THE CONFESSION OF LETTER

Kum tam tak aliam ta, Nipui khaw lum huam huam te leh Thlasik boruak vawt vur maite pawh engzat nge liam zozai ta le ?

lunglenna te, khawharna te chu hun her in aliampui an lo ti ṭhin maw?

Khuarei hian engzata tam fakau nge hmangaihna ṭahpui tute leh hmangaihna avanga thinlung kehchhia te chu hnem tak ang maw?

Hunin aher liampui mai theih hmangaihna thliak tute chuan thinlung ser leh hliam khawpin hmangaihna an dãi thei ngai dawn em ni?

Aw, Van a arsi te u lo hnai ula, lo ngaithla teh u.

Aw, Zân thlifim te u, ka rilru ngaihtuahna leh lunglenna thinlungte hi han chhem kiang teh u.

Chutin he thlarau rethei hian nunhlui hnutiang chhawnin a hringnun a hmang ve tûr a.

Chhumpui ang mai ina khawharna in a tuam he thlarau hi, chung Van Angel thianghlim te khian Van tukverhte hawngin rawn thlir ve selang chuan an ṭahpui ve hian ka ring asin.

Ka hmangaih, engatinge ka theihnghilh theih ngai loh che? 

engatinge ka ngaih ém êm ṭhin che le?

Kum engzah nge ka rilru leh ngaihtuahna ah hian i châm tawh le?

mitkhap kâr lek chhung chauh tal pawh he thinlung hian ala theihnghilh ngai lo che asin.

Ṭan tlang Lasi lalnu, Chawngtinleri ianga ṭhatna leh duhawmna a malsawm, i hmel mawi tak leh zaidamna leh ngilneihna, hmangaihna a khat i mitmeng mawi tak hma ah khân e, Kumpui lingletin hringnun lo hmang ṭhin mah ila, He ka thinlung thuruk hi sawichhuak tur in huaisenna reng ka nei si lo.

I hma a sawichhuah ai chuan in e, Siamtu chung Khuanu hnena he thlarau sual thiltih tenawm ber leh nun ṭawp tak hi puanchhuah ka duh zawk asin.

Aw, Ka duhlai, He hringnun khawvel hi i chhuahsan tawh nge ṭangdang bêlin hlimlaini i chêk mek tih reng ka hriatna thahrui te hian a ngaihtuah chhuak zo ta lo.

A enga pawh chu lo ni ta tehreng pawh nise la, mitkhap kâr te lek chhung pawh i rilru leh ngaihtuahna a ka lo lang ve anih ngai chuan, chu tluka lawmna ka nei chuang lo.

He hringnun khawvela ka châm chhunga ka neih theih ngai loh tûr leh ka chan phâ ngai reng reng loh tur chu he thinlung rethei hian a lo hmangaih si a, mahse ka kalsan loh chuan hun a her anga, mitthi khaw mawi turin he thlarau hian a nunna hi thihna kut vawt chu a hlan hun ala awm dawn si.

I hringnun aṭang chuan ka kalbo ngei a, ka hriatrengna thinlung erawh i chhuahsan si lo, ka thinlung hian angai ngawih ngawih che asin.

Duhtak, I sakhmel hmu lo hian in he thlarau hian a khawvel damlainite chu lo hmangral mahsela, nangmah ngaihtuah reng chungin fam khawpui alawi ani tih tal lo hria ang che aw.

Aw, thihna khawiah nge i tûr chu? khawiahnge i hnehna te chu an awm zawh tâk ni?

Vawi engzatnge i kut vawt hian hmangaihna i lo pawh ṭhen tawh a, Engzatnge i chakna hmang in i lo lem zo tawh le?

I ângchhung a luh hlau a himna zawnga tlanchhia te chu i chakna hmangin i hneh ṭhin amaw.

Aw, mitthi kulh kawngkharte u lo in hawng teh u.

Aw, Lungloh tui thiangte u engti zai zia nge in lo kang chah tak ni?

Chuti ni suh sela chuan i zing daifim ang a vawt chu he thlarau rethei hian lo dáwt in, a hringnun khawvel chu nghilh zai a rel ve thei mai tur a.

Hawilopar duhawmte u, lo par chhuak ula, lo inlan teh u, chutin he thlarau rethei hian alo thliak in a tawn che u anga, chutin hringnun khawvel hnutiang chhawn in a achawl hahdam thei hram mahna.

Aw, Duhtak, he lehkha a ka kutziak tlawm tak, ka hmangaihna mittui a chhinchhiah leh ka châr hnan hi i lo hmu anih ngai chuan, i lungngaihna hnemtu leh, i buaina te, i harsatna zawng zawng i thlenna ṭhin, i ṭhian khan a lo hmangaih reng che a, nangmah ngaihtuah nan leh hmangaih reng theih nan alungphu ala chawlh tir lo tih ilo hre dawn nia.

Nangmah avang in hmangaihna hi enge anih ka hriat phah a, nangmah avang hian ka nui a, ka tah leh avang pawh hian ka lawm a ni.

Ka lo hmangaih che avang hian ka in chhir lo a, engtik lai mah in ka in chhir ngai hek lovang.

Mahse engtiklai maha ka neihtheih ngai loh tur ka lo hmangaih che avang hian, ka hringnun chu ṭahna in a khat zo si anih hi.

Aw, Duhtak, he khawvel ah lengdun thei ngai dawn lo mahila, kan piannawn leh hun ah tal chuan ka ta ini thei tawh ang tiraw.

..a enga pawh chu nisela, kei chuan tawp lo in ka hmangaih reng ang che a, he ka thisen kallai te hi lo khang in, he lei taksa hian thlan khur chhungah a tawihral hun a nghah hunte lo thleng mahsela, ka hmangaihna chuan a nghak reng ang che a, thlarau khawvel a thlen thleng pawh in i hmangaihna beiseiin kumkhua ai pawh a rei zawk, chatuan thlengin alo nghak reng ang che.

Aw, Duhtak, thihna kut vawt te chuan min hual vel a, ka mit pawh a thim ta, ka thahruite chuan min kiansan a, chakna reng ka nei ta lo, damtak in le..

Aw, ka hmangaih, ka van ngai ṭhin tak che em..