THUHMAHRUAI

.Zankhaw tairêk thleng thlengin thu/thawnthu ziah tûr kan ngaihtuah a.

Kan ṭhianpa pakhat ina, 'Ngaihzâwngte chu thawnthu ziah nan a ṭangkai asin, chutiang tûr chuan nei ila, inṭhen nikhua pawhin rilru a hlim sârh mai alawm.' a tih hi a lo dik angreng fu mai, a chhan chu dikna lai a awm ve tlat(!)

Mahsela(!) in ti deuh duah teh ang, chutiang tûr pawh chuan ngaihtuahna lo sêngin lo ti pawh ni ila, a bulṭanna tur, thawnthu ziah bulṭanna tûr tak mai hi a buaithlâk duh angreng khawp mai.

Bulṭan phawt loh chuan a tâwpna siam chi a ni hauh si lo a, a tâwpna a bulṭan ngawt lah a thawnthu a tawi duh dâwn si, chu lovah a tâwpna a bulṭan te chuan engtin nge kan tih tâwp tâk ang tih pawh hi ngaihtuah angai ve fû mai, tiraw K'u Ar el(!)

Chuvang chuan bulṭanna bulṭan na hi thil pawimawh tak niin alang.

A enga pawh chu nisela, khi kan ṭhianpa vék, 'Ngaihzâwng lama idea nei a ' khi ania, ka thawnthu ziah pakhat a a dul lam in hma asâwn tâk êm êm chungchâng ka ziah tel avânga lungawi lo êm êm chu. (tuna ka thuziah pawh hi a lo hmu leh ngei ang a, a lung pawh a awi lo thuah hnih ngei ang, mahse pawi lo, mêl zâ deuhthaw kâr dan ah kan awm tawh tho.)

Chuvang chuan, han ti ngawt ila, a eng a 'chuvang' han tih hluaina tûr êm êm pawh a awm chuang lo a, chuvang tak chuan heti lam hi i'n sawi kai lawk teh ang.

Chawm bawk a, hâwp bawk a, pal baw bawk, an tih ang deuh a, han sawi vul chûk a, han ṭhet darh deuh hluai tûr khawp chuan kan kum lam hi ala nau deuhin kan tawn leh hriat te ala tlêm lulai deuh a, kum sâwm leh pariat kan kalsanna pawh kum sâwm leh pathum pelh hret emaw lai ni tawh mahsela, kan naupan hun kha angai tho a ni a, han sawn hma a, kan tawn thil te kha tih hma theih a ni chuang bawk si lo a, amaherawh chu naupang inti viau mah ila, khawi i ilo chhuahvah châng te lah in, kan chhai rual lek lek emaw kan tih te khân, ' ka pu, ka pu' min tih châng a awm ta deuh reng bawk si a, angaihna tak hriat pawh ahar duh khawp mai, a ni lawmni Pi Rafa (!)

Ni e, Naupang inti viau mah ila, ṭhangthar deuh te pawh an nu leh pa an sawi hmasak loh chuan kan lo hre tawh mang rêng rêng lo mai a, an ni angrual kan nih lai a, ka pu/ka pa emaw kan tih te leh tlangval an nih chuan tlangval senior kan tih ho te ang rual kha kan lo ni tawh tho mai.

Keimah bîkah liau liau phei chuan thui tak tak thleng a hmai phih ngai ang chi, nisâ ina a em na tle vât ang chi khân Pathian hian mal min lo sâwm hlauh mai bawk si a, duh lo teh mah ila hnial rual loh, dan rual loh malsawmna 'Thupêk' ang chi kha a ni si a, malsâwmna rau rau vah a buaithlak ber chi a ni ta hial ve ang(!)

Dik chiah chuan khâwnvâr tui pâwl hma   a la pha ve ngat leh têl pawh a pavâ, tel tak leh badam têl duh zâwk zâwk, pava bo ngei a lei hman ka ni ve tlat. Inchhuanna tham chu ni lo mahse ṭhangthar te lakah chuan intithei thei ka nihna lai a awm ve. A chhan chu, khâng hun kha hre hman ve miau hlawm hek lo.
Khâng hun lai kha la rei lo viau mahsela, ṭhenkhat tân chuan hriat phâk loh, hmanlai a ni ve tawh miau a, chuvang chuan second sâng engemaw zah lai hun kha a ni in ti tawl mai teh ang.

Khâng hun lai khân tunlai angin Mobile phone te ala awm lova, Computer Games pawh anawlpui ang chuan ala lâr lo, chu ai chuan Video Games alâr zâwk a, Super Mario, Super Contra, Load Runner leh Tank.etc..te khelh nasat hun lai ber a ni a, Comics bu hrang hrang, Tinkle, Phantom, Archie, DC & Marvel Comics-  uar hun lai kha a ni.

Tlai school bân veleh a tlân haw char char in, dar 03: 30- a Cartoon ṭha mi kan tih, Power Zone en hman tum kha kan ni bawk a, Centurion, Space Ghost, Galter, Batman & Robin, Sky Commander, Transformer, Ninja Robot, Thunder the Barbarian, Swat Kat leh Captain Planet..etc te kha en hmaih kan phal ngai lo.

Khâng hun lai khan tuna WWE hi WWF ala ni a, Hit man te, Hulk Hogan te, Ultimate Warrior te leh Tatanka khûr te kha mit tla lo lêkin kan en a, Undertaker- intih pâ lai, a pu ina dawibur a ken lai te leh Val Venis-a'n a ring chhûnga a puan ven (towel veng-a kan ti ṭhin) sexy tâwk a a phelh lai te kha aw!

Chumi chawhnu lama The Rock lâr lai te, (tunlai ṭhangthar te chuan the rock hi wresler a ni ṭhin tih an hre tawh mang lo) a beksam a zuah sei anga kan bek a samdumna kan hnawih ve ṭhin lai te, sawi vek sên a har, Booker T- a mitmu lian tak te leh Hardy Boyz te, Dudley boyz te, Kurt Angle a lu kawlh hma leh sexy lutuk Torrie Wilson te, Tawite si hnute lian deuh Trish- te kha hre pha an awm chuan kum 30 râl an kai ve tawh ngei ang.

Chutiang zel chuan han ti deuh duah ila, Lehkhachaih uar lai hun a uar ve hman, a hrui pawh darthlalang chhut sawm, atta nen a hmeh pawlh a, midang lehkhachaih hrui ah chat tum te zîngah pawh ka tel ve hman a, Thirzai kual 'Ghari' ti a khalh ve hman pawh ka ni.

Tin, ṭhangthar te'n a Gi-Joe an tih, Uchang rêp mai ni lo, Original  Gi-Joe- ngei mai, Flint te, Barbeque, StormShadow, Cobra Commander, Road Pig, Razer, Snake Eyes, te bâkah kan phuah belh, Vaki chhawm a te, Awle chhawm a te, Parachute chhawm a te kha ka khalh mai ni lovin ka modified a, chhûng te'n a Tom Sawyer- min tih hial khawp khân kan in thleng kual a, a tâwp ah ka ta ngai bawk te kha ka nei leh nawlh ṭhin ania.

Khâng hun lai khân He-man leh a sakei te, Skeletor te pawh DD channel a en mai nilovin, a Toys in kan khalh ṭhin anih kha.

Hun a lo in her a, Cartoon Network- a hmuhnawm ti tak a kan en ṭhin Transformer te chu a Movie in kan lo en ta a, Gi-joe te, Comics bu Marvel leh DC - te pawh Comics mai ni lovin leh Cartoon mai ni lovin, a Movie in kan lo en ta chu ania(h).

Isua Zirtir Thoma ang maia a nâk thleng a zen kim biai tûr chuan kan hriatrengna aia kan hriatreng lohna a nasat tawh miau avángin kan sawikim biai thei ta hauh lo mai, pan lai nun ngaihnawm tak te kha...

Tun hun aṭanga her lêt a kum tam vak la ni lo a kan hun hman hlimawm nge zahthlak zâwk te pawh kha (kan dul hmahruaia te ho nen a kan inkawp tak tak lai) up ral mai mai atan chuan a uiawm ka ti a, remti lo mahsela a huat ah tal pawh han sawichhuah hrim hrim hi ka chunglam tân ka 'mission' pawimawh tak pakhat chu niin ka hria.

Kha ka ṭhian-a khân a nakruhbo a neih lêt ni khan a mah maia ding lova, a kianga ve tûr a min sawm ve tâk mial avângin theihpatâwpin kan in pen parh dûn a.

Kan vêng ṭhenawm lawk a monu hruai tûr a kan va kal chuan moneitu emaw min lo ti a, ka pianchamphaphak aiin chibaitu ka ngah zâwk hialin ka hria.

Monu te inchhûng kan thleng a, inchhûng kan lût laklawh tawh si kha tihtur kan hre si lo, kan va hawihai rei tak êm.


Lungthlulo fe a inchhûnga kan ṭhut rênrâwn hnu in Mo chhawm tur load angai tiin ka kalpui te hovin min chhuahsan vek a, Rei vak lo lâi ṭût a ka ṭhut hnu chuan mo chhawm load pui tûr chuan ka chhuak ve leh daih a.

Chutianga Smart fahran a thuam thil kan put kual chiam lai chuan kan ṭhian pakhat nu hian 'Monu te zu hruai tawh rawh, kal a hun tawh ania,'  tiin min lo ko a, kei chuan, ' engtin nge ka hruai dawn, engtin nge ka tih ang, ' ka tih lah in, 'ka hre bîk lo, zu hruai tawp rawh', a tih avângin mo te inlam pan chuan ka kal mâwl leh tawp a.

An in ka thlen chuan Hunserh an lo hmang zo tawh a, keimah chu min lo nghak deuh reng tawh hi a ni âwm a, inchhûng ka lût chu ka chungah mitin rêng mit chu a fu deuh ṭhup mai a, 'Monu an lo hruai tawh dâwn anih hi', an tih deuh sap sap thleng chuan ka lai chu ala reh chuang hauh law.
Khatih lai hun kha zahna kâwn vawi hnih kal nawn angah ka in ngai hial.

Monu bânah ka vuan chawt a, 'Sangte, kal tawh ila,'  ka tih lai a lo nui deuh ṭhû te kha an tam angreng khawp mai.

Chutiang chuan mu leh mal nei lo lêk khawp a zak chungin kan han inhruai chhuak a, Inneihna tûr biakin bul kan thlenin, motor aṭanga kan han chhuak chu, rin aiin monu kawr fual kha a lo sei mah mah a, lei ah a hnûk deuh dûl dûl bawk si.

Kei chuan inti remhre tâwkin mipui kârah monu kawr fual chu la kângin ka zial mawp mawp a, mahse duhaiin ka lo zial tam deuh ni tûr a ni, monu mal lang hawih khawpin kan pawt hlîm tehrêng anih kha, ka thlah leh rang teh e.(moneitu aiin monu mal ka hlîm hmasa zâwk)

Chutih lai akâr ah, Biakin chhûnga min lo nghak reng tawh tûr a ka rin, Moneitu ber chu mipui kârah arawn lang ve leh hlawl a.

'Biakin chhungah lo zu awm rawh, hmanhmawhin', tiin kan intîr liam leh nghal chûk chûk bawk a.

Biakin chhûnga kan luh rualin Moneitu chu a ṭhutna tûrah a ṭhu fel ve chiah anih chu.

Zah tawh nâk alaiin Biakin a kan luh lai mêkin monu ṭhiannu chuan, " Khawilamah nge ka ṭhut dâwn kha(h), ka theihghilh daih," a rawn la ti heu mai chu a rilru a buai duh khawp mai.

Theihnghilh ava han har tak êm, Inneih zungbun inbuntîr hunah moneitu in min lo dil a, ka lo ak tawp si lo, ka va han in check nasa tak e aw(!)

Rei fe ka indap hnu ah ka hmu zo lo a, beidawn tawh lamah a in dap ve a, aman a lo ak reng chu niin. Monu bun tîr a tumna lamah a thlauh a, a lîr bo a, kan zawng dûn nghek anih kha.

Kan zavai mai chuan a vawikhatna vek kan ni hlawm a, khâng kan thil tawn te kha kan tihluih anih loh vek avângin thiam kan in chantîr ta vek mai anih pawh in a sual tampui lovang.

Kha hun aṭang khan kum tam fe aliam a, ka ṭhian a te pawh chuan Pathian malsawmna dawngin fapa hmelṭha tak an nei ta. Khami chungchâng chu duhtawk mai ila, abâk dang ka ṭhiana chungchâng chu tam tak awm mahsela ka'n zêp ṭhensak ve ange.

An fapa a pian hlim aṭanga ICU- a awm, an nu nauvin a a awmpui chaw pe tûr a kan kal te kha, ICU- awmna zâwt zêl chunga thawveng tãwk a ICU- chhûnga kan lût rup mai te kha hnâr alian duh emai, sawi tawh lo mai ang.

Chutiang chuan kum a lo vei zêl a, an fapa pawhin a School akai fê hnu pawh chuan kei chu angai ngaia kîr leh tum ang hrim in mahniin ka la tei ta ruk ruk a.

Tirhkoh Paula'n a, 'Keimah angin awm rawh u,' a tih chângchawi pawh ka an dâwn aruaiah kei tehlul hian kei aia lian mah rûn rem pui tûr ka'n hmu ve hlauh mai kha chu kei ai chuan Vân mipui te pawh an lawm zâwk ta hial ve ang(!)

Kum tam tak hnu ah ka ṭhiana nen bawk chuan kan inlungrual leh a, kei ve teh lul in a, 'Kumtluang atân' tih pui tûr ka'n tawng ve mial kha chu phûr namen lohvin a phûr a, mo hruai nân a motor a thawh hial anih kha.

Tichuan le, zîngkâr hun zawng zawng inchei nan a kan hman hnu in, chaw kaw puar pawh ei hman lo lêkin kan phili leh si a.

Dar 11:00am- a biakin a hunserh hman tur kha, dar 10:30am-  ah Bawngkawn aṭangin Durtlang North kan pan chhek chhek anih kha.

Kan hmanhmawh êm avângin Leitan chho ah chak mangkhêngin kan tlân a, mahsela kan tlân chak chuan motor cheina, motor hmaa an nû ina uluk taka pangpar bâwr, Split Tape a  a chilh beh chu thlawn in a tla dâwn zel a, kan ding a, vawi li, vawi nga vêl kan châr beh ṭhat hnu phei chuan,  a pangpar bâwr chawp in Split Tape kan bel khat vek tawh a, analhna pakhat mah awm tawh lo mahsela, Biakin kan thlen meuh chuan a nghet ṭha tawh kher mai.

Min inneih tîrtu Pastor lah chuan thu chham min neih tîr laiin, vawikhat mah ka hming zu han lam dik lova(!)

Kei lah chuan ka hming chu dik lovin lam mahse ka hming dik hlîrin ka chham a, kan nu lah ngeiawm bawk, ka hming dik hlirin a lo chham ve char char tho.


Kha hun aṭang khan thla tam a lo ral leh reng tawh a, fa tîr ah mipa kan han nei lehzêl te kha chu a lawmawm ka ti ṭhin.

Thla tlêmte la ni mahsela, a rualpui te sam erawh a buk in atam hle a, ka'n fapa erawh in chhun tûr pa min lo neih miau avângin ala tam ve hleithei ta tlat lo mai.

Mahsela chu chu kei apa hi, Pathian ina  apa ngei ka ni tih lantîr nân a mal asâwmna pakhat ani tih chu hai rual a lo ni leh si lo.

Chuvangin thil hi anihna leh neitu tak chianna hi a fiah loh chuan buaina zakhua thlen tu a ni thei a.

Tunlai a kan ziaktu tam tak te pawn a an hriatthiam loh/ hriatpawlh pakhat chu Thuhmahruai( prologue) hi aniin alang.

Prologue chu, Greek ṭawng, 'prologos, pro (before) logos (word)' tih aṭanga lo kal a ni a. chumi awmzia chu, 'Thuhmahruai' tihna a ni.

Chu chu thawnthu chhûngthu nilovin, Kan thawnthu ziah tur thuhma ang anih chu.

Chuvangin, Prologue tih ah, Rhapsody (sawihawnna) hi dah lo hram ila thiam kan chang a ni mai. Prologue leh Rhapsody hi a in ang lo ania.

Tikhan kan han sawi tak vak a, a thupui kal kân in kan sawi nge a thupui kan sawi lo hrim hrim tih erawh chu chhiartute ngaihdan ah dah ila, Kan 'Sawi vak' ka han ti ngawt a, kei a thil sawi ve te hi chu a chhumbung remrum ṭhin rêng rêng a ni tih kha min lo hriatsak dawn nia.

Engkim hi atak ram dai pha khawp leh bun ruah vek mai châkawm viau mahsela thupui ah a ziahdân kalhmang tûr kân lo sawi vek tawh sia, chuvangin engkim mai khi a chhîn hawn ang chauh vek ah in lo ngai mai dawn nia.

Thuhmahruai anihna angin a 'tlîpna/tâwpna(epilogue) pawh hi dah ṭût a rem lo a, ṭawngkam thiam tak maia han thluaithlum lah a chi hek loh.

Chuvang chuan mak in lo ti anih pawh in a mak ka ti ve hauh lo ania, a chhan chu, thuhmahruai chauh kan sawi miau hek.