S.O.S |The Masquerade

Tlâi ni tla tûr chuan tuipui zâu tak mai chu a chhun de siar siar a.

Chunglam vân boruak zau tak maiah chuan zan lam rorêltu Arsi chhuak hmasa lam pawh mit lâwng a hmuh theih in an rawn lang ṭan dêr mai.

Kum khat ah thla sâwmlehpahnih awm mahsela chawhma lam thla kua lai aral tawh avângin khua chu a thim hma ang reng tawh kher mai.

Tuipui nimahsela, Khawthlang lama lungchhe niawm tak a hreh hmel fahran a Nî a her liam tâk meuh chuan khua pawh chu a thim chhunzawm ve nghal a.

Chu zân reh tak maiah chuan chu tuipui zâu tak mai ah chuan Sangha man tu lawng nge ni a, tuipui hrût a zin vâk ṭhin Lawng, pan lam bîk pawh nei chuang lova tuifâwn dân ang ang a tuipui chung a lêng vêl hi tui fâwn kârah chuan a rawn lang leh zauh ṭhin a.


Rei lo tê an arawn lang hnâi zêl a...


Chu lawng chu Sangha mantu lawng emaw zin vâk mî lawng emaw pawh a ang chuang hauh lo mai.

Lawng hmalam zâwlah chuan mi pakhat, a thawmhnaw huh hnuang mai hi zangthal zâwng hian a let reng a, a mit erawh a meng nâ in khua hmu âwm pawh hian alang lo.

Rei lo tê an vân boruak lamah hian thâwm dang rawn chhuak in, Helicopter- pakhat hi chak fahran lo hian a rawn thlâwk a, a hnui a light êng tak invuah chuan a hnuaia tuipui zâu tak mai chu a chhun kual thuak thuak reng a.

Chutianga mibo zawng niawm tak a tuipui chunga an thlawh mêk lai chuan Lawng awmna zâwn chu an thleng teuh angreng kher mai, an inkârah chuan  hlam sawmriat emaw vêl chauh a awm tawh ang tih chuan,  rei lo tê an chu tuipui ah chuan thlî a tleh dâwn tih thu Hmunpui lam aṭangin hriattîrna an dawng deuh thut a, tichuan muangchâng a in herin an rawn kalna lam ah bawk chuan an thlâwk lêt leh ta a.

Thlawhna ri a hriat veleh chu Lawng chhuat a mu reng pa chu thei leh thei lo hian, muangchângin a tho a, pai deuh chawn chawn chung hian lawng bathlâr sír chu vuan in a âu nghek nghek a, bân lah a vai nasa...

Chu thlawhna chuan a bul lawk lawk tuipui te chu a êng pâi chuan a rawn chhun zauh zauh reng avângin an hmu ta emaw tiin a lâwm hman kher mai.

Mahsela a beiseina neihchhun erawh duhthusâm mai an chang leh ta.

A lam a rawn pan dâwn emaw atih lai chuan chu thlawhna chu a in her ruai ruai a, muangchâng hian a rawn kalna lam pan chuan a thlâwk lêt leh ta mai a.

A theihtâwp a ring leh nasa in a âu a, mahsela tuifáwn rî hlup hlup kârah chuan a âw khawngaihthlak leh châu tak mai chu a rîral in, tuifâwn rî chuan mitkhap kâr lek an a chhilh bo zêl leh thung a.

Tlu rawk rawk chung hian lawng hnunglam chhuat a a zin bâg dah chu pan in a tlân phei thuai a.

A bag chhûng a silai ang deuh, hmanhmawh thil leh tawhsual tawh hun atân a êng an kahchhuahna chi chu lachhuak in lawng hmalam ah chuan a tlân phei leh dâwr dâwr a.

Mangang tak a rûm hrâwk hrâwk hian chu a silai kah ên chu chunglam vân boruak zau tak mai chuan a kâp chhuak ta a.

A chung zàwn vân boruak chu a êng chuaih a..

Beisei takin a hmalam hla tak mai a chhanchhuaktu thlawhna êng de nal nal chu thlîr in, a rilru pawh phûrna in a rawn luah ve hman hial mai.

Mahsela boruak a a thil kah ën a reh hnu pawh chuan thlawhna chuan rawn kîr pawh a tum tawh chuang lo tih chu hrilh nawn leh kher pawh angai âwm lo ve.



A beiseina neihchhun ve ngawih ngawih ina a thlawh bosan hnu chuan Lawng chhuat ah chuan beidawng tak hian a thu hnawk a, A lungngaihna mittui chu luang lo mah se a parawl kuang thung a.

Chutih lai chuan ruah mal hian a lû ah a rawn far zauh a, rei lo tê an a tam telh telh a, mahsela nasâ erawh a ni lo.

Rûm hak pah in a'n hawi kual a, Chu zân khawhar takah chuan tuipui chu zankhua in dam tak in a awm dâwn lo tih pawh a hria.

Chunglam a han hawi leh a, Zân hun ti ropui tu leh cheimâwi tu arsi te chu hmuh tur an awm ta mang lo..

Chutiangin Zanlam rorêl tu atân a Siamtu ina a duan, Chhawrthlapui pawh  chu chhûm dum chhah tak tak mai te chuan an lo hliah vê mêk a, Chu Zân reh takah chuan Arkâiden- nimahsela, a ropuina leh a thiltihtheihna êng ropui tak mai te chu hnehchhuh a awm in, Zankhaw tairêk thleng a a ênna ropui takin a chu tuipui a chhun ên phût hun te pawh chu an liam zo ta.

Hneh rual loh a nasa in Chhûm dum leh râpthlâk tak tak te chuan mitkhap kâr an an hliah bo zo va.

Enge a hmachhawn tûr chu a hria, châk fahran teh lo mahsela hlauh vânga tlânchhiat san theih a ni lova, Cho avânga hmachhawn chi lah ani hek lo.

Engpawhnisela, A beidawnna zawng zawng ina  a thinlung aluahkhat tâk hnu chuan a Pathian a âu leh ta nge nge a.

A theihtâwp a nasa leh a thiam ang tâwkin a ṭawngṭai a, mahse thehhmeh ang maiin a reh vang vang zêl si.

A beiseina te chuan kalsan tawh mahsela, a ṭawngṭai lai na na na chuan phûrna leh tha tho na te chu a neih belh leh a, mahse a ṭawngṭai zawh rual chuan lâkbo ang hlauh hian an bo leh si.

Chu zân lo thleng tûr chu a hria, enge a hmachhawn dâwn tih pawh.

A thinlung chapona leh remhriatna chuan a lawng chu khalh mahse, khawmual a hlat tial tial emaw tih mai tûr in a bo pil tual tual zêl si..

Hun aliam a, Zân a rei tulh tulh a, Tuifâwn te pawh chuan awmzia an nei lo ṭan in, a lawng chhûngah te pawh tui a rawn lût ṭan mêk a.

A hmâ lawk a hla tak a khawpui ri dum dum leh ṭêk tla êng chuaih chuaih te pawh tunah chuan a chung zâwn ah mai an lo awm ta. Chhûm dum chhah tak tak te chuan a vêlin an hual a, Ruahsûr lah chu a tam telh telh mai lehnghal.


Ni e, Chu zân hun a hman dân tûr chu hrilh chawp kher angai tawh awm love, A lo thleng dawn tih hre mahse a beiseina neihchhun ina a thlawh bosan miau avângin tih theih dang a nei si lo.

Lungngaiin lawng chhuatah chuan a rûm a, a hun a thleng dâwn tih pawh a hria, mahse a tâwpna a thlen meuh chuan tâlchhuah dân kawng a ngaihtuah a, mahse chu a ngaihtuahna te chu duhthusâm lek fang an ni si.

Hun tam tak a lo beisei ṭhin Pathian hnenah chuan a tâwp nan a âu chhuak leh Chu thlipui leh tuifâwn kâr aṭang chuan a siamtu ropui tak mai chu a theihtâwpin a âu a.

A tâwp nan, chu zân hun lak aṭang chauh a chhanchhuah a dîlna te pawh chu.

Mahse, Ngaihthlâk ani lo nge, chhânna rêng rêng a awm lo.

Tuifâwn nasa tak chuan chu lawng chu a khuh leh hlup a...

Khawchhak lam aṭanga Ni êng mawi tak a rawn chhuah leh meuh chuan chulai tuipui zau tak chu a dam duai tawh a, Chu ni êng nalh tak chuan a hnuai a tuipui chu a chhun êng siar siar a....

Mahse lawng erawh hmuh tûr a awm tawh hauh lo..