hnuaiah chuan an phûm ta a ni. Typhoons hi tlângkâng angin Mount Etna- ah hian ala thawk fo țhin an ti a, tun thleng hian he tlâng hi tlangkang irhchhuah țhin na hmun a la ni.

Chumi hnu chuan an pa Cronus- bei tûr chuan an chhuak leh ta a, Cronus chu a lian in a chak êm êm a, Hades- chuan a a lukhum intih bo theihna khum chungin a chhaih buai a, Poseidon-a'n a tiang thiltithei Trident- hmangin a lo bei a, Zeus- pawhin kawlphe zuai zuai kâr aṭangin ṭêkin a lo dêng chiam chiam a, an unau hmeichhia te pawh an bâng bîk lo, an thil tum ah an chiang in an tum a ruh bawk a, a tawpah chuan harsa tak chungin Cronus chu Tartarus-ah an paihthla thei ta hrâm a ni.

Kum sâwm lai an indo hnu chuan Olympians- te chuan hnehna an chang chho ta a.

Titans ho zawng zawng deuhthaw chu hremin Tartarus-ah an tântîr hlawm a. Milian Atlas-a chu a sâng thei ang ber a a koki a vân khi do tlat tûrin an hrem bawk a.

Titans ho zîngah Atlas, Oceanus, Theia leh Themis-i te chauh chu Tartarus a paihthlak loh awmchhun an ni, Titan Iapetus leh Clymene-i te fapa Prometheus leh Epimetheus- te erawh chu Olympians-te lamah an țan avangin hrem an ni ve lo thung.

Tichuan Titans te Lalna chu paihthla in Zeus-a leh a unau te chuan lei leh van ah ro relin Olympians Pathiante hun chu a lo in țan ta a ni.

 Zeus-a chu naupang ber nimahse Pathiante zîngah chuan hotu leh hruaitu a ni a, an unau chuan ram leh thuneihna an insem vek a.

THE FIRST OLYMPIAN GODS & GODDESS :

Titan Cronus leh a unaunu Rhea-te fa paruk hi Olympian pathian te chu an ni a.

ZEUS: Dikna a roreltu a ni a, lei leh vân a roreltu ber a ni, nupuiah a unaunu Hera-i a nei a, mahse a lerh êm avângin mihring leh Pathiannu dangte lak fâ tam tak a nei bawk.

HADES : Olympians unau zînga a upa ber a ni a, Khawvel piah lam zawng zawng, Mitthi khua a roreltu a ni. A unaunu Demeter-i fanu Persephone- nupui ah a nei bawk.

POSEIDON : Khawvel a tui zawng zawng Pathian a ni a, Lîrnghîn tîrtu Pathian a ni bawk, Tuipui Lasî, Nereid Amphitrite-i chu nupui ah neiin fapa Triton- an nei a, Triton a hian fanu Pallas-i a nei leh bawk, mahse Pallas- i hi Athena-i nen an infiam laiin Zeus-an Țêk in a dêng hlum a, Athena-i hian Pallas-i hriatreng nan a lim Palladium a siam a, he Palladium hi Trojan khaw hnehtheih lohna thurûk kha a ni bawk.

Poseidon hian sakawr thi theilo pahnih Xanthus leh Balias- kha Achilles-a pa Peleus-a leh Thetis-i te inneih khan a pe bawk anih kha, khami sakawr pahnih kha Achilles-an Troy beih nan a a hman te kha an ni.

Tin, Gorgon Medusa nen fâ pahnih sakawr thlâwk thei Pegasus leh Mi chak huaisen Chrysaor te an nei bawk. Poseidon hian Pathiannu te leh mihring te lakah fâ tam tak a nei bawk.

HERA : Zeus-a nupui a ni a, Pathiannu te zînga Lal ber a ni bawk, inneihna leh chhungkaw enkawltu bâkah hmeichhia te enkawltu Pathiannu a ni bawk.

Thîkthu chhe tak mai a ni a, a pasal Zeus-a'n a mihring lak a fâ a neih te chungah nasa takin phubâ a la țhîn a, Zeus-a fapa Hercules pawh kha a nausên laiin thah tumin rûl chukna mî a tîr a, Hercules-a hna hah thlâk sawmlehpahnih pawh kha ama remruat vek a ni bawk.

DEMETER : Khawvel Sik leh sâ enkawltu leh thlai chi țhatna Pathiannu a ni a, a fanû Persephone-i, Hades- an a rûk lai khan a fanu zawngin khawvel hmun tin ah a kal a, sik leh sâ pawh a enkawl hman loh avângin khawvel sik leh sâ a buai a, mihring tam tak an boral a nih kha.

HESTIA : Olympians unau te zînga pasal neivlo awmchhun a ni a, mihring thinlung vêngtu leh chhungkaw enkawltu Pathiannu a ni.

THE SECOND OLYMPIANS GODS & GODDESS :

Anni ho hi Olympian unaute ho fa an ni a, pathian ropui tak an ni bawk.

ARTEMIS : Artemis- i hi Zeus leh Leto-i te fâ a ni a, Ramsa leh Pasalțha te véngtu Pathiannu a ni. Troy indo lai khan Trojan ho lam țanpuiin Greek ho riahbûkah Colchis ram ațanga a lâk sakeibaknei lu pahnih nei a chhuah a, mahse Achilles-an a lu a lo sâh bun sak avângin Achilles-a kha a hlau hial anih kha.

Tin, Agamemnon-a, Helen-i pasal Menelaus-a unaupa in Artemis-i ramsa humhalhna hmuna Sazuk- a kâp a, Artemis-i aiin ka ramvachal zâwk ti a a uan zui avângin Greek sipai te Troy kulh bei tûra an chhuah dawn laiin Thlî a thâwt tîr duh lo a, an lâwng pawh a kal thei lo a nih kha.

APOLLO : Zeus-a leh Leto-i te fâ tho a ni a, Thal kah leh rimawi Pathian a ni. Zeus-a'n a mihring hmeichhia a ngaihzawn avângin a nupui Hera- bâkah Pathian dang te nen Zeus-a an phiarru a, chuvang chuan Zeus chuan Apollo- hi hrem in Troy kulh a sak luih tîr a nih kha. Trojan ho ina an Pathian biak ber a ni a, chuvang chuan Achilles-a ke artui a Trojan Lal fapa Paris-a kah tîrtu kha a ni a, Paris-a thal mu tih ngîl sak in Achilles- a kâp hlum a nih kha.

HEPHAESTUS : Zeus leh Hera- i te fâ a ni a, Mei Pathian a ni bawk, a kê a bâi avâng hian a nu Hera- i hian duh lovin a paih a, mahse Achilles-a nu Thetis-i leh a unau te’n lo chharin an lo bawihsawm a, chuvangin Achilles-a pawh a duat hle a, Achilles-a hmanrua zawng zawng te pawh a aia țha awm tawh lo tûr khawp a țha in a siamsak a, Troy indina ah Lui Pathian Xanthus leh Lui Pathian dang tê'n a Achilles-a an beih rawn laiin Achilles-a a lo chhan bawk a nih kha.

HEBE : Zeus leh Hera- i te fanu a ni a, Țhat lai leh Vânglai Pathiannu a ni.

DIONYSUS : Zeus leh Thebes Lal fanu Semele- i te fapa a ni a, Zû leh Lei țhatna thlentu Pathian a ni. Semele-i hi Zeus-a nupui Hera- in a huat a vangin tihhlum a tum a, Nikhat chu Semele-enkawltu anga in siam danglamin Hera-i chu a va inlan a.

Hera-i chuan Semele-i chu bumin , Engtik ni ah emaw a fa paina Zeus- chu a Lal thuam a inthuam a ațêk thiltihtheihna nena a hma a inlan tûr a ti tûrin a chah a, Chu Thu chuan Semele-i chu a ti lâwm hle a,

Tichuan Zeus- an a rawn tlawh leh hmasak berah chuan alo sawi ta ngei a, Zeus pawh chuan ngaihtuah chiang lo in a lo tiam ve mai bawk a, a hriatchhuah leh meuh chuan Pathian meuh ina a thil tiam tawh chu sût leh theih a ni tawh si lo. Zeus chuan thi thei mihring Semele chuan a țêk sa lutuk chu a dâwl zo dâwn lova, a hma a a inlan vaih chuan meivâp ah a chang nghal dâwn a ni tih a hre sa a, mahse a thutiam bawhpelh theih a ni si lo.

A ngaihzâwng hma a a ropuina thuam famkim a inthuama a inlâr chuan a hlauh ang ngeiin meialh chuan Semele chu meivâp ah a chantîr nghal a, mahse Zeus chuan a naupai lai chu chhanchhuah sakin a enkawl seilian a, a hmingah Dionysus-a vuah ta a ni.

HERMES : Zeus leh Maia te fâpa a ni a, zaipawl leh zin mî te vêngtu Pathian a ni, a pheikhawk thlâ a nei a nei a, chu chuan chak tak tak in a thlâwk kual țhîn. He a pheikhawk hi mi huaisen Perseus-a'n Medusa a beih dawn in a bun sak bawk a ni.

PERSEPHONE : Zeus leh Demeter-i te fanu a ni a, Mitthi khaw Lalnu a ni, Mitthi khaw roreltu Pathian Hades-an rû in nupuiah a nei a nih kha.

ARES : Indona Pathian a ni a, Zeus leh Hera-i te fapa a ni, Pathiante zînga țuan rang ber a ni a, Mei Pathian Hephaestus-a nupui Aphrodite-i chhuhsakin fapa Eros-a an nei a, Eros-a hi Helen-in Paris a a hmangaih theih nan a Heleni thinlung hmangaihna thal a kâptu kha a ni bawk. Amazon Lalnu Otrera nen fanu pali Hippolyta, Antiope, Melanippe leh Penthesilea an nei a, Penthesilea-i hi Trojan Indona ah Troy Lal Priam-a țanpui tûrin a kal a, mahse Achilles-an alo tihlum a nih kha.

Tin, Hippolyta-i hi sawi dan pakhat ah chuan fanu Diana neiin an sawi bawk.(Diana-i chu DC Comics a Wonder Woman kha a ni a, a movie pawh in an siam bawk kha).

ATHENA : Zeus leh Metis-i te fanu a ni a, Indona leh finna Pathiannu a ni bawk a, Athens- khaw dintu hi a ni bawk. Pathiannu Pasal nei lo a ni a, Amah biakna temple chu Athens khua a temple ropui Parthenon khu a ni.

APHRODITE : Ani hi Uranus a serh aṭanga rawn piang niin sawi a ni a, Tin, Hera leh Zeus-te fanu ti a sawilan a ni bawk, hmelṭhatna leh hmeichhiat mipatna pathiannu a ni a, pathiannu te zînga hmelṭha ber a ni, ani hian a fapa Eros hnenah hmangaihna thal a Helen-i kap tûr in a ti a, tichuan Eros chuan Helen-i chu kâp in Trojan Lal fapa Paris-a chu a lo hmangaih ta êm êm anih kha.

Hengte hi Greek ho Pathian, Olympians an tih te ber chu an ni a, heng lo pawh hi Pathian tenau tam tak an la nei bawk a, Hercules hi a boral hnu in mihring te'n pathian angin an bia a, chakna pathian ah ngaiin a hnenah inthawina an hlân ṭhîn.

Inthawi kher ngai lo pathian sang tam tak an awm a, mahsela heng ho hi chu mihring te'n a hranpa in an be nasa lo.