2022 HRILHLAWKNA LEH ARMAGEDON INDONA

Tunlai khawvel chanchinthar  te hi han ngaithla hlawm ila, thil hlimawm lam ai chuan chhiatna lam hi a tam leh nasa zâwk an ni tlangpui a, 2019 kum tâwp lam aṭanga khawvel huap hripui lêng chuan ziaawm lam ala pan tak tak thei lo a, chutihlai in indona, Russia leh Ukraine,NATO- ram te chungchang in min nangching leh tawh bawk si.

Manganna leh thlaphanna, rilru tih chiai na tizual tûrin mi ṭhenkhatin indopui pathumna/Khawvel tâwp hrilhlawkna fahrah te te an lo sawi ve chamchi bawk a, a sawitu lah in hrechiang bik lo, a hre tu lah in hre chiang chuang bîk lo, an in tihṭhaih kual vel mai mai niin alang, chhechhâwnga te vai dâwr ang maiin.

Tunlai khawvel chhiatna leh buaina tam tak ina min tih mangan nasat tawh lai a hetiang thu vu vûk leh puarpawleng mai mai kan thehdarh ta vak vak mai ṭhín hi kan mawl vâng nge kan changkan tawh vâng tih pawh hriat a har ṭálh ta mai.

Aw le, kan tarlan duh hmasak chu, tunlai a Ukraine leh Russia inbeihna hi mi ṭhenkhat in Indopui pathumna tûr a ni e an ti a, chumai la duhtawk lovin Bible thu nen a zawm belhin, Indopui pathumna chu Khawvel tawp indona Harmagedon- a ni te an tia.

An ṭanchhan pakhat ah chuan France mî Nostradamus-a hrilhlawkna tam tak a tel a ni. Ani bâkah hian pitar mitdel pakhat Baba Vanga- pawh a tel bawk,  a lâr zual bîk leh an sawi nasat chauh ania khimi te pahnih khi. Midang hrilhhlawktu za tam an awm tel bawk.

Hemi te pahnih ina khawvel hun tawp lam chanchin an puan lâwk hi a in ang riau mai a, ṭhenkhat chuan heng hun hnuhnung a thilthleng tûr te hi  2021 hi a ni e an ti a, 2021 ah indopui pathumna a chhuak dawn, chhiatna a thleng dawn an ti chamchi a, mahsela a thlen leh tâk si loh avângin 2021 a thleng tûr kha 2022 ah a thleng dawn an rawn ti thar leh a, kumin a a thlen loh chuan nakkum lam te pawh anla sawi ri leh mahna.

Engpawh nisela Baba thusawi, 2021 a thil thleng tûr an tih hi tlem han tarlang lawk ila, ani hi  Kum 1996- khân kum 85 mi niin a lo boral tawh a, a hrilhlawkna hrim hrim hi 85% vêl thleng dik ah an ngai.

Hrilhlawk theihna mak danglam tak mai a neih avanga “Nostradamus of the Balkan” an tih hial Baba Vanga (a hming tak Vangelia Gushterova) chuan 2022 kum lo herchhuak tûr a thilthleng tûr te chu a lo hrilhlawk tawh a.

He mihring hian Brexit leh 9/11 te pawh a lo hrilhlawk ang ngeiin a thleng dik a ni.

Baba Vanga- hi 1911 ah a lo piang a, kum 12 mi a nih laiin thlipui na tak in a nuai a, chuvâng a mit a del zui ta a ni. Ani chuan," Heta ṭang hian Pathianin hmalam hun hrilhlawk theihna finna mak danglam tak min pe," tih a sawi a ni.

Ani hian 2022- ah chuan khua a lum nasa dâwn a, khawlum lam chu 50C- a sâng ah a thleng chho dawn bawk a, tui thianghlim intûr pawh khawvel in a tlachham ang.

2022 kum lo herchhuak tûr ah hian Asia ram tam tak leh Australia chu lirnghing leh tuilian nasa takin a nuai dawn a, Tin, Khawvel ah virus hlauhawm tak a lo chhuak ang a, chu chu Russia ram Siberia a researchers team te'n an hmuhchhuak dâwn a ni.

Tin, asteroid ‘Oumuamua’ an tih chu Alien te'n khawvelah nunna zawngin an tirchhuak ang a ti bawk.

Heng a thusawi te hi 2022 a thleng tûr an ni a, mahsela kum chanve kan hmang ṭêp a, pakhat mah thleng dik chu ala awm chuang lo a, thla sarih ala awm a, chumi chhûng chuan thleng hman hlawm tak ang maw.(!)

Khawlum erawh chu Nipui anih miau avângin a lum thei angreng rih hle.(!)

Khau puang tûr pawh a sawi a, "Khau nasa takin a puang ang a, heng khau te hian thlai leh buh kung an eichhe zo ang a, India ramah ṭam a tla ang," a ti bawk. A hrilhlawkna zulzuiin 2020 kumah Rajasthan, Gujarat leh Madhya Pradesh ah te khau rualin thlai leh buh kungte an lo eichhe tawh a nih kha.

Mahsela 2022 a thleng tûr anih avângin 2020- a thleng erawh hnuhluh hrâm chi a ni thei si lovang.

Baba hrilhlawkna ah pawh 2022 a thil thleng tûr/Chhiatna thleng tûr hi kan sawi chamchi a, kan hlau viau niin alang a, mahsela ani pawh hi hrihhlawkna dik zîkthluak lo puangtu tho a ni a, Crystal ball hmanga thu puang lâwk ṭhîn Jean Dixon- aia kan dah sânna chhan tûr a awm bîk lo.

A chhan chu Bible aṭanga kan teh dawn chuan, Pathian zawlnei/Pathian lak aṭanga chhuak hrilhlawkna thu chu thleng dik lo thei lo a ni a, lo la thleng lo pawh thleng dik vek tûr a ni.(Dik lo thei lo)

Chutiang anih chuan Baba pawh hian American President hnuhnung ber tûr chu American-African a ni ang a ti a, chu chu a hrilhlawkna pawmtu leh a dik ti tu te chuan Barack Obama Hussein-a ni e an ti a, mahsela a hnuhnung ber erawh a ni si lo. Chumi lo pawh thu puanlawk dik lo tam tak a nei a, amah zuitu leh ringtu te pawn 85% a puang dik an ti tho.

Hei hian zawlnei/hrilhlawktu der, thim Lal finna aṭanga thu puang ṭhîn a ni tih a tilang chiang êm êm a, chuvangin Baba thupuan lâwk te hi dâwt leh thu vuvuk mai mai, Lapaw chini ang lek ah i ngai mai ang u aw.

Tunlai a lâr ber mai pakhat, Nostradamus- ina 2022- a thil thleng tûr a sawi te hi han tarlang leh lawk ila.

Ani hian a lehkhabu lâr tak 'Centuries'- ah khân India ram pawh hi a lo sawilang ve teh khiah a.

"Ram thiltithei tak, kil thum a tuipuiin a hual chhuah ramah chuan ṭhendarh anih avânga a tawrhna hliam zawng zawngte thâwidam a, nun pangngai a hruai tûrin hruaitu hmeichhia, chak leh thiltithei tak a lo chhuak ang. Mahse chu nu chuan kum 67- a pelh hma in ama inah ngei, amah venghim tûra ngaih te'n an tihlum anga. Hei hi kum zabi thar inhawn hma kum 16- ah a thleng ang." tiin.

Hemi ina a sawi chu, Indira Gandhi, kum 1984- kum zabi 21- na inhawn hma kum 16- na a thah anih tâk kha a ni.

Ani hian 2022- a thil thleng tûr a sawi ti a an vawrh darh chu:

2022- ah chuan thil man a to vin ṭam a tla ang a, Tin, Lui tui te chu an sâ ang a, sangha te pawh an hmin thei hial ang.

2020- ah khawchhak ram in France a do ang a, 2020 ah buaina nasa tak a thleng ang. (hei hi tâm tla tûr)

2022- ah khawvel awm tirh ata ṭam rapthlak ber a thleng ang a, Tin, Khawvel a ramchak leh hruaitu te an in thlâk kual ang.

2021- ah indona leh lirnghing, tuilian te avânga khawpui tam tak a chhiat a, a kan hnu ah indopui pathumna a lo thleng ang.

Buaina nasa takin unau pahnih a pawt hrang ang a, ram hruaitu ropui tak a thi bawk ang.

Tih te an ni a, a ṭhen te hi chu Nostradamus-a puan pawh ni lo, a ngaihnawm tûr leh mî te ngaihven duh zâwng a tu emaw te'n an phuah belh a ni hial ang, a chhan chu Nostradamus-a hrilhlawkna bu a awm lo te a awm nual tlat a ni.

2022- ah chuan van sangah meialh ṭêk chuai chuai a lo awm ang a, chu chuan khawvel sik leh sa a thlâk danglam ang.

Hei hi thil thleng ve thei tak mai chu a ni a, Mi tam tak chuan Meialh hi arsi keh them(Asteroid?) in kan lei a rawn pan ang a, kan lei tuamtu boruak(atmosphere) a rawn sut hunah a ṭék chuai chuai dawn a ni ang an ti a, hei erawh hi chu asteroid in kan lei a rawn pan a nih hrim hrim chuan thil thlen dan tûr a ni hrim hrim sa.

Nostradamus a'n indopui pathumna(?) a sawi niawm tak chu indona nasatna ber tûr Europe a tih te, Russia, China leh India, Turkey bâkah US leh France- buaina nasa tak leh indona a an tel thu te, Khawchhak lam ram(Asia khawmualpui) in khawthlang lam an do tûr thu a sawi avâng te hian tun hun a Ukraine leh Russia buaina hi a bulṭanna a ni ange an ti a, ṭhenkhat phei chuan indopui pathumna hi thleng mêk ah te an lo chhuah leh tawh bawk.

He indona ah hian Nostradamus- chuan Arab sipai te'n Israel an beih a, an hneh tûr thu a sawi ve tlat mai a, Tin, khawchhak lam ram ṭangrual te bei tûrin US leh Russia an thawk ho dâwn bawk.

Tunlai khawvel thil thleng thlîr chuan kumin 2022 a thleng atân chuan a chawpchilh tawh mah mah in alang deuh iti ve lo maw.(!)

He thu chiang lo ruai hi kan sawi vul chûk a, a sawi hnuhnung apiang te sawi kan ring nasa zual zel a, keimahni leh keimahni kan in tihṭhaih vak vak a ri ringawt mai.

A dik a dik chuan kan han tarlan tâk tam tak khi kum 2021 emaw 2022 kum bîk a thil thleng tûr ni lovin, kum zabi 21- a thleng tûr an ni a, chumi awmzia chu, kum 2001 leh 2100 inkâr a thleng tûr a ni, Nostrosamus a hrihlawk dân chuan.

Engvangin nge  2021 leh 2022 a thleng vek tûr kan ngaih tâk mai kan tih chuan, a tam ber ah chuan tu tu te emaw in an ngaidan/Pathian thu rin/zirtir dan mil a khawvel kalphung her rem a, mipui tih chi ai a, Pathian thu tak lak a ta thu ho mai mai a mi rilru hneh tum vâng niin alang.

A thu hrim ah Kum zabi 21 a thil thleng tûr a sawi lâwk te pawh hi kum zabi thar thlen hma deuh aṭanga in mûng chho leh indona tenau pawh inṭan tûr a ngaih a ni a, mahsela a eng amah a thleng dik hran lo tih theih anih chu.

America leh Russia ṭang dûn ina China leh middle east ram an do a, indona rapthlak tak thleng tûr chu kum 1995 chho vel a thleng tûr a ni a, mahsela a thleng lo hlauh.

 Mongols hovin thihna zungzâm tidarh thei ralthuam an hman hnu ah khawvel indopui a thleng ang a, khawvel ram chak pahnih leh India te ṭanhona leh inzawmna ṭhat vangin indona in kawng dang a hawi ang.

Kum zabi thar (21st) aṭanga chhiar ṭan a kum nga ah indona a reh ang tih pawh 2006 ah  a ni tihna a ni a nia, mahsela inremna a thleng chuang lo.

Tin, kum 1999 july thla ah van aṭangin Rîkrâptu Lalber a rawn chhuk ang a, he mî hi puan leh kawrfual in a inthuam ang a, khawvel hi kum 27- chhûng a rîkrâp ang.

He rîkrâptu hi 1999- a lo kal tûr angin a sawi a, chuta ṭang chuan 2026- thleng khawvel a rîkrâp dawn a, a tu chu nge ni ang le, tunah pawh khawvel ah ala awm ngei dawn si a.

Tin, 1999 chungchang ah hian thu hrilhlawk pahnih a awm a, pakhat zâwk chu,

"Indopui hnuhnung lam chu Jupiter leh Aries arsi te chhinchhiahna nei a an chêt hnu kum 1999 a ni ang." tih a ni a.

Helai thu ah hian kum 1999 anga kan pawm dawn anih chuan, Aries Constellation chhûng a Jupiter luh hun niawm tak a ni a.

Chutiang anih chuan, 1939 May ni 11- khân Jupiter chu a lût a, chu chu chhinchhiahna ang a ni a, a hnu lawk December ni 20 ah pawh a lut leh tho nâ in.

1939 aṭanga kum 1999 chu  kum 3938 a lo ni a, kum 3938 ah indopui pathumna hnuhnung lam a ni chauh dawn tihna a ni.

Mahsela a dik hlel kan tih a, Nostradamus-a'n kum zabi 21 na ah alawm a tih kan tih chuan, kum zabi 21 na a Aries Constellation a Jupiter a luh kum hmasa ber chu 2010  June ni 6 ah a ni a, 

2010 aṭanga 1999 hnu chu, kum 4009- a ni leh a, kum zabi 21 na a indopui pathumna inṭan chu kum 4009 vel ah a tawp vel dawn chauh tihna a ni.

Kumin 2022 ah pawh hian May ni 10 leh December ni 20 hian Jupiter chu Aries Constellation ah a lût leh dawn a, chutiang anih chuan Nostradamus-a'n, "Jupiter leh Aries arsi te chhinchhiahna nei a an chêt hnu kum 1999 a ni ang." "HNU" - a tih avângin Kum 2022 aṭanga 1999 hnu chu kum 4021- a ni a, an indo chhûng/indopui pathumna chhûng a rei duh dâwn hle mai.

A enga pawh chu nisela, Baba leh Nostradamus te thupuan hi thu dik zikthluak lo an ni tih kan lo hre ta a, 2022 emaw eng kum ah pawh nisela indona chu ala awm dawn a, ala nasa telh telh dawn tih hi dik lo thei lo Bible chuan a lo sawi lâwk tawh a, indopui pathumna kher hi Khawvel tâwp Harmagedon indona a ni lo thei bawk tih hi kan hriat angai a ni.

Indopui vawi sâwmna daih pawh Harmagedon indona a ni thei tihna anih chu, amah erawh chu indona leh ṭâm te, hri lêng te....etc a lo thlen hun chuan Bible dik zia i hre thung dâwn a ni.

Covid 19 vângin kan mangang a, tunah indo thuthang te kan hria in kan hmu a, mahsela héng hi hrehawm takin tuar mah ila, Bible dik zia tarlangtu an ni asin, an rawn thleng lovang tih hi a hlauhawm zâwk iti lo maw.

Lo thleng thei lo sela chuan Bible hi dâwt bu mai a ni dâwn si. Chuvang tak chuan Bible dik zia i lo hre chiang ta a, hrereng chungin sual kawng ila zawh ṭâlh dawn em ni.(?)

Kan tarlan tâk angin, Kumin 2022- a thil lo thleng tûr ṭhenkhat, hrilhlawk thiam ho puan lâwk hian Indopui pathumna chu Russia ina Ukraine a rûn aṭang hian a inṭan dâwn a, indopui hmahruai a ni e an ti a.

Helai ah hian, he Russia leh Ukraine inkar hi indopui pathumna hmahruai chu a ni ve thei tho mai bawk a, he indona avânga khawvel ram in siksawi leh buaina ngaihtuah chuan thil ni thei tak tûr pawh a ni.

Chulai ah chuan hrilhhlawkna pawmtu te hi duhtawk mai sela chuan dikna lai pawh an nei mai tûr hi a ni a. Hrilhlawkna hrim hrim kan hnawl vek e tihna erawh a ni lo a, an hrilhlawkna, Indopui pathumna lo thleng tûr bîk ah hian indo ngawr ngawr chauh sawilang sela, a bâk, a chuangliam thu dang erawh belh lo sela kan ti a ni zâwk e aw.

Chumi awmzia chu, Indopui chu Russia leh Ukraine inkar thil thleng aṭang hian a inṭan dawn tiin sawi mai sela, chumi ni lovin, indopui pathuma chu Harmagedon indona a ni dawn tih te thleng a an han sawi hi chu a chuang liam hret kan ti a ni.

Harmagedon indona chu khawvel tâwp a indona, indona hnuhnung ber tûr a ni a, Indopui pathumna erawh khawilai ah mah khawvel tawp indona tih tarlan a ni si lo, indopui sawmhnihna daih kha Harmagedon indona a ni thei ve tlat a ni.

Nostradamus chuan kum zabi 21-na (2001 - 2100) chhunga indona leh thil thleng tûr a sawi ah chuan,

"Indona chu Europe ramah a nasa ber ang a, He indona ah hian Russia sawrkar thlâk duhna a awm ang a, mahsela a hlawhchham ang.

Tin, hnam nihphung chawilar thar leh duhna te a lo thleng anga, rorelna chi thar te lo chhuak in Russia chuan khawvel ah dinhmun pawimawh tak a chang ang.

Chi inthliarna avângin UNO a kehchhia ang a, khawchhak ram in zawmkhawm chuan khawvel pum inṭhian ṭhatna leh thawhhona te a ti chhe vek ang.

Middle East ah Dictator a lo lang ang a, Arab sipai te chuan Morrocco lal, khawthlang lam ram âwn tu chu an paihthla ang.He indona hi varṭianah a inṭan ang a, Arab ram te chuan Israel beiin a hneh ang.

Hetiang a Arab ram leh Khawchhak lam ram an lo len zêl chuan America leh Russia te'n thawhhona thu an puang ang.

Khawi aṭanga lo kal nge tih hriat loh Rocket in America leh Russia a dêng ang.

Khawchhak ho te chuan hmar tawp ram chungah natna hrik hlauhawm tak an theh darh ang a, chung chu thliin lên in, Canada, US, Russia leh Europe hmarlam ramah te sem darh a ni ang.

Arab leh China ṭangrual in Turkey an beihrawn ang a, natna hrik hmangin Greece rampum an ti chhe vek ang.

Khawchhak ho chuan nuclear ralthuam hmangin Florence leh Siena khua an la lêt leh ang a, Pavia ah natna hrik pai ralthuam an hmang leh ang.

China ram hruaitu, kut bul lehnghal in Atom bomb a ti puak ang a, chu chuan France ram zau tak a ti kâng ang, tin amah pawh he bomb puak hian a ti hlum ve bawk ang."

 Hêng hi Nostradamus-a'n khawvel indopui pathumna lo awm tûr a sawilâwk ṭhenkhat a ni a, a pawimawh leh hriat chakawm bîk lai te te chauh rawn tarlan a ni a, a dang tam tak pawh a sawi bawk tih kan hre tel dawn nia.

Tin, Hiroshima leh Nagasaki- khawpui a Atom bomb thlâk chungchâng pawh kha lo hmu lâwk in, " Thihna mei chu rang takin a darh hluai a, thihna leh chhiatna nasa tak a thlen a ni," tiin.

A thu hrilhlawk te leh tunlai a a hrilhlawkna niawm tak tak an sawi te hi inang lo a awm nuai mai a, 2022- a indopui pathumna lo thleng tûr phei chu a sawi lo hrim hrim niin alang.

Engpawh nisela indopui hnuhnung ber (Harmagedon) ah chuan loh theih loh a tel tûr chu Israel an ni a, tun ṭum Russia leh Ukraine buaina pawh hi a rei telh telh a, Indopui pathumna tûr inṭanna anih theihna lai a rawn lang ve leh ta tlat mai.

Tunhnai khân Russia foreign minister Sergei Lavrov-a'n Nazi Leader Adolf Hitler an Jewish origins anei a ti a, Hei hi Israel lam chuan an helh hle a, ngaihdam dîl tûrin an ti hial anih kha, he indona a Israel a luh tel ve vaih chuan Russia chu Iran in a pui ngei dawn a, Middle East ram hovin Israel an ṭan dâwn lo nasa mai si.

Israel leh NATO ram ho chu Russia leh Middle East ram te nen a indo buaih na thleng  thei a ni ve leh thei tlat bawk. Mi tam tak chuan chu thil avâng chuan Indopui a chhuak in Harmagedon thleng mai thei tûr ah an lo ngai a, hrilhlawkna tam tak an lo vawrh darh leh chiam bawk.

Mahsela rin loh tak maiin Russia President Vladimir Putin- chuan Israel hnenah ngaihdam a dîl tlai khaw hnu leh si anih kha maw.(!)

Engemaw hlek ah Theory hrang hrang hi a rawn darh leh hluai mai ṭhîn a, hei hi chu thutak a ngaih chi pawh a ni hranpa lo, khawvel ken tel ve hrim hrim ni awm zâwk tak a ni.

Kan tarlan tak zawng zawng aṭanga teh chuan 2022 a indopui(Harmagedon ) thleng tûr anga sawi chu dawt thu mai a ni e tih kan hmu thiam ang a, Indopui pathumna erawh thleng thut thei reng a ni tih pawh kan hriat ve angai bawk.

Chulam chu duhtawk ta ila, he indona hnuhnung ber Harmagedon- chungchang hi tlem han tarlang leh lawk ila.

He Indopui hi Muslim lehkhabu thianghlim Quran ah pawh a lo chuang ve a, mi tam tak chuan tun a Russia leh Ukraine buaina ah hian an lo seng lût leh pek nia maw le.(!)

Harmagedon indona chu Gog leh Magog- ram ina Israel a beih tûr thu leh, Gog leh magog chu Pathian ina a hrem tûr thu Ezekiela bung 38,39 chho ah kan hmu a.

Quran lamah pawh, Surah,18 Al Kahf (The Cave) 83-110 ah a lo inziak a, Gog leh Magog chu Yajuj leh Majuj- a inti a ni.

Quran a tarlan anih dan chuan, Yajuj leh Majuj- ram te chu ram dang nen Dhu al-Qarnayn-i'n an in daidangna bang (Wall) a sak hnan dawn a ti a.

Dhu al-Qarnayn- hi 'ki pahnih nei' tihna a ni a, Mi tam tak chuan Alexander the Great kha a ni e an ti a, ani khân middle east ram te hneh in Aigupta ho pathian Amun (Greek ho pathian Zeus) chhinchhiahna ki pahnih nei lukhum a khum ṭhîn an ti bawk.

Tin, Dhu al-Qarnayn chu mi kawlhsen leh milian tak tak Vikings ho an ni e an ti bawk a, anni hi lawng hmang a ral bei ṭhîn leh lukhum a ki pahnih nei hmang ṭhîn anni bawk.

Khawvel tawp indona chu Bible a zawlnei Ezekiela bu ah chiang takin a in ziak a.

(Ezekiela 38:2-8 ) "Mihring fapa, Magog rama mi, Ros leh Mesek leh Tubal hotu ber Goga hmachhawn la, a chungah thu sawi la, 

LALPA PATHIAN chuan heti hian a ti a ni: Ngai rawh, aw Goga, Ros, Mesek leh Tubal hotu ber, ka do che a ni; 

ka lehhawitîr ang chia, i khabeah nghakuaiin ka kuai ang chia, ka khai chhuak ang che; i sipai rual zawng zawngte, sakawr leh a chung chuang mite, râlthuam famkima inthuam zawng zawngte, pâwl ropui tak, phaw lian leh phaw tê hmang a khandaih keng theuh te nen chuan. 

Persia, Kus, Put te nên, an vaia phaw leh thir lukhum neite chu; 

Gomer leh a sipai rual zawng zawngte; Togarma chhûngte, hmâr tawpa mi leh a sipai rual zawng zawngte; i hnên a mi tam tak te nên pawh. 

Inralring la, a ni, lo in peih rawh, nang leh i hnêna awm khâwm, i pawlpui zawng zawngte nên; tin, an vengtu lo ni ang che. 

ni tam tak hnuah chuan koh khâwm i ni ang a, kum hnuhnungah te chuan khandaih laka chhanchhuah, hnam tamtakte laka ata lâk khâwmte awmna ram, Israel tlâng tiau reng thinte chu i rawn bei ang; hnamte zing ata hruai chhuaha, tuna an vaia thlamuang taka an awmna ram chu. "

Tin, Thupuan bu ah pawh kan hmu bawk.

(Thupuan 20:8)  "Lei kil lia hnam te, Goga leh Magoga chu buma indonaa hruai khawm turin a kal chhuak ang; chungho tamzia chu tuifinriata tiauvut ang mai an ni. "

Heng ram te hian khawvel ram dang te chu an do mai ni lovin pathian thinurna an tawng baw dawn a ni.

Gog, Magog, Rosh, Mesek, Tubal, Persia, Kus,Gomer, Put, Togarma...tih hming te hi hmanlai hming an ni a, tunlai ah chuan hming dang an pu tawh thung a, tin, hnam inthlah chhâwng zêl te  pawh an ni bawk a ni.

(Genesis 10:1-3) "Tin, hêng hi Nova fapa Sema te, Hama te, Japhetha teho thlahte an ni: tui lêt hnuah chuan fapate an nei hlawm a.

Japhetha fapate chu Gomera te, Magoga te, Madaia te, Javan te, Tubala te, Maseka te, Tirasa te an ni a.

Tin, Gomera fapate chu Askenaza te, Riphatha te, Togarma te an ni a."

(Genesis 10:6) "Tin, Hama fapate chu Kusa te, Mizraima te, Puta te, Kanaana te an ni a."

Chumi hnu chuan heng an thlah ho te hi khawvel ah an lo kal darh ta a ni.

(Genesis 10:32) "Chûnghote chu Nova thlahho hnamte an ni a, an thlahte ang zêlin, an chite zîngah chuan: tui lêt hnuah chûngho aṭang chuan a ni leiah hian chi tin an darh tâk a ni."

Hêng ho Hmar lam lal leh a ṭhuihruai te hi khawvel indopui tâwp ber a chhim lal lal te nen a indo tûr an ni a, tûn ṭumah hi chuan hrilhlawkna chungchang lam deuh kan thupui anih avângin Gog leh Magog chungchang sawi mah ila, hmanlai leh tunlai a an in din chhoh dan, a hnam leh an ram chungchang chhui bîkna , an in thlahchhawn dân erawh kan tarlang tel rih dawn lo a, remchangah Gog leh Magog hi hmanlai aṭanga tun hun thleng a an lo kal chhoh dan bîk tarlan kan tum thung dawn nia, tunah chuan Armageddon indopui bîk kan tarlang phawt ang.

Armageddon indona hi Ezekiela hian a ziak chipchiar angreng hle mai a, mahsela a chipchiar lo zâwk Thupuan bu ami hi kan hriat tlanglawn ber a ni thung.

Ezekiela bung 38,39 bakah Daniela bu ah kan hmu bawk anih kha.

Chhui dan a tam a, hriat dan a tam a, tun a kan tarlan tum pawh hi a dik ber e kan ti a ni chuang lo a, mahsela chhui dan hrang hrang zíng a pawmawm ber te zîng ami erawh a ni thung.

Gog chu, Magog ram hruaitu tihna mai a ni a, Magog ram chu tuna Russia hi a ni, tin, Gog hi China a ni e tih te pawh a awm bawk.

Tin, Ros(Rus) chu Russia ram hmasa hming a ni a, Mesek pawh hi tuna Russia khawpui Moscow hi a ni a, Tubal pawh Russia ram tho Siberia a ni.

(Ezekiela 38:5-8) " Persia, Kus, Put te nên, an vaia phaw leh thir lukhum neite chu; 

Gomer leh a sipai rual zawng zawngte; Togarma chhûngte, hmâr tawpa mi leh a sipai rual zawng zawngte; i hnên a mi tam tak te nên pawh. 

Inralring la, a ni, lo in peih rawh, nang leh i hnêna awm khâwm, i pawlpui zawng zawngte nên; tin, an vengtu lo ni ang che. 

ni tam tak hnuah chuan koh khâwm i ni ang a, kum hnuhnungah te chuan khandaih laka chhanchhuah, hnam tamtakte laka ata lâk khâwmte awmna ram, Israel tlâng tiau reng thinte chu i rawn bei ang; hnamte zing ata hruai chhuaha, tuna an vaia thlamuang taka an awmna ram chu. "

Heng ho hi Gog leh Magog puitu tûr ram an ni tih Bible hian min hrilh a, Russia thurualpui tûr ram te an ni.

Persia chu tunah chuan Iran a ni a, Kus(Cush) chu Ethiopia(Africa continent).

Put(Puth) pawh tunah chuan Libya (Northern Africa).  Gomer chu tun a Germany, Togarma pawh hi tunah chuan Turkey tiin kan hre tawh thung.

Russia, China, Libya, Germany, Ethiopia, Iran,Turkey te ṭang ho in Israel leh khawvel ram dang ṭangrual an bei dawn a ni.

Chumi awmzia chu, Russia, Middle East, Arab-Africa leh China te an ṭangho dawn tihna anih chu, chumi hruaitu tûr chu Russia hi a ni.

Chu chu Daniela bung 11-ah kan hmu leh a, Hmar lam ram leh Chhim lam ram chu an indo dawn a ni.

(Ezekiela 38:15-18) "hmârlam ram tawp ret, i hmun atang chuan i lo kal ang, nang leh i hnêna mi tam tak sakawr chung chuang theuh, pâwl ropui tak, sipai rual nasa tak mai chu. 

Chhûmin ram a tuam mup mup ang mai hian ka mi Israelte chungah i lo kal ang; heti hi a ni ang a, ni hnuhnûngahte chuan ka ram do tûrin ka hruai ang chia, hnamte chuan mi hria ang, Aw, Goga, an mithmuha nangmaha tihthianghlima ka awm hunah chuan. 

Tin, LALPA PATHIAN chuan heti hian a ti a ni: Hmâsânga ka rawngbawltu Israel zâwlnei, chûng laia kum tamtak chhûnga thu lo sawi thintuten anmahni bei tûra ka rawn hruai tûr che thu an sawi thina kha i ni êm?ti rawh,' a ti a. 

Tin, chumi nîah chuan heti hi a ni ang a, Israel ram bei tûra Goga a lo kal hunah chuan ka thinrimna chu ka hnâr khu chhuak hluah hluah ang, tih hi LALPA PATHIAN thu chhuak a ni."

Hetah hian kan hriat tûr chu, Jerusalem aṭanga hmar lam ram tâwp rêt chu Russia a ni.

Hetih hunlai hian Sakawlh chu leiah a awm tawh dawn tih kan hmu a,

Thupuan bung 16- a kan hmuh angin, Pathian thinurna berhbu parukna leihbuak anih hunah a ni China chu Israel do tur a a rawn kal ve dawn tâk ni.

(Thupuan 16:12 )"Tin, a parukna chuan a berhbu chu tuipui, Euphrates-ah chuan a leih bua a; tichuan, ni chhuahna lam atanga lal lo kal turte tana kawng chu peih sa a lo nih theih nan, a tui chu a kangchat ta a."

Tichuan Israel chu do rawn an ni ang a, mahsela an hneh dawn lo thung a ni.

Ezekiela bu a kan hmuh angin, 'Thla sarih' tih a ni a, hei hi Sakawlh nen a israel remna leh sakawlh hun pêk anih chhûng sawina a theih bawk.

Chumi hnu chuan Sakawlh chuan Israel nen a inremna chu a bawhchhia ang a, Daniela bung 11:31,32 a kan hmuh angin, hmun thianghlim te an ti bawlhhlawh ang a,halral thilhlan awm fo te an ti bo ang a, ṭiauna tenawmna chu an dintir zâwk ang.

Chumi chu Armagedon indona chu a ni a,

Chumi hnu ah indona hnuhnung ber a awm leh ang a, chu erawh chu Sakawlh leh Krista indona a ni tawh thung ang.

(Thupuan 20:8-10) "lei kil lia hnam te, Goga leh Magoga chu buma indonaa hruai khawm turin a kal chhuak ang; chungho tamzia chu tuifinriata tiauvut ang mai an ni. 

Tin, lei vang lam dapin an kal chho va, mi thianghlimte riah hmun leh khaw duhawm tak chu an hual ta a; tin, van atangin mei a lo tla a, anni chu a kangral ta a. 

Tin,anmahni bumtu Diabola chu sakawlh leh zawlnei der awmna, mei leh kat dilah chuan an paih ta a; tichuan chatuanin achhun a zan a nghaisakin an awm ang."

Tin, kan hriat reng tur chu, Gog leh Magog ram ṭanpui tu leh a thurual pui ram te hi unau vek an ni a, Nova fapa Japhetha fa te vek an ni.

Tichuan Bible pawn lam hrilhlawkna te chu an dik tawk lo tih kan lo hre ta a, hman aṭang a tun thleng a thupuang lawk tu te hian za a za in Bible angin an puang dik dawn lo tih hi i hre thar leh ang u.

Hun hnuhnung a ni tawh a, Bible ina a lo sawi, indona, hri leh ṭâm te pawh a lo thleng chho mêk zel a, chumi avang chuan hrehawm tak a awm in i lo beidawng ṭhîn anih chuan Bible chhiar la, heng chhiatna leh buaina, harsatna lo thleng te hi Bible ina a lo sawi làwk tawh anih avângin i rin Bible dik zia i hre thar leh ang a, chu i rinna ah chuan ding nghet tlat la, tichuan hlim takin, Krista en chungin leh zui chungin harsatna i hmachhawn dawn nia.

Indona te, ṭam te, hri te, buains hrang hrang leh chhiatna tam tak te hi lo thleng lo sela chuan mangang zawk tûr kan ni asin, a chhan chu chutiang a thleng lo anih chuan Bible hi dawt a ni dawn tihna a nia, chuvangin Bible thu a lo thlen dik zel avâng hian Krista i rinna chu lo nghet sauh sauh sela, Bible pawn lam pathian thu leh hrilhlawkna te chu lo ring lo phawt mai rawh.

Isua pawh kha Setana khân Bible thu hmangin a thlem a, Tin, Cherub Hriakthih, Vantirhkoh chungnung ber ber te zîng ami hian hrilhlawkna, mihring te rilru a awm reng, mihring te hriat chak zâwng hi a hre ve tho tih pawh hi i hre thar leh ang u.

2022 ah indopui pathumna a thleng dawn lo kan ti lo a, indopui pathumna hi Harmagedon indona a ni kher lo kan ti a ni zâwk e.

Tin, Israel nen a thuhlung an siam hma in sakawlh chuan Israel a do phawt dawn a, chumi hnu ah inremna a awm ang.

Inremna an neih hnu ah indona an nei leh ang, chumi chu Hsrmagedon indona a ni, mahse chumi hma in Setana hi kum sangkhat phuar a ni dawn phawt.

Chuvangin 2022 a khawvel tawp mai tur te, indopui thleng mai tur te hi dawt thu hrihlawkna mai chauh a ni e, kan hma hun a thil lo thleng tûr kan hre duh anih chuan Bible kan chhiar mai dawn nia.