THE DISAPPEARED GIRL : The Maple Street (Chapter -1)

SAWIHAWNNA :

Cypress Street, Sandersville, Georgia, a chêng râwlthar Phoenix Delson-a'n a a inluah tukverh aṭanga Entlang (monocular) a a ṭhenawm nula tituai nalh tak a bihthlâk ṭhin chuan nunna rêng a nei tawh lo.(!)

Thih hnu khawvel aṭanga a chunga thil tisual tu lak a phuba la leh tûr a rawn kír Michelle Ann Portman - chu engtia nghaisak hlum nge a lo nih rêng.

Thlarau nen a inngaihzawnna hian thinlung chhûngril a lo khawih danglam thei chiang a ni tih chu hrilh nawn kher angai lo.

Phuba la tûr chuan bang lai a thlalâk târ mawi chu  lâk kian angai si a.

Hmangaihtu chuan a hmangaih tân bang chhah tak chu a tih chhiat a ngai miau si.

Bang phênah chuan enge awm a?

Thlalak phên ah chuan enge in phûm ru tih i hriat duh chuan he thawnthu hi i chhiar ngei a ngai a ni.


THE MAPLE STREET (Chapter - 1)


Chumi zân chuan angai tê bawk in a room light a ti thim leh vek a, a tukverh parda hlîm thla in a entlang (monocular) chuan a in râl lawk a in luah thar te in bawk chu a thlîr leh ta dauh dauh a.

Tukverh puanzâr an hlîm vek avângin tukverh zâwn inchhúng chu a lang chiang kher mai.

Inbual zo niawm tak a a hnute khuh chiah a Towel bih hmeichhe pakhat hi tukverh zâwn ah chuan rawn pheiin a sam chu samkhuih hian uluk fahran mai in a khuih melh melh a.

A sam khuih zawh chuan Chair- ah ṭhû in a taksa, a malpui leh bân, a hmai te chu Lotion- hnawih leh in muangchâng hian a kalsawn leh ta a.


Phoenix- chu a chilthlî a far lo chauh mai, a thlîr tui lutuk chuan a ṭhutna Chair- chu a bawh tlu lehnghal.

Rei fê hmuh leh tumin a'n bih leh ngial nâ a,  a rawn inlan leh tawh lo, mahsela chu chauh pawh chu a lâwm tâwk a tling êm êm tho mai.

Khumah a zuang kai thawrh a,  thâwk halh pah in chu a hmeichhe hmuh îtawm tak mai chu mumang ram a hmuh nawn leh tum rân chungin mutthilh zâi a rêl  ve ta a.


****************************************************************************************************



Pineview, Georgia - lam chhuak a ni nâ in Phoenix Delson- chuan Quality Inn- a hna a hmuh avângin  Sandersville- lamah a chhûngte awm bosan in, amah a inluah in a awm ta daih a, Hines Street leh Elm Street- inkâr Cypress Street- a in bêngbel in, a awmna kawtthler lehlam chu Maple Street a ni thung a.

Chawlhkâr khat vêl chauh ala awm tih chuan a in luahna ep, Maple Street- lama in pakhat ah chuan Motor lût chhuak a tam in, zan lam a Party leh han rîk deuh luai luai pawh a awm ngun tih chu hrilh leh hranpa pawh angai lo kher mai.

Chu chu an zantin dân a ni deuhthaw mai a, mahsela zan tîr lamah chauh thâwm an neih avângin chutia ninawm ti a han sawisel êm êm chi pawh ni chuangin a hre lo.

A hnathawhna Quality Inn- ah chuan zîng lam dâr 8:00- aṭanga tlai dâr 6:00 thleng kalin, zanlam ah erawh an ṭhian ho inhmuhkhawmna Restaurant, Country Buffet- lamah a awm tlângpui a, a ṭhian kawmngeih tak, a Hotel-  thawhna a a thawhpui tleirawl, Natalie Jensen- te tâ anih vâng pawh a ni pakhat a, an ṭhian ho mipa pali leh hmeichhe pathum te chuan zân hun chu Buffet- a inkawm hlim nan an hmâng deuh ziah ṭhîn.

Ani hian lîrthei aneih loh avângin an thlah haw ziah a, mahse haw tlai deuh mahsela a mu nghal mai ngai lo, a tukverh bula a entlang chhawp sa hmang chuan a ṭhenawm te in chu a thlír hmasa phawt ṭhîn a.

Chutiang a zan eng emaw zât hmeichhe inthlâk a thlîr hnu chuan chu hmeichhia chu a vei ta riau mai a, a ṭhiante bulah a sawi chhuak ta nge nge a.

"Chutiang te chu an inah kal mai rawh," a ṭhianpa Richard- chuan nuih rulh rulh pahin a ti a.

Ani chuan, " Chu chu zantin a ka tum dân alawm, mahse...."

"Enge mahse chu, eng emaw chhuanlam siam la, pipe fit ṭha tu emaw angin insawi la, tichuan a ina i luh veleh i duhzia thu i sawi mai ang chu,"... Katie- ina a tih chuan an vai mai chuan nui chungin kut an bêng dar dar a.

"Dik chiah, Katie- sawi hi a awlsam ber, idea ṭha tak a ni, amah pawh hi pipe fit tu nen an in date tawh alawm," Richard chuan a lo tih zawm a, an vai mai chuan an lâwm kher mai.

An ṭhian pakhat Robert- pawh chuan nuih huah huah pah hian Phoenix- chu Katie- sawi anga ti tûr chuan a tur sek sek a.

"Nangmahni tawn anih loh vâng mai maiin in nui liam a, ka dinhmunah hian han ding ve chiah ulang chuan mut pawh mu hmsn lovin in thlîr tlaivâr thei ang chu maw le," Phoenix- a'n a arawn tih leh phei chuan an nui tâwp thei lo emaw tih tûr hi a ni a, Customer- dang awm ve lo phei selang chuan dawhkân an chûm ri in an khêk vak vak duh ta hial ve ang.


Chutiang chuan chu zán hun chu hmang zovin , Robert-a Car chuan ani chu an thlah haw leh a.

A in luah thlen dâwn ṭêp, Hines kawtthlêr an tlân lai chuan Richard bawk chuan, " Dude, khawilai tak maw i thinlung lalnu chênna lai chu," ring fahran lo hian Phoenix- beng bulah chuan a'n ti a.

Midang pawh chu an lo phûr kher mai, " Khawilai maw, sawi vat teh, keipawn ka hre ve duh ania," a mit sír a Phoenix- melh chung leh nuih deuh ralh ralh pah hian Dennis- chuan a ti a.

"Hey, khatiang kha chu a chi loh ang, tun ami hi chu ka ta tûr liau liau anih hi," hnek ṭawlh pah in a chhâng lêt a.

Midang erawh chu an lo nui char char thung.
"Sawi vat teh...." tiin an lo tur sek a.

Natalie- erawh an Reataurant lamah awmin, Robert chuan motor khalh in a bulah Phoenix- a ṭhû a, hnunglam ah tâwt deuh chungin, Richard, Dennis, Katie leh Holly Johnson- te an ṭhu thung a.

"Ding teh Bob,"

Zawi muangin Robert chuan Car- chu a ti ding a.

Oak Street ina an tlân mêkna Hines Street- a rawn pawhna piah deuh hlek dinglam ah chuan Maple Street- pêng a lo awm a, chuta pêng lo a Hines Street a tlêm tlân leh deuh hlek chuan dinglamah tho Cypress Street- pêng a lo awm ve thung a.

Hines Street leh Elm Street inkâr ah Maple leh Cypress kawtthlêr tê te chu an awm a ni.

An vai mai chuan an ngawi ṭhap a, Maple Street pêngah tak chuan Robert chu a ding a.

A lam a kûn phei in, nui inchung hian a bengbul ah, "Khawilai tak nge,"  Robert- chuan a'n ti leh hrâm a.

"Ngawi teh, hemi Maple Street ah hian ania, saw mi  in pali na saw," Phoenix chuan ring lo deuh hian a ti a.

"In pali na â, a va nawm hmêl ve," Katie chuan ka hau chung hian a lo ti a.

A lû a bu nghut a, " Zanin chu an reh kher mai, zantin deuh thaw hian an  ri luih luih a, Party an nei ṭhîn asin,"

"Huis... an chau aniang, kal tawh ila, Bob.." Tleirawl sam sen thar mai Holly- chuan a lo ti a.

Dennis chuan, "Ngawi rawh, ka va hmu teh ang," tih leh motor kawngkhar hawn chu a rual nghâl a.

"Â viau suh, sim rawh," Phoenix- chu hmanhmawh deuh a chhuak in Dennis chu- a nam lût rawk rawk a.
Midang ho chu an lo nui thlêr nasa kher mai.

Dennis- ber lah chu a lâwm lâwm ah ala ṭang zui lehnghâl a.

"Nih chuan, kal phawt ang u, kan ṭhianpa tân te chuan engpawh tih kan huam alawm," Robert chuan tiin, Motor chu a ti nung a, an tlán zui leh nghal a.

An tlân rei lo, Phoenix- a in pêng chu Maple Street aṭanga feet zahnih vêl chauh a ni a.

"Nula thlír nuam le," tiin an mangṭha ta a.