SULTANA : THE LOVE BETWEEN WAR ( CHAPTER -2) THE KIDNAPPING

.GARDEZ, AFGHANISTAN.
17 April, 2014.


A ngaite bawkin Gardez khawpui chu a boruak a la muanawm chuang loh kher mai, khawlum nên, khawpui boruak chu zîngkâr aṭang rêngin a eng engemaw ti deuh ruih a.

Zînglam dâr 10 a rîk meuh chuan American Military Newspaper, Star & Stripes- a thawk tlangvâl mawng zâng veh vawh Samuel Hopkins-a chuan a American- pui James McFoy, Journalist ve tho, Global Post- a thawk mêk Office chêp tak chu a thleng phei dêr tawh a.

McFoy-a hi Journalist ni mahse râltlân leh indona avânga tuarte chhawmdawl lamah a in hmang nasa hle a, mi inpe zo tak mai leh mi huaisen tak mai anih avângin a hming pawh hi Afghan leh Syria- râltlân ho zíngah phei chuan hre lo an awm lo hial maithei.  Mî ṭanpuina kawngah pawh ama mimal sum te pawh a hmang hial hial ṭhin bawk.

Chutiang a hnathawh ṭhat vâng rêng a hemi nî pawh a Samuel Hopkins- hian tlawh a ni rêng bawk a.


Mahsela rei pawh an inkâwm hman meuh lo.

Thâwklehkhat ah an awmna kawtthlêr lehlamah chuan thil puak ri nasa tak mai hi a rawn ri thut a, an phu chiang dûn kher mai.

Mipui lah chu an ṭê chêl chûl hlawm a.(!)

Rang tak in an tho zawk a, tukverh aṭanga an han hawichhuah chuan kawtthler ah chuan ISIS- sipai ho an lo tam tawh kher mai, motor eng emaw zah hian an in phur lêk lûk a, an hmuh theih apiang, mihring tupawh mai, naupang aṭanga tar thleng mai hian dimna tel lo lêk in an kâp let tawp tawp a.

" Zâwng ho chu leh, an va châk dâwn lo rua êm." ha chang ṭhial rap chung hian McFoy- chuan a ti a.

.Zîngkâr aṭangin Gardez police training centre chu Islam firfiak pâwlin thihchilh bomb leh silai nen an luhchhuah a, an thawkrip in an che nasa kher mai.

Police Trainning na mai bâkah US- ina a lâk tawh anih avângin a khawpui pawh chu rahbeh tum in ṭan an khawh a,


Sipai hmun pawimawh lai lai an beih hmasak hnu in Civil mî ho lakah an ṭuan leh ta thung a.

Syria sorkâr sipai tam vak lo leh Afghan Defence Army (ADA) ho chauh ina khawpui an luah avângin ṭanpuina rawn thlen hma in Islamic- ho chuan an duh ang chu an ti fel duak hman.

 Chutianga Sorkar hmun pawimawh deuh leh Sipai Camp- an tihchhiat hnu chuan hmâ la zêlin an rawn thawk phei zêl hi a lo ni a..


*****   ******  ******  ******  ******  *******

" Engtin nge ni ang, an va han tam ve.." Hopkins- chuan hlauhthawn hmel deuh hian a ti a.

"Kan hmanhmawh angai a ni, Lehkha pawimawh ho hi kan dahṭhat vat angai.." McFoy- chuan a ti a, ṭawng mawlh mawlh pah chuan dawhkân a lehkha pawimawh leh File ṭhenkhat ho chu Garbage bag lian vak lovah hian a thun sawk sawk a.

"Kan hmanhmawh angai,"

Tukverh bul aṭang chuan pâwnlam a thlîr reng a, a phone chu hmanhmawh deuh a phawrh rawk rawk pah in tu emaw hi biak tum in a hmet zui nghal a.

"Fuck"

"Khanglang chuan, engmah a tlang thei lo, tumah a phone theih loh, hrep tak chuan, James, Tlânchhuahna kawng dang a awm em?"


" Aw, kawmchâr lamah sawn, hei hi min lo thun pui lawk rawh, kan dahṭhat vat angai, tunah.." McFoy- chuan a lo ti a.

Hopkins- erawh a mangan hmel khawp mai, a che reng reng chu a buai deuh nuaih a.
An thil pawimawh ho chu Garbage bag ah chuan an thun dûn sawk sawk a, an thun zawh chuan McFoy- chuan thing ṭhutthleng rit fahran mai chu hûng sawn in chhuat a Carpet- inphah chu a pawt hlîm a.

Chutia Carpet- a pawh hlîm chuan chhuatah chuan thil dahṭhatna tur rek kuak a lo awm reng mai.

An pahnih chuan Garbage bag chu chhuat rek kuak ah chuan an thun dûn mawlh mawlh a, Carpet pawh a hmâ ang chiah a phah leh in a chungah thing ṭhutthleng an hûng leh a.

Chutih lai chuan pâwn lam aṭangin silai an rawn kâp ṭan ta.

Tukverh dârthlalang a keh ri chuaih chuaih a, banga an thil târ leh computer te chu a chhe hneh kher mai.
Bawkvâk chungin chu silaimu lêng kârah chuan in hnunglam a tukverh awmna lam chu an vâk thleng thei hrám a.

Silai thâwm a reh a, pâwn lamah chuan ṭawng ri nawk nawk thâwm a ri hluai a, mahse English erawh an hmang hauh lo, an in auh rî aṭang chuan  Islamic- ho bawl chu a ni.

Inchhûng chu vaivut leh silai kahna avang chuan a khu rum rum a.

"Hmanhmawh ang.."


Kawmchâr lam kawngka rûk chu Mc Foy- chuan hmanhmawh leh dîm deuh chung hian a hawng riai riai a.

Ṭhu chung hian pâwn lam chu a'n thlêk deuh vang vang a, tumah an awm lo hlauh.

Mahse an chhuak hman chuang lo, pâwnlam aṭang chuan Islamic- ho chuan RPG- an rawn kâp lût a, anmahni tak chu fuh lo mahse inchhûng chu a êng zuaih a, ring fahran mai a puakin meialh hlâwm chuan inchhûng chu a khat nghal vek a.

Kawngkhâr hnaih zâwk a awm Mc Foy chu a per dâwrh a, pâwnlamah a in vawrh chhuak lawp a, nikhawhre lovin pâwn lei chârah chuan a let reng a.

Hopkins pawh chu thil puak lêng vêl chuan a taksa hmun tam takah hliamin, mahni in saseng thei lo lêk hian inchhûng ah chuan a let reng a.

Inchhûng vaivut khu rum rum hnuaiah chuan Islamic- sipai ho chu an rawn lût ṭan ta.

Turban khum a, hmuihmul leh khabehmul zuah sei tak tak rual ho chuan Russian AK-47 an rawn hûm deuh fur a.

"أمريكي"(american)

"sahafiin"(journalist)


"Hremhmunah kal rawh u, zâwng ho, thi puar mawlh rawh u ."

A taksa erawh a che thei chuang lo, chûng mi bâwraw leh khawngaihna nei lo mihring chu Hopkins- chuan anchhe tinrêng a lo phuhchhuah khum a.

An silai kâwm chuan an chhu a, an chhir a, an bêng a, an deuhsawh vak vak a.

 ******** ***********  ***********  ******** ********* ********* **********  ***********  ******** **********

Ring lo tê hian a rawn rûm chhuak a, a taksa khawilai mai pawh chu a kham ut ut a, a chal kak duai aṭang chuan thisen a luang chhuak ngiai ngiai a.

Chu ni sa tak mai hnuaiah chuan chêt sawn tum nasa teh mahse a lû bâk lo chu a ti che hleithei meuh lo.

A piah lawk inchhûng a thinrim eng phiar a a ṭhianpa ṭawng ri leh a na tuar ṭê ri te, Islamic- ho nui thlêr duai duai leh an pathian hming lam ri tluar tluar te chu ngaihthlâk hrehawm a ti kher mai.

A ṭhianpa chu an man ngei tih a hria a, amah pawh chuan chulai hmun chu a inthiarfihlim san vat loh chuan an rawn nangching ve vat dâwn tih a hai hauh lo.


A tha neih zawng zawng sâwmkhâwmin a in siamrem a, muangchângin a tho ṭuah ṭuah a.

Han bihrûkna mai tûr a awm lo lehnghal,  a hmalam piah deuh ah hian Car- pakhat, ṭâwn hmêl angreng deuh hi a ding a, chulam pan chuan thei leh thei lo hian a bâi phei tlauh tlauh a.

Mahse a vânduaina akal tluang kher mai.

"Lalpa leh.."

Car- kawngkhâr a hawn rual chiah chuan a ṭê ṭhawt a, a ṭhingṭhi nghal rawp a.

Mahse chuti mai a thih erawh a tum hauh lo.

A hnunglama ṭê ri teng tung leh tlân ri dawt dawt thâwm te chu hre reng mah se, thei leh thei lo hian motor kawngkhar chu hawngin a vâk lût hrâm hrâm a.

Mahse a ke ah chuan man in an rawn phih lêng lawp a, leichâr ah chuan thisen nen a let nuaih a.

Khatia Motor a luh tum, kawngkhar a hawn dawn chiah khan Office chhûng lama a ṭhianpa nghaisatu ṭhenkhat kawmchâr kawngka a rawn chhuak te chuan rawn hmû a, ṭê ruai ruai chung hian a khûp ah kâp in an rawn ûmzui nghal hi a ni a.

"American, Thi rawh.."

Che thei lo va lei châr a mu reng chu anchhe tinreng lawh chung hian a khûp, silai a kah na hliam lai tak chu an silai kâwm chuan an han chhu leh nghek a.

A lû leh âwm ah te chuan an chhir zawt zawt reng bawk a.

"Thi rawh American uicho ."

Pakhat chuan a phih tho lawp a, a sam a ṭhâmin a chem hriam tak mai chu a nghâwngah a chuktuah zui nghal a.

"A tâwk, Journalist kha that suh.."

"Nungdamin kan kawl ang, kan mamawh.."

A hrawk hrui an chhat teuh hman kher mai, mahsela inchhûng aṭanga pakhat rawn chhuak chuan a rawn khap hman hlauh a.

"American kha nungdamin kan mamawh.."

Chutianga an rawn auh tâkah chuan chu misual chuan a chem chu pâi ṭha lehin Hopkins- chu leichârah chuan a theh per leh lawp a.

"Rawn hnûk phei rawh u."

Islamic sipai pahnih chuan a zak ah ve ve dawm in inchhûng lamah chuan an hnûk lût a.

" Kan tihlum rih lovang, kan hmang ṭangkai phawt ang."
a hmâ a rawn au tu pa bawk chuan a ti a.

''Phuar hlâwm ula, Motor ah hlâng rawh u.." a ti zui nghal zat a.

Chu Office chhûng khu rum rum mai lak ata Journalist pahnih te chu phuar chung in dîm lo baksak hian an hnûk chhuak a, an motor ah chuan theh lût in Allah hming lam chung zêl chuan khua chu an chhuahsan ta a.