HYPNOSIS | INDAWIMUT NA

Indawi mut (Hypnosis) hi Greek ṭawng 'Hypnos'- tih aṭanga lâk a ni a, 'mûhil'- tihna a ni âwm e, Greek ho mutthilhna pathian hming châwi a nih ber chu.

Indawi mut hi piannawn lehna leh deja vu- te nen hian sam phiar ang mai hian a in phiar zawm chiat mai a,  a mal ṭheuh a lâk hran pawh thil tih theih loh hul hual ang a ni.

Indawimut na hi thlarau be pawp thei Medium tam tak in an hmang ve bawk ṭhîn a, tin, chutiang ni lem lo tân pawh a theih ve bawk a, kum zabi 17- chho velah te kha chuan a lâr in mi tam takin he indawimut dân hi an zir a, eizawn nan an hmang nasa êm êm a ni.

Hetiang thiam bîk te hi rintlâk tak tak awm mahsela inbumna a awm tel ve ṭhin avâng hian mi tam tak chuan dâwt mai a ni e an lo ti ve mêk bawk a.

He indawimut hi a tam ber chuan mihring piangnawn leh a in ngai te nun hmasa chhui nan an hmang a tih theih âwm e, Tin, hmun dang a rhil thleng mêk hriat nan a hmang an awm bawk.

Tunlai ah chuan rilru tih hahdam nan leh taksa tih hrisel nân a hmang an tam zâwk mah âwm e.

Mahsela Science lam chuan he thil hi a hnawl ṭhak thung a, he a hnawlna chhan erawh hi chu finfiahna felfai tak a awm loh vâng a ni pakhat a, rau lam thil rêng rêng hi chu mihring thiamna ringawt hi chuan a finfiah thei ngai dâwn lo a ang hle mai.

America ram a rilru hmang a damlo enkawl thiam Adgar Cayce- pawh kum sawmhnih leh pakhat (21)- anih in hrawk lama harsatna tâwkin aw chhâng natna a vei a, chu a natna avâng chuan indawimut thiam (Hypnotist)- in a enkawl a. Vawikhat chu chutia dawimut anih anih lai chuan aw pakhat hian," Natna dinhmun chu kan hmu thei. Rilru lam enkawlna hmangin a tihdam theih,"- tih a sawi ri a hria a. A lo harh leh chuan a aw chhâng natna chu mak takin a dam hmak mai anih chu.

A harh leh hnu chuan a aw hriat chungchang chu Hypnotist- hnenah a han sawi a, chumi hnu chuan a dawi mu leh ta a.

Chutia dawimut anih leh lai chuan Adgar Cayce-a chuan amah enkawltu Hypnotist vèi mêk pumpui natna chu engtia enkawl dam tûr nge anih a hrilh daih mai a ni.

Chu Hypnotist- pawh chuan a sawi ang enkawlna a han neih hnu chuan a dam ve hmiah mai. Chumi aṭang chuan Adger Cayce-a chuan dawimut te zirin damlo te a enkawl ve ta a ni.

A châng chuan Doctor te beidawn san tawh damlo thlengin a enkawl dam a, lâr pawh a lâr hle nghe nghe a ni.

Damlo ṭhenkhat phei chu a hmun a pan lovin hmun dang aṭanga enkawl dam te pawh anei a, mahsela chunglam mi tu emaw ṭanpuina avânga natna enkawl dam thei anih thu sawiin enkawlna man a hranpa takin ala ngai lova, lawmthu sawi nan a an pêk ang ang erawh chu hnial lovin ala ve thung. Chutianga damlo enkawl hna chu a thih dawn kum 1944- thlengin a thawk a ni.

Mak tak maiin Adgar Cayce- hian Medium leh Hypnotist dangte anga inbumna hmang a damlo enkawl ṭhîn tih a puhna leh sawichhiatna a dawng ve ngai hauh lo. Bumna hmanga damlo enkawl chîng te leh thlarau be pawp thei anga insawi bum hmangte dapchhuah lam a lâr, Havard University-a Dr.Hugo Brugh-a chuan Adgar Cayce-a tihdan phung chu ni thum zet uluk tak a a enchhin hnuah, 'Inbumna thil  tel lo.'- tiin a nemnghet a ni.

Rilru hmanga damlo enkawl dam thei te zînga England ram-a lâr deuh mai pakhat chu kum 1893- a piang Harry Edward- hi a ni âwm e, Kumtin pantu mi sangnga chuang an awm reng a, kum 1859 khân a damlo enkawl tawh zât chu mi nuai ruk chuang an ni. Ani hian natna chitin a enkawl dam thei tih chu mit a hmu leh tawng mi ṭhahnem tak an awm a, Khawvel ram hrang hrangah zin kualin mipui hma ah in enkawlna a nei ṭhîn a ni. Zeng natna vei, wheel-chair-a  nawr ngai te pawh mipui hmaah ngei a tihdam tâk te pawh an awm a ni.

Adgar Cayce leh Harry Edward- te hi indawimut hmanga damlo enkawl ṭhîn annih mai bâk ah ESP(telepathy) hmang ṭhîn anni bawk a, a awmzia berah chuan Indawimut ti ṭhîn te hian an mi dawimut te rilru kha an thunun thei tihna anih chu. Mahsela ESP hmang chuang lova indawimut ti ṭhîn tam tak an awm tel bawk tih erawh chu hriat angai ve tho.

London-a Psychical doctor pakhat chuan hypnosis- hmangin mi a dâwi mu a. A dawi mut a ban chu khawih pahin, " I ban hi thir lingin ka dep ania aw,"- a han ti a. Chutia a sawi aṭanga rei lo tê ah chuan a dawi mut a ban chu mei kan ang mai hian a rawn durh chhuak ṭawk ṭawk mai anih chu. Tichuan midang a han dawi mu leh a, engmah sawi lovin thir lingin a banah chuan a han dep hlawk mai a, Mahsela a dawi mut a chuan na ti hmêl a pu tawh lova; a dehna thîr chu a sat êm avângin a ban erawh chu a durh ve tho a ni. Mahse, a ban durh chu rei lo te ah a bo leh daih a, a dehna hmuamhma pawh engmah ser emaw chambang pakhat mah a awm hauh lo thung.

American mi Scientist- pawh hi mi dawi mut thiam, Hypnotist- in hun eng emaw chen a muttir a, chutia a mut lai chuan hypnotist chuan a harh leh hunah pindan chhûng a ṭhutthleng pakhat chu pawnlam a dah chhuak tûrin thu a han pe a. Tichuan chu Scientist- rawn harh leh chuan engkhaw sawi set set lovin ṭhutthleng chu a pu lawk a, pâwnah a chhuah pui  ta liah liah mai a. Amah Scientist ber a pawh chuan engvanga chutianga ti nge a in hre rêng rêng lo. A hnu a a sawi leh dân chuan khatianga tih duhna rilru kha a put tlat vâng a ti.

Hetiang hi ESP leh Indawi mut hman pawlh a damlo enkawl ṭhîn te chêt dan leh tihdan hriatthiam awlsam theih dân ber chu a ni.

Tin, Indawimutna avânga damlai thla (Double Exposure) - chhuak tih ṭawngkam pawh hi he Hypnosis- huang chhungah hian a lâr hle mai bawk a. Heti ang phei hi chu sual rawngbawl nan a hmang te pawh an awm hial a ni. 

Ṭumkhat chu Sweden ram a Psychical Doctor pakhat in indawi mutna hmangin nula pakhat chungah a hmang chhin a.

Chu nula chu a han dawi mu a, chutia a dawi mut lai chuan nula thlâ(damlai thla) chu mêl zahnih leh sawmnga zet a hlâ, an in lamah a tîr ta a.

Nula rawn harh leh chuan an in a kal a, a chhûngte a tlawh thu a rawn sawi a. Choka a chair pakhat chungah a ke lehlam hlâng in a va ṭhû a; a nu chuan eirawng a lo bâwl a, a pa chuan chanchinbu a lo chhiar mêk niin a sawi. Hetiang a a sawi vek hnu hian doctor chuan nula chhûngte chu a va phone ta a, Anni chuan an fanu chu choka chair- a a ke lehlam hlâng chunga a ṭhu an hmuh thu leh, rei lo tê a a bo leh tâk daih thu an lo hrilh a ni.

Hetianga indawimut lai a hmun danga in kaltir hi a tam zawk ah chuan dawi mut a awm mêk khâ a va kalna leh a tawh mihring khân an lo hmu thei tlangpui a, biak erawh chu an in be ngai hran lo tih hi sawi dan leh researcher- te chhinchhiahna tam zawk ah chuan hmuh a ni a.

Amah erawh chu mak tak maiin hetia dawi mut mêk te hi an va tawh mihring te khân hmu thei lovin an thâwm ah erawh an awm thu fiahna ṭhenkhat a awm ve tho bawk a. Kan hriatthiam theih nan chutiang zîng a pakhat chu han tarlang leh lawk ila.

Kum 1899- khân American mi, California a chêng nu pakhat Mrs.Laura Story, fa sên thla sawm mi pawmlai chu Hypnotist- pakhat in a dawimu a, chutia a dawimut lai chuan an in, chulai hmun aṭanga mel hnih vel lai a hla ah chuan a damlai thla nge a ngaihtuahna a chhuak a. A rawn harh hnu a a sawi leh dan chuan;

An inah kalin a fa sên, khum a muhil lai chu tiharh a a fiam mai bâk ah an choka dawhkan a glass no pakhat chu chhuat ah ti tla in a keh a. He a va kal lai hian an nau awmtu Negro Mrs.Martha- pawh naute mutna khum bul ṭhutthlengah a ṭhut thu a sawi a.

Chutia a sawi hnu chuan Hypnotist- chuan an in lam chu phone a bia in Mrs.Laura Story- thil sawi chu a dik leh dik loh a zawt a.

Chu nau awmtu chuan Mrs.Laura- dawimut a a awm lai vel chuan naute khum a muhil chu a harh thu leh eng emaw hmuh nei niawm tak a a bul boruak vel chu hlim tak a a en thu te, fiam ang mai a a nuih thu te a sawi a.

Tin, chumi hnu lawk a choka dawhkan chunga an glass no dah pawh khawihtu awm lova chhuat a a tlâk keh thu te pawh a sawi bawk.

Hetiang a chung a kan han tarlan tâk te hi chu a ṭhen a zâr chauh a ni a, indawimut chungchangah hi chuan a tam ber chu piannawn lehna nen a in zawm tlat an ni tlangpui.

Hêng piangnawn leh a in ngai te hi mi dawimut thiam te'n dawi mu in an nun hmasa lamah an kal tîr ṭhîn a, chutiang a an nun hmasa a an thil tawn te chu an rawn harh chhuah hnu ah te an sawi leh a, Tin, chutia dawi mut a an awm lai chuan a dawi mu tu te khân an thil hmuh leh hriat te chu an lo zâwt a, anni chuan an sawi ve zel a, tichuan dawimut thiam chuan an lo ziak ta ṭhîn a ni.

Mahsela he thil hi inbumna mai ti pawl an awm a, a chhan pawh hetiang piangnawn leh a insawi te dawimut a an awm lai a an thil hmuh leh hriat te dik vek loh vâng a ni pakhat a, mahsela science pawhin a a fiah theih loh thil anih avângin dâwt vek a ni tih erawh chu a theih vek bîk loh.

Kum 1952- a Bridey Murphy-i  chanchin pawh kha eng emaw chen chu a dik a, amah hi Pueblo, Colorado- a chêng Virginia Tighe-i, Kum 1923 April ni 27 a piang leh July ni 12, 1995- a boral a ni a. Kum 1952- khân amateur hypnotist Morey Bernstein-a hnenah kum sawmnga leh pakua (59)-  zet kal ta a a nun hmasa chanchin a puang a ni.

A sawi dân chuan kum zabi sawm leh pakua (19)-  lai a Ireland ram khaw pakhat a awm a ni a, chutih hunlai a thil thleng tam tak a sawi a. An han zirchian chuan eng emaw chen chu a lo dik ve a; mahse; a sawi anga ama chanchin erawh engmah hmuh tûr a awm lo thung.

Hypnotist- chuan a mi dawimut rilru leh thlarau te chu a lêt zâwngin nunhlui, a nun hmasa nun kha zawh tîr zêl a, an naupan lai nun thlengin a hre chhuak ta ṭhîn a ni.

An nun hmasa a an naupan lai nun hre chhuak te hi dik takin an kum sâwm(10) tlin pian cham chanchin sawi lêt thei za ah sawmkua pathum (93%) an awm a, kum sarih pian cham hre lêt thei za ah sawmriat pahnih (82%) an awm bawk a, kum li tlin pian cham hre lêt thei tu za ah sawmruk pakua (69%) an awm bawk a ni. Mak dangdai ve deuh mai chu, an mi dawimut in an naupan lai nun an hrechhuak a, a sawi chhuah leh lai hian a hmel leh a awmdân te thlengin naupang zia ang chiah a a lanna hi a ni.(!)

Researcher- te chuan mi tuemaw in nun thar aneih hma a anih dân (nunhlui) chu dawimutna hmangun a hriat theih an ti a. Indopui pakhatna hma deuh a psychical lama mi thiam France- mi pa pakhat chuan chutiang chuan a lo zir chiang ve tawh ṭhîn a. A mi dawimut te chuan an tunhma nunhlui te chu an sawi hlawm a, mahse a dik vek ti tûrin an thusawi tâkte bawhzui a finfiah erawh a awm chuang lo.

English mi, Psychiatrist Dr.Sir Alexander Cannon, Kum 1896 a piang leh Kum 1963- a boral ta chuan,

" Tunhma khân nun hmasa hi a awm tih ka ring ngai lova, mahse mi sangkhat chuang zet mai ka han zirchian hnuah chuan ka pawm lo thei ta lo a ni." a ti.

Kum 1952- khân America ram ah chutiang zirchianna lam chanchin ziakna lehkhabu pakhat arawn chhuak a, ngaihven pawh a hlawh hle.

Lehkhabu ah chuan Mrs.Ruth Simmons-i dawimu a, a nunhlui chanchin an zawh thu a inziak a. Dawimut anih hnu in a hun hmasa lam chanchin an han zâwt ta a; Mrs.Ruth Simmons-i chuan a nun hmasa ah chuan Ireland ram a nu pakhat 'Bridey Murphy-i" anih thu leh a chênna, a chhungkaw chanchin leh nun a lo hman tawh dân te thlengin kimchang takin a sawi a. America- chanchinbu pakhat chuan Ireland- ramah reporter tîrin ava finfiah ta a.

Chutia a va finfiah hnu chuan Mrs.Ruth Simmons-i  thusawi ṭhenkhat chu a dik tih an hmu a, ṭhenkhat chu hmunhma hmuh tûr awm tawh lo te an nih hlawm avângin a dik leh dik loh a fiah theih tawh loh thung.

He thil ah hian thil ṭhenkhat chu sawifiah mai harsa tak a  ni a. Mrs.Ruth Simmons-i chu Ireland- ah vawikhat mah la kal ngai lovin, Ireland- chanchin ziahna lehkhabu pawh la chhiar ngai lo a ni a. Mahse, kimchang takin chu ram chanchin a sawi vek thei chu thilmak a tling ve hrim hrim.

Vawikhat chu Hypnotist- in a tih tîr avângin a harhchhuah leh hnu ah, nun hmasa a thiam anga a insawi Ireland hnam lâmin a lâm bawk a ni.  He thil hi chu inbumna rawng kai lo tluk a ngaih a ni, a chhan chu hê'ng a chanchin ziaktu hi sum vânga indawimut hna thawk a ni lova, pa zah kai tak anih angin Mrs Ruth Simmons- i sawi ang ang chu tape ah a record a, a zirchian dân te chu tlang takin a phochhuak a ni.

Indawimutna leh piannawn lehna ring lo Scientist ṭhenkhat te chuan a nun hmasa chanchin chu an han zâwt ve ta a, mahsela Mrs.Ruth Simmons-i thusawi te chuan an ngaihdan a thlâk danglam phah chuang lo a ni. Scientist te chuan he thil ah hian a scientific lohna anga an ngaihtheihna laite chu an han sawi a.

Hypnotist chuan a mi dawimut chu, "I pian hma a i thil tawn zawng zawng min han hrilh rawh le, Ram dang, hmun dang chanchin pawh ila hre thei ngei ang chu, chû'ng chu min hrilh thei tûr a ni." ti a thu a han pêk rual chuan a mi dawimut in eng thil nge a sawi ang tih kawng a kawhhmuh nghal anga ngaih theih a ni.

Dawimut mêk te tih tûr leh tih theih awmchhun chu a dawimu tu Hypnotist- thusawi zawm mai a ni tawh si a; a châng chuan hypnotist thu zawm theih nâ'n dâwtin thil eng emaw an phuahchawp ve thei tho tûr a ngaih a ni. Dawimut lai hian an thluak leh an ngaihtuahna te chu a chak ṭha hle ṭhîn a, kum li, nga vel an nih lai a an chhiar tâk lehkhabu hial pawh a chhûnga awm ang chiah chiahin an sawi chhuak leh thei a ni.

A khaikhawmna atân chuan piannawn lehna ring lo tu te chuan Bridey Murphy- i zia râng chu Mrs.Ruth Simmons-i naupan laia a thil tawn leh hriat aṭanga lo piang chhuak ve anga ngaih a ni. Chû'ng a thil hriat leh tawn te chu engtiang chiah nge an nih a, khami nî khân eng hun leh darkar chiah nge anih tih erawh chu tuma'n chiang takin an finfiah thei rih lo chu a nia.

Engpawhnisela, psychical researcher- te chuan an mi dawimut a nunhlui chhui zui chu ṭha an ti tehchiam hlawm lova. Chuvangin hê'ng thilah hian hypnotist- te hi eng emaw zâwng tak chuan an in rawlh tel ve tlat ni hian a lang bawk.

An mi dawimut in a sawi tâk te chu tuna hun a hman mêk nen in kungkaihna nei miah lovin sawi dik ve chat chat mah se chumi thil chauh chuan mihring te hian nunhlui kan nei tih nemnghet mai theiin alang lêm chuang lo. Medium- leh mitthi thlarau an in biakpawhna ah pawh hian medium- thusawi dik dân te mai bâkah, mitthi hmanrua(a damlai a mi) a hriat dik theih dân, mitthi thlarau vin a luhchilh laia a hmêl awmdân te bâkah thil tam tak belhchian ngai a awm a ni.

Chuvangin hmanlai aṭanga mihring thiamna hmanga hriatfiah an lo tum tawh chu tun thlengin hriatfiah theih loh leh finfiah theih lohin ala awm a, dâwt leh inbuma te chu tam tak tel mahsela thudik leh rintlâk tak tak a awm ve bawk a, Science aṭanga finfiah theih loh vâng ngawt chuan hnâwl theih a ni chuang bawk si lo.

Chuvangin kum tam tak lo kal leh mahsela thlarau lam thil chu thlarau aṭang vêk a chhui loh chuan hriatthiam leh finfiah theih a nih a rinawm chuang loh.