THE DEAD LETTER

Ka rilru leh suangtuahna te chuan ka hringnun khawvel te chu an luahkhat a, ka tîsa leh thlarau te chu chhun zân in an ṭap a, khawharin an rûm ṭhin asin.

Ni e, kum tam tak liam ta khan ka thinlung chu hliam in a awm a, kir leh tawh ngai lo tur a ka hringnun khawvel i chhuahsan ni khân e, ka thinlung chu chemte a vih ang maiin anâ a, mahse maw, khâng ni te kha hun in her liampui tawh mah sela, ka thinlung hliam chuan dam ni reng a nei mawlh si lo.

.Kha ni rapthlak tak khân ka thinlung chu chemte a vih ang maiin in a rawn vit a, tun thleng hian a hmuamhma aṭang hian thisen ala far reng asin.

Dik tak chuan in e, he thi thei mihring mit leh ngaihtuahna te chuan i hringnun chu keima duhthlanna ngei a ka chhuahsan ta ang pawn a lo ngai ani thei, mahse demna che ka nei lo asin.

Kumpui linglet a he lei hringnun kawng ka lo zawh pui ṭhin chu engtin nge ka hmangaih leh duhzia thu chu ka hrilh ang.

He ka thinlung thuruk sawi chhuah ai chuan in e, Engkimtithei chung Khuannu khian a Nunna Bu thianghlim aṭang khian in he ka hming hi thai bo zawk se la pawi tihna reng ka nei lo zawk ta hial ve ang.

Ni e, engtik lai pawh a ka kiang a awm reng ṭhin ka thian duhtak, he ka thinlung thuruk hi i beng hriat ah lo sawi ta ila, sual kai lo i thinlung leh ngaihtuahna, i mitmeng mawi leh thianghlim tak te kha huatna leh thinrimna ah a chang ta mai ang tih hi ka hlauh ber ani asin.

Kumkhua ai pawh a rei zawk, chatuan thleng a ka hringnun khawvel i chhuahsan tur chu ka ngaihtuah zawng ringawt pawh hian ka thlarau te chu an khur a, ka thisen luang lai te pawh hi an khang zo tak ngial dawn e.

Chuvang chuan in e, ka thinlung thuruk chu lehkha zial mi ang mai a zial bo a, i kianga len a, ka hun leh ni zawng zawng nangnen a hman ral kha ka duh zawk a ni.

Mahse he hringnun khawvel ka hman chhung a ka neihtheih ngai loh tur leh ka chan phak ngai loh tur ka lo hmangaih che avâng hian nitin in ka thinlung chu lungngaiin a rûm a, i kianga awm reng chung si khan e, khawhar in a chau ṭhin asin.

He hringnun khawvel ah chuan in ral leh mai tûr, nawmchenna leh rosum, khawvel thil hlu te chuan hringnun chu a luahkhat a, kan thinlung chuan thil dang reng a ngaihtuah ngai si lo.

Kan inkâr ah hian in e, tlang sang tak te awm mahsela, i tan chuan thlarau chawlhna van chung sâng tak arsi piahlam ramte pawh ka lawn chhuak ang a.

Mêl sâng tam tak in min dai dang in, nipui khawlum leh ni sa rapthlak tak hnuai ah thlaler ramro pawh kal tlang ngai se, ka hmangaih, i tan chuan ka kal zel ang.

Mahse tawp chin nei lo tuipui zau tak chu kan inkâr ah aluang a, a dai kaina tur reng a awm silo.

Ka hmangaih em avang che hian in, i hmel mawi tak te khan chuai ni nei lo se, i thinlung thianghlim tak te kha hahdam tak in kumkhua in awm se tih chu ka thinlung duhthusam leh ka nitin ṭah hla a ni asin.

He khawvel ah hian in, ka thinlung leh hmangaihna chauh lo chu he fahrah rethei hian engmah pek tur che ka nei si lo, nangnen hian runhmun lengdun in ka thai chang mah la, i hringnun hlimna tur reng engmah ka nei mawlh si lo.

Chuvang chuan in e, kumtluanga i hlimna tur leh hmangaih bula i hringnun i hman theih nan, i hnen ata hla tak ah ka kal bo ta anih kha.

Ka kalsan che avang khan ka hringnun chu tahna in a khat a, kum tamtak chhung inchhirna in ka thinlung a luahkhat asin.

Ka han ngaihtuah let chang te hian, i thinlung leh ngaihtuahna te chu hre lo mah ila, i chet zia leh mitmeng, khawizu thlumtha mi ai pawh a thlum i ṭawngka aṭang te khan enge maw tak a awm anih ring in, ka thinlung thuruk chu enge maw ti a i lo hmuh beiseiin, 

" the confession of letter "..

Mittui nen ka lo ziak kha ani a, kha lehkha thu aia ka thinlung thuruk leh suangtuahna puanchhuahna hi ka khawvel damchhung ni hian ka nei leh tawh ngai hek lovang a, a themte pawh puan chhuah tur ka nei tawh lo asin.

Duhtak, he khawvel ah hian i awm tawh lo nge ṭangdang belin i hringnun chu i hmang mek tih reng ka hriatna thahrui te hian an ngaihtuah chhuak zo ta lo.

A enga pawh chu lo ni ta tehreng pawh nisela, hre ka thinlung thuruk hi nangnen hlim taka kan lendun lai ami kha a ni tih tal hi lo hre hram hram la ka duh asin..

Duhtak, kha lehkhathawn hmangaihna mittui a ka char hnan tlat kha he khawvel ah nangmah zawnga a vahvaih hnu in, beidawng tak in alo kîr leh a,

" kawlkil tawp ah te chuan a lo awm mial mahna tiin beiseina nen ka vâk thleng hram hram a, mahse hmuh tur reng a awm lo.

Chutin chung van lam hla tak, arsi piahlam ram ah te chuan ka lawn a, mahse a awm chuang si lo.

Leihnuai thuk tak, mitthi khua ahte chhuk in Seoul kulh tihbaiawm chhung ah te chuan ka vakvel a,

tui hnuai thuk tak ah te pawh, mahse ka hmuzo chuang lo, boruak ah a thamral ta pawh a ni mial maithei."

tiin min hrilh asin.

Ka hmangaih, khawiah nge i awm tak le?

I hringnun chu engtin nge i hman tak zel tih reng ka thinlung hian a hre thei ta si lo.

Mahse, kir leh tawh ngai lo tur chu beiseina in ka lo la nghak a, ka vun te pawh ka ruh an bet zo ta a, ka mittui luang te pawh vur ang maiin an khang zo ta..