JUSTICE FOR KHUALBUK VENGTU

A hmasa in kan thusawi tûr in nghah nan Bible châng han thlang hmasa phawt ila;

"Nimahsela rorêlna dik chu lui angin luang sela, felna chu luipui kang ngai lo angin luang rawh se." (Amosa 5:24)

Tunlai hian rorelna dik tih hi kan ram ah hian kan han uar mai mai khawp a, "Engkim thaw thei tawh phawt chuan Lalpa fak rawh se"  tih hi kan châng thlan ni mai awm hian 'Engkim ah hian rorelna dik kan ti sup sup mai a, chumai la duh tâwk lovin a sap sendâng ho ṭawngkam hawhin hawina lam apiangah  tu emaw tân, ' Justice for'- kan han ti puam ve ṭâlh ṭâlh a, hetiang khawp a rorel dik kan tlangaupui hi kan changkan tawh vâng nge Lockdown hrinchhuah tih pawh hriat hran theih a ni teh nuaih lo e !(Ni lawmni K'U Tluangpui Hmar Zote)

Rorelna dik kan ngaih pawimawh vâng leh ram kan vei avângin inthlan dawn hnaih ah Political Party kan luhchilh thut a, rorelna dik luantir tumin a sûr asa hnuaiah thingtlang hmun kilkhawr ber ber, Inthlan dawn hnaih a a khaw hming kan hriat chawp ah te kan han Campaign a, Ni êng ina kan chil per a chhun khalhna lam a kan chil per chhimbal ang ruai a kan hma zâwn a zâm chiai khawpin ram kan hmangaih zia leh rorelna dik kan duh zia kan han sawi chamchi a.

Chumi hnu lawk ah kan thusawi Bible a ziah belh tlâk khawp te avângin ram hruaitu ah kan han tling ve ta luau a.

Mahse Rorelna dik chu keimahni ah hmuh tûr a lo awm tawh ngai lo, kan Campaign na ah kan sawi zing tawh lutuk a, ram kan hmangaihna leh rorelna dik kan duhna te kha Campaign- na ah kan sawi zo ta vek a ni hial ta ve ang.(!)

Mahsela Ram hruaitu te hian dik tak in ro rel ta sela mipui te hian tun ai hian kan sawisel nasa zâwk angem tih te pawh hi ngaihtuah tel ve ila, ram rorelna dik lo sawisel zut zut siin mimal ṭheuh hian kan thil zawrh leh hralh, kan eizawnna hrang hrang ah hian cheng hnih khat lek a hlâwkna nimahse kan patla- bûk kan ti danglam duh tho a.

Ram rorel tu te'n sâng têl teh meuh an eiru a, kei niin cheng nga kan eiru thung a, sâng tel eiru duh mah ila kan sumdawnna in a zir miau si lo.

Han zir deuh phei sela chuan kan ram hruaitu te hlawh leh an eirûk tûr zawng zawng hi kan eiru duh tho ang.

Chuvangin aw phiar ṭâwng a Rorelna dik tia au vak vak ringawt lo khân i eizawnna ah te, in chhungkua ah te, rorelna dik thlen tîr hmasak tum phawt la, chumi hnu ah ram i vei dawn nia.

Bible chuan mitdel in mitdel vêk a hruai chuan khâm ah an tla, a tih ang khân, rorelna dik chu i nun ah ṭan hmasa phawt la, chumi hnu ah i chhungkua leh i eizawnna ah.

Chumi anih loh a, mi dik lohna lai hlir hmu a, an dik lohna leh i dik lohna a in an reng si chuan ram ropui i thleng ngai lo ang.

Lalramnghaka Zote te ang a mi taksa lem a mahni hmel vuah a, thlalak edit ang chauh i ni dawn asin, i hlau lo em ni.(!)

Hetia han sawi han sawi hian a in kahpup chaw zel mai a, sawi zêl châkawm viau mahsela a thupui ber hi kan hmaih  leh roh si ang tih a hlauhawm viau mai, chuvangin thu hma hruaiah ah thupui ber hi han sawi daih teh ang.

Khualbuk vêngtu chungchang hi mizo Krismas hla ah a lo tam angreng khawp mai a, mahsela a zawng zawng chuan kan chip hman dawn lo a, tunah rih chuan Kristian Hla Bu no- 117- na, ''Hmanah Kaisar Lal Lian Rengpui''- tih hla, Kan mizo hla phuah thiam êm êm Pu Rokunga(1914-1969), phuah bík hi sawi kan tum dâwn a ni.

A châng khatna ah:

Hmanah Kaisar lal lian rengpui,

Lal lai ni eng hnuaiah, 

An hrilh van hnuai khuavel chhiarpui hmingthang,

Chhingkhual mipui pungkhawm zingah,

Mari’n riahrun a chang ve lo,

Bawng in runpui a bel.

tih a ni a, helai thu ah hi chuan han sawisel êm êm tûr a awm lo.

Nazareth mi Joseph- an a nupui raipuar Mari- chu ram awptu Kaisara chhiarpui ah Bethlehem a nau nei tûrin a hruai a, thlenin/Khualbuk an chan loh avânga Bawng in a an thlen thu chauh a ni a.

Mahsela Bawng in a han ti ngawt takna a, hei chu kan Bible pawh in'a hming hmerh a asawi loh, ran in tih a a sawi, chu pawh Lal Isua kha ran in/Bawng in a piang ni lo a, ran chaw pêkna thlêng a mu in hmu ang a tih chauh kha a ni a, chuvangin Bawng in tih hi a dik hlel deuh.

Joseph-a te kha Bethlehem ni lovin Texas- ah kal ta zâwk sela chuan Bawngin han tih pawh kha a rem mai thei, a chhan chu Texas emaw lam an hrût anih chuan Lawless City emaw Spraqneville-ah  khân thlenin an hmu lo emaw a ni ang a, tu emaw ranch a thlen an dîl a a lo rem loh chuan an bawngin ah an thleng ngei ang.

Mahsela kawng erawh a ralṭi angreng viau ang a, Indian hnam hrang hrang, Comanche, Kiowa, Apache, Cheyenne leh Sioux- bâkah Buffalo Hunter- ho lak a an fimkhur angai viau ang.

Biaka O'Renthlei- te anga vêng mawng deuh a bawng vulhtu te fanu Gurkhali  tleirawl hnute lian deuh bawnghnute sâwr lai ṭhu sual hmuh duh vâng a Vety doctor zirlai anga insawi a, zîng kâr kâr a Bawng in thleng thla ziah chu nisela, Pu Rokunga hian Bawng in a ti hi a thiamawm ngawih ngawih thung ang, mahsela he hla sak lai hian Biaka O'Renthlei-chuan Isua pianna hmun lam ni lovin Gurkhali tleirawl bâk a ngaihtuah leh bawk si lo.(!)

Engpawhnisela Bawng pawh ran tho an ni a, Bawng in pawh ran in tho anih avângin helai thu hi chu dahṭha rih phawt ang aw.

A châng hnihna ah heti hian kan hmu leh a :

Khualbuk vengtu i ui lawm ni tlantu mual liam tûr chu,

Amah vanga khuavel dam theih na kha;

Khualbuk vengtu suihlung mawl in van lal rengpui ka lungdamna,

Puan ang a hnawl ta e.

Hemi lai châng ah chiah hian lungawi lohna leh inthlei bîkna a lo lang chhuak ta.

Khualbuk vêngtu hi khualbuk neitu niawm tak a ni a, mahsela vengtu a tih hian tunlai ṭawngkam takin Security Guard- emaw HG- emaw ang hi a ni ve thei tlat mai a.

He khualbuk vêngtu hian khualbuk a khah vek tawh avâng a a thlen theih tawh loh ti a a lo chhânna mai a ni thei a, a mawl vâng a ui leh ui loh lam a ni lo, khualbuk khat vek tawh ah khân hnawh lui ta sela nau piang pawh kha nau chhartu te khân an hre hre hrang sêng lo ang a, an nu te hnenah a ni lo lo an lo pe ang a, nau chhar tute hriat sual palh vângin Joseph- a te khân Isua ni lo naute dang lo kawl sela,  hnu lawk a Heroda ina nau a suat ah khân Isua zâwk kha thi tel ve daih thei a ni asin, Isua kha Aigupta ah an tlanbopui hman mai pawh a.

Chuti lo ni sela chuan Mari- pawm lai naute kha  Kros ah a thi thlen daih ang a, Isua a rawn kal ṭhat leh emaw angai dawn asin.

Khualbuk vengtu kha ka ṭan bîk reng reng lo a nia, thil awmzia ka rawn sawi mai zâwk anih hi aw.

Heti hian in ngaihtuah leh teh ang, a hma a kan sawi te khi ni lo vek ta sela, an tleirawl chhuah hlimin Khualbuk vengtu leh Mari te kha an lo in chu e kha e tawh pawh a ni maithei a, First love can never die- an tih angin Khualbuk vengtu first love pawh Mari kha a lo ni maithei a, tunlai kan ṭhalai te ang mai a  ngaihzawng inṭawm vâng leh inkawp vâng emaw te a lo in ṭhê ṭhû an lo nih tawh phei chuan Khualbuk vêngtu tân chuan Mari hmuh rual a thinrimna so nghal bawrh bawrh kha thil ni thei a ni ve tlat. Mari'n a ngenngawl tak a thlenin a dîl phei chuan a hmangaihna zawng zawng kha huatna ah a lo chang dawn ngei ngei a, a hmangaih êm êm leh sir ah hnawl tu ni bawk chu a pasal leh a dul kiar luah a hmuh khân a rûk in a kawrfual ṭial tlâng a a mittui a hrûk zauh zauh ka ring tlat a ni.

Josepha phei kha chu a haw nghal ngawih ngawih dawn tih chu tlâng hriat ania, a lo hmelṭhat viau phei chuan thîkna melh melh in a melh ngei ang.

K'u Rozama Hauhnar te hi Josepha te kha chu lo nisela chuan Khualbuk vengtu khân Mari kha a deuhsawh ngei ngei dawn a, a chhan chu K'u Rozama hmel a hmuh rual khân a rilru in, "Mari chu a van chawh tak, min duh lo vei a, pasal a neih hmelchhiat phah ta anih hi, an fa pawh hi lo piang sela chuan a hmelchhe ngawt ang, thlahtu bul a hmelchhe em mai," tiin khualbuk ah tâwt chung chungin a hnawh lût duh ang.

K'u Rozama- hi kan sawi lang zuai a, mahsela amah pawhin a hmelchhiat zia hi a pawm ve thlap avângin a huat erawh ka ring lo.

Heti hian han sawifiah ta ila, K'u Rozama hmel hi he khawvel a mihring awm zawng zawngte hnenah hian zuar ta ila, Pi Carolyn-i bawk hi a lei ngam tûr awmchhun a ni leh mai a, a hmel hrim hrim hi Typewriter- ṭâwng tawh lam a Capital letter leh Small letter- na deuh deuh a chhut pawlh nuaih hi a ang viau lehnghal. Mahsela a rilru hi a ṭha roh phian lawi si.(!)

Mizo pi pu te'n a hnunglam a sa barh an sawi ang mai hi a ni reuh a, Madagascar animation movie a Alex (sakeibaknei) ang mai, Ramsa leh ramhnuai lalpa ni ve si, ramhnuai hlau tlat ang, hmel phu lo a rilru no an tih ang chi kha a ni a, a rilru a ṭha in a zau tih vâng ngawt chuan silai erawh a paw lo tûr ah ngai ang.

A hrim hrim in, Josepha te kha mi hausa an ni lo a, a hnu daih a Jerusalem Temple a Mosia dan ang a inthenna ( Naute hlanna) an neih dawn pawh khân inthawi nan Beram leh ran manto tak ni lovin man tlâwm zâwk leh mi rethei te hman ber Ṭhuro tuak khat leh Parva no pahnih an keng anih kha.

Chuvang chuan mi hausa an ni lo a, Bethlehem a an kal pawh hian Mari chuanna tûr sabengtung pakhat leh thawmhnaw phurhna tûr sabengtung pakhat emaw chauh an hmang ngei ang a, anih loh pawhin sabengtung pakhat chauh pawh an hmang maithei a ni.

Chutiang anih chuan Bethlehem pawh chu an thleng hma thei dawn hauh lo a, mikhual thleng tlai pawl an nih phei chuan Chhiarpui hun anih avângin nau nei tûr mikhual kha an tam dawn tih chu alang reng mai a, a hnu lawk a Heroda in'a naute kum hnih hnuailam a suat aṭang khân Isua rualpui nau piang chu an tam hle tih a hriat theih, naute sâwm vel lek tihhlum tûr a Heroda ina sipai khati zah han tirh chu a rinawm chiah loh.

Tichuan Joseph-a te kha lo thleng tlai pâwl annih chuan Khualbuk thlenna tûr an hmuh kha a rinawm tawh lo hrim hrim a, Khualbuk kha a khah vek avânga thleng ve lo an nih phei chuan Khualbuk vengtu demna tûr a awm lo hrim hrim zâwk a ni.

 Khawvel tlantu tûr naute pai tu a nih phei chu khualbuk vengtu khan a hre lo tawp ang.

Mi khualbuk hauh sa ah khualbuk vengtu khan lo thlen tîr sela chuan tun ai hian ala dik lo lehzual ang. Chutiang anih phei chuan tunlai a sawrkar hna lâk chungchang thleng a kan hmer tel angai dawn a, tu emaw recommend avânga thiamna ina a tlin si loh hna kan chelh ta sup sup te hi min ti hre chhuak uar uar mai.

Hei tak hi kan ram ṭhanmawh bâwk chu a ni,  kan Officer lian te sum in kan tham a, an duh lo chung mipui te hian ṭah aw in kan dîl hluam hluam a, tichuan tlinna nei si in sawrkar hna kan thawk a, kan thiamna in a tlin loh avângin kan ram a ṭhang thei lo ta rêng a, chutah tak chuan mipui lamin sawrkar kan dem leh sup sup a.

Tin, an diklohna leh an tlin lohna hre reng chungin kan thlang tling a, kan thlang pawh a ni lo, a lei in an in lei tling a ni zâwk mah âwm e.

Inthlan dâwnah sum min pe thei apiang kan vote a,  a thlawn a sum eisak leh an sem tûr chauh rinchhan in kan vote tling a, a dik alawm, sawrkar chuan an tih tûr an sawi sum sem chu an sem a, sawisel tûr a ni lo e, ram tân a an hnathawh tûr an thawk lo erawh an mawh ni lovin mipui mawh a ni thung, hrereng chung a kan thlan tlin an nih avângin.

Tichuan an sawrkar chhûng zawngin sawisel ila, inthlan dawn ah sum an sem leh ang a, kan tlin chuan sum kan sem ang an tih avângin thlang tling leh ila, an sawrkar hunah sawisel leh luai luai ila kan inhmeh tâwk chiah ni berin alang.

Lei leh van lal berin engatinge khualbuk vengtu hnenah Joseph-a te nupa tan seat hauh turin Vantirhkoh a tirh loh ? tih zâwk hi a pawimawh lai chu a ni a, han chhui tak tak chuan Chemtatrawta- thawnthu ang maiin a in khaidiat chho ve vek mai a, manganna tûr chu nisela a va mangan thlâk dâwn rua êm?

"Khualbuk vengtu ang mai ka ni,

 Sualin min bawm reng e,

Ka thinlung ram Kaisar lal na ah hian;

Bethlehem tlangpui rawn din la,

I tân ranthleng rawn hüng leh la,

Tahchuan lo chêng ang che."

tiin a châng tâwp ber ah kan hmu leh a.

Helai chângah phei hi chuan Khualbuk vengtu aiin a nu leh pa te kha a hla phuahtu hian a ti khawngaihthlak zâwkin ka hria.

He hla hi Khualbuk vengtu nu leh pa te khân lo hre ve phei sela chuan an rilru a nat tûr zia chu i hrethiam pha kher ange maw(!)

Khatia Troy kulh ropui, rimawi leh thal kah lam pathian Apollo-a'n Achilles-a chauh lo tumah rêng ina an tihchhiat theih loh tûr khawp a ropui leh ṭha a a sak, a hunlai khawvel a khaw ropui leh sumdawnna hmunpui ber ni bawk kha, Greek pasalṭha rual te'n an han chhu chim ta kha ania, Troy Lalpa Priam-a mangan dân tûr zia kha han ngaihtuah ve mah teh, khawpui ṭhenkhat kâng khu rum rum te kha chu hmu mahsela pathiante lo ruat lâwk angin Troy kulh kha an chhut chhiat ala ring pha lo ang, mahsela a chhe tlat si a. A tân chuan vanpui a chim hum hum a ni ringawt mai, amah ber lah chuan ala thih phah zui lehnghal a.

Khualbuk vengtu nu leh pa te chan kha han ngaihtuah ve la, hmangaih takin an fa neihchhun tak meuh meuh, tar lam fâ lehnghal, a ṭah ai chuan ti a an chhang ur neihchhun pawh an inkhualtelem nan a an pêk hial, an neih zawh loh pawh an rûk sak hial, a nu phei chuan a ât pui loh chauh kha a lo puitling a, mahsela sualin a bâwm reng mai si. Bawm rengah pawh a a pian tirh ata a thih thleng a sual bawm han neih mai kha chu tu nu leh pa in nge tuar zo ang.

Tunlai chu ni sela chuan a nu leh pa te kha an fapa vângin Mizo You Tuber za rual zetin hnathawk hman lêk lovin an lenchilhin an kâwm ang a, chutih lai a kâr ah phone call in an rawn zâwt chiang ve sek bawk ang a, an lungngaihna an va han tizual nasa dâwn tak êm.(!)

Chung ho zîngah chuan   Biaka O' Renthlei pawh a lo tel hmanhmawh ve ngei anga, a You Tube channel Mizo Mix Tube-  ah a kawmna bâk ah angaihnawm tûrin a'n phuah belh leh emaw te kha a ni leh ang a, a va han buaithlak in a va han chhangchhiat thlâk dâwn tak êm.

A enga pawh chu lo nisela, kha Khualbuk kha Duhawma Kawlni hian lo vêng ve thung sela thil tam tak a inthlâk mai thei tih hi i ngaihtuah ve ngai em.(!)

Ni e, Duhawma Kawlni chuan lo vêng sela chuan, ngawi teh, a uniform ṭial hâk tîr lo mai ang aw, uniform a hâk chuan RV kawng a duty emaw a inti leh ang a, an thlen tlai chhan kha  Joseph-a'n a la kawi emaw a ti leh palh ang.

Chutiang anih chuan, "Min han thâwk khum teh, han zuang teh," te kha a ti leh tuar tuar awm si a. Chu lo ah, an sabengtung a an thawmhnaw pai te kha Amawii- a awm leh awm loh check sakin a a phawrh chhuah tîr leh vek emaw a ni leh ang a, chuvangin tunah chuan uniform ha lovin duty tîr phawt ang.

Khatia Mari leh Joseph-a rawn kal kha, thlenna tûr khualbuk an rawn zâwt ve ngei anga, chutah chuan a hma a khualbuk vengtu suihlung mawl leh Duhawma Kawlni danglamna chu a lo lang chhuak chiah ang.

 Chu khualbuk a thlen leh thlen loh chu khualbuk khah leh khah loh lamin kawng ro a su tawh lo ang a, Joseph-a sekel fun rih leh rih lo ah a in nghat  hek lo ang a, chutiang zêl in mi pawimawh leh hausa, kawrfual hmâwr  lunghlu a chei khawp a mi awmthei pawh nisela.(!)

Khualbuk a an thlen theih  leh theih loh chu Mari kawr nghawng zauh leh zauh loh ah a in nghat tawh zâwk ang. A bâk chu sawi tam chi pawh a ni tawh lo, Sabengtung riahna tûr a Joseph-a a kawhmuh ranin awmna a hla em mai.

Joseph-a kalbo hlân a khualbuk pan chhohna kailawn a Mari a chhawm chhoh chhûng ringawt pawh khân khuan hmasa a lo khuang hman dêr tawh lehnghal.

Engvangin nge kha kailawn rahbi sâwm lek kha darkar eng emaw zah an zawh kan tih chuan, Mari- raipuar, nei ṭêp tawh si kal hleithei lo kha kuah titih, pawm titih, fet theih tâwpna remchang zawng chung a a in chhawmchhoh vâng mawle.

Chumai ala ni hleinem, Nau chhar thiam anga a in sawi leh Kaisara fapa pawh ama chhar ang a sawi tlat tu kha a nia, Mari khân nau a har lo hlauh a, mikhual dang a dawnsawn chhûngin a lo nei hman a, han har hlauh phei sela chuan a va han lâwm dâwn tak êm.(!)

Hei tak hi ania nupui han nei te kan danglam bîk êm êmna chu, duh lo teh mah ila, zantin nupui te'n min kuah zankhua reng mai a, Jimmy Vala chhangte-  te ang kumkhaw inhnemna, "kum te chu number mai mai alawm," tih ringawt mai zawng, a ṭha dang nghah tlawk tlawk ringawt hi hlohna nasa tak a ni ringawt asin, nupui ṭha tak te chu ala nei mai thei, mahsela zan engzah nge kan hlêp tih zâwk hi he damchhung kum 70-80- hi han chhût ila, tam deuh ania.

Chu lo ah, Kum te chu number mai mai alawm tih hi inhnemna a tling tak tak lo, kum te chu number mai ni mahsela vun a chuar tawh si chuan engtin nge ni ang.

Dik tak chuan Jimmy Vala Chhangte te chu keini anga an hmelina puak a tih loh vâng leh tunlaia hmeichhe tlawmngai an tlem tawh vâng hi a ni pakhat a, chuvangin keini in zan mutna a nupui te kan kuah laiin ani erawh zawngin a huan thlai ringawt a ngaihtuah a, chu lo chu ngaihtuah tûr dang a neih miau si loh avângin duh lo sa teh mahsela a ngaihtuah a ngai tlat a ni.

Sawmsawmi Pa Sailo lah hi sawi loh theih loh, khua a thim dêk dêk tawh chuan a fanu infiam lai i mut a chhuak tawh tiin a mut luih tîr ziah a, a lêrh a lêrh ta hrim hrim chuan nula number te lah hi a nei thei zêk lehnghal, mahse pakhat bâk a bum thlu thei ta chuang lo chu anih hi, a dang hi chu a tan chuan van ek khum tum ang mai an nih avângin zanrei ah hnathawk niawm takin computer hma ah a ṭhu a, a kut dinglamin mouse- a hûm a, a kut veilam pawhin mouse- tho a hûm zantin e tiin Lunglei lam a kan hmelhriat pakhat thudik ngaina miin a sawi tlat mai bawk.

Ka sawi hmaih theih loh chu Tluangpuii Hmar Zote- hi a ni, a ni pui roh hi titau bûr chung a nangni pawh lungawi lo ula, in lungawi thei bîk dawn emni ti a sofa ṭhut khuar kâwk thei kha a ni ve hrim hrim a, Sawmsawmi-i pa Sailo bawk hian alawm, Tluangpuii chu European Type- a a ṭhut hian a mawng a leng lo a, a sîr ah a uai pûr zêl ti kha, ka lo theihnghilh hman ṭêp alawm.

Ani lah tak a, Atomic Kitten- ngaisang chung a lo seilian kha a ni a, a rilru chuan a ngaisang a, an thawmhnaw hâk thlengin a copy ve ṭhîn a, mahse khâng thawmhnaw te kha a taksa hrêng na tu mai an lo ni si kha a lainat awm thei asin.

David Beckham rawn lâr tirh khân a nula ve iak iak tawh a, chumi hnu ah Beckham-a fapa a star leh a, mahsela chu pawh chuan tunah chuan nupui a nei leh tawh si, amah erawh chu ala nula thung tih hi kan belh leh hlak ange.

Khai a!  kan tui lutuk a thupui kan pên san thui ta mah mah e.

Heti zawng hian i han kheuh leh zauh teh ang.

Khualbuk vêngtu chungchang bîk hi Bible thawnthu lam, Christmas thawnthu ah a lo awm ve a, thawnthu bu pakhat ah chauh a awm lo a, bu hrang hrangah tlem a dang deuh hret hret in a in ziak hlawm ania aw, chutah chuan ;

Khualbuk vengtu hian thlarau hriattirna in Lal Isua pian tûr hi a hria. A khualbuk room pakhat hi hemi atan hian a ti ruak reng a, nitin tui leh mamawh a thlak ve ziah a. tichuan, Lal Isua lo thlen hun a nghak a ni. 

Rome sawkar cencus a thleng a, mikhual an tam êm êm mai a. An buai nuai nuai a ni ber mai. Rome sipai lal tak pakhat chuan riahna a rawn dil ta a. Lal Isua pianna tûr room bîk bak chu room ruak a awm loh thu in a lo chhâng a. Mahsela Rome sipai lal chuan a dil ngial a, rem a ti lo zet a.

 Nakinah chuan, gold coin tam tawk a rawn phawrh ta a, khualbuk vengtu rilru pawh a buai ta.

 A tawp ah Gold Coin chuan room chu a hralh ta a ni. 

Hemi lo deuh pawh hi a awm a, chutah erawh chuan Rom Sipai ni lovin, mi hausa tak pakhat tiin a in ziak bawk a.

Hemi thawnthu hi Pu Rokunga- khân a chhiar anga, chuvangin hemi behchhan hian hla a phuah zâwk pawh a ni thei ve tlat.

Hla phuahtu leh thawnthu ziak ṭhîn te chuan an thuziak ah thu tam tak an phûm ru a, an suangtuahna tam tak, a tak ni si lo leh a tak hrûl tam tak an lo ziak a, lemziak thiam pawh a ni tho ang chu. Chutiang ang a a phuah pawh chu a ni thei tho bawk.

Amah Pu Rokunga chuan,"Khualbuk vengtu hi a sual ka ti reng reng lo, tehkhin nan ka hmang mai chauh a ni. Khualbuk vengtu hi mikhualin an bawm luih luih ang hian kei hi sualin min bawm reng e ka tihna a ni a. Tehkhin nan ka hmang zâwk a ni e." a ti bawk a.

Chuvangin tunah chuan Khualbuk vengtu ṭan leh demtu te pawh kan in lungrual tawh ngei ang.

Engpawhnisela, Christmas ni December ni 25- kher hi Isua pianni a ni lo maithei a, he Christmas ni sawisel duh tam tak pawh an awm ang, a nî (Date) dik lo kan lâwm kumtin anih pawhin Vanram Kai loh phahna khawp sual a ni ngei e, tih kan chian hmasak phawt a ṭûl ve  maw?

Tin, Christmas tih chu Krista Ruai- tihna mai ania, he ruai hian mihring te'n a kan lawm leh ran kan talh a, ruai kan ṭheh mup mup kher a kâwk lo a, Isua pianni chu engni pawh nisela Krista Ruai chu kan thinlung hian a ṭheh tak tak em tih hi i ngaihtuah zâwk teh ang u.

Krista Ruai chu enge kan tih chuan, A taksa, kan tân a Kros-a a hlan ngei mai kha a ni a.

Chu Krista ruai- chu ṭheh in i puar ang u, rilṭam tawh lo tûrin i ei in i in ang u.

Chumi awmzia chu, Hawh u, i piangthar ang u, Hawh u, thinlung serh i tan ang u, Hawh u, khawvel hi kan tân i khengbet ang u, Hawh u, Krista ah chuan Siam thar in i awm ang u. tihna mai tê a ni.

Tichuan, Eng ni pawh hi Christmas ni tiin lâwm mah ila, a pawimawh ber chu i thinlung ah Krista a piang ve em tih zâwk hi a ni.

I thinlung a Krista a pian ni, i pianthar ni kha i tân chuan Christmas ni a ni e.