YOUNG WARLOCK | The Epic Of Wizard Lalruanga

SAWIHAWNNA :

Pathiante rorelna Van chung sâng tak aṭanga chhuak ta,  Mihringte malsawm ṭhîn tu, Pathiannu mitmeng de riai Mal- chuan Lalruanga te khua chu mitkhap kar a'n a thleng a, mihringte hmuh theih loh a in siam in Lalruanga te inchhungah a lut a, nausen Lalruanga- chu khum ah, pawnpui chungah hian tui takin a lo muhil sêk sêk a. A kiangah chuan  Lasi nula pahnih te pawh chu hlim takin an lo awm bawk a.

An hnenah chuan, " In nausen enkawl hi uluk takin, engtik lai pawhin in vêng reng ṭhín tûr a ni, a lo seilen hunah chuan hna ropui tak ala thawk dawn a, chumi chu a hlen ngei ngei tûr a ni," a ti a.

Lasi nula te chuan," Aw, Pathiannu Mal, i thupek te chu kan theihnghilh ngai lo e, nimahsela keini tihtheih bâk he nau chungah hian a awm a ni, a thinlung sak tak mai hi tuma dan rual a ni lo ve,"  zah tak in an bia a.

Mal- chuan Lalruanga muhil mêk chu pan hnaiin a lu ah a kut a nghat a,

"I thinlung a huaisenna hi  tumah in an thlâk thei ngai lovang, Pathian te, Tlâng Lal leh Huai tam tak te pawhin an hneh ngai hek lovang, i zinkawng zawh tûrin ala rawn nang che anga, chu ni a thlen hunah chuan tunge inih tih chu a lo lang tawh ang." a ti a, Nausen chal ah chuan dîm tak hian a fâwp zauh a.

A kianga Lasi nula hmelṭha tak tak te hnenah chuan, " In tih theih bâk a lo thleng ang, mahsela chu chu nghâk hrâm hrâm ang che u, a hun a lo thlen hunah chuan in hnathawh ropui tak tak te hlawhtlin zia in hmu ang," a ti a.

Thâwklehkhat ah inchhûng ah chuan ṭêk ang mai a thil êng de zuai hi a lo awm phut a, Pathiannu Mal- pawh chu a bo zui ve leh ta nghal a.

*****************************************************************************************

Hun a lo kal zel a, Lalruanga pawh chuan tlangval a lo hre ve ṭan ta a. A hmelṭha in a hleitling hle mai a, tlangval harh leh ṭuan ṭha tak mai anih avângin chimawm khawp a khawsak lah a thiam na rawh e.

Chuvang chuan Lasi nula te chu an mangang thei hle a, a ram vahna leh sa pelhna hmun hrang hrangah te chuan tlangval ṭuanrang leh intha zo tak anih avângin chetsualna ngei ngei tûr pawh a pumpelh leh mai ṭhîn a.

Chutiang rêng rêng a a khawsak avâng chuan Mihringte vêngtu thlarau ṭha mi, Vân sâng a romei zîng a chêng Vansen- pawh chu a mangang ve hle mai a, Siamtu ropui ber Khuanu, ina a tân a a hmalam hun a ruat te chu thleng zo thei dawn in a hre lo va.

A tîr aṭang rêngin Pathiante inhmuhkhawmna ah pawh Vansen- chuan Lalruanga  hi a lo mangan pui tawh sa kha a ni a.

Chuvang chuan Khuanu in remti dawn lo mahse tiin pathian dangte hriat lohvin Lalruanga chu puih dân kawng a zawng ru ta a.

Tichuan a rûk in Lalruanga te khuaah chuan kal in an khua a nula hmelṭha tak mai, Lalruanga pawh ina a rîm ve fo te inah chuan ruahmanna ṭha tak nen a kal ta nge nge a.

Pathiante hual lâwk anih avângin Lalruanga thinlung chu fuih phûr leh pêk chawp ngai lova huaisen leh thinlung sak a ni tawh sa a, a pian ken ve réngin.

Chuvang chuan Pathian te pawhin a thinlung kawngka an su hawng zo lo a, a thinlung an hneh thei ngai lo.

Mahsela Vansen- chuan a rûk a rem a lo ruat diam tawh avângin chu erawh chu a lungkham lova, amaherawh chu a thiltih chu Khuanu leh Pathian dang te'n an hre chhuak ang tih chu a hlauh ber a ni zâwk.

Lalruanga thinlung ah thu a sawi theih dawn loh avângin nula thinlung chu a hnehsak ta zâwk a, Lalruanga lo len dawn laiin Puan a lo tah tîr a, tin, a puan tah chu khawih chakawm tak mai hian Lalruanga mit chu a tih vai sak bawk a.

 Nikhat chu an khaw nula hmelṭha a an sawi ve hat hat ṭhin hi a rîm a. A kiangah ṭhu in a nula rîm puantah lai chu a pawhchah sak chhên mai a. Nula chuan, “Lalruang, ka puan tah hi  pawt chat pawt chat suh, i hetih vâng anih hi...” a ti a, a sawi zawm duh leh ta lo va.

 Lalruanga chuan hnaih sûrh sûrh pah hian,  "Eng ka ti nge ni, ka hetih vâng a?” a ti a, nula puan chu a pawt chat zui lehnghal a.

 Nula chu a thin a rim ta hle mai a, “Pawt chat tawh suh ka tih chu, i hetih vâng hi a nih hi i nu leh pa in…” awki vîn deuh hian a ti leh a, rang fahran hian Lalruanga chuan, “Eng maw ka hetih vânga ka nu leh pa in?” a ti zui ve zat a, a pawt chat leh nghal a.

 Chutah zet chuan nula thin chuan a tuar ta lo va. “Lalruang, ka puan pawt chat tei vet suh ka ti ! i hetih vâng a nih hi i nu leh i pa in i lei an hleh,” a ti ta a. 

Chu veleh Lalruanga chu a tho lawk a,  a tlan haw zui ta nghal a. In a thlen chuan a nu leh a pa hnenah chuan, “Ka nu, ka pa, ka nausen laiin ka lei in hlep em ni?" tiin a zâwt a.

Tapchhak a eirawng bawl mêk a nu chuan a pa chu a melh zauh a, Mahsela tunah chuan puitling a ni tawh a, a pa chuan a fapa thinlung sak tak chu a hriat chian em avângin a hriat chhuah hma loh chu a beidawng dawn lo tih a hmu tlang vek a,

" Hlep ang chu bawiha, Ditip- ah ka zeh kha,"  tiin a hrilh tlang ta law law a.

 Chu veleh Lalruanga chu inthazo fê hian bangah a tlan lâwn zawi zawi a, a lei chu a la a, a vuah leh ta a. Mak tak maiin a lei hmawr chu a vuah veleh an lo nung a, hlehna hnu hma lang miah lo hian an in zawm leh ta zaih a.

Mahsela chuta ṭang chuan a ṭawng thei satliah ringawt ta hauh lo mai.

Pathian te'n a a chanvo tûr an ruat leh a nun inthlâkna, an lo nghah ve rauh rauh chu a thleng ta a ni zâwk.

Chu hun chu thleng tûr a ruat sa ni mahsela Vansen- i'n a a puih avângin a hun hma in a thleng ta zâwk a ni.

A thil ruahman dan pawh a duh ang tak a a thlen avâng chuan hlim takin Vansen- chuan Lalruanga chu a kalsan ta a.

Chutia a lei hmawr hleh a vuah rual chiah chuan Lalruanga thinlung chu thlâk danglam in a lo awm ta a. A ngaihtuahna leh thinlung chhungril te chuan finna thûk tak mai an lo nei ta nghal a. Mihring te thiltih theih piah lam Dawi thiamna a nei tih chu.

Chumi zân chuan a mumang ah Lasi nula hmelṭha tak tak pahnih hi a lo hmu a, chûng Lasi nula te chuan dawibur ṭha tak tak mai an lo pe a, tin, a hma hun atân a inbuatsaih tûr leh a thil thiam te chu zir chiang a, thiam bel vat tûrin an lo fuih a.

Tin, an mal ah chawi mu in mumang ram aṭang chuan a rawn harh chhuak leh ta a.

A han harh chuan a mumang a Lasi nula te'n a an pêk dawi bur ngei mai chu a kut ah a lo hûm reng mai a hmuh chuan mak a ti hle a.

An thusawi chu a tak ngei a ni ang tih a ring bawk a, chu ringawt pawh chuan mahni inrintawkna a pe nasa kher mai.

Chu thil thlen hnu lawk chuan nikhat chu a pa nen an vau ah a thang kam an en dâwn a, a pa hman hma chuan Lalruanga chu insiam sawk sawkin a lo va kal hmasa a.

Mi kal an reh veleh a vawikhat nan a dawi chu a hmang chhin ta a.

Kalkawng ah hian dâr tiang mawi takah hian a lo inti chang a. 

A pa in chulai hmun a rawn thlen chuan kawng sír a tiang mawi tak chu a hmu ta ngei a, tichuan  hawl ta a. A pa chu a kal zêl a, an thang kamna hmun a thlen dawn chuan a pa kut aṭang chuan a per thla ta nalh a. 

A pa chuan, “Lalruanga te mai mai ṭhîn hi a, mahni pa te in tihah thlâwn mai mai anih hi,” a ti a. Mahsela a rûk tak chuan Lalruanga pa chu a lâwm hle thung a, a fapa ina anihna a hrechhuak ta tih chu.

An thang kam a'n han en chuan Sakhi chal hi a lo âwk zar mai a. Chumi an thang kamna kiang lawk ah chuan zawngṭah kûng lian tak mai hi a awm a, a lo rah ṭeuh mai bawk a.

Lalruanga chu a inthazo tak hian a per kai a, zawngṭah kûngah chuan a lâwn ta zawt zawt mai a. A rah chu a lo ta ṭeuh a.

Chumi hnu chuan an Sakhi awh leh zawngṭah chu hawn tûrin an siam sawk sawk a.  Lalruanga chuan a pa hnenah, “Ka pa, zawngṭah nge to ang sakhi le?” a ti a, a pa chuan, “E! Sa chu sa ngê ngê a ni ang chu, a to zâwk daih ang chu le,” a lo ti mai a. 

Lalruanga chuan, “A nih leh nangin sakhi ak la, keiin zawngṭah ka ak ang e,” a ti a. An insiam fel hnu chuan an hâw ta a.

An hawn lam chuan Lalruanga chu a kal hnuhnung zâwk a, a pa chu a hmâ fê ah a kal a.

Tichuan a pa chu kawng sîr ah hian hnahthial- ah a lo va chang ve ta thung a. Lalruanga chu a lo kal ve zêl a, chulai hmun chu a lo thleng a, kawng sîr a hnahthial ṭha zet mai a  hmuh chuan, “ Khi lai a hnah chu in themthiam nân a va ṭha âwm êm ! khawinge kan  khawh teh rêng ang,” a ti a. A fei pai chu a lek chhuak ta mai a.

Chu veleh a pa chuan a khawh tak tak chu a hlau hle mai a. “E khaih khaih, Lalruang,  min khawh tak tak ang e,” tih leh mihring a chan a rual zui nghal a.

Lalruanga chu a kal chak peih loh avângin a pa chuan a kalsan leh ta daih a.

Lalruanga pa ina kawtchhuah a thlen chuan khaw mite chuan, “ En teh u, Lalruanga pa in sakhi a âwk e, a ak zar mai,” an lo ti a. An en sak liam liam mai a.

Lalruanga ve thung chu a pa hnungah zawngṭah ak bâwr lûk chung hian a lo kal ve hnak hnak a. Mi te chuan an lo hmu a, “E ! saw, khu Lalruanga'n zawngṭah a ak ṭeuh mai,” an ti a. “Khawnge i zawngṭah chu” an ti a, an pawt sup sup a, kawtchhuah a thlen rual chuan an pawh zawh sak ta vek mai a. 

Lalruanga chuan in a han thleng a, a ip ruak vek a hmuh chuan apa chuan, " Lalruang, khawiah nge maw i zawngṭah ah zo zai chu i dah le,"  a lo ti a.

Ani lah chuan nui rulh rulh chung hian,  “Kha ka pa, ngai rawh, nichin ah zawngṭah nge ti vang sakhi ka ti a, nang chuan  sakhi a to zawk ang i ti tlat a,  zawngṭah anih hi lo to zâwk,” a ti a.

Anu lah chuan Tapchhak aṭangin, " in ha ho pafa tak êm aw," a lo ti thung a.

Chuta ṭang chuan Lalruanga pawhin a nu leh pa chu nasa takin a pui a, an lo lah chu a enkawl hneh bawk si a, an vau ah thang a kam thluah reng mai bawk a.

Tin, tui a ṭhat avângin a thang kamna kiang lawk ah chuan tui a khuap luau mai bawk a.

A thang kamah chuan a âwk duh hle mai a, ramar te, sakhi te, sazuk leh vahrit te a âwk fo mai a, A châng phei chuan amah mai chuan hawn pawh a hâwn séng lo fo ṭhîn.

Túk khat chu a thang ava en leh a, nimahsela pakhat mah a lo âwk ta hauh lo va, a thang erawh chu an per thluah thung si. A hlim tawh vei nen, chutia a thang lo awm ta mai chu a ngaihna rêng a hre lo va, a hrilhhai angreng hle a.

Ngui tak in a tuikhuah lamah inbual tumin a phei ta daih a. Mahsela a tui khuah a tui chu a lo nu vek mai si a. Mak ti tak in, kut ruak chuan a haw ta hnû hnû a.

A tûk leh ah chuan a thang en tûr chuan a kal leh a, mahsela a hma nî ang bawk khân a thang zawng zawng a lo per vek a, a âwk pakhat mah a lo awm lo a ; tin, a tuikhuah a tui lah chu a lo nu leh vek mai bawk a.

Lalruanga chuan," A tunge maw ka thang âwk la zo vek a, ka tui ti nu leh vek ṭhîn hi âw?" tiin a ngaihtuah nasa hle mai a. Chutiang hlîr chuan tûk lî lai a lo awm ta a.

Chutah zet zawng Lalruanga thin in a tuar ta ngang lova," Ka tui ti nû a, ka thang sawisa fo tu hi ka hre chhuak ngei ngei ang, sa in nge mihring in tih ka hre ngei ngei tûr a ni," a ti a.

Chutiang thil chu Van chung sâng a Pathian te chuan an lo hmu ve vek a, inhmukhawm in ro an rêl a,

" Aw, Siamtu Khuanu zahawm, i hual lâwk Lalruanga chuan a thiltihtheihna te a hre chhuak tawh si a, a thinlung sak tak mai hian  sual lam kawng vawikhat a zawh hlauh chuan pathian te zawng zawng pawhin a rilru kan thlãk sak thei tawh hauh lo ang," thinrim tak hian mitmeng de riai Mal- chuan Pathian ho hma ah a sawi chhuak a.

Van romei zîng a chêng ṭhîn Vansen chuan lo tuihnih in,

" Mal, thusawi kha a dik a ni, Ropui ber Khuanu, Van chung sâng a chêng pathian chi pêngte khu lei mihringte lakah an inrawlh nasa viau a ni, anni mai ni lo, Tlang Lal leh Huai te pawh hian i thupek an zâwm lo ṭhin asin," a lo ti ve a.

Mitmeng de riai Mal- bawk chuan," Tunah chuan lei mihring te zîngah anni hneh thei tûr a awm tawh a, chuvangin  a lo thlâwn chuan Lalruanga hian an kut a tuar duh hauh lo ang, Vanhrik-a hnenah chuan Khuavang nula te tîr la, Lalruanga lakah inthiarfihlim rawh se," a ti a.

Siamtu Ropui ber Khuanu chu a lo ding chhuak a, " Anni Khuavang nula thusawi chu engah mah angai hauh lo ang, chuvangin nang mihringte hmangaiha veng him ṭhin tu Mal, nangmah ngeiin hrilh zawk ang che, a hnenah  chuan Lalruanga tibuai tawh lo tûr in Khuanu in a ti che a, alak aṭangin lo inthiar fihlim thuai ang che iti dawn nia," a ti ta a.

Zahna chibai bûk Khuanu hma a a kûn hnu chuan pathiante rorelna hmun ata  Mal- chu a chhuak ta a.

Van chung khaw ropui tak mai, ni tlâk tawh ngai lohna khawpui ropui tak mai, Pathian chi hnuaihnung hmelṭha leh thiltithei tak tak te chenna ah chuan Mal chu a thlâwk thla ta vang vang a. 

A hnung a Sava thla ang tak mai pahnih nei, Palian leh hmelṭha tak Vanhrika hnen a thlen chuan,

"Vanhrik, lei mihring te lak a i thiltih te kha Khuanu hian a lo hmu ve vek asin, chuvangin tun aṭang chuan Lalruanga lak ata lo inthiarfihlim tawh ang che, Chu chu Siamtu Khuanu thupek a ni e," Mal chuan a ti a.

Thinrim tak hian Vanhrik a chuan," Anni lei mihring  mai mai chuan hlutna an nei em ni, an chung a rorel tu kan ni a, an lak ah hian bat ka nei lo, anni hian kan lakah bat an nei zâwk a ni," tiin a lo chhâng lêt a.

Mal chuan, "Lalruanga hi chu a danglam bîk a ni, i khin zawh rual a ni lo, Khuanu ina a hual lawk a ni a, a dam chhung ni te hi Khuanu ina a ruat sa vek an ni a, lei mihring te hmachhuan ber tûr ala ni asin," a ti a.

Mahse Vanhrika chuan Mal thusawi chu engahmah angai lo, a thla a zâp a,

"Tunge ropui zâwk kan hria ang chu, Lei mihring te dan rual ka ni lo," tiin van chung boruak ah chuan a thlâwk chhuak zui ta nghal a.

(Mizo thawnthu ah hian Vanhrika leh Vanhrikpa an awm a, kan hriat pawlh loh nan kan sawifiah lawk ang e.

Vanhrikpa chu lei leh van siam lai vel a mihring leh ramsa te'n Lal atan a an thlan, thil tithei tak leh mihringte buhchangrum pe tu kha a ni a.

Vanhrika erawh chu sichangneii ang tho a van chung a cheng, sichangneii te, tualvungi te ho nen a in ang leh cheng ho a ni, thiltithei tak tho a ni.)

A tuk zîng hma tak ah Lalruanga chu a tho a, a in siam sawk sawk a, leilung lan hma in a tuikhuah lamah, a thang awk la ṭhin tu leh a tui lo ti nu tu châng tûr chuan a chhuak ta a.

An vau a a thang kamna bulah chuan lungpui lian tak mai hi a awm a, chumi phénah chuan a biru ta a.

Rei vak lo ah chuan leilung pawh a lo lang ṭan ta a. Chutia leilung a lo lan vêleh chuan a chung zâwn vân chhûm zîng aṭang chuan sava ang tak mai, thla pahnih nei hi a rawn thlâwk chhuak hlawl mai a, rei vak lo thlifîm dawng niawm tak a boruak a a leu kual vel hnu chuan chak tak mai hian lei lam ah a rawn thlâwk thla ta a.

A tir chuan Lalruanga chuan sava lian tak emaw a ti hman a, mahsela a rawn hniam zel a, mihring, sava anga thla nei a ni tih a hmu ta a. Mak a ti kher mai, chutiang mihring chu ala hmuh ngai loh avângin.

Chu thla nei chu mipa a ni a, palian leh sa ṭha tak mai, vun var thianghlim tak mai hi a ni a.

Lei a thlen dawn chuan a thlawk muang deuh a, dîm tak hian lei ah a ṭum a.

A bul vel chu a en kual thuak thuak a, chutah Lalruanga thang a âwk apiang chu ala leh ta nghauh nghauh va, a lak zawh chuan ram hrui la in Lalruanga sa awh ho te chu a ṭâwn khawm te te a, tuikhuah sír ah dah in amah chu tuikhuah ah chuan a zuang lut zui nghal a.

Tuikhuah a a inbual lai chuan Lalruanga chuan thâwm dîm takin a veh ṭham ṭham a, vawilehkhat ah a hnunglam aṭang chuan a bawh thut a, tui ah chuan an pil dûn bâwrh a.

Rang takin Lalruanga chu a tho leh vat a, chu pa lo tho leh chu a thla ti pharh in tui aṭang chuan rang takin a thlâwk chhuak a.

Mahse Lalruanga chuan a thlawh sân hma in a ke rêk ah a man hman hlauh a.

Chu pa chuan a thla ti pharh in a zâp vak vak a, a ke lehlam in Lalruanga chu a tlawh a, a tal vak vak a.

Mahsela Lalruanga chu a thinrim tawng khawng tawh bawk a, chuti mai a thlah chu a tum bau lo mai.

Thawklehkhat ah a pawt thut a, a ke rek a a kut ahnih a vuan in a vir pui a, a theh lêng ta lawp a, a hma a Lalruanga bihrukna lungpui ah tak khân a in sawh chawrh a, a zi ṭawlh ṭawlh a. 

 “Nang hi i ni maw ka thang âwk la zo vek a, ka tui khuah tui lo ti nu fo ṭhín tu chu,”  tih leh chu pa chu pan phei a rual leh nghal a.

A thla ah chuan man in a phih tho lawp a, a hmai ah tak chuan a hnek ta chawrh mai a, chutah a sam sei tak ah chuan ṭhâm in lungpui ah chuan a hmai a tauh tîr leh ta chawrh chawrh mai a.

A zawih hnawk thlengin lung chu a tauh tîr a, chu pa hmai chu thisen in a bual nuaih a.

"Ka that dawn che, Tunge i hming min hrilh teh," Lalruanga chuab ṭeng chuai hian a ti a.

Chu pa chu a rawn che hret hret a, lungpui nghêng chuan thei leh thei lovin a rawn ṭhu chhuak a.

A hlau kher mai, aw khûr hlarh hlarh hian,  “Khawngaihin min that suh, ka hming chu Vanhrika a ni,” a ti a.

 Mahse Lalruanga chu ala thinrim hle a, a ipte pui a a chempui chu la chhuak in chu pa chu a tin ûr a,

Vanhrika chu thei leh thei lo a rawn ṭawng chhuakin, “ Khawngaihin min that suh khai, dawi ka hrilh dawn che nia” a ti ta a.

 Lalruanga chu rei fe a in ngaihtuah vung vung a, chutah, “ Aw le, min hrilh rawh, eng dawi nge min hrilh ang?” a ti ta a.

 Vanhrika chu a rawn tho chhuak ṭawih ṭawih a, mahse Lalruanga chuan ram hruiin a thla pahnih chu a lo phuar sak a.

Vanhrika chuan, “I thang âwk zawng zawng hi i dum bur a dah len dan leh i ralthawl a lui tui zawng zawng khung len vek dân ka hrilh ang che,” a ti a. 

Tichuan Lalruanga chuan, “Aw le, min han hrilh ta che,” tiin a chhâng a. 

Vanhrika chuan Lalruanga sa awh bawp zawng zawng chu a thlawn hlawk hlawk a, Lalruanga dum bur ah chuan a khung zel a, a khung apiang chuan  chhem zel a, a phâi duak duak mai a. Chutiang chuan thun zêl a, a sa awh zawng zawng chu a khung leng ta vek a. 

Tin, chumi zawh ah chuan an chhak tlâng lam hawi chuan Vanhrika chuan bân a phar duai a, dawi hla eng emaw ni hi ring lo té in a chham zuah zuah a, tichuan tlang a thing zawng zawng chu a han dawi khâwm leh ta vek a. Lalruanga tiang khawp lek in a dawi tê leh ta a. Chumi zawh ah chuan an awmna piah deuh a hnahthial hmun lam chu hawiin dawi hla a chham leh a, chuta hnahthial hnah zo zawng zawng chu Lalruanga bengbeh khawp lek a te ah an lo chang leh ta a. 

Chutah an awmna piah lam ah kal sawn in luite tui an hmuh theih zawng zawng chu a han dawi leh a, Lalruanga ralthawlah chuan an rawn chik lût leh ta vek mai bawk a. 

Chûng lo pawh chu Vanhrika chuan Lalruanga a hlauh êm avângin a dawi zawng zawng chu a hrilh a, a zirtir leh vek a.

Mahsela Lalruanga chuan nakin ah thil ṭha lo a thleng leh palh ang tih a hlau a,  an awmna van chung a mi te ho nen lei mihring te chung a phuba an rawn lâk a hlau thâwng a, chuvang chuan  a tihlum ta tho a ni.

Vanhrika dawi zawng zawng a thiam tâk avâng chuan Lalruanga chu a hlim hle a, an vau ah chuan Vanhrika ruang chu thûk zet mai hian a phûm a.

Chutiang thil vel a tih zawh chuan ni a lo tlang sang anreng tawh hle mai a, lung muang fahran hian inlam pan in a haw ta hnek hnek a.

Tukṭhuan ei hma deuh vin an in a thleng a, a pa chuan kaiṭen ah ṭhû in nilum a lo ai a, Lalruanga chuan ngawi reng a a pa chu pêl in inchhûngah a lut tlang a.

A dûm bur chu phawrh in a sa awh ho chu a han theh thla ta phawk phawk a, a nu chuan tam hi a han ti êm êm khawp a.

Lalruanga nu chuan pawn a an pa ṭhû chu a han ko va, “Zalhrang, hei Lalruanga’n sa a âwk ṭeuh mai, lo lut teh khai,” a han ti a. Lalruanga pa chuan, “Awih loh loh tûr anih chu, a lo lût lai pawh ka hmu reng alawm, engmah a rawn ak puar hleinem,” tiin awih lo deuh hian tuibûr pik zuai pah a chhângin a lut duh chuang lo va.

Lalruanga nu chuan a ko lui ṭal avâng chuan phun bul bul chung hian a va lut ta nge nge a.

Inchhungah chuan sa hlîr mai a lo khat hmuk a hmuh chuan mak a ti êm ém mai a.

"Awi, Taitea chu i sa rawn ak lût lai pawh ka hmu si lo che a, engtin nge maw i tih chu le?" a ti a.

Lalruanga chuan mahni inring tawk fahran hian," Ka pa, tlangval tak tak ka nih tawh hi, ka ah leh ah loh te engtin nge i hriat theih ang ni?" a han ti a.

Zalhranga chuan Lalruanga dâr ah a bêng thak thak a, a fapa chuan amah aiin dawi a thiam zâwk tih a hriat chuan a lawm hle a.

Sa an ngah êm avâng chuan a chan túrin an ṭhenawm ho te chu Lalruanga nu chuan hmanhmawh tak hian a sâwm khâwm hlawm a, tichuan hlim tak in an chan ta sup sup a.

Sa an chan zawh chuan chhum tûrin an buatsaih a, mahsela an han chhum dawn a, bel mawng phah tur hnah an nei ta hauh lo mai a. Lalruanga chuan, “Ka bengbeh hi phelh mai rawh u,” a ti a. A nu chuan, “Nanga bengbehin khawiah va daih hlek loh tûr anih chu” a ti a. 

Lalruanga chuan, “Han phelh phawt ula mawle,” tiin a chhang a. Chutia a tih tlat si avâng chuan a bengbeh chu an phelh ta a. Bengbeh chu a in phelh hawk a, inchhûng chu hnah hlirin a khat ta mai a. A nu chuan a manganpui leh ta si a,

 “E khai, Taite, zial leh thuai rawh, a tam lutuk êm a, kan hmang sêng lo ve” a ti leh chûl a. Lalruanga pawh chuan thuawih takin a bengbeh chu a zial leh ta vat a.

Tichuan mei an han chhem dawn a, sa atam êm avângin an thing khâwn in a chhumna tur a daih leh ta lo va.

 Lalruanga nu chuan," Taite, kan thing in a daih leh ta hauh lo mai, tlawmngai la, dai amj thing va fawm lawk ta mai che," a ti a.

Lalruanga chuan, “Ka tiang kha phelh mai rawh u,” a lo ti vat a, mahse a nu chuan a awih leh chuang lo va.

"Nang a tiang mai maiin kan sa zo zai hi a hmin zo chuang nâng maw le," a ti nang nang a.

 Mahse Lalruanga berin phelh rawh u a tih tlat avângin phun nuah nuah chung chuan a phelh ta tho a.

A han phelh chuan an  kawt lai zawng zawng chu thing hlîr in a khat leh ta vek mai a. 

“E khai, Taite, a va tam êm êm ve, têl leh vat rawh khai,” a ti leh ta chûl a. Lalruanga pawh chuan thuawih takin a tiang chu a têl leh thuai a, tuah khawp chauh chu a pe ta a.

Mei an tuah hnu chuan Sa chhumna tûr bel chu an han chhuang kai a, mahsela tui an han leih leh dawn a, an lo nei daih leh ta hauh lo mai. A nu chuan, “Taite, tui kan nei lo mai,” a ti a.

 Lalruanga chuan, “Ka ralthawl ami kha bun mai  rawh,” a ti liam puat a. A nu chuan a awih leh duh ta chuang lova, “Nang a ralthawlin va daih suh,” a ti a, a chhûng duh ta hauh lo mai a. 

Lalruanga chuan thawh ṭuih ṭuih pah hian,  “A nih chuan keiman ka'n chhûng ange,  Mahse kha lai a pitarte kha awm sawn rawh se,” a han ti a.

 Mahse pitarte kha engin emaw a mawlh ve tlat a, a awm sawn duh lo va. Lalruanga chuan belah chuan a ralthawl a tui chu a’n bun ta a, tui a rawn baw huk a,  pitarte chu a in chawpin a len bo ta daih mai a. A dawi thiam zia an hriat chuan a nu leh pa te chu an lâwm hle mai, hlim takin an in melh ralh a.

" Aw Mal, Vanhrika chuan i thusawi a hnial elaw maw," tiin an rorelna hmun boruak a aw thâm vel chiai hian Vansen-  chuan a han ti a.

Mit meng de riai Mal- chuan, " Pathiante thu chhuak a pawisa lova, a duh ang ngeiin aman a kawng a thlang si alawm le," tiin a lo chhâng a.

Mihringte vêng ṭhîn tu Vansen- bawk chuan," Lalruanga chu dem theih a ni hauh lo mai le, a tih tûr dik tak a ti zâwk a ni," a lo ti leh a.

Mal- chuan, " Chuti lam chu duhtawk teh ang, thihni hmel hmu ve lo tûr chatuan Pathiante remruat angin a lo thleng ta zel a ni e, tunah chuan a hun a in ṭan ta, Keimi pawn mihringte khua an pan tâk mék khû..." a ti a.

Chutia a sawi lai mek chuan an pahnih chuan lei lam chu an zuk thlîr a.