I'LL BE GONE |The Masquerade

Vân chung sâng tak a arsi sâng tam tak te chuan lungrual takin an ênna an chhuah a...

Tuialhthei nasa tak a alh a, a alh rêm dâwn ruai hnu a a alh êng zuai tawh lam ang mai hian chu zân hun pawh chu a ral dâwn in, kâwl pawh a rawn sen deuh khuih tawh a.

Chu zân chuan a hun aliam mêk a, chu hun chu a kalsan dâwn a ni tih chu hrilh kher ngai lo pawhin a hrechiang kher mai.

Chu hun chu tumah rêngin an ngaihtuah pui ngai lova, hun inthlâk chu midang chuan khawvel kalphung ve rêngah an ngai nghet tlat a, a tân erawh chuan chu hun chu chatuan atân a a kalsanna leh a hun tawn hnuhnûng ber a ni si.

.Hun tlêm a tawlh hret ang a, zân hun a ral in, khawfing a chat zui mai dâwn a, tichuan chu a hun chu engtikah mah a tawng leh ngai dâwn tawh lo a ni tih chu.

Thlasik boruak vawt tak ang mai hian chu a hun chu midang te nen a dâidang tu a ni.

A tân chuan chu a hun tâwp kawngka chu thlasik boruak vawt leh hrehawm tak ang mai a ni a, a nunhlui hlimawm tak tak te chu a mitthla an an châm a, mahse chûngte chuan a hun chu an ti ding thei lo a, an ti muang thei hek lo.

A tân chuan nunhlui ngaihawm mai an ni, engtikah mah a tawng leh tawh ngai dawn lo a, a mitthla a châm mai tûr chauh an ni, a tawng leh tawh ngai hek lovang a, chûng hlimlaini te chu rawn herchhuak leh ta tehreng pawh nisela, ani erawh chuan chu hun chu a nghâk chhuak thei tawh lovang a, chatuan atân vawikhat chauh kha atân a ruat a ni tih a pawm thiam hrâm hrâm angai a ni.

Ni e, Zân hun aliam ang a, khawfing chat in, ni thar a lo chhuak ang a, a ṭhen leh rual duh tak te chuan chu ni thar chu hlim tak in an lâwm ang a, mahse ani erawh hmuh tûr a awm tawh lovang.

Zân hun aliam a, chu ni thar chuan chu zân hun chu a kal liam tîr ta si a.

Ni chu khawtlang lamah liamin, a tûk ah ni thar arawn chhuak leh a.

Mahsela chu ni thar chuan a hmâ nî kha a rawn chhuahpui tawh lova, a tûk ni thar a ni tawh tlat si a ni.

Ni chu nikhat atân vawikhat chauh a tla a, rawn chhuak leh mahsela kha nî kha a ni tawh lova, ni thar a ni tawh ang hian;

A nun chu Ni ang maia chan in, a hun tâwp chu tlai ni tla ang mai a ni a, a tûk a ni thar in a hma ni chu a rawn chhuahpui tawh ngai lo ang hian, ni thar rawn chhuak leh mahsela, a ni erawh a awm ve tawh dawn lo a ni.

.Mahsela chu a hun tâwpna chu tumah rêngin an hriatthiam pui lova, khawvel kaplhung ang ah an ngai ve chauh a ni si a.

Chu a hun tâwpna, a phurrit nasa tak ina a uai rihna chu tumah rêngin an hriatthiam pui lova, a beidawnna leh khawharna, a nun phurrit chu amah chauh chuan paihthlâk a, thenfai dân a thiam si lo.

 Chu a hun tâwpna ah chuan a beidawnna te, a hrehawmna te chu inthlahrung takin a hrilh che u a, hriatthiam na nasa tak nên a amah hrereng tûr che u in leh a thiltih sual te, a thil tih dik loh te leh in lung a tihawi lohna zawng zawng te theihnghilh sak a;

In thinlung a amah in hriatreng theihna a dîl tak meuh meuh a ni.