A CASE OF DREAMS | Dreams Of Desire SAGA (Chapter -1) 18+

🍷"Case kan open leh dawn tihna a ni maw?" tiin chu Police Officer chuan a zâwt hû a.

Ani chuan," Ni lo ve, Miss Katherine Jars- in min ruai zawk a ni, Agency lam tirh kan ni a." tiin a chhâng a.

"Agency maw, a engti zawng chuan....Agency....eng thu..." ti a angaihna hriat loh hmel tak a a sawi lai chuan a lo pawt chat a.

"Keini chu Starlite Detective Agency hnuaia mi kan ni a, kan mitthi Miss Rachel Jars- i tualthih chungchângah a unaunu Miss Katherine Jars- in keini hi min ruai a ni, chuvangin a Case File kan mamawh a, a theih hrâm chuan a thihna hmun pawh kan hmu duh ang." fel fai takin a ti a.

A Jacket ipte aṭang chuan lehkha a phawrh a, a hma a dawhkânah chuan a theh phei a.

"Hei hi File chungchang a kan Agency hotu te leh Miss Jars-i te lehkha chu ania, San Francisco Police Department- hnen aṭanga File lâk chhuah phalna a ni e." a ti zui a.

Chu Officer- chuan lehkha chu lâ in a chhiar nuap nuap a, a chhiar zawh chuan phone lek in tu emaw ni hi a bia a.

🔱

"Ok, Mr...."

"Toby Keith,"

"Mr.Toby Keith, dinglam ah sâwn phei ula, Officer Erica- hnenah sawn in lam dawn nia, ka sawi vek tawh kha." tiin ṭha deuh chuan a chhâng a.

Ding chhuak in Detective Toby Keith leh a ṭhianpa Sam O'Neill te chu kut thing meuhin a chibai a.

"A chhan awm ang kan hrechhuak lo a ni maithei a, chhui chhuah tûr a awm pawh chu a lo ni maithei, duhsakna ka hlân a che u." a ti a.

🍷

Police Officer hmeichhe nalh zet Erica- hnen aṭanga file an lâk hnu chuan chu Police Department changchang zet chu an chhuahsan a

, Toby Keith-a Car Toyota Harrier Dum nalh zet chuan an Office awmna, Pacific Avenue lam pan in an tlân liam zui ta a.

***************************************************************************************************

🍷

Starlite Detective Agency hi US Marine Veteran Colonel Lewis Hank- a din a ni a, US-Vietnam War 1965 August ni 18 - 24 a US Marine leh Vietnam sipaite Chu Lai Air Base a an in kahna kha Operation Starlite- tih a ni a, he Operation hming chawi hian Agency- hi phuah a ni a.

Pacific Avenue, San Francisco- ah Office lian tak an nei a, mi chhawr lai 50 vel lai an nei mêk a, mahsela hêng an mi chhawr ah hian Serviceman hlui emaw chauh an la thung ṭhîn.

Starlite Detective Agency- hi Private Detective ṭha pâwl leh ṭhang duang tak an ni a, mi chhûngkaw thil bîk leh thuruk ah te, mi blackmail chungchang leh tualthahna te bâkah nupa chungchang, inṭhenna lam thleng in an khawih a.

Agent chhawr lai te hian Police Department ang tho in pahnih te te a inkawp in hna an thawk ve vek a, a kawp te te in Office pawh an nei hrang thiah a ni.

🍷SIX DAY EARLIER :

A dawhkan a Phone chu a ri rang rang a....

Toby- chuan pick up in,"Keith ka nia," tiin a chhâng vat a.

Hmeichhe aw puam nalh deuh hian,

"Toby, Office ah lo kal ta che, Colonel- in a hmu duh che a," tiin a rawn ko a.

"Ka lo kal nghal e."

Phone a dah rual chuan a kianga ṭhu Detective Sam- hnenah chuan,

"Susan-i, Colonel- in min ko a, ka lo kír leh vat ang." a ti a, a tho thurh a, a chhuak zui nghal a.

An Pu, Colonel Lewis-a Office pâwn a a Secretary Susan-i dawhkân bul a thlen chuan Toby hnenah chuan,

"Toby- a luh theih nghâl e." a lo ti var a.

Lût nghal ta mai lovin a dawhkân sîr ah chuan a ṭhu thauh a,

"Zanin chu, zanriah kan ei dûn dâwn lâwm ni." nûr deuh nang nang hian a ti a.

"Hah...I hman lo mai thei asin, hna i nei mai thei.."

"Takzet...midang ka hlân mai ang, i kianga awm ka châk tawh asin.." ngên ngâwl deuhin a'n ti a.

Susan- chuan, " Va lût vat la a ni mai.." a lo ti hluk a.

A mit a siai zauh a, kawngka a kik zui a.

Colonel Lewis-a Secretary Susan Coffey hi hmeichhe sâng zeih zawih, laibu lian ṭha tak leh kâwng fêk reihrawih, mawngbâwr nalh tak, sam sen thar mai leh mitmu dumpawl raih mai a ni a, a nuimawi hle bawk.

Starlite Detective Agency- a luh hnu aṭangin Toby Keith nen a inhre chawp an ni a, thla tam anla in ngaizawng lo nâ in an in hmangaih dûn kher mai, Inhmu reng mah se an hna avângin an in hun thâwl, len vahna hun an nei mang lo a, an hun neih chhunah chuan khawilai Restaurant ah emaw zanriah an kíl in an chhuak ziah ṭhin thung.

Room a ava luh chuan lu kawlh tul, hmêl hriam hrêk hrâwk, a hmai ding lama ser lian vak lo nei chuan dam thluam hian,

" Lo ṭhu rawh Mr.Keith." a lo ti a.

Amah hmachhawn zâwng chuan a dawhkân bulah chuan a ṭhuthmun a rem ve nghal a.

"Eng lo ania, Mr.Keith, Hna kan nei a, Miss Katherine Jars, Mission District- ami in a rawn phone a, hna khirh khân tak mai anei a ni âwm e, chumi chungchâng ah chuan Vawiin chawhnu dâr hnih hian a chenna hmunah Detective a hmu duh a, chumi hunah chuan engkim ala hrilh chiang ang tiin a sawi a." tiin thil awmzia chu a sawifiah a.

Toby chuan ngun takin a lo ngaithla a, muangban chat hian, " A eng lam nge a sawi rêng rêng em.?" tiin a zawt a.

Colonel chuan, "I hre tawh ang chu, hmanni lawk a nula thi, a apartment a thî a an chhar chungchang kha ania, mitthi kha a unaunu a ni awm e." tiin a chhâng leh a.

"Ok, A File engtin nge ni ang, eng emaw..." a tih lai chuan Colonel chuan a thusawi chu lo pawtchat in.

"Miss Susan-i hnenah i lam dawn nia, San Francisco Police Department aṭanga Case File lâkchhuah phalna chu, Miss Jars-i lehkha pawh a awm ang." a lo ti a.

"Tichuan....ka va hmu anga, a thu leh hla ka zawm nghal dawn tihna a ni mai awmni?" Toby chuan a ti leh a.

Colonel chuan, "Aw, ni mai e, chuan i rawn in report leh dawn nia." a ti ta a.

A ṭhutna aṭang chuan a tho a.

"Good Luck.."

Room chu a chhuahsan ta a.

🍷

Secretary Susan- chuan Computer ah thil a lo type mawlh mawlh a, a dawhkan bulah ava kal hnai a.

Thâwk halh pahin, "Khawnge lehkha chu," tiin a zawt a.

Ani chuan thil la type mawlh mawlh pah chuan," Dawhkân a Envelope pakhat kha," a ti a.

Envelope lâk pah in, " A Address pawh ka hre duh ang." a hâm bui bui a.

A thil type chu dah in dawhkan a lehkha in chhep chu a hai rawk rawk a, lehkha phêk khat hi phawrh in a chhiar a,

"Katherine Moon Jars, 24Street, Mission District, CA 6815, United States, lehkha hi la tel rawh." tih pah in a pe a.

"Zanin chu E'tutto Qua- ah aw." lehkha ban pahin zawi te in Toby chuan a ti a.

"I hmanhmawh sia, thil i ti tut tut ṭhîn a, hei hi va tifel phawt ula, Colonel hi naktuk ah New York ah a zin dawn a, lehkha tihfel tûr ka ngah riau a, kan in be leh dawn nia." Nuih seih pahin Susan- chuan a ti a.

"Ok, anih leh..Bye.."

🍷

"Sam, hna kan nei," a Office a luh pah chuan Toby chuan a lehkha ken chu a lek kâng a, Sam-a ṭhutna lamah chuan a chair hnûk hnaiin a lehkha leh Envelope chu dawhkan ah a theh thla a.

"Wow...eng lam nge ni a," Sam- chuan phûr hmel zet in a lo ti a.

Sam-a dawhkân chu a bawh a, Sam- chuan lehkha te chu lâ in Envelope pawh chu a hawng a.

" Katherine Moon Jars...Moon Jars..., a hming mai mai chu." ner nûng nûng chungin Sam- chuan lehkha chu a chhiar nuap nuap a.

"A laiah hming kha maw, nia," a sana a bih vut a, " Sam, kan chhuah mai angai, dar khat a ri der tawh.." Toby- chuan a lo ti a.

"Ok, 24Street chu a hla hleinem," a tih rualin a ṭhutna aṭang chuan a tho nghâl a, chutiang hna chu a phûr zãwng leh châk zâwng tak a ni a.

Sam O'Neill- hi pa tawi sa ṭha an tih ang kha a ni a, a sa a muk in a dâr pawh a chhah ṭha a, a tawi ang hû in a kut ke a te lo a, thahrui angah tâwk tih hi a hriat a, a kutthlâk pawh a na kher asin.

Toby Keith- nen hian LAPD- ah a phusa pâwl an lo ni dûn tawh a, Los Angeles- chhuak an ni nâ in tuna an thawhna Agency dintu Colonel Lewis-hian sâwm tak te in a sâwm a, rin ai daihin an ti fuh ta zêk lehnghal a.

🍷Miss Katherine Moon Jars- chênna chu minute sâwm lai in dâr hnih ala rî lo tih ah an va thleng a.

Miss Jars-i in chu 24Street in tâwp ber ah a ni a, a lian vak lo nâ in in hnunglama kawt zawl zau deuh awm chu alkatra a luan deuh vek a ni a, kawngpui ân lamah erawh chuan hmun an nei vak bîk lo, Gate nalh vak lo aṭanga feet sawmhnih vêl thleng chu kawt zawl angreng a ni a, kawngkapui panna step panga vel a chhawrdawh hi a awm leh tawp a, an in chu chhâwng hnih lek a sak niin an Garage chu an in tepên mai a ni a.

Sam- chuan kawngkhar sír lama hmeh rîk chu vawihnih a hmet rî a.

Minute thum hnu vêlah nula kum 25-30 inkâr âwm vêl, hmelṭha tak hian kawngka chu a rawn hawng a.

Chu nu hnenah chuan Toby chuan, "Toby Keith ka ni a, ka ṭhianpa hi Sam O' Neill-, Starlite Detective Agency aṭanga lo kal an ni," a han ti a.

"Ok, lo lut ru, ka lawm hle mai."

An in chhûng chu pâwn lam nen chuan a in chawih vek lem lo, pawnlam a en aiin bungrua an hûng changkang hrep a.

An pathum chuan an in zui lut a, Living room a Sofa mawi zet ah chuan an ṭhû a.

"Mr.Toby Keith maw inih? ka lawm hle mai," a ti nawn leh sak a. An hma a nula ṭhu chu a hmel chu a ṭha thlâwt a, mahsela a nawmsam loh hmel in a mit meng chu a dul deuh ruih a.

" Miss.... engtia hma lâk tûr nge ni....kan Case..."

" Ka unau nu ania....ka sawi awmzia chu, hman ni a boral...A Apartment- a thi a an hmuh kha...chu chu..." a ti chuai raih a.

Chil a lem khalh a,

" Police lam te'n an chhui a, mahse murder- anga ngaih theih na tûr an hmu lo a, mu hlum ang a ngaih a ni." a ti ban chap a.

Uluk deuh hian chu nu thusawi chu an ngaithla a, Toby chuan, " Anih chuan Miss, I unaunu chu Thah... tum reng vânga tihhlum ah i ngai tihna em ni." tiin a zawt a.

"Aw, ni e, A khumah saruak ngalngat in an hmu a, a thih hma hian sex a hmang ngei a ni tih chu thil chiang sa a ni a, Forensic lam te pawn chu chu an pawm thlap a ni." a tih zawm leh a.

"Miss...i thil hmuh leh i hriat ang ang engkim kan hre vek duh ania, chu chu i tân leh i unaunu tân a ni." Sam- chuan a lo ti a.

Miss Jars chuan," Aw le, ka unaunu nen hian chhûngkaw thil vângin kan awm hrang a, ....kan awm hrang ti ila, kan chhungkua min chhuahsan tihna anih ber chu, chu chu kum nga liam ta kha a ni a, chumi hnu ah keipaw'n kan in chhuahsan in San Francisco ah hian ka unaunu zawngin awmhmun ka rawn bêngbel ve ta a.

Chu chu in tân a ṭangkai vak lo ang." an pahnih chuan a melh zauh a.

Zawi sup hian Toby chuan, " Ṭangkai mai thei, a pawimawh vek...." a lo ti a.

"Chuan...chêndun leh te kan tum laiin hetiang chhiatna....chhiatna hian min rawn tlâk buak ta a ni.

Police ina min rawn hrilh chuan zîngah a ni a, a Apartment lehlam luah tu te'n areh êm avângin an ngaihṭha lovin kawngkhâr an ti chhia a, a khumah thiin an va hmu a, Police ko nghal in an ni'n kei min rawn hrilh lehchhawng a, mahse ka va thlen chuan ruang chu an lo a sawn tawh a, Ka unaunu chu nikhat liam ta, an hmuh chhuah hmâ ni a boral tawh a ni tiin Police te'n min hrilh" tiin a thil hriat ang ang te chu a sawi a.

A sawi zawh chuan tukverh aṭang chuan pawn lam a thlîr vang vang phawt a.

"Khum ah saruak in, ...a taksa ah hliam hnuhma engmah, ...kutthlakna hnu pawh an hmu lo, mit a hmu tu te chuan a ka aṭangin thisen a rawn chhuak an ti a, chu chu bedsheet ah pawh a kai a, kei ngei pawhin ka hmu a ni.

Chuan a serh erawh chu a duh lo chung mipa rual ina pâwl rawn ang mai a nghaisak a ni a, pawn lam mai ni lo, a chhûng ah pawh nasa takin a hliam a.....aw...chu zawng chu ka hmuh leh hriat chin anih chu." muang ban chat hian a tih zawm leh a.

Toby chuan rang zet in, " Anih chuan tu emaw rinhlelh deuh te i nei lo maw, a ngaihzawng emaw, a ṭhian tu emaw te...Police ho te pawh in...." ti a a sawi lai chuan Miss Jars, chuan a thusawi lai chu a lo pawtchat a.

" Rual pawl vak lo, ṭhian pawh nei lo ang mai niin an sawi a, Police te'n a chhui ngaihna an hriat loh chu, a pindan luahna bul a mi te chuan tun hnai khân mi pakhat, BMW pawl nei inleng aneih ṭhin thu an sawi a, chu pa chu a ruang an hmuh hma ni chiah pawh khân a Apartment aṭanga hmanhmawh taka a chhuak lai an hmu a ni awm e, mahse inchhûng bungrua leh thil bo engmah a awm lo niin Police te'n an sawi a, ruang pawh kutthlakna hnu hma engmah an hmuh loh avângin Murder- angin an pawm ta lo a ni....mahsela Murder ngei a ni." a lo tih zawm a.

Toby bawk chuan, " Anih i unaunu chuan hna vawn lai anei em? " a lo ti khauh a.

"Nei e, Museum, San Francisco Art Museum- ah Curator- in a thawk mêk."

"A lawmawm e, Miss Jars, A Apartment pawh kan va tlawh angai dawn a, a Address pawh kan mamawh dawn a ni." Sam- chuan a lo ti zung zung a.

Miss Jars- chu a tho va,

"Min lo nghak lawk rawh u," tiin Living room chu a chhuahsan a, chu pindan ep a Lehkha chhiarna pindan lian vak lo ah chuan a phei a.

🍷A rawn chhuak leh thuai a, File lian vak lo hi arawn lek chhuak a.

"File ah hian in mamawh tûr awm ang ang chu a awm ang a, a address pawh a awm." tiin Toby chu a pe a.

An pahnih chuan an tho a, " Engmah kan tiam thei lo che a, mahsela i unaunu boralna chhan chu zawn chhuah ngei kan tum ang, lo lungngai lo la, kan theih tawp kan han chhuah ange," Toby chuan a ti a.

Sam- pawh chuan, " kan beisei tlat a ni, eng emaw ah kan rawn la be leh ngei ang che." a lo ti ve bawk a.

" In phiar rûkna anih loh hrâm ka beisei....oh....ka lawm ngawt ang." Miss Jars- chuan a ti vut a, mahse a thusawi chu sawichhuah tum lâwk a ang hauh lo.

"Anih leh le, Thuthar a awm leh kan rawn hrilh zel ang che, kan la rawn tibuai leh maithei che a ni Miss Jars." Toby chuan a lo ti leh a.

" Ok, Ka lo beisei reng ang che u, engkim in chhuichhuah ka ring tlat a ni."

"Bye..."

"Bye.."

Miss Jars- chuan Gate pâwn thleng a thlah a, an pahnih a an tlân liam thleng chuan a thlír zui reng a.