DOPPELGANGERS (DAMLAI THLA)

Materialism ringtu te chuan an mit, Beng leh tisaa hmuh, hriat, tem leh khawihtheih chauh hi thil dik leh awmah an ngai a, an tân chuan tisa chu mihringte bulțhut leh engkim ani. An ngaihdan hi za ah za dikah lo ngai ya ila, he thil hi an sawifiah a țûl ngei ang :

" Mi țhenkhat chuan tisa hi pahnih- ah țhenin, anmahni duhthu emaw, anmahni an in hrelo emaw pawh nise, damlai thlâ an nei țhin."

Mi țhenkhat chuan țumkhatah hmun hniha awmtheihna an nei tih Psychical Research Record hrang hrangah tarlan ani a. Hetiang thil hi hmasâng thuziak ah leh tûn hnai deuh ah pawh hmuh tûr a awm a, kohhran mithianghlim te zîngah ngei pawh hetiang mi hi anlo awm tawh a ni.

Spanish Jesuit Missionary St.Francis Xavier(1506-52)  chu kohhran in mithianghlim ah a puang a, a thil mak tih zawng zawng pawh kohhranin a pawmpui thlap a ni. Missionary ropui, a ruang ringawt pawh chanchin ngah leh thilmak a tling a a damlai a athil mak tih țhenkhat te chu : damlo tihdam, taksa pangngai pu a piangsual siamțhat, țawngțaina hmanga tuifawn tih reh, ramhnuai hnawhchhuah leh mitthi kaihthawh te an ni. 

Malacca-a hmeichhe naupang a kaihthawh phei chu nithum zet thlâna phum tawh hnu a ni. Hetiang khawp a kohhran mi ropui St Francis Xavier ngei hian damlai thlâ zuk nei tlat a.(!).

Japan leh China inkâra lawnga ankal laiin țulna avangin mi sawmlehpanga(15) chu lawnglênga thlâk thla in tuipuiah an inkar chhuak a, Hetia an chhuah hnu lawk hian thlipui leh ruahpui araen thawk chiam mai a, lawnga awmte chuan lawnglênga inkar chhuak te chu boral turah ngaiin an ngaihtuah hle mai a, Mahse St.Francis- chuan," Lungngai suh u, khâng mite kha nithum chhungin an rawn kîr leh dawn ani."tiin lawnga a chuanpuite chu a hnêm a. A sawi ang ngeiin a ni thumni-ah chuan lawnglênga kalchhuak te chu an rawn kir leh a, an sawi dan chuan khatia an chhuah chhûng St.Francis-a (damlai thlâ) chu an bul ah a awm ve reng anih chu.

France Lal, Phillip IV- hunlai khan Pathian rawngbawl tu hmeichhe pakhay Maria-i a awm a, ani hian a awmna hmun chhuahsan miah lovin, a damlai thlâ hmangin South America ngaw pilril taka hnam mawl țhenkhat hnênah Pathian thu a hrîl țhin niin an sawi.

 Hetih hunlai hian South America-a ramngaw dur pui pui te hi European- hovin anla tlawhpawh lova; mahse, helilai hmuna chengte ngeiin khatih lai khan European hmeichhia in tlawh țhin ngei thu an sawi ve tlat, bâkah chu nu hmelhmang an sawi dân leh Maria-i hi a in mil berin an hria a, a damlai thlâ ani ange tiin an puhthlu ta a ni. Mi pakhat, a ruala hmun hnih a lan/awm- hi mihring rilru in a vei êm avânga awm a ni thei bawk niin alang, Psychical Record ngaihnawm leh dangdai tak pakhat ah chuan tihian a in ziak a:.

 " Lawng hmangin New York lam ka pan a, hetia mahni inlam pana ka haw mêk lai hian ani hnihna ațangin thlipui leh ruahpuiin min nuai chiam mai a, Thli leh ruah chu ani riatni-ah an bâng ve hrâm a. Chau êm êm hian khumah ka let tawp a, ka muhil ta bawrh bawrh a. 

Ka mumangah chuan ka nupui ka lo hmu a, mutkawr ha in ka pindan bulah chuan alo kal a, pindan chhungah midang an awm ve tih a hriat chuan a han ding khawmuang hlek a, Tichuan a lo lût a, min rawn fâwp ta ani. Ka harh chuan kan pindana awm ve khualzin pakhat hian min lo en reng a, 'Mi vannei tak inih hi' a han ti ringawt a. Engvângin nge mi vannei min tih ringawt?' ti a thil awmzia ka han zawh chuan, ' I mutthilh hlân khan hmeichhe pakhat arawn kal a, a rawn fâwp che a, a kalchhuak lehnghal a,' a ti ta mai a!

 A thusawi leh ka mumang a in an chiah avang chuan mak ka ti kher mai. Chuti chung chuan thil nithei niin ka la hrelo ta cheu va. A chhan chu inlamah kan nu a awm daih a, engti kawng mahin lawngah hian a rawn chuan ve theih dan a awmlo tih ka hriat vâng a ni. Mahse, ka ngaihdan chu alo dik hauhlo mai. 

In ka thlen chuan kan nu chuan nui ver ver chung hian,' Thawhlehni khan i kiangah ka rawn kal a,ilo hria em'? tiin minlo zâwt chawt mai a. Makti fê hian, ' Engtin nge i rawn kal theih ang ni,  

Thawhlehni te chuan lawngah chuangin tuipui ah ka awm daih alawm'? ka ti he hâw a. Kan nu chuan min rawn hnaih sauh pah hian, 'Nia, Mahse i hnenah ka lo kal ngei alawm,' ati awlsam êt a.

 Mak ka tih viau rualin a tak tak ni thei tura ka ngaihloh avângin,' A ni thei lo, engti tih a rawn kal anga in ngai tlat nge maw inih le?' kanti leh țalh a. Kan nu chuan,' Khami ni khan khua a țhatloh êm avângin ka ngaihtuah lutuk che a, mut pawh ka mu țha thei hleinem, ka lo chhîng deuh zawk nge, engtin emaw i mutna pindan kha ka rawn thleng deuh thut a, i bula rawnkal ka tum lai takin pindan chhûnga mi pakhat khân minlo en reng avângin ka tím deuh a, ahnu deuhvah ka rawn lût a, i bianga ka fâwh hnu in ka chhuak leh ta mai ani,' a ti ta a. 

A mak kher mai, ka nupui lo hmutu khualzin sawi dân leh kan nu thusawi chu a inmil thlap zu nia! " Hetiang hian Damlai thlâ chhuak chanchin hi tam tak sawi tur a awm a, keini Mizo te pawh hian kan hmêlhriât a, kan sawi fo bawk. 

A tlângpuiin kan sawi liam mai a, thu tak hla tak a lâk a awm ngai lemlo. Hetih rual hian belhchiandawl deuh tak, School pawh in an lo buai phah te pawh sawi tûr a awm tho mai. Titi a an sawi dân chuan, hetiang damlai thlâ nei, midang tibuai zâwnga che, inpuang duh silo chu an damrei ngailo an ti a, țhenkhat chuan mahni ina damlai thlâ nei tih in hriatchhuah vat loh chuan an damrei ngailo an ti bawk a, mahni damlai thlâ hmu chu an dam rei ngailo ti an awm bawk.

 Mahse kei chuan keimahni anga rawn inlâr ramhuai ah ka ngai nghet tlat thung. Mak ve tak mai chu keimah ngei pawh hian vawikhat chu ka hmu ve tawh a. 2012 kum tâwp lam khan ania, Zingkar exer la in durtlang kawng chho ah hian ka tlân țhin a, mi tlân sup sup laia tlân ka peihloh țhin avangin khawvar hmâ deuh hian ka chhuak tlangpui a, ka hâw leh lam hian zîng tlân hma deuh ho ka tâwk tlangpui țhin. chutiang chuan zîng tin ka tlân a, chutih lai chuan kan chhûngte Seling- khua a awm, an fapa nupui nei tawh hi Greenwood Hospital ah an rawn awm a, a nupuiin a riahpui țhin a, mahse damlo pa nû pitar lian tak mai, hian a fapa te chu a ngaihtuah em avanga rawn kal ve in kan in ah a riak țhin a,zîng karah țanga va awmpuiin tlaia a rawn phei leh țhin a, sitting room a țhutthleng seiah hian zanah chuan a mu mai țhin a.

Chutianga kar khat vel kan mikhual hnu chuan, ka zîngkar tlân haw lam chuan, Halflong thlang deuh ah hian kan mikhual pitar chu a rawn chho beuh beuh ka hmu a, pangngai tak in kan in pêl a, ani chuan biak pawh min be chuanglo, kan in pelh hnu chuan tinge maw Helai lai a alo kal ni, Damdawiin anla hawnglo anga a rawn kal vel mai mai anianga ti a ngaihtuah chungin ka tlân haw ta a. 

In ka thleng a, sitting room kan phei chu chu kan mikhual pitar ngei chu a hma lawk a ka hmuh a thawmhnaw chiah inbel chuan țhutthleng seiah chuan alo la mu reng anih chu. a tirah chuan ka phu chiang lutuk a, pindan ah ka tlân lût a, ka chhûngte thawhhma chu ka chhuak ngam tawhlo, ka zan mengrei leh zîng tlân duh vangin sitting room ah ka mu țhin kha ania, chuta țang chuan sitting room ah ka mu ngai tawh lo.

 Durtlang kawng ah pawh ka tlân ngai tawhlo, Bridget Field ah hlîr ka tlân phah ta anih hi.(a hun lai kha chuan hlauhawm ve deuh ania)... 

2015 a ka nu pa boral khan chu pitar chu alo kal ve leh a, ka nu nau, ka nu Mawii bulah, Saw pitar saw, damlai thla nei nu kha anih saw ka tia, kan dawih dûn angreng bawk sia, kan pahnih in mi tam lai laiin kan nui dun char char.( a lo ât theih hle mai..)

Engpawhnise, mihringin finfiahna a pêk chat chat theihloh thil a inhnialna hi a tâwp lawk dawnin alanglo. Anig leh Damlai thlâ chu thlalâkna hmanga lâk theih ani em? kut a khawih theih leh thil tiche thei an ni ve em? Hêng zawhna pahnih lek pawh hi tûn thlengin a chhânna hriat ala ni lova, zirbingtu thiamtak tak te pawh in, "Chutiang chu ani ngei e", an ti thei tlat lo.

Hetih rual hian ngaihruatna mai mai anni bîk silo. Damlai thlâ(Double Exposure) leh Hunlo awm tûr hriatlâwk theihna (Precognition) hi in ang miah silo hian sawizawm a awl hle a, Damlai thlâ nei tam tak te hi Hunlo kal tur hmu lawk thei leh hmu lâwk tu anni tlângpui a, a chanchin pawh hi thliâr thiam a har khawp mai. 

A tâwp berah chuan sawi leh sawi hnu, kei chuan Ramhuai lemchang thiam ina lem anrawn chan mai ni ah ka pawm mai....