MEDUSA | The Quest Of Perseus

Greek thawnthu ah chuan huaisen Perseus-a leh Medusa te thawnthu hi a lâr leh ngaihnawm ber ber te zîng ami a ni a, anmahni pahnih chanchin bîk te pawh hi a ngaihnawm êm êm bawk.

Tunah chuan an pahnih a an in beih dan thu chauh tar lan kan tum dâwn a, remchângah an chanchin bîk leh thawnthu dang te pawh tar lan leh kan tum dawn nia.

Finna Pathiannu hmelṭha leh mitmeng de riai Athena-i'n a a puithiam nula hmelṭha Medusa-i  anchhia a lawh a, îtsîkna avânga a sam mawi tak rûl tûr nei a a chantir a, a hmelṭha tak te pawh a entu apiang lung a an chan zel theih tãk hnu chuan thihna thlarau Gorgon te bul a chêng tûrin a ti a.

Island Of Sarpedon, Cisthene-, thliarkar engtiklai maha  ni hmu ve ngai lo a pûk hrehawm tak ah chuan khawhar takin a cheng a, amah rawn hmuh tum te pawh pasalṭha huaisen, a lu lâk tum a lo thawk chhuak te vek an ni.

Chuvangin a chenna hmunah chuan mihring lung a chang tawh tam tak an awm tuarh reng a.

An awmna Serifos- khaw Lal Polydectes-a'n a nu Danae- neih luih a tum vânga  phuba lâkna leh Lal Polydectes-a'n a thilpek 'Medusa'- lû a duh avângin mi te ṭih leh hlauh êm êm Sakawlh râpthlak Medusa- bei tur chuan Perseus-a chu a kal chhuak ve ta a.

 Greek khaw pakhat Argos Lal, Acrisius-a chuan fapa a nei thei tlat lova, fanu Danae-i chauh chu a nei a. A mangang chuan puithiam rawn in fapa a dîl ta a, mahse chu puithiam chuan tupa a neih tûr thu leh a tupa ngei chuan a la thah tûr thu a lo hrilh ta a.

Chumi thu a hriat chuan Lal Acrisius-a mangang chuan a fanu hmelțha êm êm mai Danae-i chu in sâng takah a tawmbo tîr ta char char mai a. A thih ṭhak thleng tawmbo tîr chu a tum ber a. 

Mahse Danae- chu Greek Pathian te zînga chungnung ber Zeus-a chuan a rûkin a lo tlawh țhîn a, rei lo te ah Danae-i chuan Zeus-a fa chu a pai ta a. Zeus-a leh Danae-i fa lo piang chu Perseus tiin an phuah a. Pathian leh mihring thlah(demi-god)a nih avâng chuan Lal Acrisius-a chuan a hlau lehzual a, a fanu leh a tupa chu thingrem lian tak chhûngah thun in tuipuiah a thlâk ta daih mai a. 

Perseus-a leh a nu Danae-i chu rei fe tuipuia an bo hnu chuan sangha mantu Dictys-an alo chhar a, thliarkar pakhat Serifos khua ah a hruai a, He Serifos Lal hi Dictys-a unaupa a ni.

Chutah chuan rethei takin an khawsa ve țan a. Perseus-a a tlangval ve meuh pawhin, a nu Danae-i hmelțhatna chu dang chuang lo reng reng. 

An awmna Serifos khaw lal Polydectes-a chuan Danae-i chu hmelṭha a tih êm avângin a duh lo chung chu nupuia neih luih a tum ta hial a. Mahsela a fapa Perseus-a, tlangval chak leh huaisen, mi te'n a an fak hial khawp chu a hlau tlat thung.

Perseus-a damchhûng chuan a nu chu a neih sak thei ngai dawn lo tih pawh a hria a.

Chutih lai chuan Serifos- khaw Lal tlawhtu, Libya, Ethopia leh ram hrang hrang aṭanga lo kal bâk ah a pasalṭha te chuan Lal thilpek ropui tak tak an pe ruih ruih a.

Mahsela Perseus-a chuan engmah pêk ve tûr a nei lo a, chuvang chuan a inthlahrung in nuam lo a ti êm êm a.

Chutihlai chuan Lal chuan a fin khek rek chhuahin thilpêkah Medusa-lû a ngiat ta tlat a, an Lal rilru puthmang chu Perseus-a chuan a hre ve kar a, eng anga hlauhawm leh harsa pawh nisela, a nu chhan nan Medusa- lû chu lak ngei a tum ta.

Mahsela chu tlangval reithei tak chuan ralthuam engmah neih a nei lo, a nu chu  Argos Lal fanu tih leh a pa chu Pathian te zînga chungnung ber Zeus- a ni tih erawh a theihnghilh lo.

Chuvang chuan amah ṭanpui tûrin a pa chu a ngên a, a hnenah a ṭawngṭai ve ta a.

A pa Zeus- chuan Finna Pathiannu Athena leh Khualzinte vêngtu Pathian Hermes- te chu Perseus- ṭanpui tûrin a ti a.

Hermes chuan Perseus-a chu pheikhawk thlawk thei(winged sandals) a lo pe a. 

Athena- chuan ip te ala mamawh tûr chu Garden Of Hesperides-ah a awm thu hrilh in, a pheikhawk thlâwk thei chu a bur tîr a, Hermes nen chuan chumi lam pan chuan khawthlang kawlkil tâwp ah chuan an hruai ta a.

Garden Of Hesperides hi Pathian Zeus-a leh Pathiannu Hera- te inneih lawmpui nan a an pî Pathiannu Ghea-i'na Hera-i a pêk a ni a, huan lai takah chuan an inneih chhinchhiahna Apple thingkûng, rangkachaka rah thei a awm a, chu Apple chu Dragon hlauhawm tak Ladon-in a vêng reng a.

Chu huan chu Nymph(lasi) pathum Hesperides- unau thum te chenna a ni. Hêng Nymph pathum te hi Zan Pathiannu Nyx leh Thim Pathian Erebus- te fa an ni a, Aegle, Erytheia leh Hespera- te an ni.

An ni chuan ipte ṭha tak mai 'kibisis'-  an lo pe a, Tin, Stygian Nymph te'n a hmanraw mamawh dang chu an kawl tih an hrilh bawk a.

Lawm takin Perseus-a chu chulai huan nuam tak aṭang chuan a kír leh a, Greek ho lui thianghlim, mitthi khua(Tartarus) panna lui lian Styx lui vêng tu Nymph te hmu tûr chuan a kal leh ta a.

He Styx lui hi lui thianghlim a ni a, thiltihtheihna nasa tak a nei a, Achilles-a pawh kha a nu Thetis-i'n Pathian te anga a thih ve theih loh nan Styx lui ah hian a chiah a, mahsela a vawnna lai, a ke artui a chiah tel ve loh avângin a ke artui chauh a famkim ve lo a, a ke artui a tih fuh chauh in a thi thei anih kha.

He Styx luikamah hian lawngpu Charon-a a awm a, mitthi thlarau te chu a lawng hmang in mitthi khua ah a lo hruai kai ṭhîn a ni.

Mitthi khua(Tartarus) aṭanga rawn luangchhuak a ni a, Styx lui hian pêng pali anei a, Acheron, Cocytus, Lethe, Phlegethon lui te hi an ni a, Tartarus-a hnâr nei vek an ni.

Stygian Nymph te hi sângthum lai an ni a, Tuipui Pathian Oceanus leh Naiad Nymph Tethys-i te fa an ni.

Hêng Stygian Nymph- hmelṭha tak tak te hian Perseus-a thil tum an hriat chuan a hmanraw mamawh tur te chu an lo pe ta a. Chung te chu Zeus-a lunghlu ngunhnam (Sword of Zeus) leh Thihna Pathian Hades-a luhkhum, intihbo theihna (Helm of Hades) te an lo pe a, Tin, Medusa chênna chu Grey Sister te'n an hriat thu an hrilh bawk a.

Zawlnei Pitar Pathum Graeae-(Grey Sister) te hi hmel rapthlak tak tak, mit pakhat inṭawm an ni a, an mit inṭawm hi an in ken chhâwk ṭhîn.

Tuipui Pathian Phorcys leh tuipui Pathiannu  Ceto- te fâ an ni a, Deino (Dino), Enyo leh Pemphredo (Pephredo) te an ni a, zawlnei, thil hrilhlawk thei an ni bawk.

Cisthene, Island Of Sarpedon- a pûk râpthlak tak a awm an ni a, an awmna hmun pawh kal a harsa in chetsual palh hlauhawm tak a ni.

Graeae- te hian Perseus-a thil tum an hriat chuan engmah an hrilh duh lova, naupang, dawihzep leh mi chak lo tak ini tiin ṭawngkam chhe tak tak in an lo ankhum a, Medusa- pawh a tihhlum theih loh tûr thu leh amah zawk a thih dawn thu te thlengin an lo hrilh a.

Mahsela Perseus-a chuan bum in an mit inṭawm chu a lâk sak a, Medusa-awmna an hrilh hma loh chuan pêk a tum loh thu sawiin nasa takin a vau bawk a.

A tâwp ah chuan Medusa chenna chu An awmna Sarpedon thliarkar a Cisthene- hmunah anih thu an hrilh a, mahsela kal miah lo tûrin leh akal anih chuan a thih tûr thu an hrilh bawk a.

Mahsela mi huaisen Perseus-a chuan an thusawi chu engah mah angai lo, an mit inṭawm chu pe kîr in a kalsan leh ta a.

Medusa chenna hmun chu hmuh har tak, hmun hlauhawm tak mai a ni a.

A zinkawng thui leh harsa tak mai chu hlenchhuah ngei a duh a, a ralthuam dawn te pawh chu a in bel a, Pathiannu Athena chuan a  awmphaw(Shield), darthlalang ang mai a hlimthla lang thei a pe bawk a.

Tichuan Sa hlauhawm Medusa- awmna hmun ah chuan a kal ta a.

Medusa-i awmna a thlen chuan a hmaa pasalțha huaisen te ruang, lung a chang tawh te chu an lo awm țeuh tawh mai a, Perseus-a pawh a zâm ve khawp mai. Medusa-i hmel awmdan lah tumahin an sawi thei si lo, a hmu tawh apiang lungah an chang zêl si a.

A hmazawn a thil awm pawh hre lo chuan hmalam a pan ta zêl a, hmaichhana Medusa-i hmel hmuh chu a țha dawn lovin a hria a. A phaw kenlai ațanga Medusa-i thlâ lo lang ațang chuan a tinzawn thei ta a, rei fe a veh hnai hnuah chuan harsa takin Medusa-i lu chu a chhawk bung ta hmawk mai a ni.

Sawi dan dangah chuan, Perseus a hian Hades a lukhum khumin a in ti bo a, Medusa- i bula awm Gorgon pahnih thi ve thei lo Sthenno leh Euryale-i te hmuh lohvin, Medusa-i muhil lai chu a nghawngah a sat bung a ni.

Medusa-i nghawng aṭanga thisen lo chhuak aṭang chuan milian Chrysaor-pasalțha huaisen tak mai, rangkachak ngunhnam nei leh Sakawr thla nei thi thei lo Pegasus- te an lo piang a.

Medusa-i lubung chu a ip 'kibisis' ah khungin a thlawh haw pui ta vang vang a, Greek ho thawnthu ah chuan Hetia a thlawh haw na lama Sahara Desert chung zawn a thlen hian Medusa-i thisen chu a far a, chu thisen ațang chuan thlaler rul tur nei chi hrang hrang an piang chhuak zut zut reng bawk a., Tin Tuna Tuipui sen kan tih pawh khu Medusa i lu ațanga thisen far ațangin a sen ta vek mai anti bawk.

Hetia a thlawh haw na lamah hian Atlas-a tlâng, sâng tak mai a thleng hlawl a, Atlas a chu milian a ni a, a dâr in vân a lo do kâng a, Olympian leh Titan ho indo zawh hnu ah Zeus-an Lei leh Van a in sîk loh nan Van chu chatuan a do kâng tûrin a lo hrem tawh a ni.

Atlas-a chuan mi huaisen tak mai Perseus, Medusa that tu chu lo bia in, hrehawm taka Van do kân reng ai chuan lungah chantir tûrin a lo ngên a.

Perseus-a chuan a ip aṭang chuan Medusa lu chu a phawrh a, Atlas-a chuan a lo en a, a en rual chuan lungah a chang ta nghal a.

A khabe hmul leh sam chu ramngaw zau takah an chang a, a koki, ban leh kut te chu lungpui lian tak takah changin a lu chu tlang sang takah a chang ta a.

Atlas tlâng aṭanga a chhuah leh hnu chuan Tuipui lai a lungpui chunga nula hmelțha tak mai an lo phuar beh chu a chhanchhuak bawk a, he nula hi Andromeda-i a ni a, Ethopia Lal Cepheus leh Cassiopeia-i te fanu a ni. 

Andromeda-i hi a hmelțhat êm avângin a nu Cassiopeia-i chuan Tui Pathiannu te( tuipui Lasi, Nymph) ai pawh in ka fanu hi a hmelțha zâwk tiin a uanpui a, chu chu Tuipui Pathian Poseidon-an alo hriat chuan a thinrim hle a, an fanu chu Tuipui sa hlauhawm Cetus chaw a tân a an pêk loh chuan an khua chu tihchhiat vek ah a vau a, tichuan hreh tak chungin Cetus chaw tûr chuan an pe a.

Mahse Perseus-a chuan Cetus lak ațang chuan chhan in, Andromeda ei tuma Cetus a lo kal veleh a ip a Medusa lu bung chu phawrh in a lo hmuh a, Medusa hmel a hmuh chuan Tuipui sa hlauhawm Cetus chu lungah a chang ta vek a.

Andromeda-i a chhanchhuah a, nupui a neih a tum chuan a hma a Andromeda nen a lo inhual tawh Phineus-a, Andromeda-i pa unau Egypt Lal Belus-a fapa leh Andromeda-i pa Cepheus- te ho chuan tibuaiin inneih an phal lo a, Mahse Perseus-a chuan bumin, Medusa-i lubung chu a hmuhtir a, lungah an vai chuan an chang ve leh ta vek a.

Tichuan Andromeda i chu hruai ve zelin an khua an thleng ta a, mahse Serifos thliarkar an thlen chuan a nu Danae-i chu an lal Polydectes-a chuan neih luih a lo tum mek a, Perseus-a thinrim chuan Medusa-i lubung chu lek chhuakin Polydectes-a leh a ṭhuihruai te hmaah tak chuan a lek kâng ta a, Medusa-i hmel hmu piang chu lungah an chang ta vek mai a ni.

An khua Serifos-ah chuan Polydectes-a unaupa Dictys-a chu Lal ah a ṭang ta a, anni Perseus leh Andromeda leh a nu Danae- te chu Argos- lamah an kîr leh ta a.

Perseus-a pu Argos Lal Acrisius- chuan a tupa chanchin ropui tak tak leh a huaisen zia te a lo hriat chuan Argos chhuahsanin a ṭhianpa Larissa Lal Teutemis-a hnenah a tlanchhia a.

Mahsela Perseus-a te chu Argos an thlen hma chuan Larissa ah chuan an chawl a, chutih lai chuan mitthi pual a infiamna an lo nei mêk a.

Perseus-a pawh chu chu infiamna ah chuan tel ve in, lung in den siak/ fei inkhawh siak- ah a tel ve a, mahsela tihpalh thil ah a pu Acrisius-a chu a tihlum hlauh mai.

Pathian te lo ruatlawk ang ngeiin Lal Acrisius-a chungah chuan a thleng ta ngei a, a tupa lakah a boral ta nge nge a ni.

Tichuan Perseus-a chu Argos ah chuan Lal a lo ni ta a, Medusa-i lubung chu ram ropui tak Mycenae din nan a hmang tangkai ta hle a, rei fê indonava a hman hnu chuan Athena-i hnenah chuan a pe kir leh ta a ni.

Andromeda nen hian inneiin hlim takin a pu lalram Argos ah ro an rel a, an boral hnu in Pathiante chuan malsawmin, an thlarau chu arsi ah an chantîr a, (Andromeda leh Perseus constellation chu zanah van lam thlîr in arsi bâwr lian tak an ni tih a hmuh theih.)

Perseus leh Andromeda te hian fapa pasarih, Perses, Heleus, Alchaeus, Sthenelus, Electryon, Mestor, Cynurus leh fanu pahnih Autochthe leh Sa hlauhawm Gorgon(medusa) a thah tâk hming chawi a an phuah Gorgophone-te an nei a,  Gorgonphone-i hi hun lo kal leh zel a Spartan Lalnu Hmelțha Helen-i nuhrawn kha a ni.

Tin, Perses- hi Persian lamah kal in Achaemenid Empire a din a, a thlah kal zel aṭangin Ahasuer-a, Lalnu Esther-i pasal a lo piang a.

Tin, Perseus-a fapa Alcaeus-chuan fapa Amphitryon a nei a, a unaupa Electryon chuan fanu Alcmene a nei bawk a.

Amphitryon leh Alcmene i te chu innei lehin fapa Mi chak leh huaisen tak mai Hercules an nei leh ta a ni.

Mahsela Hercules hi Amphitryon-a fapa tak a ni lova, a nupui Alcmene leh Zeus-a fapa a ni.