LALRUANGA & SORCERER HRANGSAIPUIA | The Epic Of Wizard Lalruanga

Ni tam tak a kal hnu chuan Hrangsaipuia te awmna chu Lalruanga chuan a thleng ta a.

Dawithiam tak Hrangsaipuia hi Lalruanga ai chuan a upa deuh zâwk a, len pawh a lian zawk deuh,  khabe hmul sei pui mai leh bawrchhawr ve angreng tak anih avângin alang hlauhawm angreng hle a. Khua ah tak pawh awm lovin, a fanu te nen khaw dai deuh ah, in ṭha leh lianpui neiin an khawsa a, huan ram pawh an nei ṭha kher mai.

An in thlen hma deuh chuan herhse kûng lian tak mai hi a ding luah a, chumi kianga din pah chuan Lalruanga chuan an leikapui a Hrangsaipuia nilum ai chu a thlîr reng a, amah aia dawithiam zâwk leh lâr zâwk, tharum pawh ani aia ngah zâwk daih a ni tih chu a hre reng a, a thinlung ah chuan huphurhna lian tak rawn awm in, engtia han dâwr chi nge ni ang tiin a ngaihtuahna a buai ve kher mai.

Ngai teh, chutih lai chuan Herhse kûng kiang ah chuan Mitmeng de riai pathiannu Mal- chu a rawn lang a, Lalruanga hnunglam ah chuan ding in Hrangsaipuia chu a han thlîr ve rên râwn a.

Mahse Lalruanga chuan a hmu thei lo a, a kiangah a awm tih pawh a hre hauh lo thung.

Rei lo deuh hnu ah mitmeng de riai Mal-  chuan Lalruanga beng bulah kûn hniam in,

" Nang aia dawithiam ni mahsela ani aiin finna i ngah zâwk, ani aiin tharum nei lo zâwk mah la i finna i hman thiam chuan a hneh hauh lo ang che," a han ti a.

Chutih tih lai chuan Lalruanga thinlung chu a in sual nasa kher mai, mahsela Hrangsaipuia a hurphurhna te chu tlêm tlêm in an reh tial tial a, phûrna a nei nasa tawlh  tawlh a. " Fing tak a dâwr angai a ni," ti a phun chung in Hrangsaipuia te inlam pan chuan a chhuak phei ta a.

Herhse kûng kiang aṭang chuan Mitmeng de riai Mal- chuan Lalruanga kal ta chu a thlîr zui reng a,  "Dawithiamna ropui tak pawh finna tel lo chuan engmah lo mai a ni, Khuanu chi pêng Lalruang, i finna hmang thiam ang che," tiin a kiai sak a, mitkhap kâr an a bo zui daih a.

Lalruanga kal ta chuan hmuh theih loh a insiam in fimkhur takin leikapuia  Hrangsaipuia ṭhu chu pêl in inchhûng a luh rual chuan mihring hmuh theihin a inlan nghal vat a. Lalruang a'n a kal pêl tih leh inchhunga a lut tih chu Hrangsaipuia chuan a hre lo hrim hrim.

An in kawngka aṭanga Lalruanga ding an hmuh chuan Hrangsaipuia fanu te chuan, "Ka pa lo lût rawh, hei mikhual kan nei a nia," an ti a, chutih lai chuan Lalruanga chu inchhûngah lût in tapchhak ah chuan a ṭhu a.

Hrangsaipuia chuan pawn aṭangin, " Awihawm loh loh, lo luh lai pawh hmu hawt lo chuan,” tiin a fa te chu a rawn chhâng a, a fa te bawk chuan, " Ka pa, kan tapchhak a hi a ṭhu reng asin, lo lût rawh,” an ti leh a, ani chuan luh pawh la tum chuang lo chuan ,“Khual ṭha nge inih khual chhia?” tiin a rawn au leh a. Lalruanga chuan chiang fek fawk hian, “Khual ṭha," a lo ti vat a.

Tichuan Hrangsaipuia chu inchhungah chuan a lo lût a, An tapchhak a  Lalruanga lo ṭhu rûn a hmuh chuan a seki phîr a la dawn tih a hre nghal a, tichuan an in dawi chu a ni ta nghal mai a.

Hrangsaipuia hi a hma in Van chung pathian chî te'n a seki phîr chu dawithiam tak Lalruanga'n ala rawn la dawn tih an lo hrilhlâwk tawh a, chuvang chuan nasa takin a lo in puahchah a, a seki phîr pawh uluk takin a lo vêng reng tawh sa a ni. A pian tirh ata a seki phîr chu duat namen loh a a duat leh a enkawl bîk a nih avângin pathiante ro rel tawh pawh nisela tih danglam theih dân a awm mial tâkin a lo ti tawh a.

Lalruanga kiang, an tapchhak ah chuan Hrangsaipuia chuan ṭhuthmun a rawn rem ve a, Lalruanga pawh en chuang lo, an thuk a meialh thlîr reng chung chuan dawi hla a han chham a, “Thur be bû tlang aṭangin i lo kal a, ka tapchhakah i lo tlṭhu thur be bû a ni maw?” a ti a. Lalruanga pawh chuan rang takin, “Pial thîn thên tlang aṭangin ka lo kal a. I tapchhakah ka lo ṭhu pial thîn thên a nih hi,” a lo ti a, Hrangsaipuia bawk chuan,“Hreu bem bum tlang aṭangin i lo kal a, ka tapchhakah i lo ṭhu hreu bem bum a ni maw?” a ti leh a, Lalruanga chuan,“Mam thîn thên tlang aṭangin ka lo kal a, i tapchhak ah ka lo ṭhu mam thîn thên a nih hi,” tiin a lo chhâng fel leh thlap mai a, chutia dawi hla an chham lai chuan thuk a an mei tuah chu nasa takin a alh leh hluah mai ṭhîn a.

Chutiang chuan han in dawi tawn mahsela mimal a inhuatna hran êm êm an neih miau loh avângin Hrangsaipuia pawh chuan sual a chhuah bîk hran lo, Lalruanga mutna tûr pawhin a fanu te hnenah pawnpui ṭha tak pe tûrin a ti a, chumi zân chuan tui takin Lalruanga pawh a mut theih phah hial a ni.

A tûk zîngah chuan hma takah Hrangsaipuia fanu te chu thovin ei an rêl a, chumi hnu chuan buh dêng tûrin pawnlamah an chhuak ta a.

Hrangsaipuia pawh chu Lalruanga thawh hma a thovin an pahnih tûkṭhuan a siam mawlh mawlh a, Hrangsaipuia chuan Lalruanga chaw tûr ah chuan dawi a phul ru a, chutih lai chuan Lalruanga pawh muangchangin a rawn tho ve mêk a.

Chaw an han ei dâwn a, Lalruanga chuan Hrangsaipuia thiltih chu a rûk in a lo hre kiau a, a hma a chaw chu chhuanlam eng emaw siamin a ei duh lawk lo a,  Hrangsaipuia lah chuan a ei hun chu a rûkin a nghâk ve kiau bawk si.

Tichuan Lalruanga chuan Hrangsaipuia fanu te zing buhdeng chu a han dawi a, a inhauh tir a, an inti thinrimin an insual a, suk te chu an tiri bur bur mai a. Mahse Hrangsaipuia chuan Lalruanga'n a dawi tih a hria a, a tlanchhuak duh hauh lo va. 

Chuvang chuan Lalruanga chuan thil dang a han dawi leh ta zâwk a.

 Hrangsaipuia vawkpa lian chu pal âwngah a tân tîr a, a thi dawn emaw tih khawpin a ngêk ta chiam chiam mai a. Chu veleh Hrangsaipuia chu leh pawh ti hman lêk lovin a tlanchhuak vut a, chutia a tlanchhuah veleh chuan Lalruanga chuan a hma zâwn a chaw thlêng chu a her vat a, chaw chu a ei ta mial mial a.

 Hrangsaipuia chu a lo lût leh a, Lalruanga hma a a dawi phul chu aman a ei ta zâwk a.

 An chaw ei kham chuan Lalruanga chuan seki phir chu lâk a tum ta a, Hrangsaipuia chuan a ui êm êm mai a. 

“Arpui, kha i ṭhian a lak dawn kha, lim hrep rawh,” tiin a arpui no hruai lai chu an dawi a, Lalruanga lah chuan, “Màwia, arpui, mahni dawi sa ei pa kha lim zâwk rawh,” a lo ti lêt a, Arpui chuan  Hrangsaipuia chu a lim ta zêk a. 

A tlân chhiat pahin a kêl pachal hnenah, “Kela, kha in ṭhian a lak dawn kha, tauh nghek rawh,” a han ti leh a, Lalruanga chuan, “Màwia, Kela, mahni dawi sa ei pa kha tauh zâwk rawh,” a ti leh a, Kel lah chuan a sawi zawh rual rual chuan a pû, Hrangsaipuia chu a si leh ta hrep a.

Hrangsaipuia chuan mak a ti kher mai, dawi ah a hneh lo chu mak a inti hial zâwk a, a seki phir Lalruang a'n a kai a, a kal pui ta mai chu ui êm êm in a fanu te nen chuan an thlîr ṭhap a.

Chutah inchhung lamah tlân lût in chaw a fûn sawk sawk a, Lalruanga te chu a ûm zui leh ta a.

An pathum chuan an in zui ta ṭhâm ṭham a, Lalruanga leh Hrangsaipuia chu an in be hauh lo.

Chhûn lai vêl ah chuan lui lian vak lo hi an zu thleng a, chaw an han fâk dâwn a; Hrangsaipuia chuan lungpui chungah ṭhû in a chaw fûn a phelh mawlh mawlh a.

Lalruanga erawh chuan chuan kawnglai ah sakhi phaw a phah a, chumi chungah chuan ṭhû in chaw a fâk ve thung a.

Chutia chaw an fâk lai chuan Lalruanga chuan  Hrangsaipuia mawng leh a ṭhutna lungpui chu a dawi belhbawm ta tlat a, Hrangsaipuia pawh chuan sakhi phaw leh Lalruanga mawng chu a dawi belhbawm ve nghâl a.

 Hrangsaipuia chuan ti fuh inti takin, “Ti khân le, i mawng leh sakhi phaw kha a inbelhbawm tlat ang a, tho thei lovin tikhân rilṭâm in i thi mai dawn a ni,” tiin Lalruanga chu a han sawi ṭhaih a.

 Lalruanga chuan, “Engah nge ka thawh theih loh vang, ka hlep ang a, ka kal daih mai dawn a ni. Nang chu tikhân i ṭhu reng ang a, tui a lo lian ang a, a rawn hrut che a nga, i tho thei dawn si lo va, i ril te a lo ṭam ang a, tlan mbo te i tum ang a, i tlanbo thei âwm si lo a, thih chauh lo chu hmabâk engmah i nei hleinem, Kei chuan ka duh duhin ka kalpui thei awm si a," a ti a.

 Chutia Lalruanga’n a sawi meuh chuan Hrangsaipuia chu a thlaphâng hle mai a, a han in ngaihtuah ṭhîn a, a tawp a tawp ah chuan, “Lalruang, kan dawi te i sût leh ang hmiang,” a ti leh ta nge nge a.

 Lalruanga chuan “Aw le, mahse min han sût hmasa la." a ti a, rei lo tê ah Hrangsaipuia chuan a sût zo vek a, "Min han sût ve rawh le," a ti a. Lalruanga chuan a han sût ve leh ta a, mahsela a sût zawh hma in," Ka zo e, tho rawh le, " a han tu a, Hrangsaipuia lah chu a dawi leh ang tih hlauh vin a han tho vut a, mahse a lo la sût zo chiah si lo, Hrangsaipuia mawng tam vun chu a hêk ta hlawk mai a. Hrangsaipuia chu a ṭê ṭhawt a, a mawng chu a thi nghal zawih zawih a, kal pawh a kal hlei thei lo.

Mahse Lalruanga chuan a lainat leh ta deuh a, a thi rehna damdawi te siam sakin seki phîr nen chuan an kal san ta a.

A lo intiam tawh ang ngeiin seki phir chu Keichala te khua a pan pui vang vang a, a han thlen chuan Keimi ho chuan a khaw nâwt in an lo thlîr ṭhap a, tumah rêngin an ti buai ngam lo.

An fapa tihlum tu nimahsela Keichala nu leh pa te chuan an lo ti ṭha tho a, mal leh mal in beihna anih avâng leh an in do chhan zawng zawng Keichal a'n a nu leh pa te a lo hrilh tawh avâng te, a lo thi anih pawh a Lalruang a'n Hrangsaipuia seki phir a a rawn la aih dawn thu te.

Tichuan Lalruanga chuan  a ṭhian Keichala chu Hrangsaipuia seki phir chuan ropui takin a ai ta dur dur a.

Chumi hnu chuan an khaw lam ah a haw leh ta a.

Hrangsaipuia erawh

kha chu hliam chungin lui kam ah Lalruanga te khân an kalsan ta kha a ni a.

Bai suih suih chungin muangchangin an in a thleng thei ṭâwk a, a fanu te chuan rang takin an lo enkawl thuai thuai a, a mawng vun hêk huam leh a seki phir ui êm êm a hloh avâng chuan a lungngai êm êm reng a.

He a pa thil tawn hi a fanu upa zawk Zangkaki chuan a tuarpuiin phuba lâk ngei tumin a intiam ta hial a.