WIZARD VS WERETIGER | The Epic Of Wizard Lalruanga

SAWIHAWNNA :

Ngaiteh, A tîr ata Siamtu Khuanu remruat ang chuan hun a lo in her ta.

Keichala te khua aṭanga Lalruanga a haw mêk laia Van chung pathian chi tenau Vanhrika phuba lâk tumtu te bawk chuan Lalruanga an tihhlum theih loh avângin kawng dang a hmalak an lo tum leh mêk a.

Mihring te hmuh theih lohvin Lalruanga te awmna ah chuan inlan mahsela Lasi nula pahnih te'n an vên tlat avâng leh Mihringte enkawl ṭhîn tu mitmeng de riai Mal- ina a uap reng anih avângin Lalruanga tak chu an khawih thei lo va, a nau, Lalruanga nau thinlung erawh chu an duh ang ngeiin an hneh sak thung a.

Lalruang an'a Keichala te khua ami ṭhi a hawn ṭeuh avâng leh Keimi khua aṭanga dam tak a a lo haw leh avâng chuan an khaw mipui te chuan an ngaisang in an sawi nasa hle mai a, naupang tê tê te pawh chuan an pawnto naah te Lalruanga lem te an changin Keimi nen a an inbeih dân te an zir nasa thei hle a.

Chutianga hlim tak a an awm lai chuan Lalruanga nau erawh chuan chutia a û hming ṭhatna chu a thîk in a ṭhi hawn te chu a awt ve hle mai a.

Lalruanga bulah kalin, " Nang pawhin a i theih chuan kei pawhin ka thei ve tûr a ni hrim hrim, Keichala te khuaah chuan ka kal ve dawn e," a ti a. Mahsela Lalruanga  chuan, "Mai mai ṭhîn a, nang zawngin tih dan te i thiam awm si lova, i va thi mai ang, Keimi khua a nih saw, keipawh thi lo a ruangin ka rawn chhuak ṭâwk a lawm," tiin an inleng te mitmei vêng takin a chhâng a.

Mahsela a nau chuan, "Nang mah mah thi lo a chhuak thei chu ka thei na chêk ang, ka kal dawn tho tho, tuman min dang thei lovang," thinrim tak hian a ti a, lungawi lo sa a a nau chu rawn kal anih avâng leh an in lêng te a hmai zah vângin Lalruanga chuan ngawih a chuh ta zâwk a, an inlêng te ṭîn hun a thil nihna dik tak sawipui leh a tum zâwk a.

Mahsela chutia Lalruanga te in aṭanga a chhuak chu a in siam nghâl sawk sawk a, Keichala te khaw lamah chuan zin tûrin khaw thim hma deuhin a chhuak ta a.

Khua a lo tlai a, zanriah te an eikham hnu chuan muangmar in Lalruanga chu a pa te inlam panin a chhuak a.

Lalruanga hi nupui aneih aṭangin a indang a, an inpuiah chuan a nu Zawltleipuii leh a pa Zalhranga bâkah a nau tlangval chu an khawsa mêk a.

An in a thlen chuan a nu leh pa chu tap ah an lo ṭhu dûn a, ani pawh chuan inchhûng a mit lên  ruai chungin a va fin ve a.

Thil awmzia a'n sawi chuan a pa Zalhranga-a chuan muang ban chap hian, '' A kal ta anih kha, mipa fâ ka lo nei che u hi chu a pawi hle a ni, hmingthanna leh ropuina, huaisenna te hian in mit a ti del tlat si a, hêng mihring ropuina te hi chuan a aiah nunna hi an phût lêt tlat ṭhîn asin, mahsela in upat deuh hunah in tleirawl phûrna te hian ala kian san ve mai ang che u," a ti charh charh a.

Tih theih dang a awm tawh chuan loh avângin Lalruanga pawh chu in ngaihtuah chungin a haw ta hnâ hnâ a.

Ni tam fê mai kawng lak a a thang hnu chuan Keimi te khua chu Lalruanga nau chuan a thleng ve ta hlawl mai a, an Lal Keichala te inlam chu a pan nghal thuai thuai a.

Chûng keimi ho chuan an zia an lo chhuah lo a, mihring ang a an lo inlan hlawm avâng chuan Lalruanga nau pawh chuan a hlau lo deuh niin a lang.

Keichala chuan a ṭhian Lalruanga nau a ni tih a hriat chuan a lo duat hle mai a, an mikhual te inlawmna leh an tihdan phung angin Keichala nu leh pa te chu a û Lalruanga an bawkin a va en ve a, Keimi an ni tih a hriat sa avângin chutiangin a hlau mai bîk chuang lo.

A hmâ ang bawk khân an ha hni ah te chuan vangvat saiṭial lian pui pui te chu an lo khâp leh thlûr thlûr a, Lalruanga nau chuan, " E khai ! Keichala nu leh pa chu anva hlauhawm êm ! An hahni ah te chuan vangvat a khâp tâk thlûr thlûr a, ka hlauh zâwng tak a ni," a ti a, uak tuar tuar pahin papui chuan a khuh leh ta daih a.

Khua a lo tlai chuan zanriah te an han ei a, an chaw eikham chuan a zinkawng a thui deuh vângin a chau deuh nge ni,  Lalruanga nau chu a mu nghal vat a, rei lo tê ah muhil in a hnâr ngal ta burh burh a.

Chutia a mut hnu chuan Keichala nu leh pa te chuan Lalruanga chunga a an tih ang bawk a ti tûrin an fapa chu an zilh leh ta a. 

A tûk khua chu a lo vâr a, Keichala chuan, " Ṭhianpa Lalruanga nau i ni bawk a, zinkawng thui tak i rawn zawh hah bawk si, chuvangin âr ka talh ang che, a pui tui lai nge i ei duh a note," a ti a. Ani chuan, " A note te chu ka kham hlei âng, a pui tui thau lai ngei ni ang hmiang," a ti a. Keichala chuan a lian zâwk a phût avângin a note a talh sak ta hlauh va.

A tûk leh ah chuan Keichala chuan, “A nih leh vawk ka talh ang che, i rawn zinna a hla bawk si a, vawktê nge ka talh ang vawk pa lian?” a ti leh a. Lalruanga nau chuan,  “A te teivet chu kan kham nang le, vawkpa lian ngat ni rawh sw,” a ti leh a. Tichuan Keichala te chuan awlsam tê in an Vawkte a talh sak leh ta hlauh va. Mahsela Lalruanga nau chuan vawkte nge a lian tih lam a ngaihtuah lo, tui ti takin a ei bawrh bawrh a. Tûkṭhuan te an ei zawh hnu chuan Keichala chuan, “Zu ka zûk ang che, beltê nge ni ang belpui?” a han ti a. Ani chuan in châk hmêl fé hian, “Belpui ngat le” tiin a chhang a.  Belte zâwk a zûk leh ta a.

Tin, chumi ni chuan Keichala chuan a û Lalruanga ang bawk khân ṭhi a lawhsak ve ṭeuh bawk a. A ṭha leh ṭha lo a hre hrang ve lem lo bawk nen Lalruanga nau chu a lâwm thiam khawp mai.

Chutianga a zin chhan ber ṭhi a dawn tâk ah chuan haw zai rél a tum ve ta a, mahsela Keichala chuan a khua te'n seh an tum dawn tih a hriat avângin Lalruanga a tihdan ang tho vin thli a fun sak a. A tûk zîng hmâ takah, khawvâr hma deuhvin a kal tîr ta a.

 Nimahsela ala hmâ êm avângin a kal peih lo kher mai, chutih lai akâr ah  kawtchhuah ava thleng, zan lama mi tê awmtual chhêmna mei nung hi a lo awm a. Lalruanga nau chuan ham bûi bûi pah hian, "Ka kal lutuk êm mai, ka mut ala chhuak rih e, meilum ai pahin mu leh lawk ila, khawvâr chian deuh hunah ka kal leh zâwk teh ang," a ti a. Mei chu tuah nung leh in a bulah chuan a mu leh ta mai a.

Chutia mutmu a tuah pah chuan a thil hawn te chu a'n en chiang a,  Keichala thli fûn sak kha chawhmeh emaw a ti a, a han phelh a, mahsela engmah a chhûngah a lo awm si lo chu a thinrim ang reng hle mai, a fûnna chu mei ah a rawh ta daih a. 

Keichala thli fûn a phelh veleh thlî chuan Keichala te bahzâr chu a han chhem ve nghal a, tichuan Keichala chuan Lalruanga nau chu a thleng hla hle tawh a nih dawn hi a ti a, a khua te chuan khawvâr tirh ata tawh Lalruanga haw dawn lai ang thova “Keichala ṭhian buanah,” ti a a in kawt a an in hâwr khâwm tuau tuau reng bawk avângin, “Nichinah a kal daih tawh” a han ti a. Chu veleh chuan Keimi te chu Sakei a inti changin meikawhin an tlân ta hum hum a.

 Mahse, ûm hran pa pawh a lo ngai lo, an khaw kawtchhuahah an va hmu ta mai si a, rei lo tê ah an pawt sawm ta vek a.

Lalruanga chuan Keichala khua a a nau zin chu haw har a tiin a ngaihtuah êm êm mai a.

Keimi pawh nimahsela Keichala nen chuan ṭha te te in an in ṭhen kha a ni a, a nau chungah chuan thil ṭha lo a tih duh a ring lêm lo.

Mahsela a nau mizia bâkah Keichala khaw mipui te, Keimi ho mizia an ngaihtuah erawh chuan angaih a ngam hlei thei lo va, a tâwp a tâwp ah chuan lam turin Keichala te khaw lamah chuan a thawk chhuak ta nge nge a.

Khua ava thlen chuan a ṭhian Keichala chuan ṭha takin a lo lâwm a, thil awmzia engkim pawh pangngai takin a sawipui a.

A khua te chuan Lalruanga nau chu ei zo tawh mahsela Lalruanga chuan a tihdam leh theih a beisei a.

Tichuan Keichala chuan a khua te zawng zawng chu a ko khawm ta vek a, Lalruanga nau ei tu zo zawng chuan a tisa chu an rawn luak chhuak leh ta hlawm a.

Chutia tisa them luak chhuah ho te chu Lalruanga chuan lung chhe tak in a thlîr reng a, Keichala khaw mipui te pawh chu an in thlahrun hlawm hmel khawp mai.

Tichuan Lalruanga chu chu tisa them inthuah tup chu a pan hnai a, a dawi bûr chu phawrhin a chungah a han lek a, maimitchhing diar diar in dawi hla mak tak mai a chham bual bual a.

Chutih lai chuan khaw chhûngah chuan thlî a rawn thaw vûk vûk a, khua lah chu a dur khup khup mai a.

Chu vai vut thli lêng vel chu nasa zêlin, Lalruanga leh a nau tisa them awmkhawm hual chuan ṭhâwngaleivir ang hian a vir ta mup mup mai a, an chung zâwn ah lah chuan chhûm dum chhah pui pui mai hi a in dinleh tup tup mai bawk a.

Chuthil an han hmuh chuan Keimi tam tak chu mang ang takin an ṭe ruai ruai a, a ṭhen lah chuan an hlauh luat avângin Sakeiah te an inti chang a, an tlân chhe dâwr dâwr hlawm a.

Chu ṭhâwngaleivir nasa tak chu a reh meuh chuan a hma lawk a tisa them intiang ûrh kha mihring ruangam ah a rawn chang leh ta vek mai.

Chu thil an hmuh chuan Keimi ho mak ti chu  Lalruanga melh zawk zawk pahin ṭi fe hian an rawn kalkhawm leh a.

A kianga awm Keichala pawh chuan Lalruanga dawithiamna tak tak a han hmuh chuan mak a ti ve kher mai.

A hma a a nau ruang, nunna nei tawh lo tih hriat tak mai a mu bêm chu Lalruanga chuan a han pan hnai a, a âwm ah a kut pahnih nghat in dawi hla a han chham leh a.

Chutih lai chuan an chung zâwn a chhûm dum chhah tak tak let tup tup kâr ah chuan mihring mangang taka ṭê ri nuaih nuaih thâwm hi rawn chhuakin thlarau ang tak rawng eng dal deuh deuh hi an thlâwk kual sup sup a, chûng ho te chu mihring ruangam ang deuh an ni nâ in an kawng aṭangin a zuih a, an ke lam chu a zuih ral thung a.

Chûng thlarau ang tak tak te chu ṭhawngaleivir ang hian an rawn vir thla leh mup mup a, Lalruanga te chu hual in vaivut nawi nen an vir pup pup hlawm a.

A khât tâwkin Lalruanga nau taksa lamah chuan thlarau chu an thlâwk phei leh ṭhîn a, Lalruanga nau taksa an sîk apiang chuan a taksa chu a phu dâwrh ṭhîn a.

Chutiang chuan dar chanve emaw lai chu chûng thlarau te chuan an rawn awmchilh a, mahsela Lalruanga'n a dawi hla a chham zawh chuan chhûm kâr lamah an thlâwk chho leh hlawm a, thli thaw pawh chawplehchilh a rehin boruak pawh a pangngai leh a.

Lalruanga chu a lungawi loh hmel kher mai, muangchangin a nau taksa chu dap kualin an let vêl a, mak tak maiin a zak vun hi a lo la kim lo va, tisa in luahkhat mahsela a zak chu ala hêk huam mai a.

Chutah Keichala hnenah chuan, " Ka nau vun hi ala kim lo a, chuvangin a thlarau chu ko kîr mah ila, a taksa chhûngah a lût thei lo a ni." a ti bung nghut a.

Keichala pawh chuan hrethiamin a khua te chu a ko khâwm leh a, Lalruanga nau ei tu te chu ko hrangin zak vun luak chhuak tûr chuan a ti leh hlawm a, an theih pa tawpin an han inkawm luak ṭhîn a, mahsela a rei deuh tawh avângin tumah rêngin an luakchhuak thei ta lo.

Inthlahrung fê in an Lal Keichala leh Lalruanga chu an melh tawn zek zek hlawm a.

 Lalruanga chuan awmzia a awm dawn lo tih a hriat in Laiking man tûrin a ti a, tichuan laiking chu rang takin an rawn la vat a, a vun chu hîk a dawihla chham chungin a nau zak vunah chuan a bel ta a, vun pangngai ang chiah fel fai takin a in bel thlap a, mahsela Laiking vun a ni tih hriat takin a hmel a danglam phah chuang lo.

 Tichuan Lalruanga chuan a dawi bur chu a nau ruang chungah chuan a lek chhuak leh a, dawi hla a chham zui nghal a.

A hma ang bawk in an chung zâwnah chuan chhum dum chhah tak tak a rawn inthuah leh tup tup a, thawklehkhat ah a rawn êng thla zuai a,  ṭek tla ang mai hian a phe zawk a, Lalruanga nau taksa ah tak mai chuan a dêng dawt a, Lalruanga nau taksa chu a phu dâwrh a, chu veleh chhûm dum te pawh chu an thâm ral zui ve nghal a.

A kut a rawn phu zeuh zeuh a, chutah rawn meng diar diar in muangchang hian a rawn ṭhu chhuak a.

Keichala leh a khua te chuan chu thil an hmuh chuan mak an ti hle mai, a taksa ei tu te phei chuan an hlau hle a, Lalruanga leh a nauvin phuba an la mai ang tih hlau rêng rêngin an ṭhiante hnung aṭangin an rawn bih dêk dêk hlawm a.

Lalruanga nau chu a rawn hawi chhuak a, a bul a a û a hmuh chuan, " Eng thil nge ni ta ngai a? Engvânga rawn kal ve nge inih? Haw leh thuai zâwk teh, keimah in ka kal thei ka tih kha." tiin thinrim fê hian a hau a.

 Chu thu a hriat chuan Lalruanga chu a thinur hle mai a, “I zak hnuai kha en thuai rawh,” a ti a.

Ani chuan a bân kau in a zak chu a en nghal a, Laiking vun chu a hmu a, "Hetiang ka vun ah a awm thei lo ang.” tiin a pawtthla ta a, a pawhthlak veleh chuan thi leh ta nghal a.

Lalruanga chu a rûm nghut a, a kiangah Keichala chu rawn kal hnaiin, “Engtin nge ni ta ang le ṭhiana?” a ti a.

 Lalruanga chuan, “Ṭhian Keichal, engtia tih theih ni tawh hek lo le, ka nau in lo that ta si a, kan indo mai a ngai dawn a nih hi le,” a ti a. 

Keichala pawh chuan a hrethiam khawp mai, a tîr aṭang rêngin a khua te thiltih avângin chu thil chu ala thlen a lo ring tawh sa a.

Keichala chuan, “Anih chuan a thi hmasa zâwk zawk chu Hrangsaipuia seki phîr a in ai ah kan ti a ni ang chu,” a ti a. 

Lalruanga pawh chuan, “ E! Keichal, ni tuk a ! mathei lovin a thi hmasa zâwk zâwk chu Hrangsaipuia seki phîr chuan in aih ah kan ti tlat ang chu." a ti lêt ve a.

Keichala chuan a khua te chu hlâng ṭha tak siam tîrin Lalruanga nau ruang chu puan a tuamin an khuh a, hlâng ah chuan an phuar bet a.

Keichala khua te chuan zâwn an tum lai chuan Lalruanga chuan a remti lo a, a dawi bûr lek chhuakin eng emaw ni hi a chhampual a, chumi hnu lawk chuan choak lian tak tak hi khua ah chuan an rawn thlâwk lût sup sup a, in chung dî leh tlangbân ah te chuan fû in an hrâm ri tuar tuar hlawm a.

Keimi ho chuan mak an tiin an hawi hau hlawm a,  ṭhahnem tak an nih hnu chuan Lalruanga chu a faifûk ta râih a, chu veleh choak rual chuan ani chu rawn pan in Lalruanga nau hlâng chu boruak ah an zâwn kâng ta mai a.

Lalruanga hma ah chuan sâng vak lovin an thlawh pui a, Lalruanga chuan anni chu zuiin khua chu an chhuahsan ta a.

Keichala leh a khaw mipui te chuan mak tiin an en huai huai hlawm a, an hlauh deuh avângin hnai deuh ah an zui ngam lova, hla deuh tak a zui zêl in an khaw dai thleng an zui dûl dûl a. Ngaw kâr a an liam hma loh chu mit tla dâwn dawn in an thlîr ṭâwk ṭâwk a.

 Lalruanga chu an khaw lam pan chuan a haw ta a, an indo chu a ni ta reng mai.

A nau ruang chu an in pawh panpui duh lovin  an chhungkaw ram ah a kalpui a, ṭha tak a a phum zawh hnu in an inpui lamah a haw ta a.

A nupui fanau te a ngaihtuah avângin an inah haw duh lovin a nu leh pa te hnen lam a pan a, A nu leh pa hnena thil awmzia a sawi chuan a nu chuan a tuar thiam lo hle mai, mahsela a pa erawh chuan a lo sawilawk tawh anih avâng leh anni unau mi chunglam a lêng te hi an dam rei a lo ring lo sa tawh a, a tuar dan pawh a thiam angreng hle mai.

A nu chu Lalruanga te inlamah kal in thil awmzia te a hrilh a, lo fimkhur tûrin a chah bawk a.

Lalruanga chuan a ṭhian Keichala'n a nupui fanau te a khawih chu ring lo mahsela, zan thil thu leh inchhûnga in beihna a thlen palh tâkin kut an tawrh tel ve a hlau zâwk a ni.

A tûkah chuan Lalruanga chu feh tûrin a insiam malh malh a, a nu hnen ah chuan," Ka nu, vawiin chu ka ṭhian Keichala a lo kal ang a, khawiahnge Lalruanga?  a tih chuan Chhuah lamah a feh lo ti ang che,” a ti a. 

A kal hnu lawk chuan Keichala chu a rawn thleng a, Lalruanga kalna chu a nu a rawn zâwt ta ngei a, ani lah chuan Lalruanga sawi angin, " Lo ah, chhuah lamah a feh," a lo ti a.

Keichala chuan fimkhur takin chhuah lamah chuan nilengin a zawng a, mahse Lalruanga chu tlâk lamah a feh daih a lo ni sî a.

A tûk leh ah chuan Lalruanga chuan," Ka nu ka ṭhian a lo kal a, ka awmna a rawn zawh leh che chuan, Tlâk lamah a feh lo ti leh mai ang che." tiin a chah leh a.

Keichala chu a lo kal leh ngei a, anu hnenah chuan a zâwt leh a, ani chuan, "Tlâk lamah a feh," a lo ti leh a. Keichala chuan nilengin tlâk lamah a va zawng leh a, a hmu leh ta chuang lo. Lalruanga erawh chu chhuah lamah a lo feh leh daih si.

 A tûk leh ah chuan a nu hnenah, “Ka nu, vawiin chu chhuah lamah a feh lo ti ang che,” a ti a. Lalruanga chu chhuah lamah a feh ta a.

Thlam a thlen chuan thlam luhka ah chuan lungtat leh hêm hmangin mihring lem a siam a, amah chu thlam chungah lawn in a biru thung a.

Ni vanlai zawl a thlen lai vel chuan Keichala chu a lo kal ta ngei a, Lalruanga chu dawithiam leh fing tak a ni tih a hriat avângin râl aṭangin a han thlîr hmasa te te a, thlam luhka a mihring ang mai chu hmu in Lalruanga ni ngeiin a hria a, a pan hnai zêl a, chutah ama hriat tâwk lek a, "Khu zet khu zuk nia le," tiin phûr takin Sakei ah a inti chang a, fimkhur takin a veh ṭham ṭham a, a hnaih deuh hnu chuan rang fê hian milim chu a bawh let ta rawp mai a.

 Chutihlai tak chuan Lalruanga chuan thlam chung aṭang chuan a zak dawh ah tak thal in a lo kap ta zawt a.

Thlam chung aṭang chuan a zuang thla a, thlam luhka a thisen nen a let reng Keichala kiangah chuan a zu ṭhû a, muangchang hian Keichala chu mihring ah a chang riai riai a, Lalruanga a han hmuh chuan thei leh thei lo hian, “Ka ṭhian, nangin a ni maw min that hmasa le, hman a kan intiam tawh ang khan Hrangsaipuia seki phîr chuan min han ai ngei dawn nia,” a ti ṭâwk ṭâwk a,

Lalruanga chuan a tukkhum ah dawmin, “E! ka ṭhian Keichal, Ni tuk e le! thlaphang suh, mathei lovin Hrangsaipuia seki phîr chuan a han ai ngei ngei ang che."  a ti a.

Tichuan Lalruanga chuan  Keichala chu a dawm hlum ta a.

Keichala ruang chu ṭha takin a tuam a, tin, Keichala te khua ah zualko atân choak a tîr zui nghal bawk a.

A dawi bûr ṭha ber ber nen a thawk chhuak sa a ni bawk a, chutianga Keichala ruang a buatsaih zawh chuan rei awm lovin a ṭhian Keichala aih nân chuan Hrangsaipuia seki phîr la tûr chuan a chhuak zui leh ta a.

Aw Mal, han ngaihtuah teh, Siamtu Khuanu remruat ang zêl chuan hun a lo in her ta, tunah chuan Keimi te chuan mihring an tibuai ngam tawh lo ang chu."  Romei kâr a lêng pathian chi, mihringte vêng ṭhîn tu Vansen chuan a ti a.

Mitmeng de riai pathiannu Mal chuan ani chu chhângin," Nunna aiah nuna chu pêk a ni a, mahsela thisen chhuahna chuan tawpin tai a nei dawn chuang si lo, Hrangsaipuia seki phîr a in aih hi ka remruat a ni lo asin, Lalruanga tân a thang kamna a ni thei tlat, mahsela Khuanu ruat sa a nih si chuan." a ti a.

Vansen bawk chuan, "Ngai teh Mal, Hrangsaipuia chu dawithiam tak a ni a, Lalruanga tân chuan hneh rual a ni ang emaw?  Khuanu rem ruat dan anga anni pahnih intawng tûr hi thlâk theih ni tawh lo mahsela thil tam tak chu i thlen tîr thei alawm." a ti leh a.

Mitmeng de riai pathiannu Mal chuan, " Ni e, Khuanu chuan rem ti lo mahsela Lalruanga ka puih angai a ni, tunah Hrangsaipuia awmna lam panin a chhuak tawh si a," tiin lei lam chu a bih  a.

Chutah Vansen lam hawiin a nui suk a, Van chung sâng tak aṭang chuan a chhuak zui ta nghal a.