DEJA VU

Dèjá vu- hi French ṭawng a ni a, a awmzia tak chu," Already seen" ( hmu tawh) tihna a ni. Deja vu- hi piannawn lehna nen a in kaihhnawih hle mai a, sawifiah dawn pawhin piannawn lehna sawi tel lo chuan a sawi theih loh hial a ni.

Hetiang hi a tak ah emaw mumang ah emaw a thleng ve ve thei a, tun thleng a enge anih chiah tih la finfiah theih loh leh hriatthiam theih loh a la ni. Mithiam te'n a an sawifiah dân kan hriatthiam theih nan a fiah thei ang ber a kan sawi dawn chuan; kan thluak a kan thil hmuh leh hriat bâk ah kan mumang châmbâng ina a siam chhuah hi a ni.

Hê'ng kan neih chhan chu quantum mechanics in a sawi ang in kan ngaihtuahna (thought) kha energy a lo chan tawh vang in information kan dawn tawh kha kan thluak chuan memory ah luh tir phawt in a lo analyse ta lo a. Chuvang in heng hi alo awm thei ta a ni e an ti a. A chhan chu kan ngaihtuahna chak tak hi energy a lo nih chuan mihring ṭhenkhat emotion ngah deuh te hian deja vu hi an experience duh bik an ti.

Mahsela mihring emotion ngah deuh leh ngah lo ah pawh angkhat vekin a thleng a, chuvangin hei chu rintlâk tak tak ala ni thei chuang lo a ni.

Tin, mizo ah pawh Deja vu- nei leh tâwk tawh pawh tam tak an awm ngei ang a, tuna a ziaktu ngei pawh hi vawi tam tak a awm tawh a ni.

Mahsela a tawng tawh ho hnena ka sawi duh chu, he thil hi rilru buai lai leh taksa chak loh lai hian a awm duh bîk in in hre ve em tih hi a ni.

Vawikhat mah la kal ngai lohna hmun kan va thleng a, tunhma a thleng tawh ang thân a inhiatna leh inngaihna a awm thei. Chu thil chu ni anga ngaihna ni lovin, hriatrengna rilru nen a inzawm a ni. Chutiang thil tawng te chuan chumi hmun an thlen veleh tunhma a chumi hmun an thlen tawh dân engkim an sawi leh thei vek a, Chuta a lo awm tawhna hmunhma thlengin an hre bawk.

Chû'ng thil chu, tunah, nun hmasa hlimthla te a rawn inlâr vâng niin mithiam ṭhenkhat chuan an ngai.

Vawikhat chu Switzerland- ram a pa pakhat chu a naupan lai aṭangin a thluak a chak lo hle a, a chhûng te'n theih tawp chhuahin siam danglam tum ve ṭhîn mahsela awmzia tak tak a nei thei chuang lo va. Tichuan ziak leh chhiar thiam mang lovin pa chhâw tak a lo ni chho a, mahni pawh in enkawl zo lovin kum sawmli leh paruk (46)- a nihin a thi ta a.

Mahsela, a naupan laia a lo ziah, water colour painting- te chu Euro- khawmual ah te chuan a lâr ta êm êm mai a. Lemziak thiam pui pui te'n a lemziah te chu an fak hle a, England Lal George IV- ngei pawh khân a lei ve nghe nghe a ni.

Hetiang hian mi ṭhenkhat chuan beihpui thlâkna leh tumna nei êm êm chuang lovin, thiamna mak leh sâng tak tak an nei ṭhîn a, chûng chu chhûngkaw inthlahchhâwnna nen pawh in kungkaihin a lang bawk ai lo. A chhan chu, chûng mi mak danglam tak tak te leh an chhûngte chu an inthlahchhâwn dân en pawha chhûngkaw pangngai ve mai an ni hlawm a, Science leh a kaihhnawh thiamna leh zirchianna te phei chu an mumal lovang tih alang reng mai bawk si a. Chûng thil chu piannawn leh thil ringtute erawh chuan ' Nun hmasa a a fin tawhna a chhawm nung zêl a ni' an ti.

Tin, hetianga Deja vu- nei te hian khawi hmun emaw, tu emaw, thil hming leh bungraw eng emaw te chu an ngaina in a ṭhen an haw êm êm leh thung bawk ṭhîn a. Psychical Researcher- te ngaihdan ah chuan, chutiang hriatna chu a naupan lai thil te chiang tak a a hrechhuak leh anih chuan awmze nei lova hlauhna, tenna, huatna leh thinurna zawng zawng a bo vek ṭhîn an ti. A awmzia chu miin sazu(mouse)- a hlau êm êm mai a, a hlauh chhan chu a naupan lai khân sazu nena in kungkaih thil rapthlak leh hlauhawm tak a tawn vâng a ni thei a ni.

Mahsela chutiang thil tawngtu naupang zawng zawng chu, chuti'n an awm vek e tihna erawh a ni kher lo  chuang lo. Chuvangin he thil hi hriatthiam harsa leh buaithlak tak a ni a, dâwt leh inbumna a ni ti a piannawn lehna ring lo tu te ngaihdan pawm dâwn a pawm vek theih si loh a ni ve tho bawk si.

Khawvel fang kual a zin ṭhîn American nupa tuak khat chuan India ram Mumbai khua an lo thleng a. Mak deuh maiin kawng kawhhmuh tu nei hlek lovin an duh duhna hmunah an kal zut zut thei a, Kawng kawi an thlen hunah eng thil nge an hmuh dawn tihte inhrilhtawn malh malh chungin an kal zêl a, kawngkawi an va thlen chuan an sawi ang thilte chu a takin a lo awm ve zêl a! A bîkin hmawng kûng lian tak ding bula in pakhat chanchin chu an rilru ah a lo lang a, tichuan chu hmun chu an va pan ta a. Mahse, awm ni a an hriat hmawng kung leh in chu an hmu ta rêng rêng lova,  kawng a an hmuh police pakhat chu an zâwt ta a.

Police chuan," In sawi angin, tunhma kha chuan he hmunah hian hmawng kûng leh in pakhat chu a awm ve ngei a. Chu in luahtu te chu 'Burn'- chhungkua an ni, mahse tunah chuan an awm tawh lo; an in leh hmawng kûngte pawh a awm tawh lo a ni," a ti a. Mak deuh mai chu, he American nupa te hian fa pakhat an nei a, a hming chu 'Burn' tih a lo ni reng mai.

Kum 1951, January ni 19- khân Uttar Pradesh, India a thingtlang khaw pakhat a puansu tu Jagud Sawaparasub-a fapa neihchhun Mona, kum ruk mi chu a kawlai len laiin mi pahnih in an hruai bo va, rawng takin an that a. Tualthattu anga an puh zînga pakhat chu puansu a eizawng a ni a. Pakhat erawh lumêt a eizawng a ni ve thung. Mahsela Court chuan thuhretu leh finfiahna engmah a hmuh loh avângin an pahnih chuan a thlah zalen ta a.

Kum 1951, July thla a lo thlen chuan chu khua a Rangud-a te nupa chuan 'Rabit Shanka'- an tih, fapa duhawm deuh mai an nei thar a, tichuan an fapa kum thum a lo nih chuan a chhûngte hnenah a nunhlui a an inah va kal a, a infiam ṭhinna Toys- te lâksak tûrin a ngên chiam ṭhîn a.

Tichuan kum ruk anih in an school a an zirtirtu pakhat hnenah a nunhluiah chuan thah anih vânga thi anih thu leh a hming pawh Mona-anih thu te a hrilh ta a.

A pa ina chu thu a hriat veleh an khua ami Jagud Sawaparasub-a te inah a hruai ta a. Chu naupang chuan Mitthi ta Mona- pa a hmuh veleh a kuah chat a, a nunhlui a apa ngei anih thu a sawi chhuak ta a.

Tichuan thah anih dân zawng zawngte pawh chu chiang takin a sawi ta vek a.

A sawi dân ah chuan, thah anih dâwn chuan kawlthei a ei thu te, a hnu ah luipui kam a hruai anih thu te leh biakin bul a thah anih thu te, luipui kam ṭiau vut kâr a phûm anih thu te thlengin a sawi ta vek a.

Chûng a thusawi te chu a thlen dân nen a inang vek a ni. A nunhlui a a in fiamna toys-anga a sawi te thleng chuan dik lo pakhat mah a awm lo.

Chumi hnu chuan Naupang Rabit Shanka-a chuan pathian an biakna kût ah amah that tu anga a sawi zînga pakhat chu a hmu ta thut mai a. Chutia a hmuh veleh chuan hlau tak hian a khûr zawih zawih mai a ni.

Rabit Shanka- hian lumettu leh puansu tu zawng zawng chu a hlau êm êm ringawt a, chû'ng mi te a hmuh chuan a tlanchhe daih zêl. A nghawngah pianpui ser(Kutchuk) lian deuh mai a nei a, chu ser chu a nunhlui a thah anih lai a an hliamna hnu hma a ni.

Mahsela kum sawmleh pakhat anih in a nunhlui te chu a theihnghilh vek a, tunhma a a lo sawi ṭhin zawng zawng te pawh a theihnghilh vek a ni. Tin, a hlauhna leh thinrimna te pawh an lo reh tial tial a, amah thattu pakhat zâwk phei chu a theihnghilh hlen ta bawk a ni.

Tin, mihring mai ni lo, ran te pawh hetiang Case- ah hian chhinchhiah an lo ni ve nual mai a, hei hian hrilhfiah a ti buaithlak ve êm êm bawk a ni, a chhan chu ramsa leh ran te hi thlarau pawh nei ve lo angin mihring te hian kan ngai tlat si a. Chuvang chuan kan ran vulh te pawh an thih chuan thi hlen tawp tûr ah kan ngai tlat si.

America rama a megazine- pakhat a an tarlan case mak deuh mai hi han tarlang tel lawk ila;

California State a chêng, Edward leh Anny Remark-i te chuan ni khat chu Car-a an zinchhuahna na ah an ui vulh lai 'Dosy'-i an tih chu an hruai tel ve a.

Vangova- an tlan pelh lai chuan Dosy-i chu awm hle hle thei lovin a phî chung mai a, hmun pakhat an va thlen chuan Car- chu darkar khat ah mél sawmruk- a chakin tlân mahse, vawilehkhatah Dosy-i chu Car- aṭang chuan a zuang thla ta daih mai a.

A neitu Edward-a te chuan chutia an ui a tlân chhuah avâng chuan an Car- ti ding ve nghal in an ui chu an ûmzui vat a. An ui an va ûm phâk chuan huan pakhat gate bulah hian a lo awm a, gate chu hawn tumin a lo nawr nek nek a. Anny-i'n a a va pawm lai chuan huan gate chu lo inhawngin nu pakhat a rawn chhuak a.

Dosy-i'n chu nu a hmuh veleh chuan Anny- i kut aṭang chuan zuang thla in chu nu lamah chuan a tlân phei a, hlim hmel deuh hian chu nu chu a liak kual vêl a, chumi hnu chuan in chhûngah a tlân lût leh ta daih a.

Inchhûngah chuan a hawi kual hû hû a, chutah pawnah rawn tlân chhuak lehin kudam ah ava tlân lût leh ta a. Edward-a te chuan an ûm zui zêl a, kudam an va thlen chuan thil mak deuh mai an hmu ta.

An ui Dosy-i chu mahni inleh lo ang mai hian a khawsa a, kudam chung lawnna ah chuan tîmna deuh hauh lovin a lâwn chho ta a. Chutah chuan, hmun tin mai chu a han hnîm kual leh a, chumi pah chuan a rûm deuh ngur ngur a.

Anny-i chuan a va pawm a, a chhuk pui leh ta a ni.

Kum ruk liam ta khân huan gate- lo hawngtu Mrs. Woodford-i hian Quiny-i tia an koh ui nu pakhat a vulh a, Mrs.Woodford-i fapa Robert-a chuan leilawn aṭanga kudam chung lâwn dân a zirtir ṭhîn a. Chutiang chuan Quiny-i chuan kudam chhâwngah chuan no a nei a. Chumi hnu ni hnih ah Mrs.Woodford- i chu thil pawimawh ah a zin chhuak a, a fapa Robert-a lah hmundangah College kal a a awm bo lai a ni bawk si. Tichuan Mrs.Woodford-i chuan inchhûngah a ui chu a awm tih theihnghilh in a kalhhnan a, a zinbo chhûng chuan a ui chuan kudam a a note te chu a ngaihtuah in a phî chung mai a. Ni hnih hnu, a zin haw a, kawngkhar a hawn rual chuan a note awmna kudam lamah a ui chu a tlan chhuak ta nghal a.

Mahsela kudam chhûng a a chhâwng chung panna leilawn chu a rap pial ta hlauh mai a, a hnuai a thir zum in phun ah chuan tla fuh in a thi ta nghal a ni.

He ui hi a piangnawn leh emni tih dawn chuan ran mai mai chu piannawn awm loh tak a ni bawk si. Thil mak ve tak chu a ni.

Engpawhnisela, he deja vu hi piannawn lehna nen a inhnaih tak leh piannawn lehna hrilhfiahna a ni pakhat a. Piannawn lehna hian Hindu sakhua ah hmun pawimawh tak mai a chang a, Chuvangin piannawn lehna leh deja vu chungchang hi India ram chhûng chauh a thleng nisela chuan Hindu sakhaw tih dik tumna emaw tih lâr tumna tih mai theih a ni tûr ania, mahsela Hindu sakhua pawh ni lo, khawvel hmun hrang leh ram hrang hrang lamah Case- a awm ve zêl hian mithiam te lu a ti hai in a chhan an hrethiam thei lo a ni.