BLACKBIRD |The Masquerade

Chu a thinlung hliamna leh natna avâng chuan a ni, lemchanna dawhsân a   a tui lo pal buak tawh te hai lan nân thing hmaikâwr a vuah tâk ni;

Anni chuan a nui hmêl leh hlim hmel te chu ngaih ṭha takin an thlír liam nitin a, mahsela engtik lai pawh a a biang a mittui luang te erawh chu an hmuh hmaih leh tlat lawi si a...

Ni e, a dik chauh chuan chu chu amah pawh ina a duh ber a ni reng a ni, an tân chuan a hlim angai a, an in tih chak tawn a, an ziak fung te'n a nasa leh zual a an thâi chhuah a, rahbûk an kal pelh theih nan chu mittui luanna lui râl leh lam chu an thlîr hrâm hrâm angai tlat rih si a ni.

Mahsela engtik ni ah emaw chuan chu thing hmaikâwr chu phelh a a awm hun a lo la thleng ang a, chutih hunah chuan an hmai khuhna te chu hlih a ni tawh ang a,  dârthlalang chhan a phê ruai a an hmuh chu fiah tak a hmu in an hrethiam tawh ang.

Chatuan atãn a kalsan a theihnghilh a duh ṭhîn a, kum tam tak chu chu nun aṭang a kalbo chu a tum a, a thinlung ser nasa tak chu a theih ang a enkawlin, a tam zâwk te'n a an lo dampui theihna te pawh chu a kal kân bîk lo, ni chiah mai, a hil a, a hliam te pawh thai reh in a awm ve ngei alawm dâr chanve emaw lai kha chu!

Mahsela, Chatuan atân a Siamtu ina atân a ramri a kham sak a ni hial lo maw;

Hun chanve leh eng emaw zah vêl lai a a thinlung ser thai bo a awm chu, chu hun ah chuan her kîr leh a awm in a hmuam hma chu heh duhawm leh sên vâm ham mai ang a thar leh îtawm a lo ni leh ta si a.

Chu a beidawnna leh khawharna te chuan a hringnun chu an uai a, a tân chuan phurrit an ni tak meuh meuh a ni.

Lei mi te'n a an hringnun zinkawng an zawh chhuah hun kum te chu atân chuan ban phâk mai an a lo awm ve tawh reng mai.

Chu zinkawng a zawh ṭantirh aṭanga a phurrit râpthlâk tak, lemchanna dawhsan a rah hma aṭang a hruihrual sen a zawm khâwm, a zawmpui te lak aṭang a paihchhuah a awm in, chatuan atân a chunglêng sava te'n a an zanriah atâna an hman  tûr a hnutchhiah a nihna te,  thinlung inzawmna ropui ber, a pian chhuah pui hmangaihna zawng zawng a pêk tak vek a kha, alak aṭang a lehkha zial mi ang mai a zial bo sak anih leh a chhan te chuan chûng thil hnutiang chhawn a, Hawi lo pâr a thliah ve meuh hnu pawh chuan a hringnun zinkawng a zawh lai chu chatuan atân an ûm reng a, chu phurrit chuan Sal ang maiin an tuar tîr reng a.

Chu phurrit chuan engtik ni ah emaw chuan nasa takin, a chakna zawng zawng pawh ina a hneh zawh rual loh khawp a nasa in an la delh hun ala thleng ang a, thuah riat lai a nasa in an la delh bet ang a, a tân chuan chhuahna rêng  awm tawh hek lovang.

Ar kai den zân nimahsela chu Chhawrthlapui mal leh khawhar tak chuan a ropuina te chuan chu zahngaihna leh hriatthiamna nei rêng rêng lo chhûm dum chhah tak tak te chu a chhun tlang thei mawlh lo.

Chu zân khawhar tak mai  ah chuan hla tak a zân sava, a kawppui ngai ni mai awm tak a hrâm lauh lauh tih loh chu thâwm dang hriat tûr a vâng kher mai.

Chau takin chu kawng reh tak mai ah chuan a pên chhet chhet a, veilam ah emaw ding lamah emaw pênna tûr rêng a awm lo, chu kawng chu mit tlin tâwk piah lam aṭang a in ṭan niin, a tâwp lam erawh chu hla tak a tlâng lian leh sâng pui pui bulṭhut ah chuan  phiah darh in a awm thung a.

Chu zinkawng thui tak chu engtia sei nge a zawh tawh ang a, eng chen nge a zawh dâwn tih chu suangtuah na mai lo chuan sawithiam a va har êm.

Hun rei lo tê ami kha, a lû ah kêlsam lo ṭo vin, a mit a thim dâwn ruai a, a chipui te hnen a lak bova a awm hun a hnai ta a ni tih hai rual a ni lo ve.

Mit khap kâr an thla zâp ri a rawn ri hluk a, sava dum lian tak mai hi a hnunglamah chuan a kalsan hlau niawm tak hian arawn thlâwk a.

Engtik aṭanga rawn zui nge a nih a, khawi thleng nge a zui dâwn tih chu tunge hria ang ni?