ONE MORE LIGHT | The Masquerade

Nipui khawlum huam huam te chu an kalbo zo va,  Chhûn lam rorel tu Êntu ropui zâwk pawh a her liamin rei lo te a chinah Zanlam rorêltu Chhawrthlapui pawh a rawn chhuak ngei ang...

Ni e, Chu Thlasik zân reh takah chuan Vân chung sâng tak a ênna ropui tak tak neitu arsi sâng tam tak te chuan an ropuina leh thiltihtheihna te chu chhuang tak chung hian pho lang a.

Zankhaw tairêk thleng thleng a an tualchaina vân chung sâng an mâwi phei chuan Siamtu hian hetianga awm tur hian a rilru leh ngaihtuahna, a remhriatna te hi kum maktaduai engzah tak sêng ang maw tih hi rilru hian a ngaihtuah vawng vawng ṭhin...

Kum zabi  tam tak kal tawh aṭang khân lungrual takin chûng arsi sâng tam tak te chuan an tualchaina vân chung sângah chuan an ropuina leh mawina te chu leia mihringte tihlim tûr leh an lawmna tikim tûrin zinkawng thui tak an lo zawh tawh a.


Mahsela mihring te erawh chuan chûng Arsi, ênna chhuah ṭhintu leh an khawvel timawi tu te zinkawng erawh chu an zu chhûtpui kîlh kêlh kher ngai lo.

Ni êng mawi tak a kal bova, Zân hun thim arawn thlen hunah vân chung sângah Siamtu ina duh taka a duan Arsi êngmawi sâng tam tak an rawn lang leh dâwn tih bâk chu,(!) chu an thinlung ngaihtuahna tâwi tak mai chu an damchhûng rei lo tê an sawhsawn rêng reng an tum hlawm lo nia.


Chûng ṭuan leh mang ata tawh a lungrual a lo lêng zâ te chuan inkal bosan hun an nei ṭhin a, chumi awmzia chu, Vân chung sâng taka arsi te khian an ênna an hloh in thih hun( ral hun/mih) an nei ṭhin a, chûng hunah te chuan an êng (an alh, meialh hlâwm) te chu an upat tawh êm avângin a mit ṭhin a, chûngte chu mihringte chuan arsi thi kan lo ti ṭhin anih kha.

Mahsela chûng an boral hun a lo thlen chu Arsi êng mawi lungrualte chuan an duh bîk hauh lo (!) Nimahsela Siamtu ina chatuan atâna an tân a a lo ruat sa leh a lo duanlâwk anih avángin duh lo sateh mahsela an tawn ngei angai si a...

Ni e, Engtikni ah emaw chuan chûng vân chung sâng mâwi ṭhintu te chuan chu an tâwpna nî chu anla thleng vek dawn, mahsela a hun erawh a in ang vek kher lo ang.

Kum zabi tam tak kal ta ata tawh lungrual takin, an ropuina leh an theihna, an thiamna zawng zawng hmangin Zân boruak thim leh khawhar tak tûrte chu an timawiin an lo hnêm ho  dial dial a, mahsela an Siamtu ina a lo ruat lâwk ang ngeiin Chûng Arsi êng mawi tak te zînga pakhat chuan a ênna a hloh in a boral hun a thleng mêk a...

Nimahsela a thiltihtheihna leh thiamna zawng zawng hmanga a lo tih hlim ṭhin leh a lo thlamuan ṭhin mihringte chuan chu arsi pakhat lek ina a énna a hloh chu an hre tham rêng rêng lo.

Ni e, Vân chung sáng takah chuan Arsi maktaduai tam tak an awm a, an ropuina leh thiltihtheihna te chuan Zân hun khawhar tak tûr te chu zantin an hnêm a.

Chuvangin Arsi êng mawi tak, maktaduai tam tak zîng a Arsi pakhat lekin a a ênna a hloh chu tumah rêngin an hre tham lo..

Tunge mipakhat lek kalbo tûr chu hre tham ang(!)