RAWL LAI D

Ziaktu : Jonathan Lallungmuana Bawitlung

'Ka hmangaihna hian a tuam reng che a;

A zuitu chu rinawmna.

Hmangaihna hian a thlîr reng che a;

A nghâk tu chu beiseina.'

LALRINAWMA (LRA):

Tukṭhuan kan ei tlai avangin sikul kal tûrin ka insiam sawk sawk a, hmanhmawh takin ka chhuak phei ve a, ka tlai ṭhelh chu a ni. Kan chawlh lawk lai chuan sikul sirah ka ṭhu a, ka ṭhiannu Sawmtei chun rawn phei vein ka bula rawn ṭhut pah a, “LR, thil hrilh tur che ka nei asin,” a tih chuan, “Eng thu maw?” ka lo ti var a. “Ihh..

Eng lo a nia, kumin bak hi chu in khuaah hian ka awm tawh hmel loh a,” a tih lai chuan phâwk deuh hrâ hian, “Engati maw?” ka lo ti vat a, ngui hmel deuh hian, “Ka pa hi Aizawl lamah an sawn dawn a, kumin Krismas pawh hi Aizawl lamah kan hman tawh ka ring.”

“E, a ni maw? I pa chu a va’n uiawm dawn em! Eng pawh ni se, kei pawh ka pass ve hlauh a nih chuan nakkumah pawl sawm ka kal ve leh ang a, a bak chu kal kal chhunzawm theih dawn pawhin Aizawl lam a ngai ve tawh ngei ang.” ka tih chuan, “Ni e, i rawn kal thei dawn a nih chuan Sikul pakhatah luh dun dan kan ngaihtuah dawn nia. LR, ka ngai ṭhin ngawt ang che, chanchin inhrilh tawh zel ang aw.” a ti reng mai.

 Nui chung hian, “Nupui pasal kan neih thleng chuah ni lo, pitar putar kan nih thleng pawhin kan inkawm zel ang chu,” ka tih lai chuan dar a rawn ri a, kan lut dun ta a.

Ka ṭhiannu, Vanlalsâwmi (Sâwmtei) hi hmeichhe ze zawi leh zakzum tak a nih

rualin hmel hlim erawh a ngah hle lawi si. Rual pawl thiam leh mi pawi sawi lo tak a ni.

Exam kan zo va, huan lamah ka pa ka’n pui ve lâwp lâwp a, ni tin mai hian Sawmtei te

Aizawl awm tur chu ka ngaihtuah a, mal dawn riaua inhriatna ka nei a, ka khawhar tur zia ka ngaihtuah a, ka huphurh takzet. Result a rawn chhuak a, vanneihthlak takin Sawmtei nen chuan kan pass ve hlauh lehnghal a, kan lawm dun kher mai.

Aizawl lama an kal dawn zanah chuan a pa thawhpuite leh chhungkhat laina

sawmin inthlahna hun an hmang a, kei pawh ṭhian ṭha tiin min rawn sawm tel ve.

Inthlahna hun leh ei in lam kan tih zawh chuan ṭîn zai kan rel ta a, kawtah min rawn

thlah a, ka kuta vuanin, “LR” tiin a kun a, a rawn dak chhuak leh chuan mittui tling piau chungin ka mitah tak a rawn en a, “Aw, ka va’n ngai dawn tak che em! Ka khua a va’n har,”

sawi zawm hleithei loin a mittui a luang zawih zawih a, “Sawmte, lungngai suh, kan dam phawt chuan kan inhmu leh thuai ang,” tiin keia ṭawngkam thiam lo chuan han hnem vak ngaihna ka hre si lova, ka lai ru ngei mai. “Sawmte, kei pawhin kan ngai ngawt ang che. Chanchin min rawn hrilh vat ang che aw, ka phut ve tlat che a nia, in address tal te chu min rawn hrilh vat la aw,” ka tih leh chuan, “Lutuk,” tih pahin a lu a bu nghat a, “Engpawh ni se, i lehkha thawn nghakhlel takin ni tin hun hi ka chhiar liam ṭhin dawn a, a theih hram chuan a rang lamin aw,” tiin inthlahlel tak chung chuan kan in mangṭha ta a.

Kan hma lawka Lal piancham lo thleng tur chu engtin tak hmang ang i maw?

Kum dangah kha chuan ṭhian dang pawh ngaihsak miah loin Sawmtei nen hlim tak leh nuam takin kan hmang dun ṭhin kha a ni a; kuminah erawh keimah chauha hmang

tur ang hrim hian ka inngai a, ka huphurh tak zet a ni. Lehlam taka chuan hman

zawh hlan ka nghakhlel hle thung. Khawhar tak chung chaun Mass leh Kum thar

vuakvet chu ka hmang zo ta hram.

Sikul admission kan tihfel hnu lawk chuan vanduaithlak takin ka pa’n lungphu

chawlin min boralsan ta thut mai si a, ka hrilhhaiin ka bangbo ta ngei mai, engtin awm zel ang i maw! Zirna chhunzawm zel chu duh viau mah ila ka tan tihngaihna a awm tawh lo, unau zinga upa ber ka ni a, ka naute zirlai an la ni ve bawk si.

 Chhungkuaah sawrkar hna thawk awm ve hek lo le, ei bar zawng turin ka nu ringawt rin chi a ni si lo.

Chutiang chu kan dinhmun a lo nih tak siah chuan kan tê ber, Mami hian sawrkar hna thawk tura a zir zel peih ta lo a nih pawhin; ka chhang chiah, Lalrotluanga (Marova) erawh sawrkar hna thawk thei tura zir chhuahtir ngei ka duh avangin theih tawpin ṭan ka la ve sauh sauh a; ka nu pawh a thawk rim narawh.

Ka nu hi khawngaih ṭhin viau mah ila, ka naute zirna avang leh chhungkaw thil

pawimawh dang avangte pawhin lo lamah bawk hian kan ṭan dun a ṭûl si. Inhlawhna

remchang ka hmuh apiangin ka inhlawh ve zel bawk a, Pathian zarah hrehawm lutuk

lo leh harsa lutuk loin kan khawsa chho ve zel a.

Ka theih tawp leh phak taawkin thawk rim viau mah ila, kan chhungkaw

hmasawnna tur leh ka naute zir chhuahna tur a ni tih ka hria a, hrehawm ka ti chuang

lo. Ka dam a nih chuan kawla ni chhuak chhiarin ka thawh chhuak ve a, ka \hiannu

Sawmtei erawh theihnghilh ni ka nei ngai lo. Ka inngaihtuah chian chang chuan, “ṭhian kan nih mek lai hian kan kâr ah ṭhian inhmangaihna mai ni lo; nula tlangval

inhmangaihna hi a piang ta zawk em maw’n dawn le?” tih te hi ka rilruah a rawn lang leh ṭhin. Chu hmangaihna chu keimahah pawh hian lo piang ta pawh ni se, Sawmtei thinlungah a piang ve ang em? Ka rilru hi hria se la, mak a ti ang em. Engtin min ngai ve ang maw? Aizawl an kal dawn zana ka kut vuan chunga, “LR, ka ngai ngawt ang che,” tia a mittui luan zawih zawih lai te kha ka mitthlaah a lo lang a, ka khua a harin ka lung a leng zual ngei mai.

Ni khat chu ka hahchawlh ni tak hian kan dâk-pu fapa hian ka lehkha tur min

rawn pe a, ka hawng a, nghakhlel taka ka lo thlir ni tin ṭhin Sawmtei lehkha ngei a ni.

Ka’n chhiar a, tluang taka Aizawl an thlen thu te, a lunglen leh khawhar dan te,

inthlahrung tak chunga ṭhian hmangaihna chauh ni lo; hmangaihna dan amaha a lo

pian dan leh ka ngaih dan a hriat duh thu a rawn sawina te chuan min tihlim tak zet.

Ka rilru zawng zawng hi hrilh nghal vek mai ka duh a; mahse, lenna tlang a dangin,

mul hla kar danah kan leng si.

'Tawn leh ka nuam ngei e,

Aw! Rawl lai ka di tê kha;

A chân reng thinlaiah,

Thiamna rûn khat bêl a dâr ang kan lenlai ni te;

Koh kîr leh theih ni si lo,

Hlim tê a kan lenlai hun a va'n rei lo tak êm!'

Sawmtei nen hian chanchin kan inhrilh tawn reng a; mahse, lehkhathawn hi dak

aṭanga kal a nih avangin a thang rei thei em a, kar hnih a liam hma chuan kan hmu hman meuh lo.

Sawmtei nena kan inkarah hian hmangaihna chaun parfung chawi tawh mah se, ṭuan kan ṭulna tlang erawh a la dang si. Kha chen hlim tea leng dun ṭhin kha, kan hun tawngin a zir ta si lo. Tawn leh ni tur her chhuak leh tak ang maw? Chhun hun rei ka tih aia nasa mahin zan hi a rei emaw tih tur a ni, rilrua ngaihtuah loh chang lahin mitthlaah a cham awl si lo; ka ngai a ni tih mai loh chu sawi thiam har zawk hian.

''Lenna tlâng dang mahse rinawmna vawng zêl ila;

Khuanu zârah dâr ang tawn lehni zawng ala her chhuak ve ngei ang."

tia beiseina nena mahni chauha hun hman rek rek mai hi ka tih theih tawk a la ni

rih a, mut mu lah tuah a har ṭhîn ngiang mai.

"Khuahmun loh Dî mah ngaihn ana a;

Chhîngkhual a Dî min phuar vawng vawng."

tih hla te zawng ka sa thui ngam ngang lo chu a ni e.

Kum a liam zela, tunah chuan kei pawh tlangval puitling taka chhiar theih ka lo ni

ve ta reng mai. Tlai khat ka feh haw chu ruaihpuiin min nuai hrep avanga chau ve deuh chu len zai pawh rel loin zanriah ei kham veleh ka ka mu nghal a, kan chhungkaw dinhmun leh kan ei bar zawn dan te ka chhut neuh neuh a, hetiang ringawta hma kan sawn chak theih lohzia pawh hi ka hre chiang khawp mai. “Engpawhnise, kan in leh huan, lo ram vel hi hralh ila, Aizawlah pem ve rawih ila a ṭha ang,” tih chu ka thu tlukna mah ni se, ka nu râwn a ngai dawn a, rem ti tak ang maw le. Ka rilru kaptu ber chu, ‘Ka pa lung kan la

phun lo leh ka pa lu nghahna hi ka nu hian a chhuahsan duh ang em?’ tih a rawn ni nghal pang a, “Lung han phun ve ngawt dawn pawh ni ila, senso sang lutuk tur chu ka hre ve kur si.

 Nu leh pate hi an hmanlai rilru a, an kawppuite lu nghahna chhuahsan an hreh

bawk si,” â, ngaihtuah tur a tam, mahnia chin fel theih lah a ni lo, rilru a hah takzet.

Hlim tê a kan lenlai hun, a va'n rei lo tak êm! tih leh lehkha inthawn leh ṭhin ngawt

loh chu tih theih dang kan nei rih mawlh si lo. Ka thiam ang tawkin Sawmtei lehkha tur

chu ka ziak a, dâkah chuan ka va thawn ve leh ta a. Tun lai hun ang hian mobile phone te hi lo awm tawh se la chuan awlsam taka chanchin inhrilh zung zung theih tur a ni a;

mahse, khawpui lamah laneline a tam tawh viau na a, thingtlang lamah erawh a la

thleng pha chai si lo.

Hun leh kum inher chho naw naw chuan kan chhungkua pawh min ṭhuai chho ve

nawk nawk a ni ber a, tunah chuan Marova pawhin pawl sawm a lo pass ve ta der mai,

kan khaw lama zir zawmna tur a awm tak loh avangin Aizawl lama zir zawmtir dan kan ngaihtuah a. Ken theih ang ang, ṭûl leh pawimawh kengin, Aizawla ka nî te ina awm turin kan kaltir ta a.

Kan huan thlaite hian min chawm theih teh meuh mah se, vanduai thilah thar

mumal loh kum pawh awm theih bakah Marova chu thlahthlam nghal ngawt thei kan nih loh avangin, chhungkaw mamawh leh ka naute zirna nena rinrawl bera neih chu fuh a ka hriat loh avangin sum chang thei thlai chinna Lo tur neih belh ṭha in ka hria a, lo number te pawt ve in, buh ṭîn hnih hmun awm vela zauh kan thlang ve a, Lo vah a lo hun a, ka hna thawh ṭhan loh thil a ni bawk a, ka chau ṭhin hle. Ka pa ka ngaih a zual ṭhin ngei mai. 

Buhban tin khat leh suma chantir mai theih tur thlai eng eng emaw chingin kum

hnih chhung chu theih tawp kan chhuah a. Hahthlakin rim viau mah ila, dingchhuak tur

chuan taimak a ngai a ni tih ka hriat avangin hrehawm ka ti chuang lo.

Kum tawp lamah chuan vanneihthlak takin Pathian zarah kan thlai chin ang angten

rah duhawm tak min chhuaksak a, kan hlim ve takzet. Kum thar lamah chuan chhung

khat laina hnaite nen kan theih ang tawpa ei leh in lam te buatsaih vein ka pa lung chu kan phun ve ta a, ka rilru kap tlattu pakhat kan han tizo thei ta chuan thaw a ti veng ve deuh huai nia! Kan eng pawh a thawl ve ta hawk e.

Huan pawh chu hralh zai kan rel ve ta a, in erawh chu a luah duh tur an awm

nual thoin a rinawm a, hralh rih loh mai \ha kan ti tlâng a. Kan tum leh kan dinhmun

min hriatpuiin kan Health Worker-in man man takin kan huan chu min leisak a, kan

lawm kher mai. Ka rilruin Sawmtei ka hre reng a, kan pem tum thu pawh hi hrilh ka duh a; mahse, a lehkha thawn hnuhnung lamah khan sawrkar hna a thawh tawh thu a sawi avang khan, keini ang thingtlang tlangval ni tin inhlawhfa chawpa ei zawng ringawt hi chu engah mah min ngaih zui ka rin loh avangin hrilh loh hi ṭha zawkin ka hria a ni.

Kan inkara hmangaihnain parfung a chawi ṭan ni kha chuan chu hmangaihna chu

dikna leh rinawmna zan dai fimin a chawin, nupa hlim tak kan nihna tura a par chhuah

ngei ka ring ṭhin. Mahse, tunah chuan ka dinhmun chhuanawm loh tak hian ka riina leh beiseina zawng zawng chu beidawnna ruamah a hnuk lut zo ta. Ka dinhmun chhe tak hian rilru dang puttir lo se tih chu ka duh ber a ni fo.

Aizawl lamah inbeng bel ve turin kan khua, ka pa lu nghahna ngei mai chu kan

chhuahsan ta. Tluang taka kalin, tlai dar nga velah Aizawl kan thleng a, ka ni te inah invawm lut rawihin a tuk lamah in luah tur min lo zawn hmuhsak diam lamah chuan kan insuan lut ve ta a ni. 

Ka nite nupa hi kan chhungkaw tan hian an ṭha em em a, ka pa boral aṭang

ngat phei kha chuan anni hi kan inpui ber an ni mai a, an thla zar hnuaiah engkim kan ti a ni hawt e. Kan pem thlak kum hi ka nau, Morova pawh B.A 2nd Year zir hun a lo ni ve leh chiah a, theih tawp kan chhuah zel a, B.A hmel pawh kan hmu ve thuai dawn e.

Ka ni pasal chuan ka thawh awm tawk te min kawhhmuhin hna thawh tur leh

inhlawhna tur pawh chu ka haihchham lo viau a, nghei lo chuan kan awm ve naw naw e.

Ka nu lah, thingtlang nu, hna thawk loa awm mai mai thiam lo a lo ni vei rawl nen,

Bazara chawhmeh chi hrang hrang khar chhawngin veng hrang hrangah a zuar kual a, a tih fuh chang phei chuan kei ai hian sum a la lut hnem tak zauh zauh a, a tih chi tak a lo ni vei nen, nuam a ti ta phian a.

Ei leh bar ah na na na chuan kan phâng lutuk bik lo; mahse, khawpui ṭhalaite nun

dan leh an khawsazia chu man thiam har ka ti ṭhin. Sum an nei hle emaw tih mai tur

hian, “Nuam ka chên e,” tiin an neih zawng zawng pawh khawh ral raih hreh lo ni awm

takin hlimhlawp lam thil an buaipui hle ni hian ka hre ṭhin. Chu lamah chuan rilru sen

ka tum loh chu thu hran ni se, ka neih ka thawh chhuah hian a tlin lo a, hah taka ka

thawh chhuah hi hlim hlawp bawla tlak ral mai mai atan chuan ka phal lo nasa a ni.

Kan te ber, Mami paw’n zirna lam chu a tui chilh lutuk lo nen, puanṭhui te a zir a,

kawr han design kual leh mawi thei ang bera han ṭhui vel chu nuam a tih em avangin

puanṭhui kan zirtir ve leh a, a kalna tur tak a ni ang chu rei pawh a zir hmain a thiam

zung zung mai. Kan chhungkua hi rethei te, hmeithai chhungkua mah ni ila, “Pa nei lote

pa,” an tih ṭhin ngei hian kan nghei châr a lo phal bik reng reng lo nia!

VANLALSAWMI (SAWMTEI);

Office kan bang a, ruah a sur deuh avangin rain coat ka ha a, in lam pan chuan ka

inkhalh chhuak ta a, thui tak pawh ka tlan hman lo; kawng chhak lam aṭanga kawng kan a tlangval pathum rawn chhuk thla te avangin ka ding chawih a, an zinga a hnunhnung ber

a kut vei lama suahdur keng chuan ka mit a la zar mai. Eng vangin maw? Ka hmangaih

LRA ngei kha niin ka hria. Ama’n min hmu lo mah se, ka mit ngeiin ka hmu a, ka thinlung hian a hmu chiang takzet.

Biak chu duh viau mah ila, mi hnena inhlawh lai lo pawh pen chi a ni si lo, ruah a la sur zui bawk si.

 “Naktukah ka kal hma deuh ang a, an hna thawh ṭan hmain biak theih

dan a awm mai ang,” tiin ka tlan leh ta a. Ka ngaihtuahna a va’n kal thui tak, “Eng vanga khalai hmuna hmu kha nge ka nih? Engati nge a rawn kal tur thu min hrilh lo?” tihte ka ngaihtuah a, rilru dan min putsan ta mai a ni ang a tih thlengin ka ngaihtuah a, chutiang em thleng tur chuan ka phal mawlh si lo. Ka thinlung hi zawhnain a khat a ni ber mai.

A tukah chuan ka kal hma deuh a, an hna thawhna ka va thlen chuan tu mah an lo awm lo. Piah deuh hleka ka scooty dahin an hna thawhna tur bul hnaiah chuan ka lo nghak a, rei fe ka nghah hnu pawh chuan tu mah an rawn lan tak loh avanga beidawngin ka kal leh ta.

Rilru lam chu a buai telh telh emaw tih mai tur a ni, “Min lo hmu sa reng ang a, a

rawn inlan duh lo a ni ang. A nih loh pawhin nupui neiin, hna a thawk lai ka hmu leh sia

ka beisei leh a hlau ang a, a hna thawhna ngaiah a thawk ngam tawh lo a ni ang,” te ka’n ti leh ngawt ṭhin. Ka rilru a nuam thei lo, ani hian min phatsan a nih ka ring rum rum a, ka ta ni lo tur chuan ka phal bawk si lo.

Awm ngaihna pawh hre lo lêkin zan hun pawh ka hmang ral leh a, ka tlaivar dawn

hial emaw ka tih laiin khaw var ṭan ek ekin ka muhil a, rei pawh ka muhil ta lo. A tukah

chuan bei nge sei run dung tiin hma deuh takah ka inkhalh chhuak leh ta a, rei lutuk lo ka nghah hnu chuan bawngtuthlawh puia an hna thawhna lam pana a kal chu ka va hmu ta a, hnung lam a\angin, “LR,” tia ka va koh takah chuan a rawn hawi a, mak tih hmel tak hian, “Ehh! Sawmte, i dam maw?” tiin min rawn chibai a, “LR, dam alawm. Engati nge i lo kal tur thu min hrilh loh? Ka rilru i tihah hman lutuk,” ka tih lai tak chuan a hna thawhpui tur te an rawn lang ta mai si, “LR, in awmna min lo hrilh teh, sunday-ah ka rawn leng ang. Sawi tur ka ngah tawh a nia,” ka ti a, min hrilh hnu chuan ka kalsan leh ta a.

Kan inhmuh chhung zawnga a mita zahna leh inthlanghrunna lo lang leh a chezia

zawng zawng kha ka hai lo. Ka lakah hian eng vanga inthlahrung nge a nih tih kha hriat chian vat ka ngai a ni. Nupui a lo nei tawhin, min lo phatsan tawh reng te hi a nih vaih chuan engtin nge ka awm zel ang tih pawh ka ngaihtuah ngam der mai si lo. Aw, LRA chanchin chu hriat chian thuai thuai ka duh tak zet a ni.

LALRINAWMA (LRA):

Pathianni chawhnu inkhawm kan bang a, Sawmtei’n rawn len a tum avangin in

lam ka pan nghal a, ka inthlak mawlh mawlh laia kan kawta Scooty rawn ding thum vat vat chu ka va thlek zawk a, Sawmtei ngei mai chu a lo thleng der mai. Varahdah- ah chhuakin, hlim hmel pu sâng hian ka lo hmuak a, kan inzui lut ta. |hut pindan lam kan pana kan ṭhut fel rual rual chuan mak ti taka min en pah hian, “Eng nge in rawn pem tur thu min hrilh loh chhan ber chu ni?” tiin min zawt leh nghal chawt a. “Ni e, ka pa boral aṭang khan ram hna ka thawh a ṭul a, hetah pawh ni tin inhlawh ka ngai tho bawk. Nang lah kamding i ni a, ka cho rual i niin ka hre lo a, ka tan hian a inthlahrunawm ema ka hrilh ta lo che a ni,” ka tih lai chuan, “Eng dinhmunah pawh ding la, ka phatsan lo ang che. Kha

leh chen kan inhmuh loh chhung pawh khan vawiin thleng hian ka thinglung lairil luahkhat tu i la ni reng asin,” a tih chuan ka lawm kher mai.

“Ka tana i rinawmna hian min tilawm tak zet. Chutih rualin, eng tik niah emaw

chuan i tan zahpuiawm mai ka la ni ang a, i zahna leh mualphona thlentu lek hi ka ni ang tih erawh ka va’n hlau em!” ka tih chuan, ka mit taka min en chung hian, “Eng tikah mah, khawi hmunah mah ka zahpui lo ang che, kei pawh eng mah ka ni bik hleinem,” dawt sawi lo tih hriat taka a mit menga takna lo lang chuan ka thinlung a tilawm takzet.

A kutah ka vuan a, ka lam pawh hnaih pah chuan duhthawh takin ka fawp vawng

vawng a, ani pawh a awm mai mai bik lo. Kan inthlah a, kan han ngawih dun leh vang vang hnu chuan, “Tunah hian hna thawh laklawh lai in nei em?” tia min zawh chuan, “A, laklawh han tih chuan kan thawh lai saw ni thum velah chuan kan zawh theih tawh chu ka ring a, chhunzawm lehna mai tur erawh ka la hre mai rih lo,” nui deuh chung hian, “Hmun dangah inhlawhna tur min lo hmuhsak tihna em ni?” ka ti zui nghal a.

 Hlim hmel zet hian, “Dawn lo’m ni? I remchan chuan, In sakna bungraw zawrhna dawr a hmingin kan nei ve a, hmanni

deuh aṭang khan kan dawr nghaktu chhungkaw lam harsatna avangin a bang tawh a, ka nuin a nghak a, hmeichhe khawih atana remchang lo bungraw rit tak tak a awm nual mai bawk si nen, bakah hmun dana phurh chhuah a ngaih chang a awm si a, ka nu hriselna a ṭha bawk si lova min nghahsak thi la chuan ka pa pawh a lawm ngawt ang,” a tih chuan,

“Nia, engpawhnise, kan thaw lai hi kan han zo phawt ang a, keini ang te min sawm phalphawt chuan kan hnal phal dawn em ni?” tiin kan nui dun hawk hawk a.Ka nu a lo haw a, rawh luh pah chuan, “E! Sawmte, i lo leng a ni maw? In dam em?” a rawn ti bawrh bawrh a, ka nu nen ka pathum chuan hlim takin kan ti ti barh barh reng a.

Ni te a liam zel a, kan hna thawh lai kan zawh hnu chuan Sawmtei te dawr chu ka

nghak ta a, inhmelhriat sa leh kan dinhmun engkim hretute an ni bawk a, min duhsak

ṭhin hle. Sawmtei nen pawh hian kan inring tawn em em a, inkawm ni tin thei lo mah ila, inrinni leh office chawlhah dawn min nghahpui ve ṭhin a, kan hlim dun ṭhin hle. Thinlunga hmangaihna par tlana hun leh ni kan chhiar chhoh ve zel laiin, ni khat chu Aizawl aṭanga khaw hnai teah in sakna hmanrua phurin an dreiver, Lawma nen chuan kan inkhalh chhuak ta a.

VANLALSAWMI (SAWMTEI):

Kan office lama kan buai deuh avangin ka haw tlai deuh a, In ka thlena kan

kawngkhar lo inkalh ka hmuh chuan mak ka ti ngei mai. “Tun ang hunah ka chhungte

chu khawnge an kal dawn chu aw,” ka tih rilruk lai chuan ka thawm hriain kan

ṭhenawmnu, Pi Ruali chu a rawn chhuak a, hlauthawng hmel tak hian, “Sawmte, in driver leh in dawr nghaktu LRA kha khawi hmunah nge ka hre chiah lo, In sakna bungrua an dah rawn haw lam an chesual a,” a tih lai chuan, “Engtin nge an awm, an na em?” ka lo ti thuai a, “Driver chu a zuangthla hman a, LRA chu a biak theih loh tih chauh ka hria a, engtin chiahin nge an awm ka hre lo. Damdawi inah an dah a, i pate pawh an kal a nih kha.” Ka mang a va’n ang tak em! A thi mai ang em? Engtin nge ka tih ang? Hnukulh ṭeuh

chung chuan damdawi in lam chu ka pan ve ta. Ka va thlen chuan a nu leh a naute pawh an lo awm tawh a, Doctor-in, “A kheimit sir ruh leh a ke ruh hi a sawp vek avangin a ngalrekah tan a ngai dawn a, a bak chu a taksa hmun dangah ṭha lo eng mah a awm lo.

Tun laiah thiamna a sang tawh a, ke lem a awm a, khup chin hnuai lama tante tan chuan danglamna a awm lo emaw tih tur an aw, lungngai reng reng suh u,” tiin Doctor chuan min ṭawng thlamuan a; mahse, erawh na tak a ni.

Ka pa’n LRA hnenah chuan, “Lungngai reng reng suh, damdawi leh thil ṭul

pawimawh senso ngai zawng zawngte chu kan rawn ngaihtuah vek mai dawn a,

buaina tur eng mah a awm lo, rilru hahdam deuhin in lo awm dawn nia,” a tih chuan

thei leh thei lo hian min rawn en a, “Ka lawm lutuk,” tiin min rawn en ṭawk ṭawk a,

min biak a duh tih ka hria, kei pawhin biak ka chak; mahse, a tân ṭawng a harsa rih

em a ni.

 Ka inthiam thei meuh lo. “Enga ti nge kan dawr nghak tura ka lo sawm kher

le?” tiin ka inzawt a, ka thlakhlelh em em piah lamah ka hmangaihna avangin ni sen

sa hnuaia ni tina a inhlawh tur chu ka ngaingam mawlh si lo a ni. “LR, min ngaidam ang che aw, i chunga vanduaina lo thleng tur hi ka hre lawk bik si lo,” tiin ka mittui ka hru leh zauh ṭhin.

Hun a liam zel a, LRA pawh a changkang sawt hle. Zak dawm tiang hmangin han

pui chiam pawh ngai lo hian Damdawi in chhung dungah chuan a vei ve thei tawh a.

|anpui fo thei lo mah ila, office kal lam emaw, haw lam emaw tal chuan ka tlawh lo thei lo a ni. Thla khat hnu hretah chuan chuan dam takin a chhuak ve thei ta a, ka lawm tak zet. Ka pa’n LRA damdawi in aṭanga dam taka a chhuah lawm nan tiin sa a lei a, anmahni in lamah kan chhungkua nen zanriah kan kil ho ta a, kan hlim ngei mai.

Chawlhni tlai khat chu zanriah kan ei lai hian ka pa chuan, “Mami, vawiin tlai

Fellowship in hman hlan khan in leng i nei a, engtin nge kan tih ang?” a tih chuan, LRA

palai an nih ka rin loh em avangin, “Eng vangin nge, tute nge? Chutiang huna palai tir chu Kohhrana inhmang tam lem lo an nih dawn chu,” ka ti mai a, ka hriatthiam hmel loh em avangin ka pa chuan, “Lawma’n palai a rawn tir,” a ti chuan ka thinrim lutuk chu ka kham nghal a, “A va’n zak thei lo ve, chutia palai te a rawn tir ngawt a,” ka tih tawn tawn lai chuan, ka nu lahin, “In inngaizawng tihna a ni mai alawm, inngaizawng ni lo ula engtin nge palai a rawn tirh ngawt ngam ang?” a rawn tih leh lek phei chuan ka ṭek sawk ni ber hian ka inhria.

Aw ki sang ṭhek ṭhawk hian, “Lawmsangzuala hi vawi khat mah ka la ngaizawng ngei lo. Kan motor a khalh tirh aṭangin min ngaizawng tawh a, thu awmze nei tak takin min be fo a; mahse, ka thinlung hian a lam a hawi ngai loh avangin ngaihzawng biakin ka be ngai lo a, a tana zuam tur leh beisei tur hian vawi khat mah ka la awm hek lo, zak thei lo lutuk mai,” ka ti bawrh bawrh a, ka nu bawk chuan, “I thu hmu lo leh i rem tihna lo chuan palai meuh a rawn tirh ngam ka ring lo deuh a ni,” a tih leh lek phei chuan ka puak keh hi a ni ber tawh. “Khawiah mah kha mi mawl khan ka thu a hmu lo. Hmanniah, ‘Palai ka rawn tir tawh mai dawn,’ a ti a, kan inngaihzawn loh lutuk avangin ka nuih a tizaa, ‘Eng palai maw i rawn tirh dawn?’ tiin ka zawt a, chu zawng chu a ni mai.” Ka thin a rim em avangin, “In hriat duh chuan ka ngaihzawng chu kan dawr nghaktu LRA hi a ni, pasalah neih ka tum bawk,” ka ti zui nghal zat a. Ka nu leh pek chuan hnehsawh zet hian, “Piangsual maw i duh?” a ti vin hlar a, chu veleh ka pa chuan, “E, nu-i, ṭawng fimkhur rawh, kan hma lam hunah hian eng nge kan chungah thleng dawn tu ma’n kan hre lo, piangsual thei dinhmuna ding vek kan nih hi, ani pawh a duh reng vang a ni hleinem,” tiin ka nu chu a khak a, ka pa thil sawi chuan min tilawm ngei mai. “Ka nu, ka

pa, min hrethiam ula, LRA neih ka duhna hi khawngaih takin min rem tihpui hram

rawh u, LRA hi ka hmangaih a ni, a piansualna tak hian ka hmangaihna a tizual a, ani lo chu neih ka tum lo a ni,” tiin ka pindan lam ka pansan ta a. Muthilh zai pawh rel thei lo vin hun liam tawh te ka ngaihtuah a,

'Ka chun nunnem, min tîr lui suh aw;

Duh loh lêng tâwn a khiangawih zawng,

Ka ngai ngam lo, ka zuam lul lo,

Belh lai lung di ka ṭhen thei lo.'

LRA hian hria se engtin ngai ang maw?Khaw var dawnah chuan rei lo te ka lo

chhing ve sek a, a tukah chuan chawlh ka la a, LRA te in lam ka pa ta a. 

Hmawmsawm eng eng emaw ka kente chu ei pahin kan inkawm a, “LR, palia rawn tir tawh mai rawh,” ka’n ti phawng mai chu, phâwk tak leh mak ti awm fahrana min en deuh hâ hian, “Sawmte, hetiang dinhmuna ka ding chung pawh hian pasal atan min la duh tho ang maw!” a tih chuan, “Hmanah khan eng nge ka sawi kha? ‘Eng dinhmunah pawh ding la ka phatsan

lo ang che’ ka tih kha ka dinna ngaiah ka la ding reng a, i piansualna hi ka ka hmangaihna che tizualtu a ni asin,” tia duat taka a hmuia ka fawh hnu chuan min en vang vang a,

“Sawmte, ka tan hian i va’n hlu tak em!” tih vawng vawng pahin min pawm chawt a,

duhthawk tak chuan ka inkeih ta mial mial a. Nilenga inkawmin, Office ban hun pangngai aia hma hretah chuan ka hawsan ta a ni.

Kan motor khalhtu Lawma chu ni thum lai a lo kal tawh loh avangin ka pa’n chanchin a zawt a, an kawmthlang zawngṭah kung a\ang chuan a lo tla chu niin, damdawi

in lam panpui a, X-Ray leh thil ṭul dang dang an tih hnu chuan a kawnga chin hnuai lam chu a lo zeng niin, in lamah an lo inenkawl zawk tawh chu a lo ni.

Ka thin chu tirim viau mah se, a khawngaihthlak ka ti hle thung si. Lawma

chanchin hrilh ka duh avangin Office kal pahin LRA ka tlawh kawi a; tlai lamah chuan Lawma ka tlawh kawi thung. Min hmuh veleh ngaihdam min lo dil nghal chung mai a, a chanchin LRA’n a hrai leh hriat loh min zawh chuan, zing lama ka hrilh tawh thuin ka chhang mai a, “Min lo nghak la, LRA lehkha tur ka’n ziak lawk ang e,” a ti a, thingpui in pahin ka nghak a, a ziah zawh chuan, “Khawngaihin LRA chu min lo peksak hram dawn nia,” tih pah lehkha chu min pe ta a.

LALRINAWMA (LRA):

Tukṭhuan kan ei lai takin Sawmtei a rawn lut hlawl mai a, “E, in hmelchhiat lai a ni

maw?” tiin a rawn nui lut ver ver a, “Hei, LR, i letter tur a nih hi,” tih pahin lehkha min

pe a, “Luck bik si aw, ka thik khawp mai,” tih pahin a nui tlawrh tlawrh a. Kei pawh ka

kham thuai a, ṭhu tura ka tih lah chuan a tlai tawh thu leh a hmanhmawh thuin min

chhang a, min chhuahsan leh mai a.

Lehkha chu ka’n chhiar nâk chuan,

“LR, a hmasain khawngaih taka min ngaidam turin ka nge a che. I piansual chhanvkha eng dang vang mah a ni lo va, keimah vang liau liaua piangsual i ni,” umm... ama khalhah kan che sual a, a tihsual chu a inthiam lo hle a ni maw? A, chhiar zel phawt ang.

“Sawmtei hi ka duh a, ka hmangaih takzet. Mahse, ka duhna leh hmangaihna engah maha a ngaih duh loh lai a, inneih duh khawp hiala in inhmangaihna tih ka hriat khan ka rilru a na a, ka thin a rim hluah hluah. I chhiatna tur ka ngaihtuah ta a, in sakna bungrua kan phurh chhuah dun khan remchangah hmangin motor aṭangin ka zuan thlaksan che a, kha dinhmun hrehawm takah khan i din phah ta a nih kha. Min ngaihdam theih chuan ka lawm ngawt ang. Lawmsangzuala."

mak tak a ni, ka lehkha dawn chu! Lawma lah chu a lainatnawm riua bawk si. A chhanna tur ka ziak a, Sawmtei pek turin ka dah ṭha ta a nih kha.

Ni leh thla ralin, kum a vei leh meuh chuan kan palai tirhte thu rawn hawnin a zir

bawk a, tunah chuan Sawmtei nen ngeia nghet taka hmangaihna par fung kan lo dawm dun ṭhin chu a par zu kan tlan a lo rem ve ta. Sawmtei pawh ruaia thlah ngei an duh tlat avangin a buai hle ang tih chu ka ring thiam mai a, keini lam pawh kan buai map map khawp mai. Kan theih ang tawk tawkin kan inbuatsaih ve sauh sauh a, thil ṭul ti turin kan hmanhlel tlang a ni ber e.

Ka mitthlaah ka pa a lo lang a, ka ngaih a zual ngei mai. Phur takin kan insiam

sauh sauh a, inkhawm dar a rik meuh chuan Biak in kawtah ka ding vâng tawh. Min lawmpuitu an tamin, Sawmtei te chhung lam mi lian an lo ni vei nen, inkhawmpawh kan ṭha ngiang mai.

Pastor chuan thu min itiamtirin, thihna chauh lo chuan min pawhṭhen tawh loh

turin min inkutsuihtir ta. Tunah chuan ka hmangaih em em Sawmtei chu ka nupui a ni a, ka ta a ni ta. A ta ka ni bawk a, kan pahnih chuan pum khat kan ni tawh si. Thianghlimna leh mawina duhawm tak kan vawn nun tlat chu tu ma tihbuai lohin kan inhlan tawh thei tawh dawn a ni.

Inkhawm banah chuan Biak in tualah thla kan la a, kan hlim tlang takzet.

Duhsaktute lak aṭangin thilpek pawh kan dawng hnem narawh e.

 Tichuan, Sawmtei chu kan in riang tak leh pa tel loa kan seilenna hmunah ngei chuan ka lawi lut ve ta ruah chu a ni a, ka pa’n rawn hmu ve se tih chu ka thinlung kil khata chuan a ri reng mai. Zan lamah chhung kimin present te chu kan han hawng vel a, kan hlim dar dar teh asin.