PASALṬHA CHHUANSANGA | INDONA LEH HMANGAIHNA (BUNG LI NA) ṬHIAN CHHAN THIH NGAM

Chu ngaw chhah pui hnuaiah chuan fimkhur takin an an ṭhiante zawng chuan an chhuak ta ṭhâm ṭhâm a, thui tak an kal hnu chuan mihring na tuar ṭê rawng rawng thâwm hi an hre vuai vuai a.

"Chu aw chu in hria em?" Ṭhuama chuan a ti sap a,  Lala chuan," Kima aw niin ka hria," tiin a lo chhâng a.

"Kan veilam saw niin ka hria," tih leh chumi lam pan chu Sangpuia chuan a rual nghal a, midang pawh chuan kah mai theih tûr a an silai lek chung hian an zui ve nghal a.

Chhûm leivâk a tam êm avângin in hlauh mai an hlau a, chuvangin inhnaih te te in an kal hlawm a, ruah lah ala rawn sûr seng seng reng avâng chuan chu ngaw hnuai chu a hrehawm hmel hle mai.

Chutia thawm an hriatna lam a thui tak an kal hnu chuan vaihmite arawn tam ṭan riau mai a, an hmabak lah chu chho ulh deuh, lung khawkrawk hmun deuh anih avângin kal pawh a harsa ṭan anreng viau a.

Rim thâng deuh nghur a awm tâk ah chuan hmahruai ber Sangpuia chuan," Sapui a hnai in ka hria, " a ti thâwp sat a. Khua a hmuh thui theih si lo, hlam hnih thum vel bâk lo chu chhûm leivâk avâng chuan a hmuh theih loh a, an sîr hla vak lo a hnim pal rîk deuh sun sun te pawh chu a rawn hnai ve hret hret zel a.

An hma lam a lung khawkrawk leh hmun fai lai deuh kawh pah hian Sangpuia chuan," Khimi laiah khian i lawn chho phawt teh ang u, khua pawh a thlír theih deuh ang," a ti a.

Mahsela pat ek a tam avângin a lo nâl angreng khawp a, awlsam tak a lawn chu a theih mai loh.

Mahsela Sangpuia leh Ṭhuama chauh chu an lawn kai hman tih chuan Hnim pik kâr aṭang chuan Sapui a rawn chhuak thut a, an vai mai chuan an darh hak a, a hnung ber a Lala- ding chu a zuan tlu nghal rawp a.

Siama chuan rem leh rem lovin a silai chu a hmet per ṭhuai a, Sapui chu a fuh ngeiin alang, a hrâm dân aṭang chuan, mahsela an ṭhianpa Lala chu hnim zîngah a hnûk lût hman tho mai.

Chhuansanga pawh chuan thâwm awmna lam hawi chuan a silai a hmet per ve vat a, mahsela a tum a fuh nge a ṭhelh tih pawh a hriat theih loh.

Silai hlo thunna hman a awm tawh loh avângin rang takin Siama nen chuan an chem tum hûm chungin hnim zîngah chuan an liam zui ve nghal a.

"Chhan tlak ka la awm," tiin Lala chu a au zêl a, Ṭhuama leh Sangpuia chu lung khawkrawk ah chuan an rawn tawlh thla dûn rawk rawk a, Siama te tlanna lamah chuan an tlan ve nghal a.

Thui fe an ûm hnu chuan Thing lian tak bul ah hian an va nangching a, Sakei chuan Lala-a chu a kap ka lak rûn a, a lo inhrosa nasa in a hrâm ruai ruai reng a, Lala erawh ala thi lo nâ in chet pawh a che thei tawh lo thung.

Siama leh Chhuansanga chuan an chem chu nghet tak a keng in an lek dûn a, ṭan hmun siam rem hret hret zêl in Siama chu Chhuansanga veilamah, amah hlat angreng tak hian inring tak hian a awm a.

Muangchang a an pan hnaih hret hret lai chuan,

"Siama..." Chhuansanga chuan a ti ṭhawt a.

Mahsela Siama chu a inring hman lo. Siama hnung chhûm zíng chuai kâr aṭang chuan an ṭhianpa Tawia kha a lo lang thut a, Thing bung lian tak lek in Siama a tukkhum ah tak chuan na fe mai hian a hêm chawrh a. Siama chu a ṭe ṭhawt a, lei ah a tlu zawi nghal hnawk a.

Mahsela a vuak rual chiah chuan Tawia chu Chhûm leivak leh hnim kâr ah chuan a pilbo lehnghal daih mai.

Khatia a vuak rual chiah khân Chhuansanga chuan an hma a Sakei awm pawh chu a hre chang tawh lo, Siama lamah chuan a tlân nghal a. Chhuansanga chesawn chu Sakei chuan a rawn zuan ve nghal a, mahsela a zuan lai tak chuan silai a ri nghal ṭhawt ṭhawt a, boruak a Sakei zuang 

kâng lai chu lei ah a tla thûm ṭawk a, ala thih chian loh avângin Ṭhuama chuan a chal ah a kâp nawn leh sak a. Chumi hnu lawk chuan a zal ve ta.

Sangpuia leh Ṭhuama chu an lo thleng ve chiah hi a lo ni a. Anni chuan Lala leh Chhuansanga silai thlauh chu an rawn chhar phei hi a lo ni a.

Lei a Siama nikhawhre lova tlu reng chu Chhuansanga chuan a bawihsawm vat a, mahsela a lo thi fel dêr tawh thung. A tukkhum chu a dûp vek a, a ka leh a beng aṭang chuan thisen a rawn chhuak zawih zawih a.

Sangpuia'n a Lala- a ṭhutchilh lai chuan Ṭhuama chuan a silai in Sakei chu a lo hawlh kual vel a.

Lala pawh chu chhan tlâk meuh a awm tawh lo niin alang. Sakei chuan a nghawng ruh chu a seh tliak hneh hle a, ngaw hnuaia a hnuhna lamah te pawh chuan a pilh pheng phung bawk a.

Sangpuia'n a an pawm kân pawh chuan a nghawng ruh chu a ri rawih thei hial a, Sakei ngho luhna chu a kut zungchal thawl hal hal hian a kaw pam a, thisen a rawn hnâm chhuak ṭiam ṭiam a.

"A va han pawi tak êm, kan hun tawn hi a mak takzet a ni," Ṭhuama chuan a ti chuai raih a.

"Sawi ngaihna pawh a awm lo," Sangpuia chu ama hriat tawk lek hian a phun sap a.

"Ṭhuama, min han zâwn pui mai teh, thing hnuaiah khân i'n zalh rih teh ang," Chhuansanga chuan a ti a. Ṭhuama pawh chuan Siama- ke lamah chuan a rawn chawi a, an pahnih chuan Sangpuia bulah chuan an zâwn phei a.

"Sangpuia sawi ang khan tunah hian thil mak tak mai an tawng niin ka hria," rûm nghat pah hian Chhuansanga chuan a ti a,

"Kan lo tlai deuh niin alang, mahsela Siama hi engti zia nge ni?" Ṭhuama chuan a ti a. Chhuansanga chuan Siama ruang en chung hian, " Ka mit vai chu a ni lo, Tawia ngei a ni," a ti thâwp sat a.

Sangpuia chu lo ṭawng chhuak in." Ka rin ang chiah anih chu," a rawn ti a.

A thusawi chu mak an tih hmel kher mai, an pahnih chuan Sangpuia lam chu an hawi rual ṭhawt a, " Eng maw," an ti deuh hluai a.

" Tawia hi keini chhan theih a ni tawh lo, Sih huai in a luhkhung tawh a ni, Chhuansang, Tawia sa hnu kan chhui a kan thil tawn aṭang khân i hrethiam tawh lo em ni, Kha sih huai lung kha a ti awi lo a ni ngei ang, "  Sangpuia chuan a ti thâwp sat a.

Chhuansanga'n a, " Ka hre thiam e, mahsela midang ho te pawh kha," a tih lai chuan Sangpuia bawk chuan, "Ka hre lo le, anni pawh kha dam a kan hmuh leh hi a beisei awm lutuk hran loh." tiin a rawn thual leh a.

"Engpawh nisela zawn hmuh an ngai a ni, anih loh chuan kan haw kawngah hian buaina nasa zawk kan tâwk thei reng ania," Ṭhuam-a chuan a lo ti a.

"Anni ruang hi engtin nge,   helai hmunah hian kan phûm mai dawn nge," Chhuansanga chuan a lo ti a. Sangpuia erawh chuan an bûk lama haw pui phawt a duh thung a.

Chutih lai chuan ngaw chhûng khâwk rum rum hian patling nui ri a rawn chhuak a. An vai mai chuan an phâwk hrû hlawm mai.

" Kan tawn tûr chu eng pawh nisela, i zo phawt teh ang u, kan ṭhiante ruang chu helai ah hian awm phawt sela, kan kír leh lamah tihdan i ngaihtuah zâwk teh ang u," a silai hlo thun pah chuan Ṭhuama chuan a rawn ti chhuak a. Sangpuia leh Chhuansanga pawh chuan an hnial ta lêm lo, anni pawh chuan an silai hlo chu hmanhmawh takin an thun sawk sawk a, an thun zawh chuan Sangpuia chuan an piah deuh va Changel hnah chu la in an ṭhiante ruang chu a khuh a, an hun tawn in a zir loh ém avângin an Sakei kahhlum pawh chu an ngaihsak chang tawh lo.

An in sing sak zawh chuan an ṭhian dangte zawng tûr chuan ngaw hnuaiah chuan an vâk chhuak leh ta a.

Thui vak lo an kal hnu chuan an hma lawk ah chuan Sangpuia chuan thil che zeuh a hmu a," Thâwm dîm ang u, sawlai ah sawn eng emaw ka hmu a nia," zawi fahran hian a ti a.

An silai chu kah mai in peih hian an lek far a, an hma lam pan chuan thâwm dîm takin an kal phei ṭhâm ṭhâm a. 

Thui lo tê an kal leh hnu chuan Mi pakhat, anmahni hnungchhawn zâwng a ding hi an hmu a, chhum leivak a zîn chiai avângin hlam sawmhnih vel lek pawh chu a hmuh chian theih loh kher mai.

An hnaih phei hret hret a, mahsela an mitkhap kâr an a bo leh ta daih mai.

"Phiangsen chuan," Sangpuia chuan a ti zawi sap a. An hmuh na lai tak ah chuan ding in an han hawi kual vel a, mahsela tumah hmuh tûr an awm lo.

Ṭhuama erawh chu a kal sawn a, a silai lek chung chuan a hawi vel ruai a.

"Saw ta saw," a ti zawi sap mai.

An pahnih chuan Ṭhuama- melhna lam pang chu an hawi rual ṭhawt a, an piah deuh a thingkung phênah chuan mihring bân lo lang dêt dêt hi an hmu a.

Zai zir in an in bia a, chu an thil hmuh chu hual in Sangpuia leh Chhuansanga chu veilam leh dinglam ah pêngin an veh phei a, Ṭhuama erawh chuan hnunglam aṭangin a veh thung a.

An veh hnai telh telh a, thing bul phên lam an thlen chuan mak an ti hlawm kher mai.

Thingkung ngheng chuan an ṭhianpa, Tawia ûm tu pakhat zawk Kima- chu a lo ṭhu thluang a, han en mai pawh chuan nunna a nei tawh lo tih hi a hriat ngawih ngawih.

A taksa chu kut tin hriam tak a ham na hnu hian a râng pilh nuau a, a hmai ah chuan kut thla lian tak mai hi a kai a, an benna hnu niawm tak a ni, a ringruh a tliah avângin a lu chu a kun deuh lup a.

Ṭhuama'n a a lu a kaih dâk chuan a ngawngah chuan kut tha chak tak ina a rehna hnu tih hriat tak hian a thlâ ala lang kulh thei anih chu.

"A va han pawi zo zai tak êm?" Sangpuia chuan a ti chuai raih a. An ṭhianpa ruang chu ngui tak hian an din hual ṭhap a.

Thawk leh khat ah thâwm a rawn chhuak thut a, Ṭhuama chu a lêng lawp a, an hma a thingkung chu a tauh chawrh a, leiah a tlu thûm ṭawk a.

Sangpuia leh Chhuansanga chu a per sawn nawlh a.

Chhum zîng chuai kâr ah chuan an ṭhianpa tawia ngei mai chu a rawn lang leh ta, a hmel chuan mitthi tawh hmel hi a pu a, a mit meng chu a pual rû a.

Rapthlak tak a ṭe ruai ruai chung hian an pahnih chuan a rawn pan chhut chhut a.

"Tawia," Chhuansanga chuan ti chuai raih a.

Sangpuia chuan a per sawnna lamah a silai a thlauh avângin Chhuansanga chu a silai a kâp tûrin a au a, mahse Chhuansanga chuan a kap thei lo, an ṭhianpa ngei mai kah chu a thei lo, a silai chuan a'n tin ṭhin tak na a, mahse a hmet thei hauh lo.

"Tawia a ni tawh lo, kap rawh, tunah..."Sangpuia chuan a ti tuarh tuarh a.

A tawp a tawp ah chuan Tawia'n a a rawn pan a, an in hnaih chilh tawh êm avângin maimitchhing chungin a silai chu a hmet per ta a, mahse a tlawlh tlat mai.

Tawia chuan mitkhap kar an a rawn hnaih chilh a, a kut pahnih chuan a nghawng ah a rawn rêk kâng chawn chawn a, Chutih lai chuan Sangpuia chu rawn tlan pheiin Tawia chu a rawn bawh thlu a, an pathum chuan an tlu khãwm ta rawih a.

Tawia thawh leh hma chuan Sangpuia chu rang takin a tho a, Tawia chu bawh bet in a hnek ta chawrh chawrh mai a.Chhuansanga erawh chu an thil tawn avâng chuan chet lak vak ngaihna hre lovin a hawi â deuh hû thung.

Chutih lai chuan thingkung a lêr lam aṭang chuan a letling zawng hian a kut leh ke a vâkin chungin an ṭhianpa Hnema chu a rawn chhuk thla ṭhêm ṭhêm a, a hmel pawh chu Tawia ang tho a ni.

Chhuansanga hawi hai lai chu zuan in a  rawn bawh thlu tawp a, hnim pik kâr ah chuan an in khuainuai zui a.

Hnema chuan ṭê ruai chung hian Chhuansanga chu a bawhbet a, a hnek a, a chûm in a ham bawk a. Chhuansanga pawh chuan a theih pa tawp hian a lo beilet ve a, a kut lehlam a a nghawng a rêk chung hian a kut lehlam in a rem lai lai ah  a lo chûm ve nghek nghek a.

Tawia hmel chu hmuh tlak awm lo khawp hian thisen in a bual nuau a, Sangpuia kut pawh chu a pilh pheng phung a. Engmah hre lovin Tawia chu a awm a, Chhuansanga te insual a hmuh chuan a tho lawk a, Chhuansanga Silai tlawlh chu chhar in a tlân phei a, a ṭhianpa bawhbet tu Hnema chal ah tak chuan silai kâwm chuan a hêm chawrh a, Hnema pawh chu a let hlawm ve ta tawp mai.

Chhuansanga awm leh hmai vel te chu a pilh neng nung a, Sangpuia chuan thaw hlawi hlawi pah hian a tung tho a,

Chutih lai chuan Hnema chu a rawn che leh hrut hrut a, an piah deuh thingkung bul a nikhawhre lova let reng Ṭhuama- lamah chuan chak deuh hian a phit phei zawk a, Ṭhuama ke rêk ah chuan man lawk in hnim pik kâr ah a hnûk lût ta daih a. Chutih lai chuan an hnung lamah chuan thil ri rawp an hria a, an pahnih chuan chulam chu an hawi phei nghal a.

Hmai thi hnuang chung hian Tawia chu a lo ṭhu chhuak leh luau hi a lo ni a.

"Tlan rawh, bûk lam ah," tiin Sangpuia chuan a ti vîn ṭhak a, amah chu thovin Tawia lamah chuan a tlân phei leh a. Tawia hnek tum a a ban avai lai chu Tawia chuan lo man in a elh ri tuarh a, Sangpuia na ti chu a ṭe tuarh a, Tawia chuan Sangpuia âwm ah tak chuan na fe mai hian a chûm zui ri leh nghal dup mai a.

 Chhuansanga pawh a awm mai mai bîk lo, Sangpuia thawh rual khân a piah lawk a a ipte pui leia tla lamah chuan a bawk vâk phei hrawih hrawih a, a chhûng chu dap rawk rawk in a chempui hriam tak mai chu a lek chhuak a, Tawia te lamah chuan a tlân phei ta nghal a. Sangpuia chu a âwm a Tawi an a chum khân leiah a tlu hnawk a, chutih lai tak chuan Tawia nghawng a sah tum chuan zak kau hawk hian Chhuansanga a chem chu a rawn vai fua a, mahsela Tawia chuan a lo thle sawn hman hlauh a, Chhuansanga chem vai, a tha tawp a a ban a vai lai chuan Tawia chuan a bân rêk ah a lo man chawt a, chumi rual chiah chuan a phih nawk a, a hnungzângah a kut leh lam chuan a chûm leh ta ngheng mai a.

Chhuansanga chu a pai chawn chawn a, a ṭhingṭhi zui nghal hnawk a.

Sangpuia pawh chu a rawn tho chhuak leh vat a, Tawia'n a ṭhianpa a khawih leh hma chuan a rawn bawh thlu tawp a, hnim zîng ah chuan an let thual thual a.

Mahsela Sangpuia chuan a hneh lo kher mai, Tawia chuan a hnek ri chawrh chawrh a. A hnar aṭang chuan thi a rawn chhuak zawih zawih a.

Chhuansanga chu a thaw ri deuh hrâwk hrâwk a, a ṭhingṭhi chu kûn in a kut pahnih chuan lei a beng a, thisen a chhak chhuak ṭhawt ṭhawt a. A ṭhianpa Sangpuia te chu thei leh thei lo hian a melh ṭâwk ṭawk a, chutih lai chuan Sangpuia chuan, " Kal rawh, tlan rawh, tlan rawh,.." a rawn ti a.

Tawia chuan na fe a Sangpuia bek a a hnek leh zawt hnu chuan Sangpuia chu a zal ta dêr a, Tawia chuan nui huah huah chung hian a ke rêk ah a man lawk a, hnim pik zîng ah a hnûk lût ta daih a.

"Sangpui...Sangpui," thaw ri hrâwk hrâwk chung hian a ti zâwi sap a. Tawi a'n a a hnuh liamna lam chu thinrim hmel tak hian a melh reng a.

Chutah a han in sang mar a, rûm ṭiah ṭiah chungin a tho a, a silai chu chhar in a hlo a thun te te a, an ṭhianpa thi tawh Lala bul thingkung kiang a Ṭhuama Silai thlauh pawh chu chhar leh in Tawia'n a Sangpuia a hnuh liamna lam hnim pik kâr ah chuan pei khat khat chungin a pît bo zui ve ta a.

Tawia'n a Sangpuia a hnuh liamna lam chu a pe deuh hun a, thing ṭang te chu an sut tliah nual a vângin Chhuansanga chuan an hnu chu a chhui ve zel a.

Thui fe a umzui hnu chuan a hma a Sih an kalna hmun kha a chuang chhuak leh hlawl mai. Thâwm dîm takin a pan zel a, Sih tui kamah chuan Tawia leh Hnema- chu Sih tui lam thlír hian an amah hnungchhawn zâwngin an lo ding vung vung a. An bul lawk leiah chuan Ṭhuama leh Sangpuia chu pilh nên nuan hian nikhaw hre lovin an let reng a.

A thil hmuh avâng chuan a ṭe chhuak ṭêp a, mahse a kut in a hmui a hup hman hlauh mai. Sih tui piah a thingkung lian leh zâr âwn du mai ah chuan a ṭhiante pathum Do a, Chunga leh Thanga- te chu saruak ngalngat hian letling zawng hian an lo inkhai fur hlawm a.

Chu thing zâr ah chuan ramhrui nghet tak a in suihin anni pathum chu an lo in khai thên nawlh nawlh mai a. An taksa chu kutthlakna hnu hma in a khat hneh hle a,  an hnungzang leh malpui te chu a duk cher chur a, an vai mai chuan an lu ah hliam na tawk tak an tuar ṭheuh tih a hriat in thisen in a bual nuau mai bawk a. An thihna pawh a rei thawkhat tawh tih a chiang hle mai.

Biak pawh an in be chuang lo, a chângin Tawia leh Hnema chu an bu leh nghut nghut ṭhîn a.

Sih kam ah chuan an vei tawn deuh sek a, Chhuansanga chuan thawm dim takin a hnaih phei hret hret a, a silai pakhat zawk chu ak in pakhat zâwk chu kah mai in peih at in a lek reng thung a.

Rei vak lo hnu ah chuan Tawia chu a rûm nghut a, Sangpuia a ke rêk ah chuan a man lawk a, Sih tui chu a dai zui nghal a. Hnema erawh chu sih kamah chuan che miah lo hian ala ding vung vung thung.

Tawia chuan a khûp chen vel tui a dai a, Sangpuia pawh  ke vel pawh chu tui ah a hnûk lût ṭan mêk a.

Chhuansanga chuan ni thei ngang in a hre lova, a tawmna aṭanga tlanchhuah pahin, "Tawia".. tiin a au nghek a. Chu veleh Tawia leh Hnema chu an rawn lehhawi rual ṭhawt a, Hnema chu alam ah arawn tlân phei nghal a.

Chhuansanga chuan a silai chu a hmet per a, mahsela a hmanhmawh êm avângin a kah ṭhelh ṭêp a, Hnema nghawng chu a kâp thâwi thuak a, a per sawk a, thisen a rawn hnâm ṭiam ṭiam a. Mahsela a rawn la tlân zui zel a, Chhuansanga chuan a silai chu a paih lawk a, a ah zâwk chu lek in a kâp zui lehnghal a. Hnema lu chu a thlawh darh teuh kher mai, a chal ah tak a kâp a ni a, a lu chu a hêk huam a, lei châr ah chuan a tlu zawi ta hnawk a.

Tawia pawh chu chak tak hian Chhuansanga lamah chuan a rawn kal phei a, ani lah chuan a silai hlo thun hman tawh hek lo, a silai dâwt lamah chuan vuan in Tawia vuak thluk tum chuan ṭe ruai chungin a pan phei ve bawk a.

Tawia'n a reh tum a a rawn zuan i chuan a ṭanhmun a lo siamrem zawk a, Tawia bek ah chuan silai kâwm chuan a hêm ta chawrh a.

Tawia chu a pei khawt khawt a, nui vur vur chung hian a rawn pan leh a. Mahse Chhuansanga chuan fing tak a lo beilet in, rang takin a kûn hniam a, Tawia khûp ah tak chuan silai kãwm chuan a hém leh ta chawrh a.

Tawia chu a ṭhingṭhi hnawk a, chutih lai chuan rang takin Chhuansanga chuan bei zuiin a hnungzâng ah chuan a hêm leh ta pawp mai a, Tawia chu a tlu bawkkhup thlawrh a. Mahsela Chhuansanga chuan chuti mai chuan kalsan ala tum hauh lo.

A silai kâwm chuan Tawia lu ah chuan a hlap leh chawrh a, a lu leh hnâr, a ka aṭang te chuan thisen a rawn chhuak nguah nguah a, tho leh tûr awm tawh lovin a zal ta dêr a.

Chhuansanga pawh chu Tawia bulah chuan a ṭhu hnawk a, a chau in a thaw ri hrâwk hrâwk a, " Ṭhianpa, a pawi ka ti hle mai, ka chhan thei ta lo che hi ka in thiam thei ngai dawn lo a ni," hrehawm tih hmel deuh hian a phun sep a.

Chutih lai chuan thli a rawn thaw deuh vûk vûk ta mai a, a awmna piah lawk a hnim te chu an ri sun sun a.

A hma ang chiah khân, Sih piah lawk a thingkung lian tak chu a auh ri leh ta tuarh tuarh a. Thil a fel dawn a a hriat loh avângin a tho thuai a, lei châr a Ṭhuama mu reng lamah chuan a pei phei nawk nawk a, a hming a kovin a sawi nawk nawk a, mahsela a harh theih loh avângin Sih tui a in chiah reng a Sangpuia lam pan chuan a tek thla leh a, Sih tui aṭang chuan a hnûk chhuak ta a. Chutia a hnuh lai chuan an nau leh ṭhianpa Puia ruang chu Sih tui lai ah chuan puam êk ûk hian a rawn lâng luau luau a.

Hmanhmawh takin Sangpuia chu a hnûk a, Ṭhuama kiangah chuan a hnûk phei a, amah pawh chu a chauh êm avângin a ṭhingṭhi hnawk a.

Chutih lai chuan Sih tui chu a rawn phuan burh burh a, Palian pui pui, taksa hmul thep thup,  sâwm rual vel hi tui aṭang chuan an rawn chhuak a.

Eng emaw ni an chunglam boruak ah chuan a rawn ri chuaih a, thil phe zawk hian Chhuansanga chu a dêng ni mai hian alang. Nikhaw hre lovin a ṭhiante bulah chuan a let ve ta reng a.

Chhuansanga te kiangah chuan Hmeichhia ang deuh, thawmhnaw êng tak mai ha hi a lo lang thut a.

Chung sih tui aṭanga rawn chhuak te pawh chuan a ên êm avângin an en ngam lawk lo va.

A palian ber chuan thûm chhur hian," Tunge nih a, helai ka Lalram chhûngah hian engvanga rawn kal nge inih," a ti a.

Chu mî chuan, " Lei mihringte enkawltu malsawm tu Mal- ka nih hi, nang Sih huai hian héng mihringte hi engvanga sawisa nge inih?"  thu pe aw tak hian a ti let a.

Chu palian bawk chuan, " hêng mihring te hi ka phal na la lovin ka ram chhûngah an rawn lût a,  Ka fanu an kâp hlum a, chuvangin ka fanu laka an thiltih man hi pêk ka tum mai a ni,"  a ti thûm leh chhur chhur a.

Mal- bawk chuan," Han hawi teh i thil tih zawng zawng hi i hmu lovem ni, i fanu laka thal thlahtu lah i thiltih avãngin a boral tawh a, hêng mi zo zai nunna hi laksak na chhan tûr i nei lo, an chungah hian kut lek tawh suh," a ti leh a.

" Ka fanu nunna min pek kír hma loh chuan ka tawp san lovang," tiin rum tak in a chhâng leh a, Mal -bawk chuan, " Heng mihring te hian ei atân ramhnuaia ramsa an zawng a, i fanu hian lem changin ramsa angin a inlan a, anni kut a tawrh phah ta a ni, mihring te hian thiam lohna an nei lo, chuvangin tunah hian i thiltih lai hi i tawpsan nghal tûr a ni, i tawp san lo anih chuan Khuanu pawh i lak ah a lungawi lo ngei ang," tiin a chhâng leh a.

Anni Palian pui pui te chu thinrim tak hian an au ruai ruai a, tui te chu an bêng per chuai chuai a, an hotu pa ber chuan," Ka pawi an sawi leh anih chuan tuman min dang thei tawh lovang," a ti chuai raih a.

Tichuan hreh takin Sih tui ah chuan an lût leh ta diak a, Mal- chuan Chhuansanga te chu khawngaih thla la deuh hian a thlîr vawng vawng a, chumi hnu chuan thawk lehkhat ah van chung boruak chu ṭêk tla ang mai hian a phe zuai zuai a, Mal pawh chu a mitkhap kar a'n a bo zui ta daih a.

Chhuansanga chu a rawn che ṭalh ṭalh a, a rawn mengin a rawn ṭhu chhuak a. Mahsela an kiang velah chuan thâwm danglam engmah a awm lo.

Mak tih hmel tak a a hawi kual hnu chuan Sangpuia chu a sawi nawk nawk a, ani pawh chu a rawn harh chhuak ve ta a.

Chhuansanga chuan dawmin arawn ṭhu chhuak a, Chutah Ṭhuama pawh chu Chhuansanga chuan ko vin a sawi nawk nawk a, rei fe tihharh a tum hnu chuan a rawn meng ve thei ta ṭâwk a.

" Eng thil nge kan tawn, helai hmun bawkah maw,"  Sangpuia chuan a ti a.

"Ka rawn zui zel che u alawm, tunah chuan an bo zo tawh a ni ang, " Chhuansanga chuan a ti a.

Ṭhuama chu luhai hmel deuh hian a rawn ṭhu chhuak a, a kiang vel chu mak tih hmel tak hian a thlîr kual a.

"Eng phiansen nge," a ti nuah nuah a.

"Kan la sawi dawn nia, thui tak sawi angai, mahse tunah chuan helai hmun hi kan chhuahsan vat angai," Chhuansanga chuan a lo ti a.

Sangpuia chuan, " Ni e, Mahse ka bân lehlam hi ka ti che thei tlat lo, a ruh a tliak a ni maithei," a  ti a. Chhuansanga chuan thing ṭang lakhawm in Hnema puan ven lai chu a pawt ṭet bawk a, Sangpuia ban ah chuan ṭhem a dawh sak ta thuai a.

Ṭhuama chuan Sih piah thingkung a an ṭhiante ruang inkhai leh Tawia leh Hnema ruang te chu mak tih hmel takin a thlir a, eng emaw sawi tum a a ka a ân zuau ai chuan Chhuansanga chuan, " i kal thei ang em," a rawn ti a, ani lah chuan, "Thei lutuk e," tih pahin a tho chhuak nghal a.

Chhuansanga chuan a silai thlauh te chu chhar in Ṭhuama nen chuan Sangpuia chu an kaih kuah a, muangchangin chulai Sih awmna hmun chu an kal chhuahsan ta a.