From Epic Greek Mythology | HADES & PERSEPHONE

Greek thawnthu ah hian an Pasalṭha te aiin an Pathian te thawnthu hi a lâr in an thawnthu khaikhawm tu ber pawh a ni awm e.

A thawnthu hrim hrim ah hian mî ti phûr leh tha tho chi te, mî ti lungleng thei tak te leh han chhiar pawh a hmelṭha ti a ngaihzawn mao theih hial khawp te a thawnthu ṭha leh inrem dik hi a tam in, a zawng zawng hi chutiang chu an ni vek mai âwm e tih theih a ni a, Greek ho te hi hnam fing tak an nih avângin tûn hun thleng pawh hian an thawnthu hi khawvel ah a lâr ber hial awm e.

Tun a kan thawnthu sawichhawn tûr pawh hi a ngaihnawm mai bâkah thil engkim, thil ni thei ve tho te inphûm rûkna anih avângin an Pasalṭha te thawnthu tam tak ai pawh a lâr zâwk a ni hial awm e.

Titan Cronus leh Rhea-i te fapa, Zeus leh Demeter-i fa neihchhun Persephone, Hremhmun Lalpa Hades-a'n a rûk bo dân chanchin.

Hades hi Titan Cronus leh Rhea-i fa te zîng a upa ber a ni a, a nau te chu Tuipui Pathian Poseidon, Khawvel leh van zawng zawng Pathian Zeus, Inneihna Pathiannu Hera, Sik leh sa Pathiannu Demeter leh pasal nei lo awmchhun mihring te thinlung vêngtu leh chhungkaw Pathiannu Hestia- te an ni a, an unau hi Olympus Pathian te chu an ni.

An Pa Titan Cronus leh a unau te nen indo vin hnehna an chang a, tichuan an unau vin khawvel ah Lalna an chang a, thuneihna pawh an in sem ta vek a ni.

Mi huaisen Perseus-an Medusa tihhlum nan a a hman intihbo theihna lukhum kha Hades-a ta hi a ni a, Perseus-a a hman tír anih kha.

Hades- hi Lei piahlam khawvel, hremhmun Lalpa a ni a, hremhmun Gate vêngtu ui lu pathum nei Cerberus(Hellhound) anei bawk a.

Tin, Mitthi khua Tartarus hi mi chumchhia leh tar ho te awmna tûr a siam a ni a, Pasalṭha leh Lal te, mi hmingthang te thlarau erawh chu hmun nuam tak Elysian Field- ah an awm thung.

Pathian ropui ber Zeus leh a unaunu, Sik leh sa bâkah lei ṭhatna, thlai, buh leh bâl te enkawltu Demeter-i te chuan fanu hmelṭha tak mai Persephone an nei a.

Mi hlim thei tak leh tleirawl hmelṭha Persephone- chuan Pathian te chenna Mount Olympus mai ni lo, lei a hmun nuam leh pangpar hmun te, lui tui thianghlim tak tak te chu nitin len vah nan a hmang ṭhîn a.

Naiad leh Neired Nymph (tlangram leh tui lasi) hmelṭha tak tak te nen nileng a infiamin an lêng ho ṭhîn a, a nu Demeter chuan a rawn tlawh zauh zauh ṭhîn bawk a.

Chutianga nitin mai Lasi rual ho infiam chu Leihnuai Hremhmun Lalpa Hades- chuan lo hmu ṭhîn in, a unaunu fanu Persephone- chu hmelṭha a tiin a ngaizawng ta êm êm mai a, nupui a neih hial a duh nâ in Persephone- chuan a duh a ring si lo a.

Chuvang chuan a unaupa Zeus- hmu tûrin Mount Olympus- ah a kal ta vang vang a.

Zeus-a hnenah chuan Persephone- chu nupuia neih a duh thu a hrilh a, Pathian fing tak Zeus-chuan Persephone-i'n a Hades-a neih chuan lei hnuai khawvel ah an chêng dawn tih a hria a, chu chu Demeter-i chuan a phal ngai loh tûr thu leh amah Persephone- pawh chuan a duh dawn loh thu pawh a hmu tlang vek a, Pathian dangte pawhin an remtih dawn loh tûr thlengin.

Mahsela Hades- chuan, amah Zeus- leh Pathian dangte pawhin Pathian tenau leh Nymph te, mihring te hial pawh an duh duh nupui pasal ah neiin fa tam tak an nei ve tho tiin a kar lêt ve tlat a.

Chu thu chu Zeus-pawh chuan dik a tiin a unaupa pawh a khawngaih ve tho a, mahsela Pathian dangte dem nih chu a duh bîk si lo.

Rei tak an sawi dun hnu in fel takin a unaupa chu rem a ruat pui a.

Zeus- chuan ama hming lan loh nan Hades- chuan Persephone chu ru bo in, Underworld ah kalpui nghal se tih chu.

Tichuan an remruat dun ang chuan Hades chuan pangpar hmun a Persephone- lêng chu rûk bo ngei  tum in thang a kam ta a.

A tih dan ngai bawk in Persephone chu a ṭhian Naiad Nymph Cyane leh Nymph dang te nen Vale Of Nysa, hmun nuam tak mai ah chuan infiam tûrin an kal leh a.

Chutianga hlim taka an infiam lai chuan Persephone chuan an awmna bul lawk a pangpar nalh danglam tak mai Narcissus- pâr chu mawi a tiin a rimtui tak mai chu a hnîm veng veng a.

Narcissus- hi a tîrah chuan pangpar ni lovin Dil Pathian Cephissus leh Nymph(lasi) Liriope- te fâpa sapel thiam tak mai a ni a.

Nikhat chu ngaw hnuaia a kal laiin Mount Cithaeron a chêng Echo- leh Oread(tlangram lasi) te chuan hmu in Echo- chuan hmelṭha a tiin a ngaizawng ta êm êm mai a, a kalna apiangah chuan a zui ru ta a.

Zui ru tu a nei tih Narcissus- chuan a hriat avângin ring tak hian tunge anih a, ahma a rawn in lan tûr a a auh tâkah chuan Echo- chu Narcissus- hma ah chuan rawn in lan in a rawn  pan hnai a, kuah a tum a, Narcissus- chu a tawlh sawn a, Echo- chu kalbo nghal tûrin a ti a. 

Echo- chu rilru na tak a kalsawn in khawhar takin tuipui kam leh tlang velah te a vâk vêl a.

Chu thil thleng chu Phuba la ṭhîn Pathiannu Nemesis-i'n a lo hriat chuan Narcissus- chu hrem ngei a tum ta a.

Nikhat chu nipui lai in Narcissus-a ram vak chu a tui a hal huam huam a, Sih tui fîm tak mai chu in tum in a pan a.

Pathiannu Nemesis chuan phuba ala ta.

Tui intum a a kûn chuan tui a ama thlâ chu hmu in hmelṭha a ti ta êm êm a, a ngaizawng in a kalsan phal lo hial a.

Chutih lai chuan a taksa chhûng lam aṭangin mei nasa tak lo chhuakin a kâng hlum ta a, a vâp aṭang chuan pangpar mawi tak, rangkachak rawng leh a vâr hi ṭiak in a rawn pâr ta a. Chu pangpar chu Narcissus tiin an sawi ta a ni.

Persephone- chuan chutiang pangpar chu ala hmuh ngai loh avângin a rimtui hnim mai pawh duhtawk lovin a thliak ta a.

Chutia pangpar a thliah veleh chuan pangpar awmna lei chu nasa takin arawn khi tuarh a, chu lei khi nasa tak aṭang chuan Hades- chu sakawr tawlailir dum kalh chungin a rawn tlân chhuak a, Persephone- chu man in Sakawr tawlailir ah chuan a hnûk lût a, Persephone chu hlau in a ṭe tuarh tuarh a, mahsela a talchhuak thei chuang lo.

Lei khi kâr ah chuan Sakawr tawlailir chu a tlân lût lehnghal a, lei khi pawh chu a ping zui nghal a.

A ṭhian Nymph dangte chuan hmun dangah an awm avângin chu thil thleng chu an hre ve lo a,  Nymph Cryane nen chauh a an awm dun lai anih avângin Cryane- chuan Hades chu lo beiin, a ṭhiannu chu chhanchhuah a tum ve nasa hle nâ in, Olympus Pathian meuh chu chutiang Nymph mai mai tân a hneh rual a ni lo.

A ṭhiannu a chhan theih loh avânga beidawng leh rilru na chu muangchang a awmhmun ah chuan a tui ral ta a, a hnu ah chuan lui lian tak ah changin River Cryane- an lo ti ta a ni.

Tlailamah chuan Demeter chu a fanu hmu tûrin a rawn kal a, mahsela a fanu chu a hmu lo a, a ṭhian Nymph te pawh chu hmuh tûr an awm lo, a zawng vel chiam a.

A fanu lên vahna hmunah chuan lui lian tak River Cryane- a hmu ta thung a, chu luikam ah chuan Nymph pakhat lungngaih hmel tak a awm hi a hmu a, a fanu awmna a zawh chuan chu Nymph- chuan a bo thu thu leh a awmna an hriat loh thu a lo hrilh a.

Demeter-i'n chu thu a hriat chuan a fanu vênghim zo lo ah a puh a, chu Nymph bâkah Nereid Nymph (tui lasi)ho zawng zawng chu anchhia lawhin, an taksa nalh tak ah te phuhlip an lo awm a, Siren-ah an lo chang ta vek a.

Siren ho hi zaithiam tak an ni a, an zai ri hria apiangte chu an â in engkim an theihnghilh vek ṭhîn a, Ithaca Lal Odysseus leh a ṭhuihruai te pawhin Troy indona zawh hnu a an haw lamin heng Siren ho hi an tâwk anih kha.

Demeter chuan a fanu chu au in a zawng chiam a, a kalna ṭhin zawng zawnga a zawn hnu pawh a a hmuh loh avâng chuan a lungngai ta êm êm a. 

Pitar angin a inchei a, khawvel hêl in, hmun hrang hrang a vâk kualin a zawng chhunzawm leh ta a, a fanu chauh a ngaihtuah avângin lei chungah engmah a thawk thei ta lo.

Lei chung chungah eng thlai mah a ṭo thei lo a, ruah pawh a sûr loh avângin hnim hring te pawh an ro zo a, tui in tûr nei lovin mihring leh nungcha tam tak an thi a, tui hna a kang chat a, lei a khawro vin hmun ṭhenkhat lah a vawt êm êm mai bawk a,  lei chu nunna nei tân dam khawchhuah theihna hmun rêng a ni lo.

Chutih lai chuan Pathian te hian engkim an hre vek nge hre vek lo tih fiah tumin Lydia Lal rilru chhe tak Tantalus-a chuan a fapa Pelops a chu a tihlum a, a sa chu ei a tân a siam in Pathian te tân ruai a ṭheh a. Ruaiṭheh tûr a an ṭhut lai chuan Pathiante chuan thil awmzia chu an hre vek a, mahsela a fanu bo zawng a rilru hah tak mai, thil dang ngaihtuah thei lo Demeter- chuan Pelops-a fapa dâr lehlam chu a lo ei zo hman a.

Chu thil thleng chuan Pathian te a ti thinur ngei mai, Zeus-a chuan mahni fa that tu leh Pathian te bum tum Tantalus-a chu chawplehchilh a tihlum nghal in mitthi khuaah a thawn liam nghal a.

Zeus- chuan hremna pe in mitthi khua ah Tantalus-a chu a nghawng thleng a tui tlingin a phuar hlawm a, a nghawng thlengin tui tling mahse intum a a kûn veleh tui chu a kiam leh vek zel a, a din mar veleh tui chu a lo tling leh ṭhîn a. Tin, a awmna chung lawkah ban phâk maiin thei a rah hmin tuar a, mahsela lawh tum a a ban veleh thing zâr chu a awm sawn leh zel a, chatuan in rilṭam leh tuihal in a awm reng dawn a ni.

Rethei tak a a fanu zawng a a vakvel lai chu Titan Hecate(Hekate)-i, Dawithiam Pathiannu chuan a lo hmu a, A fanu chu engkim hmu tu Ni Pathian Helios-an a awmna a hria ang tiin a lo hrilh a.

Ni Pathian Helios-a hian zîng kâr ah mei tawlailir in Ni- hi a hnûk chhuak nitin ṭhîn a, nilengin vân chungah, khawchhak lam aṭang a hnûk chhuakin khawthlang lamah a hnûk liam leh ṭhîn a ni.

Helios hnenah chuan Demeter chuan a fanu a hmuh leh hmuh loh a zawt a, Helios-a chuan, a hmuh thu leh Hades-a'n a rûkbo thu a lo hrilh a.

Chu thu a hriat veleh chuan Demeter chu Zeus- hnenah a kal a, a fanu chu Hades-a chhuah tîr tûrin a ngên a.

Zeus- chuan a thusawi chu lo pawmin Hades-a hnenah Hermes-a a tirh tûr thu leh rilru hahdam tak a awm a, lei chunga a hnathawh te thawk chhunzawm tûrin a lo ti a.

Demeter pawh chuan lungawi takin Mount Olympus- chu chhuahsan in lei chunga a hna chanvo te chu a thawk leh ta a.

Lui tui, a vawh avânga khal te chu an lo tui a, an luan dan pangngaiin an luang leh ta a, lei chungah ruah te lo sûrin lei chu a lo hnâwng a, mihring te thlai chîn pawh an lo ṭha leh thei ta.

Hades a awmna, leihnuai khawvelah chuan Zeus- chuan a fapa Hermes a, khualzinte vêng ṭhîn tu Pathian chu a tîr ta a.

Hermes chuan Hades- chu Persephone chhuah tûr leh a nu hnena pe kîr leh tûrin a ti a.

Mahsela Hades- chuan chuti maiin a hmangaih Persephone- chu chhuah a tum bîk hauh lo.

Zeus- chuan a rûkin rem a lo ruat fel leh diam a, Hades- hnenah chuan, Persephone chuan Underworld-a thei chi khat Pomegranate- rah mû a ei chuan khawvel ah a kir thei tawh lovang tih a hrilh a. Mahsela  Zeus-a chuan chu chauh chu thil phiar rûk a nei hauh lo.

Underworld a a kal hma in Hermes-a hnenah chuan, Underworld chu Hades-a Lalna ram a ni a, Pathian tupawh Underworld ah chuan an kal thei a, mahse Hades- chauh lo chu tumah an chhuak leh thei tawh ngai lo, chuvangin Persephone chhanchhuah nan chuan Hades-a sakawr chauh a hman theih tih thu a hrilh ru ve thung a.

Zeus- remruat angin Hades- chuan inthlah nan tiin Underworld a Pomegranate rah chu lovin a phel a, Persephone- chu eitur in a pe ta a.

Persephone chuan mu ruk chauh a ei hman tih chuan Hermes chuan Hades-a sakawr chu man in rang takin Underworld aṭang chuan Persephone- chu a hruaichhuak ta a.

A fanu hmel a hmuh chuan Demeter chu a lawm êm êm a, mahsela Persephone- i'n a Pomegranate rah mu ruk a lo ei hman avângin kum khat ah thla ruk chauh minung khawvel ah a awm thei a.

Thla ruk chhûng Persephone chu khawvelah, a nu bul ah hlim takin a awm a, chu thla ruk chhûng chuan a nu Demeter pawh chu a hlim in, Nipui leh Fur hun nuam tak a ni a.

Mahsela thlaruk a liam chuan a nu chhuahsan in Hades-a hnen ah, leihnuai hremhmun ah thla ruk awm tûrin a kîr leh ṭhîn.

Hades-a hnena a awm chhûng thla ruk lai chu Demeter chu a fanu ngaiin khawhar rêng rêngin a lo awm ṭhîn a, chu thla ruk chhûng chuan khawvel sik leh sa pawh a enkawl hman ngai lo.

Chuvang chuan thla ruk chhûng chu khua a ro a, a ṭhen laiah khua avawt in, khawvel chu vûrin a bawh lûk mai ṭhîn a ni.

 Chumi aṭang chuan khawvel sik leh sa pawh siam danglam niin, Kum khat a thla sawm leh pahnih a Nipui leh Fur chauh awm chu Favang leh Thlasik in an belh ta a. Chu chu kum tin khawvel sik leh sa awm dan chu a lo ni ta a ni.

Thlaruk chhûng Nipui leh Fur a ni a, thla ruk chhûng Favang leh Thlasik hun te niin kum khat a thla sawm pahnih awm chu ṭhen darh an lo ni ta zel a ni.