ROMINA

Tlai lam ni tla tûr thlîr in chu tlâng theng thaw nuam tak maiah chuan nula pakhat leh tlangval pakhat hi an kal dûn a. 

Chu tlâng sâng tak mai a lungpui tolawt lian leh phêk thlur maiah chuan in ngaih hmel tak hian an ṭhu dûn a, a mipa zawk chuan chemte tereuhte kengin ti ti siam siam pah hian thing ṭang ro a suih malh malh a. 

Chutia an ṭhut reng hnu chuan hmeichhia zawk chuan mipa chemte ken lai chu laksak in chu lungpui ah chuan a hming a ker neuh neuh a.

Rei pawh a ni lo, chutia an ti ti chu eng emaw thu vânga in bak kaih in an in hnial zui a, zawi te te a inhnial chu rei lo te ah an aw rawl pawh a lo ring sâwt in mipa zâwk chuan kut hial a thlâk ta a, hmeichhia lah chu a tlâwm duh bik lo, Hindi leh Mizo ṭawng a râk pawlh nuaih in a chemte ken lai chuan a mipa zâwk chu vih tum in a vai fua fua a, mahsela mipa chuan lo dangin a man bet lawk a, chu an awmna lungpui ah chuan a lu a tauh tîr ta chawrh chawrh mai a, chu nu chal aṭang chuan thisen a rawn chhuak zawih zawih a, mahsela a la duhtawk mai lo, chu pa chuan hmeichhia chu ṭhut bet in a theih pa tawp in a nghawngah a rêk ta vak mai a, rei lo te ah hmeichhia chu a rêk hlum ta a.

Chutia a reh hlum hnu chuan a hawi kual vel a, mahsela tumah mihring a hmuh loh avângin leh tuman an hmu lo tih a hriat chuan chu a rehhlum nu ruang ke ah chuan hnûkin khâm sâng tak maiah chuan a theh thla ta a.

***********************************************************************************************************

KUM SAWM HNU AH CHUAN :

Chu khâm sâng tak mai leh bir thla vut maiah chuan anni pathum chu an uai thla mêk a, nuam an tiin nula pahnih te chu  an khêk tuarh tuarh a, a uaithla hmasa ber Zodina- pawh chuan a phone phawrh in thla a la kual ve nasa hle mai.

An uai thlâkna lai khâm feet sang thum (3000) vel lai a sâng chu mual leh mual inkar mual hniam lai ah a in khawh lût a, thingkûng chu sawi loh, hnim lian deuh ṭo pawh awm lovin khâm pang zawng zawng ah chuan lung to lawt lian tak tak a awm thluah a, tlâng hmawr aṭanga thlîr thlâk phei chuan a rapawm lek lek zawk hial a ni.

Hlim leh fimkhur tak a an uai thlâk lai chuan an ṭhianpa pakhat uai thlâk ve tum a inbuatsaih lai mek chu a rawn hlawm thla tawp a, hmeichhe uai thla hnuhnung zâwk chu rawn delhin, tlâng chung a a inthlunna hrui in bât tâng chu a pît thla zui ve nghal a.

Hlau thlabâr a khâm pang a a tawlh thlâk zur zur lai chuan a ṭhiannu chuan a hrui pît chu a rawn man hlauh a. Vanneih a siamin a tla tlang lo hlauh.

Mahsela tlang hmawr aṭanga rawn tla pa erawh kha chu hrui a ala in suih ve hman loh avângin khâm ah chuan a in sawh thla zui zêl a, a hnuai ber a awm, mipa uai thla mêk chuan amah a rawn delh dâwn ngei a a hriat avângin a theih ang ang a lo in thên sawn a tum viau nâ in a hman ta bîk lo.

Chu kham a rawn lum thla pa chuan a rawn delh lêng lawp a, hrui erawh chu a chat lo hlauh. Mahsela a rawn delh lên lawp avângin a in thên nawlh a, khâm pang a lung tolawt ah chuan na mangkhêngin a tukkhum a va tauh chawrh a, chu hrui sei tak ah chuan a uai zawi ta hnawk a, a kâ leh hnâr aṭanga thisen rawn chhuak chu chu khâm sâng tak mai ah chuan a fâr thla zawih zawih a.

Chûng ṭhian ho pali te chuan phûr takin an puan in (Tent) chu kai pharh in muang mar in an bungrua te chu an rem fel a, mipa pahnih leh hmeichhe pahnin niin Angels Adventure Club- member vek an ni a, Lalrinhlua, Malsawmtluangi, Esther Lalrinsangi leh Zodinpuia te an ni.

An kalna hmun hi Durtlang North a Icfai University Far hmun chhak lawk a a vêng neitute'n 'Hming ziak tlâng'- an tih ah a ni a.

Helai hmun Durtlang ram chhungah chuan a hmun sâng lai leh tlâng ti a an sawi ve ṭhin niin a tlâng inkhawh thla tawn tirh chu Maenga Tlâng tiin an sawi a, mimal ram niin a tlâng mual tawp lam erawh Icfai University Mizoram- ram a ni thung a, Maenga tlâng leh Far hmun in a kâr cheh a ni.

Tin, a tlâng zâwl thlen hma deuh hian Mizoram Social Welfare- in ram zau tak neiin Special Home- an dah bawk a, he Special Home chhak lawk mai chu tlâng zâwl a ni nâ in a hmun a reh a, a thengthaw in a tlâng ko lam chu a bir vut thung.

Chumi tlâng ko hnuai lam chu ramhnuai a ni tawh a, tin, zîng ni chhuak leh tla lam a hmuh theih ve ve mai bâk ah ṭhal lai tih loh ah chuan Lengpui Airport pawh chiang takin hmuh theih bawk a ni.

Ruah a sûr lo nâ in van boruak ah chuan chhûm a tam angreng khawp a, boruak a thiangin nula pahnih te chuan an phone keng kualin thlâ an la sek a.

Tlai lam dâr hnih a ni a, zan riah tum a feh chhuak an nih avângin an in keng bâwr angreng khawp a, an tlâng lawnna hmanrua mai bâkah bungbel leh gas stove lian vak lo an pai tel bawk a.

Mipa pahnih ina an puanin kaih chhûng a an bungrua an lâk luh a, an rem fel mêk lai chuan an nula pahnih te thla la zo pawh chu hlim takin an rawn nui lût hawk hawk a.

" A nuam hle mai, tlâng a rawn lêng vâk pawh an awm lo a," a bialpa Zodinpuia( Zodin-a) nêk tâlh a ṭhut pah hian Esther-i chuan a ti a, chutih lai chuan a ṭhiannu Malsawmtluangi( Mal-i) pawh chu Lalrinhlua(Rinrina) chuan   pawt ṭhu in an in pawm chial a.

" Lêng vâk an awm loh chuan a nuam daih zâwk dawn anih chu," Zodina- chuan a ti a.

Chutah Mali- chuan," Kei chu naktuk a uai thlâk hma in zanin tlaiah ah hian lo uai lawk chhin ka châk khawp mai, a nuam dawn nge dawn lo tih te pawh hriat a chakawm alawm le, tiraw Esther." tiin a ṭhiannu chu a'n melh a.

Esther-i pawh chuan Zodina kuah chung hian,"  Ni e, keipawh test ka châk, tawi te tal," tiin Zodina hmuiah chuan a'n fâwp zauh a.

" In peih a thu a ni mai alawm, nilawmni Zodin, kan nula hmelṭha te châk zâwng tih puitlin theih loh hi a nilawm ni kan hlauh," tiin a pawm lai mêk Mali- hnu te chu a kawr chhan ah ân ṭhâm vak a.

Mali chuan, "Zak lo si maw," tih leh Rinrina- âwm a a kiu a nghawk a rual a, nui huah huah chungin Rinrina chu a tho ṭuah ṭuah a, "In siam ila a ni mai lawm," a ti zui zat a.

Tichuan hlim takin an vai chuan an in siam ta sang sang a, Nula pahnih chuan tâwnzau tight tak mai, an hnute ti lang kawh lah mai leh Hiking Pants- taksa rem zaih mai leh tight angreng tak an han hâk meuh chuan an mipa te chilthli a far lo chauh mai.

Tlang lawnna bungrua te chu mipa pahnih chuan bawr takin an keng chhuak a, uai thlâkna lai tûr an zawn fê hnu chuan lungpui hmun rem tak mai, 'Hming ziak tlâng' an tihna lai aṭang chuan uai thla tûrin an in puahchah ta a.

(Helai hming ziakna tlâng an tihna chhan chu lungpui phêk lian tak mai  hi tlâng hmâwr ah a awm  a, chu lungpui ah chuan chulai tlâng a lêng vâk te'n hming an ziak ṭhîn a, chu chu a ni a hming lo chhuahna chu.)

Tin, Chulai hming ziahna lung chu tlâng hmâwr bâwk a awm a ni a, a hnuaiah chuan mihring sâwm vel leng tûr ṭhutna hi lungpui khuar a awm leh a, chu lung chu khâm lamah a lawr chhuak vûn mai bawk a ni.

****************************************************************************************************************

Hmeichhe pahnih te chu an ṭe tuarh tuarh a, mitkhap kâr lek chhûng a  thil thleng chu an tân chuan tawrh thiam a har rêng a ni.

Hmeichhe pakhat zâwk, a uai thla hmasa zâwk Mali- chuan a ṭhiannu Esther-i uaina hrui chu a kut pahnih a vuan in a theihpatawpin a pawt ṭâng ṭang a, mahsela chutiang chuan rei a thei dawn lo tih a hriatin a theih ang angin a rilru a ti fîm lui a, mahsela a taksa khûr erawh chu a reh mai thei bîk lo.

Esther-i lah chu a hnuaiah a inkhai thên nawlh nawlh a, lungchhe vankaiin a ṭap hawm hawm reng a. Mali- chuan a theih tâwp tâwp a ringin a au a, mahsela thli a thâwt nasa êm avângin leh a aw a thangkhawk nasat avângin Estheri- chuan a au ri chu a hre mai thei bîk lo.

Tichuan Mali- chuan a ṭhiannu uaina hrui chu a theih ang angin ama uaina hrui, a in bah tânna ah chuan a suih zawm a, amah chuan a uaina hrui chu a ti hniam zui ve nghal a.

An ṭhianpa lu thî zawih zawih inkhai zawi reng chu ala thih a rin loh avângin a ko tuar tuar a, a hrui chu a ti hniam ta zêl a.

Chutia a hrui a ti hniam zêl chu Esther-i lah chuan mak a tiin Mali- chu a rawn au a, mahsela  ani erawh chuan an ṭhianpa Zodina- buaipui angaih thu in a lo chhâng a.

Thisen ina a bual nuaih Zodina kiang a thlen chuan thli a thaw nasa in van boruak ah chuan chhûm a in din leh tup tup reng a. Zodina- uai na hrui chu man in amah Zodina chu sawi nawk nawk pahin a ko vak vak a.

Chutianga a koh vak vak hnu chuan Zodina chu a rawn che ṭalh ṭalh a, mahsela ala meng chuang lo. Chu ringawt pawh chu Mali- lawm tâwk a tling êm êm a, a hnuaia Esther-i uai mek chu Zodina- la dam thu hrilh in a au leh nghek a, chumi hnu chuan Zodina sawi nawk nawk chung hian,

" Zodin, Zodin, thi suh, thi suh." a ti mawlh mawlh a.

Zodina kawng a a inthlun behna chu chelhin a uaina hrui chu a phelh zel a, chumi rual chuan ama uaina hrui pawh chu a phelh ve zêl a. Chutia tih pah chuan aw khûr bauh bauh hian Zodina- chu a ko mawlh mawlh reng a.

Khâm pang hrûl zêl a uai thla in dar kar khat vel a ral hnu chuan meter za leh sawmnga(150) vel lai an uai thla tawh a. Han uai chhoh leh mai chu an tân tih rual anih loh avângin khâm hnuai tlêm a hmun awih lo deuh lai a in siamrem tum chuan an uai thla ta zêl a.

Rei vak lo ah chuan tlem a hmun awih lo deuh an lo hnaih ta deuh a, an hrui chuan khâm mawng a thlen zo dawn chuan loh avângin Mali- chuan Esther-i chu a au a, a uaina hrui chu phelh a  hmun zâwl deuh lai a lo in ham tâng tûrin a hrilh ta ngawt a.

Esther-i pawh chuan chiai leh khur zawih zawih chungin, thuawih takin hmun awih lo deuh a thlen chuan a lo in ham tâng zui ve nghal bawk a.

Chutih lai chuan ruah mal lian pui pui a tla fup fup tawh a, Mali- pawh chu a hmanhmawh tawh kher mai. A ṭhiannu au chung zêl in a rawn in nghat ve ta a, Zodina chu Esther-i chuan lo chelhin an theih ang ang chuan lei châr ah an mut ta a.

An inthlunna pawh chu Mali- chuan phelh in Zodina pawh chu a phelh sak ve nghal a, Esther-i chuan mittui tla zawih zawih chungin Zodina- hmai a thisen te chu hrûk sak in a ko mawlh mawlh reng a, Mali- pawh chu a lung a chhia in a hmangaih ber mai tlâkna lam chu a thlîr vawng vawng a.

Khua lah chu a thim ruai tawh mai si a, ruah lah a tam telh telh bawk si, an uai thlâkna tlâng hmâwr lam Mali chuan a'n thlîr a, rapthlak tak mai hian a thim chho ruâi a. An kiang velah lah chuan mihring hnuhma rêng rêng hmuh tûr awm lovin ramhnuai pilril tak mai hi a ang êm êm mai lehnghal.

"Ni lo, ni lo, ka duh thei lo..." ti a  Esther-i ṭap ri chuan Mal-i chu a ti phu dâwrh a, rang takin an lamah chuan a tawlh hnai a, Zodina chu a boral a ni tih a hrethiam mai, a âwm ah chuan Esther-i bawkin a lo ṭap hawm hawm a.

Beidawng takin a rûm nghut a, a ṭhiannu Esther-i chu kuahin a ṭap zui veleh ta.

Ruah chu a sûr tam telh telh a, kawl a phe nasa in an kiang lawk lawk ah chuan ṭêk a tla ri chuaih chuaih a, Chutih lai chuan an awmna chhak lam pang aṭang chuan thil engemaw ni hi a rawn ri thla hum hum a, hawi pawh an hawi chhuak hman lo. Ruah sûr nasa tak avâng chuan an awmna chhak lam lei a rawn tawlh chu niin, mahsela tam erawh a ni lo hlauh a.

An awmna chu hmun zâwl tak anih loh avângin chu lei tawlh chuan an vai mai chuan an hnuai lam khâmah chuan a hnâwl thla ta vek a, thui erawh a ni lo nâ in an chauh tawh êm avângin chirh kawi tak zîngah chuan rei fe chhûng chu che chang lo hian an let reng a.

Ruahsûr nasa avâng chuan chirh erawh chu an kai mang lo, mu zangthal chung hian Mali- chuan a ṭhiannu chu a ko mawlh mawlh a, a thlang lawk a rawn chhâwn in, thei leh thei lo hian Esther-i chu a rawn vâk chho a, a ṭhiannu kiang a thlen chuan chau tak hian a bawk leh thlawp a.

Rei vak lo hnuah Mali- pawh chu muangchangin a rawn tho chhuak a, a ṭhiannu Esther-i chu a ko mawlh mawlh a. Esther-i lah chu a lo rûm deuh nghut nghut ringawt a.

Mahsela a sâwi nasa êm avâng chuan a rawn ṭhu chhuak ṭawih ṭawih a, chuti chung pawh a ala koh mawlh mawlh reng avâng chuan mak ti deuh hian Mali- chu a en hû a, Mali- chuan an sîr piah lam chu mit pawh khap lo hian a lo thlîr reng a.

"Enge ni," ti a a zawh lai chuan Mali- chuan a mit la sawn chuang lo hian, "En teh.." a ti ringawt a.

Mali- hawina lam a thlîr phei ve chuan mak a tih hmel kher mai, a bialpa Zodina chu an piah deuh hlam sawmhnih velah a hla ah hian, khâm pang awih lo lai hnim zîng ah lehlam hawi hian a lo ṭhu reng mai chu niin, a hmai chu a kut hian a lo khawih mawlh mawlh tih pawh chu an hmu a, mahsela khua a thim chian tawh avângin chiang tak chuan an hmu thei lo.

Zâwi sap hian a hming chu Esther-i chuan alam mawlh mawlh a, ṭap deuh pûr chung hian a lamah chuan a bawk vâk phei a.

Mahsela Mali- chuan a lo  man bet vat a, " Thil eng emaw dik lo a awm a ni, lo kal rawh hnuai lamah i chhuk zâwk ang." a tih pawh chuan engin nge maw ni mawlh ni, a ṭang ṭûng a, mittui tla zawih zawih in a hming chuan a ko mawlh mawlh reng a.

Tichuan chu khâm pang pêr ah chuan muangchangin an in kaihkuah phei a, lum mai a hlauhawm avângin hnim buk tawi te te chu an vuan phei zêl a.

Pên sâwm emaw vêl a an hnaih tawh tih chuan Esther-i chuan a theih tâwp a ring hian a ko ta vak vak a. Ruah sûr rî nen a aw ri chu hriat pawh a har khawp mai.

Mahsela an ṭhianpa Zodina- lehlam hawi a ṭhû chu muangchang hian a rawn lehhawi a, a taksa pum erawh chuan a ni lo, a lu chauh chu hnunglamah a rawn in her anih chu.(!)

A hmai vun chu a kut chuan a lo hîk mawlh mawlh a, a mitmeng pual  vû chuan anni ṭhian dun chu chiang tak hian a rawn melh a, râpthlâk tak hian a rawn nui ri ta huah huah mai a.

Anni ṭhian dun hlau leh phu chiang lutuk chu an ṭê tuar a, an lêng dâwrh a, an thlang lam khâm ah chuan an lum thla ta vawn vawn mai a.

Chutia an lum lai te chuan ala rawn nui ri uar uar a, thui fe an lum hnu chuan Mal- chu a ri dawt a, a ṭe nghal ṭhawt a.

Estheri erawh chu a chhak deuh a hnim buk ah eng ti ti in emaw a in ham tâng thung a. Khâm mawng lam an lum thleng hial a, mahsela a khâm mawng lam erawh chu râl aṭang a thlîr ang ngawt erawh chu a lo ni lo, chu lo ah an lum lai khan ngîl tak a lum lovin an in sawh sawn kual ve nasa hle mai a, chuvang chuan a tîr a an uai thlâkna aṭanga teh a dinglam meter sawmthum(30) emaw vêl laiah an awm tawh thung.

Chutia an khâm mawng lam an lum thlen chuan ruah pawh a hân titih tawh in tlêm tlêm ala tla ser ser a, mahsela khawpui erawh a la ri nasa kher mai.

Mali- chu 'Vang'- kûng lian tak hian a lo dang a, mahsela a ngal tak hian chu thingkûng chu a tauh chawrh a, a ngal ruh pawh a tliah phah ta a ni.

Mali- na ti chu a ṭe tuar a,  ṭap chung hian Esther-i chu a ko nghek nghek a, ani Esther-i pawh chu thei leh thei lo hian hnim buk a in pawt khalh chung hian a rawn mawngtawlh thla ve mêk bawk a, ani pawh a ṭap deuh pûr tho mai.

Rûm ṭâwk ṭâwk chung hian Esther-i chuan Mali zangthal a let reng chu a rawn kaitho a, a bul a Thingkung nghêng chuan a ṭhut tîr a.

"A tliak in ka hria," tih pahin a ngal chu a dawm vawng vawng a, rûm khûr hlawk hlawk pah hian Esther-i chuan Mali- kekawr khûp ṭet lai chu a pawh thlêr sak a.

"Eng thil nge kan tawn tâk le, kei chu ka hlau, ka duh lo, ka duh thei lo, Zodina- kha...." tiin a'n ṭap leh rih a.

Mali- chuan chau tak a thâw hrâwk hrâwk chungin," Ka hria, mahse awmzia a awm lo, kan intih pachan angai." a lo ti ve bawk a. A kekawr ṭet chu Esther-i chuan pawt ṭet in a khûp chin chu a pawt thla a, chutah a hâ in a seh thlêr belh leh a. " Ni e, helai hmun hi kan chhuahsan angai, chhuahsan vat vat ka duh, ka hlau, ka duh lo." zawi te hian Esther-i chuan a ti mawlh mawlh a.

Mali- ngal ruh tliak chuan a tisa rawn tâwn tlangin a ruh chu tlêm a rawn lawr chhuak a. Chu chu Esther-i'na a hmuh chuan," A ruh hi ka nem lût anga, ka tuam dawn aw, mahse a na dawn nia," a ti a.

"Hmawlh a awm em, thing ṭang in cher rawh," a kut pahnih a a lu dawm chung hian Mali- chuan a lo ti a. Esther-i pawh chuan a kiang vel chu thim tham ah chuan a dap ruk ruk a, thing ṭang ro pakhat rawn lekin a ulh tliak hmawk hmawk a, chu chu Mali- ngal ah vuan bet in a tuam hnan ta a. " A na dawn nia, i ke hi thluang la aw," ṭap pûr chung hian a ti zui a.

Mali'n - a ke a thluan hnu in Esther-i chuan kekawr  them chuan tuamin a ruh chu a hmet lût a, nghet takin a tuam ta malh malh a. Mali- na ti lutuk chu ring tak hian a ṭê tuar a, a ṭap zui nghal hawm hawm a.

"I kal thei angem," Esther-i'na a tih chuan Mali- chuan," Min lo kuah ding la, mahse tiang emaw hawl tûr ka duh." a lo ti a.

Chu veleh thim tham ah Esther-i chuan thing ṭang hawl tûr zawngin an kiang vêl chu a dap leh te te a, chutih lai chuan an chhak lawk ah chuan thâwm arawn awm a.

Bâwng thaw ri sûk sûk ang hi thim zîngah chuan ring angreng tak hian a rawn ri sûk sûk a, Esther-i hlau lutuk chu a per dâwrh a, a hmul thî a ding sung mai lehnghal.

A thing zâr ro chhar chu hmanhmawh taka Mali- kut a hmehbel in a kuah ding a. " Saw lam kan ding lam zêl ah sawn thlam a awmin ka hria, mahse a chho deuh hlek mai thei, vawiin a thla kan lâk lai khân ka mu in ka hria," Mali chuan a ti a.

Chutih lai chuan an chhak lawk aṭang chuan patling nui ri huah huah thâwm hi a rawn chhuak leh a, chu aw râwl chu a rapthlak ngei mai. Tichuan hmanhmawh tak a in kaihkuahin Mali- sawina lam pan chuan an kal ta a.

An kalna lai hi khâm hnuai nimahsela awih vak erawh a ni tawh lo a, an tlâk thlâkna mual sîr mual dang nen a a inkarah chuan kawr lian vak lo a awm a, chumi lam pan chuan an hnim zîngah an in pal phei bawrh bawrh a, zâwl tak anih loh avângin a chângin an tawlh thlu a, Mali- ke nat vângin vawi tam an châwl leh rih ṭhîn bawk a.

Rei fe chutia tlûk leh din fâwm a an kal hnu chuan mual in rî na kawr tê pawh an thleng ve ta, mahsela a hma lawk a ruah a sûr nasat êm avângin kawr ah chuan tui a lo tam nasa mai a, a ri a bengchhengin hmun leh hmunah pawh in auh lâwng lâwng loh chuan ṭawngri a inhriat tawn theih loh hial mai.

Chu kawr bulah chuan beidawng takin an han ṭhu châwl a, mahsela tihngaihna dang a awm ngang si loh avângin chu kawr tui khawh ri buan buan dai phei tûr chuan an in buatsaih leh ta, Esher-i chuan Mali- chu kai thovin a kuah a, kawr tui an dai dawn chiah tih chuan rim thâng deuh nghur hi a rawn awm a, an ngaih a ṭhat loh avângin an hnunglam an han hawi lêt a.

An ṭhianpa khâm aṭanga rawn tla thla Rinrina- ngei mai kha khabe bal uai deuh pûr hian an hnung chiah ah chuan a lo ding reng chu niin.

A lu chu thisen in a bual nuaih a, a kawr lah chu a thlêr nasa in a pilh nuau mai bawk a, a khabe uai pûr mai aṭang chuan thisen a rawn far thla zawih zawih mai bawk a.

Mahsela a thim êm avângin chiang tak chuan an hmu thei lo, chutia an hmu thut chu an ṭê dûn tuar a, an hlau lutuk chu an per dâwrh a, kawr tui inkhawhri hum hum ah chuan an per lût dûn ta râwih a.

Mahsela kawr chu a len loh êm avângin a tui inkhawh chak mahsela thui tak chu a lên lo, feet sawmthum (30) vel chu tui chuan a lên nâ in kawr pâwn lamah chuan an in vawrh chhuak leh thuai a.

Mali- kawng chin hnuailam chu kawr chhûnglamah la in chiah a, kawr kotlang a hnim chu pawtin a ṭhiannu chu a au vak vak a.

Esther-i erawh chu a chhak deuh ah tui chuan a vawrh chhuak thung a, a ṭhiannu au chung zel chuan a rawn tlu thla rawk rawk a, Mali- bul a thlen chuan a kut pahnih ah vuan in ṭap chungin a hnûk chhuak a, Mali- chu a chau zual ngei mai, lung a a insawhna lamah a chal chu nasa vak lo hian a kak a, chuta ṭang chuan thisen a rawn hnâm chhuak ṭiam ṭiam a. Esther-i chuan sâwi nawk nawkin a hming chuan a ko mawlh mawlh a, dîm tak a kaihkuah in a kai tho a,  Terrace- hlui niawm tak lam pan chuan muangchang hian an tlu chho leh ta nawk nawk a.

An hnungah chuan thâwm a awm reng a, a chângin an sîr lawk lawk ah te chuan hmeichhe phun ri sep sep te hi a awm leh ṭhîn a, an theih ang tâwk chuan an kal chak ve nâ in ankal sâwt lo angreng kher mai, an kal chhûng chuan rim thâng deuh huam huam hian an vêl chu a luahkhat vek emaw tih mai tûr hian a nam reng a.

Hah leh thaw hri hrâwk hrâwk chunga an kal lai chuan an hnunglam hla vak lo aṭang hian Mali- chu ring tak mai hian an rawn ko a, chu aw chu Rinrina- aw ngei a ni, vawi khat mai pawh ni lo,  a khât tâwk hian vawi nga lai a rawn ko a. Chu chuan anni ṭhian dûn chu a ti chiai in a ti hlau leh zual a, an tlu rawk rawk a.

Chumi hnu lawk chuan an hma lam sîr lawk a thingkung âwn bui mai zâr a mi pakhat in bât tâng, uai hnûp mai hi an hmu a, chu pa chuan hnunglam chhawn in a thing zâr ah chuan thi tawh tih hriat tak hian a lo uai hnûp a.

An inhnaih êm avâng chuan hmuh loh der mai theih a ni lo, in sût hrawih hrawihin chu pa melh zawk zawk chung chuan an in kuah zêl a.

A zâwn an thleng chiah tih chuan chu thing zâr a in bâng hnûp pa chuan a lu chu hnunglamah a rawn her thut a, a hmel chu an ṭhianpa Zodina- hmel chiah chiah a ni, a hmai ah chuan thisen khang a bet nuaih a, a hmai vun lehlam chu a in hîk uai pûr mai lehnghal.

A rawn ṭhen khum sûng a, ring vak lo hian nuih sawh tak in a nui ri thûm bul bul a, anni hlau lutuk chu ṭe tuar tuar chungin an kal sawk sawk a, chho zâwng anih mai bâkah a nâl êm avângin an tlu rawk rawk mai bawk a.

Thui vak lo an thlen hnu chuan chu nui ri chu a tâwp leh daih a, hlau chung chungin an han lehhawi a, mahse chu pa chu a lo awm tawh hauh lo. Chutihlai chuan ruah a rawn tla tam leh ṭan a.

Huan hlui niawm tak, Terrace- hnim tak mai chu an pal chho bawrh bawrh a, a chângin Mali- chuan a ngal chu nâ a tiin a ṭê leh ṭhawt ṭhawt ṭhîn a. A tiang hawl ber lah kawr te a an tlâkna ah a hloh tawh bawk si a,  chuvang chuan a ṭhiannu  rinchhan tak meuh meuhin a kal bai ve ṭâwk ṭâwk a ni. Esther-i pawh chu a pilh pheng phung a, a tawnzau bahna phei chu a lehlam a chat hnuang tawh lehnghal.

In kaihkuah leh hnim a in pawt zêl chungin an theih ang angin an kal ve zêl a, rim thâng huam in a chenchilh reng tih loh chu thâwm dang engmahin a tibuai tawh lo, mahsela ruah a rawn sûr tam zêl avâng chuan hmanhmawh takin an kal sawk sawk a, rei lo tê ah thlâm hlui niawm tak hi an thleng ta hlawl mai a, a thlen hma deuh aṭang chuan mi an awm tâkin an tia, an au tuar tuar a, mahsela chhâng tu rêng an awm lo.

Chu thlâm pawh chu a kawngkhâr pawh a lo awm tawh lo va, an pahnih chuan a chhûngah chuan an tlu lût dûn râwih a, an chauh êm avângin thlâm chhuat thim zîngah chuan che chang lo hian an bawk hle hle a.

Ruah chu a rawn sûr tam zêl a, kawl a phe nasa in thlâm bul lawk lawk ah chuan ring tak takin ṭêk a rawn tla ri chuaih chuaih a, mahsela chêt zai rêng an rêl lo, thlâm chhuat ah chuan bawkin an rûm ṭiah ṭiah reng a.

Rei vak lo ah chuan thlâm chu nasa vak lovin a rawn in sâwi leh a.(!)

A rei telh telh a, a rawn in sâwi nasa ta telh telh a, anni hlauhthawng chu inko mawlh mawlh chung hian an in dap a, bang nghêng a ṭhû in an in kuah chial a. Tlu mai dâwn emaw tih khawpin thlâm chu a in sâwi nghîng luai luai a, chutihlai a kâr ah an kiang hnai vel ah chuan patling nui ri uar uar a rawn ri reng a, a chângin anni pahnih hming te lam in a au leh ruai ruai a,  chutih lai mêk chuan hmeichhe ṭap ri leh patling phun bul bul thâwm hi thlam bang pâwn sêt ah chuan a awm reng bawk a.

Tihngaihna tak pawh an hre lo, an pahnih chuan an in kuah a, khûr hlawk hlawk chungin an ṭap zawih zawih a.

Rei vak lo ah chuan chu an thâwm hriat chuan a rawn luhkhung ta ngeiin an hria. Thlâm bang chu ben zawt zawt ang hian a ri zawt zawt a, chumi hnu lawk chuan thlâm chhûng boruak chu thil ṭawih uih leh rimchhe tak mai hian a khat ta hnuk mai.

Chu thil rim tawrh har tak avânga an uak tuar tuar lai chuan an hmâ lawk thlâm chhûng thim tak mai aṭang chuan mitmu lian leh sen rûm mai hian a rawn melh kur mai anih chu.

An hmuh rual rualin an ṭé ṭhawt a, Esther-i chuan Mali chu kaih pawh a kaitho hman lo, a âwm a pawm chungin Mali chu a hnuh hian a hnûk chhuak a ni ringawt mai.

Thlâm pâwn ah chuan khûr zawih zawih chungin a kaitho a, a zak a kuah a kalpui a tum leh chiah tih chuan Esther-i chu sîr lamah a lêng lawp a, Mali- pawh chu a tlu zui ve nghal a.

Thei leh thei lo a in beng kângin a sîr lawk a Esther-i let reng chu ṭap chungin a ko a, vawi tam a koh hnu ah Esther-i chu a rawn che ṭalh ṭalh a, mahsela thawklehkhat ah Esther-i chu pa lianpui, dum rên rûn hian a ke ah man in a hnûk ta hawn hawn mai a, Esther-i hlau leh mangang chu a tâl tawp tawp a, a ṭê tuar tuar a.

A ṭhiannu chu a in sût hlawp hlawp chungin a thlîr reng a, zawi te te a kovin a phun sep sep a, a piah deuh a chu palian pui maiin a a ṭhiannu ke pahnih a vuan a, puan su tu ina lung phêk a puan zo tak mai a a vaw chawrh chawrh ang mai a lei châr vuak nan a a hmang chu a hmu reng a,   chu pa chuan a ṭhiannu chu lei vuak nan a a hman nasat êm avângin Esther-i lu pawh chu a pêr in a thisen te chu leiah chuan an luang kawi nuaih a, a thluak te pawh chu a baw nuaih mai.

Mali-chu a chau vin a thil hmuh rapthlak tak mai avâng chuan a lu a hai muai muai a, a mit sulh a, engmah rêng a hre zui ta lo va.

A harh chhuah leh meuh chuan khâm a an uaithlakna bul lawk tlâng chung zâwl ah chuan zangthal hian a lo mu bêm a, ruah pawh a lo sûr tawh lovin vân chung sângah chuan khât pharh hian arsi an lo de sep sep a.

A lu chu a hai in a rih bûr a, thei leh thei lo hian a a lu her in a bul vel chu an melh kual a, hla tak a ar khuang ri âl âl a hriat chuan tlêm in a thla a muang ve ta deuh.

A che sawn hret hret a, a kut a inbeng kângin a hawi kual vêl ruai reng a, mahsela tumah a hmu lo,  an puanin kaih pawh chu angai ngaiin a lo la awm a, chumi lamah chuan bawk vâk deuh titih in a tawlh phei hret hret a, harsa takin puanin chhûngah chuan a tawlh lût ta a.

Puanin chhûng pawh chu a thim kher mai, a rackshack- zawngin a dap kual rawk rawk a, vanneih asiamin a hiking lukhum, a chal zâwn a light awm chu a dap fu hlauh mai a, a light chu ti êngin hmanhmawh deuh hian a khum rawk rawk a,  chumi light êng lo tak rin chhan chuan a rackshack- chu zawn chhunzawm leh a, kut a  khurh nasat êm avângin a hmuh pawh chuan a hawng lawk thei lo hial mai.

A dap rawk rawk a, vanneih asiamin a phone a hmu fuh hlauh mai a, mahsela a tum ngial nâ in a battery a low tlat, a nung thei ngang lo. Chutah a rackshack- chu hai leh in a thawmhnaw te chu a phawrh chhuak rawk rawk a, a Power Bank- kha pai ngeiin a in hria a, mahsela a hmu mai thei lo, chutih lai chuan puanin pâwn lamah chuan thâwm a rawn awm a, a lam pan a rawn tlân ri thlawrh thlawrh ri chu.

Chu veleh a tâwp chawt a, thâwk pawh thaw ri ṭha ngam lovin che chang lo hian a awm ta reng a.

Mahsela chu tlân ri chu puanin pâwn chiah ah chuan a tâwp chawt a, an nghâk leh deuh vang vang nâ in thâwm dang erawh a awm tawh lo, theh hmeh ang mai hian a reh tlawk tlawk a.

Chutah thawklehkhat ah zo tak mai a chung lam aṭanga pawh nawlh ang mai hian a puanin chu a dawk zawk a, a piah lam hla deuh ah hian a lêng phei lawp a. Chumi rual chuan a au tuar tuar a, a biling a balangin a tawlh sawn vat a.

A tawlh sawn lai chuan an thawmhnaw zîngah chuan eng emaw ni hi a dap fuh a, a lukhum hmalam a light êng riai rin chhan a a'n thlêk chuan chu a thil dap fuh chu Holy Bible- hi a lo ni a. A lawm kher mai, a kut lehlam chuan a âwm ah a kuah bet tlat a.

Tumah a hmuh mai loh avângin a bul vel chu a lukhum light hmang chuan a thlîr kual vel ruai a.

Chutia a hawi kual vel na lamah chuan a hma a an uaithlakna lai, Hming ziakna lung sîr ah chuan a ṭhian te pathum Zodina, Rinrina leh Esther-i te ding tlar hi a hmu a, anni chuan amah chu chiang tak mai hian an rawn melh reng a.

A phu chiang lutuk chu a au chhuak ṭhawt a, a kut lehlam a in beng khalh chungin a tawlh hnung hret hret a.

Estheri-i lu chu a chal zâwn aṭang hian a kak phei huam a, a thluak leh thisen inpawlh chu a hmai vel ah chuan an luang nguai a, a kawr lah chu thisen in a bual nasa kher mai lehnghal.

Mali- lam a a kut lehlam phar chung hian eng emaw ni sawiin a phun sep sep a, hnunglam zâwngin a âwn riai riai a, khâm ah chuan a tla thla ta a.

Chutiang bawk chuan Zodina leh Rinrina pawh chu amah Mali en reng chung chuan hnung zâwngin an âwn riai riai a, khãmah chuan an tla thla ve leh ta a.

A ṭe nasa êm avângin aw a lawi pawh anei tawh lo, a aw chu a chhâng ṭiak a,  Chutia a ṭhian te an tlâk thlâk hnu chuan a ṭap zawih zawih a, thei leh thei lovin hnunglamah a tawlh hret hret a.

Chutia a tawlh lai chuan mau bung hi a dap fuh hlauh mai a, rang takin a la a, na ti a ṭhen tlawk tlawk chungin chu mau rinchhan chuan a in vuan ding a.

Chutih lai chuan hmeichhe âw hian khâm ko lam aṭang hian a rawn ko a, rang takin a hawi vut a. A light êng chuan a  chhun chiang hle mai.

Nichin lawk a a tlâkna ah chiah khân thi hnuang hian a ṭhiannu Esther-i ngei mai chu a lam hawi hian a lo ding reng chu niin.

A phu dâwrh a, zawite hian," Esther." a ti sep a. A bible ken lai chu a lamah a lek chhuak ta ngawt a, mahsela Esther-i chuan engah mah ngai lo niawm tak hian a rawn nuih ṭhû a, a kut pahnih chu lek chhuakin a lu chu a dawm a, a herh sawk sawk a, kâr lovah a lu chu a herh bung ta hmawk mai a, nghawng aṭang chuan thisen a rawn baw chhuak nghal zawih zawih a, chumai ala duhtawk lo cheu mai.

Chu a lu bung thi far zawih zawih chu lekin Mali- vawm nan chuan a rawn hmang a, Mali- chu a ṭe ṭhawt a, a lu rawn thlâwk fua chuan a âwm ah tak fû in a thi chu a per chuai a, a hmai leh thawmhnaw ah te chuan a kai lei luai a, mahsela vanneih a siamin a tlu lo hlauh a.

A sîr lawk ah chuan Esther-i lu chu a let reng a, rapthlak tak mai hian a nui khêk ri tuar tuar a.

Mali- hlau leh mangang lutuk chuan a Bible ken lai chu paih lawkin mau bung chu a hawl a, bai sauh sauh chungin tum lam bîk pawh nei lo chuan a tlanchhe leh ta a.

Tlang chung zâwl leh hnim hniam te te bâk ṭo lohna anih avângin kal pawh tlem chuan a sâwt deuh, thaw ri hlawp hlawp chungin a bai a, tlûk leh thawh a rual reng ti ila kan sawi sual awm lo ve.

Chutia a tlanchhia eng emaw hrui zâm ah hian a in pal a, hmalam ah a per  lawp a, bang ah hian a in sawh chawrh mai lehnghal.

A tho zi ṭalh ṭalh a, a tlânna hnu lam a'n hawi chuan a chhak lam hla vak lo a palian pui mai ding hi a light chuan a han chhun riai riai a.

A taksa chu a khûr zawih zawih a, chu a bang tauhna avâng chuan a lu lah chu a hai chiai chiai mai lehnghal.

Muangchang a thovin a mau tiang leh bang ringchhan chuan a tlan leh ta a. Rei vak lo bang hrûl a a tlân zêl hnu chuan a in ngaihtuah harh thut a.

A light êngah chuan bang chu a'n thlêk chiang  a, a lâwm rilru angreng kher mai, Icfai Univetsity Far hmun Fencing- ani tih a hrechhuak a, tichuan chu Fencing hrûl zêlah chuan kalin tlem a a hniam lai deuh ah chuan a lâwn liam ta a.

Far hmun chu a thim ruai a, mahsela a hnim êm êm hran loh avângin atân chuan han chêt sawn vêl pawh a awlsam deuh.

A mau hawl chung chuan a kal zêl a, mahsela a  chauh tawh êm avângin Far kûng lian tak nghêng chuan a ṭhu hnawk a.

Maimitchhing diar diar a a ṭhut lai chuan a hming ngei mai hian hmeichhe âw hian zawi te hian a rawn au a. Vawi li vawi nga vêl chutia a rawn koh hnu chuan ani pawh chu a rawn meng diar diar a.

Che sawn chuang lovin aw rawn chhuahna lam melhin a hawi kual vêl ruai a, a light chuan Far hmun chhûng, a thlang lawk a Tree House- chu a chhun riai a.

Chu Tree House- ah chuan hmeichhe pakhat hi amah hnung chhawn zâwng hian a lo ding a, mahse thawklehkhat ah a bo thut mai.

A thaw ri hrâwk a, a kiang vêl thlîr in a hawi kual zawk zawk a. Chutih lai chuan a hma zâwn lawk ah hian tun lawk a a hmuh ngei mai lo ding reng chu a hmu thut a.

Chu hmeichhia chuan lehlam a hawi tlat a, Mali- chuan khûr dat dat hian a mai chu lekin din chhuah a tum a, chutianga a in buatsaih lai chuan a piah lawk a hmeichhia chu dam tak mai hian a rawn ṭawng chhuak a.

"Min hlau suh, engtinmah ka ti dawn lo che," a tih chuan angaihna hre lo takin chu nu lam chu a hawi a, che châng lovin thawh mai peih hian a tiang chu a vuan reng a.

Chutah chu nu bawk chuan," Thiam lohna ka nei lo asin," a rawn ti leh a. Mali- chuan mak a tih hmel kher mai.

"Ka chanchin dik tak chu hei hi a ni, Guwahati a awm ka ni a, ka hming chu Romina Roy- a ni a, Mizoram Hindi Trainning College ah hian Lecturer- ka ni a, mahsela kum hnih chauh ka thawk hman thung.

Mizo te hi an felin kawm an nuam a, in ram a hna ka thawk pawh hi vannei ka inti êm êm ṭhîn. Mizo ṭhian tam tak ka nei a, ngaihzawng pawh kan zirlai ami mizo ka nei bawk a.

Chu Mizo tlangval nen chuan kum hnih dâwn lai chu kan in ngaizawng a, kan in ngaihzawn chhûngin vawikhat mah in hauh leh intih thiam loh kan nei ngai lo.

Hlim takin kan awm dûn a, ka hmangaih êm avângin ka hnam phatsan a pasal atân mizo neih pawh ka thlang hial a. Hun rei tak kan in kawp hnu chuan chu mizo tlangval nen chuan kan chesual ta nge nge a, amah pawhin nupui a min neih a tiam a, chuvang chuan vawikhat mai pawh ni lo, kan hun neih apiangin kan mu dun ta ziah a.

Kan mut dun ngun êm avâng chuan a tawp ah chuan nau ka lo pai ta hial a, nau ka pai tâk avâng chuan amah pawh chuan nupui a min neih vat a tum ngei ringin ka hlim hle a, ka ruah loh thu pawh hrilh ka châk zek zek reng a.

Tichuan kan pahnih a kan lên dun fo ṭhinna tlângah chuan kan lêng dun leh ta a. Hlim takin thil awmzia ka hrilh a, a nupui ka nih dâwn avâng ka lawm zia thu te, mizo nun zia la lo zir rûk nasat tawh thu te pawh chu. Mahsela anih erawh chu ka thusawi chuan a ti lawm tlat lo, a hlim ka rin ve tehreng nen chuan.(!)

Ani chuan, nupui fanau nei lai anih thu a sawi ta anih chu, chutih lai a ka thinrim zia leh mak ka tih zia chu sawi hian a siak lovang. Chuvang chuan nupui min neih theih loh thu min hrilh a, chu mai bâk ah ka pum chhûng a naute chu ti tla tûrin min la ti zui anih chu.(!)

Kei chuan rilru na takin a nupui ka ni thei dawn lo anih pawhin kan pahnih a kan fâ lo piang tûr, ka pum chhûng ami chu keiman ka enkawl mai ang tiin ṭan ka khawh a, mahsela ani erawh chuan ka la tih mualpho a hlauh avângin naute chu ti tla tûr leh a senso pawh aman tum vek a in huam thu a sawi a. Kei erawh chuan engti kawng mahin ka phal lo bur thung a.

Tichuan nasa takin kan in hnial a, kut hial thawhin naute ka tih tlak loh chuan thah ah min vau ta hial a, mahsela kei chuan naute tih tlâk ai chuan thih mai ka duh thu ka hrilh thung a.

Tichuan kan in sual chiam a, ka hneh ngang loh avângin leh ka thu ka sawh sawn duh loh avâng chuan min rêk hlum a, khâm ah min paih ta a ni, ka hmangaih ber khân min tihlum anih chu." a ti a, a thusawi tâwp lamah phei chuan a lung a chhia in a ṭawng hriat a har hle mai.

Chu a thil sawi chu ngun tak hian Mali- chuan a lo ngaithla kar a, mak a tiin a chil a lem ri kalh kalh a.

A duh ang a thu a sawi zawh chuan chu hmeichhia chuan muangchang hian Mali-lam a rawn hawi a.

Hmeichhe hmelṭha leh pian nalh tak, hnâr ngûl sâng vah mai a ni a, a hmel chuan Mizo pawh a ang ve lek lek mai. Mahsela thisen nei lo tih hriat tak hian a vun chu a dâng vâr hluk thung.

Ngawi reng hian Mali-i chu a en reng a, rei lo tê ah a hmel lungngai leh khawngaih thla la tak chu a reh tial tial a, thinrim hmel a pu ta telh telh a, tichuan a mitkhur te chu lo thûkin a mit a ṭang chuan thisen a rawn luang chhuak nguai nguai a, a hmai vun te pawh chu muangchangin a sâwng ta telh telh a.

Mali- pawh chu a ngaih a ṭha tehchiam lo, a thin a phu dup dup a, a tiang rinchhan chuan muangchangin a ding tial tial a.

Chutih lai chuan chu hmeichhe thlarau chu ṭêng chuai a rawn ṭawng chhuakin,

"Ka hmangaih ka neih theih loh chhan chu nangni ho vâng hi a ni, Mizo hmeichhia te hi ka hua che u, ka chhuah tawp lovang che, ka tawrh ang bawk kha ka tawrh tîr ve dawn che a ni." ti chungin Mali- lamah chuan a rawn phei chhut chhut a.

Mali hlau lutuk chu a tiang hawl chung chuan a theih anga chakin Far hmun ah chuan a tlân chiam a, chu nu lah chuan a rawn ûm zui zêl avângin a hlau lutuk chu a khûr zawih zawih a, a tiang pawh a vuan nghet ṭha thei meuh lo. A chângin a lum a, a chângin mawng tawlhin hnim zîngah chuan a tleng thla a.

Chu Far hmun chhûng khâwk rum rum khawp hian chu hmeichhia chu a nui uar uar reng a, a changin lungngai tak a ṭap hawm hawm angin a rawn ṭap leh chiam mai bawk a.

Nâ pawh a sawi theih tawh loh, a hlauh êm avângin nâ a nei tih pawh a theihnghilh ta hial ve ang.(!)

Far hmun chhah tak a pelh chuan khua a lo vâr dâwn riai riai tawh a, leilung pawh a hmuh theih ṭan tawh. Mahsela tlân luhna tûr in leh mihring reng reng hmuh tûr erawh an awm lo, hnim pik tak tak tih mai loh chu.

Tichuan mumal lo zet in Mali- chu thaw hlawp hlawp leh ṭe tuar tuar chungin a tlân zêl a, a tlânna chin pawh a hre tawh lo. Vawikhat phei chu a tlânna hnim pik chu a lo tâwp thut a, lengkir ang deuh ni maiin a hria, hmun sâng ve angreng tak ah hian a tla thla dawp a, chutih lai phei chuan a thi ngei dawn niin a hre hial hman a.

Mahsela a rilru chiai leh umzui tu nei reng avâng chuan chak ta sawt in a inhria a, a tiang chu nghet tak a vuan in a in tung tho a, a tlân chhe leh ta a.

Chutih lai te chuan a hnunglamah chuan hnim pal ri leh thaw ri hrawih hrawih thâwm te an awm reng a, a chângin a sîr lam hnim te chu a leh sun sun a, hmeichhe nui ri leh a hming a ko ri te chu a mang hriat riai ruai a, a chauh tawh êm avâng leh a hlauhthawn êm avâng chuan a rilru chuan mu leh mal a nei thei lo.

Chutiang chuan chhuk zâwng hlir in a tlân a, thui tak a tlân chhiat hnu chuan a hnunglam aṭang a rawn nem tu awm ang mai hian hmalam ah a per dâwrh a, boruak ah kâng deuh vuai a a inhriat hnu in a ri thlawrh a, a lu chu a na ngut ngut a, a khawhmuh a fiah lo tial tial a.

Mipa aw hian, "Lo tlân teh u." a tih ri chu a hre riai riai a, tichuan engmah a hre zui ta lo va.

Icfai University College Building thlen hma deuh kawng kawi lai, kawngpui chhak hnim zîng aṭanga hmeichhe pakhat rawn tla thlawrh a hmuh chuan Icfai University a Security R.C-a chuan a ṭhian Security dangte kovin an han tlân chho vat a, chu hmeichhia chu a hliam nasa in kawngpuiah chuan a thisen a baw nuaih a.

A mar te dek in ala thi lo tih an hriat chuan Security pakhat Chhuanmawia bike ah chuan chuantîr in, amah Chhuanmawia nen chuan an ṭâwn belh bawm a, tichuan Synod Hospital, Durtlang ah an tlânpui nghal vat a.

Security R.C-a chuan Durtlang North YMA- te pawh rang takin phone in thil awmzia a hrilh nghal bawk a.

****************************************************************************

Thla hnih lai aliam hnu chuan Mali- chu a ṭhian dang te nen a hma a an kalna 'Hming ziak tlang' - ah chuan an kal leh a, mahsela chu khâm a uai tûr ni lovin, an ṭhian boral ta te thlah nân a ni thung a.

Hlim takin eitûr an pai ang ang te eiin thla te an la chiam a, hlim tak a a ṭhian te an infiam lai chuan ani chu a hma a an tlâkna lai, Hming ziakna lungpui bulah khân an hun tawn rapthlak tak tak te ngaihtuah in a tiang rinchhan chuan a ding reng a. Chutia a din reng lai chuan Hming ziakna lungpui chu a'n en chiang a, mak a ti kher mai, a lungphu chu ri dawt hian a hre hial.(!)

Chu lungpui ah chuan lian angreng tak hian hming a lo inker a, chu hming chu 'ROMINA'- tih a ni.

Chu hming inker a hmuh rual chiah chuan a beng bul a zawi te a a hminga ko ri hi a hria a.

Muangchang a a'n hawi chhuah chuan a hnung chiah ah hian a hma a a hmeichhe hmuh ngei mai, Romina-i ngei kha a hmel rapthlak tak pu chung hian a lo ding reng a, Romina-i chuan thinrim hmel tak hian a lo en reng a.

Thâwklehkhat ah Romina-i chuan Mali- âwm ah chuan na deuh hian a nem a, chu khâm sâng tak maiah chuan ṭê ruai ruai chungin Mali- chu a tla thla ta vawn vawn mai a.

A piah deuh a a ṭhian infiam mêk te chu Mali- ṭê ri an hriat rualin an rawn hawi phei a.

Mahsela Mali- chu chhan hman a ni tawh lo, khâm sâng lutuk mai a a tla thla lai an hmuh chuan ring takin an ṭê teng tung a.

Chu thil thlen aṭanga kum thum lai aliam hnu, January 2021- a lo nih chuan mipa ṭhian ho rual khat hi chu 'Hming ziak tlang'-  ah chuan lêng khaw thawng tûrin an kal a. Hming ziakna lungpui hnuai lungpui tolawt zâwl zau angreng tak a an ṭhutkhawm a, an thil pai te an ei mêk lai chuan an zîng a pakhat chu, chu lungpui tolawt aṭang chuan a tla hlauh mai a, mahsela a tlâk lai leh a tlâk dân erawh a ṭhian te chuan an hre hauh lo.

Mahsela vanneih asiamin chu khâm ah chuan a lum thui lo hlauh mai a, nat pawh a na vak lo nâ in a hmun a rem loh êm avângin lakchhuah erawh a buaithlak kher mai.

Khawthim hma deuh a tla a ni nâ in, Durtlang North Adventure Club te chuan nasa taka lakchhuah tumin an bei a, tichuan zân dar sawm leh pakhat vêl ah an la chhuak thei hrâm a.

Hliam nasa a nei lo nâ in a insawhna vêl hliam tenau erawh chu a nasa angreng hle a, an lakchhuah lai hian a chauh deuh avângin nikhawhre lovin a awm a, rang takin Hospital lamah hruaiin enkawlna pawh an pe ṭha hle a.

A hnu a an zawh leh pawhin chu a tlâk dân chu fumfe in a chhâng mai thei bîk hauh lo mai.