CHAWNGCHILHI | Based On Mizo Mythology

Thangzaia- leilawn a a intih chan a, Thangsira tuipui a a in tih chan a, a luanna mawng lamah chuan lengkir sâng tak mai, a awm a, chu lengkir ah chuan tui chu a in khawhthla sung a.

Chu lengkir hnuai lawk ah chuan Rulpui, lian êm êm mai hian pûk a nei a, chu pûk aṭang chuan nitin vak chhuakin khaw thim dawn ah a tleng lût leh ṭhîn a.

Chu rulpui chuan nitin deuhthaw hian a awmna bul hnai khua, phaizawl hmun nuam tak chu pêl in mihring ina lo atân a an neih ṭhin lam hi a pan ziah a.

Chu rulpui chuan mihring, nula hmelṭha tak mai, an lo a kal hi a thlîr nitin ziah mai ṭhîn a.

Mihring tan chuan amah chu hlauhawm leh huat rawn a ni tih pawh a hria, mahsela mihring, a thlír mêk nula erawh chuan chutiang rilru a put ve a ring phal lo ṭhîn.

A chhan chu, amah ina a hmangaih êm vâng a ni.

Tichuan a tawp ah chuan engpawh huamin, anih nih ni tûrin chu nula feh na lo lamah chuan a tleng thla ta ruak ruak a.

Lo ah chuan tumah a hmu lo a, Thlam lamah erawh chuan hmeichhe zai ri lauh lauh hi a hre thung a, tichuan zawi muangin Thlam lamah chuan a tleng chho ta a.

A rin ang ngei chuan Thlam chhungah chuan nula chauh chu a lo awm a, hlauh a hnêk in a lo ti ṭha hle thung a.

Tichuan hlim tak a inkawm in hun an hmang a, nidangah pawh lêng ṭhîn tûrin an in ṭhen ta a.

Thlam a chhuahsan dawn lai chuan nula chu a hming a zawt a.

Nula chuan zak deuh chung hian, "Ka hming chu Chawngchilhi a ni a," tiin a chhâng a.

Chuta ṭang chuan nitin deuh tawh Rulpui chu Chawngchilhi kiang a awm lêng tûrin a chhuak ta ziah a. Tin, mak tak maiin chu rulpui (serpent) chu mihring ang mai hian a ṭawng thei a, Chawngchilhi nen chuan mihring ṭawngin an inbe ziah ṭhîn a ni.

Chawngchilhi hian nau hmeichhia, thingphur rual vêl hi a nei a, pa nen, an pathum chuan an khawsa ho a. A nu erawh chuan an unau a an naupan deuh laiin rihsâng mual a lo liam san tawh thung a ni.

Kum dang ang lo tak in chumi kum chuan an lo leh a vel ah buh hmin tlân tûr sa leh sava an tam riau va, awllen lai pawh ni sela buh vêng a ni tin feh ziah a ngai ṭhîn  a.

 Chawngchilhi te unau chu buh veng tûrin an feh ziah a, an pa an chhâwk theih avângin an pa chuan chaw chhûn atan buhchangrum leh sa a fun sak ṭhîn a.

Mahse chutianga hlim tak a an feh lai chuan thil danglam tak mai an tawng ta tlat mai.

Rul lian tak maiin a an thlâm lam apan mêk lai chuan Chawngchilhi nau chu an vau a herhse kûng lian tak mai kiangah a awm mêk a.

A hmuh tirh chuan mak tiin a ṭê ṭhawt a, chu a thawm chhe te chhuah chu Rul chuan a hria niawm takin a tleng lai chu châwl in a ding ûr ûr a, a lei sei tak chhuah zauh zauh chung hian a hawi kual zuk zuk a.

Chu veleh Rul chuan a hmu ang tih hlau takin a kiang a herhse kung phên ah chuan a biru nghal a.

Thin phu dup dup in thing phên aṭang chuan a'n bih dêk dêk a, mahsela rul chu a lo hawi kual tawh lo.

A mei hmawr lam chauh a hmu hman, an thlâm a a tleng luh lai chu.

Chawngchilhi nau chu ala naupang bawk si a, a thinlung chu hlauhna ringawt in a khat vek a.

An thlam chhungah chuan a u Chawngchilhi a awm a, rul chuan a hmu anih chuan a chu loh vêk pawhin a dawlh ngei ngei ang tih pawh a hria.  Mahsela thlam chu a pan ngam chuang lo a, thinpu dep dep in thing phênah chuan a ṭhu reng a.

Ni ina suk a chen dawn ruai tawh tih chuan thil ri deuh sun sun hi a hria a, a bihrukna aṭang chuan khûr zawih zawih chung hian a bihthla leh ta.

a awmna herhse thingkung aṭanga chil chhâk phâk maiah chuan an lo mawng lam pan in Rul lian chu a tleng thla mêk a lo ni a, an buh hmun chu a pe thla hun mai lehnghal.

Mahsela mak tak maiin a u pawh a hmu tlat mai.

An thlam kawt ah chuan dingin Rul tleng na lam chu a lo hawi mêk a.

Rul a tleng bo chiah tih chuan Thlam lamah chuan a tlan phei nghal a, a hlauh êm avângin a u pawh chu a au ngam lo a ni.

Thlam kawt a thlen chuan a thaw hlawp hlawp hian a ṭhu hnawk a.

"Rul kha...Rul..kha..." a ti buai nuaih a.

A u chuan a nau awm dan a hmuh chuan thil awmzia a hrethiam nghal mai a. 

"Ka hrilh dawn che nia," tih pahin a nau chu a kai tho a, thlam chhung lamah a kaihkuah lut zui ta a.

"Ka pa hnenah chuan engmah sawi rêng rêng suh aw, i hrilh vaih chuan rul khan a dawlh ngei ngei ang che," a ti a.

A nau chuan mak a tih hmel kher mai, thlam chhuat ah chuan a ṭhu hnawk nuai a, a tiril ala khûr zawih zawih mai lehnghal.

Paikawng a thing phurh tûr thawn mawlh mawlh pah hian a u chuan,

"Rul kha fel tak a ni a, mihring ang in a ṭawng thei a, rul sa tliah a ni rêng rêng lovang. A zâr ah vanneihna emaw pawh kan la tawng maithei a, chuvangin a chungchang hi khawiah mah i sawichhuak tûr a ni lo, ka pa mai bâk ah kan khaw mi te pawh, tuman an hre tûr a ni lo," a ti leh a.

Tichuan an thing phurh tûr te a thawn zawh chuan an unau chuan an haw ve ta a.

In an thlen chuan an pa chuan chhuang takin a fanu te fel zia bâkah thu ṭha tam tak a lo fah chiam a. Chawngchilhi nau chuan chumi tlai chuan engmah a pa hnenah a sawi ngam lo a.

Chumi ni aṭang chuan Rul chu Chawngchilhi te thlamah chuan a rawn kal ta fo mai a, a nau chuan a hlau thei hle a, an thlam a rul awm chhung chuan thlam kil chep ah chuan khur zawih zawih hian a lo tawm ngat ngat ṭhîn a.

Chutiang anih loh pawhin Rul a lo kal chuan an vau a herhse thing bul ah a awm daih ṭhîn.

Lo an thlen veleh Chawngchilhi chuan Rul a lo la kal loh chuan a nau chu rulpui ko tûr in a tîr vat ṭhîn a, a nau chuan a u thu chu a hnial ngam si lo va. Hnial a tum pawhin Chawngchilhi chuan rulpui chu ko tûr in a tur lui tlat a, “I koh duh loh chuan rulpui ka hrilh ang” tiin a sawi ṭhaih vel ṭhîn a.

 Chawngchilhi nau chuan hreh tak chungin rulpui chu a koh sak ṭhîn a, An lo mawng lamah chuan a a kal a, hlau leh khur chungin zâiin rulpui chu a ko va.

“Chawngchilhi u leuh u leuh e,

Ka u’n zuang se a ti e,

Ka pa’n zuang se a ti e;

Chawngchilhi lungdi e” a ti khûr hlawk hlawk a.

Rulpui chuan a hriat ve leh rang takin zaiin a lo chhang ve leh a,

“Ka zuang na’nge ka zuang na’nge,

Vai diar ka khim lai tak a,

Tawnsam ka zial lai tak a” tiin. 

A châng chuan

“Ka lo kal thuai dawn e,

Mawi takin ka sam ka khuih mek e;

Nalh takin ka diar ka khim mek e,

I ṭangnemah thi ang dêr a bei tûr in."

ti te'n a lo chhâng bawk ṭhîn.

Lo mawng lam aṭangin rulpui chu a lo tleng chhuak hruah hruah a, thlam lam a rawn pan zû zûl a, thlam ah chuan rawn inkualin Chawngchilhi nen chuan an inkawm ṭhîn a.

Chawngchilhi nau chuan Chawfak hunah pawh chaw a fak ve ngai lo va. Rulpui leh a u chuan inchhaih dun her her chungin chaw an fak san ṭhîn a.

 Chhunah engmah a ei ngai loh avãng leh, a u in rulpui a ngaihzawn avângin a rilru hah chu rei lo te ah a rawn lang chhuak a, a cher ta hle mai a.

Hun a lo kal zêl a, rilru hlau thawng leh rilṭam reng reng a a awm ṭhin avâng chuan hmuh theih khawp in a lo chêr tak tak ta a.

A fanu naupang zawk mizia lo danglam ta thut mai leh a taksa a lo chêr tâk êm avâng chuan a pa chu a ngaih a ṭha thei ta lo va, a rûk in hun rei tak chu a lo chîk ru nauh nauh a, a táwp ah chuan,

 “Chemte, buh leh sa nen a, ka chawm che pawhin eng i ti a i chêr telh telh mai le?” tiin a zâwt ta nge nge a.

A u leh rulpui a hlauh êm avângin Chawngchilhi nau chuan engmah a sawi ngam chuang lo va.

Mahsela thil eng emaw dik lo awm a a hriat avângin Chawngchilhi- awm loh hlan in a pa chuan Chawngchilhi nau chu a lo chêr tâk êm êm chhan chu hriat a duh tlat avângin a zâwt leh ta a.

 “Chemte, ti tak mai a i cher deuh deuh hi ngaihzawng i neih vang a ni maw?” a ti a.

 Ani chuan, “A teuh lo mai ka u asin ngaihzawng te chu nei,” tiin a chhâng a.

Chutianga a pa nen an inchhâl an inchhâl na lamah chuan Chawngchilhi nau chuan a u leh rulpui inngaihzawn thu chu a sawi chhuak ta nge nge a. 

A u leh rulpui inkawm dân zawng zawngte, rulpui a hlauh vânga chaw chhûn ei ngam lo a nih thu te leh a u leh rulpui in ina an ei ṭhin dan te, rulpui a hlauh zia thu te chu a hrilh ta vek a. Tin, a u chu saruak a awmin Rul nen a an in ngaih thu te pawh chu a sawi ta vek bawk a.

Chu thu a hriat chuan                          Chawngchilhi pa chu a thinrim hle a, rulpui chu thah dan tur a ngaihtuah ta a. 

Tuk khat chu, “Chawngchilh, vawiin chu inah lo awm la, i nau nen lo ah kan zu feh ve thung a nge” a ti a. Ani chuan a pa thu a hnial ngam loh avângin in ah chuan a lo awm ta a.

 Chawngchilhi pa chuan a chempui a tat hriam var a, lo ah chuan an kal ta a. Lo an thlen hmain Chawngchilhi lemah a chang a, Chawngchilhi thawmhnawte a ha a, hmeichhia angin a insiam a, êm te a phur ve a, Chawngchilhi ngaihzawng rulpuiin ral aṭanga a lo hmuh palh pawh a, a hriat hran mai theih loh tûrin a insiam danglam a.

Lo an thlen chuan Chawngchilhi nau hnenah chuan, “Chemte, rulpui chu ni danga i koh ṭhin dân ang takin han ko teh le, ka lo that teh ang,” a ti a. 

Chawngchilhi nau chu an lo mawngah chuan a va kal a, a koh dân ngai ang bawk chuan rulpui chu a a ko leh ta a.

“Chawngchilhi u leuh u leuh e,

Ka u’n zuang se a ti e;

Ka pa’n zuang se a ti e,

Chawngchilhi lungdi e” tiin a au leh a.

 Chawngchilhi nau aw a hriat veleh chuan rang takin a lo chhawn a; a hmangaih thu hetiang hian hla in a rawn chham a,

“Ka lo kal thuai dawn e,

Mawi takin ka sam ka khuih mek e

Nalh takin ka diar ka khim mek e,

I tangnemah thi ang dera bei turin” tiin.

Rei vak lo hnuah rulpui chu a rawn tleng hruah hruah a, thlam chhungah chuan a rawn inkual leh ta rui mai a.

Chawngchilhi rawn kawm a, induh tawn tak a awm dûn leh tûr a lo kal chu, a beisei loh takin Chawngchilhi aiah a pa a lo lang ta thut mai.

Thlâm namthak a lehlam hawi a lo ṭhû, Chawngchilhi thawmhnaw ha chu a lo in her thut a, Chawngchilhi rêng rêng a lo ni i khaw lo mai. Chawngchilh i pa lek a lo ni anih chu.

A chempui tah hriam chu a lo puan hnuai sa reng avângin a lehhawi rual chuan a vilik nghal a.

A hnung a thlamuang tak a lo in kual Rulpui chuan leh, pawh a ti hman lo. A theih pa tawpin a sât ta chawrh a, chu rulpui chu a lai ah a bung ta hmawk mai a.

A thisen te chu thlam chhuat leh bang vel ah te a per nuaih a, Rulpui na ti chu ring tak hian a sû hum hum a, a tâl tawp tawp a.

Mahsela chu mi lek chuan Chawngchilhi pa chu a ti lungawi zo lo. A thinrim êm avângin chu rul chu bung thum laiah a chhuah a.

Chutia rulpui an tihhum zawh chuan Chawngchilhi pa leh a nau chu hmanhmawh takin in lamah an haw leh leh ta nghal vut a.

An haw kawng tluan chuan Chawngchilhi pa chu a thinrim êm êm mai a, a ha chang a ṭhial ri rawp rawp a, in an thlen chuan Chawngchilhi chuan mak a lo ti ang reng hle a, engtia chutiang hun a an lo haw tâk tiin thil awmzia a pa a  lo zâwt a, Mahsela a pa chu a thinrim êm avângin engmah pawh a sawi thei lo.

"Mi hur nu," 

tih leh tapchhak a Chawngchilhi eirawngbawl chu a chhîp sap a hnuh a rual nghal a.

"Mi hur lepchiah maw i lo nih a," tiin a hnûk leh tawp a, a tukkhum ah sât in a lu chu a chhawk bung hmawk a.

Chu mai ala duhtawk lo cheu mai(!)

Chawngchilhi thi tûr chalchâng chu dimna rêng nei lo hian a taksa rem lai lai ah a sât zui leh ta sawk sawk a.

Chawngchilhi chuan rul fa kha a lo pai hman chu niin, a hrin a lo hun tep tawh a.

A pa ina Chawngchilhi- pum a sah na hliamna aṭang chuan rul note hi a têl têl in an rawn chhuak ta tuam tuam a.

 Chawngchilhi pa chuan rul note ho chu a lo that zel a, mahsela a that vek emaw a tih laiin pakhat hi a thah hmaih a, in hnuaiah a tla a, sephung kuaah a tleng lut ta daih a.

(Remchang hmasa ber ah THE EPIC OF WIZARD LALRUANGA - tih chhuah leh kan tum dawn nia, Lalruanga thawnthu hi Mizo te'n Epic kan neih Chhurbura leh Rairahtea te zîngah chuan a hlu berin ka hria a, Hlawm lian tak, ORIGIN OF WIZARD LALRUANGA, THE GREAT WIZARD LALRUANGA, WIZARD LALRUANGA & MONSTER KEICHALA,  WIZARD LALRUANGA & THE SORCERER HRANGSAIPUIA, THE LAST WIZARD WAR : LALRUANGA & ZANGKAKI, tiin ka ṭhen a, tlema hnam dangte thawnthu anga felfai leh thawnthu puitling deuh a ka siamrem avângin a thawnthu pawimawh lai erawh ka paih tel dawn chuang lo tih min lo hriat sak ṭheuh dawn nia.

Thuziak te min lo chhiar sak ṭhin avângin la lawm êm êm e.)