NEVER TOO LATE

A chang chuan tihian ka ngaihtuah ṭhin,

engatinge ka ngaih êm êm ṭhin che le?

Engatinge ka thinlung hian a theihnghilh theih ngai loh che?

..engvangin nge ka mitthla ah hian i châm reng ṭhin?

Aw, duhtak, kum tamtak liam tawh hnu pawh hian ka thinlung leh ngaihtuah na zawng zawngte hi nangmah ngaiin an la rum asin.

I sakhmel mawi tak te leh i nui hmel duhawm tak te kha hmu leh chak in zawng ṭhin che mahila, hmu leh ngam tur hian in ka thinlung hian huaisenna reng a nei mawlh si lo.

I hnen aṭanga ka kalbo ni khân e, ka thinlung hi chemte a vih ang mai hian ana a, kumkhua ai pawh a rei zawk chatuan thleng pawh a reh tawh ngai lo tûr Ser ka in siam dawn tih reng ka tleirawl ngaihtuahna mawl leh rilru nû khân a ngaihtuah phâk mawlh si lo, mahse a pawi ta ber zawk chu, ka ṭhian ka lo hmangaih che kha a ni.

Ka thinlung leh ngaihtuahna te hian nang hmangaih tur che hian min nawr tlat ang khan, i chetzia leh ṭawngkam chhuak te khân i rilru putzia leh ngaihtuahna te chu an nawr ve tho a ni lawm ni.

..mahse hmangaih biahthu hlân tûr chuanin kumpui linglet a ṭhian hmangaihna bak ka huaisenna hian a ngam lo ang bawk in, i hmangaihna chuan a ngam bik si lo a ni ti raw.

Ni e, he ka hmangaih leh duh zia thu hi hrilh ta che ila, engtin nge i thinlung khan lo dawnsawn anga, engtinnge i lo ngaih ang tih te hi ka ngaihtuah ve ṭhin fo asin.

Mahse nang chân che hi ka ngam lo a, i thinlung tih nat hi ka duh ngailoh a ni si a.

Aw, duhtak, ṭahna leh lungngaihna te'n i hringnun chu chîm buai lo a, hlim taka i nun i hman reng theih te chu ka ṭawngṭai hla ni ṭhin mahse, i hmel mawi tak te chu i lungngaihna mittui luanna ah ka siam sak che a, i thinlung thianghlim leh hmangaihna a khat liam te chu suall lam kawng zawh tûrin ka lo thlak sak che a.

I hlimna chu lungngaihna ah ka chantir zo ta si anih hi.

I chung ah hian thil tamtak ka tisual a.

Aw, siamṭhat leh theih ka va'n châk tak êm!

Mahse, ka neih rosum leh thil hlu zawngte chu i tân chuan engmah lo mai an ni si, i hnen aṭanga ka kal bo ni aṭang khân e, hlimni reng ka nei thei tawh lo asin, nang chuan chutiang reng i dawn pha si lo.

Ka taksa chu i hnen aṭanga hla tak ah awm mahse, ka thinlung chu i kiangah a awm reng asin.

Nang ka neihtheih nan che hian tlangsâng takte chu lawn liam ngai mahse, i tân chuan ka lawn chhuak ang a, thlasik khawvawt leh ruahpui nasa tak pawh kal tlang ngai mahse, nipui khaw lum leh thlaler khawro pawh ka paltlang ang a, mel sâng tam tak pawn min dang thei chuang lovang.

mahse kan in kârah chuan tawp chin nei lo tuipui zau tak a awm si a, a kai na tur reng a awm si lo..

Aw, duhtak, i lak aṭaga kalbo kha ka duh ngai lo asin.

Aw, tunah zawng nunhlui chuan mual aliam a, mahse thinlung ah erawh nitin athar zel si anih hi maw.

I thinlung te chuan khawvel ah hlimna zawng tur in an nawr reng che a, i taksa te chu a sualna zunzam chuan an ei mek in, chhuahsan theilo khawp in an châr bet tlat si a maw.

Duhtak, keimah avanga i tawrhna te hi ava rapthlak tak êm.

Mi te chuan i parmawina chên in, i pawnlam ṭhatna te ûm in hmangaihna thu an fah ṭhin che a.

Mahse kei chuan in e, i taksa ni lovin i thinlung thianghlim tak kha ka duh asin, eng ang pawn i hringnun chu lo hmang tawh mah la, sualna khur chitin ah pawh lo tla lut tawh mah la, kei chuan tawp lovin ka hmangaih reng che.

Ka hnena i lo kîr hun ka lo la nghak reng asin.

Ka hmangaih che a, ka hmangaih reng fovang che, a chhan chu nang chauh hi ka hmangaih awmchhun, ka hmangaih hmasa ber leh hnuhnung ber chu ini si a.

Chuvangin kei chuan engtiang pawn awm la, eng ang harsatna leh buaina pawh lo tawk tawh mahla ka la hmangaih reng che.

Engtiang pawhin i hringnun chu lo hmang pawh ni la, kei chuan tawp lovin ka hmangaih reng fovang che.

Ka beiseina chuan a lo la nghak reng che a, ka thinlung chuan a lo la nghak reng bawk che.

Ka hnena i thusawi hnuhnung ber, ' engtikni ah emaw chuan kan la in tawng leh ngei ang' itih te kha ka la theihnghilh lo asin.

Chuvangin chu hun chu ka lo la nghak a, ka lo la thlir ṭâwk ṭâwk a ni.

I lo kîr leh ang tih hi ka ring tlat a, mahse engtiang in nge? Eng hunah nge tih chu ka hriatna thahrui te hian an ngaihtuah chhuak zo lo.

Mahse ka hmangaih êm avang che hian ilo kir leh hi ka ring tlat a,

I lo kîr leh dawn tih ka hria, ka la hmangaih reng che, ala tlai lo, ka lo la nghak reng che asin.

I sualna zawng zawng nen pawh khan ka la hmangaih reng che, lo kir leh hram rawh.

Ala tlai lo..

Duhtak, i sualna zawng zawng nen khan ka hmangaih che asin, min hmangaih thu min hrilh nan khua ala tlai lo...

..khawvel te hi lo tawp in...

..van te khi lo tla mahse..

..hun leh ni te lo in her danglam zel mahse..

..ka ruh te hi ka vun ah lo bet in, ka nunna te hi lo tawp mahse..

..ka lo la nghak reng ang che..