A CASE OF DREAMS | Dreams Of Desire SAGA (Chapter -2) 18+

🔱🍷

PRESENT DAY.

San Francisco Police Station an chhuahsan hnu chuan an Office awmna Pacific Avenue-lamah an tlang nghal a.

🍷"Report kan pêk vat angai dawn a ni, chumi hnu ah mitthi chenna lama kan liam leh nghal angai ang." Toby chuan Miss Jars-i lehkha pêk bih pah chuan a ti a.

A dawhkân chunga a ke thluang diai hian Sam- pawh chuan Case File- an dawn chu a chhiar ve bawk a.

"A bangbo thlâk hle mai, engtin kan han ti dawn chu ni maw," a thaw ri hak a.

"Mitthi chenna lamah kan va kal phawt anga, a chhui ṭanna tûr pawh a awm hlauh maithei asin." Toby chuan a lo ti var a.

Mahse Sam-chuan a ṭhianpa thusawi chu a pawm vak lêm lo, a chek tlak tlak a.

"Anih chuan Report chu pe ila, kan va kal nghal mai loh chuan, bei nge sei run dung...."

🔱🍷

Toby- an report a pêk lai chuan Susan-i chuan Computer ah rang zet zet hian a lo type lût mawlh mawlh zél a.

Colonel Lewis chuan, "Engtia chêt zêl nge in tum." tiin an pahnih a melh chung chuan a zawt a.

"Mitthi chenna hmun va tlawh hmasak phawt kan rêl a," Sam- chuan a lo ti a.

"A ṭhat chu, han chhui zui zêl phawt ula, hlawhtlinna chu in hmu ngei ang." Colonel- a ti a.

Sam- chuan,"Bulṭanna tûr pawh zawn hmuh hmasak angai a, kan hmu thei ngut ange maw." a ti bah niaih a.

"Case- a ti tuiawm zual sauh alawm le," Toby- chuan a lo ti var a.

Report an pêk chhûng leh an sawikhâwm chhûng chu a rei angreng fu mai, an zawh fel meuh chuan tlailam dar 5:30- a lo ri dêr tawh a.

Anni pahnih pawh chuan Mitthi chenna lama kal chu a tûk ah an sawn phah ringawt mai.

An Office a lehkha pawimawh ho te chu sing sa in, an Case buaipui lai tân a ṭangkai leh pawimawh tûr ang ang te an thliar fel zung zung a.

"Naktuk tukṭhuan eikham ah kan che chhuak mai dawn em ni." Sam chuan lehkha thlep mawlh mawlh chung hian a ti a.

Toby pawh chuan chêt mawlh mawlh pah tho chuan, " Ni mai e, ka rawn lam mai ang che, Office chu kan hman tâk leh chawhnu lamah kan kal thung dawn nia, Susan-i ka lo bia ang." tiin a chhâng a.

Sam-a haw hnu chuan rei vak lo ala awm khawtlai a, haw tûr a Susan-i'n a rawn sâwm chuan an Office chu chhuahsan in zanriah kîl dûn tûr in E'tutto Qua- Restaurant changkang zet pan in an in phur liam ve ta a.

"Inneih ka rawt hi pawm i tum lo hrim hrim niin ka hria, Duhtak..." Toby chuan ngên ngawl deuh hian a ti a.

A wine no lek chung a Susan-'in, "Oh...Toby, heti hian anuam daih zawk ka ti asin," nui chunga a ti chu Toby chuan a lo ner khum a.

"Kan la in zui rei lo tih chu ka hria a, mahse nupa ni tûr khawp chuan kan in hmangaih tawh in ka hria,"

" Tak tak ana, Toby, i rilru ang tho kha ka pu ve tho asin.," tiin a thil ei lai chu a ei zui leh daih a.

Toby chuan Waiter pakhat thil chawi chu a hûi zauh a, a wine chawi chu a no ah leh Susan-i no ah chuan a thlit tír a.

Chu Waiter kal liam hnu chuan,

"Ka rilru ang i put te chuan naktuk ah zungbun ka lei nghal mai dawn asin," phûr deuhvin a nui vur vur a.

"I thusawi kha a sût theih tawh loh." a ti zui zat a.

"Hah..Toby, hna kan nei ve ve a, hun awl kan nei lo dûn bawk si a, chuvangin hetianga inkawp mai hi tunah chuan kan tân ala ṭha zawk alawm,"

"Nia, ni tho mai, mahse kan chungah hian eng emaw thil a thleng ang tih ka hlau ania, chân che hi ka duh hauh lo."

🔱🍷

Muangchângin a ding riai riai a, mi veivak pawh an la tam êm êm lo.

Sam-a Apartment luahhawh kawt a a motor a din tîr chuan Sam-a chu in peih sa diam in kawtah chuan a lo ding reng tawh a, Newspaper a lo chhiar malh malh a.

Toby- a a hmuh veleh a Newspaper chu thlep in Car ah chuan a lut nghal a.

"I hma kher mai."

" Ka helhhawlh leh pek tawh aniang, hetiang hna chinfel ngai kan neih apianga helhhawlh hi chu ka kham ve deuh tawh a ni." Sam- chuan a ti a.

"Khawilai Street nge kan kal na tûr kha." Toby- a'n a tih chuan, Sam chuan, "Kearny Street." a lo ti var a.

Motor ti nung in an tlân chhuak ta a.

Thil thlenna hmun an va thlen chuan kawng sír remchâng laiah Motor- dahin an hma a in hlui lian zet, Victorian hunlai a sak tawh niawm tak ah chuan an in zui lut a.

"Room no engzat ah nge.." Sam- a'n a tih lai chuan an chhoh mekna Kailawn a nula leh tlangval lo chhuk te chu Toby chuan a lo tiding a.

A Detective ID- a hmuh rual in,

"Kan lo tibuai lawk che u, He laia chêng in ni em?"

Chumi te pahnih chu an hamhaih deuh a.

A mipa zawk chuan, " Aw...aw ni e," kailawn tawp chiah pindan chu melh zauh in, " kan pindan ania."

"Ok, tunge Manager,...inneitu hi, hetah hian a cheng ve em.? ti a a zawh chuan anni chuan, " Aw, in lo kal pel chiah, in hnuai ah khuan, pindan pâwn lam zawk khu ania,"

"Kawngka biang a Manager tih intar khu..? Sam-a'n a lo ti a.

Anni chu an bu nghat a.

"Kan lawm e." Toby chuan a ti a.

Sam- chuan kawngkhar chu a kik karh karh a, rei vak lo ah Putar tawi nelnawl hian a rawn hawng a, kawngka biang aṭanga dah chhuah pah chuan a ngaihna hriat loh hmel zet hian an pahnih chuan a en tawn zak zak a.

"Min lo hrethiam lawk mai, Starlite Detective Agency aṭanga lo kal kan ni a, i Hotel a tualthihna thleng chungchangah eng emaw thil en fel lawk kan duh a.."

A ID lek chungin Toby- chuan hawihawm zet hian a ti a.

Chu pa chuan, "Police lam in engkim an chingfel tawh emaw tia." rinhlelh hmel zet hian a ti a.

"Mitthi unaunu in a a rawihte kan ni a, a hmunhma hrim hrim pawh enchian kan mamawh a ni." Sam chuan a lo ti zâwi sup a.

"Lo lut phawt teh u."

"Ka Pu, a hrim hrim a thu in i in luahhawhtu hi engtin nge a boral a ni tih in hriat." ṭhutthleng a ṭhut pahin Sam chuan a ti a.

Manager chuan, " A room bul a mi te'n a min rawn hrilh kha kan hriat dan chu a ni mai." a ti tawi deuh hak a, chutiang zawhna chu a vawikhat dawnna a ni lo tih chu a hmel ah pawh a lang chhuak hial mai, a nin hmel khawp lehnghal a.

"Anih chuan he mitthi hian a thih hma nî, a ruang in hmuh hma hian ṭhian inleng emaw, hetiang thil ti duh túr mihring emaw hi ṭhian a nei em? amah thli thlai tu emaw tal pawh.?"

"Amah in tihlum tiin Police lam te'n thu an ti tlu a, chu chu kan lo ring mai, a chhan awm ang tûr chu kan hre bîk hauh lo." Manager chuan a ti bûl leh nghut a.

"Ok, a nih chuan a room lam pawh chu han en hrim hrim kan duh a, chabi pawh kan va mamawh awm ve."

A ṭhutna aṭanga muangchang a tho vin bang hrûl a thing Drower nalh zet lam chu a pan a, chabi lâk pah chuan,

"Police lam te'n a an rawn enfel hnu pawhin nangni ang tho hian mî eng emaw zât in room chu an enfel tawh asin." a ti roh a.

"Police lam mî ni lo maw...?" an pahnih chuan an ti rual ṭhawt a.

Toby- lama Chabi theh phei pahin, " Ni e, khâ nula tê kha eng emaw chu a ni ngei ang."

"Han sawi chiang deuh teh."

"Nimin leh nimin piah khân a chhûngte lam aṭanga rawn kal niawm a insawi an rawn kal a, a bungrua eng emaw chu lâk an neih thu pawh an sawi."

Sam chuan, " Oh..Khawilam aṭangin nge tih te i lo bengvar lo maw?"

" Hre hauh lo, mahse an motor pakhat number erawh chu ka lo chhinchhiah hman." a kekawr a dap ruk ruk a, lehkha them hi a rawn phawrh chhuak a, Toby- chu a pe a.

"Nimin leh nimin piah a an rawn kal chuan he motor hi an hmang vek em? Toby chuan a ti a.

"A ruang kan hmuh tûk, Police lam ina thil an enfel zawh hnu, a ruang an laksawn hnu ah khân pa pahnih hi an rawn kal a, mahse engmah lâk emaw kenchhuah emaw an nei lo, chumi ṭum chuan Taxi in an rawn kal a, nimin piah leh nimin kha chuan Private Car leh Taxi in an rawn kal a, mi paruk lai an ni, mipa pali leh hmeichhia pahnih, a hma a rawn kal te pawh kha an tel."

"I ti lawmawm kher mai, chu chu Police lam i hrilh tawh em?"

"Hrilh lo, Station lama koh reng hi ka châk vak lo a." a ner deuh sak a.

"Kan lawm lutuk e"

"Room no 16- na kha..."

****************************************************************************************************

🔱🔱 "An va chinglet nasa ve,"

"Miss Kathy pawh khan a unaunu bungrua pawh hi hlâwm a tum lo emaw ni le.?

" A che muang ve chi a ni ngei ang."

Toby chuan kutkawr fîm a bun mawlh mawlh a.

"Bedroom lam hi en hmasa teh ang,"

" A khum chu mi pahnih leng lai a nih hi, bedsheed chu awm tawh lo mahse eng emaw chu beisei nei ve tlat teh ang, heta hi a thisen pawh a tlang anih hi," Sam chuan a ti mawlh mawlh a, Mattress- a thi khâr tlem kai chu chîk tak hian a bih vûng vûng a.

Toby erawh chuan Khum bul a Side Table leh Drower vel te chu hmuhhmaih hlau tak hian a lo check vel a.

"Kan Pi i chuan a bungrua vel chu a senghawi tawh anih hi, mahse lâkkim loh chu a la nei tho ang, kan hma ami te sulhnu a ni ang hetiang in chap darh hi chu."

"Sam..."

Lehkha ziahna dawhkan tê a lehkhabu leh paper in chap darh nuaih mai chu a hai chiam a, paper pakhat hi a rawn lek chhuak a.

"Hei chu an lâk hmaih a ni ngei ang,"

"Enge ni,"

"Thil pawimawh lutuk, a Personal File ami ani ngei ang, kan mitthi khâ enge a hming ni kha,"

Toby a thil ken thlêk dûk dûk chung chuan, Rachel Jars-"

"Katherine Moon Jars"

"Ni chiah mai, a unaunu anih chuan....chuan chuan, a laiah hming Moon tih hi Miss Rachel hian a paih tihna a ni ngei ang."

"Chuan.."

"Ka hre lo le, hming...eng emaw ah ala ṭangkai phian ang."

"Hei pawh hi, Toby,"

Lehkhabu in chapdarh ho chu a lo en a."

"Kan nula i hi hetiang lam buaipui chi chu a ni em lo ang chu maw."

"Khawi maw, Seducing The Succubus, Wild West Succubus, Shared By Her Demon, Lillith Falls....

Hetiang lam lehkhabu hlír hi elaw,...a thlâ la ringawt la a tawk mai."

"Hei pawh," Sam chuan lehkhabu lian vak lo hi a keu nuap nuap a.

"Summoning Sex Demons : Inccubus & Succubus, khawi maw, hei chu ala pawimawh ang," Toby chuan a pawh thlak sak a, a jacket chhúnglam ipte ah a ak daih a.

Lehkhabu zínga pakhat, Diary emaw ni pawh chu a keu thuak thuak a, a kâr a paper inzep ho chu chhuat ah a tla darh nuaih a.

"Oh.." lehkha tla chhar a a kûn lai chuan pawn lamah Motor thâwm a lo awm a.

Rang zet in tukverh aṭang chuan Sam- chuan pawnlam a zu thlîr a, an awmna in kawt a Police car lo ding chiah chu a zu hmu thei a.

"Police, kan chhuah mai angai anih hi,"

"A Diary pawh hi paipawn daih teh ang, kan hmuh tûr ang ang chu kan hmu tawh tho."

Hmanhmawh zet in an chhuak a, kailawn ah chuan an tlân thla ri bap bap a, Manager- kawngkhar pawh chu kik lem lovin an hawng rawk a, Chabi an pe a, lawmthu hrilh pah in an chhuak zui ta daih a.