ODYSSEY | Odysseus & Penelope

THUHMA :

( Achaen Greek hovin a Spartan Lalnu Helen-i lâklêt leh tum a Troy kulh an beihna chanchin, Mitdel Zâithiam Homer-a kutchhuak Iliad bû leh Troy an beih zawh hnu a Odysseus-a te Greece- lampan a an haw leh na chanchin Odyssey- bû hi a ngaihnawm in a ropui hlê a, Illiad bû tak hi chu a vâi vâi in ziaklo mahila, angaihnawm lai leh a thawnthu lairil, Achilles-a chanchin erawh kan pho lan nual tawh avângin tun ṭumah chuan Odyssey kaihtâwi, a ngaihnawm lai lai âwrkhâwm hi kan lo pholang ve thung ange.

Homer-a kutchhuak Illiad leh Odyssey hi thawnthu a ni a, hlâ a ni tel bawk a, hla chham mî, a sak a sak tûr a phuah a ni hial zâwk âwm e, Sâp sendâng hovin a Epic an tih, Epic Poetry- an tih ang hi a ni mah zâwk

Odyssey- hi kum zabi 8- na, (800BC) vêla ziah ni a pawm tlânglâwn a ni a, He thawnthu hla sei hi tlar 12,110- a sei a ni a, poetic meter chikhat, ' dactylic hexameter ' hmanga phuah, bung (bu) 24- a sei a ni.

A tîrah chuan he hla sei hi a hnû a epic dangte anga a chhiar a chhiar tûr a phuah a ni lova, sak tûr a phuah zâwk a ni a, Hla hrang hrang, awmze nei a remkhâwm, a bu a lo piang ta a ni.

Tunah erawh chuan Odysseus-a chanchin, a ngaihnawm tûr a a thawnthu lâwrkhawm ka lo pho chhuak dâwn a ni a, a sak a sak lam erawh chu in duh dân dân ni thung rawh se( just kidding)..)
Olympian Pathian te zînga ropui ber Zeus chuan Euryodeia- nen fapa Arcesius an nei a, Arcesius chuan Chalcomedusa - nen fapa Laertes an nei leh a.

Laertes- a hi pa fing tak leh remhre tak mai, Ithaca Lal a ni,

Colchis ram a Rangkachak beram hmul la tûr in, Achilles-a pa Myrmidon Lal Peleus-a te, Jason-a te, Apollo-a fapa Idmon-a te, Hla phuah thiam leh ṭingṭang perh thiam Orpheus te, michak Hercules leh mi huaisen pasalṭha tamtak te nen an va rammu a, chu chu Argonauts- rammutna ropui tak kha a ni.

Tin, Chumi hnû Argonauts rammute anlo hâw leh hnû hian zu pathian Dionysus-a chuan zu siam nan a ṭha deuh grape chî Calydon Lal Oeneus-a a pe a, Lal Oeneus-a chuan grape chu a chîng a, a thar hlâwk hlê mai a, Pathian zawng zawng hnenah lawmthu sawi nan inthawina a hlan a, Amaherawh chu, Ramsa pêltu te leh ramsa te pathian Artemis-i hnenah inthâwina a hlan theihnghilh avângin Artemisi-i thinrim chuan Calydon ramah chuan nghalchang lian leh kawlh tak mai a chhuah a, an thlâi mai bâk ah mihring hial a beih tel avangin chu sanghal tihlum tûr chuan Laertes-a te hi an va rammu leh a, heta rammu te hi ' Calydonian Hunters' an ti a, Greek ram pumpui ah an hmingthangin an zah êm êm a.

He ramchhuahna ah hian Ithaca Lal Laertes te, Myrmidon Lal Peleus te, Amazon ramvachal Atalanta-i te bâkah Meleagar-a te, Argos Lal Amphiaraus- te bâkah pasalṭha tamtak an kal a nih kha.
Tin, Pathian ropui ber Zeus- leh Siruk unau te zînga mi Maia- te chuan fapa Hermes an nei a.

Hermes chu Zeus-a thuchah kengtu a ni a, Khualzinte vênghimtu Pathian a ni bawk, Hermes chuan Chione- i nen fapa Autolycus- an nei leh a, Tin, Autolycus chuan Amphithea nen fanu hmêlṭha tak mai Anticlea- i an nei leh a.


A lo tlângvâl hnû in Odysseus-a chuan Sparta Lal Tyndareus- a fanu hmêlṭha tak mai Helen-i chu nupuia neih tumin a rîm ve a, Helen-i hi a hmêlṭhat êm avângin hetih lai hian Greek ram lalfapa zawng zawngin nupuia neih ngei tumin an rîm ve bawk a.

Chuvang chuan Odysseus- chuan Helen-i chu chang thei dâwn chuang lova a in hriat avângin Helen-i pa Tyndareus-a chu kawng dangin a sakhithingchunglâwn ta hlauh va.

Tyndareus-a hnenah chuan, Helen-i rîmtu Greece ram lal fapa lo kalkhawm te chu lo dâwr an harsa hlê ang tih a hrilh a, An vaiin Helen-i chu nupuia neih an tum ṭheuh a, An chanloh chuan buaina siam mai duh tâwk te an awm ngei dâwn tih a chiang a, Chutichuan Tyndareus-a hnenah chuan thû an tiam vek anga, chumi hnu ah an zînga a duh ber Pasalah Helen-i chuan a thlang ang.

An inneih hnuah Helen-i pasal tibuai an awm emaw, Helen-i te nupa in buaina an tawh chuan Lal fapa thutiam zawng zawng te chuan Helen-i pasal chu an ṭanpui vek ang, tiin ro an rel ta a. Chu chu Odysseus-a ngaihtuah chhuah a ni.

" Chutichuan, Helen-i rîmtû zawng zawng chuan Tyndareus-a hnenah chuan thu an tiam ta vek a, ' Nakinah Helen-i hi rûkbo tum hial pawh anla awm maithei a, chutih hunah chuan ka hnena in thutiam hi in hrereng tûr a ni,' tiin a delhkilh vek a, Lalfapa zawng zawng te chuan chhia an chham ta vek a, An chhechham a nghehzia entîr nan Tyndareus-a chuan Sakawr a pe ṭheuh bawk a.

Tichuan thu an tiam zawh in Helen-i chuan a unaupa nen a an khua a rawn râltlân Menelaus-a chu pasalah a thlang ta a.

Tichuan Tyndareus-a boral hnû in Menelaus-a chu Sparta Lal a lo ni zui ta a.

Odysseus-a erawh chuan Helen-i nei thei dâwn chuanglova a in hriat avângin Tyndareus-a unaupa Icarius-a fanu Penelope-i a beisei ta zâwk a, Tyndareus-a chuan palai sak in an in nei nghe nghe a ni.

Menelaus-a chuan Sparta Lal anih tirh in an kumkhaw lei do Trojan- nen a inremna a siam a, Mahse he inremna an neih lai hian Trojan Lal fapa Paris-a chuan A nupui Helen-i chu rû in Troy khawpuiah a hâwn daih a.

Chuvang chuan Helen-i lâklêt leh na tûrin Greek ram pumpui a an Lal te ho zawng zawng chu a ko khawm a.

Helen-i rîmtu Lal fapa te kha tunah chuan Lal anlo ni vek tawh a, Helen-i pa Tyndareus-a hnena thu anlo tiam tawh avângin Greece Lal ho zawng zawng chu Menelaus-a ṭanpui tûrin an rawn chhuak khawm a, Helen-i lalêt leh tûr chuan an in puahchah ta mup mup a.

Hetih lai hian Ithaca Lal Odysseus-a leh a nupui fing tak Penelope-i te chuan fapa an nei ve deuh chiah a, nausên tê chauh a la ni a, a hming ah Telemachus-a an phuah a.

Mahse Odysseus-a pawh hian Tyndareus-a hnena thu atiam ve avângin a nupui fing leh hmélṭha tak mai bâkah a fa sên tê chu Troy khaw lampan in a liam san ve ta a..