WILL YOU BE MY VALENTINE

Ka hmangaih leh duhzia thu che hi hrilh che ka van châk ṭhin tak êm.

Ka ta ni la, ka kiang ah awm reng thei la tih hi ka ṭah hla a ni asin..

Ni e, hmangaihna avang hian ka thinlung leh tîsa hi lungngai leh khawhar in a lo awm tawh a, chatuan thleng pawh a ser reh thei ngai tawh lo tur khawp a na chu ka hringnun hian a lo tuar tawh asin.

Hmangaihna chu hlimna leh lawmna a ni an lo tih ṭhin te chu  ka tân chuan thih hnihna ai pawh a râpthlak leh hrehawm mai a lo ni a, chu hmangaihna avang chuan kum tam tak chhûng lungngai leh khawhar chungin ka hringnun hian kawng alo zawh ve tlauh tlauh ṭhin asin.

Ka râwllai thinlung leh chakna te chuan min kal bosan a, hlimna leh lawmna te chuan kîr leh tawh ngai lo tûrin min thlawh bosan zo ta.

Ni e, kum tamtak liam tawh mahse ka thinlung leh ngaihtuahna te hian kha ni rãpthlak tak kha an la theihnghilh lova, nitin in an la ṭahpui ṭhin zawk asin.

Kum tam tak chhûng khawhar tak in hun ka hmang a, engtik ah mah ka hlimna te kha ka tawng leh tawh ngai dawn lo a ni tih ka ngaihtuah châng phei chuan hawilopar thliah a, thihna lui dai kai mai ka duh ṭhin a, mahse natna te chuan min kalbo san a, thihna te chuan min hawisan a, mitthi kawngkhar te chu ka tân hawn theih loh tûra châr beh in a awm si, ka lungngaihna leh beidawnna na te, ka tuarna zawng zawng te kha, Van Angel thianghlim te khian Van tukverh te rawn hawng in rawn thlir ve selang chuan thinlung na in an ṭap ve hian in ka ring ṭhin.

He ka khawvel damchhûng ni hian kha ka hmangaihi kha ka theihnghilh theih ka ring ngai lo va, ka tawrhna te hian min kalbo san thei ngai hian ka ring ngai lo.

Mahse kum tam tak chhûng ka lo tuarna te chu i sakhmel mawi tak ka hmuh ni aṭang khân lâk bo vin a lo awm a, i hmel mawi tak khân ka thinlung nâleh tawrhna zawng zawng te chu mitkhap kâr lek an lâkvbo ang maiin an chhâwk ṭhin asin.

Ni e, ka tâna Chung Khuanu in a a lo ruat che anih loh pawn ka damchhûngni khawhar leh mal taka ka hman loh nana asiam che a ni ta hial ve ang.

Mahse he thinlung lungchhia leh mal ngawih ngawih hian hmai hma  ngei a thinlung thurûk hrilh tûr che chuan in huaisenna reng a nei tawh si lo.

I chetzia leh mitmeng thianglim mawi tak thlir chang chuan e, he ka hmangaih zia thu che hi hrilh mai che ka duh ṭhin a, he ka thinlung zawhna hi i lo hnar ka ring ngai bik lo asin.

Ni e, ka chakna leh huaisenna zawng zawng sâwm khawm in, zah pawh dawn zo lova Palai bawngte ka rawn tirh hi beidawng in lo siam lul suh aw, he thinlung khawhar tak hi lungngaiin mitthi khua i lawi tir loh hram ka beisei a ni, a chhan chu nang chauh hi ka nunna, ka khawvel chu ini si a.

Hmangaihna pâr thliak tu ten a an nghahhlelh leh hmangaihte tana hun hlimawm Valentines Day pawh mitkhap kar lek an alo thleng dawn ta, he hmangaihna hun ropui tak hi ka thisen far tawp hma loh a ka theihnghilh ngailoh tur ka hmangaihi nen kan lo hmang dun a, ani he hun ah hian ani hmangaihna ka chhar a, hmangaihna kawng ka zawh ve ṭan tâk kha.

Ka hmangaih, he hun ropui lo thlen hma ngei hian ka Palai Bawngte chu i thinlung thuruk chu lo hrilh la, i hmangaihna thianghlim tak kha he ni hian min hlan hram la ka van duh tak êm.

Chutin he ka lei hringnun hman chhung hian hmangaihna kawng hnih ni lovin, kawng khat ka zawh ang a, ka thinlung hmangaihna chu mi pakhat ka hlan a lo ni mai tûr a.