GREEK MYTHOLOGY | Perseus & Medusa

Greek ho thawnthu ah chuan pasalțha ah Achilles-a chanchin hi a lâr ber a, chumi dawt ah chuan Hercules anih loh pawh in Medusa leh Perseus-a chanchin hi ani hial ang.

Medusa-i hmel ringawt hi chu hmulo leh hrelo kan tam vak lovang a, a thawnthu chiang erawh kan hriat lutuk ka ringlo. Medusa-i hmel hmu reng reng chu chawp leh chilin lungah an chang nghal țhina, a hmel rapthlak leh hlauhawm lutuk vang niin an sawi bawk țhin.

Ziaktu tam ber chuan Medusa-i hi ramhuai sual leh rapthlak tak angin an tarlang fo țhin a, mahse duh vang reng pawh nilova anchhedawng, mihring zinga awm tlaklo khawpa hremna tuar ta a ni ve tlat a. Medusa tih awmzia tak phei chu Venghimtu (Guardian,Protectress) tihna daih a ni..

A hlauhawm zia leh mihring tam tak lunga chantir tu a nihdan te chuan sawi a hlawh em em a, mahse mihring anchhedawng leh khawngaihthlak tak a ni tih erawh sawilan a ni ngai meuh lo.

Medusa- hi Lei Pathiannu Gaia leh Tuipui zawng zawng Pathian Oceanus te fa Lui Pathian Phorcy-a leh Ceto(keto)-i te fa ani a, a unaunu te chu, The Grey Sister, Ladon, Thoosa, Syclla, Charybdis, Sthenno, leh Euryale-i te an ni.

Medusa-i te unau hi 'Tuipui Huai' kan tih ang deuh vek kha an ni a. an vai hian thilnung rapthlak tak vek anni.

Graeae/ Grey Sister te hi dawithiam pitar pathum mit pakhat nei Dino,Enyo, Pephredo-i te kha an ni.

Charybdis-i hi chu livir, mi hîp țhintu ani a, Lawng tamtak a chhung ah a hip lut țhin, Nikhat ah tui vawithum a phuhchhak a, vawithum bawk a hîp lut leh țhin.,

Scylla-i pawh hi Charybdis-i bul lawk a awm ani a, an pahnih hian Ithaca Lal Odysseus-a te Troy khaw rûn haw lam anlo tibuai anih kha. Syclla-i hian Ke rapthlak tak tak sawm leh pahnih anei a, Nghâwng sei pui pui paruk lai anei bawk, a ngháwng hmawr tinah chuan lu rapthlak tak tak paruk anei țheuh a, a lu zawng zawng chuan hâ tlar thum anei țheuh bawk,

Ladon-i erawh chu Dragon rapthlak tak ani a, Zeus-a leh Hera-i te inneih chhinchhiahna Rangkachak Apple kûng a vêng țhin.

Thoosa-i pawh hi Tuipui Lasi kan tih ang deuh ani a, Tuipui Pathian Poseidon-a nen a an fa chu Cyclop Polyphemus-a ( milian mit pakhat nei) Odysseus- an a mit atih del sak tâk kha ani.
Sthenno leh Euryale-i te hi rûl ang deuh, sa hlauhawm tak anni..

Medusa-i hi Gorgon anti leh țhin a, sa hlauhawm anih hnu hian Gorgon anga sawi ni mahse, a ni lo atih theih bawk.

A chhan chu Pathiannu Athena- in a anchhia alawh hnu khan Island Of Sarpedon, Cisthene- a chêng, ni hmu ve ngailo Thihna thlarau rapthlak Gorgon unau te bula chêng ve turin a awm ta chauh zawk ani. Tin, Lamia-i, a kawng achin hnuailam rûl, a chunglam mihring pangngai, hmeichhe hmelțha tak nen hian kan sawipawlh emaw ni le aw atih theih bawk, Lamia-i hi Libya Lalnu ani a, Pathian ropui ber Zeus- nen hian fa an nei a, Zeus-a hmei ani bawk. Zeus-a nupui inneihna Pathiannu Hera-i hian apasal hmei Lamia-i hi a thîk hle a, a fa te zawng zawng a rûkbosak a, amah pawh chu sakawlh Rûl rapthlak takah a chantîr a, a fa te hi a ngaih em avangin mihring naupang ho a rubo ta țhin ani.

Greek thawnthu ah chuan Medusa hi Greece ram nula hmelțha em em mai a ni a. Mi tam takin an ngaizawng luih luih renga, Lal tam tak te pawhin nupui atan an duh ve em em țhin. Mahse Medusa-i chuan an Greek Pathiannu Athena(Finna Pathiannu: Goddess of Wisdom) tana damchhunga rawngbawl chu a thlang ta zawk a. Pathiannu Athena- tana inserh hrang tur chuan an Pathiannu temple Parthenon an tihah chuan a awm ve țan ta a.

(Zeus-a fanu Finna Pathiannu hmelțha Athena-i hi Athens-khaw dintu ani bawk a, a mah biakna temple lâr tak Parthenon pawh hi Athens-khua a awm ani. Parthénos/Parthénoi : hmeichhe thianghlim pasal neilo tihna ani a, Naòs : Temple, tihna ani bawk a, hemi thu pahnih lakawp hian Pathiannu thianghlim pasal neilo Athena-i tan hian Parthenon anti ani, a awmzia chu Hmeichhe thianghlim temple tihna anih ber chu....Khawvela ka kal chakna ber ani.hehe).

Tichuan Parthenon temple ah chuan hun rei tak chu Athena-i tan chuan rawng a bawl a, nitin rinawm takin an Pathiannu hmaah chuan a inthawi țhin a ni.
Mahse a hmelțhat leh piannalh em vang chuan Tuipui Pathian Poseidon-a meuh pawhin a lo ngaizawng ve tlat mai. Athena-i hian Medusa hi a hmelțhat em avangin a îtsîk a, chuvangin apatea Poseidon- nen hian an in tiamrual a, Ni khat chu Medusa-i inthawi tura a kal lai chu Poseidon-a chuan a lo nangching a, a inthawi țhinna hmun Athena-i lim hmaah tak chuan a pawngsual ta a. Medusa-i chu hreawmna tinrengin a khat a,Greek dâna pasal nei thei a ni tawh lova, Parthenon temple-a rawng bawl tlak a ni tawh bawk silo. Chu mai bakah rinawm taka rawng a bawl sak țhin Athena-i ngei pawh chuan Medusa-i chu thiamloh a chantir leh ta zawk tlat mai si.
Medusa-i chungah chuan anchhia a lawh ta a, nula hmelțha em em Medusa-i chu hmel rapthlak tawpkhawkah a chantir a, a sam rangkachak rawng sei leh mawi em em mai te chu rûl tûr neiah a chantir ta bawk a ni. Chu mai chu duhtawk lovin Greek ho thihna thlarau Gorgon an tih ho zinga awm ve tur leh a hmel hmutu apiang lunga chang tur chuan anchhia a lawh zui ta a. Nula thianghlim, hmelțha em em leh an Pathian rawngbawla inserh hrang țhin chu a thiamloh ni miah lovin ramhuai anchhedawng ah mai a lo chang ta.

A lu ringawt pawhin lunga chantir theihna a neih avangin pasalțha huaisen tam takin a lu lak tumin an zawng renga. Mahse Medusa-i lu la thei tumah an awmlo a. Medusa-i awmnaah chuan pasalțha chi hrang hrang te ruang lunga chang tawhte a in tlar ta țeuh mai a ni.
Poseidon- an a pawngsual hnu hian fa pahnih Medusa hian anei a, a fa pakhat chu michak leh milian Chrysaor-pasalțha lâr tak kha ani a, pakhat erawh chu Sakawr thla nei thitheil lo Pegasus- a ni.

Chutih hunlai chuan Greek khaw pakhat Argos Lal, Acrisius-a chuan fapa a nei thei tlat lova, fanu Danae-i chauh chu a nei a. A mangang chuan puithiam rawn in fapa a dil ta a, mahse chu puithiam chuan tupa a neih tur thu leh a tupa ngei chuan a la thah tur a lo hrilh ta a. Lal Acrisius-a mangang chuan a fanu hmelțha em em mai Danae-i chu in sâng takah a tawmbo tir ta char char mai a. A thih ṭhak thleng tawmbo tir chu a tum ber a.

Mahse Danaei chu Greek Pathian te zinga chungnung ber Zeus-a chuan a lo tlawh țhin a, reilote ah Danae-i chuan Zeus-a fa chu a pai ta a. Zeus-a leh Danae-i fa lo piang chu Perseus tiin a ko a. Pathian leh mihring thlah(demi-god)a nih avang chuan Lal Acrisius-a chuan a hlau lehzual a, tuipuiah a thawnbo ta daih mai a.

Perseus-a leh a nu Danae-i chu rei fe tuipuia an bo hnu chuan sangha mantu Dictys-an alo chhar a, thliarkar pakhat Serifos khua ah a hruai a, He Serifos Lal hi Dictys-a unaupa ani.

chutah chuan rethei takin an khawsa ve țan a. Perseus-a tlangval ve meuh pawhin, a nu Danae-i hmelțhatna chu dang lo reng reng a. Serifos khaw lal Polydectes-a chuan Danae-i duhlo chung chu nupuia neih luih a tum ta hial a. Perseus-a chuan a nu chhan nan mi tam tak la tih theih ngailoh, Medusa-i lu lak chu a tum ta a.
Tichuan Medusa-i awmna lam pan chuan a chhuak ta a, mahse hmanrua leh hriamhrei engmah a nei lova, Medusa-i chu engtia thah tur nge tih leh engang hmelpu nge tih a hre miah lo bawk a. A tihngaihna hrelo chuan a pa Zeus-a hnenah chun a țawngțai ta a, Zeus-a chuan Perseus-a chu pheikhawk thlawk thei(winged sandals) a lo pe a. Tin Medusa-i thah theihna tura hmanraw pawimawh tak tak te chu Stygian Nymph (Lasi kan tih ang hi, Forest Nymph anti bawk)-ho in an neih thu ahrilh bawk a.

Perseus-a chuan Stygian Nymph ho awmna ahriat hnu chuan a kal ta vang vang a, Nymph ho awmna chu a thleng thuai a. Stygian nymph ho chuan Perseus-a thil tum an hriat chuan a hmanraw mamawh tur te chu an lo pe ta a. Chung te chu Zeus-a ngunhnam (Sword of Zeus), Athena-i phaw (Shield of Athena) leh Thihna pathian Hades-a lukhum ( Helmet of Hades) te an nia, chung hmanraw pathum te nen chuan Medusa-i awmna lam chu a pan leh ta.
Medusa-i awmna a thlen chuan a hmaa pasalțha huaisen te ruang chu a lo awm țeuh tawh mai a, Perseus-a pawh a zâm ve khawp mai. Medusa-i hmel awmdan lah tumahin an sawi thei silo, a hmu tawh apiang lungah an chang zel si a. A hmazawna thil awm pawh hrelo chuan hmalam a pan ta zel a, hmaichhana Medusa-i hmel hmuh chu a țha dawn lovin a hria a. A phaw kenlai ațanga Medusa-i thlâ lo lang ațang chuan a tinzawn thei ta a, rei fe a veh hnai hnuah chuan Medusa-i lu chu a chhawk bung ta hmawk mai a ni.

Medusa-i lubung chu ipah khungin Sakawr thla nei Pegasus a chuangin a thlawh haw pui ta vang vang a, Greek ho thawnthu ah chuan Hetia a thlawh haw na lama Sahara Desert chung zawn a thlen hian Medusa-i thisen chu a far a, chu thisen ațang chuan thlaler rul tur nei chi hrang hrang an piang chhuak zut zut reng bawk a., Tin Tuna Tuipui sen kan tih pawh khu Medusa i lu ațanga thisen far ațangin a sen ta vek mai anti bawk.

Chutia a haw kawngah chuan tuipui a nula hmelțha tak mai anlo phuar beh hi a chhanchhuak bawk a, he nula hi Andromeda-i ani a, Ethopia Lal Cepheus leh Cassiopeia-i te fanu ani.

Andromeda-i hi a hmelțhat em avangin anu Cassiopeia-i chuan Tui Pathiannu te( tuipui Lasi, Nymph) ai pawh in ka fanu hi a hmelțha zawk ati a, chu chu Tuipui Pathian Poseidon-an alo hriat chuan a thinrim hle a, an fanu chu Tuipui sa hlauhawm Cetus chaw atana an pek loh chuan an khua chu tihchhiat vek ah a vau a, tichuan hreh tak chungin Cetus chaw tur chuan an pe a,
mahse Perseus-a chuan Cetus lak ațang chuan chhan in, Andromeda ei tuma Cetus alo kal veleh a ip a Medusa lu bung chu phawrh in a hmuh a, Medusa hmel a hmuh chuan Tuipui sa hlauhawm Cetus chu lungah a chang ta vek ani.

Tichuan Andromeda i chu hruai ve zelin an khua an thleng ta a, mahse Serifos thliarkar an thlen chuan a nu Danae-i chu an lal Polydectes-a chuan neih luih a lo tum mek a, Perseus-a thinrim chuan Medusa-i lubung chu a la chhuak a, Polydectes-a hmaah tak chuan a lek kâng ta a, Medusa-i hmel hmu piang chu lungah an chang ta vek mai a.

Tichuan Perseus-a chuan Mudusa-i lubung chu ram ropui tak Mycenae din nan a hmang tangkai ta hle a, rei fe indonaa a hman hnu chuan Athena-i hnenah chuan a pe kir leh ta ani.

Andromeda nen hian inneiin hlim takin a pu lalram Argos ah ro anrel a, an fanu pakhat chu Sa hlauhawm Gorgon(medusa) a thah tâk hming chawiin Gorgophone- tih in aphuah a, a fanu hi hun lo kal leh zel a Spartan Lalnu Hmelțha Helen-i nuhrawn kha a ni.