PASALṬHA CHHUANSANGA | INDONA LEH HMANGAIHNA (BUNG THUM NA) SIH HUAI

Tûn hma lam hun rei tawh takah khân Lei a chêng mihringte leh Vân chung lam rama chêng Ván mî te chu nasa tak in an lo inkalpawh ṭhîn a.

Tuipui lasî tê, Tlângram a chêng ṭhin lasî te leh ramngâw a awm ṭhin lasî te bãkah Vân chunglam ram a chêng thiltithei tak tak ṭhenkhat te chuan Lei a mihring, an hmêl duhzâwng te chu nupui pasalah an nei fo ṭhîn a.

 

Chûng mî te thlah chu hun a lo rei chuan an lo pung ve zêl a.

Heng mî innei te zînga pakhat, Vân chung nula hmelṭha tak mai Sichangneii leh a pasal Lei mihring chuan fâpa thiltithei tak tak pasarih ngawt mai, Kaptheia te, Dotheia te, Haitheia te, Chhintheia te, Entheia te, Mantheia te leh Tlengparela te an nei a.

Chûng an fâ te zînga pakhat 'Kâptheia' chuan Chawmnu-ina an unau tan a nupui a sem lak ata fapa Sikawia an nei a, Sikawia chuan an khaw ṭhenawm ami Rozîki nen fapa Mualzahranga- an nei leh a.

Mahsela Mualzahranga-a naupan laiin an khua chu Khawchhak lam hnam huaisen tak in an rawn rûn avângin Sihpui khua ah an chhungkua in an pêm ta a.

Mualzahranga chuan a lo puitlin hnu in Sihpui khaw nula Dâri- neiin fapa Kâpsânga- an nei leh ta a.

Tichuan Kapsanga  chuan nupuiah an khaw Lal fanu mal leh hmêlṭha Chawngthangi- a nei a.

An Lalpa ina fapa aneih loh avângin a lo thih hnu chuan Kâpsânga chuan a puzawn âiawh in an khuaah chuan ro arêl ta a.

Kum a lo vei meuh chuan fapa duhawm tak mai neiin a hmingah Chhuansânga-an sâ a.

****************************************************************************************************

"Hei chawlhkar li lai a ni tawh a, he ti ringawt a haw lah a chi bawk si loh," ngui nghiai hian Sangpuia chuan an meipui chheh tuah belh pah chuan a ti a.

A kiang a ṭhu pakhat chuan, " Mahsela tihngaihna dang a awm tawh ngang lo a ni. A khaw nâwt a zawng tûr chuan kan awmna hi a hla deuh chu a ni," tiin a lo tuihnih a.

An vai mai chuan an hlim lo hle tih chu an hmel ah alang vek hlawm, mei êng hnuaiah chuan Sa phurhna tûr bawmrang an tah pah bawk a.

An zîng a upa ber, an Val upa Denga- chuan," Engpawh nisela, ni rei tla tûr buhfai kan nei tawh si lo a, chuvangin naktuk zîng khawvar rual a khaw lam pan a kan chhuah phawt hi a ṭul a ni. Sa hi chu kan zawh tâwk tûr kan rêp a, dam tê a khua kan thleng thei anih ngau chuan, ni rei zâwk châm thei tûrin a siruk la in kan chhuak leh zâwk dâwn nia a," dam thlap hian a lo ti a.

Chutiang ngaihdan leh remruat dan chu an pawm tlâng a ni ang, tumah chuan thudang zeh pawh an tum buai tawh lo.

An Sai sa rêp chu an siam ṭha in meipui an chheh belh leh hluai a, mu tûrin an in buatsaih chhunzawm ta a.

Sai an kahhlum ni khân a sa chan pahin Chhuansanga-a chu an lo nghâk deuh a, Mahsela khaw thim dawn ruai pawh a a lo la lan loh avângin a zawng tûr an in siam a, a bâk zawngin sa an lo chan thung a.

A sa ṭha lai leh an zawh tâwk an hleh hnu in an riahbuk lamah an thiar a.

Mahsela chumi ni a Chhuansanga zawngtu te chuan an hmu lo mai ni lovin, a hnu chhui tûr pawh an hmu lo.

Sa rêp a zankhua hun an hman hnu in a tûk nilengin an zawng leh a, vanneih asiam in Chhuansanga Silai an chhar a, tin, a keite tihhlum pawh an hmu bawk a.

Mahsela ani Chhuansanga-erawh a hnu chhui zawm tûr rêng a awm lo thung.

Beidawng lovin an zawng zêl a, chawlhkar li lai ngaw pik tak hnuaiah chuan an vâk vêl a, mahsela hnu hlui emaw, a thar emaw pawh hmuh tûr a awm lo.

****************************************************************************************************

Rosangpuii thlâwh chhuahna lam chu Chhuansanga-a chuan a thlîr dauh dauh a, a lung a len hmel kher mai.

A rûm deuh nghut a,  a piah deuh a meipui chheh hluai na lam chu muangchangin pan ta a.

Mut tum a an lo inbuatsaih lai mêk chuan  ngaw chhûng aṭang chuan Chhuansanga-a chu a rawn chhuak a, Mei êng chin a thlen lai chuan an zîng a naupang deuh Puia- chuan a lo  hmu a.

Hlauh hmel takin a ṭê deuh ṭhawt a, a hnung a an ṭhian pakhat awm chu a bawhthlu rawp a.

A ṭhen chu an lo mu hman tawh a, a naupang zual deuh erawh chuan an sa rêp na chu an lo siam ṭha mêk thung a.

Rawlthar Puia- lam chu an hawi rual ṭhawt a, chutih lai chuan Chhuansanga chuan an kiang a rawn thleng tawh.

"Chhuansang..? i ni em..?Chhuansang?," a mutna aṭanga thawhchhuah a rual nghal a.

"Aw, keimah ngei ka ni e," ani chuan a lo ti dam thlap a.

An bawr deuh huk a, mak an tih hmel nasa mai, chutia kar eng emaw zah bo tawh leh thi tawh riak a an ngaih dam ṭha tak a an han hmu leh chu an hlim hle mai.

Mahsela ramvachal tak tak vek an nih avângin an buai phili rei lo, hmuithla emaw anih an ring deuh kha a ni a, mahsela an ṭhianpa ngei a ni tih an hrechiang thuai a.

Tumah pawh chuan mut zai an rel leh thei ta lo, an  meipui chheh chu an tuahbelh sauh a, a bul ah ṭhuthmun an rem sauh sauh bawk a, an sarep te chu tlang lian pui pui a zei thla in titi pahin an keih thî sawk sawk a.

Mahsela Chhuansanga chuan an beisei angin a chhâng vek lem lo. An hmuh ve loh leh an tawn ve loh thil anih avângin ṭawng tui tam in awmzia a nei dawn lo tih a hria a.

Sai ina a rawn phîn avânga a tlanchhiatna lamah Keite nen an in tawn thu te, ramhnuai ah a bo avâng leh puk pakhat a a hliam nen a a tawm thu te bâk thil dang a sawi lo.

Chumi zan chuan zanlai pelh thleng rawk an meng a, upa Denga'n- a tûk a haw kawng thui tak zawh tûr an nih thu a hrilh tâk ah chuan mut zai an rel ve thei ta chauh a.

****************************************************************************************************

Khawvar rual in an tho a, an bawmrang tah ah chuan an Sarep chu an khung mawlh mawlh a, tûkṭhuan pawh ei lovin an chhuak zui ta nghal a.

An Sai ramchhuahna Ngûr- tlâng hi a hlat mai bâk ah a ram a chhengchhe nasa mai si a, an la hriat ṭhan loh hmun anih bawk avângin an vai mai chuan inhloh an hlau êm êm vek a ni.

Nilengin an kal a, an in phurh rit êm avângin kal erawh a sâwt êm êm lo khawp mai. Khua ina a thim hnan avângin chumi zan pawh chuan palailêngah an riak leh phawt a. An riahna bula lui tê luang hak hakah chuan tui te chawiin chaw te an chhûm a. Changel bûk an zar a, zan lama tuah tûr thing an fawm khâwl bawk a. Sai sa ringawt chu an lo hne deuh tawh a ni ang,  tlai chawhmeh tûr zawngin Tawia leh naupang deuh Puia- te chu silai nên an han vâk chhuak a.

Rei lo tê an silai ri an hre ta mai a, "Eng tak chu kâp ang maw," an tu nak nak hlawm a, an hlim angreng viau mai.

Mahsela silai rîk hnu pawh chuan an ṭhiante chu an rawn la haw lawk thei lo a, an thang rei êm avânga ngaihṭhat lohna an neih hman hial hnu ah chau angreng takin an rawn kîr ve leh mial a.

Chumi zân chuan Tawia chu a ṭawng tam lo hle a, Kha tia an chhuah hnu lawk khân, an thlang lawk a sakhi patuai a kah   thu a sawi a, mahse a hnu an hloh avânga an rawn kîr san thu bâk te chu.

A hlat vak loh avângin  ṭhiante chuan a tûk a zu chhui zui leh an rel a. Mahse Tawia- chuan erawh chuan,

"Kan hmuh ka ring tawh lo, kha tia a hnu ka chhui kha, thui pawh a ni lo, a mual let liam lawk ah sih tui lian vak lo a lo awm a, kha sih ah khân a hnu a tâwp tlat a ni," a ti nuah nuah a.

Sangpuia chuan," A tla hlum a ni mai lo maw, nge ni a i chhui sual zawk," a lo tih tâkah chuan,

" Chhui dik e, a tlâk hlum chu a rinawm chiah loh,"  tiin a lo chhâng a.

A nau hruai lah chuan engmah a hre ve hauh lo, Tawia'n sa hnu a chhui chhûng zawngin a kahna lai ah a lo awm char char thu a sawi bawk si a.

A tûk an chhuah hma a Tawia sa kah-  hnu chhui ngei tum chuan hma takah an mu ta a. Zân lam pang pawh thla a êng hle a, an awmna ngawpui pawh zân thla êng chuan a rawn chhun tlang phuar a. 

Chutiang a tui tak a an mut lai chuan eng emaw ni hian Tawia- chu a ti  harh zawk mai a. A ṭhiante chu an en kual a, an lo mutui hlawm hle mai. An bûk kawt a meipui chheh pawh a lo la thi lo.

Chutia a harh takah chuan pawnlam ah eng thâwm emaw a awm tih a hria a, Sapui emaw chinghnia in emaw an sarep rûk an tum anih ringin thâwm dîm tak hian a silai a ban a.

Chutih lai tak chuan bûk kawngkhar ah tak hian mi pakhat rawn lang thut mai. A palianin a sang hle mai a, Bûk kawngka ah chuan a khat hmuk a, kûn deuh dû hian Tawia chu a rawn nuih deuh ţhu bawk a.

Amah chu a hmul deuh thup a, a hmel erawh a hmu chiang thei lo. Chu veleh Tawia chuan,

, “Tu nge i nih?” tih leh a silai a tin chu a rual a.

 Chu pa lah chu a la nui vur vur lehnghal. Tawia chuan a rilru in, ‘Hetiang ram pilrilah tu mihring mah an awm lo vang, ramhuai a niang,’ tih leh kah a rual a. 

Silai puak ri ah chuan a ţhiante ho an lo harh a. Chutih rual rual chuan an thlanglam ngaw lamah chuan mi tlân thawm ni âwm tak hi  a ri thla sun sun mai a. A ṭhiante ho chu an rawn mengphâwk hle mai.

 Sangpuia chuan, “E ţhianpa thil i hmusual em ni?” a rawn ti a.

 Tawia chuan, “Nia ka hmusual a ni ang e. Na hre thei a nih chuan a na ve hle ang,” a ti duh chauh va, eng mah sawi tam lo chuan an mu leh ta a.

A tûk khua a lo var chuan rawngte an han bawl a. Sangpuia leh Chhuansanga chuan an buk bul vel chu an han en kual a. Mahsela eng hnu mah hmuh tûr a awm si lo. Midang phei chuan mak a ti ru hle a. Amah Tawia ngei pawh chuan mak a ti angreng hle mai, chuvang tehreng emaw ni, chumi tûk a tho chu a nuamsam lovin a khua a sik deuh ser ser reng a.

Tukṭhuan ei hma chuan Sangpuia leh Chhuansanga chuan Tawia sa kah hnu chu chhui an tum a, a rawlthar hruai Puia chu an kalna chin kawhhmuh tûrin an hruai tel bawk a.

Rawlthar Pui-a'n a an sa kah na lai leh Tawia- sa hnu chhui na vel a kawhhmuh ang ang chuan anni ṭhian dun chu  silai lek chungin an liam zui a, Puia chu thing kûng ah lâwn tîr in an han kalsan zet a, Mahse Chhuansanga chuan, " Ram chin kan hre bawk si lo a, Sapui pawh an awm hnai maithei bawk si," a tih avângin an kalsan fê hnu in an au leh a, an pathum chuan an kal ho ta zel a.

Thawm dîm leh inring tak a hawikual a, fimkhur tak chung a Tawia  kal na hnu,  Pui a'n- a a hriat chin chu an an han thleng a. Mahsela an duh ang an hmu hauh lo mai.

An bûk awmna aṭang chuan mel khat vel lai an kal tawh a, chhuk deuh zâwng anih avâng erawh chuan rin aiin an kal chak angreng phian mai.

An beidawng angreng hle tawh a, kîr leh mai pawh an pawiti lo.

Hnim lah chu a pîk ṭanin thosi an awm ṭan noh noh bawk si a, mei lah a zûk ngam dêr si lo. An han ṭhu chawl te te a.

Chutia ṭhut chawlh pah a an han hawi vel chuan an kalna hnu lam chu an han thlír let a, An bûk awmna aṭanga chhuk char char a ni a, mahsela tuna an awmna hi chu mual letliam a ni tawh thung a, chutih laia thil mak deuh mai chu Sangpuia chuan kâwk meuhvin Chhuansanga te chu a hrilh a. An kalna hnu lam, mahsela tuna anni kawng zawh thlang deuh hi Sazuk chal emaw   kal tlangna ang mai hian hnim chu a pe deuh hun mai a. Sangpuia chuan, " Hnu kan chhui dik lo deuh a ang khawp mai," a ti a.

"Sih pawh Tawia khan a awm thu asawi a ni lawmni, mual letliam lawk a tih kha," a lo ti ve bawk a.

Thawh pah hian Sangpuia bawk chuan," Ni chiah e, a hla tawh lovang, i thleng law law mai ang hmiang," a ti a.

Tichuan chu hnu awmna lam ah chuan an pathum chuan an kal leh ta a.

Thui vak lo an kal hnu chuan hla deuh aṭang hian Sih pawh chu chiang vak lo in an hmu thei ta a. mahse hnim a pik êm avângin an kal chak hleithei lo.

An thlen hma deuh chuan Sih awmna lamah chuan thâwm ri hrut hrut, hnim han tâwn ri sur sur hi an hria a; mahse a reh zui leh tak daih avãng chuan sa tênau Sih tui tlân tur a nih an ring deuh a.

Thâwm dim takin Sih tui chu an pan zel a. A kiang vel chu a hnim viau na a, sih awmna lai vel tak erawh chu a fai hun mai a, chu Sih bul lawk ah chuan thingkung lian angreng tak, zâr âwn dû mai hi a ding bawk a.

Chhuansanga chuan, “Sih tui tlân sa tênau an awm a nih dâwn hi, lam hnai deuh nisela thang  kam tlut tlut pawh a chakawm anih hi,” a ti a. 

Mahsela Sih an thlen chuan an rin ang a lo ni vak lo ni ngei tûr a ni. Sangpuia chuan, "Sa hniak hnu awm reng ka hmu miah lo,” a ti nuah nuah a.

" Tlân chu an awm ngei ang, a thu hrim ah, a bul vel hi a fai hun mai a, sa an tâl nasa hle a ni ta ve ang, chân chhuah tûr an awm ka ring tlat," Chhuansanga chuan a lo ti a.

"Khawnge sa hniak pawh chu a va awm lo êm," Sangpuia chuan ṭhingṭhi meuh vin Sih tui kam vel chu a bih a. Chhuansanga pawh chuan a lo thlir ve mêk a.

"U Chhuansanga helamah hian lo phei teh u," Puia chuan a lo ti a, an piah deuh ah chuan ani pawh chuan sa hnu vel chu a lo thli thlai ve mek a.

Anni pahnih chu Puia kiangah chuan an va phei a, an vai mai chuan leilam chu an bih a, mak an tih hmel kher mai.

Lei ah chuan mihring hniak hi chiang vak lo hian a lang a, chu chuan sih lam pan in sih tuiah chuan a tawp tlat mai anih chu.

A hniak chu an han chhui let viau na in pen sawm vel bâk an chhui thei lo, Sih tui hnaih lai leh a kam lei nem lai ah chauh alan avângin. Chu ke hniak chu mihring pangngai ke hniak ai chuan alian daih a, Sangpuia'n a a rah ve chhin chuan chu ke hniak chhungah chuan a ke hniak chu a thâwl hal hal a.

Chutih lai chuan thli a rawn thaw deuh vûk a, Chhuansanga leh Sangpuia chuan an silai chu rang tak a lek in thli rawn thâwt na lam chu an tin dûn nghal a.

An lo kalna lam aṭang chuan thâwm a rawn chhuak a, an piah deuh hnim chu a che laih a, hnahthel ro rap ri rak thâwm arawn chhuak leh a.

Inring takin silai an tin a, mit pawh an khap hlek lo mai.

Chutah chu thawm rawn chhuahna lam aṭang chuan thlî a rawn thaw vûk a, an pahnih inkarah chuan rawn thaw phei vuai in, an hnunga Puia lo ding chu a lêng lawp a,  Sih tuiah chuan a tla ri ta bâwrh a.

Leh pawh an ti hman lo, Chhuansanga chuan a silai a paih lawk a, Sih tuiah chuan a zuang lût ve nghal a.

Puia tlâkna lai chu sih tui lai tak anih loh avangin chutianga thûk leh mihring pil theihna tûr chi a ni lo hrim hrim. Mahsela a tlãk rîk bawrh aṭang khan a pil nghal vang vang a, vawikhat mah a rawn lâng tawh lo.

Chhuansanga zuang lut pawh chu a ri bâwrh a, a pil ve nghal mai a, mahsela rei lo tê an a rawn lâng leh nghal vat a.

Mahsela a hmel a hmuh chuan Sangpuia chuan a Silai chu Chhuansanga- lamah lekin vuan tûrin a ti a.

Thei leh thei lo hian Chhuansanga chuan Sangpuia silai dâwt chu a ban ṭhelh nawk nawk a, a tawp a tawp ah chuan nghet tak hian a vuan fuh ta a, chuveleh Sangpuia chuan a hnûk chhuak ta hrawih hrawih a.

Sih sîrah chuan Chhuansanga chu a bawk deuh reng a, a chauh hmel kher mai.

"Mak tak a ni, khatiang khân a thûk ang tih ngaihna rêng ka hre lo," thaw hlui hlui chung hian a ti a.

Sangpuia- erawh chuan a silai lek chungin a bul vel chu a melh kual thung a. "Ka rin ang chiah a ni," a ti thâwp sat a.

"Tui khân min hîp tlat niin ka hria, ka hrethiam teh nuaih lo," tiin a khuh bawrh bawrh a.

Chutih lai chuan thli thaw si lo hian an bul vel a hnim chu ramsa rual ina an pal ang mai hian a ri sun sun hlawm a." Kan kîr vat angai," Sangpuia chuan a ti a. Chhuansanga pawh khuh bawrh bawrh chung hian a tho a, a silai a chhar thuai a.

Chutih lai chuan Sih tui kiang a thingkûng lian tak mai tlu tûr ang mai hian a auh ri tuarh tuarh a.

An tlân deuh hman tawh tih chuan Sangpuia chu a hawi let a, " A mai mai chuan le," tih pahin a silai chuan chu thingkûng chu a kâp ta zawt mai a, 

"Engnge ni a," Chhuansang-a'n a a tih chuan, " Hetiang thil thleng hi maw le," tih pah chuan a fungki a a silai hlo chu bun in kah leh tum chuan a sawh leh ta nawk nawk a.

Chutih lai mek pawh chuan chu thingkung chu ala  auh ri tuarh tuarh reng a, thing mai ni lovin mihring ṭê ri te pawh a ang zâwk hial mai(!)

A silai hlo a thun zawh veleh Sangpuia chuan chu thingkung chu a kâp nawn leh sak a.

A kah zawh rual chiah chuan thingkung awmna lam aṭang chuan thil na tak mai hi a rawn thaw vûk a, anni pahnih chu a rawn su lêng lawp a.

An lo kalna lam a thingzar leh hnim te chu thil beng ang mai hian an   thle siau a.

Ngaihṭhat thlâk loh khawp hian chu lai hmun boruak chu a reh ta diak a, sava hram tak ngial pawh a awm hauh lo.

"Engthil nge ni a," thawh ṭawih ṭawih pah hian Chhuansanga chuan a ti a.

A silai chhar chungin, " Sih saw maw le, nakin ah kan la sawi dawn nia, tunah chuan kan kal vat angai, kan bûk lamah," Sangpuia chuan a ti a.

A mitmeng aṭang chuan sawi duh ala nei tih alang nâ in a sawi zawm duh bîk lo a, an bûk lam pan in hmanhmawh takin  chulai hmun chu an tlan chhuahsan ta a.

An bûk lam an pan lai chuan khua a rawn dur ṭan a, an hnunglam hla deuh ah hian thâwm a awm leh zauh zauh ṭhîn tih loh chu engmah thil danglam an tawng tawh lo.

Bûk an thlen chuan a tlai  tawh angreng hle a, tukṭhuan pawh an lo eisan vek tawh niin alang.

Eng emaw chu an tawng ni ngei tur hian an lo phâwk deuh hrû hlawm a.

An zinga upa ber Denga- chuan," Engti zia nge ni, in va han rei ve," a lo ti a.

Chhuansanga huh deuh hluam an hmuh phei chuan an ngaihṭhat loh hmel hlawm hle a.

"Thil tam tak sawi tur a awm," tih leh mau tui bûr chu ban a rual a, Chhuansanga pawh chu chauh hmel tak hian bûk kawt a lungpui ngheng chuan a ṭhu sawp deuh nuaih a.

"Mei hi rawn tuah belh leh teh u," Upa Deng a'n a tih chuan an ṭhian pakhat chuan a rawn chhem nghal a.

Chutih lai chuan Bûk chhung lam chu an ri leh deuh hak ṭhîn a. Sangpuia chuan,"Eng nge ni, " tih leh buk chhûng a luh chu a rual a.

Upa Denga chuan," Hei Tawia hi in chhuah hnu deuh aṭang khan a khua a sik a, a buai deuh niawm in alang," a lo ti a.

Buk chhungah chuan Tawia chu an ṭhut bawr deuh laih a, a mutbu phah ah chuan Tawia chu a lo mu bêm a, a ṭawngvai deuh niah niah a, a chângin a kam sîr velah chuan a chil phuan a tla leh ṭhin a.

"A dik dawn lo tawp mai," tih deuh sap pah hian Sangpuia chu buk aṭang chuan a chhuak a, Mei chhehna lamah chuan a phei ve leh ta daih a. Upa Denga chuan a hnungah rawn zuiin,

"Eng thil emaw chu intawng niin alang, keini pawh pawh, kan vai mai hian," a ti chuai raih a.

Chutih lai chuan Ni chu ngaw chhungah a rawn éng lut tûr a awm tawh lo, Ruah sur mai thei awm hian chhûm chhah tak tak hian an hliah bo zo a, ngaw chhûngah chuan chhum lei vak a rawn zâm ṭan mêk a.

Meipui bul a ṭhut hmun an rem hnu chuan Sangpuia chuan," Khawiah nge midang ho hi an awm zawh ni," tiin Upa Denga chu a bia a, mahse a mit erawh chuan Buk lam chu a melh reng thung a.

"Khatia in chhuak kha in rei tâk êm avângin leh Tawia awmdan a dik tâk loh deuh avângin Do-a, Chunga leh Thanga- te'n an rawn um zui che u alawm le, anni nen in in hmu lo maw," a ti a.

"Hmu miah lo mai, kan hnu an rawn chhui dik lo a ni mai lo maw le," Sangpuia chuan ngaihṭhat loh hmel tak hian a ti a.

"Chu pawh nisela, rawn kîr a hun tawh asin maw le," Upa Denga chuan a lo ti zui zat a.

Chutih lai chuan Tawia chu a ṭe ṭhawt a,  a mitmeng lah chu a pual hru mai bawk si.

"Ka kal duh, ka kal dawn," ti a au vin a tal vak vak a, mi pasarih laiin an bawh bet a. Mahsela an hneh lo kher mai, a bawhbet tu pakhat chu a tlawh leng lawp a, Sangpuia te ṭhutna kiang ah chuan a rawn tla thûm ṭawk a.

Chutah pakhat chu a nghawngah rêkin a theh lêng leh lawp a, buk pawh chu a chim zui nghal a.

Tal vak vak leh ṭe ruai ruai chung hian a rawn ding ding chhuak leh vut a.

Buk kawt a lo awm Hranga chuan a hnunglam aṭang hian a lo pawm bet a, Chhuansanga chuan rawn puiin a khûp hnih ah a rawn pawm bet ve bawk a. Mahsela an chelh hneh lo kher mai, hnunglam a pawmtu Hranga chu hmalam ah a bin let tawp a, Chhuansanga chu a tukkhum ah ṭhâm in a rêk na kher mai, 

A kut lehlamin Chhuansanga bân chu a elh vak a, a na ti lutuk a ṭe ṭhawt a, a vawn lai pawh a thlah zui nghal a. Chutih chhung chu mitkhap kar ang vel lek a rei lo, thil thleng thut anih avângin midang meipui kianga ṭhu ho te pawh chu an lo inring hman lo.

Chhuansanga chu a kut lehlam chu a rêk kâng nawl nawl a, Sangpuia te ho, Meipui kianga ṭhu te rawn tho kâng vawm nan chuan a hmang a,

Chhuansanga chuan anni ho chu a delh tlu hlawm a, chu veleh meipui chu a zuan khum  thuak a, an piah lam hnim zîng ah chuan chak takin a tlân lût zui ta daih a.

Chutih lai chuan ruah mal lian pui pui a rawn tla fap fap tawh a. Chhum leivak chuan ngaw chhûng chu chhah vak lo hian a tuam vêl mêk a.

Ralthuam engmah pawh chuh hman lovin Kima leh Hnema- te chuan Tawia tlân ta chu an umzui nghal a, auh kír hman pawh an ni lo.

Midang zui ve tum ho erawh chu Upa Denga chuan a au kîr leh hlawm a.

"Lo la ding rih teh u, thil rel fel hmasak angai e," a tih chuan an kal lui ta bîk lo a.

Ruah lah chu a rawn tam zél avângin an bûk chu an siam ṭha sawk sawk a, Changel kung leh hnah bãkah, thing buk te chu sâk khawm in tawm hulna tûr an sa sawk sawk a.

Tawi-a'n a a bin Hranga leh Enga- chu an na angreng khawp a, Hranga phei chuan a nghawng ruh a sawh nat deuh avângin buaipui angai angreng khawp mai.

Tin, a hma deuh a Sai an beihna a hliam tuar Kapa- pawh kha ala dam fel hleithei lo a, amah a in saseng thei ṭawk chauh a ni.

Ruah chu a rawn sûr tam telh telh a, mahsela thli a tel loh avângin a zia phian mai, an bûk chhungah chuan ngui angreng takin an ṭhu ṭhap hlawm a.

" Kan thil tawn hi thip danglam tak niin alang a, hei Sangpuia te lah in Puia an hloh der mai a, Tin, Thanga, Chunga leh Do-a te pawhin rawn haw tik an nei thei bawk si lo. Tunah Kima leh Hnema- te Tawia ûm in an kal chhuak bawk a ni a, tlem in ruah pui hi han hân deuh sela a zâwng tûr insiam angai ang a, mahsela khaw thim hma a bûk hi thlen khawm leh ngei ngei tûr a ni ang." Upa Denga- chuan a ti charh charh a.

"Ni e, kan thil tawn hi mihring cho rual loh thil a ni maithei bawk a, a ruh langin han sawi tawp mai ila,  Kan thlang deuh ah khuan Sih a awm a, Tawia sa kah kha Sih huai nen a in kungkaihna nei a nih loh pawhin Sih tui ah a hnu a tâwp tlat mai a, chuvangin engpawh huam a keini ho hian chet kan lâk angai dawn a ni.

Tawia pawh hi kan hmu zo lo a ni maithei a, mahsela Kima leh Hnema- erawh dam a kan hmuh leh an ngai tak zet a ni." Sangpui pawh chuan a lo ti ve a.

Chutah sa ṭha zek zawk  Ṭhuama chuan a vaibel seh ri rap rap chung hian,"  Sangpuia, Chhuansanga, Siama, Lala leh kei hi kan kal ang a, a bak chu bûk lamah hian lo awm mai ula a ṭha mai lo maw," a ti a.

Mahsela Hrima chuan, " kei ka kal ve ang, kan ṭhiante zawn hmuh leh hi ka hna a ni." a ti ram hmak mai a, ipte pui ak in a chem leh silai a chuh nghal a.

Midang pawh chu an hriam neih te chuhin chhuah mai in ring in an phu suau hlawm a.

Mahsela Upa Denga a lo inrawlh vat a, " Ngawi teh u nau te u, Kan kal vek chuan tunge kan bûk hi lo nghak ang a,  kan ṭhian te hliam hi lo enkawl ta ang, chuvangin fel tak a rem kan ruat tlan angai a ni, Hrima sawi ang khân an ni ho hian hnu han chhui hmasa phawt sela, bâk zawngin buk hi lo nghak  rih mai ila, tin, tumah hi kal darh loh tum hram hram ila a ṭha ngai e, Sangpuia te pawh hi a theih hrâm chuan inṭhen darh lo sela a ṭha ang." tiin a rawn khap hlawm a.

Ani an zînga upa ber thusawi chu ṭhalai zâwk te chuan hnial en ah an en ta bîk lo a, mahsela eng thil pawh tâwk thei an ni tih an in hriat hlawm avângin bûk nghak tûr te pawh chuan ban phâk rengah  Chem leh Silai an dah reng a. Sangpuia te ho pawh chu ruah hân rual chuan an chhuak zui ve ta nghal a. Mahsela ngaw chhûng ah chuan chhûm lei vâk a zâm chiai reng avângin thui a hmuh theih loh kher mai.