Greek Pathian te zîng ah chuan tun lai hun thleng a mi te hriat la hlawh ber chu Eros- hi a ni awm e. Kan hriat dân tûr chuan Eros- hi hmangaihna thal keng ṭhîn, Valentine Day vel lai a Card leh Present thil chi hrang hrang a hmangaihna thal keng naute lem hi a ni âwm e.
Roman hovin a an koh na, Cupid- tih hian kan hmelhriat fur hlawm zâwk ang.
Greek ho Pathian ropui ber ber Olympian an tih Zeus- leh a unau panga te hi chanchin ngah ber leh lâr ber ber, Greek Mythology lungphum ber te an ni a, an hnuaiah hian Pathian naupang zâwk, an fâ te, Minor Gods an awm leh a, chûngte chu Apollo, Athena leh Hermes..etc te ho an ni leh a.
Chumi hnuaiah chuan Pathian hnuaihnung zâwk tak tak, Lasi kan tih ang chi te an awm leh a, an hnuaiah Pathian leh mihring thlah pawlh mi chak leh huaisen Demi-Gods- an awm leh a ni.
Eros hi Greek ho hmangaihna Pathiannu hmelṭha Aphrodite-i leh Indona Pathian Ares-te fapa a ni a, Minor God te zîng ami ni mahse Greek ho Pathian te zîngah chuan hmun a chang tam lovin a langsar êm êm lo thung.
Mahsela hmun pawimawh tak erawh chu a chang tho thung.
Trojan leh Greek ho indona ah khân a bul tumtu chu Eros hi a ni pakhat a, Trojan leh Greek hovin inremna an neih laiin Sparta Lalnu hmelṭha Helen- thinlung kha Trojan Lal fapa Paris- a hmangaih theih nan a kah sak a, chuvangin Troy indona a lo chhuah phah a nih kha.
Greek ram a Lal pakhat hian fanu hmelṭha deuh deuh pathum a nei a, an pathum zíng a a naupang ber Psyche- chu a û te pahnih ai chuan ala hmelṭha leh zual a, Thi thei mihring zîngah chuan Pathiannu te ai pawh a hmelṭha zâwk awm chhun an ti hial a ni.
Psyche-i hmelṭhatna chu an ram mai ni lo, Greek ram pumpui ah chuan a thang nasa hle a.
Mi tam tak amah hmuh châk in an kal khawm ruih ruih a, a hmelṭhatna avâng chuan an chawimawiin pathiannu ang hial in an bia a.
Mipui te chuan hmangaihna leh hmelṭhatna pathiannu Aphrodite-i ai pawhin a hmelṭha zawk tiin tumah rêng chuan pathiannu hnena inthawi an nachang an hre lo hial a.
Pathiannu Aphrodite-i temple chu a ruak huai a, a maicham a mei te chu an thi ṭhiap in a inthawina vut te pawh chu an dai diak a.
Pathiannu lim ker tu te pawh chuan ker belh reng reng an tum lo. Chawimawina zawng zawng chu mihring thi thei Psyche- lakah chuan an pe vek a.
Hun a lo kal zel a, chung mipui thiltih te bâkah Psyche-i hmelṭhat zia te chu pathiannu Aphrodite-i chuan a lo hre ve ta a, a thin arim mai bâk ah Psyche-i chu a thîk ta êm êm a.
Hmangaihna thal neitu, a fapa Eros- chu rang takin a ko a, a hnenah chuan,
" I thal leh a mu keng la, Psyche-i hnenah kal ang che, i thal chuan Psyche- i chu i kap ang a, tumahin an ngaihzawn lohna tûr in chu thal mu vêk chuan tlangval hmelchhe tak i kap ve leh ang a, tichuan an pahnih in an lo inngaizawng dawn nia," tiin a hrilh a.
Tichuan Zan laiah Eros chu Psyche-i mutna pindan ah chuan a lut ru ta a, tui tak hian Psyche-i chu a lo muhil a.
A thal la chhuak a Psyche-i kah a tum lai chuan Psyche-i hmel chu a hmu chiang ta a.
A hmelṭha a tih êm avâng chuan a thlîr ta ngawih ngawih a, a mit lâksawnna chang pawh a hre lo hial. Psyche-i hmelṭhatna chuan a zem a, a zûnah a uai nghal anih chu.
Chu mihring nula hmelṭha êm êm mai chu khawvel a thilsiam bawhhlawh ber, mihring azawng a hmelchhe ber mai nen a hmangaihna khur a an tlu lut tûr chu a phal ngang lo a, a nu thusawi tak te chu zawm a tum lo kher mai.
Psyche-i mutui lai chu a thal chuan a kap ta a, tichuan amah pawh chuan Psyche-i a hmangaih reng theih nan Psyche-i a kahna thal mu vêk chuan amah leh amah chu a in vit a, a thinlung chu a vit tlang ta hrawih a.
Hun a lo kal zel a, Mahsela Psyche-i chuan tumah a ngaizawng lo mai ni lovin mipa rêng rêng a ngaihsak ta lo mai a. A nun chu a hlim lovin amah a awm chet chet a thlang ta fo va.
Amah duhtu mipa tam tak te chu an beidawng a, hmeichhe dang an nei ta zel mai a. A unaunu te pahnih pawh chuan an mangan pui a, tisa châkna lam hawi zawng te'n kawm mahsela engmah a danglam phah chuang lo.
Tin, a unaunu te'n pasal an neih ve ve pawh chuan a rilru a thlâk phah chuang lova, Psyche-i'n a pasal a neih ve duh nan tiin, a unaunu te pasal neih pawh ropui tak in lawm mahsela eng a ang thei chuang lo.
Tumah a hmangaih thei lo a, mipa reng reng a ngaihtuah theih lo, tu emaw a hmangaih tak awm tlat hian a hria a.
Psyche-i chu khawvel a hmeichhe hmelṭha ber a ni a, mahse lungngai leh khawhar tak mai a ni thung. Mipa tam tak te chuan ngaisangin chawimawi mahsela, nulat tlangval angin an hmangaih hauh lo thung.
Mipa te chuan nupui atana an duh loh avang chuan Psyche-i nu leh pa te chu an mangang êm êm a, Pathian te kan ti thinrim a ni an ti hial a.
Tichuan Psyche-i pa chu inthuam danglamin Delphi zawlnei hnenah a kal ta a, Psyche-i pasal tûr an hmuh theih nan a Rimawi leh thal kah thiamna pathian Apollo- hnena inthawi a, thu zawhsak tur leh a lo finchhuah theih nan a rawn tûrin a chhuak ta a.
Delphi Zawlnei hnenah chuan, "Kan fanu Psyche-i hian tumah mihring mipa hmangaih a nei thei lo a, tumah rengin nupui atan an duh bawk si lo, pasal neihtir ngei kan duh a, amah pawh hi pasal neih a hun tawh si a, chuvang chuan khawngaih takin Pathian te min râwn sak teh khai, kan mangang tak zet zet a ni." a ti a.
Mahsela Psyche- i tân a pathian Apollo- thu pek chu a rapthlak in a lungngaih thlak kher mai. Delphi Zawlnei chuan Apollo thupek chu Psyche-i pa chu a hrilh ta a.
" Psyche-i chu mitthi vui angin, thawmhnaw dum vek in inthuam sela, Pathian te tlâng ah, tlang chhip ah lawn sela, tichuan amah chauhvin awm rawh se, chu chu a pasal tûr ina a tana a thil ruat sak chu a ni.
Pathian te aia chak leh thiltithei ramsa thla lian tak nei a lo kal anga, ani chuan a pasal tûr hnenah a hruai ang." tiin.
Chu thu a hriat chuan Psyche-i pa chuan Delphi zawlnei chu chhuahsan in a khaw lam ah hmanhmawh takin a haw leh ta a.
A Lal ram a thlen a, a chhûngte hnena Lalpa ina Delphi zawlneiin a Pathian Apollo-a thupek a hrilh a sawi chhuah chuan Psyche-i ṭhian te leh a chhûngte ho chu an mangang hle a, chutiang thu rapthlak leh beidawnthlak chu tuman ngaihtuah pawh an ngaihtuah ngam lo.
Mahsela pathian thupek anih avângin tuman an hnial ngam bawk si lo. Tichuan Psyche-i chu mangang leh hlau chung chung chuan Pathian te tlâng a kal tûr chuan a in buatsaih ta a.
Psyche-i hreh leh mangang chu nasa takin a ṭap a, a hmel pawh mitthi hmel ang maiin a dâng a, thlân a phum tûr a an hruai ang maiin a taksa pawh a dawldângin a chak lo kher mai.
Tichuan tlangah chuan Psyche-i chu hmeichhe ṭhenkhat in an hruai ta a, tlâng a thui tak an lawn hnu chuan amah chauh chuan an hnuhchhiah a.
Ṭanpuitu nei lo, mal leh khawhar tak a a hun te hmang tûr Psyche-i chu hreh tak chungin a hruaitute chuan an kîr san ta a.
Khua a lo tlai chuan Psyche-i chuan a pasal tûr chu lo kal mai tûr a a rin avângin beisei takin a lo nghak a, phaitual hnim ah chuan a ṭhu reng a.
Mahse hun aliam a, khua pawh a lo thim ta hial a. Chu zan reh tak chu Psyche-i chuan hlauvin a khûr a khûr a, lungchhe takin a ṭap zawih zawih a.
Mahsela zan ah lehnghal, tlâng sang tak mai a mahni chauh a nula awm leh mangang tak a ṭap a hmuh chuan Khawthlang thli pathian Zephyr- chuan a khawngaih ta êm êm a.
Tichuan a thiltihtheina lan tîrin thlifim leh boruak rimtui tak mai hi Psyche-i awmna vel ah chuan a len tir vel chiam a.
Tichuan chu boruak thianghlim tak chuan rei lo te an Psyche-i chu a zêm a, tui takin a mutthilh tîr ta a.
Chutia a mutthilh lai chuan pathian Zephyr- chu thli ah a inti chang a, Psyche-i chu boruak ah chawi kângin a tlang chhip lamah a thlawhpui ta a.
Phaitual hnim hring dup leh pangpar mawi tak tak awmna tlâng chhîp hmun nuam takah chuan Psyche-i chu nghat in zankhua a tui tak a a mutthilh theih nan thifîm in a tuam vel a.
Zîng a lo ni a, Psyche-i chu a lo harh a, a mit a men chuan mak a ti ngei mai.
Hmun mawi leh nuam tak mai a a lo awm daih vâng chuan mak a ti a, a bul lawk a Lal in ropui tak mai a lo awm reng chu mak tiin a thlîr ngawih ngawih a.
A bul velah chuan thing sâng tak tak mai hi mawi tak in a inrem tlar ṭhat a, pathian te huan ang maiin Lalin bul vel chu a mawiin thei chi hrang hrang te pawh an rah bawk a.
Chu Lal in chu pathian te'n a a hmuh atân a an ruat sa hrim hrim a ni thung.
Chu in ban chu a mûm, rangkachak vek a ni a, a chung chhûnglam pawh saingho leh thing rimtui Thyine- thing mawi tak a ker vek an ni.
Tin, a bang chu tangkarua (silver) vek a ni a, ze mawi tak hian ramsa chi rang hrang lem a in ker vek bawk a, a chhuat ah pawh lunghlu nawi chi hrang hrang awmze nei hian a in phah vek bawk a.
Kawngkhar bulah chuan a ding reng a, chu thil ropui leh mawi lutuk mai chu a tak a nih a ring lo deuh a, a ringhlel deuh hial mai.
Chuvang chuan inchhungah pawh chuan a lût lawk duh lo a.
Chutih lai chuan inchhûng khawi lai emaw aṭang chuan aw hi a lo ri chhuak a, Psyche-i chu a rawn be ta a.
Psyche-i chuan aw lo chhuahna chu a zawng vel ruai a, mahse a hre thei lo.
Chu aw lo chhuak chuan,
"Hlauh tûr engmah a awm lo ve, lo lut rawh khai, he in hi tan a ni e, inbual fai la, tichuan nang khual zahawm tak hi zanriah ropui tak kan buatsaih sak ang che," tiin Psyche-i hnenah chuan a ti a.
Tichuan aw ina a hrilh ang chuan a inbual fai a, zanriah atan, a tâna buatsaih eitur tuihnai leh rimtui tak tak te chu a ei ta bawk a.
Chutia zanriah a ei mêk lai chuan a bul vel ah chuan rimawi nalh leh mawi êm êm mai hi a rawn ri a, zaipawl aw nalh tak zai ri ang mai hian rimawi chuan a awmna vel boruak chu a luahkhat a.
Chu rimawi chu hre mahse, a tak, a tum tute erawh a hmu thei lo, boruak ah ri a rawn chhuak a ni tawp mai.
Chumi nileng chuan amah chauhvin a awm a, mahsela a hma a aw a hriat khân a zui reng thung a.
Mahsela eng emaw ti tiin a pasal tûr chu zanah a lo kal dawn niin a hria a, a thinlung ina a beisei tlat vâng pawh a ni ang.
A be tu aw nalh tak mai chuan a bengah hrilhru neuh neuhin a hria a, chu aw a hriat apiang chuan a hlauhna te an bo zovin, hahdam riau in a in hre bawk a.
Amah tak hmu thei rih lo mahsela, a pasal tûr chu ramsa mak leh hlauhawm erawh anih a ring hauh lo thung a, a aw aṭang ringawt pawh chuan a pasal tûr chu a hmangaih a, a pasal tûr pawh chuan amah chu ngai in a duh êm êm a ring tlat bawk.
Tichuan ni te chu an liam hun te chu a kal ve zel a, Psyche-i chuan chu a hun hman mêk chu nuam a tiin, chu hun aia nuam leh a nun hlimna chu ala tawng ngai lo, a hriat theih chin ah chu a hun hman mêk chu a dam chhûnga a hun tawn nuam ber ni hialin a hria.
Amaherawh chu, nilenga amah chauh a a awm leh, a pasal a hmu thei lo chu pawi a ti a, a rilru ah chuan chutia mal tak a awm reng chu nin na a lo awm ve ta telh telh a, a nu leh pa te a ngaihtuah chhuak a, a ngai ta êm êm a.
A chhûngte kha amah vângin an lungngai a, mahse tunah erawh a ni chu a la dam a, a hlim bawk a, chuvang chuan a chunga pathiante thil ruat dan chu a dik lo a ti a, amah avânga a chhûngte nat chu a phal thei lo.
Zan a lo thleng a, thim zîng a khum nuam tak mai a mu chung chuan a pasal mak tak mai, a aw chauh ala hriat hnenah chuan a thil duh chu a sawi ta a.
A unaunu te chu a awmna hmunah chuan hruai ve sela, amah Psyche-i chu ala dam a, a hlim zia te mit ngeiin rawn hmu ve sela, chu chuan a nu leh pa upa tawh tak te chu a tihlim in, an rilru te pawh a hahdam ve ngei ang tiin a hrilh a.
Mahse a pasal chuan a thusawi chu a pawm sak lo a, chuvang chuan Psyche-i chu a in rilru na takin a rûm a.
A pasal chuan, " Aw le, i unaunu te chu helai a an lo kal chu ka remti e, mahse hei hi ka hrilh ang che, an duh dan leh an thunun theih tûr che in i awm tûr a ni lo. Chumi anih vaih chuan kan in zawmna hi a chat ang a, hrehawmna tam tak i tuar ang." tiin a chhâng a.
Tichuan a pasal chuan khawthlang thli pathian Zephyr chu kovin, Psyche-i unnau te chu hruai tûrin a ti ta a.
Tichuan a tûkah chuan a unaunu te chu thli pathian Zephyr chuan Psyche-i chenna tlâng chhîp sâng takah chuan thli chak tak mai hian a rawn chawi chho a.
An unau a dam tak a an han inhmu khawm leh chu an hlim hle a, lâwm avâng an ṭap zawih zawih a.
Amaherawh chu, a unaunu te, Psyche-i chenna Lal in ropui tak mai chhûng a an luh chuan, inchhûng chei na rohlu tak tak leh lunghlu ker mawi chi hrang hrang te chuan an mit ala in, ropui an ti a, mak tiin an chek tlawk tlawk a. Inlarna hmu ang maiin an in hre hial.
Zanriah an ei chhûng zawngin rimawi nalh leh danglam lam tak in a awi reng a, pathiante zu in ṭhin ang mai a zu tui ṭha tak mai te chu an in bawk a.
Hlim viau masela Psyche-i unau te chuan îtsîkna thinlung an nei ta tlat mai, dil chhût takin chutiang ro hlu chanchin te chu, chhân sen pawh a ni lo hial mai, chu nula khawhar leh mal tak mai chu chutiang Lal in ropui leh rohlu chintin rêng neitu a pasal chanchin te zâwt in, eng hna nge a thawh ṭhin tih te thlengin an zâwt a.
Mahsela Psyche-i chuan a pasal chu sa pel mi, naupang tak tih chauhvin a chhâng thung.
Mahse, anni chuan Psyche-i thusawi chu an ring lo kher mai, ram vak a, sa pel mai mai chu hetiang khawp hian a hausa thei lovang, Lal fapa emaw pathian te zîng ami emaw a ni ngei ang tiin an ngaihtuah a.
Anmahni hausakna ve te chu Psyche-i leh a rohlu zawng zawng nen a an han khaikin chuan engmah lo mai a ni tih an hria a, an unaunu tih nat dan tur ringawt chu an ruahman ta a.
An haw dawn chuan Psyche-i hnenah chuan, " Delphi zawlneiin i pasal hi ramsa rapthlak tak mai anih thu asawi a sin.
Engvangin nge i pasal hian nangnena inhmuh a duh loh?
A chhan chu, i pasal hian a hmel rapthlak leh tenawm tak chu i hmuh chuan i kalbosan ang tih a hlau tlat alawm, Psyche- khawngaihthlak, ramsa rapthlak leh ṭihbaiawm tak chu engtin nge i mutpui theih zâwk." an ti a.
Chumi ni chuan Psyche-i chuan a unaunu te thusawi chu a ngaihtuah ngut ngut a, mahse thil ni thei tûrah a ngai thei lo.
Mahsela, a unaunu te thusawi kha a dik anih chuan,
"Engati nge chhûn ah a lo kal ngai loh? Engatinge amah nen inhmuh a duh loh? Engnge a thuruk chu ni rêng reng? Engatinge a nun dan te pawh min hrilh ve loh? "
tih te chu a in zawt a, nileng in angaihtuah a, mahse engmah a hrethiam thei lo.
A tawp chuan thutlukna asiam ta a, zanah engvangin nge ka kiangah a lo kal ṭhin, a thuruk chu zawng chhuak dawn, zaninah sathau khawnvar ka chhî ang a, khawnvar êngah chuan enge anih chiah ka en dawn a ni, rul anih chuan ka tihlum nghal ang, a nih loh chuan bati ka tihlum anga, hlim takin ka mu leh mai ang a ti a, a hma a a pasal thusawi te kha a theihnghilh ta vek a.
Tichuan an mutna pindanah chuan chemte leh sathau khawnvar a thukru a, Zan a lo nih chuan an mutna pindan chu a lo thim leh ta vek a, a kianga thlarau ang mai a a pasal thim tham chauh a a kianga awm ṭhin, a aw chiah a hriat ṭhin chu a kiangah a mu tih a hria a.
A huaisenna zawng zawng sawm khawmin a pasal muttui lai tak chuan thawm dim takin a tho a, lei pawh rap ṭha ngam lovin, a ke zungṭang chauh rinchhan a kal in a chemte thuhruk leh a sathau khawnvar chu a la a, a chhi êng ta a.
Khawnvar a chhit ên a, a pasal hmel an hmu chiah chu mak a ti kher mai.
Ramsa ṭihbaiawm tak ni lovin, ala hmuh ngai reng reng lo, khawvel thilsiam zîng a mawi chungchuang ber leh hmelṭha ber mai, hmangaihna pathian Eros- a lo ni reng tih a hmuh chuan a phu zawk a, amah Psyche-i a hmangaih theih nan a ama thal mu a a in vihna, a awm pawh chu ala hliam in, a mutna sírah chuan a thal mu bawm pawh a lo awm reng a.
A ngaihtuahna mawl lutuk chu a zak kher mai, a hlim leh phûr lutuk chuan a sathau khawnvar chu Eros a chung zawn ah lek kâng in hmuh chian lehzual a tum a.
Mahsela Sathau khawnvar tui chuan Eros-a hnungah ah a far ta hlauh mai a.
Chu veleh Eros-a mutui lai chu a rawn harh ta nghal a, Psyche-i hmel a hmuh chuan lungngai takin,
"A pawi hle mai, Psyche, ka hmel hi i hmu lo tûr asin, tunah chuan ka hmel i hmuh tâk avângin kan awmdun thei ta lo anih hi," a ti a, an mutna pindan aṭang chuan a tlan chhuak a.
Pysche-i chuan rang takin a pasal chu umzuiin man beh a tum a, mahsela a sathau khawnvar kha a tui a buak avângin a thi zui ta mai si a, engmah êng a awm loh avâng chuan tih ngaihna a hre bîk lo, thim zîngah chuan a pasal chu a ko vak vak ringawt a.
Chutih lai chuan thim zíng aṭang chuan aw a lo ri chhuak a, thinlung kehchhia, rilru na tih hriat ngawih ngawih hian a pasal aw chuan,
"Hmangaihna chu in rinngamna tel lohna ah chuan a chêng thei ngai lo," a rawn ti a, tichuan thim zîngah chuan Eros chu a thlâwk bo ta daih a.
Psyche-i chu a ṭhingṭhi hnawk a, a rilru in, "Hmangaihna Pathian, ani chu ka pasal a ni a, mahse ka ring ngam si lo.." a ti a.
Psyche-i lungleng chu a ṭap a ṭap a, tichuan,
" Ka pasal a lo let lehna tûr anih chuan engpawh ka ti ang, khawi hmunah pawh awmse, ka zawng chhuak leh ngei ngei ang a, ka hmangaih zia hi ka ti lang ngei ngei ang," a ti a.
Tichuan a pasal nen a an chenna hmun nuam tak chu chhuahsan in, a pasal zawngin a vak kual ta a.
Hmun tam tak ah a zawng a, a tawp ah chuan Sik leh sa pathiannu Demeter-i temple a thleng ta a.
Pathiannu Demeter-i hnenah chuan inthawina hlân in, ṭanpui tûrin a ngen a.
Demeter- chuan Psyche-i chu a khawngaih êm êm a, a thil tuar chu a hriatthiam puiin a thil dîl pawh chu âwm a ti a, mahsela a ṭanpui chuan pathiannu Aphrodite-i a dodal a ni dawn si a, chuvang chuan chu a thil tawrh zawng zawng a mawhphur tu Pathiannu Aphrodite-i hnenah kal a, a fapa Eros-a hnena chen leh dîl tûrin a ti a.
Pathiannu Aphrodite-i temple a thlen chuan Psyche-i chuan inthawina hlân in Aphrodite- i hnenah chuan, a fapa Eros- hnena awm phal sak tûrin a dil a.
Mahsela Pathiannu chuan Psyche-i hmelṭhatna chu a îtsik avâng leh a fapa nena lo an in hmangaih avâng chuan a haw êm êm a, a chhiahhlawh hmeichhe pahnih nen nawmsip bawl nan a lo hmangin, a kawr chu an pawhthler sak a, sakawr vuakna hruihrual in an lo vua a.
Aphrodite-i chuan a naupai chu hria in, a lo nuih sawh a, a fapa nen a an inneihna chu a der mai mai anih thu a lo hrilh a.
Tin, Aphrodite-i chuan phuba lâk a duh avângin heti hian Psyche-i hnenah chuan a sawi a, " Eros-a bula i awm dawn chuan thil pathum itih phawt angai ang, i tih theih loh chuan Eros-hi kumkhua in i hloh vang vang bawk ang," a ti a.
"I tihtur hmasa ber chu hei hi a ni," tiin Psyche-i hma ah chuan, Vaimim fang, Buh fang, Wheat fang, ram pangpar chi khat Poppy chi leh bean chi, te chu a theh phei a.
"Hei hi temple a sava khawi ho te eitûr a ni a, chhar khawm la, a hrang ṭheuh in dah ang che, vawiin a itih zawh hman loh chuan Eros-hi ka hmuh tir leh tawh ngai lo ang che," a ti a.
Chutia a sawi zawh chuan pathiannu chu inneihna a ruai kil tûrin a kal bo ta a.
Psyche-i chuan chu thil chu a huphurh hle a, chutiang chi te tak te te chu hmuh kim a har dawn em avâng chuan a mangang in a ṭap zawih zawih a.
Beidawng taka a ṭah lai chuan temple chhûngah chuan fanghmir rual khat hi an lo kal a, Psyche-i an hmuh chuan, an khawngaih a, a tan chuan tih rual a ni lo, i ṭanpui ang u, tiin chûng chi te chu an chhar khawm a, a hrang te te in an dahkhawm sak leh ta vek a.
Inneihna ruai ṭheh a a kal a rawn kîr leh chuan khua a thim tawh a, Aphrodite-i chu a a rui kher mai, Psyche-i'n a a thil tih tûr tuk a lo tih zawh vek avâng chuan a thinrim êm êm a.
"I hna i la zo lo, " tiin temple chhuat ah chuan a mut tîr a.
A temple tepen ah chuan Aphrodite-i chuan pindan nuam leh zau tak mai, khum dûp nuam tak awm a nei reng a, mahse chuta Psyche-i riah chu a phal lo.
A eitûr atan chhang ur sîr khawro leh ût lai a pe a, chumi zân chuan chhuat a mu tûr a tiin a kalsan ta a.
Aphrodite-i chuan Psyche-i hmelṭhatna a thík êm avângin hun rei tak chhung hna hahthlak tak tak ka thawh tîr ang a ti rilru a.
Chumi lai zawng chuan Aphrodite-i chuan Eros- chu khawiah mah a kalchhuah a phal lo a, ama chenna ah mi tâng angin a khung reng a, amah avânga Psyche-i hrehawm tawrhna te avâng chuan Eros- chu lungngai tak in a in dawm kun reng a.
Varṭian ah Aphrodite-i chuan Psyche-i chu a ko a, a hna pahnihna tûr hrilhin tuipui kamah a hruai a,
" He luipui zau tak piah ah sawn thliarkar a awm a, chutah chuan Beram tam tak an awm a, an hmul chu rangkachak vek a ni, chûng an hmul te chu ka hnenah i rawn la vek tûr a ni, heng Beram te hi ni pathian Helios-a ta an ni a, an hrâm rîk vaih chuan Helios-a lung i ti awi lo ngei ang." a ti a.
Kal kai na dang a awm si loh avângin huphurh tak chung chuan Psyche-i chu tuipui zau takah chuan lut in a theih ang angin a hleuh a, mahse tuipui chu mihring tân a hleuh kai atan chuan a zau mah mah a ni.
Mahsela a lungngaihna leh beidawnna chuan a ti huaisen a, chakna a pe ta zawk a, chuvang chuan nasa tak a beiin tuipui tak chu a hleuh chhuak ta a.
Thliarkar chu a nuam hle mai, phaitual hnim in a bawh chuai a, beram te pawh an lo tla sup sup bawk a.
Psyche-i chuan chung beram te chu man mai a tum a, mahse a rin ang an lo ni lo, an lo kawlh in mihring te pawh an lo bei ngam nasa mai hi a lo ni a.
Chuvang chuan Psyche-i chu beidawng takin phûl chungah chuan a ṭhu ta reng a.
Mahsela mak tak maiin a bul lawk a phairuang buk chu a rawn ṭawng ta tlat mai, chutia Psyche-i indawm kun reng a hmuh chuan,
"Beram te kha chu man an har lutuk a, i man thei lo ang, chuvangin tum buai duh suh, saw lai i awmna piah deuh a hnim buk awmna sawn va kal rawh, a ṭangah ah beram hmul a kai ṭeuh a lawm," a lo ti a.
Tichuan Psyche-i chu hnim hling nei awmna ah chuan ava kal ta nghal a, a hlîng a beram hmul bet ṭeuh a hmuh chuan a hlim hle a, beram hmul awmna thing ṭang chu thliak in a kîr leh ta a.
Rangkachak beram hmul a pêk hnu chuan Aphrodite-i chuan Psyche-i chu tihtur hlauhawm tak mai a tuk leh ta, Crystal bottle- pe in hmun pakhat ah a hruai a, hnuaichhiah tak a Psyche-i en chungin,
"Kan hma a lui tui dum, tlang aṭanga rawn luang chhuak saw i hmu em, saw lui saw Estige- a ni a, Styx lui leh Cocytus lui hnâr a ni, a tui khawh thla lai ami tui saw Bottle ah khan va thun khat ang che." a ti a.
Tichuan Psyche-i chu tlângah chuan a lawn ta a, lungpui te chu an nâl in an awih hle mai, khâm sâng tak a lawn a ni ringawt mai a.
Chu tlâng sâng aṭanga a tlâk vaih chuan a hnuai a lung ah chuan a insawh hlum dawn tih pawh a hre reng a.
Tui fàwn ina tlang bulṭhut leh a pang lung te a rawn sut ṭhin avângin lung te chu a pial put hlawm a, rah lai tûr pawh thlan a har kher mai.
Chung zawng zawng aia hlauhawm chu, a tui lâk na tûr tui khawh thla bul ah chuan Dragon lian leh rapthlak tak mai, thla hlaipui nei awm ve chu a ni.
Mahsela Pathian te zîng a Lal ber Zeus- chuan Psyche-i chan chhe lutuk a hmuh chuan a lainat a, tichuan pathian dangte hriat lohvin a mupui chu Psyche-i pui tûrin a tîr ta a.
Chu mupui chu chak takin tuipui chungah chuan a thla lian tak hmang chuan a thlâwk a, tlâng pang a Dragon- chu beiin nasa takin an insual a, rei lo te an Dragon chu a hnawt bo ta a, mahsela Psyche-i tân lengkir sang lutuk a lawn a, tui khawh thla lo dawh chu a tih a tih rual loh anih avângin a Bottle- ken lai chu lak sak in a ke chuan a ṭhâm a, tui khawhthla a tui chu a thun sak ta a.
Aphrodite-i chuan a tui lak chu a lo pawm a, mahse a lungawi hran lo,
vîn tak hian, "Tuemaw chuan an pui che a ni, a nih loh chuan he i hna hi i thiam hle a ni ang, tunah hian i thiamna leh i theihna te, i chanvo i hlenchhuak thei tak tak em tih la fiah leh dawn a ni," a ti a.
Tichuan Psyche-i chu bawm te tak te Pyxis- a pe a,
"Mitthi khua ah i kal anga, he bawm hi Persephone- i pe dawn nia, a hnenah chuan, mitthi khaw Lalnu Persephone, i hmelṭhatna tlemte tal lachhuak in, he bawm ah hian min lo dah sak, Pathiannu Aphrodite-i chuan, ka fapa a dam lo a, a enkawl leh tihdam nan i hmelṭhatna hi hman ka duh a ni i ti dawn nia," a ti a.
Chu thu a hriat chuan Psyche-i chu a lungngai êm êm a, mihring damlai tumah in mitthi khua an kal thei lo tih a hre si a.
A beidawng lutuk chu kulh bang sâng takah a lâwn a, chuta ṭang a zuan thlak a, mahni intihhlum a tum mai a tum ta a.
Zuan thlak a tum lai chuan aw hi a hria a, chu aw lo chhuahna lam a hawi chuan, mihring ni lovin, chu a lawnna kulh bang chuan aw a lo chhuah a ni tih a hria a.
Chu aw chuan, "Nula khawngaih thlak, min lo ngaithla teh, mahni intihlum in zuang thla luh suh, Mitthi khua kalna chu ka hrilh ang che, helai aṭanga hla vak lo Achaean- khawpui ah, Lacedaemon ah kal la, a ramri lai ah khan hmun pakhat, Taenarus- a awm ang a, chumi lai ah chuan mitthi khaw kalna leh gate luhna kawng rûk a awm.
Mi i tawh reng reng i be tur a ni lo, zawhna an zawt che anih pawhin i chhâng tur a ni lo. I thil tih tûr chauh ngaihtuah la, thil dangah pêng khawtlai suh ang che, thil dang in a a tih khawtlai che chuan i dam chhungin ni eng i hmu leh tawh ngai lo ang a, kumkhua in mitthi khua ah i tâng reng tawh ang.
Tin, Charon-a tan pawisa thir pahnih i neih angai a, Cerberus ho pêk atan Khawizu leh chhangphut chhang ur, zu telh i keng tel bawk tur a ni." a ti a.
Psyche-i'na chu thu a hriat chuan a lawm hle a, tichuan mitthi khua a kal tur chuan a inbuatsaih ta nghal a.
Kawng a a kal lai chuan kebai pakhat, sabebengtung chunga thingbung lo dah mek hi a tawk a, chu pa chuan lo bia in, " Engzah a tam nge sabengtung hian heng hi a phurh zawh ang," a lo ti a.
Mahsela Psyche- chuan a chhâng lo, ngawi rengin a kal pel a.
Tichuan Taenarus- mual pawng hmun a thlen chuan mitthi khaw kalna kawng chu a zawng chiam a, mahsela vanneih asiam in a hmu hlauh mai.
Chu lai mual pawng hnuai a lung inrem kar ah chuan a lut a, pûk a lo ni reng mai. Lawm takin a chhûngah chuan a kal ta zel a, thui tak a kal hnu chuan Mitthi te leh minung te awmna daidang tu Styx- lui lian tak awmna chu a thleng ta hlawl mai.
Chu Styx- lui kamah chuan lawngleng pakhat leh a kar tu a lo awm a.
Chu lawngleng ah chuan chuangin, lawng kar tu Charon-a ka ah chuan a pawisa thir pakhat chu a dah a, mitthi khua a kal a duh thu asawi a.
Tichuan Charon-a chuan a lawng chu kar in an chhuak ta a.
Minung khawvel pêl a mitthi khaw ram chin an thlen chuan chu Lui ah chuan mitthi thlarau tam tak hi an lo lâng sup sup a, Psyche-i chu an lo ban a, thlarau pakhat chuan, "Khawngaih in in lawng tlâng hi ka lo vuan ang a, tichuan min hnûk ula, he lui ata hi min hnûk chhuak teh u," a lo ti a.
Mahse Psyche-i chuan a hma a kulh bang thusawi kha a vawng reng a, ṭawngkam khat mahin a chhang lo.
Tichuan vaukam an thleng a, mitthi khaw kawtchhuah ah an ding ta.
Pitar pakhat hian puan a lo tah a, Psyche-i a hmuh chuan a lo bia a," ka puan hi la la, hun rei lo te puan hi min lo tah pui lawk rawh," a ti a. Mahse Psyche-i chuan a chhâng lo, chu pitar puan pawh chu khawih pawh khawih lovin kawngah chuan a kal tlang ta zawk a.
Rei tak a kal hnu chuan mitthi khaw luhna Gate- lian pui mai awmna hi a thleng ta a, Gate ah chuan Hades-a ui chuam, Gate vengtu ui lian tak, lu pathum nei Cerberus- an lo awm a, Psyche-i an hmuh veleh chuan thinrim takin an lo hram a, an ha hriam tak te chu Psyche-i chuan a râp kher mai.
Ui chu thir khaidiat a thlun tlat a ni a, mahsela Gate ah tak an awm avângin Gate- chu luh theih a ni chuang lo.
Psyche-i chuan thil a hrechhuak zawk mai, a chhang ur ken pakhat chu Cerberus- hma ah chuan a theh thla a, an ni chuan rang takin an lo ei nghal a, an ei zawh hnu rei lo te ah an muhil ta daih a.
Gate ah chuan lut in, Ui sir ah chuan tih thawh hlau tak chungin a kal a, a pelh veleh chak takin a tlan zui a.
Mitthi khaw Lalnu Persephone- kulh ropui tak mai a thlen chuan zâm tak chungin a chhûngah a lut a.
Mahse a hlauh angin thil engmah a thleng lo hlauh, Persephone- chuan a lo be ṭha hle a, zanriah tuihnai tak lo buatsaih sak in dawhkan nalh leh ropui tak maiah chuan eitur tui hnai tak tak a lo chhawp sak a.
A pasal Hades- nena an kianga lo ṭhu a, ei a in ve tûrin an ti a.
Psyche-i erawh chuan an sawmna chu a pawm lo, an bulah ṭhu duh lovin chhuat ah a ṭhu a, ei atan chhang ur a dil ta zawk a.
Chutianga zanriah an kil zawh chuan Persephone chuan mitthi khua a a lo kal chhan a zawt ta a.
Psyche-i chuan thil awmzia hrilh in, a bawm ken chu a pe a, Hmangaihna Pathiannu Aphrodite-i'n a a hmelṭhatna tlem tal bawm a thun sak tûr leh chu chu a fa damlo enkawl nan leh tih dam nan a hman a duh thu te a sawi a.
Persephone- chuan Pathiannu Aphrodite-i infiamna mai mai a ni tih a hria a, mahsela Psyche-i duh ang ngei chuan bawmah chuan a duh chu a thun sak ta a.
Psyche-i chu a thawveng huai mai, hlim takin Persephone- Lalin ropui tak chu a chhuahsan ta a. Mitthi khaw luhna Gate a thlen chuan Cerberus- te chu an muhil tawh lo tih a hria a, chuvang chuan a chhang ken lai chu a pe leh a, an ei zawh a an mutthilh lai chuan Gate aṭang chuan a chhuak leh ta a.
Thui tak a kal hnu in Mihringte chanvo rel ṭhin tu pathiannu pathum Fates- te awmna a thleng a.
Fates te chu mihringte hnena hrilhhlawkna puang ṭhin an nih avângin an lo phun nuah nuah a.
"Ka hma hunah enge thleng dawn? Eng chen nge ka dam dawn? ka hlim reng dawn em?"
tiin an lo phun a,
"A chhanna in hre duh em? min zawt rawh u, zawhna zawng zawng chhang thei tu kan ni?" ti te in.
Mahse Psyche-i chuan engahmah angai lo, ngawi rengin an ni ho chu a kalsan a.
Styx lui kam a Charon-a lo awm chu a pawisa thîr pakhat chu a pe leh a, tichuan mitthi khua chhuahsan tûrin tuipui ah chuan an in kar chhuak leh ta a.
Minung khawvel a a lo chuan kai leh hnu chuan thingkung lian tak mai hnuaiah hian a hahchawl a, a bawm ken lai chu ngaihtuah chhuak in, a thlîr reng lai chuan a rilru ah thil tam tak a lo lut a.
Mitthi khaw Lalnu Persephone- hmelṭhat zia leh a tluk loh zia te a ngaihtuah a, a hna hahthlak tak tak te avângin a taksa in a tuar a, a hmel pawh a chuai tawh mêk niin a hria a.
He a thil tih lai hi pathiannu hna tuk hnuhnung ber a ni a, bawm hi Aphrodite-i a pek hnu ah chuan a pasal Eros- nen an awmdun leh thei dawn tih a hria a.
Chuvang chuan a hmel chu zahpuiin, a pasal lakah chuan a in thlahrung ta êm êm a.
Mahsela Persephone pawh khan a lo bum reng maithei bawk a, bawm ah chuan engmah a lo thun leh si loh chuan a pasal nen an awmdun thei ngai dawn lo tih te pawh chu angaihtuah chhuak a.
Chuvang chuan dîm takin bawm chu a hawng ta a.
Mahsela bawm chhûngah chuan hmelṭhatna/hmelṭhatna damdawi (Cosmetic) reng reng a lo awm hauh lo.
Bawm chhungah chuan anchhia, Stygian Sleep- an tih, thi ang mai a awmna chauh a lo awm a.
Psyche- ina bawm a hawn rual chu chu anchhia chu a rawn thlawk chhuak a, chhûm dum ang mai a khu chhuak in Psyche-i ka ah chuan a lut ta vek a.
Chuvelah Psyche-i chu thi ang maiin a let tawp a.
Pathian te tlang Olympus- aṭang chuan Eros- chuan Psyche-i chu a lo thlîr reng a, Psyche-i'n a bawm a hawn rual chiah chiah chuan rang takin a thlawk chhuak nghal a.
Psyche-i chung zawnah chuan a thla chu zâp in a ka a Stygian sleep, lut chu a chhêm chhuak a, bawmah chuan a thun leh ta vek a.
Mahse Psyche-i chu ala harh thei chuang lo.
Dim tak hian Eros chuan a pawm a, a hmangaihna thal mu pakhat chu la chhuak in Psyche-i âwmah chuan a vit ta a, a hliam erawh dim tak in a nuai a, a ti dam leh ta nghal a.
Psyche-i chu a lo harh a, Eros- chuan," I hna i la zo hleinem, ka nu hnenah he bawm hi i pek angai," tiin boruak ah thlawh kân pui a, a nu temple lamah chuan a hruai ta a.
Bawm a pek let leh chuan Aphrodite-i chu Psyche-i lak ah chuan a thinrim hle a, khawiah mah kal phal lovin, a dam chhûng a a chhiahhlawh a siam a tum a.
Mahsela chung thil zawng zawng lo hmu vek tu Pathian ropui ber Zeus- chuan a fapa Hermes chu Aphrodite- i hnenah chuan tîr in, Psyche-i chunga kut lek lo tûr leh Pathian te rorelna kut a awm anih thu a hrilh tîr a, Tin, Aphrodite-i chu Olympus tlang ah, Pathian zawng zawngte rorelna neihna tûrah kal ngal tûrin a ti bawk a.
Olympus- tlângah chuan pathian te chuan ro an rel ta, Zeus-a chuan Psyche-i chu Eros nen innei turin rem a ruat a, Aphrodite- i pawh chu Psyche-i tibuai tawh lo tûrin a ti bawk a.
Pathian Ropui ber Zeus-a remruat angin Eros- leh Psyche-i te chu inneiin, Olympus tlangah a lawmna an nei a.
He an inneihna ah hian pathian te zawng zawng an tel vek a, Zeus-a fanu pakua zaithiam Muses- te'n hla mawi tak an sa a, Satyr- in a ṭingṭang a lo rem in, Pan- pawhin a beram venna phaiphuleng in rimawi a lo siam sak ve bawk a.
Eros- chu pathian, thi thei lo anih avângin Zeus chuan Psyche-i pawh chu thi ve thei lo tûr in a ti a, tichuan pathiante chauh in ṭhin Ambrosia wine chu in ve in, pathian te angin a thi ve thei ta lo a ni.
Eros leh Psyche- i chuan fanu pakhat Hedone- an nei a, Hedone-i hi duhthlanna pathiannu a ni.
Tin, Zeus- an Psyche-i chu dinhmun sang takah dah in, Mihring thlarau te enkawl ṭhîn tu pathiannu ah a ṭan tîr bawk a.
Tichuan Eros, Psyche-i leh an fanu Hedone- te chu Olympus tlang ah chêngin hlim tak in an cheng ho ta a ni.
Thil thlen dan hmu vek tu Zeus- chuan a tîr aṭang rêngin engkim a lo ruahman vek a, Pathian dangte hriat lohvin a thil tih tûr zawng zawngah Psyche-i kha a lo ṭanpui vek a ni reng si a..
Comments
Post a Comment