WORLD IS BLACK

Vân boruak ah chuan chhûm dum chhah tak tak mai an in bin let tup tup a...

Chhûn lamah thlalêr vaivut khu, Oil khur leh thil kâng khu dum dum chhah tak tak te avângin khua chu a thim deuh mup reng a, zan lamah erawh chuan in kâng, bomb puak êng râpthlak tak mai leh ṭêk ang mai a ri bengchheng te chuan hmuntin rêng mai chu a luah ve thung a.

Vân chung sâng a indo thlawhna thlâwk zuai zuai mai te leh silai kâp ri zawih zawih reng mai te, thlabâr leh mangang aû thawm te chu ngaiah neih mai a ngai hial mai(!)

Hun rei lo tê liam ta ah te kha chuan tupawh mai chuan hlim takin an nun an hmang vek a tih theih hial ang, khaw dâi thlalêr lung khawkrawk hmun a naupang leh putar te'n a infiam chung a kêl rual an thlah ho diah diah ṭhin te, tlâi ni tlâk dawn ruai ruai a naupang rual ina thlalêr vaivut lêng chum chum kâr a ball an pêt lai hun te kha(!)

Chûng chu nitin a an hun hman dân leh an nun dân ve rêng tûr a Siamtu ina a ruat ni mai âwm hi a ni a.

Mahsela ani hauh si lo, Chûng an hun hlimawm tak te chu chatuan a tân a vawikhat an tawn chu Siamtu remruat dân rêng ani zâwk si.

Naupang ina a nu ko va a ṭah chuan, anu chuan eirawng a bawl a nih loh chuan châkkhai lamin Bazar ah a kal emaw a ni ṭhin, rei lo tê an anu chuan a malchungah chawiin a âwi mu ṭhin a...

Mahsela tunah chuan a theih tâwp in a nu chu ko mahsela chhângtu an awm tawh lo, a nu chuan a kal bosan lova, a bul ah a awm reng a, kalsan tum mahsela khawiah mah kal thei a ni lo.

Chutiang chu mitin rêngin an tawng a, an la tawng zêl bawk ang, ṭanpuitu aû mahsela khawiah mah an awm lo, chûng thil thleng chu mitin ina nitin zantin a an tawn leh an tawn mêk te a ni tlat alawm.

Thlalêr thlipui tleh hum hum te chuan an hlimna zawng zawng te chu kumkhua atân a lên bo zo ta.

Zïng ni chhuak mawi tak chu in leh motor kâng khu dum chhah pui pui te chuan an hliah hliah khuh hneh kher mai.

Naupang hlim nui ri chu lo tâwp in, a aiah indo thlawhna thlâwk ri vung vung an lo ri chhuak thung a.

Vân boruak zau tak mai ah chuan tuipui sava rual pêm tum ang mai hian indo thlawhna rual tam tak mai an rawn thlâwk ruih ruih a.

Lung hmun khawkrawk leh kawng pêng ṭhuam te pawh an dang chuang lo, Tank leh sipai motor tam tak in rei lo tê'an a khat zo ta.

Kawtthlêr hmun tinah chuan sipai râpthlâk pui pui te chu silai leh hriamhrei hlauhawm tak tak nen an vei suau suau a.

Rei lo te'an hawi na lam apiang mai chu thil puak ri dum dum mai leh silai mu lak a tlanchhia in an khat nghal huk a.

Silai a ri zawih zawih a, thinrim a âng tâwn tâwn leh mangang tak a ṭap ri te, thi tûr leh thi mêk te chuan ralmuanna khawvel chu an luahkhat zo a.

Nî a liam a, Thlâ a liam a, Kum pawh a vei zel a, mahsela chu hun hrehawm leh râpthlâk tak chuan kian a hnêk in zual lam a pan nasa deuh deuh zawk a..

Chu zân hrehawm takah chuan a khât tâwk hian bomb puak a awm leh zauh ṭhin in, kawtthlêr ṭhenkhat ah chuan motor ṭhenkhat chu a kâng alh zuai zuai reng a.

Indona avânga lungrem in tla bal chhûng aṭang chuan hmeichhia lungngai tak a ṭap ri hi a rawn ri chhuak a.

Ni e, Indona râpthlâk tak chuan a pasal hmangaih êm êm mai leh a fapa neih chhun kum nga(5) mi lek chu silai mu lêng vâk avângin a lo chân tawh bawk a.

Tunah a fanu duat leh hmangaih ngawih ngawih pawh chu bomb puak avângin a chân leh ta, a hmangaih êm êm chu a taksa pawh kim lovin vuiliam angai a, he khawvel a engtikah mah a hmuh leh tawh ngai loh tûr chu a duh ang a rilru dam a a vuiliam thei lo chu a khawngaihthlak in a lainat thlâk tak zet zet(!)

Silaimu lêng kârah chuan ' Mangṭha ' ti a, mahni sahimna zawn angai tlat si alawm le(!)

Ni e, Indona râpthlâk tak avâng chuan khawvel chu thlâkin a awm a, a tâwp hma loh chuan nitin hrehawmna leh manganna chu a zual zêl ang.

Kan vaiin chu thlâkthlengna chuan min tuam a, kan in tluktlâng vek a ni.

Mihring mai ni lo, nunna nei tawh phawt chu kan kawng zawh a in ang vek a, chu kawng chu hrehawmna leh natna a ni.


Chu hmun ah chuan ruah ang maiin hrehawmna chu a sûr a, thlalêr thlipui ang maiin lungngaihna chuan a tuam vêl bawk a.

Hun aliam ang a, chu indona mual chuan kian zai a rel hunah chuan kawtthlêr a nunna nei tawh lo, naupang khawngaih thlak tak tak ruang let reng te, nupui fanau châwmtu chhûngkaw pa ber ruang te, hmangaih leh hmangaihtu tu ruang chhiar sen loh vûm thûr mai te chu Siamtu ina a ruat sa ang rêngin hmangaih a vuiliamtu nei lo mahsela vaivut ah an chang ang a, buh sî thlî in a alen bo ang maiin len bo in anla awm ang.

Chumi hunah chuan nun thar a awm ang a, hringnun bul ṭan ṭhat a ni ang, mahsela eng hunah nge hrehawmna chuan a rawn nan leh ang a, ṭahna chuan a rawn tuam leh ang tih erawh lungphu dep dep chung a ngaihchân reng a ni tawh thung si ang.

Indona chuan tumah rêng a zuah lova, hmangaihtu leh hmangaih te a pawt ṭhen a, chu hun ah chuan nu in a fâ a kalsan a, fâ in a nu a kalsan ve thung a, mahsela duh rêng vâng a ni hauh si lo.

Inrem lohna chuan indona a thlen a, Indona chuan thihna a thlen leh ṭhin, chuvangin hmangaihna chauh lo chu tumah rêng hi engmah pe chhuak lo ila, tichuan inrem lohna a thleng lo thei mial mahna.

Tuipui zau tak a thlipui tleh te chuan reh hun nei mahsela an chîm chin erawh a danglam tawh ṭhin.