ODYSSEY | Cyclopeia

(Odysseus- a leh a Cyclops Polyphemus- te in beihna hi Cyclopeia- tih a ni a, chu chu Cyclops- nena in beihna tih na a nih ber chu. CR)..


Chutia Troy khawpui an chhutchhiat hnu a Greece lampan a an haw lehna kawngah chuan Cicione- ho khawpui Ismarus- bul ah an châwl a, Chu khawpui chu suamin a mi chêngte chu an that mang deuhthaw a, Rohlu tamtak lâ in an sal an man ṭeuh bawk a.

Mahse Mifing Odysseus- chuan tuman alak a vui vâina an neihloh nan chûng an thil lâkte chu rualkhâi tak in a ho te hnenah chuan a sem leh vek a.

Mahse chutia khawpui an suasam aváng chuan Cicione ho te chu khaw dang dang ami an in punkhâwm chiam a, anni râl hneh zo chuan ruaipui te siam in uain nen an nuam an tâwl chiam a.

Chutih lai tak chu Cicione-ho te chuan rawn nangching in nasa takin an inbei leh chiam a, Cicione ho hi an tam êm avângin Odysseus-a te chuan harsa titak chungin an inthiarfihlim san a.

Chumi hnû chuan ni kaw chhûng zet Tuipui ah thlipui leh ruahpui in a nuai chiam a, chuvâng chuan an tumlohna lam ah thli in a lên phar a, A ni sâwmna ah chuan Lotus pangpâr ei ṭhin hnam te chênna thliarkârah an chhuak ta hlawl a.
Chûng mî te chuan Lotus pangpâr hi chaw ah an ring a.

Khawmual an kâi a, lawng bulah chuan châw an fâk nghâl a, An ei a an in zawh hnu chuan Odysseus-a chuan chumi thliarkâr a chêngte chu eng ang mî te nge an nih va bêl chiang tûrin mi pahnih a tîr a. Thuchah tlânpui zung zung tûrin pakhat hi an zîngah chuan a kal tel tîr bawk a.

Odysseus-a mi tirh ten a thliarkâr mî te hnen anva thlen chuan chûng hnam ho chuan engtin mah anlo ti chuanglo a, Lotus erawh anlo eitîr ve a.

Lotus pangpâr ei hnû chuan anmahni in lam rêng rêng an ngaihtuah chang tawh lova, kîr leh pawh an duh tawhlo, an chunga thil lo thleng lah an sawi duh hek lo. Chûng hnamho zînga khawsak a, lotus pangpâr ei reng mai chu an duh a. Amaherawh chu ṭap vawng vawng chung hian an lawng lamah tihluihna in an hruai hlawm a, lawng ṭhutphah hnuaiah te chuan an phuarbet hlawm a.

Odysseus-a chuan a ho te hnenah chuan inkar chhuak nghal vat tûrin a hrilh a, tichuan hmanhmawh takin an bungrua te chu lawngah chuan an thiar lût sawk sawk a, hmanhmawh tak in chulai thliarkâr aṭang chuan an in kar chhuak leh ta a.

Nilênga tuipui a an in kar hnu chuan ram pakhat, mi nunrâwng leh pawisak engmah neilo Cyclops- ho awmna hmun hi an va thleng leh a.

Chûng milian mit pakhat chauh nei Cyclops- hnamho chuan lei an let ngailo a, thlâi lah an chîng ngai heklo.

Ram a thlai tualṭo ah chuan an in nghat tawp a, an mâwl êm avangin amal te te in an khawsa a, an in hmukhâwm ngai heklo, Tlâng sâng tak tak chhîp a pûkahte an chêng a, Mahsela Lei Pathiannu Gaia-i fâ te leh an thlahte an nih aváng erawh chuan râlthuam lam erawh an siamthiam hle thung.

Chu Cyclops- ho thliarkâr an thlen chuan khua a thim daih tawh a.
Khua a thim êm avâng leh Chhûm leivâk atam êm avang chuan thliarkar pawh chu eng anga zâu nge tih pawh a hmuh theihloh hial a.

Chuvang chuan an lawng te chu thlungin, zîng khawvâr hmâ chuan vâukamah chuan an riak ta hlawm a.

A tûk zîngah chuan Odysseus-a chu a ho ṭhenkhat te hruaiin chulai an awmna thliarkâr bul ami, thliarkâr lian zâwk ah chuan lawnglêngin an va inkar chhuak leh a. midang ho erawh chu an lawng lian ah chuan anlo awm thung a.

Chu thliarkâr an va thlen chuan tuifinriat kam maia kham bang sâng pui pangag chuan pûk lian ṭha zet mai hi an va hmu a, a luhka chung chu thingkûng hian alo hual mâwi a. Chu chu Beram leh Kêl ho riahbûk a ni.

Pûk pâwnah chuan tualzâwl zau tak mai hi a awm bawk a, a lei ṭhuthmun aṭangin lungbangin an hung kual vek a, a khât mawi tâwk in pine leh oak thing hi anlo phun thluah mai bawk a.

Chulai hmun chu Milian pakhat riahna a ni a, amah tak phei chu alo awmlo.

Pûk chhûngah chuan an lût a, Mei te chhêm in kêl hnute um khâng te chu pah in a neitupa lo haw chu an nghâk a.

Rei vaklo ah chuan a neitupa chu a lo haw a, A zanriah bâwlna tûr thingbung tam êm êm mai hi arawn pu hâw a, a pûk chhuat a a han keuh dawp mai chu a tháwm a ṭha ham ham bawk a, pûk kilkhâwr ber ber thleng chuan Odysseus-a te chu an va bîru châwih châwih hlawm a.

A berâm leh kêl nû ho chu pûk chhûngah chuan a khalh lût dam dam a,
Chûng a ran te chu an hnute sâwr tûr a khalh lût hi a ni a. A pá ho, a berâm leh kêl pâ te erawh pâwnah, pûk tualzâwl ah a hnutchhiah hlawm a.

An lût kim ta maw tih ah chuan pûk kawngkâ chu lungpui hrawl zet mai hian a khâr a. Chû lungpui chu a'n hrawl mai mai khawp a, Sakawr tawlailír sawmhnih lâi pawhin a awmna hmun aṭang chuan hnuhsawn han tum ta se la, an thei lo'ng e tih tûr hi a ni.

Kawngka a khâr zawh chuan a ṭhu a, beram leh kêl hnute chu a sâwr sak hlawm a.

Chutianga a sâwr zawh hnu chuan mei a han chhêm êng a, pûk kil a Odysseus-a leh a ṭhiante lo tawm ṭhap chu a hmu ta a.

A rûm nghut a, chutah an hnênah chuan, " Tute nge in nih, khawi aṭanga lo kal nge in nih," tiin thinrim deuh hian a ti chhûr chhûr a

Chu Palian pâ pianhmang leh awrâwl chuan Odysseus-a leh a ho te chu a ti hlâu kher mai, An zâm chhe hle hlawm a.

A tâwp ah Odysseus-a chuan hlau deuh chung hian Troy aṭanga anmahni ram lam pan a hâw Achaean- mi te an nih thu te leh an buaina tawh zo zâi te chu a hrilh a.

Chû milian pa erawh chuan Odysseus-a thusawi pawh chu ngaithla lo chuan a tho lawk a, Odysseus-a ho te zínga pahnih chu a han man a, ui note ang lek ah hian ngaiin lei den nan a hmang a. Lei ah te chuan an thluak te chu a baw neih nuaih mai a, an thisen te pawh chuan lei chu a chiah huh zêi zûi a. Chutah an fûke te chu amal mal a pawt bal in a ei zui nghâl hmiah hmiah a.

Ram palailênga sakeibaknei ang maiin a thil ei lai chu a ṭhial buan buan a, an ruh te, an ṭisa leh an kawchhûng zawng zawng nen lam, engmah hmaih lovin a ei zo ta vek a.

Midang ho chuan an hlâu kher mai, an thil hmuh râpthlâk tak avâng chuan an ṭap pûr hlawm a.

Chû Milian Cyclops- pa'n a pumpui a hnawh puar a, kêl hnute tui a in leh hnu chuan a han zi mar vang vang a a, a beram rual ho zîngah chuan mut zâi a rêl ta a.

Rei fe hnu ah chuan hlau chung chung hian Odysseus-a chuan a ngünhnâm phâwiin chu palian hnukpui chu chhah a tum zet a.

Mahsela, a harh chhuak leh vat a, Chutia a ni ber a tihhlum vaih chuan pûk kawngkhâr lungpui chu an mahni ringawt chuan an lum sawn thei dâwn silo a. Chuvang chuan hlâu va khûr chung leh hui pap pap chung chuan zíng khawvâr hun an nghâk leh ta zâwk a.

Zîngah chuan Palian pa chu a tho va, mei a chhêm a, berâm leh kêl ho chu an hnutê a sâwr sak leh a, chumi zawh chuan Odysseus-a ho te zîng a pahnih chu man leh in tûkṭhuan atân a hmang leh a.

Tichuan awlsam tê in pûk kawngkhâr lungpui chu nam sawn in, a rante chu a khalh chhuak a, lungpui bawk chuan pûk kawngkâ chû a khâr lehnghal daih a.

Nileng in Odysseus-a te chuan tlânchhuah dân tûr leh phuba lâk dân tûr an ngaihtuah a.

A tâwpah chuan Odysseus-a remruat ang chuan tih an tum ta a.

Cyclops- pâ chuan tiang hrawl tak mai, lawnglian tak puanzâr ngûl chen lai a sei leh lian Olive- thing hring hi a nei a, Chu chu a ro hun a tianga hman a tum a ni ngei ang.

Chu thing chu lâ in feet ruk vêl a sei tûr hian an tan a, an tan chhum sâ chu a hmâwr lehlam thel mâm in, a lehlam hmâwr chu an zum thung a, meiah chuan a zum lai chu an rawh chang zual sauh va.

Chutia an tih zawh hnu chuan ran êk kâr ah an thukru a, Tichuan Cyclops- pa mutthilh hun a a mit chhun nân a hman an tum a.

Tlâi alo ni a, Pûk neitupa chu a ran rual nen an rawn hâw leh ta a. Hemi tlai hian a ran rual ṭhenkhat te chu pâwn ah hnutchhiah tawh lovin, an vai mai chuan pûk chhûngah a rawn khalh lût vek a. Lung chuan pûk kawngka chu a khâr leh a.

A ran hnute te a sâwr leh a, chumi hnu chuan a ngaite bawk in Odysseus-a ho te zînga pahnih chu man leh in, a kut chak tak leh hrawl tak mai chuan a pawt sawm leh a, zanriah atan a hmang leh ta a.

Chutianga a ei mêk lai chuan hlau chung chung hian Ivy- thinga siam thlêngkum, uain dum duk ruih mai dahna kengin Odysseus-a chuan milian pâ chu a va pan a, a fin vâr chhuah in,

"En teh, Cyclops, Mihring sâ i ei bawk a he uain hi han in chhin teh khai, eng ang uain chiah nge lawngah kan neih i hre mai ang, kan chunga khawngaihna i lantír a, kan ram lama min hâwntîr theih beiseiin he uain hi i intür thilhlan atân a i hnena rawn keng ka ni," a va tî a.

Chu pa chuan mihring sâ la ṭhial nuau nuau chung hian Odysseus-a chu a en vung vung a.

Chutah rang zet hian a ban a, uain chu a tlâk zui nghâl ta pawp a, uain chu tui a tih avâng chuan adang la leh tûrin a ti a, Odysseus-a chuan pêk belh zêl in, thlêngkum lian thum lai hi a in ta a.

A in tam bawk a, Uain chuan reilo te an a ti zawi a, chhuat lai ah chuan a mu zangthal ta hû a, a rûm deuh chhur chhur hnu chuan tui tak hian a muhil zui ta daih a.

Chutia a uain rûi mutthilh tui lai chuan hmanhmawh tak hian an thing thuhrûk chu an la chhuak a, mei a vut zîngah an thawlh sâ a, chutih pah chuan Odydseus-a chuan a ho te chu zâm hauhlo tûr hian a fuih sauh sauh reng bawk a.

Chutah an thing rawh sat chu thuk aṭang chuan lachhuak in an vai mai chuan an vuan ṭaih hlawm a, theihpatâwp a nâ hian Cyclops- pâ mit ah tak chuan an zu sawh ta ngheng mai a.
An chhun nat êm avângin a mit ah chuan thing zum chu a bûr vû a, thisen tam tak hi a rawn luangchhuak nghâl nguah nguah a.

Chutah, râk ruai ruai chung hian arawn tho chhuak a, Odysseus-a te ho pawh chu rang tak mai hian pûk mawng kil lamah an bîru zui nghal vat a.

A mit aṭang chuan thing zum chu ṭê ruai ruai chung hian a phawi a, thinur tak mai hian a paih ṭhuai a.
A na tuar chu a rûm hluah hluah a, a kut chuan a dap ruak ruak reng a.

A pûk kawngkhâr lungpui chu lum sawn in, kawngka ah tak chuan a ṭhû a, berâm rual ho zînga Odysseus-a te an chhuah ve leh chhuah ve loh chu a lo dap zêl a.

Chutianga pûk kawngka a aṭhut tlat avang chuan an buai kher mai, an hmabâk chu thil râpthlâk eltiang, thih leh dam inkâr tak meuh meuh anih avângin chêt lâk dan tur an ngaihtuah nasa kher mai.

Cyclops- pa in alo man leh vaih chuan an chan tûr chu an hrechiang ropui mai sî a.

Tichuan, Odysseus-a chuan ruahmanna ṭha tak mai a nei a, mahse chu pawh chu hlauhawm tak a ni.

Thâwm dîm deuhvin berâm pâ pathum chu hrui hian a phuar a, a lâi ber a awm berâm hnuaiah chuan mi pakhat zeel an bîru ang a, a sîr a berâm pahnih te chuan an hliahkhuh dâwn a ni.
Berâm pathum ah mi pakhat zel an awm dâwn tihna anih chu.

Chutiang anga Odysseus-a ruahhmanna ang chuan an in siamrem a, berâm hmul buk tak hnuai, a dul hnuaiah chuan a zangthal zâwngin an uai bet ta rân hlawm a, Chutiang rêng rêng chuan zîng khawvâr hun an nghâk a.

( Cyclops hi mit pakhat chauh nei milian a ni a, A chal lâi ah tak mit pakhat lian tak a nei a ni, Chuan, A berâm leh kêl te pawh hi lian tak tak, milian ransa chî an ni tihna a nih chu. CR).

Zîng khua alo vâr chuan berâm leh kêl te chu tlatchhuah tumin an phusa ṭan a. An pû lah chuan na tûar chung hian a ran ho chu a lo dek zêl a ; mahse an dul ah mihring an beh leh beh loh lam erawh uluk takin a dap lêm lo va.

Chutiang chuan an ni ho chu him takin pûk aṭang chuan an chhuak a, Pûk aṭanga hla vak lo ah chuan chhuk in Berâm thâu ṭha ṭha te chu hmanhmawh tak hian an lawng lamah chuan an khalh thla dum dum a.

An lawng lêng ah chuan an thiar lût vat vat a, insiam rem thuai thuai in tuifinriat lamah chuan an in kar chhuak ta nghâl a.