WERETIGER KING KEICHALA | The Epic Of Wizard Lalruanga

SAWIHAWNNA :

Chatuan mi, thihna tem ve ngai lo Pathian te remruat ang chuan Lalruanga pawh chu a lo puitling ta a. Nupui fanau neiin hlim takin an awm a.

Mahse chutih lai chuan mihring te chenna hmun tam tak chu Keimi te'n an bei a, Lalruanga pawh chuan a thiltihtheihna te hmangin hneh ngei tumin a bei lét ve a.

*******************************************************************************************************************************************************************************

Hun a lo kal a, Lalruanga pawh chu a lo puitling ve ta tak takin nupui neihte a lo hun ve ta hial a.

Tichuan a nu leh pa chuan khua a nula hmelṭha ber mai chu nupui atan a neih sak ta a. 

Chutih hun lai vel chuan  Keimi an tih, sakei a chang thei mihring hi an tam hle mai a, mihring te an tibuai nasa in an ran vulh vawk leh sial te an seh sak nasa hle mai a.

Bawlte hmun a awm nula hmelṭha tak mai Kungawrhi'n pasalah Keimi a neih thu te, a fanu chhanchhuak tur a tlangval huaisen unau pahnih Pawthira leh Hrangchala, Kungawrhi pa ina a tirh thu te chuan khaw hrang hrang ah sawi a hlawh nasa kher mai.

Mahsela Lalruanga te khua erawh chu Keimi lakah chuan an la him in a fâl a feh pawh hlauh en ah anla en meuh lo.

 

Lalruanga leh a nupui te'n a fanu an neih hnu lawk chuan an khua aṭanga hla vak lo a keimi pahnih an tihhlum thu a lo thang leh ta hluai a.

Chu keimi te chu Keimi ni sa a piang nilovin, eng emaw tawhsual tawh palh avânga keimi a chang ta Hlawndawhthanga nau te an ni a. Hlawndawhthanga erawh chu tihhlum loh vin ala awm thung a.

Pasalṭha te'n a a unau te an tihhlum avâng chuan ani phuba lâk tum pawh chu a hrâng ta hle mai a.

Hmun khat chauh ni lo, khaw hrang hrang ah Keimi a'n rawn hrân tâk viau ah chuan Lalruanga te khua pawh chu an bâng bîk ta hauh lo mai.

Tichuan lo lam a keimi a chhuah fo tãk ah chuan mi te chuan an hlau êm êm a, a lo rei deuh hnu phei chuan tumah feh ngam an awm ta lo hial a.

Kal bo leh mai tûr a an ngaih lai a chutia an lo lam a mihring chân chhuah tum rêng rêng emaw tih mai tûr a a awm ta tlat mai chu  Lalruanga chuan a hrethiam lo hle mai a,

Hetia feh ngam lova awm ngawt chu a ṭha hleinem, kan tûl tehlul nên, kei chu ka feh dâwn e, ka hlau ve lo,” a ti a.

A nupui ina feh lo tûr leh tawhsual tawh palh a hlauhawm thu a sawi chamchi lai chuan ngawi rengin feh tur chuan a insiam mawlh mawlh a, A nupui hnenah chuan Chaw leh a hmeh fûn tûrin a ti a.

Tichuan a chaw fun chu iptepui ah ak in, a thal leh rawchhêm a keng bawk a, tin, tûk pum deuhthaw a a hmawlhte suih tawi te te pawh chu pai tel in an nu phal lo chung chu a chhuak lui ta a.

An khua chu a reh hle mai a, kawtchhuah ah dingin an hawi kual vel a, khawlaiah chuan tumah hmuh tûr an awm lo, naupang inkawibah pawh hmuh tûr an awm lova, nau chaw ngên ṭap ri hriat tûr pawh awm lo hian khua chu a reh duk a.

Lalruanga chu a rûm hak a, tichuan lo lam pan chuan a kal ta thuai thuai a.

Thlam a thlen chuan a hmawlhte ken  chu thlâm bangah chuan a thiat ta ṭeuh a. Chumi hnu chuab a rawchhem chu phawrh in a han tum a, chutia rawchhêm a tum rîk veleh chuan bang a a hmawlhte thiah te chu an zai ri ta ṭhup ṭhup mai a.

 Chutia a hmawlhte-  an zai lai chuan Keimi chhuak fo an tih, an hlauh êm êm ṭhin chu Lalruanga lo ah chuan a lo chhuak ta a. 

Vau aṭang chuan Lalruanga thlam a zai ṭhup ṭhup ri chu a hria a, mi tam tak awm a a rin avângin a pawh mai ngam bîk lo a, ralkhat aṭang chuan a au ta ringawt mai a.

"Lalruang, inva tam âwm ve, In chawfun min han hmuh teh,” a han ti a.

 Lalruanga chuan, “Hei pawh, hei pawh…” a ti a, a chaw fun pakhat ken kha a han hmuh a, a dah leh a, angai bawk chu a hran ang zêl chuan a hmuh ta mai a.

Chung thil a hmuh chuan Keimi chuan beih mai ngam chi a ni lo tih a hria a, an tam hmel si a, chuvangin amah mai chuan a hneh dawn lo tih a hriat avângin râl aṭang chuan a han au leh a.

" Hawh, Lalruang, in ṭhian ang hmiang,” a ti a.

 Lalruanga pawh chuan, “Lokal ta che,” a ti var a.

 Keimi chuan, “Nangmah lokal zâwk rawh,” a ti ve bawk a. 

An pahnih chuan an in pawh ngam lo ve ve a, rei tak chu an in au an in au tawn a, mahsela a tâwpah chuan Lalruanga chuan, "Lai leh laiah intâwk ang hmiang," a ti ta a. 

Keimi chu mihringah a inti chang a, palian leh hmelṭha tak mai hi a ni a, Vau aṭang chuan a rawn chhuak a, Lalruanga pawh chu thlâm aṭang chuan vau lam panin a chhuak ve bawk a.

A fei khauh tak mai chu Lalruanga chuan zak kau hawk khawp in a han khawh a, lei ah a bûr chat a. Chu a fei khawh bûr na laiah chuan an in tâwk ta a. 

Rei fe chu eng ang mi nge an nih tih inhriat tawn tum niawm takin an han in thlêk deuh vang vang a.

An in tiat tâwk kher mai, an kawng fêk leh an dar pharh hlai tak mai te, an taksa in phiar fuat mai te chu a in bûk tâwk êm êm a.

 Lalruanga chuan a bân phar chhuakin, “Ṭhian a, nang tunge i hming le?” a ti a. Keimi chuan, “Ka hming chu Keichala ka ni e,” tiin a lo chhang a. Chutah Lalruanga chuan,  “Ka fei khawh bur hi han phawi teh, i phawi zo em?” a ti a. Keichala chuan phawi a han tum a,  mahse Lalruanga chuan a rûkin a fei chu a lo dawi hman chu niin, Keichala chuan a beih ngial pawhin a phawi zo ta lo a.

 A beidawn hnu chuan Lalruang chuan, "Khawinge, keiman ka’n phawi ang e,” tih leh phawi a rual ta mai a,  awlsam te in a phawi ta mai a. Keichala chuan mak a ti kher mai.

Tichuan an pahnih chuan ṭhian ah an in siam a, Lalruanga chuan Keichal-a chu a thlâm ah hruaiin chaw te an fâk dûn ta a.

Chaw an eikham hnu chuan Keichala chuan, " Lalruang, ṭhian kan ni ta bawk a, nu leh pa in hmuh ang hmiang," a ti a. Lalruanga pawh chuan remti tiin, "Nia maw le, mahsela kei zawng, ka nu leh pa an chhe êm a ni," a ti a.

"Kei pawh, chutia tih ah chuan nu leh pa hmuh tlâk ka nei bîk hleinem," Keichala chuan a lo ti ve vat a.

Tichuan khua a lo tlai chuan Lalruanga te khaw lam pan chuan an in zui haw ta hnak hnak a. In an thlen chuan Lalruanga chuan a nupui hnenah," Hei ka ṭhian Keichala hi a lo thleng dawn a, i unau te ko la, kan vawkpa lian ber kha lo talh rawh se," a ti a. A nupui pawh chuan an pa thusawi ang chuan a unau te ko tûr in a chhuahsan ta nghal a.

"Keichala chuan Lalruanga nu leh pa chu a han hmu a.

"Lalruang, nu leh pa hmuh tlak ka nei lo ve itia, zuk nei teh meuh chia," a ti a.

Tichuan Lalruanga te inah chuan ni tam Keichala chu a châm a, Lalruanga te chhûng chuan Keichala chu an ti ṭha hle a, ran hming kim in an talh sak a ni.

Lalruanga te lo tih dan ah chuan Keichala chu a lawm hle mai a, Rei tak a châm hnu chuan a nu leh pa te hmu tûr chuan Lalruanga nen Keichala te khaw lam pan chuan an chhuak ve leh ta a.

 Keichala te khua chu a lo hla hle mai a. Kawngah chuan zan tam tak an riak a. Ni khat chu nghalrual tam zet mai hi an hmu a, Lalruanga chuan, “Nang, ṭhiana, han luhchhuak ta che, ka lo chang ang e,” a ti a. Keichala chu sakei ah a inti chang a, tichuan a han luhchhuak ta a. A thiam kher mai,  a rual rualin a rawn um chhuak zung zung mai a.

Chutia Keichala rawn ûm chhuah apiang chu Lalruanga chuan a thal in a lo kap chat chat zel a. A thi chhuah hma in a kahna hmuamhma ah chuan mei bu a lo bel zat zat zel a,  an thi chu far khat pawh far hman lovin a lo hnawh phui zêl a, tichuan pakhat mah hlah lovin Keichala hual chhuah zawng zawng chu a lo kap hlum vek a ni.

Nghalrual an chhuah kim hnu chuan Keichala chu mihringah inti changin a rawn chhuak ve ta a. Lalruanga'n a sanghal ûm chhuah a lo kap hlum vek a hmuh chuan mak a ti hle a, thal kâp thiam a ti kher mai.

A sa kah ruang bul a ṭhu chung hian Lalruanga chuan  “Thiante sa kah hmuamhma hre thei rawh le,” a lo ti a. Keichala chuan thaw halh halh chung hian sa ruang ho chu an let kual vel cham chi a, a zawng a zawng nâ in a hmuamhma rêng rêng a hmu ta hauh lo mai.

Mak tiin a chek tlak tlak a, “Ṭhiana, engtin nge maw i tihhlum zêl le?” a ti ta ngawt a. 

Lalruanga chuan kiai suk ah hian,  “Mipa na na na chuan a lo khalh chhuah apiang khân, ‘khi pawh, khi pawh,’ ka lo ti a, ka kut zungchal hian ka lo kawk zêl a, an tlu phawk phawk mai lawm,” a ti mai a. Keichala chuan mak a ti hle mai.

Tichuan an kal zel a, nakinah chuan thlam ram pakhat hi an va hmu a, khua a tlai deuh tawh avângin riah mai an tum a.

 Lalruanga chuan, “Keichal, khita mei lak nge i duh khu ta tui chawi?” a ti a. Keichala chuan, “Khita mei lak ka duh e,” a ti a, mei la tûr chuan a kal ta a.

Keichala mei la tûr a a kal hlân chuan Lalruanga chuan a meibu in mei a lo chhêm a, chaw leh chawhmeh te chu a lo chhûm diam a, Keichala rawn lêt leh meuh chuan ei mai theih in a lo peih diam tawh a.

Keichala mei la rawn kîr leh chuan mak a ti leh khawp mai, “Ṭhiana, engtin nge maw mei i lo chhêm chu le?” tiin a zawt a.

Lalruanga chuan chaw ei siam mual mual chung hian, “Mipa na na na chuan, kan tin hnâ kan han sik zauh a, a alh mai alawm,” a ti a. Keichala chuan mak ti deuh hian a kut a en vung vung a.

Tichuan zanriah an kîl dûn a, chu thlâmah chuan an riak ta a.

A tuk zîng vaṭianah thovin an chhuak dûn leh ta a.

 Chawhnu her vel ah chuan hmun pakhat hi an va thleng a. Nghalrual hi an awmna kiang lawkah chuan an awm ṭeuh mai a.

 Chûng nghalrual thlîr dauh dauh pah hian Keichala chuan, “Khai, nang ṭhiana, nang han luhchhuah ve thung rawh le, keiin ka lo châng ve thung ang e,” a ti a.

"Ni e, maw le," tih pahin Lalruanga chu a tho thurh a, Nghalrual tlat na lamah chuan a liam zui ta nghal a.

Lalruanga chuan a han luhchhuak ta a, Keichala awmna lamah chuan an rawn tlân ṭuk ṭuk a, Keichala chuan a hma a Lalruanga tihdan kha a hre reng a, lo kawh hlum ve ngei tumin a kut a lo phar a, khi pawh khi pawh tiin sanghal rawn tlân apiang chu a lo kâwk ve zawt zawt a.

Mahse pakhat mah chu kawhhlum theih a nei ta lo va, a beidawng chuan a tawpah pakhat chu a lo chûm thlu ta ngawt a. A chûm na bawk aniang, a chumna lai chu a duk chur mai lehnghal.

Lalruanga rawn thlen hma hma in sa chu a let thawk a, a chum dukna lam chu lei lam a hawi tîr  ta ringawt a.

 Lalruanga a lo chhuah chuan Keichala chuan, “Ṭhiante sa thah hmuamhma hre thei rawh le,” a lo ti ve a. Chu veleh Lalruanga chuan sanghal chu a han kuai let a, a chumna hnuhma chu a lo duk chur mai si a, “Hei i chum hlum a nih hi,” a ti ta mai a. Keichala chu a zah hmel kher mai.

Mahsela zanriah hmeh tûr an neih avâng chuan an lâwm ém êm tho a.

Lalruanga chuan thingtuai sât in sanghal ruang chu an zâwn dûn ta a. Keichala te awmna khua chu a hlat êm avângin ni hnih lek a thlen mai theih a ni lo va. Khua a lo tlai chuan riahbûk an sual leh ta a.

Changel hnah te lakhawm a bûk an sak zawh hnu chuan Keichala chuan, “Ṭhiana, nang khi ta mei lâk nge i duh khu ta tui chawi?” a ti ve ta thung a.

 Lalruanga chuan, "Khi ta mei ka la ang e,"  a ti a, mei la tûr chuan a chhuak a kal ta nghal a.

 Lalruanga thang bo hlân chuan Keichala chuan a hma a Lalruanga tih dan ang khân mei lo chhem ve hi a tum a, a tin hna chu sik alh ve tumin a sik thi phung mai a, mahse mei rêng rêng chu a chhuak thei lo va.

 Lalruanga lo thlen chuan a kut chu a thukru vat a, mahse Lalruanga chuan a hmu hman tho mai, “Ṭhiana, engti zia nge i tin hna chu thi pheng phung mai le?" tiin a zâwt a.

 Keichala chuan a kut tuai vat vat chung hian,  “Engtinge maw i tin hna i sih alh theih mai bîk le?” a ti nuah nuah a.

 Lalruanga chuan, “Keiman kan chhêm ang e,” a ti a. A meibu chu a talh zauh a, a tin kâr ah chuan a zep zauh a.

Keichala hnenah chuan," En rawh, pang pang mai a, hei mah mah ka la sik na lo anih hi," a ti a. Mei chu a chhêm zui ta nghal a. Keichala chuan mak hi a ti êm êm mai khawp a.

 An sa chu Lalruanga chuan a chhum a, a ei ta a,  Keichala erawh zawngin sakei anih avângin a hel a ei a duh zâwk a.

Bûk pawn a lungpui  phên ah chuan a khel ri bawp bawp a, a khât tawkin Lalruanga chaw ei chu a rawn en zauh zauh a. A rawn hawi veleh Lalruanga chuan a lo melh leh vak mai ṭhîn a, Keichala chu a zak leh deuh ṭhîn.

 An chaw ei kham chuan an han mu a, a tûk khua a lo vâr chuan an kal leh ta a.

Thui fe an kal hnu chuan ngaw dur zau pui mai hi an thleng a, a kiang lawk ah chuan an châwl a.

Chutia an chawlh lai chuan Lalruanga chuan chu ngaw hmun thlír chung chuan, “Ṭhiana, helai chu nunchan zir nan a va ṭha teh lul êm,” a han ti a. Keichala chuan, “Zir ta che, amaherawhchu a tawk ka tih ve leh banah,” a ti a. Lalruanga chuan,"Aw le," tiin a lo chhang var a.

Keichala chu intha zo deuh hian thingkung ah a zuang lâwn zak a,  thingkak lian fê ah hian ṭhut hmun a rem ta a.

Chutia Keichala awm rem hnu chuan nunchan zir tûr chuan ngaw nghûng lamah Lalruanga chu a kal liam ta a.

Lalruanga chuan  kawlhnam a phâwi a, “Heih heih heih” ti chung zêl in ngaw dur pui pui te chu a vai eng ta pawp pawp mai a. Keichala chuan hmuhnawm ti takin a lo thlîr reng a, nasa hi a ti êm êm mai khawp a, ṭhâng pik tak tak te chu a vai êng thla duak duak mai si a.

Chutichuan Lalruanga chu auvin, “Ṭhiana, a tâwk tawh e” a ti ta chûl a. Lalruanga chuan tâwk ti âwm lo chung hian Keichala awmna zâwn a thlen chuan, “Tâwk tawh mai ang hmiang,” ti chung hian Keichala awmna thing chu a fik hmawk mai a.

 Keichala chu a lo in ring hman mai bîk si lo, leiah  a tla thûm ta dawt mai a, a tlâk na lamah a in sawh na deuh bawk nen, lungawi vak lo hian, “Ṭhian ṭha chu ni lo la saphuthlik,” a ti ram hmak a.

 Lalruanga lah chuan a kawlhnam ah ṭhat pahin, “Nang pawh ṭhian ṭha chu ni lo la thalfang châr,” a ti lêt ve a.

Mahsela ṭhian a insiam tawh an nih avângin an thinrim zui chuang lo a, Lalruanga'n a nunchan a zir zawh hnu chuan tawi khawmuang lovin an kal zui leh ta a.

Kawng lakah te chuan an riak dûn zêl a, harsatna engmah tawk lovin ni eng emaw zah chu an kal  leh ta a. 

Nikhat chu pholêng hmun bawn fê mai hi an thleng hlawl mai a. Keichala chuan, ”Ṭhiana, helai chu nunchan zir nan a va tha ve maw le,” a ti a, Lalruanga chuan “Zir tak rawh khai, hei a ṭha hle alawm ” a lo ti mai a. Keichala chuan an piah lawk chu kawh pahin, “Aw le, helai ka thlen veleh hian tawk lo ti ang che,” a ti a. Lalruanga chuan bûk nghauh nghauh pah hian, “Aw le, i thlen hma hma in tâwk ka lo ti ang, i hlauhawm âwm êm mai,” a ti a. Lalruanga ṭawngkam avâng chuan Keichala chu hlim deuh maiin a kal ta a.

Keichala chu sakeiah inti changin a rawn bawh êng ta pawp pawp mai a. Rei fê a han ti a, a hah ta hle mai a, a bawh êng ṭha peih ta mang lo va.

 Lalruanga hnenah chuan, “Ṭhiana, a tâwk tawh ti rawh,” tiin a han au va,  Lalruanga lah chuan a ti duh lawk lova, a haider lui tlat a.

 A kiang hnai a rawn thlen chuan lung tum rit nelh nawlh hi a chhar a, “Tâwk tawh ang hmiang,” tih leh Keichala chhîp a  den a rual leh ta mai a. Keichala chuan a hah nâk alaiin chutia a han dêng thûm ṭawk mai chu na a ti hle mai a, a thin a rim ta hle a. Mihring ah a inti chang zui nghal a.

Lalruanga hnenah chuan, “Ṭhian ṭha chu ni lo la, sa phuthlik,” a ti ṭêng chuai a, Lalruanga lah chuan hlauh loh hmel fahran hian, “Nang pawh ṭhian ṭha chu ni lo la, thalfang char,” a ti ve leh mai a.

Intibuai êm lo chuan an kal ve leh mai bawk a, Ni suk chen vêl anih chuan Keichala te khua chu an thleng dâwn ruai tawh a, an khaw dai bul lawk ah chuan an chawl leh ta a.

Keichala chuan, "Ṭhiana, hetah hian lo awm la, ka khua te pawh lo inbuatsaih tûrin ka han hrilh ang e,” a ti a.(Keichala chu lal a ni a.) Keichala chu khaw lamah chuan a kal ta a.

Chutia a kal ta chu  Lalruanga chuan a hnungah a zui ru ta zêl a.

 Keichala chu an khuaah a han lût ta a, an khaw pa ho chu inrel ah hian an lo awm a, an taksa ṭhenkhat sakei a ti changin, “Tu pa mei sei sei” tiin an mei sei pui pui chu an lo thlâk zuar zuar hlawm a, ṭhenkhat chu kawtchhuah ah awm in an lo inti hlim a, an lo aû ruai ruai hlawm bawk a.

Chu chu Keichala'n a hmuh chuan an zîng ah tlân lût in a au a, “Zia thup aw, zia thup aw, hringmi hâwng e,” a han ti a, chu veleh sakei a inti chang ho te pawh chuan an zia thup in mihringah an in ti chang ta hlawm a.

Chutia Keichala au vê leh Lalruanga chu a tlan let leh ta vang vang a,  Keichala lo thlen hmain a awmna ngaiah chuan a lo va awm leh hman vâng tawh a.

Rei vak lo ah Keichala pawh chu a lo thleng ve leh ta a. Lalruanga hnenah chuan,

 “Lokal rawh le, i kal tawh ang,” a ti a, tichuan khaw lam pan chuan an kal zui ta nghal a. 

Khua an luh rual chuan Keichala khua te ho chuan an lo bâwr tuau tuau a, an zui hum hum a, Keichala te in kawt an thlen in Lalruanga chuan a fei chu leiah a khawh bûr chat a, chutah rang zet a zuang kâng in a fei khawh bûr chhîp ah chuan a ke lehlam in a dîng vang vang a. Keichala khua te ho chuan hmuhnawm an tih hmel kher mai, an khêk tuar tuar a.

Chu mai ala duh tawk lo, chu a dinna fei hmawr ah chuan a lâm ta vâ vâ mai a.

 Lalruanga lâm lai chuan Keichala lah chu inchhûngah a lût daih mai si a, chutia Lalruanga lam chu, a lâm zo seh tum in khaw mi ho chuan an rawn bâwr leh tuau tuau a, a bulah chuan an châng ṭhup mai a.

Anih lah chuan an thil tum a hriat ve reng avângin a chhuk lawk duh bîk lo. Mahsela khaw thim dâwn ruai ah pawh chuan tumah anla ṭîn duh si lo, Lalruanga chhuk hun nghah chhuah ngei chu an tum hmel hlawm kher mai.

A lâm rei tawh êm avângin a chau viau tawh a, a ning tawh bawk si a, chuvang chuan, “Thosi, favai ṭhâp anga tam lo awm rawh se,” a han phun sup a.

A sawi zawh rual chiah chuan Khaw thlang lam aṭangin thosi, a tam a tam mangkhêng mai hi an rawn thlâwk sûp sup a, Khaw tual vêl ah chuan  an rawn bâwr tup tup a, Lalruanga châng tu Keimi ho chu an seh ta noh noh hlawm a, an han vai chiam nâ in an tam êm a, chutia vai reh mai chi lah ni hek lo.

In hiat leh in vai ruai ruai chungin an in lamah an tlân haw ta diak hlawm a.

Chutia an ṭîn vek hnu chuan a fei hmawr aṭang chuan Lalruanga chu a zuang thla thak a, a bân lehlam chu phar chhuak in, " A tâwk tawh e, kal bo leh tawh ru le," a ti a, chuveleh tho si ho chu an ri mum mum a, a hlawm hlawm in an lo chhuahna khaw thlang lamah chuan mitkhap kâr a'n an thlâwk bo leh ta diak hlawm a.

Lei a a fei bûr chu phawi pahin a'n hawi kual a, mahsela tumah pawnah an hmuh tûr an awm lo tih a hmuh chuan a rûm nghût a, Muangchangin Keichala te inchhûngah chuan a lut ve ta a.

Inchhûnga a luh rual chuan, “Ṭhian Keichal, khawiahnge i nu leh pa chu?” a han ti a. Keichala lah chuan tapchhak a ṭhuthmun rem pah hian, “Kawmchâr ah, papui a ka khuh saw va en rawh” tiin a lo chhâng liam puat a.

A ip pawh nghat lo chuan Lalruanga chu kawmchâr lamah chuan a lût phei zui nghal a. Keichala sawi ang chuan papui chu a'n hawng a, Keichala nu leh pa chu sakei a chang deuh reuh hian an lo bawk dûn rial a, hah hmel tak hian an lo ṭhen ṭhû mai a, an hahni ah te chuan an ramsa pelhna a an  vangvat saiṭial lian pui pui kai te chu an lo khâp thlûr thlúr mai a.

Chumi a hmuh chuan  Lalruanga chu  kawmchar kawngka lam aṭang chuan a chhuak zauh va, Keichala te huan, an kawmthlang lawk a changel hnah chu a hlai ber a zu la a, a kîr leh pahin chu changel hnah chu a'n pawt zût a,   pawndum ah a chang ta nghal a.

Inchhung a luh leh rual chuan pawndum chu a han pawt thlêr kâwk kâwk a, Keichala nu leh pa te ha hni a vangvat lianpui te chu a hruk thlâk sak ta pawk pawk a.

A zawh hnu chuan papui a khuh leh tawh chuang lovin inchhûng lamah a luh san leh nghal daih a.

Bang dâp ther ah a ipte a khai a,  Tapchhak a Keichala kiangah chuan ṭhuthmun an rem te te a,

"Nu leh pa hmuh tlâk ka nei lo i ti a, i nu leh pa an ṭhat tehlul nên,” a ti a.

 An chunga a thiltih zia leh a thusawi te an hriat chuan Keichala nu leh pate chu Lalruanga chungah chuan an lâwm ta êm êm a. Zanriah te an han ei a, an eikham chuan Lalruanga chu a mu ta a, mahse a muhil der tlat thung. Zan a lo rei chuan a ke zungpui chu a hnâr tîr barh barh a. Keichala nu leh pa te chuan a muhil tak tak emaw an ti a, Keichala chu an ti ti pui ta a.

Lalruanga erawh chuan an thusawi chu ngun takin a lo ngaithla ru kiau a. Keichala nu chuan,  “Keichal, he i ṭhian hi ṭhian ṭha a nih hi, naktuk zîngah, 'Ṭhiana, ar ka talh ang che' ar ṭhum nge ka talh ang che, arpui tui lai?' ti langin, 'Ar tê,' a tih chuan, Arpui tui lai talh la, 'Ar pui,' a tih chuan a tê talh ang che.

Tin, 'Vawk ka talh ang che’ ti lang in, ‘Vawk lian nge Vawk tê ka talh ang che’ i ti ang a, 'Vawk lian' a tih chuan Vawk tê i talh ang a, 'Vawk tê' a tih chuan Vawk lian i talh dawn nia." a ti a.

 Keichala pa pawh chuan a nupui thusawi zawh chuan, " Ni e, Keichal, i nu sawi ang khân ti ngei ang che, Tin,  ‘Zu ka zûk ang che, bel tê nge ka zûk ang che bel pui?' ti la, 'Bel tê,' atih chuan belpui zûk la, 'Belpui,' a tih chuan Bel tê zûk ang che.

Tin, Kan huan a ṭhî pawh saw a duh tâwkin lawh sak ang che," a ti a.

Chutia an titi zawh hnu chuan an vai chuan mut zai an rel ve ta a.

Lalruanga erawh chuan chûng an thusawi zawng zawng chu a lo hre vek a, hlauhawm a awm lo tih hria in ngaihngam takin a muhil zui ve ta a.

A tûk zîng a an han thawh chuan Keichala chuan, "Ṭhiana, ar ka talh ang che, a ṭhum nge ka talh ang che, a pui tui lai?" a ti a. Lalruanga chuan a hmâ zân a an thusawi a hriat vek avângin fing takin a chhâng a.

''Keini ṭhian dûnin a pui lian te chu kan ei sêng nâng le ! a ṭhum le," a ti ta a. Tichuan Keichala chuan an arpui tui lai thau tak mai chu Lalruanga a talh sak ta a.

Tûkṭhuan te an eikham hnu chuan Keichala chuan, "Ṭhiana, zu ka zûk ang che, bel tê nge ka zûk ang che belpui,?" a han ti leh a, Lalruanga chuan,

"Kei a kâr a,  belpui te chu ka phû hleinem, bel tê zâwk ni rawh se," a ti leh a. Tichuan Keichala chuan a zu Belpui chu rawn chawi chhuakin an pahnih chuan duh tawkin an in dûn leh ta a.

Chutia zu an han lem zawh chuan Lalruanga pawh a tha a tho ve ta deuh a, "I khua chu a lian in a ropui ngei mai, ka han hawi khaw thawng lawk ange," ti chung hian in aṭang chuan a tek chhuak ta daih a.

A hma zân a an thusawi a hriat vek avângin chutia a chhuak ta chu Keichala te kawmchhak lamah te chuan a tei vel a.

Keichala te kawmchhak chiah ah chuan pitar pakhat hi a awm a, Lalruanga tei kual vel chu chu pitar inah chuan a han lêng lût ve nawlh a.

Amah chauh va a lo awm avâng chuan Lalruanga chuan a hlau êm êm hran  lo. An Lal khual a ni tih a lo hriat avângin pitar pawh chuan a lo be ṭha hle a. Chu chu remchâng a hmangin Lalruanga chuan thu a zâwt ru ta zauh mai a.

"Ka pi, Ka ṭhian in ṭhî min lawh dâwn a, a englam zâr nge ṭha ber ang?" a han ti zâwi sap a.

Pitarte chuan," Hmar lam zâr khu a ṭha ber a, mahsela an ui ber ang," a han ti te te a, chutah Lalruanga lam a thlêk hnaih pahin, " Nimahsela heti hian ti ang che, hre reng rawh, 'A kûng a i lâwn hunah Ṭhiana, ka tla dâwn' ti la, hmar lam zâr chu uai tliak palh la, tichuan ṭhi ṭha ber chu i nei thei ang," a ti ta a.

Tichuan pitarte in aṭang chuan hlim takin Lalruanga chu a chhuak ta a, Keichala te in a thlen chuan Keichala chu a lo insiam mawlh mawlh a.

"Khawiah i kal tâk daih ka lo ti a, ngaih i ti ṭha lo hman alawm," Keichala chuan a lo ti a.

Lalruanga lah chuan," I khua ka fang dawn ka tih kha,"a ti liam puat ringawt a.

"Ṭhian Lalruang, i haw hma in ṭhi ka lawh ang che, i kal ang hmiang," a ti zui leh a.

Tichuan an in piah lawk a Keichala te huan ah chuan ṭhi lo tûr chuan an kal ta nghal a.

A hmun an thlen chuan an pahnih chuan ṭhi chu an lo dûn ta a, Lalruanga chuan a hmâr lam zâr hlîr chu a lo va, a lawh ṭeuh tawh hnu chuan Keichala hmuh loh hlânin a hmar lam zâr chu a uai ta vak a, "Ṭhiana, ka tla dâwn," a tih rual chuan a tliak ta hmawk mai a, “In thlahrung tak hian," a ti zâwi sap a.

 Keichala chuan a ui hle mai a, a ṭhi lawh lai châwl meuhvin hmar lam zâr tliak chu a thlîr reng a, “Ṭhian ṭha chu ni lo la sa phuthlik,” a ti ram ta hmak mai a.

 Lalruanga lah chuan a tlâkna a a insawhna tuai vat vat chung hian, “Nang pawh ṭhian ṭha chu ni lo la thalfang char,” a ti lêt ve leh bawk a.

Mahsela ṭhian a an insiam tawh avâng leh ṭhi lawh pawh aman a sawi hmuh anih avângin lungawi loh ah ala zui chuang bîk lo, Keichala hi rilru chhe tak anih loh avângin an duhkhawp an lawh hnu chuan an in zui haw veleh mai bawk a.

Tlailam a lo nih chuan Keichala chuan, "Ṭhiana, i haw hma in Vawk ka talh ang che, Vawk lian nge Vawk tê ka talh ang che," a ti a.

Lalruanga chuan," A lian te chu kan ei sêng nâng le, a tê le," a ti a.

Tichuan Keichala chuan an vawkpa lian ber chu a talh ta a.

Zanriah pawh puar takin an ei a, a tûk zînga haw a tum avângin hma tak ah Lalruanga chu a mu ta a.

 Lalruanga mut hnu chuan Keichala chu a vâk chhuak a, an khaw kawtchhuah a a khaw mi ṭhahnem tak mai meipui chhep a ṭhukhawm a hmuh chuan thâwm dîm takin a pan a.

Mahsela an ti ti aṭang chuan Lalruanga chu seh ngei an tum tih a hria a, a khua te an nih mai bâkah a chipui te an nih bawk avângin khap daih tawp ringawt chu a rem dawn lo tih a hria a, Tin,  a khaw mipui te chu alak ah an hel mai a hlau bawk a, chuvang chuan chûng ṭhu khâwm ho te chu pawh lovin a haw leh ta daih a.

A khua ten Lalruanga chu seh an tum tih a hriat avâng chuan khawfing chah rualin Lalruanga mutui lai chu a kaitho a, chaw a fûn sak sawk sawk a, a ṭhi hawn tûr te pawh chu a rem fel sak thuai thuai a. Tin, thlî a fûn sak bawk a.

A thli fûn sak chu," In khua i thlen a, i in i luh hma loh chuan phelh hauh lo ang che," a ti a.

 Tichuan alang a engmah sawi chuang lovin Lalruanga chu a haw tîr ta vat a.

Lalruanga chhuah hnu deuh, leilung a lang ṭan tih chuan Keichala te inkawt ah chuan a khaw mi ṭhenkhat chu an rawn kal khawm a, “Keichal ṭhian buanah” tiin an rawn au va.

Inchhûng aṭang chuan  “Zîng a tho mêk,” tiin Keichala chuan a lo chhâng a, an han reh deuh a, mahse a hnu lawkah chuan, “Keichala, ṭhian buanah” an rawn ti leh a, Keichala chuan, “Chaw ala ei mek” tiin a lo chhâng leh a.

Mahse pawn lam ah chuan an ri hut hut a, a ṭhen lah chu sakeiah inti changin an hrâm ruai ruai tawh mai si, Keichala pawh chu a awm a nuam thei bîk lo, inchhûng dungah chuan a vei tawn sek a.

Rei lo tê ah, "Keichala ṭhian buanah," an rawn ti leh a, Keichala chuan, "A la insiam mêk," tiin a lo chhâng leh thuai a.

Mahse a sawi zo deuh chauh tih chuan Sumhmun velah te chuan an rawn ri leh deuh ta ṭuk ṭuk hlawm a. Keichala pawh a mangang tawh kher mai. Chutih lai akâr ah "Keichala ṭhian buan ah," an rawn ti leh a.

Lalruanga thlî a fûn sak kha, In i thlen hma loh chu phelh suh kha a tia. Chutia an rawn âu lai mêk chuan thlî hian Keichala bahzâr a rawn chhêm ta heuh heuh mai a.

Keichala chu a ngaih ala ṭha vak chuang lo nâ in chutia a thli fûn sak a phelh tâkah chuan eng êm a thleng lo ange tiin kawngkhar a hawng rawk a, "Khai le," tiin a papui a nam chhuak rawk a.

Chu veleh keimi ho chuan Lalruanga chu akal tawh a ni tih an hrethiam a, Sakei ah inti changin an hrâm ruai ruai a, chak takin Lalruanga ûm chuan a kalna lamah ah an tlân liam ta hum hum a.

Mahsela Keichala kha a ngaih a ṭhat theih loh avângin Lalruanga um tu te zîngah chuan tel ve in a tlan liam ve leh ta bawk a.

Van chung sâng a chêng Pathian chi te zîng ami, Vanhrika-a tihhlum avângin chûng vân chung a chêng thil tithei tak tak te chu Lalruanga chungah an lungawi lo hle mai a. Vanhrika a tihhlum avâng khân Lalruanga mai ni lovin lei a mihring te lakah pawh phuba lâk an tum reng a.

Chuvang chuan Mihring tlangval Hlawndawhthanga te unau tui intûr pawh kha mihring te laka phuba lâk nan a an lo ruahman vek a ni a, an thiltihtheihna hmangin Keimi ho thisen leh rih dil tui te leh dawi thil chi hrang hrang pawlhin tui an siam a, Hlawndawhthanga te hmuh ngei tûrin thing kawrawng ah an lo dah a, tichuan Hlawndawhthanga te unau chu Keimi ah changin mihring an lo tibuai ṭhîn bawk anih kha.

Chumai anla duhtawk lova, Siamtu Khuanu te remtih na lovin an chipui Vanhrika that tu Lalruanga ngei chu tihhlum an tum nghet tlat bawk a.

Mahsela Lasi pahnih te'n a an vên tlat ṭhin avângin hun ṭha erawh an hmu mai thei bîk lo.

Mahsela vanneih asiamin an tân hun a lo in hawng ve ta hlauh mai. Khatia Keichala te khua chhuahsan a a haw  lai khân A ip te puia Keichala thli fûn sak kha chûng vân chung ami ho chuan Lalruanga hriat lohvin a ip ata chu an tih tlâk sak a.

Lalruanga chuan kal pah a chhar in ngaihtuah mang hlei lovin a phelh ta mai a.

A phelh hnu chuan Keichala thusawi kha a hre chhuak a, mahsela engah teh vak a ngai lem lo, a awmzia a hriat tlat loh avângin.

Chutia thli fûn an tih tlak sak lai tak chu Lasi pahnih te khan an lo hmu hman a, chung van chung mi te chu ûm zuiin an bei let chiam a.

Chuta tâ chu thui pawh a kal hman lo, Thli thaw deuh vûk vûk leh leh hnim ri sun sun avâng chuan a tawi khawmuang a.

Sakei rual tlân leh hrâm thâwm a hriat chuan ngaihṭha lo takin a ngaithla reng a, thli thaw chuan an thâwm a rawn beng avângin chung chu hria a ni a.

A beng chhe ri mai anih ring a kal leh mai a tum lai chuan chu thâwm bawk chu a rawn ri leh a, a ngaih ṭha lo chu a kiang a bûng thing ah chuan lâwn in a kalna hnu lam chu a han thlír ta a.

A thil hmuh chuan a ti mangang ve kher mai!

A hnunglam mual hi an lo thleng tawh reng mai chu niin, Sakei rual tam tak mai hi mei kawh in an rawn tlân hum hum a, ṭhâng pik te chu an rawn bawh êng uar uar mai a.

Lalruanga chu hmanhmawh takin thing aṭang chuan a chhuk a, a theih anga chakin a tlân ta chiam a.

Chutih lai chuan van boruak ah chuan Lasi pahnih te leh van chung sâng a awm pathian chi hnuaihnung deuh te chu an lo inbei ve mêk bawk a. Mahsela mihring te hmuh theih loh tûrin an in lan thung.

Pathian chi, van chung nula leh tlangval ho chu Lalruanga tihhlum ngei tum a a siruk la a rawn thawk chhuak an ni a, an tam kher mai.

Lasi nula te pawh chuan an theih tâwpin an bei let ve a.

Chutih lai chuan van chhûm zîngah hian Pathiannu Mitmeng de riai Mal- chu a rawn lang hlawl mai a, Keimi rual tam tak ina Lalruanga an ûm a hmuh chuan chûng Keimi ho te tih khawtlai nan ngaw chhûngah chuan khaw chhak thlî a tleh tír chiam a,  ngaw chhûng a thing lian pui pui te chu thlî chuan lên tlu in, thing zâr te chu ṭêkin a dêng tliak hmawk hmawk a.

Thing tlu ina an kawng a dâl avâng leh ṭhenkhat a delh avângin an in pui leh  rih te te a. Chumi chhûng chuan keimi mitdel pakhat hi thlen hmasak ber tumin a ṭhiante inpuih lai chuan a tlân tlang daih a.

Mahsela kawng thui tak anih avângin Lalruanga chu eng anga chak pawhin tlân mahse, thui a thleng hman dawn lo tih chu Pathiannu Mal- chuan a hre tlang vek a. Chuvang chuan Lalruanga mit a tih vâr sak ta a.

Thui vak lo a tlân hnu chuan Lalruanga chuan kawng sîr a saphu khur hlui hi a hmu a, a ipte pui chu a hnawh lût rawk rawk a, amah pawh chu a lût zui ve nghal bawk a.

Keimi rual ho an in puih chhûngin keimi mitdel ber kha a lova tlân hmasa a, a lo va thleng hmasa ber a. 

Lalruanga khan a hmanhmawh êm avângin a ke lehlam a khai lut ve hman lo va, mitdel thleng hmasa ber khân lungtat emaw a ti a. 

"Kei chu lungtat ka chhar," a tia, a lo zût hauh hauh va, chu chu Keichala chuan a hmuh chuan Lalruanga ke a ni tih a hria a, midang lo thlen hma chuan rang takin mitdel hnenah chuan, " Khawi, hei chu keima hual asin," a ti a, mitdel pa chu nam sawn in amah chuan ṭhut bet ta tlat a. 

Rei lo tê ah Keimi dang ho chu hah hnêp hian an lo thleng khawm ve ta hlawm a, Lalruanga an hmuh tâk si lovah chuan an ṭhu khawm a, hlauhawm an sawi khâwm ta mai mai a.

Chutih lai chuan Mitmeng de riai Pathiannu Mal- chuan chulai hmun a Keimi ho thinlung chu a hmuh tlang vek avângin an rilru ah chawmawlhna a thlen a, Lalruanga chhan chhuah nan mitdel ber chu a rilru a sawi chhuah tîr ta a.

Keimi Mitdel- chuan, “Kei chu hlauh deuh mai ka nei a, mahse ka sawi ngam lo, a tak tak a lo nih chuan min tlansan vek ang, ka tlân chak ve thei awm si lo,” a ti a. A thil sawi pah chuan a hawi kual in a hnâr a lên dû dû a.

 Keimi dang ho chuan, “Han sawi teh, tak tak pawh lo ni sela, heti hian kan ti che ang a,” an ti a,  a zakah chuan pahnih hian zo deuh maiin an han khâi a, an tlânpui dân tûr te chu an han zir chhin vel a.

 Tichuan mitdel pa chuan a sawi ta a. “Kei chu ka hlauh ber chu, Lalruanga khân khua hi han ti dur khup khup mai sela, bawkbawn rûl tia tia hian ruah mal hi han ti tla phuar phuar mai se la;  chutah Lalruanga khân châng han tum râih mai se la, chu chu ka hlau ber,” a ti ta a.

Chu thu a sawi zawh chuan Mitmeng de riai Mal- chu a kiai sak a, Van chung nula leh tlangval te bei a, Lasi nula te pui tûr chuan van boruak sâng lamah a thlâwk sawn ta a.

 Chutia mitdel pa thusawi chu Lalruanga chuan a lo hre kar mai si a, a sawi zawh veleh chuan a sawi ang tak chuan a han dâwi ta a.

Rei lo tê ah ngaw pui chung ah chuan chhûm dum chhah tak tak hi an in din leh ta tup tup mai a, ngaw chhûngah te chuan chhûm leivâk an rawn zâm chiai chiai a, mitkhap kâr a'n ruah mal lian pui pui a rawn tla leh ta phuar phuar mai a.

Chutia thawklehkhat a thil lo thleng thut an hmuh chuan an ding ṭhuau a, an hawi kual vêl ruai a.

Chutihlai tak chuan Lalruanga chuan châng a han tum leh ta râih mai a. Chu veleh keimi ho chu sakei ah an inti chang a,  bak lêngin an tlan chhe ta rum rum hlawm a.

Chutia an tlân liam hnu chuan Keichala pawh chu ngaihṭha takin a tho va, mitdel pa kha chuan Lalruanga chu engtin mah a tih theih a rin loh avângin sakeiah a inti chang a, a ṭhian te tlân chu a ûm zui ve ta daih a.

 Mitdel pa erawh kha chu an tlansan ta vek a, amah chauh chuan chulai hmunah chuan hlau chung chungin a vir kual sek a.

Keimi ho an awm tawh lo tih a hriat chuan Lalruanga pawh chu khur aṭang chuan a lo chhuak a, Keimi mitdel chauh a hmuh tâk ah chuan hlau hek lo. A vaw nek a. Lei te a barh ṭeuh a, a kalsan ta daih a. 

Lalruanga kal liam hnu chuan mitdel pa chu hlau leh chau tak chungin an khaw lamah a haw veleh ta hnuang hnuang a. An khua a va thlen chuan an lo bâwr tuau tuau a. Eng tak tawng ang maw tiin an lo chhaih vêl a.

Ani lah chuan, “Lalruanga in tih kha kan chawlhna bul a saphu khurah khân a lo tawm reng a, ka chem phêk in ka hêm nek a, lei ka barh lei ka barh ṭeuh a, ka rawn kalsan ta anih kha” a ti ta hlauh va.

 Keimite chuan an awih lo khawp a, an haw haw dur dur a, chutah, “Nangmah zâwk hi a hêm hrep che a ni lo maw? Khawinge kan han en teh ang che,” an ti a.

An man bet lawk a, a ṭhen in a ka an lo keu kau bawk a,

“E ! Nangmah hi a hêm hrep zâwk che anih hi,  hei a hêm na che i mawng pawh a duk chur alawm,” an ti a.

A ṭhen chuan, "Ṭawng pawh i ṭawng ṭha thei lo anih hi i ka ah lei a la awm nuaih alawm," an ti bawk a, an bawr tuau tuau a, sâng takah vâwr in an dawng leh a, chuti rêng rêng chuan an sawisa ta chiam a.

Khatia Lalruanga kal ta kha buaina engmah tâwk lovin a kal zêl a, an khaw dai tuikhur a thlen chuan khua a tlai tawh angreng hle mai a, chutah chuan châwl in tui te a in a, chutia a ṭhut chawlh lai chuan a fanu hi tuikhur ah tui chawi tûrin a lo kal a, a hmelṭha kher mai.

 Lalruanga chuan rei tak a hmuh tawh loh avângin a fanu chu a hre tawh hauh lo va. Mi dang daih emaw tiin mutpui ah a thlêm ta a, a ṭhi hawn te  chu phawrh chhuakin pêk a han tum a, mahse nula chuan,

 “Ka duh lo, kei pawh ka pa Keichala khuaah a zin a, ṭhi te chu a hawn ve ṭeuh dawn ,” a ti ta a.

Chutia a sawi tâkah chuan ama fanu ngei a ni tih a hre ta a, Lalruanga chu a zak ta êm êm mai a, a tui thâl lai chuan a in ak sawk sawk a, a kal ta daih a.

In a thlen hnu lawk chuan a fanu tui chawi pawh chu a rawn thleng chawp chilh ve nghal a.

A fanu chuan a nû hnenah Tuikhur a a pa tih dan chu a han sawi dawn a, a sawi dawn veleh Lalruanga chuan a ṭhi hawn chu thlangra ah a bun rawk rawk a, a fanu hnenah chuan,

 “Hei chemtê, a ṭha ṭha,” a lo ti zung zung a, a fanu chuan a sawi hman ta lo va.

Tleirawl â tih takah chutia ṭhi ṭha tak tak a hmuh chuan hlim takin ṭhi chu a thil ta zâwk a.

Van chung sâng tak ah chuan Pathian te an in hmu khawm a, Vanchung nula leh tlangval te'n a Lalruanga lak a kut an lek chu Romei kâr a lêng, mihring te enkawl ṭhîn tu thlarau ṭha mî Vansen- chuan ngawihsan mai a ṭhat loh zia thu a tlângau pui a.

Aw, Mal, min hrilh teh khai, Khuanu chi pêng ami Lalruanga lakah chuan engvânga chêt thawh mai nge maw an nih le,"  tiin pathiannu mitmeng de riai Mal- lam chu a hawi a.

Mitmeng de riai Mal chuan," Siamtu Khuanu lak ah an hel a ni ber mai, an chipui Vanhrika phuba lâk tumin an in hâwr khâwm a, Lalruanga chauh ni lova, lei a chêng mihringte lak a an chêt duh dân aṭang hian an nihna an bosan a ni ber mai," a lo ti a.

Vansen- bawk chuan," Mihring te tibuai tûrin Keimi an thunun a, Lalruanga chauh ni lo, mihuaisen leh mi te zah kai Hlawndawhthanga te unau laka an chêt zia pawh kha Khuanu hian a hmu anih ngai chuan zilhna pêk ngei an ngai a ni, heti rêng rêng anih chuan lei chung ah buaina nasa zâwk an thlen thei tlat a ni." a ti leh a.

Siamtu Khuanu lam hawiin Mal- chu a kûn zauh a, "Aw thihni hmel hmu ngai lo tûr Khuanu ropui, Vansen thusawi te hi i hria a, Van chung nula leh tlangval te thiltih pawh, engkim i hre vek tih kan hria e, anni lakah hian eng chen nge i zahngaihna i lantîr dâwn," a han ti a.

Siamtu Khuanu chuan," Aw Mal, mihring te i hmangaih tluk zet hian keipawhin mihring te hi ka hmangaih a, Pathian chi hrang hrang te leh thlarau ṭha mi te pawh hi ka hmangaih vek che u asin, mahsela engkim hi ruahman lâwk vek a ni a, hun in ala rawn hrilh ang a, inla hrethiam ve mai ang." a ti thung a.

Mahsela Mal chuan," Mahse, tunah lawk pawh khân Lalruanga chu a thi ṭep a ni a, ka lasi nula te khân lo chhan lo phei sela chuan Keimi lakah a boral tawh ngei ang," a ti ve tlat a.

Chutih lai chuan Vansen pawh chu a lo inrawlh ve vat a," Ni e, Mal, sawi kha a dik a ni, I remruatna chu a sual ngai dawn lo, mahsela mihringte lakah Keimi te khu an che nasa telh telh a, khap vat chu angai a ni." a lo ti ve bawk a.

" Keimi chi zawng zawng erawh chu suat vek an ngai lo ang, a bul tumtu chu Vanchung nula leh tlangval te khu an ni a, a chi a an tawrh vek loh dan tûr leh mihring te an tihbuai tawh loh dân túr siam angai a ni," Mal chuan a lo ti leh a.

Siamtu ropui ber Khuanu chu a lo ding chhuak a, " Aw Mal, in thusawi te, in ngaihdan te kha a dik vek alawm, mahsela a hun a lo thlen hunah chuan engkim in hrethiam mai ang ka tih chu, Chi zawng zawng aiah an hruaitu in nunna hlân sela, tichuan an inrem mai thei dawn a ni." a rawn ti ta a.

Mitmeng de riai Mal chuan, " Aw Siamtu Ropui ber, i remruatna chu kan hrethiam e, mahsela nunna chu nunna ina a tlan angai a ni lawmni." a rawn ti leh a.