A COLDEST WINTER NIGHT

Zanlai a lo thleng ta tih min hrilh tum ni awm fahran a bang chung sâng a sana lian in khâwn rîk na pawh dar chanve vel lai a ni tawh ta hial ve ang.

Dar sawm leh pathum pawh lo ri ta teh reng pawh nisela ka tan chuan danglamna leh pawimawhna hranpa êm êm a awm chuang lo, hun aliam hret tih mai loh chu.

Ka muhil thei lo chu khum ah chuan ka let ka let a, thlasik khawvawt tlân bosan a mumang khawvel fan ka tum ve na chu a ṭhelh chiang khawp mai.

Chutia muhil thei lo a ka leh ka leh hnu chuan ni thei ngangin ka hre lo a, intih harh tum in tukverh ka'n hawng a, room chhûng a thlasik thlifim rawn thaw lût heuh heuh te chuan min zem ni ber in ka hria.

Lemziak thiam in la uluk tak a aziah ni awm tak a Van chung sâng tak a arsi sang tam tak lungrual hmel tak a de sep sep leh in pho uarh te, khaw chhak lam pan a a zinkawng zawh mek ni awm tak a Thlasik kawng paw riai mai te chu ka thlîr ning thei lova, hetiang a awm tûr hian Siamtu hian kum maktaduai engzah nge a remhriatna leh ngaihtuahna te chu a lo sên ang tih hi rilru hian a ngaihtuah vawng vawng mai.

Chutia Van lam thlir a ka hawi dauh dauh hnu chuan ka hma zawn a khawpui ropui tak mai chu kan thlîr leh a, a tûk mai a Lal pian hun champha lo thleng tûr nghah nan leh lawmna atan a inbuatsaihna, mitin in a uluk tak a cheimawina chitin reng a kawtthler leh an in an chei te chuan ka rilru a hneh in ka lung a ti leng a, ka muthilh ni lovin, chûng ka thil hmuh te chuan ka thinlung aluah hneh kher mai, ka ngaihtuahna chuan kum liam ta chu a chhui lêt a.

Ni lo, chhui lêt mai nilovin hun liam ta ah a kîr leh zâwk a ni.

Ni e, nikum Christmas urlawk zan te kha chuan, ka hmangaihi nen he tukverh ah ngei hian Siamtu ropui zia thlîr in chung Van lam hla tak a arsi inpho iarh te chu hlim tak a inkuah rial in kan chhiar a, kawtthler an cheimawi ah te thla la in inkai rial in kan fang dun anih kha.

Ni e, kha zan lunglen thlak tak leh ngaihawm tak kha he ka damchhung hian ka tawng leh ngai tawh dawn lo tih ka ngaihtuah châng phei chuan khawvel ah hian mal ngawih ngawih in ka in hria a, dam châkna rêng ka nei mawlh lo.

Thlamuang tak a ka awm a bei a, " Khawiah pawh awm ila, lo thi ta pawh ni ila, urlawk zan a lo thlen apiang in ka hmangaih che tih hi i lo hrechhuak ziah dawn nia, ka hmangaih che a, ka hmangaih reng fo ang che "a tih te kha ka beng ah hian a ri nawn tluk tluk a, tun lawk ni maiin ka hria.

Kha zan hlimawm tak kan hman dun lai khân kumin urlawk zan kan hman dun dan tûr te kha a sawi siam siam kha ania, he hun lo thleng tur a nghahhleh zia te khân ngaih a ti ṭha lo rum rum zâwk a, ngaih ṭhat loh ang ngeiin a duhthusam te chu boruak ah a thamral a, chu mai pawh ni lovin a mah ngei pawh in a duhthusam te chu kumkhua ai pawh a rei zâwk chatuan thleng pawh a hmang thei tawh ngai lo tûr in a kalsan ta si a.

Kan in tawn tirh aṭang rêng khân kan in hmangaih a, hun lo in her danglam zel mahse kan in hmangaihna chu a danglam ve ngai lo mai ni lovin, nitin in a zual deuh deuh zâwk a, kan in hmangaih a, kan in hmangaih reng a, kan in hmangaih reng fo ṭhîn a, Ni leh Thla leh Arsi te khi tuipui zau tak a an pil bo hun a lo thlen hun ah pawh kan la in hmangaih reng ka ring a ni...

He Thlasik zan boruak vawt leh thiang tak hi ka tân chuan hlimna a lo ni ṭhîn a, chutiang bawk in mitin tan pawn kumpui linglet a an lo nghah fak leh an lo thlahlel ber a ni a, mahse ka tan chuan mittui ti tla tu mai a lo ni ta si anih hi.

"Hmangaih ber nen chuan Thlasik boruak vawt tak pawh in kuah rialin kan hmachhawn a, mahsela hmangaih ber te tel lo chuan Thlasik boruak vawt tak chu thlâk danglam rual a ni si lo."