GREEK MYTHOLOGY | Hercules & The Twelve Labours

Mi huaisen Perseus- an a Sakawlh Medusa- a tihhlum hnu khan Aethopia Lal Cepheus leh Cassiopeia-i te fanu Andromeda nen innei in Argos- khua ah ro an rêl a, fapa pasarih, Perses, Heleus, Alcaeus, Sthenelus, Electryon, Mestor, Cynurus leh fanu pahnih, Gorgophone leh Autochthe-i te an nei a.

Tichuan Perseus-a thih hnu in a fapa Alcaeus-a chuan Argos-ah chuan Lalna changin Pisa- ram Lal Pelops-a leh Hippodamia-i te fanu Astydeima-i nupui ah neiin fapa Amphitryon leh fanu pahnih Anaxo-i, Perimede-i te an nei a.

Tichuan Electryon-a chuan a unaupa Alcaeus-a fanu Anaxo-i chu nupui ah nei in fanu Alcmene-i an nei a.

A pa Alcaeus-a hnu ah Argos ah chuan Rorêl in Amphitryon-a chuan a unaunu fanu Alcmene chu nupui ah neiin fapa Iphicles-a leh fanu Laonome-i annei a, hun lo kal zel ah Iphicles-a fapa Iolaus-a chu Hercules-a sakawr tawlailir hotu ah a țang anih kha.

Tichuan Lalnu Alcmene-i chu arûk a Pathian ropui ber Zeus- chuan lo mutpuiin fapa Hercules - a nei leh ta a, tichuan Hercules-a chu Iphicles-a leh Laonome-i te nen chuan nu hmun, pa hrang anni tihna anih chu.

Pathiannu Hera-i chuan a pasal Zeus-an mihring lakah fa anei tih a hriat chuan a thinrim êm êm a, Hercules-a chu thla riat mi lek anih laiin tihhlum tumin, rûl tûr nei pahnih hmanga tihhlum a tum a, mahse Hercules- erawh chuan chûng rûl pahnih te chu alo tihlum ta zâwk a.

Nausen tê anih ațangin Zeus-a chuan malsawmin, a chak êm êm a.

A hnu zelah pawh thahrui ngahzia leh a thiltih ropui tak tak te chuan sawi a hlawh a, mahse Hercules-a nunkawng diktak erawh lungaihna leh hrehawmna a khat a ni thung. 

A chakna chu Hercules-a tân chuan anchhia mai a ni a, Zeus-a fapa a nihna pawh chu hrehawmna thlentu mai zâwk a ni. 

A naupan lai ațangin midang aia chak zawk a ni char char a, a kutthlak a nat bîk lutuk avangin tumah a bulah an awm duhlo hial a ni. Țhian mumal pawh a nei ngailo reng reng a, a thahrui chakna chuan mi anglo ang hialah a siam ta a ni ber. 

Hun alo kal zel a, Thebes Lal Creon-a fanu upa ber Megara-i chu nupuiah neiin fa pali, Therimachus, Creontiades, Ophitus leh Deicoon te an nei a, hun engemaw chen chu hlim taka awmin Hercules-a nun pawh chu a pangngai ve ta viau mai. 

Mahse Hercules-a hian haw em em tu a nei tlat a, chu chu a pa Zeus-a nupui Hera-i a ni. Hera-i hian hmeichhe dang laka Zeus-a fa a nih avangin a piantirh ațang khan a haw êm êm a, a chungah thil țhalo tam tak a thlen tîr țhin a. 

Zan khat chu Pathiannu Hera-i chuan Hercules-a mumang chu a tibuai vak mai a, Hercules-a mangchhia chuan a nupui leh a fate chu a that ta vek a. A tûk zîng a Hercules-a harh chuan a nupui fanaute ruang chu a hmu ta a, mak a ti êm êm a, a kuta thisen kai a hmuh chuan ama thiltih ngei tih ahre chhuak ta a. 

Chu a thiltih avang chuan a inthiam thei lo a, rilru nâ leh beidawng takin a hun a hmang țan ta a.

Mahni inthiamchawp tumin thilțha te tive țhin mahsela a rilru a dam thei chuang lova, a rilru damna tûr leh a inthiam ve theihna tûr a nih ringin Greece ram tana damchhunga thil țha tih a tum ta a. 

Tichuan Mycenae Lal Eurystheus-a hnen a pan ta a. Hera-i thupêk angin Eurystheus-a chuan Hercules-a chu hna hahthlâk tak tak sawmpahnih, a puitlin theih pawh an rinloh khawpa rapthlâk chu a lo tuk ta a ni. He hna hahthlâk leh hautak tak tak hi ani khawvelin a Hercules-a anlo hmelhriatna chu.

A hna hmasa ber atan chuan Hercules-a chu Nemia Sakei, kawlhsen êm êm mai chu that turin an ti a. Chu sakei chu tihlum thei tumah an la awm lova, a vun chhah êm avang chuan mihringte thal khauh ber te leh fei zum țha ber ber te pawhin a tipem zolo a ni. 

Hercules-a chuan a kutlâwnga a beih a ngai a, harsa tak chungin finna Pathiannu Athena-i puihna a zârah Hercules-a chuan a rêk hlum thei ta a.

Hercules-an Nemia Sakei a that thei tih an hriat chuan mak an ti hle a, Pathiannu Hera-i chuan a aia hna rapthlâk a tuk leh ta a. 

Rûlpui lian lutuk mai, lu râpthlâk tak tak pakua lai nei, Lernanean Hydra an tih chu that turin an ti leh ta a. Hydra hian lu pakua a neih mai bâkah a lû an sahchhum apiangin lu dang pahnih a pian belh zel lehnghal a.

A lû a sah bun apiangin a sah bunna ah khan lu dang pahnih arawn piang lehnghal zêl a, beidawng taka a awm hnu in Pathiannu Athena-i chu naupang anga rawn inlan in Hercules-a chu ngaihtuahna thar a rawn neihtîr a, tichuan Hercules-a chuan meichher a siam a, Hydra chu bei nawn leh in a lû a sah chhum veleh rang takin a lu sahchhumna lai chu meichher in a hliau zêl a, tichuan lu dang an rawn piang thei tawh lova, A lu a sah bun vek hnu chuan chu Hydra chu a thi ta dêr a.

Rûlpui Hydra pawh a thah leh tâk avangin Hera-i chuan hna harsa lehzual a ngaihtuah leh ta a. 

A hna pathumna leh palina atan chuan Ceryneian sazuk, fei thlâwk lai pawh ûm pha thei khawpa tlân chak leh Erymanthian sanghal, khawpum pawh ching darh vek thei khawpa chak chu a nung chunga man turin an ti leh ta a. 

Hercules-a leh Cerynaeian sazuk hi Greece khaw hrang hrangah kum khat chhûng zet an in ûm kual a, a tâwp ah Ramsa chunga roreltu Pathiannu Artemis-in țanpuiin Sazuk hi a man thei hrâm a, Tin sanghal nen pawh thla tam an inbei a, mahse a man theihloh avangin Mount Erymanthos- ah kal in Chiron-a hnenah a man theih dan tûr a zawt a.

Chiron-a hi a kâwng achin hnuailam sakawr, a chunglam mihring ani a, Pathian Zeus-a te nen Cousin an ni. Chiron-a hian Greek pasalțha tamtak hriamhrei hman dan leh indo dân te a zirtir a, Argonauts Rammutna a an hotu Jason te, Peleus-a fapa Achilles-a te, Ajax-a te bâk ah mi tamtak sipai leh Pasalțha ropui tak takah a chherchhuak ani.

Chiron-a chuan Hercules-a hnenah chuan Thlasik laia Sanghal chu man turin alo ti a. chuvangin Hercules-a chuan Sanghal chu a man thei ta hrâm anih kha.

Hera-i leh Lal Eurystheus-a chuan tih ngaihna an hre ta lo a, hna danglam deuh an ngaihtuah leh ta a. 

A hna panga na atan chuan Lal Augeas-a bâwngin, bâwng sâng chuang awmna, kum sawmthum zet thenfai loh a awm chu nikhat chhûngin thianfai vek tûrin an ti leh ta a. 

Nikhat chhûngin chawl miah lovin a thawk a, Alpheus leh Peneus- lui te chu an luanna la pêngin chu Bâwngin bâl tak chu a tlenfai tîr a, tichuan Eurystheus-a hnenah chuan a kír leh ta a. 

Tichuan Hercules-a chu Stymphalian mupui lian lutuk mai, Arganouts khaw mipuite kum tam tak lo tibuai tawh tu chu that turin a ti a. Chu mupui lian tak chu Pathiannu Athena-i puihna azârah a tihlum a, Chumi zawhah Crete rama bâwng kawlh zet mai, an lal Minos-a meuh pawh ti mangang êm êm tu chu that turin an tîr leh a.

He Bâwng kawlh hi tihlum lovin aman a, a hnu ah Athens Lal Theseus-an Pathiannu Athena-ihnenah inthawi nan a hlân leh a.

A hna puitlin tawh te avang chuan Hercules-a chuan hahdamna hmuh a inbeisei ve țan a, a rilru hreawmna chu a reh thuai a ring ve țan ta a. 

A rilru a hahdam dawn chauh tih chuan a hnathawh leh tur chuan a rilru a ti hrehawm êm êm a, a chhan chu Argos Lal Diomedes-a sakawr nû ru tûr a anti vang ani. Diomedes-a hi indo hrât tak leh mi rorum êm êm a ni a, Trojan War laia an hotu pawimawh tak a ni nghe nghe. Diomedes-a hian sakawr chak țha ber ber a la khawm a, mihring sa in a châwm țhin a, Diomedes-a sakawr te tan chuan mihringte chu an chaw anih avangin an hlau lo hle a, an kawlh phah êm êm bawk a ni. 

Hercules-a tan pawh hna harsa tak a nih phah a, mahse a thiltih tawh te avanga thiam a chan theihna a nih a rin avangin Argos lam pan chuan a chhuak ta thova. Diomedes-a sakawr nû, mihring sa a a châwm țhin, Podargos, Lampon, Xanthos leh Deinos- tih a hming a vuah te chu ru chhuakin Lal Eurystheus-a hnenah a rawn hruai a, Eurystheus-a chuan Olympus tlânga Pathian chungnung ber Zeus-a hnena inthawi nan hlân turin alo ti a, Mahse Zeus-a chuan Mihring sâ ei țhin Sakawr chu ama hnena inthawi nan a hlan chu lo phallo vin, ramhnuaiah Sakei leh ramsa dangten a an eitûr in a dah tîr ta zawk a.

Chumi hnu chuan Amazon Lalnu Indona Pathian Ares-a leh Otrera-i te fanu Hypolita-i kâwnghrên la tûrin an tîr leh ta a. Hypolita-i unaunu chu Penthesilea-i, Trojan War a Achilles- ana a tihhlum tâk kha ani.

Amazon hnam hi hmeichhe rual, ramhnuaia chêng an ni a. Indo an thiam in an che rang êm êm a, Ramdang ina Indo nana Sakawr chungchuan na chang anla hriatloh lai, Sakawr tawlailir chauh anla hman lai te khan anni chuan Sakawr chungchuan an thiam tawh a, Indona ah pawh an chêt țhat țhin phah rêng ani.

Hypolite-i kâwnghrên hi Lal Eurystheus-a fanu Admete-ina a duh vang ani a, Hercules-a hian kum thum dawn chu a beih a ngai hial a ni. 

Hercules-an an hna tuk ang te a tih thei zel avang chuan Pathiannu Hera-i leh Lal Eurystheus-a te chu an mangang țan ta a. Hercules-a chu khawvel mihring te la kal ngailohna ram, khawvel hmâwr tâwpa awm Gerydon thliarkar ah chuan an tîr leh ta a. 

Gerydon bâwngpui sen chu ru tûrin an tîr a, he bâwngpui hian lu pathum a nei a, vêngtu rinawm êm êm Eurytion-a, amah chauh pawha tlâng sâwi nghing thei khawpa chak a awm bawk a, chupa chuan chhûn zân zawmin a vêng țhin a ni.

Hercules-a chuan bâwngpui chu rei fe a veh hnuah a ru thei hrâm a, Eurytion-a hian hla tak thleng a ûm a, mahse a man hman ta lo a ni. 

Gerydon bawngpui a ruk leh theih tak avang chuan Hera-i chuan Hercules-a chu amah ngeiin hmachhawn a tum ta a. Hercules-a hna sawmpakhatna atan chuan Hespiredes huan laitaka rangkachak a rah țhin Apple chu lo tûrin an ti ta a. 

He thingkung, rangkachak Apple rahna hi Hera-i leh Zeus-a inneih chhinchhiahna thingkung a ni a, tumahin an la khawih ngailo a ni. Hercules-a chu Herperides huan zawng tur chuan a chhuak leh ta a, kum tam tak a thang hnuah pawh chu huan awm ang reng reng a hmu thei lova. Beidawng takin Atlas tlângah chuan a lâwn chho ta ringawt mai a, chu tlâng chhîpah chuan Titans pakhat Atlas-a a hmu ta hlauh mai a. 

Atlas-a chu vân châwikâng tu a ni a, Zeus-a hremna avanga kumkhuaa vân châwikâng tura ni a. Hercules-a chuan a rilru hrehawmna te ahrilh hnu chuan Atlas-a chuan Herperides huan awmna a hriat thu te leh rangkachak apple ngei pawh a lâk theih thu a lo hrilh a.

Tichuan Hercules-a chuan Atlas-a phurrit chu a put chhâwk a, Atlas-a chu rangkachak thei lo tur chuan a chhuak ta a. Reilote ah rangkachak thei nen chuan a rawn kîr leh a, mahse kumkhuaa vân châwi kân chu a inhuam zui tlat lova, Hercules-a chu hnutchhiah a tum ta a. He tih lai tak hian Hercules-a chuan,”Min kalsan dawn chuan ka dâr nghahchhan hi kan siam țha lawk ang, reilo te han pu leh phawt la”, a ti ta a. Atlas-a pawh chuan a lo la ve mai bawk a, mahse Hercules-a chuan vân chu pu leh tawh lovin a kalsan ta a. 

A thiltih zawng zawng avang chuan Hera-i leh Eurystheus-a chuan Hercules-a chu an hlau ta hial a. Mithhi khua lamah an tîr leh ta a, mitthi khaw kulh vêngtu Cerberus an tih chu man turin an ti ta a. Cerberus hi ui lu pathum nei a ni a, a lianin a kawh êm êm a, tumahin an la kalpêl thei ngailo a ni. Thihna Pathian Hades-a rinrâwl ber a ni bawk a, mihring tana thah theih chi ziazang a ni lova, a nung chunga man te phei chu thil tih theih a nih an ringlo hrim hrim a ni. 

Hercules-a chu mithi khua lam pan chuan a chhuak leh ta a. Mithhi khua a thlen chuan Hades-a chuan a lo hmuak a, Hercules-a chuan Cerberus man tura lo kal a ni tih a hrilh ta a. Hades-a chuan kut lâwnga a bei dawn a nih loh chuan Cerberus chu ko dawnlo tih a lo hrilh a Hercules-a chuan kut lâwnga beih chu a remti ta a. 

Hercules-a leh Cererus chu an inbuan ta ngat ngat mai a, Hercules- pawhin thih thâ tak meuhin a bei a, a hnâ zawng zawnga hahthlâk ber ani tih a hrechiang hle mai. A tawpah Hercules-a chuan a hneh thei ta a, Cerberus chu a minung khaw lamah a hawn chho leh ta a. 

A hna sawmpahnih a zawh meuh chuan Hercules-a pawh a lo upa ve tawh hle mai a. Mahse Hercules-a chuan rilru hahdamna te leh a thiamchanna tûr a lo beisei țhin te chu a hmu ta chuang reng reng lova. A nupui fanaute chunga a thiltihte chu a thinlungah a reh thei chuang lo a ni. 

Thil țha tam tak pawh tise, a thiltih te avang chuan a rilru a hahdamin thiam a inchantir thei dawn chuang lovin a hria a, ama nunna lâk hial a duh ta a.

Tichuan thing a fawm khâwm a, thing dawhsân lianpui a siam a, inhâlhlum a tum ta a, meipui a aluh hnu hian Pathiante chuan khawngaihin Finna Pathiannu Athena-i chuan rawn la chhuakin thi thei tawhlo tûrin a siam a, Zeus-a chuan Greek Pasalțha thi tawhte tan chauh an thlarau awmna tûr an siam Pialral, Elysian Field- ah a nupui fanau te nen hlim takin a khawsak tîr ta a ni..