PANDORA BOX : From Epic Greek Mythology

Pathian ropui leh fing tak tak, Milian unau sawmlehpahnih(The twelve titans) te'n a ro an relna chu an fa te unau Paruk(The Olympians) te'n duh lo in an in bei chiam a, he an in beihna hi Titanomachy( war of the titans) tih a ni a.

Kum sawm lai an indo hnu in chung Titans- ho chu Olympians te chuan Leihnuai Tartarus- ah paihthla in pathian ah an in siam ta a.

Mahsela Titan Iapetus leh Titaness Clymene-i te fapa mei pathian Prometheus leh Epimetheus-a te erawh chu Titans ho leh Olympians te indo lai khan Zeus-a te unau lamah an țang a, chuvang chuan hremna an hmu ve lo a ni.

Prometheus leh Epimetheus te chu Zeus-a chuan mihring siam tûrin a ti a. Prometheus-a chuan lei (clay) ațangin Mihring ruangâm a siam a, Pathiannu Athena-in nunna thâw pê in minung an lo ni ta a, Epimetheus-a chuan ramsa te siam hna a thawk ve bawk a.

Prometheus-a chuan chûng a mihring siamte chu a hmangaih êm êm mai a, an thlai thar leh thei, an eitûr engpawh mai chu a hel, chhum hmin/ hem hmin loh a an ei a hmuh chuan  Pathiante chauhvin an neih theih Meialh(fire) chu pêk mai a tum ta a.

 A tûk zîng a vân chung sâng a Ni Pathian Helios an a mei sakawr tawlailir a Nî a lo hnuhchhuah lai chuan a Meialh țhenkhat chu lâ in mihringte hnenah a pe a. Mei enkawl dân leh hman dânte a zirtîr hnu in a kalsan ta a.

 (Greek ho te chuan Nî khi Zîng kâr ah Ni Pathian Helios an Mei sakawr tawlailir a rawn hnûk chhuak a, tlailam a khawthlang lama hnúk liam leh țhin ah an ngai. CR)

Mahsela Zeus-a’n Prometheus-a thiltih a hriatchhuah chuan a thinrim kher mai. Chuvang chuan Prometheus-a chu tlâng pangah khâidîat in a phuar bet a, chatuan thleng a a thinlung chuk chhuak tûrin Mulukawlh thu a pe a.

Nilêngin chûng mulukawlh te chuan a thin chu kher in an ei sak a, zanah a lo dam a, a tûk ah a ngai ang bawkin mulukawlh te chuan an kher leh ṭhîn a ni.

Chûng Prometheus-a mihring siamte pawh chu a tihlum leh ta vek a.

Chumi hnu ah Zeus- chuan mei leh kut themthiam lam pathian Hephaestus- chu thu pe in, hmangaihna pathiannu hmelṭha êm êm mai Aphrodite-i entawn a hmeichhe lim siam tûrin a ti a. Ani chuan lei leh tui hmangin hmeichhe lim chu a siam ta a, a siam zawh hnu chuan Zeus-a chuan khawchhak, khawthlang, chhim leh hmar aṭang a thli thâwt tîrin chu milim chu nunna a pe ta a. Olympian pathian te chu a kiangah lo kal hnaiin thilpek an pe ṭheuh a.

Chu hmeichhe hmelṭha tak chu finna pathiannu Athena in rangkachak a chei kawrfual nalh tak bâkah tangkarua aṭanga siam lallukhum, nalh tak a cheimawi a pe a, finna leh ṭuan ran na a pe bawk a.

Hmelṭhatna pathiannu Aphrodite-i'n hmelṭhatna, tlukpui nei lo khawp hmelṭhatna pe in, duhawmna leh khawngaihna a pe a, Tin, Zin mi te vêngtu pathian Hermes-a'n, kut themthiamna leh ṭawng hrang hrang thiamna a pe bawk a, Tuipui pathian Poseidon-a'n tuikeplung aṭanga siam ṭhi nalh tak a pe bawk a, chu ṭhî a awrh chuan tui ah a tla hlum thei dawn lo a ni.

Rimawi leh thalkah thiamna pathian Apollo pawhin, ṭingṭang (lyre) perh a zirtir bâkah zaithiamna a pe bawk a.

inneihna pathiannu, pathiannu ropui ber Hera-i'n finna danglam tak, dil chhutna leh thil chîkna thinlung a pe bawk a.

Zeus- erawh chuan mawlna, chimawmna leh thatchhiatna thinlung a pe thung.

Tichuan chu mihring chu lo nung in hmeichhe hmasa ber chu an lo siam ta a, a hmingah Pandora-an vuah a, Pandora- tih chu ‘Thilthlâwn pêk’ tihna a ni ber mai.

Pandora-a'n siam hnu hian mihring dang te pawh an siam leh ta a.

Epimetheus- an Pandora-i a han hmuh chuan hmelṭha a tiin a zûn ah a uai nghal a, chu chu Zeus-a'n a hmuhin nupui atan a pe ta a.

A hma daihin Epimetheus- hi a unaupa Prometheus-a'n Zeus-a thilpek reng reng dawng duh lo tûrin a lo ti tawh a, mahsela a unaupathusawi chu Epimetheus- hian a lo ngaithla duh lo a ni.

Tichuan Zeus-a chuan Hermes chu Epimetheus-a hnenah tîrin, " Pandora- hi Zeus a thilpek a ni a, remna thilpek a ni. Hei hian pathian ropui ber Zeus leh i unaupa lak a i thinurna leh phuba lak duhna thinlung kha ti reh rawh se, chuti anih loh chuan Pandora- hi i nei thei lo ang,'' a ti a.

Epimetheus- chuan Hermes-a thusawi chu lo pawmin nupui atan Pandora- i chu a nei ta a.

An inneih thilpek ah Pandora chu Pathian te chuan thilpêk an pe țheuh a, Zeus-a chuan bâwmtê (box/jar) a pe a, chu bâwm ah chuan thilsual leh țhalo tam tak khungkhâwm a nih avangin Zeus-a chuan hawng hauh lo tûrin a ti a.

Tichuan Pandora chu Epimetheus a nen inneiin hun rei tak chu hlim takin an khawsa a. Mahsela Pandora- chuan Zeus a bawm pêk chu hawn châkna a a khah tlat avângin a hlim a kim thei tak tak lo. Pathian leh Pathiannu ten thil ropui tak tak an pêk hlawm țheuh avangin Zeus-a thilpêk chu a danglam bîk hle in a ring tlat a, chu bawm mawi tak mai chu a en a en ṭhîn a. Pathiannu Hera-i'n a dilchhutna a pêk  tlat avângin a insûm thei ta lo.

Țumkhat chu a pasal Epimetheus a awmloh hlânin  an dahṭhatna a ta bawm chu ala chhuak a, a ṭhi a bawm chabi, rangkachak aṭanga siam herh mawi tak chuan chu bawm chu a hawng ru ta a.

Zawi muangin a chhîn chu a hawng riai riai a, chu veleh hawn rual chuan bawm chu sîn tak hian a ri se se a, thil rimtui tak rawn chhuak in a bul vêl boruak chu chu rimtui chuan a luahkhat nghal a.

Tunlaia khawvel hri țha lo hrang hrang, Natna, îtsîkna, duhâmna, chapona leh thil țha lo chi hrang hrang te chu an lo thlâwk chhuak ta sup sup mai a. Pandora-i mangang aû thâwm a hriatin Epimetheus-a chu hmanhmawh takin a lo haw a, thingrem chhîn chu rang mangkhêngin a han khâr a, mahse thil țha lo zawng zawng te chu anlo thlâwk chhuak zo hman vek tawh a.

Hemi zân hian thingrem chhûng ațanga aw lo chhuak an hria a. Chu âw chuan, “Min chhuah tîr rawh. Beiseina ka ni e,” a rawn ti a. uPandora leh Epimetheus-te chuan an chhuah a, mihringte hnêna beiseina pe tûrin khawvelah a thlâwk chhuak ta a ni.

He Pandora- chungchang thu hi Christian zirtirna nen a in ang hle mai a, Bible ah chuan hmeichhe hmasa ber Evi- kan hmu a, a bul ber ah chuan Evi thlemna tawh vâng hian khawvel chu sualah a tlu a ni ber a, Sual ah han ti ila, Thlemna a Adama nen a an tluk hnu ah sualna hrang hrang, Pandora box a sualna te a rawn chhuak ta anih kha.

Pandora thawnthu dangah chuan Epimetheus-a kha Pandora hian box kha hawng tûrin a thlêm tih te a awm bawk a.

Pathiannu Hera khân dilchhutna leh a pêk miau avângin Box kha hawng ta kha a ni a, chu thinlung chu Rul ina Evi a thlem chiah khân Evi rilru pawh a lo ni ve leh chiah a ni.

He thu pahnih hi a in ang diak diak kan ti hran lo a, Pandora chu lei leh tui aṭanga siam anih laiin Evi erawh chu Adama nak ruh aṭanga siam a ni thung.

Mahsela mihhringte thlahtu ber Pandora leh Evi te dilchhutna leh thil hriat chian châkna avângin khawvel chu tun thlengin sualna in a khah phah ta a ni.

Engpawh nisela he hmeichhe pahnih te avâng hian an pasal te'n an zalenna leh an himna an hloh ve ve a, sualna hnuaiah an tlûk luh phah ve ve a ni.

Chumi hnu chuan Pandora leh Epimetheus chuan fanu Pyrrha- an nei a.

Pandora ina Thil țha lo bâwm a hawn ațang a sualna lo chhuak te chuan mihring te chungah hna an thawk țan ta a. A ni têlin sualna a lo pung a, Natna râpthlak tak tak te a lo thleng reng ta bawk a. Mihring in an mihring pui te sâ an ei a, hmun tinrêng chu sualna in a khat tlat hlawm a, chuvang chuan Zeus-a chuan khawvel a mihring te chu tihhlum vek tumin Tui a lêt tîr ta a.

Mahse khawvelah chuan Pathiante rawngbawl țhîn leh mifel chhungkua pakhat a hmu a, chu mite chu Deucalion-a te chhungkua an ni. Deucalion-a chu Prometheus leh Tuipui Lasî Clymene-i te fapa a ni a, nupuiah a pa unaupa Epimetheus leh Pandora-i te fanu Pyrrha-i neiin fapa pathum, Hellen, Amphictyon, Orestheus leh fanu pathum Protogeneia, Pandora II leh Thyia te an nei a.

 Zeus-a chuan mihringte tihboral nan khawvelah tui a lêt tîr dawn tih sawiin an chhungkaw in chhanhimna tûr Lawng tuk tûrin a ti a. Tichuan tuilêt chhûng zawng Lawngah chuan an chhûngkua a awmin tuilêt a kâm hnu chuan an lawng chu Mount Parnassos-ah a ding ta a. Tichuan Pathiante hnenah lawmthu sawi nan inthawina te an nei a.

Khawvel mihring ah an mahni chhungkua chiah an awm ta a, Tichuan a fâ te chuan Pathian chi hnuaihnung deuh Tuipui Lasî te, Ngaw hnuaia chêng țhin Lasî te nupuiah neiin mihring chhuan thar an lo indin leh ta a.

An fapa Hellen chuan Lasî Orseïs-i neiin fapa leh fanu te an nei a, heng an fa te hi hnam hrang hrang dintu anlo ni ta zêl a ni.

Heng hi Hellen leh Orseïs-i te thlah kal zelte chu an ni. An fapa Aeolos-a thlah te chu : Aeolos a chuan nupuiah ah Tlângram Lasî Enarete-i neiin fapa Sisyphus-an nei a, a ni hi Corinth khaw dintu a ni bawk.

Tin, Aeolos-a fapa pakhat Iocus a chu Cretheus hnam dintu a ni bawk a. Magnes-a chu Macedonia lalram dintu a ni a, a thlahte chu Macedonian an ti.

Perieres-a chu Messene hnam dintu a ni bawk.

Tin, Ion-a chu Ionian hnam dintu a ni.

Hellen fapa pakhat Dorus-a thlah te : Dorus-a fapa Aegimius a chu Dorian hnam dintu a ni a, Dymus-a chu Pamphylus- hnam dintu a ni. Dymames-a chu Pamphylian hnam dintu a ni.

Hellen leh Orseïs-i te fapa Acheus-a thlah te chu Achaean hnam dintu an ni.

 Tichuan an hnam ang zêlin hmun tinah an lo darh ta zél a,  Greek hnam huaisen leh ram ropui tak tak te khu an lo din ta a ni.

An in thlahchhawn dan a Greek mi chak leh pasalṭha bâk ah Lal ṭhenkhat Greek thawnthu a chanchin nei hmasa lam han tarlang lawk ila ;

Hellen fapa Aelous, chumi fapa lehchhawng Magnes-a fapa pahnih te hi Dictys leh Polydectes an ni a, Dictys hi sangha man tu a ni a, Argos Lal fapa mi huaisen Perseus leh a nu Danae-i te, Danae-i pa in bawm a a khung a, tuipui a a paih lo chhar tu kha a ni a.

Polydectes hi Seriphos Lal, Danae-i ngaizawngtu leh Perseus-a, Medusa that tûr a tîr tu kha a ni.

Aeolus-a fapa pakhat Athamas hi Boetia Lal a ni a, a fapa Phrixus leh fanu Helle te hi rangkachak beram hmul nei Colchis ram a thlawhluh pui tu te an ni a, Helle-i hi a tlakhlumna tuipui chu tun thlengin Hellespont an ti bawk.

Tin, Hellen fapa Aeolus, chumi fapa Sisyphus hi Corinth Lal a ni a, Zeus an tuipui pathian pakhat  Asopus a fanu Aegina-i a tlanbopui lai Asopus-a hnena a lo sawi avangin Zeus an Sisyphus-a hi tihlum in Tartarus ah chain in a thlung bet bawk.

Tichuan Pandora Box aṭang chuan Sualna hrang hrang bâkah hri ṭha lo tam tak a chhuak a, chungte chu mihringte ti mangangtu leh tibuaitu, mihringte hremna nasa tak ni mahsela a chhuak hnuhnung ber Beiseina hi mihringte hremna nasa ber leh rapthlak ber zâwk chu a ni si.

Mihringte ngaihdan a beiseina neih hian mihring thinlung ah chakna a siam tih thu hi, mihring te'n a kan hriatthiam loh vâng zâwk a ni a, Beisei theih tawh loh beisei tlatna te, awmze awm lo a beiseina kan neih tlatna te hi mihringte thinlung bumna mai mai zâwk a ni a, he beiseina hi Zeus-a khân mihring thinlung leh ngaihtuahna tih beidawn nan a lo dah a, Hremna nasa ber leh rapthlak ber zâwk chu a lo ni reng si.