KRATOS | God Of War

Kratos hi atam zawk chuan kan hre ngeiin a rinawm a, kan hmelhriatna leh a lârna na chhan ber chu  Video Games a God Of War- series vâng hi a nih a rinawm hle.

A chanchin anga sawi tûr chuan Games- a a character leh a destiny hi mythology ai chuan a ngaihnawm zawk bawk a ni.

God Of War Games hi David Jaffe-a siam niin 2005 aṭanga Santa Monica Studio- ina an pekchhuah ṭan a ni a, a games hi siam belh zel in series anga kal a ni.

God of war hi Greek mythology behchhan a games siam a nih thu kan hre vek ang a, chuvang erawh chuan Kratos- chanchin leh a thiltih te hi a tak tak (greek mythology) a ni tihna a ni lo, Game siamtu te hian amah mimal (Kratos) hi an hmang  hawh ve chauh zawk a ni.

Tun ṭumah hi chuan a tam zawkin a kan hriat ṭhanna Games version hi kan sawi dawn lo a, a thawnthu Greek Mythology zawk hi sawilan kan tum dawn a ni.

Mahsela chhiartu te'n a in hriatchian zawk nan tlem han thailang lawk ila.

Games ah chuan Kratos hi Pathian chungnung ber Zeus- leh Callisto te fapa anga tarlan a ni a.

A unaupa chu Deimos- a ni a, nupui hmasa chu  Lysandra a ni a, a hnuhnung zawk chu

Faye( Laufey the Just) a ni.

 Tin, fapa Atreus leh fanu Calliope- a nei bawk a.

indona pathian Ares-a'n a a unaupa a man avangin Ares zawn a tihhlum a tum a, Ares- hi a tihlum ngei bawk a ni.

Tin, Games-a a hreipui lian tak Leviathan Axe- kha dwarf unau )Huldra Brothers),  Brok leh Sindri- te siam a ni a, anni hi Viking pathian Thor-a tuboh Mjölnir- siam sak tute kha an ni.

A Games hrim hrim ah chuan a changtu ber anih avângin Greek pathian te a rawn hnehin Pathian ropui ber Zeus- leh thihna pathian Thanatos hial hneh a, a tihhlum avângin Greek Mythology lam tui mi te chuan God Of war hi an ngaihnep phah hial a, mahsela games khelh nuam tak anih avangin bansan erawh a har fu mai.

Tin, Nine Realm lam zawh in Norse pathiante nen pawh an in bei a, Frost Giantess- nupui ah a nei bawk anih kha.

He games khelh nuam tak hi a lâr êm avângin mi tam tal chuan Greek pathiante hi Kratos-an tihlum a, hneh vek tak tak ah an ngai hial a, mahse hei chu game ania, Kratos- chanchin tak tak ni lovin, a khelh nuam tur anga an siam rem a ni.

Kan hriatthiam dan tur chuan, Merlin series (mizo ṭawng pawh a an lehlin) lar tak mai, Collin Morgan, Bradley James, Katie McGrath, te channa, Arthur leh a chhiahhlawh Merlin- ang kha a ni mai a.

Kha Series- kha Welsh mi, Geoffrey of Monmouth- thawnthu ziah Merlin- behchhan a siam a ni a.

A movie ah chuan rawlthar Merlin kha Arthur Pendragon a chhiahlawh ah aṭang anih kha, Tin thir chher fanu ah mihang Guinevere- a ṭang bawk a.

Mahsela a thawnthu ah chuan Merlin kha Arthur-ina Camelot a ro arel khan putar mai a ni tawh a, Arthur lo pian dawn ah pawh khan upa tak a ni tawh a, Uther Pendragon-a kha Merlin hian ava tlawh nghe nghe anih kha.

Tin, Arthur-a nupui Guinevere-i pawh kha Cameliard ram Lal Leodegrance- fanu, nula hmelṭha tak mai a ni bawk.

Troy - movie ah pawh Achilles(brad pitt) a hovin sakawr lem chhungah Odysseus-a te an biru a, Troy kulh an tichhia anih kha.

Mahsela a thawnthu ah chuan, Greek sipaiin a sakawr lim lian tak an siam khan Achilles a chu a thi daih tawh a, Odysseus-an Achilles-a  fapa Neoptolemus-a hruaiin Troy kulh kha an bei zawk a ni.

Heng kan sawi te aṭang hian a awmzia chu kan hrethiam vek in a rinawm a, Pathiante zînga chak leh ṭuan rang ber mai Indona pathian Ares- hneh in amah Kratos chu indona pathian ah a rawn ṭang ta a, mahsela hei hi thil ni thei lo a ni a, Indona pathian chu Ares- a ni reng dawn zawk a, Greek Mythology hi siam belh a ni lo a, siam ṭhat a phuah belh a ni thei tawh lo hrim hrim tih hi kan hre thar leh dawn nia.

Aw le, Mythology lam han hrût ve thung dawn ila :-

Games-a Kratos-a nu, Callisto- hi Mythology ah chuan Arcadia Lal Lycaon-a leh Nonacris-i fanu a ni a,

Zeus- nen a an fa chu sapel tu Arcas- a ni a, Ramsa enkawltu pathiannu Artemis-i te nen a sa pel ṭhin a ni.

Mahsela Zeus-a nupui Pathiannu Hera-i'n a thîk avângin savawm ah a chan tîr a, tichuan a fapa Arcas-a sa pel in a kâp kap hlum ta a ni, a thlarau chu Pathiannu Hera-i'n arsi ah a chantîr a,  chu chu Mizo te'n zangkhua kan tih, Ursa Major- arsi bawrkhawm hi a ni.

Tin, Games-a Kratos-a unaupa hi Mythology ah chuan Indona pathian Ares leh Hmangaihna pathiannu Aphrodite-i te fapa a ni a, a unaupa chu hlauhna pathian Phobos-a ni, Deimos- hi Hlauhna leh chakna pathian, minor god- a ni.

Tin, Kratos-a nupui hmasa Lysandra- hi Amazon Lal fanu, a fin leh phakar ém avânga lâr êm êm kha a ni.

Kratos-a fapa Atreus hi Mythology ah chuan Sparta Lal Pelops leh Hippodamnia-i te fapa a ni a, a nupui chu Aeropi-niin fapa pahnih Agamemnon leh Menelaus-a te an ni a, Menelaus hi helen of sparta pasal kha a ni.

Tin, Kratos-a fanu Calliope hi Mythology ah chuan Zeus leh hriatrengna/ngaihtuahna pathiannu Titaness Mnemsoyne- te fanu a ni a, phír pui pariat a nei a, a unau te nen chuan Muses- an ti, pathiannu zaithiam tak te kha an ni.

Kratos-a nupui pahnihna Laufey- hi Norse lam a ni ve thung a, Milian (Jötunn) Lal Farbauti- nupui a ni a, an fapa chu pathian phakar tak Loki- kha a ni.

Kratos-a hrei Leviathan axe kha Norse mythology ami an lakchhawn tho a ni a, Loki-a siam niin, a hming tak chu Lævateinn- a ni, he hrei lian leh thiltitihtheina chak tak nei hi Pathian Odin-a fap Thor- in khawvel tawp indona Ragnarok ah hmangin, a hmelma kumhlun hremhmun sa hlauhawm Jormungandri- thah nan a hmang a ni.

(He hreipui hi kan hriat dan tur chuan, Marvel Universal movie Avenger : Endgame a Thor-a hrei lianpui ken kha a ni.)

Kratos- hi Greek Mythology ah chuan Cratus/Cratos- tih a ni a, chu chu Greek original zawk a ni.

A hmasa in Kratos thlahtu te chungchang hi han ziak lang hmasa phawt ila.

Van Pathian Uranus leh Lei Pathiannu Gaia te'n fa sawmlehpahnih, Milian Titan an nei a, chûng Titan zîng ami Crius chuan nupui ah Eurybia-i neiin fapa Tuipui pathian ropui  Pallas an nei leh a, Pallas- hian nupui ah Styx- nei ve leh in fa pali, mipa pakhat Kratos- leh hmeichhe pathum Bia, Zelus leh Nike- te an nei leh a ni.

Kratos-a nu Styx- hi tuipui enkawlnu tu pathiannu Tethys leh Titan Oceanus te fanu Tuipui Lasi Nereid- sângthum te zînga pakhat a ni.

Milian Titans leh Olympian te indona Titanomachy ah Styx hian Olympian lam a ṭan avângin, Zeus-a (Olympian zînga lal ber) chuan malsawmin, Khawvel leh mitthi khua inkar a luang Styx- lui thianghlim enkawltu pathiannu ah Styx- hi a siam a ni.

Tin, Tethys hi Uranus leh Gaia te fanu a ni.

Kratos-a pi, a pa Pallas-a nu Eurybia-i hi tuipui chet vel dan enkawltu Lasi a ni a, tuipui pathian, zawlnei Pontus leh Gaia te fanu a ni.

Pontus- hi Van boruak leh êng pathian Aether leh Gaia te fapa a ni a, Aether- hi Thim pathian Erebus leh Zan pathianu Nyx-te fapa a ni.

Nyx leh Erebus te hi Van Pathian Uranus leh Lei pathiannu Gaia te rual a Chaos ina a hrin te an ni.

Kratos-a hi chakna pathian (God of Strength) a ni a, a unaunu te pawh hi Pathian te tho an ni a, Nike- hi hnehna pathiannu a ni a, Bia- hi Tharum/thinrimna pathiannu niin, Zelus- hi phûrna/tha tho na leh îtsikna pathiannu a ni bawk.

Kratos- hi Minor Gods( pathian te nau te) zînga chhiar tel theih a ni a, mahsela Hercules ang tho a a chanve mihring, a chanve pathian (Demigod) aṭanga dah chungnun leh chauh a ni.

A chanchin hi Greek Mythology ah alang tlem hle a, Greek mithiam, Author of Greek Tragedy an tih hial Aeschylus- a lehkhabu Prometheus Bound- ah deuh chauh a inziak lang a.

Prometheus Bound hi Milian Titan Prometheus- chanchin inziahna a ni.

Hemi bu ina a sawi dan chuan Mihring te zîng a mei(fire) a pek avângin Zeus- an a hrem a, lungpui chungah chatuan a awm tûrin a phuar tih a ni a, hetah hian Kratos leh a unaunu te hian Zeus- hi an pui a ni.

Prometheus- hi Titan Iapetus leh Clymene-te fapa a ni a, milian Titan tho a ni, a nu Clymene hi Tethys leh Titan Oceanus- te fanu Nereid sangthum te zînga pakhat a ni bawk.

Prometheus- hi Milian Titans leh Olympian te indona ah Olympian- te lam aṭan avângin Zeus- hian Titans ho a tân tîr na Tartarus- ah a paihthla ve lo a.

Mahsela Mihring te hnen a mei(fire) a pêk, Zeus-an mihring te hman a phal loh avânga Fennel pangpar kuang kâr a a thuhruk ru chhuak a mihringte a pêk avângin Zeus- a hian a hrem a,  Mei pathian Hephaestus-a, hmanraw siam thiam chu Zeus- hian thirkhaidiat (chain) a siam tîr a, tichuan Prometheus-a man tûrin Kratos leh a unaunu Bia- te a ko a, anni unau hian an thiltihtheihna hmangin milian  Prometheus- chu an man a, Scythia tlâng a lungpui chungah a zangthal a muttir in an man bet a,  Hephaestus- chuan a thirkhaidiat chuan a kut leh ke ah a lo phuar ta a ni.

Tichuan Zeus- chuan mupui lian tak tîr in, Prometheus-a taksa chu mupui chuan a ham thlér a, nilengin a thin a kher a, a eisak ṭhin. Mahsela zan khua in Prometheus-a taksa hliam te chu a lo dam a, a tuk ah mupui chuan angai te in a thin a eisak leh ziah a, nitin chutiang chuan mupui chuan a eisak ziah ṭhin a ni. Chu hremna chu chatuan a awm reng tûrin Zeus-a chuan a ti na in, hun a lo kal a, michak Hercules- a lo pian hnu in Zeus-a remtihna in Hercules chuan chu Prometheus-a thin ei ṭhîn tu mupui chu a a thal in a kâp hlum a, A phuarna thîr khaidiat chu Indona Pathian Ares-a'n a tih chah sak ve thung a ni.

Kratos- te unau hi a nu Styx- hian an naupan lai aṭangin Olympus tlangah, Zeus-a hnenah a awm tîr ṭhin a, Zeus- hian naupang Kratos- chu a hman ṭangkai ṭhin duh avângin a no chawitu ah a hmang ṭhin a ni.

Kratos- hi pathian hnuaihnung kan tih tawh kha, chuvangin Greek mythology ah hian hmun a chang tlêm êm êm a, a nupui leh a thlah te pawh pakhatmah sawilan a ni lo a ni.

Tichuan Kratos-a chanchin leh nihna chu  Zeus-a no chawitu, a tirhkah rinawm tak a ni tih mai loh chu Greek Mythology ah hian hmuh tûr a awm lo tihna a ni ber e.