GREEK MYTHOLOGY | Achilles VS Hector

Troy Lal fapa Hector hi Lal Priam-a leh Hecuba-i te fapa a ni a, Priam-a hian nupui leh hmei tam tak a nei a, chûng ho lakah chuan fâpa sawmruk pariat leh fanu sawm leh pariat a nei bawk a, hêng a fâ te ho zîngah hian Hector-a hi a ropui ber a ni.

Hector- hian Cilician Thebes Lal Eëtion-a fanu Andromache-i nupuiah neiin fapa Scamander- an nei a.

Mahse an fapa hi Troy- indo tâwp dâwn khân Achilles-a fapa Neoptolemus- an kulh aṭanga thlâkin a thi ta a nih kha.

Hector- hi Palian êm êm lo, a valai tâwk vel, dâr pharh hlãi tak mai leh inkhâithli tak niin an sawi ṭhin.
Amah hi Lalfapa âwm rêng, zahawm tak a ni a, indo mi leh mi huaisen tamtak zîngah pawh, ' Hei ngei hi a ni,' tih tûr hian a thei hmêl a pu a, Pasalṭha dangte nen a an awm ho pawh in ani erawh chu a uangthuang lova, mahse a langsâr ber a ni thei tlat ṭhin.

Greek- ho ina Troy an do ṭantirh pawh lam pawh khan Hector-a râlrêl thiam leh huaisen vângin Greek ho te kha'n an hneh theilo a, a chan chhe zâwk ah an ṭang zêl a, an beidawn avangin Achilles-a zawngin Odysseus-a leh a ho te an chhuak a, Greek ram zawng zawngah Achilles-a zawng in an vâkvâi a nih kha.

Hector-a anga râlrêl thiam hi Achilles-a leh Odysseus-a chauhlo chu an awmlo a ni.

Tin, Hector- hian Troy indona ah khân Pathian thlah mi chak leh milian tam tak a that a, Phylacus- ram Lal fapa huaisen Protesilaus-a pawh a that a, Tin, Achilles-a unaupa Patroclus-a a that erawh chu a vânduaina a ni ta a nih kha...

Greek ho rammut chhan ber chu Helen-i a ni a, Heleni pasal Menelaus-a unaupa Agamemnon-a hi he rammutna a Greek Lal ho zînga hruaitu leh hotu deuh ber a ni a, Mahse Achilles-a leh a ho Myrmidon- ten a Troy leilung an rawn rah ve a chinah khan Achilles-a nen hian an in tâi reng a.

A chhan pawh Achilles-a hi a huaisen in indo a thiam a, tin Myrmidon ho pawh indo thiam tal an nih bawk avangin anni rawnkal achinah Troy sipai te chu an hnungtawlh ta reng a, Achilles-a hming pawh reilote chhûngin a lâr ta hle a.

Amah aia Achilles-a a hmingthan tâk avangin a thîk êm êm a, chuvang chuan an in ngeih theilo a, Achilles-a phei chuan Troy rûnna ah thâ a thawh duhlo ta hial a.

Achilles-a leh Myrmidon te hian Troy khaw bul lawk ami, Sipai ṭha bîk ina an vên Pathian Apollo-a puithiam ho chênna Lyrnessus- rûnin mihring zawng zawng a that fai deuh vek a, Apollo-a temple a thil hlû zawng zawng pawh râllâk atân ala fâi vek a, Tin, Puithiam Mynes-a nupui Hector-a unaunu Briseis-i a man bawk a.

Hemi hmâ lawk hian Agamemnon-a hian Apollo-a puithiam tho Chryses-a fanu Chryseis-i a man ve bawk a. Mahse chumi avâng chuan Apollo-a chuan phuba lâ in Greek sipai ho zîngah Hripui a lêntîr vak a.

Achilles-a erawh a hlauh avangin kut athlak ngam ve lo a. Chuvang chuan Agamemnon-a hian Achilles-a hi a îtsîk in a hlau a, an in ngeihloh phah ta reng a ni.

Agamemnon-a nen a anin hmuhthiamloh avângin Achilles-a chu indona ah a telve duh ta lova.

Achilles-a tello chuan Greek sipai te chu an chak thei silo, chuvang chuan Lal ho te chuan a ṭah âw taktê in an rawn sâwm chamchî a, Odysseus-a pawh ina theihtâwp a a sâwm pawhin a beng a chhu ngawng tlat a.

Indona a atelve duhloh avang chuan Pathian te chu an buai kher mai, Achilles-a thinlung sak lutuk mai chu tu Pathian mahin an su hawng zo lo.

Indona a a telloh chuan Pathiante remruat sa, Troy kulh chu tihchhiat a ni dawn silo, chuvang chuan Zeus-a chuan phakar chhuah in, Achilles-a unaupa Patroclus-a thinlung ah hna a thawk ta thung a.

Patroclus-a chuan Achilles-a hnenah, " Kan Lawng leh rawsawt an man a, tuipui khamah Trojan sipaite an rawn in hâwr khâwm tuau tuau va, Tunah zet chuan Greek sipaite buaina leh nanganna chuan a vâwrtâwp a thleng chho mêk a nih hi.

Heti chung hian i thinrimna chu i pai reng ang a, anmahni ṭanpui tûrin kut i thawh miah lovang maw?

Hmeichhe thinlung i pû a, mipa thahrui i nei lawi sî anih hi, Chutichuan, kei chu Myrmidon sipaite nen indona ah kan chêtchhuah ve mi phalsak la, i thîr kawr min hâktîr bawk ang che. Trojan ho chuan indona ah i telve leh ta emaw an ti anga, tichuan Greek sipaite chuan insiamrem lehna türin thâwklâkna hun an nei thei dâwn a ni." a ti a.

Odysseus-a pawh chuan," Indona a i tel duhlo anih pawhin kan lawngte lâk kir leh tuma kan beih hunah i ralthuam famkim a inthuamin rawn inlan vela, i ralthuam an hmuh ringawt pawh in Trojan ho chu an hnungtawlh mai ang." tiin a ṭah âw ve bawk a.

A tâwpah zawng Achilles-a chuan, " Ka lawngte an rawn hâl ve anih ngawt loh chuan ka che chhuak lovang, Awle, Patroclus, Ka ralthuamte an hmuh vânga Trojan sipai te an tlânchhia anih ngai chuan ka ralthuamte chu inbel mawlh ta che, amaherawh chu tuipui kama Trojan sipai te chu va ûmdarh ringawt la, lo kîr leh thuai ang che, Hei hi vawng reng rawh, Troy kulh chu keima lâk tûr a ni a, i va hnaih tûr ani lo.

Troy kulh bulah phei chuan iva tawlh hnâi reng reng tûr a nilo. i hnaih vaih chuan i thî ngei ang. Apollo- an Trojan ho chu a hmangaih sî a." a ti ve ta a.

HECTOR VS PATROCLUS :

Greek sipai ten Patroclus-a anhmuh chuan Achilles-a emaw an ti a, an beidawnna leh thathona hloh tawhte chu an nei thar leh ta a. Lawng kâiah chuan indona chu a vânglai tak a ni a.

Trojan ho chuan Greek ho lawng zawng zawng chu an man zo teuh tawh hlê a.

An lawng kaina hi la ngat thei se chuan Greek ho tân chêt ngaihna a awm lovang.

Myrmidon anlo lang ta.

Thal leh lung lêng nuai nuai kârah chuan an rawn kal a, An thîr lukhum leh phâw chu insi ṭhap in an dah a, lungbang nghet taka rem ang hian anin tlar a.

Hemi ṭuma an indo dâwn zânah hian Hector-a chuan mumang a nei a, Apollo- a chuan he thu hi a hrilh a,
"Naktûk ah Greek ho chuan Troy kulhbang hi an rawn nawr chiam anga, Engang pawhin kulh chhûngah rawn lût dâwnin lang mahse, i che chhuak rêng rêng tûr a ni lo. i nupui bulah awm tlat ang che. Naktûkah chuan mi pakhat, i thah miahloh tûr indona ah chuan alo tel ang a, chumi chu i that palh hlauh vang tih ka hlau a ni. Ani chu Greek ho nen a in indo tâwpna hril tu tûr a ni." a ti a.

Hei hi a chhan chu Apollo-a hian Patroclus-a hi indona ah a tel dawn tih a hriat vâng a ni a. Hector-an Patroclus-a a tihhlum a hlau a ni, Patroclus-a a thih loh chuan Achilles-a te hi Greek ram ah an haw leh mai dawn a, Agamemnon-a nena an in hmuh thiamlo avangin Achilles-a hi hâw a tum tawh sâ rêng a. Achilles-a tello chuan Troy hi Greek ho te hian an hneh thei dawnlo tih a hre vek a.

Mahse Patroclus-a a thih vaih chuan Achilles-an phuba a rawnla ngei ngei dawn a, Achilles-a thinrim chu tuman an dang thei dawnlo a, Pathian te takngial pawh in an hlauh avangin Troy kulh chu a rawn chhu chhe vek mai dawn a ni.

Chu chu Apollo- hian a hriat avangin Hector-a mumang ah pawh a inlâr rêng bawk a.

A mumang avang chuan Hector-a chu a tûk a indona ah pawh chuan a tel ta lova.
Trojan sipai ten Patroclus-a an hmuh chuan Achilles-a emaw an ti a, an zâm hlê a, "Khawnge Hector-a " tiin an aû chuah chuah a.

An phîlî buai lai chuhin Greek sipai te chuan Trojan sipai te chu an bawh ruih ruih a, thlipui angin an thawk a, Trojan ho chu mangang takin an hnungtawlh duai duai reng a.
Khawpui thlengin Greek sipai te chuan an ûm a, Khawpui chu la maithei âwmin alang tawh hial a, Chutah chuan Patroclus-a phûr lutuk chuan Achilles-a thusawi chu theihnghilh in, " Vawiin ah Khawpui hi kan la tûr a ni," a ti a.

Troy mipui leh sipai ho mangang chuan Hector-a an zawng a, mahse hmuh tûr a awm silo.

Paris-a chuan anupui bula a awm a zuk hmu a, " Troy a tlu dâwn e, kut i thawh dawnlo anih pawhin i sipaite mangan zia tal chu han thlir ve teh." a ti a.

Hector-a'n Trojan sipao tlâwm teuh tawh zia a hmuh chuan Apollo-a thu hrilh kha a theihnghilh a, a râlthuam a inbel ta a.

Chutia khawpui an lâk ṭêp lai chuab Apollo-a chuan Patroclus-a tih tîm nan, " Khawpui hi i lâk tûr a ni love,'' tiin alo aû a.

Chutia a tihbuai lai chuan a hnunglam aṭangin Hector-a alo tlân chhuak a, nasa tak a an inbeih hnû ah Hector chuan feiin a chhun fuh ta hlauh mai a. Patroclus-a chu a tlu ta a. A âwmah a rapbet a.

" Achilles, Ka hmaah i tlâwm ta a ni lâwmni?" chapo takin a ti a. A thîr lukhum a han hawn chuan Patroclus-a alo ni a. Patroclus-a ani tih hi tuman an hre lo, Trojan sipai leh Greek sipai zawng zawng te pawh in, Achilles-a tûrah an ngai vek a.

Chutah Patroclus-a chuan, " Hector, Ka unaupa Achilles-a chu a ropui a, nanga hneh rual a ni lo. Keipawh Apollo- an a ṭanpui vâng che in min hneh chauh a ni. Pathian te pawh ina an hlauh leh an zah ka unaupa Achilles-a chuan ala rawn that ve ang che." a ti a. Tichuan a thi ta a.

Hector-a chuan a mumang kha a hrechhuak ta zawk a, inchhîr takin a âwm a chûm a, " Aw, Pathian te u, thil ka tisual reng mai." tiin a aû vak a.

Patroclus-a thih thu hi Nestor-a fapa Antilochus-an Achilles-a a rawn hrilh vang vang a.

Hetih lai hian Achilles-a chu tuipui kam ah a awm daih a.

Antilochus-an a thil awmzia a sawi zawh hnu chuan Zeus-a thuchah kengin Chhimbâl Pathiannu Iris-i alo kal a, " Achilles, kal lâ, Patroclus-a ruang va la rawh," a ti a.

Tichuan Achilles-a chu Pathiannu Athena-in a vêng a, A phâw rinawm tak a sawh hliah zêl chungin Patroclus-a ruang chu a la thei ta a. Tuipui kamah a vûina hun serh chu an hmang a. A taksa chu an hâl a, a vâp chu tuipui kamah an phûm a.

Tunah chuan Achilles-a chuan Agamemnon-a chunga a thinrimna te chu a theihnghilh a, Patroclus-a phuba lâk chauh lo chu lungkham dang a nei tawh lo.

Hei hi Zeus-a remruat dan leh duhdan chiah a ni a, Agamemnon-a nena an in tihthiamloh avangin Achilles-a chu indona ah a tel duhtawhlo a, Greek ramah haw daih a tum a, Greek rama a haw vaih chuan Troy kulh chu tihchhiat ani thei dawn silo a, mahse Zeus-a chuan Achilles-a thinlung sak lutuk chu a hneh thei silo.

Chuvang chuan Zeus-a chuan Achilles-a chu dâikhalh in, indona a Patroclus-a athih chuan Achilles-a chuan phuba la in Troy kulh chu a a chhuchhe ngei ngei dawn tih a hre kar a, Tichuan Patroclus-a thinlungah hna a thawk a, indona ah tel tîrin a thih tír ta rêng a ni.

A nu Thetis-ina a rawn tlawh chuan a lungngaih chhan te a zawt a.
Achilles-a chuan,
"Ka nu, Indona a Patroclus-a akal hlân khan Zeus-a hnenah Patroclus-a vênghim tûrin ka ṭawngṭai a, min chhânna chu hei hi a nih tâk hi, chuvangin keimah ngeiin ka unaupa phuba chu ka la dâwn a ni. Zeus-a hnenah chuan ti hian lo sawi la, Hector-a nena kan inbeih hunah chuan pathian tumah rawn inrawlh lo sela, keimahni chakna leh theihna in kan inbei ang." a ti a.

A nu chuan," Ka fapa, Hector-a enge i chungah thleng dâwn tih i hre lo anih hi. Hector-a thih hunah chiah i tan hunbî a kal ve dâwn a, i thih hun a hnâi deuh deuh dâwn a ni." a ti a.

Achilles-a chuan, "Ka unaupa tello chuan dam pawh hi engmah a ni lo, Mahse ka râlthuam erawh Trojan - ho in an phur bo si.." tiin a chhâng a.

A nu chuan, " ka fapa, I râlthuam chu ka lo ngaihtuah ang, Pathiante Râlthuam chher ṭhin tu Mei Pathian Hephaestus-a hnenah kal ang a, ka lo siamtîr ange" tiin a chhâng a.
Tichuan Tuipui a Zâwngdulinu( dolphin) chungah chuan chuang in akal ta nghal a.

Achilles-a râlthuam chu Hephaestus-a chuan a aia ṭhâ awm tawhlo tûrin alo siam sak ta bawk a.

Tin, Achilles-a nû Thetis-i chu Olympus tlângah lâwn in Zeus-a hnenah chuan a han kal ta bawk a.

""Aw, Ka pa Zeus, Hector-a'n Patroclus-a athah avângin ka fapa chu a lungngai hle a. Patroclus-a indona a akal hma khan ka fapa Achilles-a chu i hnenah arawn inthâwi a, mahse Patroclus-a chu a boral ta tho si a.

Chuvangin tunah pawh ka fapa chu ala thinrim êm avângin inthâwi pawh a inthâwi duh tawhlo hial a, Nimahsela, keimah vangin Achilles-a chu hrem lul suh ang che, A dam nî a rei dâwn lova, a hun tâwite lungawi leh hlim taka a hman ka duh a. Tin, Hector-a nen a an inbeih hunah pathian tumah inrawlh lo tûrin ka fapa chuan a dîl bawk che a ni." a ti a.

Zeus-a pawh chuan chu chu remti in Pathian zawng zawngte chu a kokhawm nghal a, an hnenah chuan,

"Tunah chinah tumahin Trojan leh Greek- sipai ho te hi in ṭanpui tawh tûr a nilo. Hector-a leh Achilles-a inbeih hunah tumah in ṭanpui loh tûr, an mahni chakna leh thiamna hmang chauh in an inbei ang." tiin a hrilh a.

.ACHILLES VS HECTOR :

..Zîngah chuan Hector-a chuan a nupui Andromeda chu duat taka kuah in,

"Vawiin ah min bei tûrin Achilles-a alo kal dâwn a, Apollo-a chuan min ṭanpui a duh reng a, mahsela pathian hovin an rêl tawh anih chuan min pui thei tawh lo ang. Awle, Achilles-a emaw tiin a unaupa Patroclus-a ka that a, ka mi thah kha ka thah loh tûr a ni a, hemi hun lo thleng tûr hi Apollo an minlo hrilh tawh a, ka mumangah min hrilh a, mahse ka vanduaina bul pawh a ni maitheo, ka mumang kha ka lo theihnghilh si a.

Ka pa thu ka zawm a, ka hmangaih che a, pathiante rawng ka bawl a, Trojan- tan ka do bawk a. Ka damchhûngin thil tihsual pakhat chauh ka nei, chu chu Patroclus-a ka that kha a ni. Achilles-a chuan phuba lâk atum anih chuan Pathiante pawhin an dang zo dawn lova, Troy leh Greek- indona ho kei leh Achilles-a chinfel tûr a ni." a ti a.
Tichuan uluk takin a râlthuam ṭha ber ber te chu a in bel a.

...Nî chu a chhuak sâng tawh hle a, Vân chu eng emaw ti taka phusak tuma in sîksawi ang hian alang a, Favâng a ni a, vân leh khawvêl chu veng uar te tilovin , ruahthiampui inṭham tûr ang mai hian kâwlkilah chuan chhûm a in dinlet zut zut a. Vân zâwl sânglam pan silo hian kâwl tâwpah chuan mei hu tawng ang mai hian a sen khuih khuih a.

...Achilles-an Patroclus-a phuba lâk atum avâng chuan Troy khawpui chu a ngui ruai a, Tu pawh an awm hlê hlê theilova, Thil eng emaw lo thleng tûr nghâk ang mai hian an phîli a. Khawpui chhimlam a Apollo-a temple ah chuan pathian be tûrin mipui an kal dûl dûl a. Khawlaiah te chuan pungkhawmin nunau te chu lungngaiin an indawm kun tlawk tlawk bawk a.


Indona Pathian Ares-a te, Ramsa ho vêngtu pathiannu Artemis-i te, Hmangaihna pathiannu Aphrodite-i temple ah te pawh chuan an pungkhawm a. Achilles-a laka humhimna dîl in an ṭawngṭai nuaih nuaih a.

A sakawr Balius leh Xanthus- chu muangchanga khalh in Achilles-a chuan Troy kulh chu a pan ta hnak hnak a. Phâizawla akal lai chuan tumah a hmulova, thei reh tak hian a reh tlawk tlawk a, Lei let te chu a kalpêl a, in te chu luahtu neilovin alo ruak hiai hlawm a. Nakinah chuab Hmeichhe pakhat bâwm chhîpchhuan hi amah tâwk zâwngin alo kal a. Achilles-a chuan, " Nula, mî rêng rêng hi engati nge hmuh tûr an awmloh? '' tiin alo zâwt a.

Hmeichhia chuan, " Troy khawpuiah Achilles-a alo kal dâwn a, Mipuite chu hlâu vin kulh chhûngah an tawmbo zo a ni." tiin a hrilh a.

Nakinah chuan Troy khawpui chu a thleng ta a. Kulh bang hungna kotlangah chuab Trojan sipai te leh mipui te chu anlo tlim hmur a, Achilles-a, amah chauh a alo kal chu tî tak chung hian anlo thlîr ṭhuap a.

Kulh kawngka chung zâwn dawh zâwlah chuan Lal Priama leh a mi pawimawh ho te bâkah Helen-i, Paris-a, Hector-a nupui Andromache-i te, Hector-a nau Cassandra-i leh Amazon Lalnu Penthesilea-i te anlo ṭhû a.

Kulh kawngkapui chu alo in hawng a, Achilles-a tâwk tûrin Hector-a chu sakawr tawlailir in arawn chhuak a.Ngûnhnâm apai a, Fei leh phâw a keng bawk a, a che rêng rêng chu a zei hle a.Thiam takin a sakawrte chu a thunun a.

An pumrua a intiat tâwk hlê a, inbei âwm tak pawh niin an lang.

An tawlailîr aṭanga chhukin an in veh a, Thih thleng ṭhaka insual tûr annih avangin an fîmmkhur dûn hle a, Achilles-a chuan Hector-a chu a han zuan vak a, a zuan pah chuan a fei hmingthang ' Peleus-a fei ' antih chuan a chhun a .(Peleus-a hi Achilles-a pa a ni. CR)

Tumah Achilles-a fei chhunah hian an in vêng hman ngailova, Mahse nalh takin Hector-a chu alo indang a.
A chhun na bawk a, a ri bawl a.

Tunah chuan Hector-a pawh a hmêl alo hlauhawm ta kher mai. A fei chu a vaivir a, chunglam leh hnuailamah a hâwl tawn zawk zawk a.

Chuti ang rêng rênga insual leh hriamhrei chelek thiam chu a entute chuan anla hmu ngailo. Amaherawhchu, mipui leh sipaiho tân chuan hmuhnawm teh mahse, Priam-a leh Andromache-i te tân erawh chuan thil zawng zawng a thil hmuh hrehawm ber a ni âwm e. Andromache-i chuan a âwmah a kut dahin a thaw hlawp hlawp a.

..Hector-a leh Achilles-a te insual thâwm chuan Troy phâizâwl chu a nghawr nghîng dur dur a. Chuti ang renga inbeihna râpthlâk leh nasa chu ala awm ngailo.

An fei leh phaw inchhun rîk an hriatin an bulhnaia lui Pathiante pawhin hmun hrang hrang aṭangin anlo thlîr ve reng a, Tin, Greek- sipai ho te pawh an inbei entûrin Troy kulh kianga tlângah anlo kal khâwm bawk a.

Nakinah chuan Hector-a chan chu a chhe ta hret hret a. Pathian Apollo-a chu Ida- tlângah a ṭhu a, Hector-a chu a khawngaih êm avangin a thinlung a khûr a, A rûkin Hector-a chu puiin Achilles-a fei chu atih thlâksak a. Chu chu a hmuhin Pathiannu Athena-i chu a thinrim hlê a, Achilles-a ṭanpui tûr chuan chhuah ve a tum a, " Apollo-an Achilles-a fei a tih thlaksak.." a ti a.

Nimahsela Zeus-a chuan, "Insûm kar deuh teh ka fanu, Achilles-a chu Sakeibaknei vânglai tluka chak alawm a nih. Hriamhrei chelekah lah amah han khingpha tûr reng reng mihringah anla piang ngailova, huaisenna lamah lah a thinlung chu hlauhna in a tikhûr ve ngai hek lo. Apollo-a hnenah chuan Iris-i ka tîr ang a, lo inrawlh ve tawhlo tûrin va hrilh rawhse.." a ti a.

Trojan ho chiab Apollo-an Achilles-a fei a tih thlâksak an hmuh chuan an lawm êm êm a, an lal fapa chu fuihin an âu vak vak a.

Achilles-a chuan, " Pathiante'n an ṭanpui che a, diklo takin ka chungah an ti a,...Aw le, Priam-a fapa, Ka thisen i chhuah thei e maw? ka taksa ah i fei chu chhun luh han tum ta che.." a ti a, a ngûnhnâm a phâwi zui nghal a.

Hector-a chuan, " Vawiinah hian ka kut a thi tûrin pathiante'n ka hnenah an rawn hruai che a ni. Achilles, Troy mipui te hian ka thah lai che hi an hmu châk a ni, ka thah hma che in hei chen in rammutna chu a hlawhchham ta tih ngaihtuahna hun neila ka duh..." a ti lêt ve sak a. Tichuan nasa takin an in bei leh ta zak zak a.

An dinhmun han en chuan Hector-a chan chu ṭha zâwk fê in alang a, Mahse an han inbei leh a, Achilles-a chuan a phâw in Hector-a rawn chhunna chu alo dang a, A ngûnghnâm chuan alo khak per zung zung mai bawk a.

Thlî ang maiin a chê chu a rang a, " Trojan Lal fapa, Bei ta che, bei rawh, bei rawh.. Achilles-a hneh theih inringin i tlângau va, tûnah hian i thusawi chu hlen ta che..." hmusit tak in a ti a.

Hector-a chuan a tha tâwpin Achilles-a chu a fei chuan a han chhun leh a, Achilles-a chuan a phâw in alo dang pial a, a ngûnhnâmin Hector-a fei chu a khak per ta lawp a. Trojan kulh kawngkhâr hmazâwnah Hector-a fei chu a tla a. Achilles-a chuan a nawr vak a, a dârah a hliam a, Hector-a chu leiah a tlu ta a.

A thisen chu Troy vaivutah chuan aluang sen nguai a, Achilles-a chuan pan hnâiin,

" Mi â tak ini, Achilles-a hneh theih i in rin lai khân thil pakhat hriatloh i nei a, chuvanga mi bei ngam chauh i ni. Ka thah hma che in ka thuruk ka hrilh ang che, Ka ke artuiah chauhlo chuan tihnat theih ka ni hleinêm. Thi theilo Pathian tluk ka ni a sin.." a ti a.

Chutih lai chuan Pathian Apollo-a chhiahhlawh chu Hector-a ṭanpui turin alo kal a. Mahse Pathiannu Athena- i chu rang taka lo kal ve vat in Apollo-a chhiahhlawh chu a fei hmâwrin a lû ah alo khâwng vak a, a thlawhpui ta daih a. Mahse Apollo-a chhiahhlawh chuan Achilles-a thuruk chu a hre hman tlat.

Hector-a chuan, " Achilles, ka thihhma in thil pakhat chauh ka ngên ang che, Min that dawn ta a. Ka taksa chu ka nu leh pa te hnenah khawngaihin pe la, anni chuan tihdan pangngai takin min vui thei ang, ka ruang tlan nan chuan rangkachak leh tangkarua tam tak ka pa in a pe ang che.." a ti a.

Mahse Achilles-a chuan, " I taksa bûk tâwk pawhin i pa chuan a tlan lovang che, i ruang chi ui leh mulukawlh te'nan ei ang,.." tiin alo chhâng a.

Che thei tawh lova leia tlu reng Hector-a chu vih tum a a tin lai chuan Kulh bang chung aṭangin Hector-a nupui Andromache-i chu ring tak hian alo ṭê chiam a.

" Achilles, ka pasal nunna kha zuah lul rawh, A tlan nân rosum engzãt pawh ngiat la, itih apiang ka pe ang che, .." a rawn ti a.
Mittui tla zawih zawih in, " Khawngaihin, a nunna zuah hrâm rawh..." tiin a ngên mawlh mawlh a

Achilles-a chuan Patroclus-a kha a han ngaihtuah a, Tin, Hector-a hnenah a thurûk alo sawi hman tawh avângin a nunna chu zuah thei niin a in hre lova, Hector-a âwmah chuan a vit a, a hnuk a chhat ta a.

Achilles-a thinlung ah chuan Beidawnna alo lût thut a, a thin aso leh ta êm êm mai a. Hector-a keartui chu a chhun tlang a, bâwng vuna siam hruiin a thil a, nghet taka thlungin lainatna tel miahlovin a hnûk ta hawn hawn mai a. Troy phâizâwlah te chuan tlân kualpui in Greek -sipai ho riahbûk ah a hnûk hâw ta daih a.

..Chuti tak a Lal fapa leh mi zahawm ruang a diriam chu Pathiante chuan râpthlak anti in hmuh hrehawm an ti a.
A hma zâwng zâwng a Achilles-a ṭan tu Pathian te pawh chuan Achilles-a chu an huat phah ta hial a.