ODYSSEY | The Trojan War

Greek Lal te chu Agamemnon-a kaihhruaiin sipai leh sipai mamawh phur lawng lian tam tak nen an inthiar mup mup reng a, Greek sipai sâng tamtak chu Trojan tuipui kamah chuan khawinghal bu kotlâng ang maiin an phu mur mur a, Mual dung lianpui hnuaiah chuan puan in anh kaih kûl fên fûn a, chhâwl bûk an zâr thliah thluah mai bawk a. Khawpui indin ṭantîr ang mai hian an in kulh a. An inkulhna chu thingin an hung a, fung an bun thluah mai bawk a. Tuipui kam chhuah tlâng let liamah chuan Trojan khawpui kulh ropui tak mai chu chatuana ding tûr ang mai hian a ṭo luah a.

Nimahsela, Trojan lal fapa Hector-a chu mi huaisen leh indo thiam tak anih avang leh amah ngeiina Trojan sipaite a kaihhruai avângin Greek ho chuan hma an sâwn hlei thei lo.

Vawi tamtak inbei tawh mahsela Greek ho chu a hnungtawlh zâwkah an ṭan deuh zêl avâng chuan Lal ho te chu an beidawngin an in hmukhawm a.

Zâwlnei te chuan, " Trojan khawpui hi Achilles-a lâk tûra pathiante remruat a ni a, Amah lo chauhlo chuan tumahin kulh bang an tichhe lo vang."

an tih avâng chuan Achilles-a zawng tûr in Odysseus-a leh a pâwlte chuan Greece lam an pân leh ta a.

Greek ram pumpui ah Achilles-a chu an zawng a, mahse tumah rêngin a awmna chin an hre lo.

A tâwp a tâwp ah chuan Odysseus-a leh a ho te chuan Skyros thliarkâr an thleng ta a. He thliarkarah hian Achilles-a chu a nû Thetis-in a tlanbo puina thliarkar kha a ni.

Achilles-a hi a nû in hmeichhia anga a inthuam tîr avang leh Skyros Lalfanu ho te nen a an awmho avângin Osysseus-a chuan hmeichhe lawmzâwng, Ṭhî leh bengbeh, tlereuh lam chî dangte chu chûng hmeichhe hi hmaah chuan a chhawpchhuak a, Chûng zîngah chuan ngûnhnâm ṭha tak, a pâi rangkachaka chei hi a dah tel a, hmeichhe ho chuan chûng tlereuh leh hmeichhe lâwm thilte chu an thlang sap sap a, Achilles-a erawh chuan ngûnhnâm chu ala nghâl ta nalh a.
Chutah chiah chuan Mifing Odysseus-a chuan Achilles-a chu a hrechhuak ta a, Tichuan Trojan ho do tûr chuan a va hruaichhuak ta a ni.
.
Troy tuipui kama Achilles-a leh a ho te Myrmidon-an rawn thlen hnu hian Greek ho pawh in an inbeihna ah hma an sâwn ta deuh deuh a, Chuvang chuan Trojan ho ṭanpuitu Ramsa enkawltu Pathiannu Artemis- in Greek sipai ho riahbûk bul ah sipaite tibuai tûrin Colchis sakeibaknei lu pahnih nei, Dragon ai pawha hlauhawm zâwk an tih hial chû a chhuah a. Chu sakeibaknei chu a kawlh in a râpthlâk kher mai, A vun chhah tak chu fei pawh in an khawh na zo lo va. Sipai te'na tihngaihna an hriat loh avâng chuan hun rei tak chu an buai phîlî kher mai. Mahse Odysseus-a chuan fing takin rem a ruat a, tichuan chu sakeibaknei bei tûr chuan an in thlang chhuak a, remruat ang chuan Ajax-a leh pasalṭha dang te'n a hmalam a an chhaih buai laiin hnunglam aṭangin Achilles-a chuan a lo bei thung a. Sakeibaknei nâkah chuan a feiin a chhun a, a chungah zuang kâiin a lu pahnih chu ngûnhnâm in a sât bung ta a, chuta ṭang chuan Artemis-i chuan Greek sipai te chu a tibuai leh ngam ta lo hial. Greek lal ho zînga an hruaitu deuh ber Agamemnon-a hian Achilles-a ropuina hi a thîk avangin vawi tam tak an in tithiamlo a, Indona a Achilles-a te an telloh apiangin an chak thei ngâi silo. Chuvâng chuan Odysseus-a hian Greek lalho zîngah palai hnâ a thawk ngat ngat a, Tin, finna leh remhriatna lamah pawh Greek ho zîngah tumah amah tluk an awmlo. Indona a Myrmidon an telloh apiangin Trojan ho chuan Greek Lalho an intithiamlo tih an hria a, chuvang chuan hnehsawh takin anlo bei ṭhin a. Greek ho lawng leh eitûr chhêkkhâwm tam tak Trojan ho in an man tâkah chuan Odysseus-a bawk chuan Achilles-a chu a va thlêm leh a, An chakna hnâr a ni tih a hriatchian êm avângin beidawng lovin a nawr ngar ngar a, a tâwp a tawpah chuan a thlem chhuak leh nge nge ṭhin. Achilles-a damlai pawh in Greek ho chakna hnâr langlo lama pawimawh ber chu Odysseus-hi a ni hial ang.

Achilles-an Trojan chakna ber an Lal fapa Hector-a a tihhlum hnû leh Trojan pui tûr a lo kal Ethopian mihâng Pathian thlah Sakeibaknei sâwm rual tluk a chak Memnon-a a thah hnu pawn Troy kulh chu anla la thei chuanglo a.

Trojan Pasalṭha leh apui tûra mi chak lo kal apiang Achilles-an a thah hnû chuan a kulh lâk tumin anlo thâwk chhuak a, mahse Troy Lal fapa Paris-a chuan Scean kawngkhâr pui aṭangin Achilles-a ke artui ah tak thal in alo kâp a, reilo te an Achilles a chu a boral a, Odysseus-a hian a dawm hlum a ni.

Troy bei tûr a kal Greek Lal leh Pasalṭha
ho zîngah Achilles-a hi a hmingthang ber a, chanchin pawh angah ber a, Pasalṭha dang ho zawng zawng a hliahkhuh vek a tih theih hial ang.

Mahse, indona a a thih vê tâk mai avângin Odysseus-a hi arawn langsâr ta sauh a, A finna leh remhriatna bâk ah a huaisen zia a rawn lang ta chiah a ni.

Achilles-a dawm hlumtû leh Greek Lal ho zînga Achilles-a ṭhian ṭha ber Odysseus-a chuan Achilles-a rãlthuam te chu a chang a.

Troy kulh ropui tak hi Zâwlnei ten Peleus-a fapa Achilles-a chauhlo chuan an tichhe theilo ang tih in an puang lâwk a, chuvangin Achilles-a ber Indona a a boral leh tawh bawk si avâng chuan Greek ho te chu an mangang rilru kher mai.

Achilles-a boral hnû pawh chuan rei tak anla indo a, mahse Troy kulh erawh anla la thei chuanglo.

An beidawn tâwh avângin hotu chan chang engmah nisi lo Agamemnon-a thusawi awmze neilo leh mak tak tak te, amah indah chungnung larh reng a a awm reng mai te chu Greek Lal dang leh sipai ho te chuan an ning êm êm a,
Chuvang chuan mifing leh remhria Ithaca Lal Odysseus-a kut ah an in nghat tawp ti ila kan sawisual lo ang.

Odysseus-a chuan Trojan Lal Priam-a fapa pakhat, Rimawi leh Thalkah Pathian Apollo-a puithiam leh zâwlnei Helenus-a chu Ida- tlânga a chênna ah ava man a. Engtin nge Troy khawpui chu an lâk theih ang tih ava zâwt a.


Helenus-a chuan, " Thil Pathum intih ngei ngei angai. Achilles-a fapa Neoptolemus-a indona a in têltîr ve angai a, Indona ah Hercules-a thal in hmang bâwk tûr a ni. Tin, Troy khawpui chhûnga Palladium inlâk angãi bawk, Palladium hian Troy khawpui chu hmelma lakah a vênghim reng a, Chumi pathum in tihhlawhtlin loh chuan Troy chu in hneh lo vang." a lo ti a.

Achilles-a fapa chu naupang tak a la ni a, A nû Thetis-in a Skyros thliarkâr a a tlânbo pui lai a Skyros Lal Lycomedes-a fanu Deidamia-i nen a an fâ a ni. Odysseus-a chuan Troy tuipui kam aṭang chuan Skyros thliarkâr a a awm chu ava hruai vang vang a ni.

Tin, Philoctetes-a chu Hercules-a thal an pe bawk a. Amah hi thal kah thiam tak mai, Thal kah pathian Apollo- tluk deuhthaw a thiam a ni.

Greek Pasalṭha leh Zeus-a fapa ni bawk Hercules-a a thih dâwn khân a hâlna tûr thing a fawm sak a, chuvang chuan Hercules-a chuan a thal hi a pe a ni.

Philoctetes-a hi Sparta Lal fanu Heleni- rîm tute zîngah khân a telve a, Helen-i pâ Tyndareus-a hnena thû atiam ve avângin atîr a Trojan- rûntu te rual khan a chhuak ve a, Mahse Troy an panna kawng laka Lemnos- thliarkâr a an chawlh laiin rûl in a chuk a, ama duhthlanna angin a ṭhiante chuan thliarkârah chuan amahin an hnutchhiah a, an indo mup mup chhûng hian amah in kum sâwm alo awm ngar ngar a ni.

Argos Lal Diomedes-a leh Ithaca Lal Odysseus-a te'n thliarkâr aṭang chuan an va hruaichhuak leh a.

Philoctetes-a chuan Hercules-a thal hmang hian Trojan mi tamtak a kâphlum a, Inmal beih ah Trojan Lal fapa Paris-a a cho va, Philoctetes-a hian thala tûr tah hmangin a kâp hliam a, Troy ram a a tihdamna a awmloh avângin a boral ta a ni.

A tîrin Hmangaihna Pathiannu Aphrodite-in a fapa Eros-a (Eros hi Roman ho chuan Cupid an ti a, hmangaihna thal keng ṭhin, Valentines day lai a lâr deuh ṭhin kha a ni. CR)

chu Sparta Lalnu Helen-in Paris-a a hmangaih theih nan Helen-i thinlung chu hmangaihna thal in a kah tîr a, tichuan Paris-a leh Helen-i chu anlo in hmangaih a, Paris-an Troy ah a ru ta a nih kha.

Mahse Paris-a a boral chiah khan chû dâwi chu a in sût ta a, Helen-in a Paris-a a hmangaihna kha alo reh ta chiah a.

Mahse Paris-a thih hnû khân Paris-a unaupa Deiphobus-an Helen-i chu pâwngsual in nupui ah a nei lui leh ta a ni.

Greek ho chuan Troy khawpui chhûnga Pathiannu Athena-i temple a Palladium chu engtin nge an lâk chhuah theih ang tih an ngaihtuah a.

Odysseus-a finna leh remhriatna hmangin amah leh Diomedes-a te chu a ru tûrin an thawkchhuak a, Diomedes-a chuan kulh pâwnah alo nghâk a.

Odysseus-a chu kutdawh anga in chei danglamin vuakna vualin a taksa chu a ti hmelhem a, thawmhnaw chhe pui pui a inbel bawk a.

Chutianga kutdawh leh mi â ang mai a in chei danglam chung chuan Troy kulh ah chuan a lût tlang a, tumân tunge a ni tih reng reng an hre lo.

Helen-i erawh chuan Odysseus-a chu a hmuhin tunge anih alo hre nghâl a,

Helen-i chuan," Ithaca Lal Mifing, Odysseus, Engti tûrin nge khawpui chhûngah hian ilo luh?" tiin alo zâwt a.

Odysseus-a chuan, " Palladium- la chhuak tûrin ka lo kal a ni," tiin a chhâng a.

Helen-i chuan, " Ka ṭanpuina tello chuan i la chhuak thei lo vang," tiin, Odysseus-a chu a bihrûk tîr a.

Tichuan zân thim hnuaiah, an pahnih chuan Helen-i remruat ang zêl a chê in Athena-i temple chhûnga Palladium chû an ru chhuak ta a.

Kulh pâwn ah chuan him tak a chhuak in Diomedes- nen chuan Greek ho riahbûk ah Palladium chu an thlen ta a ni.

Finna Pathiannu Athena-i hi Zeus-a fanu nimahse Tuipui Pathian Poseidon-a fapa Triton-a'n a enkawl a, Triton-a chuan fanu Pallas-i a nei bawk a, Athena leh Pallas-i te chu hmeichhe naupang inkâwmngeih tak an ni a, an infiam a, thiamna chi hrang hrang an zir dûn ṭhîn a.

Vawikhat chu ngûnhnâm vaiin an infiam a. Pallas-i chuan Athena-i chu sah a tum a, zak kâu hawk khawpin a tin ûr mai a. Zeus-a chuan a fanu chu Pallas-i chuan a sât fuh ang tih a hlau va, chutia an pahnih a nunchan an zir lai chuan Olympus tlâng aṭangin âwmphâw a thlâk a, Athena-i chu a âwmah a zuk vuahsak a.

Thâwklehkhata thil lo thleng thut a nih avângin Pallas-i chu a phu zawk a. Chutih lai tak chuan Athena-i chuan Pallas-i chu a vit a, a vit hlum ta dêr mai a.

Athêna-i chuan Pallas-i thî chu a tuarthiam lo hle mai a.

Tawng thum a sângin thing milim, Pallas-i lim chu a siam a, A kê a inzawm a, a kut dinglamin fei a hûm a, a kut veilamin tiang a keng a, Amah ti phu zawk tû âwmphâw pawh kha a âwmah a vuahsak bawk a. Chu milim chu Palladium-a ti a, Olympus tlângah Zeus-a lalṭhutthlêng bulah a hûng ve a.

Vawikhat chû Zeus-a chuan Siruk (pleiades) nula rual zînga pakhat Electra-i a pawngsual a, Electra-i chu a tlânchhia a, milim chu in humhim nân hman a tum a, Zeus-a thinrim chuan Palladium chu leiah a paihthla ta daih a.

He Palladium hi Priam-a pû mi chak Illus-an lo hmû in, Troy khawpui din nan hian a hmang a, Athena-i temple sâ in temple chhûngah Palladium- hi a dah ta a ni.

Zâwlnei te chuan, " Palladium-hi an vâwn ṭhat chhûng chuan Troy- chu hmelma in an hneh thei lo vang," an ti a ni.

Tichuan Odysseus-a mumangah Pathiannu Athena-i inlâr in, Troy khawpui hneh dân tûr a lo hrilh a.

Tichuan Athena-i hrilh ang chuan Odysseus-a chuan Greek lal ho chu kokhâwm in, chanchin te chu a hrilh a.

Pathian thlah te zîng ami kut them thiam Epeus-a chuan a sân zâwng leh len lamte ruahman in, Greek sipai ho chuan ni thum chhûng in thing sakawr lim lian tak mai an siam ta a ni.

Tichuan an lawng leh riahbûk te chu sawn in, an puanin ṭhenkhat chu an hâl chiam a, chu sakawr lim chhûngah chuan Greek pasalṭha sawmthum, Odysseus, Diodemes, Agamemnon, Menelaus, Ajax, Epeus, Calcas, Philoctetes, Neoptolemus leh mi huaisen dang an tawm a, Greek sipai dang erawh hmun dangah an biru thung a.

Chu Sakawr lim chu Trojan mipui ten an hmuh chuan Sakawr ngaina tak Tuipui Pathian Poseidon-a pêk ah an ngai a, Ṭhenkhat in Pathiannu Athena-in a pêk ah an ngai thung a.

Hector-a unaunu Athena-i puithiam Cassandra-i erawh chuan, " Kan hâl râl vek tûr a ni," a ti thung a.

Lal Priam-a chuan, "Ni lo ve, hmânah Zeus- chuan ka pû Illus-a chu Palladiun a pe a, He sakawr pawh hi Poseidon-a'n khawpui vênhim nân a min rawn pêk a ni." a ti a.

Tichuan Sakawr lem chu Thing leh lung hmanga kar na leh rah chhan an siam a, Sakawr za tam tak hnuh tîr bawk in khawpui chhûngah anla lût ta a.

Zân reh lai chuan chu sakawr lim chhûng aṭang chuan Greek pasalṭha te chu anlo chhuak a, He khawpui suasam zân hian Achilles-a fapa Neoptolemus-a a huaisen fâl hlê a, Sakawr lim chhûnga an awm lai pawh in, a kawngkhâr bulah awmin a kut lehlamin a ngûnhnâm fawng a vuan reng a, a lehlam in chhuah mai inpeih rengin kawngkhâr a vuan reng thung a.

Odysseus leh Menelaus-a chu sipai ṭha zual vén lâi Helen-i nei lui tu, Deiphobus-a in ah kal in Helen-i an va hruaichhuak a.

Kulh vêngtu te chu Neoptolemus, Diomedes leh Ajax-a te chuan that in chhûng lam aṭangin kulh kawngkhar chu an hawng a, Tichuan khawpui chhûngah chuan Achaean Greek sipai huaisen sâng rual teh meuh te chu an rawn lüt ta hum hum a, Tichuan nupui fanau kalsan a an rammut na chhan ber chu an suasam ta a.

Troy khawpui an lâk hian Greek sipai te hi an che rawva hle a, Ajax tê zâwka an tih, Ajax the Lesser- chuan Athena-i temple a Priam-a fanu Cassandra- i lo awm chu hnûk chhuakin Athena-i lim hmâ ah a pâwngsual a, Athena-i zahpah lo tak a a khawsak avâng hian Odysseus-a chuan a ngaihaw hle mai a, lunga denhlum hial a duh a, mahse an ngaidam leh ta zâwk a.

Troy khawpui chu an hâl a, râllak sum an insem chuan Cassdandra-i chu Agamemnon-an a chang a, Hector-a nupui Andromachae-i chu Neoptolemus-a'n a chang a, tin, Neoptolemus-a hian Priam-a a that bawk a ni. A nupui Hecuba-i chu Odysseus-an sal ah a man a, Hector-a fapa Astyanax-a chu nausên a la ni a, phuba a lâk an hlauh avâng leh Troy lal chî tih chimih vek an duh avângin kulh bang aṭangin an thlâk bawk a.

Pathian te zînga ropui ber Zeus-a chuan Troy indona tûr hi a hmâ daih aṭang tawhin engkim alo ruahman fel vek tawh a.

Lei a Pathian thlah mi chak leh mi lian, thiltithei tak tak leh huaisen tak tak ho te thah chimih nan a a lo ruat kha a ni a, chuvângin Troy khawpui hnehtu Achaean leh Argive Greek pasalṭha, Pathian thlah ropui leh huaisen tak tak te pawh chu an hâw leh dân tûr a ruahman tello a ni. Chumi awmzia chu, Pathian thlah Greek Lal leh pasalṭha te pawh chu Troy tuipui kamah chuan tihhlum vek a lo tum sa tawh reng a ni.

Athena-i lim hmâ a a puithiam Cassandra-i Ajax an a pâwngsual avâng khan Athena-i chuan Greek Lal ho inkâr ah buaina a rawn thlen a,
Sparta Lal Menelaus-a chuan Greek sipai zawng zawngte chu an hnunglam a tuifinriat zâu tak ata mahni ram lama kír leh chungchâng ngaihtuah tûrin a hrilh hlawm a. Nimahsela, a unaupa Agamemnon-a erawh chuan an hâw leh hmâ a Troy tuipui kam a Athena-i thinurna han tlawn lungawi leh a, inthâwina ropui tak hlan phawt a duh thung a.

A va mâwl thlâk tak êm!

Ani zawng chuti maia han hmin chî a ni lo tih hi a hre lo rêng rêng a; chatuan mî pathiante thinlung hi zawng inchhîrna kawngah chuti maiin a in lamlêt ve ngai si lo.

Tichuan an ni unau pahnih chu ṭawngkam dêngkhâwng tak tak nen an in hnial chiam a.

Chumi avâng chuan Greek mîte chu an phun ta mur mur a, ruahmanna pawh a phîr ta hial a.

Tichuan, chumi zân chuan Troy tuipui kamah chuan an riak leh ta nge nge a.

Zîng alo ni a, pâwl pahnih te zînga pakhat zâwk chuan râl lâk leh bungrua te chu lawngah an thiar lût a, Troy tuipui ah chuan an in kar chhuak ta a.
Heta chhuak ta te hi Menelaus-a, Neoptolemus-a leh Odysseus- a ten an ho va.

A chanve dang te erawh chu Agamemnon- a hovin Troy tuipui kamah ah chuan anla châm bâng a.

Mahse an ni pawh Pathiannu Athena-i hnena inthâwina te hlân a an awm khawtlai hnu in Troy khawpui ropui tak mai ni ṭhin, tuna vaivut a chang ta mêk chu hnuchhawn in Greece lam pan in an in tuifinriat zâu tak chungah chuan an tawlh chhuak ve ta a.
Sparta Lalnu Helen- hmêlṭha i pawh in Ithaca Lal mifing Odysseus chu,

" Pianpui rilru chakna nei, a vawikhat melh tawh chu a hrechiang nghâl thei zêl leh theihnghilh tawh ngai lo;

Thu sei tak tluk chiah a thu tawite fel leh fing tak sawi thiam, Remhriatna leh finna lama Greek Lalte zînga tumah ina an tluk loh, Zeus a chi pêng a mi, Mifing Leartes-a fapa Ithaca Lal Odysseus-a," tiin a lo sawi ṭhin.