MEDUSA | The Curse Of Athena

Greek ho thawnthu ah hian Pasalṭha te aiin an Pathian te chanchin hi a lâr daih zâwk a, An ramsa hlauhawm leh thlarau sual lam te chanchin phei chu a thawnthu a sawi tûr meuh chuan a tam lo a, mahsela sawi sên loh sa hlauhawm an nei lawi si.

Hêng ramsa hlauhawm leh thlarau sual te, ramsa chi hran in thlahpawlh rapthlak tak te, ramsa leh mihring inthlahpawlh hlauhawm tak tak te chanchin zîngah chuan Medusa- chanchin hi a lâr ber hial awm e.

Medusa-i hmel ringawt hi chu hmu lo leh
hre lo kan tam vak lovang a, a thawnthu
chiang erawh kan hriat lutuk ka ring lo.

Medusa-i hmel hmu reng reng chu chawp
leh chilh lungah an chang nghal țhîn a, a
hmel rapthlak leh hlauhawm lutuk vang
niin an sawi bawk țhîn.

Ziaktu tam ber chuan Medusa-i hi
ramhuai sual leh rapthlak tak angin an
tarlang fo țhîn a, mahse duh vâng reng
pawh ni lova anchhedawng, mihring zînga
awm tlâk lo khawp a hremna tuar a ni
ve tlat a. Medusa tih awmzia tak phei chu
Venghimtu (Guardian,Protectress) tihna
daih a ni.

A hlauhawm zia leh mihring tam tak
lunga chantîr tu a nihdan te chuan sawi a
hlawh êm êm a, mahse mihring anchhedawng leh khawngaihthlak tak a
ni tih erawh sawilan a ni ngai meuh lo.

A chanchin bîk kan sawi hma in a chanchin rapthlak leh ngaihnawm lo chhuahna chhan ber Greek ho Finna Pathiannu Athena- chanchin tlêm a zâwng han sawi phawt ila.

Pathiannu Athena-i hi Greek ho Pathian te zíngah chuan chanchin ngah ber a ni hial awm e, tunlai hun thlenga hriatreng hlawh a ni hi Finna Pathiannu anih vâng te pawh a ni mahna le.

Athena- hi Greek ho Pathian ropui ber Zeus leh a unaunu hriatrengna/ngaihtuahna/damdawi lam Pathiannu Metis-i te fanu a ni a.

Mycenaean ho hunlai khân Athens khawpui hi a din a, a tîrah chuan Athena Polias (Athena, Guardian of the city) tih a ni ṭhin a, mahsela a hnu ah Athens- tiin thlâk leh a ni.

He Athens- khawpui hian Athena chhinchhiahna (symbol) chhimbuk chu an khawpui chhinchhiah nan an hmang bawk.

Amah biakna temple lâr tak Parthenon
pawh hi Athens-khua a awm a ni.
Parthénos/Parthénoi : hmeichhe
thianghlim pasal nei lo tihna ani a, Naòs :
Temple, tihna a ni bawk a, hemi thu
pahnih la kawp hian Pathiannu thianghlim
pasal nei lo Athena-i tân hian Parthenon
an ti a ni, a awmzia chu Hmeichhe
thianghlim temple tihna anih ber
chu.

Tin, July thla hian Pathiannu Athena-i piancham Athens Festival an tih tâk, Panathenea- chu ropui takin an lawm ṭhin bawk a ni.

Pathiannu Athena- hi Troy indona a Achilles-a venghimtu leh Greek sipai ho ṭanpuitu a ni a, Troy Lal fapa Hector leh Achilles- insual laia Hector-a ṭanpuitu Pathian Ares leh Apollo te, Aphrodite leh Artemis-i te lo dangtu kha a ni.

Tin, Troy indo zawh a Ithaca Lal Odysseus-a inlam pan a zinkawng thui tak zawh kha a venghim tlat bawk anih kha.

Medusa- hi Lei Pathiannu Gaia leh Tuipui
zawng zawng Pathian Oceanus te fa Lui
Pathian Phorcy-a leh Ceto(keto)-i te fa a ni
a, a unaunu te chu, Ladon, The Grey Sister, Thoosa, Syclla, Charybdis,
Sthenno, leh Euryale-i te an ni.

Medusa-i te unau hi 'Tuipui Huai' kan tih
ang deuh vek kha an ni a. an vai hian
thilnung rapthlak tak vek an ni. Mahsela a unau te nen hian Pa hmun nu hrang ang chi vek kha an ni thung.

Graeae/ Grey Sister te hi dawithiam pitar
pathum mit pakhat nei Dino,Enyo,
Pephredo-i te kha an ni.

Charybdis-i hi Messina tuipui rêk lai a lungpui hnuaiah a chêng ṭhin a, mahsela Pathian Zeus-a thinrim in tuipui sa hlauhawm ah chantír in, a hnu ah phei chuan livir ah a chantir hial anih kha.
Lawng tamtak a chhung ah a hip lut țhîn a,
Nikhat ah tui vawithum a phuhchhak a,
vawithum bawk a hîp lut leh țhîn.

Scylla-i pawh hi Charybdis-i bul lawk a
awm a ni a, an pahnih hian Ithaca Lal
Odysseus-a te Troy khaw rûn haw lam
an lo tibuai anih kha. Syclla-i hian Ke
rapthlak tak tak sawm leh pahnih anei a,
Nghâwng sei pui pui paruk lai anei bawk,
a ngháwng hmawr tinah chuan lu
rapthlak tak tak paruk anei țheuh a, a lu
zawng zawng chuan hâ tlar thum anei
țheuh bawk.

Ladon-i erawh chu Dragon rapthlak tak
a ni a, Africa a Garden Of Hesperides- ah Zeus-a leh Hera-i te inneih
chhinchhiahna Rangkachak Apple kûng a
vêng țhin.

Thoosa-i pawh hi Tuipui Lasi kan tih ang
deuh a ni a, Tuipui Pathian Poseidon-a
nen a an fa chu Cyclop Polyphemus-a
( milian mit pakhat nei) Odysseus- an a
mit atih del sak tâk kha a ni.)

Sthenno leh Euryale-i te hi rûl ang deuh,
sa hlauhawm tak an ni a, an pahnih hian an thi thei lo thung.

Medusa-i hi Gorgon an ti leh țhîn a, sa
hlauhawm anih hnu hian Gorgon anga
sawi ni mahse, a ni lo atih theih bawk.
a chhan chu Pathiannu Athena- in a
anchhia alawh hnu khan Cisthene, Aeolis- bul lawk Island of Sarpedon a chêng, ni hmu ve
ngai lo Thihna thlarau rapthlak Gorgon
unau te bula chêng ve turin a awm ta
chauh zawk a ni. He Gordon te hi Sthenno leh Euryale-i te an ni.

Tin, Lamia-i, a kawng achin hnuailam rûl, a chunglam mihring
pangngai, hmeichhe hmelțha tak nen
hian kan sawipawlh emaw ni le aw atih
theih bawk, Lamia-i hi Libya Lalnu a ni a,
Pathian ropui ber Zeus- nen hian fa an nei
a, Zeus-a hmei ani bawk. Zeus-a nupui
inneihna Pathiannu Hera-i hian apasal
hmei Lamia-i hi a thîk hle a, a fa te zawng
zawng a rûkbosak a, amah pawh chu
sakawlh Rûl rapthlak takah a chantîr a, a
fa te hi a ngaih êm avângin mihring
naupang ho a rubo ta țhîn a ni.

Delphyne-i a kawng a chin hnuailam rûl, a sam rûl ni bawk nen te, Echidna-i a kawng achin hnuailam rûl, hmel rapthlak tak nen te pawh hian sawi pawlh a ni ṭhîn bawk.

Greek thawnthu ah chuan Medusa hi
Greece ram nula hmelțha êm êm mai a ni
a. Mi tam takin an ngaizawng luih luih
reng a, Lal tam tak te pawhin nupui a tân
an duh ve êm êm ṭhîn. Mahse Medusa-i
chuan an Greek Pathiannu Athena(Finna
Pathiannu: Goddess of Wisdom) tâna
damchhunga rawngbawl chu a thlang ta
zawk a. Pathiannu Athena- tana inserh
hrang tur chuan an Pathiannu temple
Parthenon an tihah chuan a awm ve țan
ta a.

Tichuan Parthenon temple ah chuan hun
rei tak chu Athena-i tan chuan rawng a
bawl a, nitin rinawm takin an Pathiannu
hmaah chuan a inthawi țhîn a ni.

Mahse a hmelțhat leh piannalh êm avâng
chuan Tuipui Pathian Poseidon-a meuh
pawhin a lo ngaizawng ve tlat mai.
Pathiannu Athena-i hian Medusa hi a hmelțhat êm avângin a îtsîk tlat a, a chhiahhlawh, a tân a rinawm leh a puithiam ni mahsela a îtsîk tlat avângin a chungah rilru ṭha tak a pu thei tlat lo.

Athena-i chuan a pa Zeus-a û Poseidon- chuan Medusa-i chu a hmelṭha a ti tih a hriat avângin a intiamrual pui a, chûng thu erawh chu pathian dangte chuan an hre lo.

Nikhat chu Temple a mipui awm loh hun, mi reh lai a Medusa-i inthawi tûr a a kal chu Temple chhûngah lo biru sa reng Poseidon chuan lo man bet in, a inthawi țhinna hmun Athena-i lim hmaah tak chuan a pawngsual ta a. Medusa-i chu hreawmna tinrengin a khat a, Greek dâna pasal nei thei a ni tawh lova,
Parthenon temple-a rawng bawl tlak a ni
tawh bawk si lo.

Chu mai bakah rinawm
taka rawng a bawl sak țhin Athena-i ngei
pawh chuan Medusa-i chu thiamloh a
chantir leh ta zawk tlat mai si.
Medusa-i chungah chuan anchhia a lawh
ta a, nula hmelțha êm êm Medusa-i chu
hmel rapthlak tawpkhawkah a chantir a,
a sam rangkachak rawng sei leh mawi
êm êm mai te chu rûl tûr neiah a chantir
ta bawk a ni.

Chu mai chu duhtawk lovin
Greek ho thihna thlarau Gorgon an tih te
zînga awm ve tûr in Island Of Sarpedon, Ni lan ve lohna hmun a pûk hrehawm takah a awm tír ta daih a.

Nula thianghlim, hmelțha
êm êm leh an Pathian rawngbawl a inserh
hrang țhîn chu a thiamloh ni miah lovin
ramhuai anchhedawng mai ah a lo chang
ta.

A hmelṭhat avânga ngaizawngtu an tam ang bawkin, anchhedawng anih hnu ah pawh a lu ringawt pawhin a lung a chantir theihna
a neih avângin pasalțha huaisen tam
takin a lu lâk tumin an zawng reng a.

Hrehawm leh khawhar takin a hun a hmang ve zel a, amah hmuh tum ve te pawh pasalṭha hrâk khawkheng, a lu lâk tum te chauh an ni, mahsela tumahin a lu an la thei lova, a chenna hmunah chuan mihring lung a chang an awm nuaih reng a.

Mahsela kum tam tak hnu ah Argos Lal Acrisius a fanu Danae-i leh Pathian Zeus-a te fapa mi huaisen Perseus-a chuan Pathian te puihna in Medusa-i chu a rawn tihlum ta a.

Medusa lu chu a tan sak a ni. Perseus-an a lu a tan sak na thisen far aṭang chuan michak leh milian Chrysaor-a leh Sakawr thla nei thithei lo Pegasus- te an lo piang a.

Chrysaor hi pasalṭha lâr tak, rangkachak ngunhnam nei a ni a, Tuipui Pathian Oceanus leh Tethys-i te fanu Tuipui lasi Callirrhoe- nen an in nei a ni.

Perseus a chu Sakawr thla nei Pegasus- chungah chuangin a thlawk haw a, chutia a thlawh lai chuan a hnuaia tuipui zau tak ah chuan Medusa-i ngawng aṭanga thisen far chu far in, chu tuipui chu a lo sen ta vek a, chu chu Red Sea (tuipui sen) kan tih tak hi a ni.

Tin, Sahara leh Lybia thlaler a Medusa-i thisen far aṭang chuan thlaler rûl (serpent) rapthlak tak tak an lo pian phah bawk.

Tichuan Medusa-i chu a lo thi ta a, misual rapthlak tak (villain) nge ni a, mihring a zawng a mihring khawngaihthlak ber mai ni a i hriat ve le.?