IMMORTAL LOVE | A Thousand Years..

.



Khawthlang lam aṭanga thli rawn thaw chu ana êm êm lo nâ in a thâwm erawh a nasa angreng kher mai...



Arkaiden zân nimahsela, a hnuaia ngaw chhah tak mai chu zanlam rorêltu, vân chung sâng tak a zinkawng zâwh mêk Chhawrthlapui ropui meuh pawh chuan a chhun tlang zo meuh lo.



Sakawr tlân ri tlauh tlauh ri hi chu ngaw chhahpui aṭang chuan alo ri chhuak a. Rei pawh a ni lo, tuibûr hmuam da emaw vêl lek hnu ah chuan chu ngâw aṭang chuan sakawr dum lian zet mai hi a rawn tlân chhuak ta hlawl mai a.



A chungah chuan hmanlai pasalṭha te inthuam anga inthuam, thirkawr dum veka inthuam leh puandum hlai tak mai, a dâr a bât hi a chuang bawk a.



A kâwng veilamah chuan ngunhnam sei tak mai hi a pai ran mai a, chu zan thim tak maiah chuan thir lukhum khum lo mahsela a hmel chu a hmuhchian êm êm theih fahran chuang lo.



Chu ngaw dur khup mai chhung aṭang chuan chak fahran maia lo tlân chhuakin a chhak lawk a tlâng dung sei tak mai lam pan chuan a tlân zui chiam a.



Reife chutianga a tlân hnu chuan tlemin chu pa chuan a sakawr chu a tlân muan tir riai riai a, chulai kawng deuh reuh aṭanga hla vak lo a lung chhawrdawh, mithiam rual ina uluk fahran mai leh an duhthâla an remkhawm niawm fahran a rem leh mawi tak mai zâwn a thlen phei chuan a sakawr chu a din tîr ta a.




Chumi hnu chuan muang fahran mai hian chu pa chu sakawr aṭang chuan chhukin, sakawr chu duat hmel deuh mai hian a chûl zui thuak thuak a.



Sakawr beng zawnah chuan zawite hian eng emaw sawi hian a phun zui leh ser ser a.


Chutia a sawi zawh chuan ngaih hmel fahran hian sakawr chu a kuah leh tê tê a.



Chutianga a tih zawh hnu chuan chak fahran mai hian a sakawr chu a rawn kalna lam, a tlânsan tâk ngaw dur khup lam pan chuan a tlân lêt thla leh a.




Ngaw chhung aluh dawn ṭep chuan a tâwp nan ti niawm tak hian ring taka hram in a ke hmalam pahnih chu sâng tak mai hian a lek kâng a. Tichuan ngaw chhung lamah chuan a tlân lut zui leh ta a.



Chutia a sakawr tlân ta chu a thlir zui vawng vawng a. Ngaw chhunga a luh hnu fê pawh chuan a la thlir zui ta reng a.



Rei tawk fang chutianga a din reng hnu chuan rilru hah hmel deuh hian a rûm hrâwk a, muangchang hian lung chhawrdawh lam chu a hawi zui ta nghal a.



A hma râl hla taka ngaw dur khup lam chu uluk fahran a thlek chung hian muangchang hian chu lung chhawrdawh chungah chuan a lawnkai a.



A hma lam thlir reng chung leh mit pawh la sawn chuang lo chuan chu lung hmawr lamah chuan a phei hret hret a.



Ngaiteh, chutianga chu zân khaw tairêk a chulai tlâng bulṭhut a eng emaw chen khawhar hmêl deuh a a awm hnu chuan a bân pahnih hi a hmalam sâng deuh ah hian a phar chhuak a, chutih lai mek chuan a chung zâwn van boruak sâng leh zau tak mai lam hawi chuan muangchang hian a hawichhuak a.



Rei lo tê an thinrim leh lungngaihna aw lungchhiat thlâk tak mai hian ring fahran lo hian,


" Pathian te u, min hawisan tih chu ka hria e, mahse a pawi lo, a pawi chai lo, nunna siamtu leh pe tu chu in ni ngei a, mahse thihna chunga rorêltu chu in ni lo tih ka hria a sin." chutia a sawi zawh chuan a'n châwl leh det a, a kut chu hûm ruh in, a hma aia ring zawk mah hian a sawi zawm leh a.



" Ni e, ka thusawi chu in hria tih hi ka hre thei a sin, ka laka uang thei in ni a, chapo thei pawh in ni, mahse ka taksa chunga thuneitu chu keimah ngei hi ka ni, chuvangin mitthi khaw kulh kawngkhar te chu in mi hawnsak angai lo, keimahin ka hawng ve thei a sin." a ti leh a.



Chu thu a sawi zawh chuan a ṭhingṭhi hnawk a, a lû chu a kun nghiai a.



Dâr chanve emaw lai chutianga kun ngiai a a ṭhingṭhit hnu chuan muangchanga rawn hawi chhuak in a hmalam hmun hla tak mai lam chu a hawi a.



A thinrim hmel réng hmuh tur a lo awm tawh lo. Vawi li emaw vêl lai rilru hah hmel deuh a a thâwk rîk hrâwk hrâwk hnu chuan a mit aṭang chuan mittui hi a rawn luang chhuak nguai nguai a.



Zâwite hian,


" Carmila, âw Carmila, ka hmangaih, i hmel mawi tak te kha vawikhat tal hmuh leh theih ka van châk tak êm(!)



Âw, eng rilru nge maw i put tâk le? Ka van hrethiam lo tak êm...



Ka hmangaih che a sin, ka hmangaih takzet che a sin." a ti leh sep sep a.




Chu thu a sawi zawh chuan chu zân boruak vawt tak mai chu a reh hian a reh tlawk tlawk a.



Zân sava leh ramsa te pawn thawm rêng an chhuah hek lo.



Zân thlifîm te pawh chu chu pa lungngaihna leh khawharna tuarpui niawm fahran hian an reh ṭhap a, an kal lâi te pawh an chawl a ni mial mah na.(?)



Chu zân khawhar tak mai leh ramhnuai pilril tak mai ah chuan nunna nei an awm lo nge an mutbo lâi ni zawk? Rî rêng rêng hriat tûr hi a awm mawlh lo.



A reh hian a reh tlawk tlawk a ni ber mai.



Rei lo te hnu ah chuan chu tlangval khawhar tak mai chu lungngai tak mai hian a rawn phun ri leh sep a.



" Kan inkârah hian hmangaihna chauh lo chu engmah a awm ngai lo tih chu thi thei lo Pathiante pawhin an hria a ni lawm ni?


Ka tâna i rinawmna te kha Pathiante hial zah kâi a ni ṭhin a ni lawm ni? Khawilam thlarau sual in nge luhkhung zo ta che le? Ka hrethiam lo, ka hrethiam thei mawlh lo." a ti a.





Khawhar hmel deuh a zawi sap hian ala sawi zawm zêl a,


" Ka tâna i thinlung kawngkhar i khâr ta hi a mak ka va ti tak êm(!)


Ngaiteh, tâwp chin nei lo tuipui zau tak chu chatuan atâna dâi kâi theih a ni ngai lo a ni lawm ni? Van boruak zau tak te khian tâwp chin leh huam chin a nei ta a maw?


Carmila, ka hmangaih, vawikhat tal hmuh leh che ka van châk tak êm, khawilam thlarau sual in nge luhchilh che a ka hnen ata ikal bo tak le? Eng rilru nge maw i put tâk ni, ka van hrethiam lo tak êm." a ti leh a.


Muangchâng hian a kawr chhung aṭang emaw ni hian darthlalang bûr tereuhte mai, kutzungpui tia vêl a lian leh sei hi ala chhuak riai riai a.


A hmai zâwn ah lek kângin lung chhiat hmel deuh hian reifê chu a thlîr ngawih ngawih a.


Chu darthlalang bûrah chuan tui emaw ni? Nge dâwi thil zawk?


Tui pâwl rawng tak tak leh chhah tak mai hi a awm a.


Chutianga reifê chu darthlalang bûr a thlîr vung vung hnu chuan zâwi sap hian a phun leh sep a,


" Ka duhtak, i thinlung chu ka lamah i pe tawh ngai dawn lo tih ka hria asin, chatuan atân ka hnenah i rawn kîr tawh ngai lo ang, ka hria, ka hria.


Chuvang chuan he ka taksa leh thlarau, ka ngaihtuahna te hian i tel lo a he khawvêl a chên reng hi an thei hlawl lo a ni e " a ti a.


Chutia a sawi zawh rual chuan chu bûr a thil tui awm chu a in zo zui ta nghal vek a.


A lem deuh chiah tih chuan a pum chu a nâ a ni ngei ang, a dawm nghal vawng vawng a.


Harsa tih hmel deuh hian a thaw ri deuh hrâwk hrâwk reng bawk a.

Reivak lo hnu ah chuan muangchânga ânn riai riai in lung chungah chuan a mu zangthal zui ta dêr a.


Chutianga a na tuar lai hmel chu a khawngaihthlak kher mai, thawh chhuah leh a tum ṭhin tak na a, mahse a thei lo.

Harsa tih hmel fahran hian a thaw ri kâwk kâwk a, mahse a rei lo.


A tâwp nan ti niawm tak hian zâwite hian eng emaw ni hi a sawi leh a.


" Carmila, min ngaidam ang che, i tel lo chuan ka nung zo lo a ni e, thihna chuan ka taksa pum hi a fan chhuak a, mitthi khaw kawngkhar te pawh a chhunga ka luh nan an in hawng ta, ka kal a hun ta, mangṭha le."


Chutia a sawi zawh chuan hriattham loh hian eng emaw ni sawi in ala phun mawlh mawlh a, mahse a sawi a hriat theih tawh loh.


Muangchang hian a mit chu a chhîng ta riai riai a.


Chutih lai mek chuan vân chung sâng a chhûm vâr thianghlim tak tak mai te chu a rawng inthlâk nghal in dum chhah pui pui maiah hian an lo chang ta nghal a. Ruah sûr tûr niawm tak hian chûng chhûm dum chhah tak tak te chu lei lamah lo thlâwk thlâ in chulai hmun chu an rawn tuam nghal a.


Chutianga dâr chanve emaw vêl lâi chhûm dum chhah pui pui a zîn chhah mup hnu chuan muang fahran hian an reh leh ta tial tial a.



********************************************************************************



Nula leh tlangvâl inhmangaih tak te chuan an inhmangaihna chauh lo chu engmah rêng an ngaihtuah lo...


Pathian nû te tluk hial a hmêlṭhâ tleirâwl duhawm, Carmila-i leh a hmangaih Marvin- te inhmangaihna thûk leh nasa tak mai chu Pathiante pawhin an thîk hial a...


An in hmangaihna avângin an Siamtu te an theihnghilh a, an tân hun rêng an pe ngai lo. Chuvang chuan Carmila-i chu Pathiante chuan bumin a hmangaih nena an inkâr chu râpthlâk namen lovin an ti keh a.

Chuvâng chuan tleirâwl duhawm Carmila-i thinlung chu a hmangaihna aia nasa zâwk huatna in a khat ta tlat mai.


Ngaihdam chitin a dîl hnu pawh chuan Marvin- chuan ngaihdamna rêng a hmangaih lakah chuan a dawng lo.


Chuvang chuan a rilru na lutuk leh hrilhhlai bawk si chuan a nunna ala ta hial a...



********************************************************************************


.

Vân chunglam sâng takah chuan zan lam rorêltu Thla êng ropui tak mai pawh chu thuneih hmêl tak mai hian a tawlh ruai ruai a...




Chu tuipui zau tak mai chunga thlifîm thaw heuh heuh kârah chuan a khât tâwk hian hmeichhe âw, khawhar hmel tak mai hi ring fahran lo hian a rawn ri chhuak leh riai riai ṭhin a, mahse khawi lai tak aṭangin nge a rawn chhuah tih erawh chu hriat a har kher mai..




 .



Chu tuipui kam chuan chunglamah chuan fâr thing sâng tak tak mai hi an ding thluah a, tuipui kam ah tak erawh chuan ṭiau lung emaw ni, lung lian pui pui mum pil pel hi an awm thluah thung.




Tuipui chungah chuan thlifim na vak lo hi a thaw heuh heuh reng a. Arkaiden zân anih avângin Thlâ chu a êng hle mai, chu tuipui chung zâwnah chuan thuneih hmel deuh hian a êng bial kulh mai a. Mahsela zanlam rorêltu ropui Chhawrthlapui chu a khawhar hmel ngawih ngawih kher mai.




Ni e, chu a ropui zân chuan hlim hmel hi a pu mawlh lo, a ropuina leh thiltihtheihna zâm vêl te chuan a hnuai zâwna chatuan tuipui ang maia tuipui zau leh tawp chin nei lo ang maia tlim hmur mai chu chhun êng sar mahsela, chatuan atâna siamtu ina arsi dangte anga kawppui nei lo tûra a lo duan lawk anih avângin ngui tak mai hian siamtu remruat ang angin a lo her chhuak ve mai chauh a ni si.




Ngai teh, chulai tuipui kam lawk fâr hmun hnuaiah chuan thlân hlui tawh tak mai, a lung pawh khi deuh tuarh tawh hi a lo awm reng a, a chungah chuan hmeichhe pakhat, inneih kawrfual nge, hmânlai hmeichhe ho inthuamna ni zâwk. Kawrfual rawng thim lam deuh, a kawr bân hlâi tak mai hâ hi a lo ṭhusawp deuh nuaih a, khawhar hmêl tak hian thlân chu a thlîr ngawih ngawih a.




Ni lo, thlân mai ni lo, mit ina a hmuh phâk aia sei leh thinlung mit pawh ina a hmuh phâk piahlam, thlarau khawvêl a thlî ni zâwk hian alang. Vân chung sâng taka thla êng ut mai chuan a hma zâwna tuipui leh a bul vêl ramngaw te chu chhun êng mahsela, a hmel tak erawh chu a hmuh chian theih chuang loh.




Mahsela hmeichhe hmelṭha tak leh hmel zahawm tak mai a ni tih erawh chu hai theih a ni hauh chuang si lo. Mahse, a mitmeng te chu a dul ruih a, a taksa te chu thisen nei lo ang mai hian a dâng vâr deuh vu mai lehnghal. A mit meng pawisawi lo, mawi leh thianghlim tak mai aṭang chuan mittui hi a rawn luangchhuak ṭiam ṭiam a, a hmai mâm nalh tak maiah te chuan zawimuanga luang kawi ngiai ngiai in, a khabe zum nalh tak mai ah chuan a luangthla zêl a, a khât tâwk hian a ṭhutna thlânah chuan a far leh zauh zauh ṭhin a. Rei lo tê an a hmui senno châk leh vâm ham mai chu muang fahran a chêttir in, a phun leh sep sep ṭhin a.




 Chu tuipui chunga zân thlifim lêng vêl te chuan a aw nalh tak mai chu an chhêm darh vêl ni mai hian a hriat. A aw khûr dar dar mai chu boruak ah chuan a thâm vêl chiai a, " Marvin, Marvin, ka hmangaih, ka duhlai, engchen fakau nge i ngâi hian ka mittui a sûr dawn, min ngaidam hrâm rawh, khawngaih in min ngaidam hrâm rawh aw." tiin aw khûr dar dar hian chu hmeichhe khawhar hmel tak mai chuan zawi fahran mai hian a ti a.


Van lam hawiin lungchhe tak hian a âu leh a, "Pathiante u, khawngaihin ka hmangaih nunna hi pe leh hrâm rawh u, nikhat chauh tal pawh ani nên hun min pe leh thei lâwmni, khawngaihin Mitthi khaw kulh kawngkhâr te chu lo hawng leh ula, tichuab ka hmangaih a lo kîr leh thei mial mahna..."




Mahsela Pathiante chuan chu nula lungngaihna leh khawharna chu an hawisan tlat a, a chhâng tûrin tuman âwka pawh an chhuah hauh lo.




Chu thlân, a ngaihzâwng a hmangaih ber mai an zalhna thlân khur chhûng aṭang chuan âw a lo chhuak a, "Carmila, ka hmangaih, Pathian te'na i thinlung an thlâk danglam lai pawh khân ka hmangaih che a, Ka hmangaihna che hi engtiklai pawhin a pangngai reng asin, a chhan chu ka thinlung zawng zawng hi itân ka hlân vek avângin." tiin arawn ri chhuak a.




Chu âw a hriat veleh chuan a lungngaihna chu a zual sawt nimai hian a hriat. A mittui chu a a biang ah chuan a luang zawih zawih a. "Âw Marvin, Pathiante'n a min bum avânga ka kalsan che a, i thinlung ka hliam avâng khân min ngaidam ang che, khawngaihin chu chauh chu min tiam rawh, ka hmangaih che, ka thlarau nen zawng zawng hian ka hmangaih che asin" lungchhe tak hian a ti leh a.




 Thlân chhûng aṭang bawk chuan âw a rawn chhuak leh a, "Carmila, ngaihdam ngâi zâwk chu keimah hi ka ni asin, chatuan atân a i lak aṭanga kalbo tûrin ka nunna chu mitthi khua lâwi tûrin ka hlân a, keima kut ngeiin ka hmasialna chuan minung khawvêl pawh ka kalsan asin, i lungngaihna mittui ka luan tîr avângin kei misual hi min ngaidam hrâm ang che, Âw Carmila, vawikhat chauh tal han kuah leh che ka van châk tak êm, vawikhat chauh tal ..." a rawnti leh a.




Chu nu bawk chuan chhâng lehin, "Marvin, ka ngaidam che, ka ngaihdam che avâng tal pawh hian vawikhat chauh tal hmuh leh che ka van châk tak êm, ka hmangaih..." tiin a lo chhâwn leh a.




Ãw bawk chuan, "Hmangaih ber, I lungngaihna hnêm tûrin i kiangah ka awm thei tawh si lo, Minung ram leh mitthi khua chu duh duh tân a inkalpawh theih a ni si lo. Mahsela ka hmangaihna che erawh a dâi ngai lovang, Lei chhûngril a ka thisen leh taksa an ral mêk lai pawh hian ka hmangaihna che hi a ral lo a, he thlân khur chhûng aṭang pawh hian ka hmangaihna che hi ala ngâi reng asin..." a rawn ti leh a.




"Ka hmangaih, kei pawhin tâwp lovin ka hmangaih reng ang che tih ka tiam e, ka hmangaihna che hi nitin a zual deuh deuh a, i lei taksa te chu vaivutah kîrin ral mahsela min hmangaihna a reh dawn lo tih ka hria asin, a chhan chu ka hmangaih che ang bawk a min hmangaih avângin..."






 "Ka duhtak, Minung ram a kîr leh tawh ngai lo tûrin ka thlarau te chu an in buatsaih a, chumi avâng erawh chuan itân ka awm tawh ngai dawn lo tihna a ni lova, kei chuan kumkhua ai pawh a rei zâwk chatuan thleng pawhin ka hmangaih reng ang che, a chhan chu ka hmangaih ber inih tlat vângin..." tiin chu thlân chhûng aṭang chuan âw chuan a rawn chhâng leh a...