GOODBYE MY BELOVED TEXMATED

(He thawnthu tawi hi kum eng emaw zah liamta khan khawiah emaw ni ka chhiar fuh a, ka rilru a hneh em avang leh ngaihnawm ka tih em avangin a ziak tu dil tum in ka theih ang ang in ka zawng a, ka hmu chhuak zo tlat lo mai a. Ka chhiarna lehkhabu pawh ka hrechhuak zo tawh lo.

Hei, kum ral fe hnu ah ka phuah belh a, a ngaihnawm dan turin ka siam rem leh a ni a. A thupui ah 'LUCY' tih ka tum zet ná in, tun ami ang hian ka rawn ti leh ta zawk a ni e.)
..................... ........................ ................. ........................... ...................

Zan khat chu, ka muttui tehreng nen; ka cellphone ri chuan min thawng tho va. Message pawimawh tak tak chauh dawng thin ka nih avangin mutchhuak tho phang leh khaw hmuh phe ruai chungin phur fahran lo hian ka sms dawn chu ka chhiar a.
" Hi there !..Care 2 b my txtmate ? " (Hi, ka tan sms thian ini thei mial lo maw ?)

Khawi lam thu riangvai nge maw ka dawn a, tu fa lu bawk in nge maw tun ang zan rei tawh lutuk a mi rawn thawng tho le ?

Mi rawn thawntu ka hre lova, ka hmelhriat hnen atanga ka dawn ani bawk hek lo. Chuvangin, eng khaw sawi set set lovin ka delete nghal hmak a. Ka cellphone chu khum sir a dawhkanah chuan dahin, muthilh san leh mai hi ka tum a, ka mit ka chhing a, mutchhuakin min zem leh ta riai riai tih ah message tone (ri) chu ka hre leh ta.

" keimah bawk ka ni e, ka sms thian nih chu i rem em ?"... tih hi alo ni leh pek a.

" Tun ang zan rei tawh a sms thian atana mi rawn zawng tu chu tu tak ni ang maw ?"... tiin ka han inzawt ngial thin a, ka hre chhuak zo chuang lo. Chhan zai pawh rel chuang lovin ka delete leh nghal hmak a.

Mi thenkhat chuan chhun en lai chu sawi loh, zan reh ah pawh text message thawn hi an ching hlawm nek mai tih te chu thawnthu hriatin ka hre satliah fo tawh thin. Mahse, kei hi chu SMS thawn hrat tak 'textmaniac' an tih ang chi hi ka ni ngai lo. Khualkhua a zin reng reng thin ka nu leh pate'n cellphone nei turin min tilui a. Phone neih hi a remchang riau ni a sawiin ralkhat atanga min thunun reng theih an duh avangin min hman luihtir ani.

Ka phone chu han switch off daih mai hi ka duh viau na a, ka nu hian zan a mi rawn biak hi a ching riau mai si a. Inah i awm em ? Ka dam tha em ? .. tih te hi min rawn zawt fo thin lah tak a. Chuvangin, han off daih mai chu a finthlak lutuk fahran lo maithei.

Mang bo ṭhak khawpa muthilh leh tumin ka han chhing dek dek a, message tone bawk chu ka hre leh ta.
Number ngai bawk, ava han tumruh tehreng em !!
" ka tana Angel ni turin he msg hi chhangin ka nun ruak leh khawhar tak lak atang hian mi chhanchhuak ta che !!!"

A chhan ka hre mai lo na a, chu message chuan ka rilru a khawih riau ni tur ani. Ka khum ah chuan ka thu chhuak hlawl a, phur zet mai hian a chhan letna tur ka lo hmet mual mual mai hi alo ni a.

" Vantirhkoh ka ni lova, nang chhanchhuak tur che hian Superman- lah ka ni hek lo, mi naran ve mai, a mutui lai i kaitho lekfang ani. Engpawh nise, ka hriat ngai mi ini em ?".. tih hi ka ziak a, ka thawn let ve ta a. Second tam pawh aral hma in a chhanna chu alo thleng nghal a.

" Aih, he thinlung khawhar tak mai hi ila hriat ngailoh ani a, ani lahin a hre hek lo che. I thian nih ka duh a, ka hming chu Lucy Cervantes a ni, Nang ?"

" Chester tiin min ko mai thin, engtin nge ka number ineih a ?" tih hi ka thawn let leh a..
" I fel khawp mai, Chester. Ka phone number tawp pahnih te thlakthleng in ka rawn thawn mai ani," ti hian mi rawn chhang ve thung a.
Ani hi cellphone hmanga ka tawn hmasak ber leh hnuhnung ani hial maithei.

Chumi zan chuan msg inthawn tawn zel in kan chanchin te kan in hrilh dun a. Duhtawk rih phawt tura thenna biahthu kan inthawn meuh chuan zing dar nga (5) a ri tur a ka alarm set chu alo ri ta ral ral a, rang taka tho vin, ka in bual a, coffee leh chhang te ei a ka in hnawhpuar hnu chuan Class kal tur in ka chhuak ta hna hna a.

Chutiang chu kan bultan dan chu ani a, chuta chin ah chuan ngaihtuahna fan thei chi leh thu thlum tak tak hlir hi ka dawng ta fo va. Ka phone arik hlek tawh chuan amah ni ngeia ringin phur takin ka en vat zel a. Amah vang liau liauvin text message thawn hi anuam a, a phurawm ani tih ka hre ta.
Lucy- vang hian thildang pawimawh tak mai ka hriat belh bawk a. SMS kaltlang mai mai pawh ni sela, hmeichhe tan hian ka lo duhawm (romantic) ve hle ani ang tih hi.

Ni khat chu," Thianah mi pawm la, keiin ka thinlung chhungril berah dah che in, ka kalh hmak ang a, tumahin min chhuh theihloh na turin a hawnna chabi pawh ka paihbo nghal daih ang, " tih hi ka dawng a.

Rang takin ka chhanglet nghal a.
" He hringnun khawvelah hian thiantha zawn hmuh mai hi a harsa khawp a, ilo chhar fuh hlauh anih ngai chuan chhuah tawh hlek lo turin chelh hlen reng ang che, chutiang mi chu hringnun thilpek hlu ber anih avangin hloh leh tawh ngai suh," tiin.
A chhan ka hre hauh lo nachungin Lucy-i min chhanna chuan ka thinlung a kâp tlat mai.

" I nun chhungril ber khawih tu chu hlut hle ang che, kir leh tawh ngailo tur a i hringnun khawvel an chhuahsan hun tur i hre lawk si lova."
A tirah chuan ka hrethiam lo ngei alawm, mahse, hriatchian em em mai ka neih pakhat chu, a hnen atanga eng thu emaw ka dawn loh chuan nikhat lek pawh ka awm thei thlawt lo, tih hi....

. In hmachhawnin a sakhmel la tawng lo mah ila, ka ngaina a, ani ka tawng hi ka lawm a. Dik tak chuan ka hringnunah hian hmun a chang lian hle. Nilo, hmun zau tak ani mah zawk awm asin.
" Mi rawn hnaih hlek suh, mi kal pel dah ang e, mi rawn dek hlek suh, mi ti tap dah ang e, mi hmangaih miah suh mal taka awm turin mi kalsan daih palh ang e," tiin ka chhanglet a.
Engvanga chutiang thu te chu thawn ta mai nge maw ka nih le ?

A chhan hrethiam chiah lo mah ila, khatiang thute kha ka thinlung chhungril ber ber atanga lo chhuak anni tlat hlawm si. Hun reilo te chhung chauh msg hmangin kan in be ve mai ani na a, ka thinlung chhungrilah hian hmun a khuar nghet hle tih erawh ka hai hauh lo.

Tumkhat chu, msg mai duhtawk lovin ka va be ta rawih a, mi rawn chhangtu aw chu Angel aw tluk zet a mawi ani, aw dam thlap, zahngaihna ngah leh hmangaihna hlir a khat ni maia mawi ani. Mahse a aw chuan engemaw ka sawifiah thiam mai loh hi a fun tel tlat hian ka hria a. Reilote tak tak chauh kan inbe na a, phone a dah hma chuan be nawn leh ngai tawh lo turin min ngen lehnghal. A ngaihdan chuan sms hmanga inbiak chhunzawm zel hi atha zawk ati alawm.

A aw ngaihnobei leh mawi chungchuang chu ka lu bur ah hian a ri nawn tlut tlut na a, ka thinlung erawh chuan chu aw ngei mai han hriat leh chu a chak tlat reng mai thung a. Han biak leh ngial tum a ka call pawh in, vawikhatte mah phone a pick up duh tawh ngailo. Chutichung chuan msg min rawn thawn erawh a bang chuang lova. A chang chuan thu mawi tak tak te hi mi rawn thawn thin a, chutiang thu te chu ka lehkhabu pakhat ah hian ka lo chhinchhiah zel a. Hmangaihna beisei bo ani thei mai ang em ? Ka hrethiam lo. Chiang taka ka sawi theih erawh hei hi ani; a msg mi rawn thawn te reng reng chu thinlunga khat liam, thinlung taka ziak te an ni hlawm, tih hi.

" Kar lam hla mah se, ka thinlungah erawh i awm reng si. Ka mit ka chhin hian ka kiangah i awm thin asin. Hmu thei ngai dawn lo che mah ila, nangmah ngaihsak tur che hian englai pawhin ka awm reng ang, kumkhua ai pawha rei zawk chatuan thleng in,"..

Christmas atana in puahchah vanglai December thla zan thiang reh nuam taka hetiang thu thlum tak mai han dawn chu nuam tak ani, hetih hun ah hi chuan thla khat vel lai msg hmangin kanlo in kawm tlangnel hman hle tawh hi alo ni a. Alo sawi dik chiah anih hi, vawikhatmah la intawng lo mah ila, enginnge min thlunzawm tih erawh kan hre chiang dun hle niin ka hria.

   A ruka hmangaih che hi ka thei hlawl lo ani e, i thinlung leh rilru hre theilo mah ila, keiin ka hmangaih che ang bawk a min hmangaih hi ka ring thin a, ka beisei bawk asin. Engpawh chu lo ni se, kei chuan tawp lovin ka hmangaih reng fovang che," tih hi ka thawn a. Mi rawn chhanna chu, " Ka tan leh keimah a i hlutzia hi hrilh theih che ka van duh tak em. Mahse, hmangaihtu neih hi ka hlau a, rilru na a min siamtu neih hi ka hlauh ber a ni. Mahse, kei mi hmangaih hi ning lovin dawhthei takin min nghak rih la ka duh bawk si...." tih hi ani.

Rang takin ka chhang let nghal thuai a. " Nang ka tawn theihna che hi Khuanu zar anih a, nangnena inthen hi Khuanu ruat dan anih leh si chuan, Khuanu tel lova nun ka thlang zawk mai nang e," tiin.

Engtikah nge kan inhmuh ang ? ti a ka zawh apiang lah hian, " Kan in hmu thuai dawn nia, Duhtak, dawhthei deuhvin...." ti chauh hian min chhang thin.

Kan inhmuh theih lohna ringawt chuan amah ka ngaihdan ati danglam ngai eih lo. Dik chiah chuan, ka hmuh chak phah sawt zawk ani. Tin, keimah ang bawk hi anih ve ngei ka ring tlat bawk. Hmangaihna thu thlum tak tak inthawn tawn zelin, kan hmalam hun chu beiseina sang tak nen kan thlir dun a. Nakinah, engtik hunah emaw chuan, rilru leh thinlung inpawh tawn taka inkawm turin hmaichhanah kan la inhmu ve ngei ang.

Christmas dawn ruai atang chuan msg min rawn thawn ta ngai reng reng lova, Prepaid ahmang anga, sum a tlachham ta ni hmiang tiin ka ngai mai a. Mahse eng emaw tak hian min helhkam tlat hian ka hre thung a. Ka han ngaihtuah ngial thin tak na a, ka zam ru tlat tih mai loh chu engmah ka ngaihtuah chhuah phah chuang hauh si lo. Han biak ka tum ngial pawh in a phone tlang theih bawk si lo. Eng a pawh chu lo ni se, msg erawh ka thawn thei reng thung si.

Christmas thlen hma ni thum chiah a awm tawh tih in, zankhat chu, ka msg tone (ri) chu ka hre ta. Ka phur khawp mai a, amah alo ni lehnghal !!

" Duh lo chung pawha kan hmangaihte hnena thenna biahthu kan hlan atul hun a awm thin, Mahse, chu chuan kan hmangaih tawh lova, kan ngaihsak tawh lo tih erawh a kawk silo. A chang chuan DAM TAK IN tih hi a hrehawm zawnga KA HMANGAIH CHE tih thu kan sawina tawngkam ani chawk bawk."

Ka bo chiang khawp mai. Engtia han ngaihtuah chhunzawm chi nge tih pawh ka hre lova, engnge a sawi awmzia lah ka man pha chai bawk si lo. A chhanna emaw a awmzia emaw hriat chian tumin zawhna ka thawn let mawlh mawlh a, mahse vawikhat mah min chhang let ngai lo.

Ka pian ahnu lama a vawikhatna atan ka nun chu a hrehawm hluah hluah a, ka beidawng a, ka nun hi a ruak huai ni berin ka hria. Tihtur leh tih dan tur pawh ka hre lo. Ka hloh phal ngang lo ani. Ka ngaina a, ka hmangaih thang tawh a, a kianga awm kumkhua hi ka duh ngawih ngawih a ni.

Chumi tuk chuan ka nun hi a ruak takzet a. Lucy-i chuan ka taksa atang hian ka nunna ala bo ta daih ni ber hian a lang. Ka ngai ngawih ngawih a, a msg tak ngial pawh ka thlahlel em em mai si a, a pual bik a msg tone ka hman chu a rik hun tur ka nghakhlel a, engtikah mah chu ri chu ka hre ngai tawh silo. Ka chhehvela awm engpawh mai hian ka nun ruak leh amah ngaia ka khawharna hi an ti ziaawm thei thlawt lo ani ber e.

Tut...tut...tut....

Ka phone ari, amah ngei ani lehnghal..!!

Christmas hma ni chiah (urlawk ni) ani a, ka nghahhlelh em em Lucy-i msg tone ri ka hria chu ka hlim kher mai.

" Meet me at the cafe, 10 AM today."

Coffee in dun thei turin cafe-ah dar sawm (10) ah kan in hmu thei ang maw ?.. Chuta kal tur chuan mi rawn sawm anih hi. Ka in rinhlelh avangin a ri kher in ka chhiar chhuak nawn leh ngat a. Chutah le, a hnen atanga msg ka dawn leh avanga ka lawm lutuk chu mahni inthunun thei lek lovin ka lam chhuak ta hial a. Rang takin ka insiam sawk sawk a, Cafe-lam pan chuan hmanhmawh zet in ka chhuak nghal thuai a. Dar sawm ala ri mai dawn rih lo deuh tih pawh ka hre reng. Mahse, athlen hma a thlen ka duh avang leh ka helhhawlh lutuk avangin ka chhuak hma ani ber. Tichuan pangpar dawr ah peng kawi in aduh leh ngainat ka rin Rose par sen leiin ka phit chhuak leh nghal a..

Kan in hmuhna tur hmun chu minute 10-zet a hma ah ka thleng a, mahse, dawhkan kil ber a thu in min lo nuih ver ver tih ka hmuh chuan amah ngei ani tih ka hria a, mak ka ti kher mai, kei ai daih in alo thleng hmasa anih ngei dawn hi. A va han duhawm chungchuang tak em.!! A bahsam sei dum tliang hliau leh nung sarh mai te, a mitmeng pawl riai leh a heh vam sen hlar mai, fawh atana itawm fahran mai te chu tawngka a sawi thiam rual pawh ani lo. Hnar ngul sei leh nalh zet mai piah lam a a mitmeng mawi tak ah chuan hmangaihna leh lainatna a khat anih na chu hmuh hmaih rual ani lova, mahse, chu mitmeng mawi tak phenah chuan hlim loh riau na leh lunghnurna a inphum ru tel em ni le ?

Zantin a hriat ka chak thin a aw ngaihnobei tak mai chuan, " Hi, Chester," tiin mi rawn ko a. Chu aw chu khawvel a zawng a ka aw ngaihthlak chak ber kha ani chiang mai bawk si.

" Khawngaihin thu ve ta che."

" Ka hmu che hi ka lawm takzet asin Michelle."
A dawhkan kilpui tura thuthleng ka pawh hnaih hma chuan a tan liau liau va Rose par ka ken sak chu ka han pe hmasa leh te te a.
" Ka vannei takzet ani tiraw duhlai."
" Chester, awm rei thei ka ni lo."

A aw mawina bo chuang miah silo hian a thusawiah chuan lawm lohna leh hlim lohna inphum ru tlat hian ka hria. Nge, mittui far chungin chu thu a sawi zawk ?
" Ka kal leh nghal mai angai ani."

" Mahse Lucy- kan inhmu ve chauh a ni si a. Reilote tal kan la titi thei lovem ni ?" tiin ka han ngen zui hram na a, min chhanna chuan minti beidawng kher mai.

" Ka thei lo takzet ani, Chester. Pawi ka ti khawp mai, i hmel hmu tur leh ka tana i hun hlu tak tak i sen avanga lawmthu hrilh tur che a lo kal ka ni. Khatiang thil zawng zawng avang khan lawmthu ka hrilh a che Chester. Ka theihnghilh tawh ngai lovang che, ka thinlung chhungril ber ah hian i cham reng asin."
Chutiang thu a sawi laite chuan chiang zetin ka mitah tak min en kal a. A thusawite ka hriatchian tluk zet bawk in, kei mi kalsan avanga a nun khawhar tur tuar lawka a aw lai deuh lek lek chu ka hriat hmaih hauh lo bawk. A aw mawi taka hlim lohna a inzep ru tel tlata ka hriat ang bawkin a mitmeng mawi takah pawh chuan lunglenna leh khawharna hmu tel tlat in ka in hre bawk.
Hreh hmel takin a tho chhuak a, min nuih seih a.
" Naktuk zingah mi rawn tlawh la, mi rawn hmu ngei dawn nia aw," tih pahin lehkha them hi min pe a.

A lehkha min pek chu ka han chhiar a, chhiar zo va ka han dak chhuak leh chu, hmuh tur reng reng alo awm tawh lova.

A tuk Christmas ni chuan ka tho hma bawk a, ka phur em avangin ka insiam zo hma hle bawk.
Hmanhmawh takin ka pen sawk sawk a, Pangpar dawr lam ka pan hmasa zet a, chutah chuan Rose par senduk bawr leiin ka in pawm bawr teuh va, an chenna address min pek lam pan chuan ka chhuak leh ta a.

An chenna ka thlen chuan chhungkaw khawsa thei leh nei nung tak chhungkua anni tih ka hre chauh a.

Khualchhawn leh vengtu nih fawm pa lianpui uniform ha hnenah chuan Lucy- hmu tura kal ka nih thu ka han hrilh a. Guard min melh dan ah chuan ka ngaih atha lo kher mai. A mitmeng kha makti hmelpu ni mahse, hlim lohna riau tel tlat hian ka hre leh pek a. In neitute ava koh hlan a dawhthei taka lo nghak rih tura min hrilh hnu chuan inchhung lamah chuan min luh san ta a. Chutia inchhung lama alut chu kan en zui a...

.. In chhung chu uluk fahran a tihen ani tih ka hre ta.
Nu la valai angreng tak hi rawn chhuakin mi rawn nuih seih a. Mahse, ani pawh hi a dang chuang lo. A nui hmel phenah chuan lungngaihna leh lawm loh rukna a inphum ru tel ve thovin ka hria.

" Hi, Maria ka nia, Lucy-i nu ka ni. Tirawh Chester. Inchhung lamah lut ang hmiang."
Inchhung pana kan kal lai chuan ka hming a hriat bel zia leh Lucy- in a thianpa Chester-a hming a lamrik ngun zia te chu asawi a, Michelle-i nu in min hmuh avanga mittui tla zawih zawiha a tah chhan hriat tuma ka inngaihtuah nasat lutuk na lamah engnge a sawi tih pawh ka hre chiang hlawm meuh lo.

Inchhung pilril zawk a pindan zau kan thlen chuan thil awmzia ka man deuh kuar tawhin ka inhria.
An chhungkhat laina hnai tak a boral ni ngei tur ani. Mahse, ka tiril ah min fan a, hlauh rukna hian ka thau ah min man tlat ni hian ka inhria a, ka zam takzet ani.

Pindan zau ah chuan ṭhenkhat anlo ṭap hawm hawm a, thenkhat anlo tawngtai mawlh mawlh bawk a. Ka ngaih atha lo takzet tawh a. Inthlahrung thei ka ni tawh lo.

A nu hnenah chuan, " Khawiah nge Lucy-i hi ?" tiin ka zawt ta khawl mai a. Min chhang mai lovin dimte a ka bana chelh in Rose par senduk hlirin a hual vel kuang awmna lam pan in min kai phei a. Chu kuang chhunga ruang awm hmel ka hmuh chuan mak ka ti kher mai, nula duhawm chungchuang ka hmuh ngei mai kha ani si.

Pa pakhat hian min rawn pan hnai a, Lucy-i pa ani tih ka hre nghal mai. " i lo kal chu kan lawm takzet a ni Chester. Lucy- hian englai mai pawh hian i hming alam a. A phone pawh aruang nen phum turin min ngen nghe nghe a, chutianga a phone kan phum tel sak chuan msg pawh ala rawn thawn chhunzawm thei che anga, tichuan akiangah i awm reng thei dawn niin a sawi bawk asin."

Ka awih theilo, engkim mai chu ka awih thei mawlh lo. Ka rilru a hnim ruih a, ka mit nghal sulh hian ka inhria.

" Mah..se.. ani thei dawn em ni...? Nimin mai pawh khan kan inhmu si a.... ?" ka ti bah niaih a.
" Chu zawng thil theihloh hulhual ani, ni 3 kalta khan a boral a," tiin apa chuan minlo chhang thuai a, " A naupan tet lai atang renga Lung natna nei ani a," a tihzawm zat bawk a.

" Mahse..." sawi zawm tur ka haihchham tlat.
" Hrilh tur che leh rawn be kherlo tur che in minti a," tiin anu chuan mittui far kiang kiang chungin a han sawi a. Dan rual loh a mittui hruk hul tuma han chul zauh pahin, " A sawi ang ngeiin hei, tunah ilo kal ta chu anih hi," ati chuai raih a.
Ka thinlungna leh ka tawrhna chu han thupbo rual ani lo. Nungdama ka awm chhunga ka theihnghilh theih tawh ngai miah loh tur, hmangaihna a khat ka thiannu hmel ka thlir reng lai chuan mittui tla zawih zawih chung in ka ding khur hlawk hlawk a.
Vuina hunserh zawh hnu chawhnu lamah chuan atlawh nitin thin, ti a min hrilh Biakin lam chu ka pan a, tap chungin Pathian ka auva, thinlung takin ka tawngtai mial mial bawk a. Inti pachang luiin ka phone chu ka phawrh a. Tihian msg ka ziak a ;

" Mi ngaihsak dan min zirtir a, zahngaihna min zirtir a, hmangaihna awmzia min zirtir a, hringnun hi enge anih tih min zirtir a, mahse thil pakhat min zirtir hmaih i nei, chu chuan min tina zual thin, lungduh mual liam, lungdam te a thlah tur a then dan tur min zirtir tello asin "..

Chu message chu ka thawn ta a. Mi chhang turin akut in cellphone a chelh thei tawh dawn lo tih hre mah ila, ka msg chu alo dawng ngei ang tih ka thinlung chuan a hre chiang tlat thung.
Chhanna ka beisei hauh lo. Mahse, ka phone a msg tone ka lo hriat bel tak mai chu alo ri leh ta tlat mai. Ka sawi thiamlo, ka lu bur hi a sa hum hum ni berin ka hria.

Phone chu ka han en a, a thawntu number reng reng alang lo. Message chhiar tum a phone ka han hmeh laite chuan ka mittui hi dan rual loh hian a rawn dir zawih zawih a, tihian alo in ziak a ;

" I hmangaih kut chu thlah mah la, Pathian kut erawh thlah hauh suh ang che, A kut i chelh chuan Pathianin a kut lehlamin i hmangaih kut alo chelh lai ani mial maithei asin, chutiang anih chuan Pathian kaltlangin inla in chelh reng thei dawn si a,"....

" .... ka theihnghilh kumkhua lovang che, Lucy. Mi kalsan hi ka phal ngai lovang....." tiin ka chham a.

Mal ngawih ngawih chungin Biakin chu ka chhuahsan ta a...

.... THE END ....