THANGSIRA LEH THANGZAIA | LASIRI LEH LASARI

A hmasa in mizo thawnthu, thawnthu khat a kawp chawi tuak hnih channa hi a awm meuh lo niin alang a, he thawnthu erawh hi chu tuak hnih te chanchin a ni thung a, han sawi zau deuh hlek ila.

Gemini Zodiac sign, phír emaw, unau chhinchhiahna atâna hman remchang tak mai a ni a, Thangsira leh Thangzaia hi.

Greek Mythology ah hian anni ang deuh hi an awm a, chumi te chu Castor leh Pollux- unau te hi an ni. An chanchin pawh he mizo thawnthu nen hian a in hrûl nasa hle a, remchang dangah tarlan kan la tum dawn nia.

Tin, Sumerian Mythology ah pawh Lugal-irra leh Meslamta-ea- unau tiin an lo nei bawk a.

Castor leh Pollux unau te hi phír an ni a, Sparta Lal Tyndareus leh Leda te fa an ni a, an unau nu te chu Helen Of Sparta leh Clytemnestra-i te an ni.

A dik tak chuan Leda-i hi  Pathian Zeus nen mudun in Pollux leh Helen-i hi Zeus-a fa te an ni a, Castor leh Clytemnestra-i hi Tyndareus-a fa te an ni thung.

Pollux leh Castor- te hian phîr unau ve tho Phoebe leh Hilaeira-i te an nei bawk a. 

Tichuan an unau hi Gemini- Constelation an lo phuah nachhan leh Gemini Zodiac sign te chu an ni.

An ni leh He mizo thawnthu hi a in hrûl êm a, chuvangin thu hma ah ka lo tarlang lawk a ni e.

Raldawna leh Tumchhingi chuan fapa pahnih an nei a, an ni unau hi Pathian chi leh mihring thlah pawlh an nih avângin an hmelṭha ve hle a, an lo puitlin hnu phei chuan mihring te aiin finna leh remhriatna mai bâkah pumrua thlengin an lian hle mai a.

An ni unau hi a upa zawk chu Thangsîra a ni a, a naupang zawk chu Thangzaia a ni thung a.

An lo puitlin a ngaihzawng neih an lo duh ve chinah phei chuan Mihring mai ni lo Van chung a chêng Pathian chi te hial in an lo hmelhriat a, an nu leh pa te avâng chuan Pathiannu te pawh chuan an iai bik lo mai ni lovin an ngaizawng ve hial hlawm a.

An nu leh pa te zâr ah Van chung sâng a an nu te chenna ah chuan an kal fo va, pathian chî naupang zâwk te leh pathian chî nula te nen pawh an in kawm fo ṭhîn a.

Tichuan kum a lo vei in an ni pawh puitling a chhiar an lo ve ta a. Chutiang hun a lo thlen chuan an nu leh pa te rual ni lova, anmahni ngei a len chhuah an tum ve ta a, mahsela he van chung an lawnna hi annu Tumchhingi thiltihtheihna vâng chauh niin, a kawng pawh ani chauh chuan a hre thung.

Van chung a an kalna ah chuan Pathian chî tam tak te nen in kawm ho ṭhin mahsela kawm bîk leh hmel duh zâwng unau nula hmelṭha tak mai Lasiri leh Lasari te an nei a. Anni unau pawh hian Thangsira te unau hi an hmel duh in an ngaizawng ve tho bawk a.

Tichuan remruat in, an ni unau te'n a vân an lawn nan van chung aṭangin rangkachak ang mai a tle siau mai, hrui nalh leh lian tak hi lei lamah Lasiri- te unau chuan an thlâk ta ṭhîn a.

Thangsira te unau hian an kal dawn apiangin hla an sa a, tichuan Lasiri te unau chuan an ngaihzawngte tân hrui chu an thlâk ta ṭhîn a ni.

Thangsira te unau hian an khua leh mi te hriat an hlauh avângin an khaw dai a an huan, hmun reh leh biru deuh lai chu Van lawn nan an hmang ṭhîn a.

An len dawn apiang hian hla nalh tak mai.

"Lasiri leh Lasari,

Tukba lei la, rawn thlâk la,

Thangsira uai chhoh nân e,

Thangzaia uai chhoh nân e," tiin.

(He lai a an tih dan hi Norse/Viking Mythology lam kan thlîr chuan Asgard Gate vengtu Heimdall-a'n Asgard kal tûr te tân a Bifrost( rainbow/chhimbal)  a lo hawn hi. Thor Movie kan en chuan, Thor-a'n, thlaler a "Heimdall, Open The Bifrost"-  a tih lauh lauh kha lo mitthla la.)

Chutianga hlâ an sak veleh chuan an chung zâwn van boruak ah chuan lei lam panin chhûm a rawn bâwr thla tup tup a, thli a rawn thaw deuh vuai vuai in lei chung a hnahthel ro te chu boruak ah an lêng darh chum chum bawk a.

Chutih lai chuan Van Chhûm zîng chuai aṭang chuan rangkachak hrui sei leh mawi tak mai hi a rawn in thlâk thla ruai ruai a.

Chu veleh an unau vin an uai chho a, Lasiri te unau chuan an khâi chho ṭhîn a. Van ah chuan hlim takin an inkawm a, an duh tawk an lên hnu chuan Lasiri te unau chuan hrui ah bawl chuan an khâi thla leh ṭhîn a ni.

Chutianga van lama an lên ṭhin chu an lawnna piah lawk ngaw hmun a chêng Bakvawmtepu  hian a lo hmu ṭhîn a, Van chung a lawn a, Pathian Chî nula hmelṭha tak tak kiang a kal ve chu a châk ve ṭhîn hle a.

Tichuan ruahmanna siamin, Thangsira leh Thangzaia te unau kal hma chuan an tihdan angin tih ve a tum ta a.

A aw thûm pui hian, “Lasiri, Lasari,

Tukba lei la, rawn thlâk la,

Thangsira uai chhoh nân e,

Thangzaia uai chhoh nân e." 

 a han ti hlut hlut a.

Mahsela, Lasiri leh Lasari- te chuan Thangsira leh Thangzaia te aw a ni lo tih an hria a, an hrui chu an thlâk duh lova.

 Hrui an rawn thlâk duh tâk loh ah chuan Bakvawmtepu- chu a ngui ruai a, mahsela Van chung nula te a mitthla ah an châm reng si a, kal a châk telh telh a, nileng zankhua in Van chung a kal dân tûr ringawt a ngaihtuah ta reng ringawt mai a.

 A tawp a tawp ah chuan a hrechhuak ta, ramhnuai fianrial tak a chêng, hmeithai Pitar- dawithiam ang mai a mi natna te tidam thei, hnim dam dawi siam a, amah a zai vak vak ṭhîn chu pan a tum ta a. Chu pitar te chuan Van lawn dan chu a hriat ngei a ring tlat a ni.

Tichuan a inchei danglam a, hlim takin Pitar chenna lamah chuan a tlan liam ta a.

Pitar te chenna a va thlen chuan a thil duh te chu buai nuai hian a sawi zut zut a.

Ngun tak a Bakvawmtepu thusawi a ngaihthlak thu chuan Pitarte chuan, "Thangsira leh Thangzaia te ek i ei ang a, an zun tlem te in bawk la, tichuan an aw ang i pu ang a, Van chung nula te chuan an hre hrang lo ang che” a ti a. 

Bakvawmtepu chuan uak tuarh tuarh chung hian, "Chumi lo chu kawbg dang a awm lo em ni?" ti a a zawh chuan, Pitarte chuan vin zet hian.

"Awm lo, i duh a hnu, kal malek la ti nia," a lo ti ṭêng chuai a.

Hlau tak hian Bakvawmtepu chi Pitar in aṭang chuan a zuang chhuak a, a tlan haw nghal ta vang vang a.

Mahsela tihngaihna a awm chuang si lo, Thangsira te unau van lawn chu ngui tak hian a thlír leh ta dauh dauh mai a.

A tawp ah chuan, " Khawi nge, Van chung nula kiang a awm theihna anih phawt chuan,"  tiin Thangsira leh Thangzaia zun leh ek them chu ten tak chung chuan a eiin a in ta a.

 Tichuan Thangsira te unau kal hma chuan a kal ta vat a, van lam hawiin a zai ve leh ta a.

 “Lasiri, Lasari,

Tukba lei la, rawn thlâk la,

Thangsira uai chhoh nân e,

Thangzaia uai chhoh nân e." 

 Lasiri leh Lasari- te chuan chu aw chu Thangsira te unau aw ngei niin an hria a, an lo hai ta a.

 An hrui chu an zuk thlâk ta a.

Lei a thlen hma hma chuan Bakvawmtepu- phûr leh uai hman loh hlau lutuk chu a lo zuang vak vak a, a lo uai ve ta chawt a.

An han hnuh chhoh chuan rit an ti ta hle mai a. “Thangsira leh Thangzaia an ni awm lo mang e, an va rit ta êm!” ti chung zel chuan an han hnuk chhuak a.

 Van chung a an han hnuh chhuah chuan Thangsira te unau ni lovin Bakvawmtepu- a ni tih an han hmuh chuan Lasiri leh Lasari chu an mangang ta hle mai a, a tih tlak leh dân tûr an ngaihtuah leh ta nghal a.

 Nimahsela chutia an han awmkhawm tâkah chuan an han inkawm ve ta teh rêng a.

Tichuan van chung chhûm thianghlim tak tak mai, zam chuai kâr ah chuan an inkawm ho ta a.

Bakvawmtepu pawh chu a hlim in, hmai hma ngei a Van chung nula hmelṭha leh vun no lutuk mai te kianga a awm chu engmah ngaihtuah nachang pawh hre lo hian a khi sûih reng a.

Lasiri chu Bakvawmtepu si chêt a ṭhû in a zai ta hlerh hlerh mai a.

"Tawlh rawh, tawlh rawh, Bakvawmtepu,

Van tawl dep rawh, van tawl dep rawh;

Ka nauvi zâlna bo ve."

a han ti a, Bakvawmtepu chu engmah ngaihtuah lovin a tawlh hrut a.

Lasiri chuan a khât tâwkin hla chu a sa leh ṭhîn a, ani pawh chu a tawlh leh ta zêl a. A tawp ah chuan Van aṭang chuan a tawlh liam ta a.

An ṭhutna lai a Van chhum zam chiai avâng chuan Bakvawmtepu chuan a sîr vêl engmah a hmu thei lo va, an hma lam hla deuh tak a in ropui tak tak leh ngaw chhah pui mai, mawi tak tak te lo chu.

Lasiri te chuan an awmna lai chu ka beng tih tlukin an hre chiang a.  Bakvawmtepu ṭhutna bul chu lei a tlâk thlak theih khawp hial in a kaw huai a ni tih te chu.

Chuvâng tak chuan Bakvawmtepu chu tlâk tîr ngei tumin ṭhut hmun an rem a ni réng a.

Boruak ah chuan a tla thla vawn vawn a, mahsela thli a tam êm avângin thli chuan a lenkawi nasa ngei mai.

A tawp ah chuan ngaw hmun chhah tak ah hian a tla lût ta râwih a.

Chumi hnu ah chuan Thangsira te unau chuan hla an rawn sa leh ta a.

Nimahsela Lasiri te chuan Bakvawmtepu a ni leh ang tih an hlau a, hrui chu an thlâk duh ta lo a.

Van chung sâng aṭang chuan," Kan thlâk nuam lo,

Kan thlâk nuam lo,

Bakvawmtepu uai nân chuan," tiin an zai a.

An aw mawi tak chu Van boruak ah chuan a thâm vêl chiai a.

Lasiri te zai ri an hriat chuan Thangsira te chuan, "Kan ni lo ve, keimahni kan ni," tiin an han chhâwn ṭhîn a. Mahsela an tih sual leh an hlauh avângin hrui chu an thlâk duh chuang lo.

Chutianga vawi tam an tih pawh a hrui anla thlâk duh loh avâng chuan Thangsira te chuan, " Kan lo kal in phal lo vei maw? Keimahni kan nih leh nih loh in la hria ang, In kiangah kan rawn lêng ngai tawh lovang a, kan haw vang vang ang. Amaherawh chu kan haw hma in Bakvawmtepu nen mei kan han in khûk siak ang a, Kan meikhu chuan van a rawn thleng ang a, Bakvawmtepu meikhu erawh chu luidung ah a zâm darh chum chum ang," an ti a.

Tichuan an unau chuan an awmna bul a ngaw chhûngah chuan lût in  Bakvawmtepu chenna ah chuan an va kal a, ani Bakvawmtepu chu Van aṭanga a tlâkna avângin a lo in sawhna viau a, a taksa te chu a pilh pheng phung a.

An unau chuan an phih lawp a, an vân lawnna lam pan chuan an hnûk ta hrawih hrawih a.

Tichuan an sawi ang chuan mei chu an han inkhûk siak ta a. Bakvawmtepu meikhu chu luidung vêlah chuan a zâm darh ta chum chum a, Thangsira te meikhu erawh chu a tír ah zâm darh mahse  a sâng telh telh a, van lam ah ding tak hian a khi chho ta daih a. 

Chutia mei an khûk zawh chuan thinrim tak chungin an chhuak a, an kal bo ta a.

 Lasiri leh Lasari te chuan Thangsira leh Thangzaia te meikhu an hmuh chuan an sawi ang ngei chu a lo ni ta si a,  an inchhîr in pawi an ti êm êm mai a, anmahni ûm tur chuan lei ah an chhuk thla ve ta thung a.

 Tichuan an kalna kawngah chuan an ûm ve ta zel a, thui tak an tlân hnu chuan an an lâwm rual hi an va hmu a, an hnenah chuan, 

"Kha ta lâwm rual te u,

Thangsira hmu che maw?

Thangzaia hmu che maw?"

an han ti a. Anni ho chuan lo chhâng in,

"A hmuh chu kan hmu na a,

Mual aw khûm khûm,

Mualpui aw khûm khûm;

Thangsir aw lang lang,

Thangzai aw lang lang

An tawn ar chang phe ngeuh ngeuh,"  an lo ti a

Chutichuan Lasiri te unai chuan mual an liam daih tawh tih an hriat chuan an ûm leh ta ngat ngat a. Mual sarih chu inzâwn thliai hian an han thlîr a, an kal liam tur ar chang tawn phe ngeuh ngeuh chu an han hmu ta a. An theih tâwp a chak in an ûm leh ta ngat ngat a.

Bakvawmtepu chuan hnung lam ah anni chu a lo um ve zel bawk a.

 Thangsira leh Thangzaia chu in an thlen chuan pumah thir chher tûrin an kal a, Lasiri leh Lasari pawh chu an lo thleng ve thuai a.

Lasiri leh Lasari chu an hmeltha êm êm mai a, an inthuamna te chu a mawiin kawr ṭha tak tak an ha a, pakhatin Rangkachak a chei puan bih a, pakhatin Rangkachak ṭhi a awrh a, ngun nalh tak mai an bun bawk a. 

Lasiri te unau ina Thangsira te in an rawn thlen chuan Sumhmun ah hian pitar pakhat hi a lo ṭhû a, 

“Thangsira leh Thangzaia kan rawn zawng a nia” tiin an han bia a.

Chu pitar chu mitdel a ni a, Thangsira a te pa Raldawna te lam a an pi a ni.

 Lasiri leh Lasari chuan a mit chu an deh sak a, tichuan a mit del chu a lo meng leh thei ta a.

Inah chuan amah chauh chu a lo awm a, rap a  thing tlemte awm chu ai khat ah siam in an chhêm alh sak ta a.

 Thangsira leh Thangzaia puma an awm chu naupang an han kohtir a, “Thangsira leh Thangzaia kha lo haw rawh se, mikhual kan thleng e” a han tihtir a. 

Anni chuan, “Khual chhia nge khual ṭha, mi eng ang nge an nih?” an lo ti a. Naupang chuan, “Khual chhia an ni ang, pakhatin Ngansap a bih a, pakhatin Belval a awrh a, khang te an bun a."  tiin tlân liam pah in a chhâng a.

Ngaihtuah mang hlei lovin, "Chutiang mite chu tai fe leh ba pil te kha lo eitir sela, hnawtchhuak leh mai rawh se" an lo ti a. 

Tichuan naupang chuan an sawi ang chuan a hrilh leh ta a. Pitar chuan, Lasiri leh Lasari chu tai fe leh ba pil te chu a eitir a, a lo hnawtchhuak leh ta a. 

Chutiang thil Pitar an ṭanpui zawk ina a hlui ai mah chuan Thangsira te lo tih dan chuan Lasiri leh Lasari thin a ti ur êm êm a, Pitar thil hlui pawh ei duh lo chuan an chhuak leh ta a.

 An kal dawn chuan Thangsira leh Thangzaia te pi,  mitdel an tihvar sak pawh chu an tih del sak leh a.

An kal liam hnu awk chuan Thangsira leh Thangzaia thir chher zo chu inah chuan an zuk haw a, an pi hnenah chuan “Tute nge kan mikhualte chu?” tiin an han zâwt a. Ani chuan “Lasiri leh Lasari an ni a, in thu ang khân tai fe leh ba pil te ka pe a ka hnawtchhuak leh ta mai anih kha.” a lo ti a.

Chu thu an hriat chuan Thangsira leh Thangzaia te chuan pawi an ti êm êm mai a, an kalna lamah chuan an chhuak a, an um zui ve leh ta thung a.

Thui tak an kal nu chuab kawng chin hre zâwk chuan an kalna kawng ni lo lamah an lo tlan khalh leh a. Lasiri leh Lasari kalna tûr ah chuan an hmuh ngei tûr hian Dar tawnsuk- ah an lo chang a, an lo inphun su ngeuh ngeuh va.

An kiang an lo thlen chuan Lasari i chuan,

"Ai ka u-e ka u-e,

A he Dar tawnsuk te hi

La ta mai mai tang ka ti,"

a han ti a. Lasiri erawh chuan Thangsira te an nih a ring tlat a,

"Ai ka nauvi, ka nauvi,

Thangsira leh Thangzaia an ni ang e,"

a tiin lâk a phal lo va, la lovin an kalsan ta a.

Kawng kawi a an liam veleh Thangsira leh Thangzaia te chu mihring ah an inti chang leh a, tichuan an lo tlan khalh leh ta a.

A hma ang bawk in Darkawngchilh-ah an lo chang leh a.

 Lasiri leh Lasari kalna tûr kawng sír a thing zâtah cchuan an lo inbâng leh a, chu chu Lasari'n- a hmuh chuan,

"Ai ka u-e ka u-e,

A he Darkawngchilh te hi

La ta mai mai tang ka ti,"

a han ti leh a, a u chuan,

"Ai ka nauvi, ka nauvi,

Thangsira leh Thangzaia an ni ang e,"

a ti leh a, an kalsan leh ta a.

An kal tâk veleh anni chu mihringah bawk an lo inti chang leh a, ahma ang bawkin an tlan khalh leh ta a.

 Darbenvawn-ah an lo  chang leh a. Lasiri leh Lasari kalna tur kawng sîr a thing bulah hian an lo inbâng leh a, Lasari bawk chuan lâk leh tumin,

"Ai ka u-e ka u-e,

A he Darbenvawn te hi

La ta mai mai tang ka ti,"

a han ti leh a, a u chuan,

"Ai ka nauvi, ka nauvi,

Thangsira leh Thangzaia an ni ang e,"

a ti leh a, la lo bawk chuan an kal leh ta a.

Thangzaia chu an hmalamah tlânin Khaw dur nasa tak maiah hian a lo chang a, rei lo tebah ruahpui van-âwn a sûr ta a. Lasiri leh Lasari chu ruah chuan a nan huh hrep a, vawt ti chuan an khûr an khûr ta mai a. 

Thangsira chu khâm puk hul phiangah hian meiah a lo chang a, a lo vâm hiam mai a, chu chu Lasari'n a hmuh chuan a u hnenah,

"Ai ka u-e ka u-e,

A he meipui a ṭha hi

Ai ta mai mai tang ka ti,"

a han ti leh a, a u chuan

"Ai ka nauvi, ka nauvi,

Thangsira leh Thangzaia an ni ang e,"

a ti leh a. Khûr bauh bauh chung chuan an kal pêl leh ta a. 

Chumi hnu chuan Thangsira te unau chuan Lasiri te chu an tlân khalh leh ta a, Thangsira chu tuipui ah changin a tui chu a lo inti lian viau mai a. Thangzaia kha Dâr leilawn ṭha tak ah a lo chang thung a. Tuipui chungah chuan a lo indawh kai zar mai a.

Chumi hmun chu Lasiri-te unau khân an va thleng a, Lasari- chuan dâr leilawn chu zawh atan a ît êm êm a, a u hnenah chuan,

"Ai ka u-i, ka u-i,

A he dâr leilawn a ṭha;

Zawh ta mai mai tâng ka ti," a han ti leh a.

A u erawh chuan Thangsira te unau an nih arin avângin,

"Dâr leilawn tak maw i chan,

Thangsira leh Thangzaia chan raw bei e," tiin a chhâng thung a.

Chu lui chu a hêl na an han zawng chiam ṭhîn a, Nimahsela an hmu zo ngang si lo. 

Tichuan kalna dang a awm si lo va, chu dar leilawn chu zawh an tum ta a.  Lasari- kha chuan Darbenvawn- ah te an lo chan khân lâk zêl a duh avângin ani chuan dâr leilawn chu a va zawh zai zai a, a zawh kai mai a. Chumi hnu chuan  a u chuan a han zawh ve leh ta a, mahse a leilawn lai a thlen dâwn veleh leilawn chu a auh ri ta ṭhawt ṭhawt a, chim mai dawn a a lan avângin a zawh zêl ngam lo a, a tlân kîr leh thuai a.

Chutianga Lasir-i'n a a zawh apianga chim mao dâwn a alan zêl avâng chuan, a nau Lasari chuan,

"Ka u, ka paw mai ang che, tichuan kan zawh kai thei mai ang," a ti a, tichuan a u chu a paw ta a.

Dâr leilawn chu a han zawh leh a, a lai an thlen chuan a auh ri leh tuarh a, leilawn chu alaiah a tliak ta a. An unau chuan a hnuai tui ah chuan an tla dûn ta a.

Lasari chuan tui chu a hleuh a, rei lo te ah tui  hleuh kai thuai a.

Vaukam ah chuan a ṭhû a. A u erawh kha chuan a hleuh kai ve thei ta lo va, a nau chuan a u chu au in,

"Ka u hleuh rawh,

Ka u hleuh rawh."

a lo ti ṭhîn a.

Mahse tui chuan a u chu a lên zel a, a nau chuan vaukam aṭang chuan a ûm zel a.

Mahse tui lian chuan a u chu a lên zel a, hla tak ah a len bo ta a. A nai chuan ṭap chungin a ûm zêl a, 

"Ka u hleuh rawh,

Ka u hleuh rawh." tiin a tlân zêl a,  Tichuan a û ûm chuan a tlân zel a, a tawp ah chuan Uleuh- ah a chang ta daih a.

“Ka u, hleuh rawh,

Ka u, hleuh rawh” 

a tih chu hrâm nân a hmang ta a. “Uleuh, Uleuh” a ti hlen ta a ni.

Tin, chumi hnu chuan Thangsira leh Thangzaia kha mihringah an lo chang leh a.

"Tunah chuan Lasiri te pawh an awm tawh si lo a, mihring nih pawh anuam tawh lo ve, thil dang ah i chang zâwk ang," an ti a.

Thangsira chuan,

"Nang hi e, nang hi e, sial pa ah i chang ang a,

Kei hi e, kei hi e, sial nu ah ka chang ang a;

Kum tin, kum tin, i bû dûn rial rial ang aw."

a ti a. Thangzaia chuan, " Ka duh lo,"  a lo ti thuai a.

Thangsira bawk chuan,

"Nang hi e, nang hi e, arpa ah i chang ang a,

Kei hi e, kei hi e, arnu ah ka chang ang a,

Kum tin, kum tin, i khuang dûn rial rial ang aw?" a ti leh a.

Thangzaia chuan, " Ka duh lo," tih bawk in a lo chhâng leh a.

A u chuan Ran chi hrang hrang chu a han sawi zel a, a nau chuan engah mah chan a duh lo zêl a. A tawp ah Thangsira chuan,

"Nang hi e, nang hi e, farṭuah ah i chang ang a,

Kei hi e, kei hi e, vaube ah ka chang ang a,

Kum tin, kum tin, i vul dûn chîk chêk ang aw," a ti leh a.

Thangzaia chuan, "Aw le," a lo ti a.

Chutichuan Farṭuah leh Vaube ah chuan an chang dûn ta a. Tun thleng hian kum tin in Farṭuah leh Vaube chu an pâr hun a in ang ta fo a ni.

Thangsira tuipui a a chan a a luanna mawng lamah chuan lengkir sâng tak mai, a awm a, chu lengkir ah chuan tui chu a in khawhthla sung a.

Chu lengkir hnuai lawk ah chuan Rulpui, lian êm êm mai hian pûk a nei a, chu pûk aṭang chuan nitin vak chhuakin khaw thim dawn ah a tleng lût leh ṭhîn a.

Chu rulpui chuan nitin deuhthaw hian  a awmna bul hnai khua, phaizawl hmun nuam tak chu pêl in mihring ina lo atân a an neih ṭhin lam hi a pan ziah a.

Chu rulpui chuan mihring, nula hmelṭha tak mai, an lo a kal hi a thlîr nitin ziah mai ṭhîn a.

Mihring tan chuan amah chu hlauhawm leh huat rawn a ni tih pawh a hria, mahsela mihring, a thlír mêk nula erawh chuan chutiang rilru a put ve a ring phal lo ṭhîn.

A chhan chu, amah ina a hmangaih êm vâng a ni.

Tichuan a tawp ah chuan engpawh huamin, anih nih ni tûrin chu nula feh na lo lamah chuan a tleng thla ta ruak ruak a.

Lo ah chuan tumah a hmu lo a, Thlam lamah erawh chuan hmeichhe zai ri lauh lauh hi a hre thung a, tichuan zawi muangin Thlam lamah chuan a tleng chho ta a.

A rin ang ngei chuan Thlam chhungah chuan nula chauh chu a lo awm a, hlauh a hnêk in a lo ti ṭha hle thung a.

Tichuan hlim tak a inkawm in hun an hmang a, nidangah pawh lêng ṭhîn tûrin an in ṭhen ta a.

Thlam a chhuahsan dawn lai chuan nula chu a hming a zawt a.

Nula chuan zak deuh chung hian, "Ka hming chu Chawngchilhi a ni a," tiin a chhâng a....