LALRUANGA & WITCH ZANGKAKI | The Epic Of Wizard Lalruanga

SAWIHAWNNA :

Vanchung khua a pathian chi hnuaihnung Vanhrika a tihhlum avânga a chipui te'n phuba lak a, Lalruanga tihhlum an tumna hrang hrangte chu  amah vêngtu Lasi leh mitmeng de riai pathiannu Mal- te avângin a hlawhchham tawh a.

Mahsela an beidawng duh bîk hauh lo mai, chuvangin Hrangsaipuia fanu chu an enkawl ta a, mihringte hmuh theih a an in lan chuan Siamtu Khuanu lung awi loh an hlau si a, chuvang chuan a rûkin, mihring te hmuh theih loh a inlan in Zangkaki chu dawithiamna hrang hrangte an zirtir ta a.

Chung Vanchung pathian chi te hnenah chuan Siamtu Khuanu chuan, "In thawhrimna te a thlâwn lo ang a, thinlung dam takin inla awm ngei ang, a chhan chu mihring te hnena rorel tûr, anni ṭanpui a enkawl tû in ni a,  chu hun lo kal lehzel tûr atân a remruatna chu a ni." tiin a hrilh a.

Mahse chûng thu chu mihringte hmangaih a enkawl ṭhîn tu mitmeng de riai pathiannu Mal- chuan a lo hria a, pathiante rorelna ah chuan Siamtu Khuanu hnenah a sawi chhuak a.

"Aw, Siamtu ropui ber, Vanchung a chêngte thinlung chuan mahni hmasialna chauh a pai asin, i remruatna hi hriatthiam ava har êm, mihring zawng zawng chungah ni lovin mi pakhat lek chungah ni i sat tîr in ruah i sûr tîr mai dawn emni?'' a ti a.

Siamtu Khuanu chuan, "Aw Mal, Lalruanga chungchang i sawi anih chuan i thusawi chu a dik  alawm, mahsela nunna chu nunna vêk lo chuan rulh theih a ni lo tih i hria a ni lawmni khai." dam tak hian a ti a.

Mitmeng de riai Mal chu a lo ding chhuak leh a, Siamtu Khuanu hnenah," Aw Ropui ber, mahsela dawithiam Zangkaki lakah Lalruanga i boral tîr dawn tihna a ni maw!" a rawn ti leh a.

"Aw Mal, kei ang tho a hrechiang ber tu ini alawm Lalruanga chu, a piantirh ata i enkawl a ni lawmni, ropuina leh malsawmna tam tak kan vûr a, tunah chuan amah khing pha rêng dawithiam an awm lo, a damkhua a sei anih chuan tuna a ropuina leh hmingthanna te hi chu a hming ve lek ala ni dawn chauh asin, a kum a pun rualin a finna leh thiamna, a chakna a zual zel si a." a ti a.

Mahsela Mitmeng de riai pathiannu Mal chuan a ngaithla tawh lo, lei lamah chak takin a thlâwk thla ta daih a.

Hun a lo liam a, Hrangsaipuia fanu te pawh chu an lo nula ve ta a, an hmelṭha dûn hle mai a, a nau aiin Zangkaki chu a la hmelṭha lehzual in an khua mai ni lo, an khaw ṭhenawm tam tak ah pawh a hming a lâr ve hle a.

A nau erawh chuan pasal aneih vat avângin a ani ai chuan alâr lo deuh zâwk âwm e, Zangkaki chuan apa phuba alâk hma loh chuan pasal neih a tum lo bur thung.

A pa boral chhan ber pawh Lalruanga dawi vâng a ni pakhat a, a mawng hliam kha huaisual in a lo upat deuh hnu phei chuan a awngrawp phah hial a, a nunna pawhin a tuar phah ta nghe nghe a ni.

Mahsela Hrangsaipuia erawh kha chuan phuba lâk a remti hauh lo thung a, "pathian te thil rêl dân a ni a, keiin lo tih danglam ka tum ve chauh zâwk a ni." a ti ṭhîn.

An naupan deuh lai a a pa in dawi a zirtir ho te te te chu amahin a rûkin a lo zir belh zêl a, mak tak maiin dawi te chu a thiam chak êm êm a, a lo nulat meuh chuan dawithiam tak, amah han el pha tûr phei chu Lalruanga chauh a ni ange tih hial khawp a lo ni ta a ni.

Lalruanga pawh chu dawithiam nimahsela kum lo in her zêl in a upatna chu a a ti zual ve zêl tho a, mahsela a tlangvâl lai hmel erawh chu ala paih vek lo.

An khua aṭanga hla deuh nimahsela Zangkaki hmelṭhat zia chu Lalruanga'n a lo hriat chuan rîm tûrin a dawi bur ṭha ber nen a thawk chhuak ta a. Mahsela Hrangsaipuia fanu ani tih erawh chu a hre bîk lo.

Tichuan zinkawng thui tak zawhin Zangkaki te khua chu a thleng ta nge nge a, Zangkaki te ṭhenawm lawkah chuan thlengin a in tuaihnum hlarh hlarh a, Zangkaki inah chuan a lêng ta thuai a.

Pathiante rorelna hmun ata a chhuah hnu chuan Mitmeng de riai pathiannu Mal- chuan Lalruanga kal hma a Zangkaki hnen thlen hman chu a tum a.

A tum ang ngeiin Zangkaki inah chuan hmuh theih loh a inlan in Lalruanga a zu thlen khalh a, Siamtu Khuanu ina Zangkaki lak a Lalruanga boral tîr a tum chu a phal ngang lo a, pathiante rorel tawh sa chu tih danglam ngei tumin Zangkaki thinlung ah chuan Lalruanga duhna leh hmangaihna nasa tak mai a dah sak a, a thinurna leh a phuba lâk duhna te erawh chu Khuanu remtihna lo chuan tih reh a ngam bîk lo, mahsela thinurna te ti reh tûrin a beng bulah zawi te te in a hrilh sek sek a.

Zangkaki chuan a lo ti ṭha kher mai, Phuba lâk tum ni mahse Lalruanga hmel a hmuh chuan a tlangval lai hmel ala paih ém êm loh avângin a duh rilru ve hle a.

 Tichuan chumi ni chuan nilengin an inkawm ta a. Zangkaki chuan atân a hun ṭha ani tih hria in chelh zui zel a duh a, phuba la châk rêng rêng a seilian nimahsela Lalruanga hmel a hmuh khân chûng a thinrimna te chu an bo duak mai a, amah pawhin mak a inti kher mai.

A dik tak chuan Lalruanga lakah chuan a tuiral hneh hle mai a, chuvangin a rilru pawh a insual nasa kher asin, an innei anih chuan dawithiam ropui ber ber an ni dawn a, anni tluk tûr leh er pha tûr rêng an awm dawn lo, tichuan an duh duh an ti thei ang a, ropui leh hmingthang takin an damchhung hun an hmang liam anga, fa an nei anih pawhin anni ang bawk a dawithiam an ni ang tih chu.

Tin, phuba ala anih erawh chuan a pa thlarau pawh thlamuang takin a chawlh hahdam theih a beisei tlat thung.

Chung thil te chuan a thinlung chu an luahkhat reng a, rilru a siam fel thei meuh lo. A zân mutna ah thleng thleng chuan a ngaihtuah âwl lo.

 A tukah chuan Lalruanga chu a han lêng leh a, chumi ni phei chuan Lalruanga hmel chu a hmu ṭha leh zual a, a tisa chuan a ngai ngawih ngawih ni berin a hria.

Inleng dang an awm lo bawk a, hlim takin an in kâwm leh ta a, Lalruanga lah chuan hmeichhe cheng a man in amah duh êm êm tu tlanchhiat theih lohna tûr khawp chuan a zei na chitin chu a hmang ta a. Nula hmelṭha Zangkaki chu chhai tlu hneh kher mai.

Chutia an chêtna avânga chauvin Lalruanga chu a muhil zui ta a, muhil tui ta maw tih ah Zangkaki chu Lalruanga bulah chuan ṭhu hnaiin a kut pahnih chu a sír lamah a phar chhuak a, dawihla zawi te te hian a chham a, chutia a chham lai chuan inchhûng khawimaw lai aṭangin meikhu ang deuh khu ruai hi a lo chhuak a, Lalruanga chung zâwn, Zangkaki hma boruakah chuan a vir mup pup a, chutah Zangkaki chuan hmalam a a ban pahnih phar chhuak in a kut a han bêng a, chuveleh Lalruanga lu zâwn ah chuan chu meikhu ang tak chu thlâk thla in Lalruanga chal chu an zu su chawrh a, an darh hak a, boruak ah an thâm ral zui ta a. Zangkaki chuan Lalruanga chu melh in a nui sak a.

Lalruanga chu a rawn harh leh meuh chuan Zangkaki chu amah si chêt hian a lo mu a, a lo nuih seih a, Engnge a mangah a hmuh a lo zâwt nghal a.

Lalruanga chuan ham bai bai pah hian,  “Hmun pakhat ah hian ka lo awm a, chutia ka awm lai chuan chhumpui nasa tak mai hi a lo zîng a, mahse ka lo chhêm kiang duak duak mai.” a ti a. Chu thu a hriat chuan Zangkaki chuan a dawi hneh lo tih a hrethiam nghal mai a, a rilru a hnual rawih a. Mahse a ti lang lêm lo, chumi ni chuan hlim takin an in kawm zui tho a, tlai a lo nih chuan Lalruanga chu a thlenin lamah a haw ta a.

 A tûk ah chuan khawfing chah rualin Lalruanga chu an khaw lamah a haw ta daih a.

Hetia an khaw lam a Lalruanga haw leh hi Mitmeng de riai pathiannu Mal- i'na a rûk a rem a ruatna vek a ni a,  a tum dan chu, Zangkaki thinlung phuba lâk châkna chu hmangaihna a hliahkhuh sak a, Lalruanga lak a a rilru put hmang thlâk a, dam tak a Lalruanga an ina a haw leh chu a ni. Chu a tum dan a tih hlawhtlin avâng chuan hlim takin Lalruanga chu a kalsan ta a.

Mahsela Vanchung pathian chi te chuan chutia Lalruanga lak a Zangkaki a tlawm ta mai chu mak an ti hle mai a, hmanhmawh takin Zangkaki thinglung chu hneh tumin fin phakar an chhuah a, a thinlung an hneh sak leh ta a.

Zangkaki chuan pawi a ti kher mai, a phuba lâk theihna hun ṭha a bawhpelh chu a inthiam thei lo a, Lalruanga nen a an awmdan avângte chuan a pa Hrangsaipuia thlarau lakah chuan a zak êm êm a.

Tichuan a rilru siam felin a pa phuba chu la ngei tûrin a intiam leh ta a.

An hun hman dun kha remchang ah hmangin Lalruanga chu an khua a zin leh tûrin a chah ta a,”I fa ka pai a, nau puak puan kengin lo zin rawh,” tiin. 

Chu thu a hriat chuan Lalruanga chuan rinhlelhna rêng a nei lo, nula hmelṭha Zangkaki chuan a bum a ring pha lo hrim hrim a.

Mitmeng de riai pathiannu Mal leh Vanchung pathian chi te thiltih chu Siamtu Khuanu chuan a lo hmu vek a, tichuan an vai chuan a ko ta a.

An hnenah chuan Khuanu chuan, "Lalruanga leh Zângkaki chungchanga in thiltih te hi ti tawp tawh rawh u le, anni mihring te chuan ngaihtuahna leh finna ropui tak an nei a, anmahni duh dan leh remhriatna in inbei sela, tun aṭang chuan a tu amahin in ṭanpui tawh tûr a ni lo." a ti ta bur mai a.

Tichuan Lalruanga chu ngaihngam takin a dawi bur chhe zawk kengin a zin leh ta vang vang a.

Zangkaki te khua a thlen chuan a thlenna ngai bawk ah thleng leh in a nau puakpuak ken nen chuan a lêng leh nghal thuai a.

 Zangkaki chuan Lalruanga hmel a hmuh chuan a hma ang bawk khân a lo lawm leh a, hlim takin an inkawm leh ta a.

Chhun laiah chuan Lalruanga chu Zangkaki mal a lu nghat in a muhil leh ta a.

A muhil tui ta maw tih chuan Zangkaki chuan dîm te in a mut ṭhat tîr a, Lalruanga lu lam ah chuan dingin a hma ang bawk khân sîr lam a a bân pahnih phar chhuakin dawihla a chham leh ta mial mial a.

A hma ai chuan a chham ring in a aw pawh a vîn lek lek zâwk mai.

Meikhu dum chhah tak tak hi in kil khawi emaw lai aṭang chuan tlem te te a rawn chhuakin Zangkaki hma zâwn boruak, Lalruanga chung zâwn ah chuan an vir leh ta mup mup a, chu meikhu dum chhah tak vir muai muai kârah chuan kawlphe ang tak tak hi an de chuai chuai a, Zangkaki'n a bân a vai rual chuan an in dinleh tup tup zel a.

Rei tâwk fang chutia dawihla a chham hnu chuan hmalam ah a bân pahnih chu phar chhuakin na fê mai hian a kut a bêng ri leh thlawp a, a kut ben rual chuan a thu chham chu a tâwp a, chumi rual chuan Meikhu dum chhah tak chuan Lalruanga taksa pum chu an zu su chawrh a, an darh leh hak a, boruak ah an thâm ral zui leh ta a.

Chumi hnu rei vak lo ah Lalruanga pawh chu a rawn harh ve leh ta a.

A bul a ṭhuthmun rem pahin Zangkaki chuan a mumangah engnge a hmuh tih a zâwt leh a. Lalruanga chuan ngaihṭhat loh hmel deuh hian, zâwi sap in,"  Khawilai emawni, hmun pakhat ah hian ka lo awm a, chutih lai chuan ka kiangah hian chhum an rawn zîng chuai chuai a, mitkhap kâr a'n chung  chhum te chu an lo chhah in min hual tual tual a, han chhêm kian mai ka tum a, mahse a chhah êm avângin ka chhêm kiang thei hauh lo." a ti nuah nuah a.

Chu thu Lalruanga'n a a sawi veleh chuan rang takin Zangkaki chu pawnah a tlan chhuak vat a, kawngkhar zâwnah tak chuan dingin inchhûnga Lalruanga, hrilhhai tak a amah rawn thlîr tu nuihsawh chung hian, “Ka inpui, lungpuiah chang rawh,” a han ti a.

Chuveleh chuan lirnghing ang hian a in chu a in sâwi dawt dawt a, chu a in chu lungpui lian takah a chang zui ta a.

Chutah chuan Lalruanga chuan Zangkaki'n a bum a ni tih a hrethiam ta a, thinrim tak in chu lungpui chhûng chêp tak chu dawi keh tumin dawihla a han chham a, chumi pah chuan a bân chu hmalam ah a han vai fua a, a ban vai veleh chuan chu lungpui chu a khi tuarh a. Mahsela engkim a hma aṭanga lo ruahman lâwk vek tu Zangkaki chuan Lalruanga lungpui tih khîk lai apiang chu dawihla chham chungin khawihnunin a lo châr nghâl zat zat zêl a,

Vawi tam Lalruanga chuan a dawi a, a châng phei chuan mihring leng deuh thaw te in a khi tuarh tuarh a, mahsela a dawi phel thei lo.

A dawi a hman nasat deuh avângin Lalruanga pawh chu a lo chau ve ta telh telh a, Zangkaki'n khawihnun a a lo châr zêl bawk si avâng chuan a beidawng ta hial a, a dawi bûr chhe zâwk a keng chi a inchhîr kher mai.

 Chu lungpui chhûng chêp takah chuan a tâng ta reng a, a ril a lo ṭâm chuan lungpui khi kâr aṭang hian Zangkaki chuan chaw fun a thlâk sak ṭhîn a.

Nitinin chu lungpui chu dawi keh tumin a bei ṭhîn a, mahsela a dawi bur chhe zâwk a ken miau avângin Zangkaki dawi a hneh thei si lo.

Ni tam chu lungpui kâr a a tân hnu phei chuan a mangang chu a rum a rum ṭhîn a, “Ka thi ngei dawn a nih tak hi,” tiin beidawng takin a au chhuak leh ṭhîn a.

 Zangkaki lah chuan,”Thih chauh lo chu beisei suh, thildang engmah beisei tur i nei lo, ka pa Hrangsaipuia lak a i thil tih zia te kha ngaihtuah lêt ang che, a tawrh ang chiah tuarin i thi ve ngei ang,"  a tih san hmak mai a.

Zangkaki thusawi chuan Lalruanga chu a ti harh zawk a, thil thlen dân engkim a han ngaihtuah lêt a, Zangkaki bumin a awm mai mai a ni tih leh, a pa phuba lâk a tum ngei anih hi tih chu a hrechiang ta kher mai.

Chuvangin Zangkaki hnena ngaihdam dîl emaw, a zahngaihna dîl emaw chu thil tih chi loh hul hual a ni tih a hrethiam ta a. 

A beiseina zawng zawng te pawh ina an kian san hnu chuan chau takin chu lungpui hnuaiah chuan a mu bêm a. Chu lungpui tânin thim ruai hnuaih chuan a bul ah chuan engemawni che zauh hi a hmu a, an enchian chuan Chaichim te reuhte hi a lo ni a.

A bul a a rawn kal hnai lai chuan Lalruanga chuan zawite in dawihla a chham zauh a.

Chuveleh chu chaichim te reuhte chu Lalruanga lu bul mai ah chuan a rawn kal hnai a.

"Chîma, i pu a mangang anih hi, kan in ah khân va kal vang vang la, ka nu te khum kiang a tungchaw ah khân a ipte ka bâng a, chu ipte ah chuan ka dawibur ṭha zâwk a awm a, va la ang che, hmanhmawh la, rawn kîr leh vat tum ang che." tiin Chaichim te chu a be ta a.

Chaichim te pawh chuan Lalruanga thusawi hrethiam niawm tak in a sawi chhûng zawng chuan Lalruanga chu a en kar a, a sawi zawh veleh hmanhmawh deuh in lungpui keh kâr ah chuan a pît chhuak ta a.

Chaichim te chu hmanhmawh takin a kal ta nghal vang vang a, ni tam fê a kal hnu chuan Lalruanga te in chu a thleng ta a, tichuan an tungchaw a ipte inkhai ah chuan lût in dawibur ṭha zâwk chu a la a, rang takin a kîr leh ta vang vang a.

Chûng lei lam a thil thleng chu pathian te chuan an lo en reng hlawm a, mahsela a dawibur ṭha ber maiin Lalruanga hnen a thlen leh chuan Zangkaki lak ata a zalen mai ni lovin Lalruanga chuan a tihlum ngei dawn a ni tih chu Zangkaki ṭanpui ṭhîn tu vanchung pathian chi te chuan an hre ve kar a, chuvangin Khuanu in remti dawn lo mahse tiin an in tiam rual a, Chaichim te lo kír leh hma chuan a rûkin an kal vat a, kalkawng a lui tui kang chat chu an lo ti lian nasa mai a.

A kal lam a a lui kân, kâm êm êm kha a kîr leh lam chuan a lo lian sen phût mai si a, a mangang kher mai.

Mahse chûng vanchung pathian chi te thiltih chu mitmeng de riai pathiannu Mal chuan a lo hmu a, Khuanu hnenah chuan, "An thil tih khu en teh, inrawlh tawh lo tûrin i ti a, kei ngei pawh, mahsela i thusawi an ngai pawimawh lo a ni." tih leh lei lam a thlawh thlâk a rual nghal a. Khuanu ina chhân a tum meuh chuan lei ah a lo thleng thla dêr tawh anih chu.

Van chung pathian chi te chu an tam kher mai, a siruk lâ in an beiseina neih chhun chu hman ṭangkai an lo tum nasa mai a.

pathiannu Mal, a thlen rual chuan lo dan tumin ṭhenkhat chuan an lo pan nghal a, mahse rang takin Chaichimte hnenah chuan a kal vat a, a thinlungah remhriatna a dah sak a.

A hmanhmawh tawh nên, a hêl na a han zawng chiam ṭhîn a, mahse a hmu zo hlawl lova. A tâwpah chuan luikam a phaiphêk hnah pakhat chu a chilh chhum rawk rawk a, lui lamah pu thlâ in a chungah chuan a ṭhu a, dawibûr keng chungin a inthai kal ta a. Mahse a sâwt vak lo kher mai.

Rei fe a in thai kal hnu chuan lui lai a va thleng a, tui zang khauh a lo nasa êm kher a, a tâng ta reng a. 

Tui ti lian mek tu vanchung pathian chi ṭhenkhat te a pan lai chuan ṭhenkhat chuan an rawn man bet a, nasa tak a an in beih lai chuan Romei kâr a lêng ṭhin Vansen- chu an kiangah chuan a rawn lang thut a,  Mal- chu rawn ṭanpuiin Vanchung pathian chi te chu an pahnih chuan an bei lêt dûn a, chutia an in beih lai chuan eng emawni hian an in bei lai chu a rawn ti tâwp a. An vai mai chuan ka hau hian chu thil chu an thlîr reng a.

Hrilhhai leh mangang tak a a hawi kual lai chuan dawibur chu a thlauh ta leh ta nghâl a, tui chuan lui mawng lamah a len thla vawn vawn mai a.

Dawi bûr chu ring tak hian, “Ka pu, min chhan rawh, ka pu min chhan rawh," tiin a âu thla vawn vawn a. 

Chaichim chuan ala thei si lo, a theih ang angin a han in thai ṭhîn a, mahse tuifinriat chunga hnahthel lêng ang chauh a ni si. Lungngai takin dawibur chu a thlîr zui vawng vawng a.

Dawibur pawh chu a âu thla zêl a, "Ka pu, hei, ka boral dâwn ta zuk ni le, aw ! ka pu, min chhan rawh," tiin.

Chumi lui mawng lamah chuan Vai lal chhiahhlawh te'n ngawi an lo dawh a. Chutia bûr mak tak mihring anga âu ri thei an hmuh chuan mak an ti hle a, an chhar ta a, eng tak ni maw tiin an han chhu keh a, a keh zawng chuan anmahni chu a per a, dawi an lo thiam phah ve ta a.

Chu an inbei lai ti tawp tu chu Lalruanga dawibur âu ri kha a ni a, an vai mai chuan mak an ti ṭheuh a, chu dawibur lakah chuan Mal- emaw, Vansen- emaw, Vanchung pathian chi te emaw chuan kut an lek lo hrim hrim a, kut lek hman an ni lo, anni chu an in sual buai mêk a ni si a.

Mitmeng de riai pathiannu Mal-chuan Lalruanga beiseina awmchhun a dawibur tuilian ina a lâk mêk chu chhar tumin a chhuak nghal a, mahse, lo chhar in Chaichim hnenah pe sela chuan Chaichim tân chuan thil mak leh hriatthiam phâk loh thil danglam thleng anih dawn mai bâk ah Lalruanga pawh pe sela, chutiang thil tûr tho chu a ni a, lei a mihring khawsak leh thil thlen dân pangngai ni lo a, thil danglam leh mak zâwk thlen tîr chu hun lo kal leh zel tûr atân a buaina tam leh danglam zawk thlenna tûr mai a ni zâwk tih a hria a, chuvangin rilri na tak chungin dawibur mangang tak chu a thlîr liam ta a.

Tin, Lalruanga kha lungpui chhûng chêp tak ah chuan hrehawm ti takin a a awm reng a, a beiseina neih chhun a dawibur lah a lo thleng thei bawk si lo. A tawp ah chuan mangang leh lungngai tak chungin a lo boral ta a ni.

Mitmeng de riai Mal pathiannu chu Siamtu Khuanu hmaah chuan a ding a.

"I remruatna chu tunah hian ka hrethiam ta, Lalruanga dawibur ṭha ber mai kha tumah rengin kha thil thlen lai khân kan ngaihsak lo a, Chaichim te khân a thlauh thei lo hrim hrim tih ka hria a ni, thlauh a hlauh êm avângin a chelh nghet hle a, a chelh mai bâkah a seh bet tel bawk asin, chuvangin i duhdan in thil i thlen tîr a ni." a ti a.

Siamtu Khuanu chuan dam thlap hian," Aw Mal, Lalruanga i lainat avângin i mit a del hial a ni, mihring te chu an dam hun chhûng bithliah sa a lo piang an ni a, thihna hi an tân chuan nunna thar inṭanna bul a ni a, chu chu mihring tam tak ina an hriat loh an nun hahdamna thuruk a ni a sin.

Tichuan Lalruanga chu a lo boral ta a, nun bul aṭan ang a, nun thar in khawvel nuam zawk ah a nung dawn tawh a ni.

Tin, Mal,i hriatthiam loh pakhat chu nunna chu nunna in a tlan angai a, chu chu Lalruanga nun bul ṭanna aṭanga i chhui kîr chuan aman a man a pe ta chiah tih i hrethiam ang.

Tin, a lo ropui zual zel chuan a finna a lo nasa deuh deuh anga, Zangkaki nena an in huat  loh chuan an in nei ngei dawn a, chutiang thil anih avâng chuan an ropuiin an lo hmingthang nasa dawn a, lei mihring zîngah anni tluk tûr leh khing pha tûr an awm hauh lo ang, fa an neih chuan anni ang bawk a dawithiam leh thil tithei an ni leh dawn a, chutiang anih chuan Lei a Lasi leh huai te, tlâng lal te pawhin an ngam lo mai ni lovin anla intlawn siak dawn a, hun a lo kal leh ang a, anni ho chuan puiin pathian dangte pawh anla hlau lo in an bei duh mai dawn a, buaina nasa zâwk ala thleng dawn a ni, a chhan chu thiltihtheihna leh ropuina hian mihringte thinlung ah chapona leh awhna sual lian tak a siam ṭhîn a, chu thil chu ka hmuh tlang vek avânga Lalruanga dawibur kha tui ah ti tla ka ni, a bâk chu i hriat vek tawh kha." a ti ta a.